¹ՊԱՒՂՈՍ ԿԱՊԵԱԼ յիսուսի ք(րիստո)սի, եւ տիմոթէոս եղբայր. փիլեմովնի սիրելւոյ՝ եւ գործակցի́ մերոյ,
²եւ ապփեա́յ քեռ, եւ արքիպպեա́յ զինուորակցի́ մերոյ, եւ առանին եկեղեցւոյդ.
³Շնո́րհք ընդ ձեզ եւ խաղաղութի(ւն) յա(ստուածո)յ հօրէ մերմէ՝ եւ ՛ի տ(եառ)նէ յ(իսու)սէ ք(րիստո)սէ։
⁴Գոհանա́մ զա(ստուածո)յ իմոյ յամ(ենայն) ժամ, յիշատակեալ յաղօ́թս իմ վասն քո,
⁵իբրեւ լսեմ զքո հաւատսն եւ զսէր, զոր ունիս առ տ(է)ր յ(իսու)ս՝ եւ առ ամենայն սուրբս։
⁶զի հաղորդու(թ)ի(ւն) հաւատոցն քոց՝ արգո́յ լինիցի, գիտու(թեամ)բ ամենայն բարութե(ան), որ ՛ի ձե́զ է ՛ի ք(րիստո)ս յ(իսու)ս։

⁷Խնդութի(ւն) յո́յժ ընկալայ, եւ մխիթարութի(ւն) ՛ի վերայ սիրոյն քոյ. զի գո́ւթք սրբոց՝ քե́ւ հանգուցեալ են ե́ղբայր։
⁸Վասն որոյ բազում համարձակութի(ւն) ունիմ ՛ի ք(րիստո)ս, հրաման տա́լ քեզ զարժանն
⁹վ(ա)ս(ն) սիրոյ։ մանաւանդ թէ աղաչե́մ իսկ այնպիսի լինել՝ ո(ր)պ(էս) եւ պաւղոս ծերացեալ, արդ՝ եւ կապեա́լ եւս յ(իսու)սի ք(րիստո)սի։
¹⁰Աղաչեմ զքեզ վասն որդւոյ իմոյ՝ զոր ծնա́յ ՛ի կապանս իմ, զոնեսիմոս.
¹¹որ երբեմն անպիտա́ն էր քեզ. բայց արդ՝ քեզ եւ ինձ պիտանի́.
¹²զոր յղեցի առ քեզ։ եւ դու՝ զդա́ ընկալջիր, այսինքն է՝ զի́մ աղիս։
¹³Զոր կամէի առ իս արգելուլ, զի ընդ քո́ ունիցի ինձ սպաս ՛ի կապանս աւետարանին։

¹⁴բայց առանց քո կամաց ո́չինչ կամեցայ առնել, զի մի́ բարիքդ քո ՛ի հարկէ լինիցին, այլ կամաւ.
¹⁵Եւ թերեւս վ(ա)ս(ն) այնորիկ մեկնեցաւ առ ժամանակ մի, զի յաւիտեա́ն ունիցիս զդա.
¹⁶մի́ եւս իբրեւ զծառայ, այլ ՛ի վե́ր քան զծառայ, իբրեւ զեղբա́յր սիրելի,. եթէ ինձ այսպէս, որչափ եւս առաւել քե́զ մարմնով՝ եւ տ(թեամ)բ։
¹⁷Եթէ զիս քեզ հաղորդ համարիցիս, ընկա́լ զդա իբրեւ զիս։
¹⁸եւ եթէ յանցեալ ինչ իցէ՝ կամ պարտիցի, զայն ի́նձ համարեա́ց։
¹⁹Ես պաւղոս գրեցի́ իմով ձեռամբ. եւ հատուցից, զի մի́ ասիցեմ քեզ՝ թէ դու զանձն քո ինձ պարտիս։
²⁰այո́ ե́ղբայր՝ ե́ս քո փոխանակ եղէց ՛ի տ(է)ր. հանգո́ զաղիսդ իմ ՛ի ք(րիստո)ս։

²¹Յուսացեալ ՛ի հնազանդութի(ւն)դ քո գրեցի́ առ քեզ. քանզի գիտեմ թէ առաւե́լ եւս քան զոր ասեմդ՝ առնիցես։
²²Միանգամայն եւ պատրաստեսջի́ր ինձ վա́նս. քանզի յուսամ թէ աղօթի́ւք ձերովք շնորհեցայց ձեզ։
²³Ողջո́յն տայ ձեզ եպափրաս գերեկի́ց իմ ՛ի ք(րիստո)ս յ(իսու)ս. եւ մարկոս, եւ արիստարքոս, եւ դեմաս, եւ ղուկաս՝ գործակի́ցք իմ։
²⁴Շնո́րհք տ(եառ)ն յ(իսու)սի ընդ ոգւոյդ ձերում։