¹ՅՈՒԴԱ ՅԻՍՈՒՍԻ ՔՐԻՍՏՈՍԻ ծառա́յ եւ եղբայր յակոբայ. հեթանոսաց որ յա(ստուածո)յ հօրէ էք սիրեցեալք, եւ յ(իսու)սի ք(րիստո)սի պահեալք եւ ընտրեալք։
²ողորմութի(ւն) ձեզ՝ խաղաղութի(ւն) եւ սէր բազմասցի։
³Սի́րելիք՝ զամ(ենայն) փոյթ յանձին կալեալ գրե́լ ձեզ՝ վ(ա)ս(ն) մերոյ հասարակաց փրկութե(ա)ն, հա́րկ յանձին կալայ գրե́լ ձեզ, եւ աղաչել զի ճգնիցի́ք ՛ի վերայ հաւատոցն որ միանգամ աւանդեցա́ւն սրբոց։
⁴Քանզի սպրդեցին մտին ոմանք, որ յառաջագոյն իսկ կատարեալ էին ՛ի սո́յն դատաստան. ամպարիշտք, որ զա(ստուածո)յ մերոյ շնորհսն դարձուցին յանկարգութի(ւն). եւ զմի միայն զիշխանն՝ եւ զտ(է)ր մեր յ(իսու)ս ք(րիստո)ս ուրացեա́լք։

⁵Յիշեցուցանե́լ ձեզ այսուհետեւ կա́մ է ինձ՝ որ գիտէքդ զամ(ենայն)։ զի ա(ստուա)ծ միանգամ ժողովուրդն փրկեա́ց յեգիպտոսէ. երկրորդ անգամ զանհաւատսն կորո́յս։
⁶Եւ զհրեշտակս որ ո́չ պահեցին զիւրեանց իշխանութի(ւ)ն, այլ թողին զիւրեանց բնակու(թ)ի(ւ)ն, ՛ի դատաստանս մեծի աւուրն՝ մշտնջենաւո́ր կապանօք պահեաց ՛ի խաւարի։
⁷Ո(ր)պ(էս) սոդոմն եւ գոմոր, եւ որ շուրջ զնոքօք քաղաքքն, որ ը(նդ) նմին օրինակի պոռնկեցան զհե́տ ընկերացն մարմնոց, կան առաջի օրինակ՝ զյաւիտենական հրոյ ընկալեալ զդատաստան։
⁸Ըստ նմին օրինակի եւ սոքա իբրեւ քնո́վ դանդաշեալք՝ զմարմինն պղծե́ն, զտէրու(թ)ի(ւն)ս քամահե́ն, զփառսն հայհոյեն։

⁹Ուր միքայէլ հրեշտակապետն յորժամ բանսարկուն սատանայի վիճեա́լ տայր պատասխանի վասն մովսիսեանն մարմնոյ, ո́չ ժպրհեցաւ հայհոյու(թ)ե(ան)ն դատաստանի հանդուրժել. այլ ասէ՝ սաստեսցէ́ ՛ի քեզ տ(է)ր։
¹⁰Իսկ սոքա զոր ինչ ո́չն իմանան՝ հայհոյե́ն։ եւ զայլսն եւս զոր բնու(թեամ)բ իբրեւ զանխօս անասուն գիտեն, ՛ի նոսին ապականեսցին։
¹¹Վա́յ է ն(ո)ց(ա), զի ըստ ճանապարհին կայենի գնացին, եւ ըստ մոլորու(թ)ե(ան)ն բաղամայ զեղխեցա́ն զհետ վարձուց, եւ ըստ հակառակու(թ)ե(ան)ն կորխայ կորեան։

¹²Սոքա են ատեցեա́լք, շոգմո́գք, երթեա́լ զհետ ցանկու(թ)ե(ան)ց իւրեանց. ՛ի սէրս իւրեանց՝ խաղդախու(թեամ)բ, լինին ը(նդ) ձեզ ուրախակիցք. աներկեւղ զանձինս ճարակեն։ Ամպք անջրդիք, հողմակոծեա́լք, ծառք պտղակորո́յսք, անպտո́ւղք, կրկնամեռք, խլեա́լք արմատաքի։
¹³անսա́ստ ալիք ծովու, որ միշտ փրփրե́ն զիւրեանց անձանցն զամօթ, աստե́ղք մոլարք, որոց վի́հ խաւարին յաւիտենից պահեալ է։
¹⁴Մարգարէացա́ւ վ(ա)ս(ն) ն(ո)ց(ա) եւ եւթներո́րդն յադամայ ենովք՝ եւ ասէ։ ահաւասիկ եկն տ(է)ր բիւրովք սրբովք հրեշտակօք,

¹⁵առնել դատաստա́ն ըստ ամ(ենայն)ի, եւ յանդիմանե́լ զամ(ենայն) ամպարիշտս վ(ա)ս(ն) գործոց իւրեանց՝ զոր ամպարշտեցին. եւ վ(ա)ս(ն) ամ(ենայն) խիստ բանից, զոր խօսեցան զնմանէ մեղաւորք եւ ամպարիշտք։
¹⁶Սոքա են տրտնջօ́ղք եւ շոգմո́գք, երթեա́լ ըստ իւրեանց անձանց ցանկու(թ)ե(ան)ց. եւ բերանք նոցա զամբարտաւա́նս բարբառին. առնուն ա́կն երեսաց վասն օգտի։
¹⁷Բայց դուք սի́րելիք՝ յիշեցէ́ք զկանխասաց բանս զառաքելոցն տ(եառ)ն մերոյ յ(իսու)սի ք(րիստո)սի.
¹⁸զի ասէին ձեզ, եթէ ՛ի յետին ժամանակս եղիցին մարդք արհամարհօ́ղք երթեա́լք ըստ իւրեանց ամպարշտու(թ)ե(ան)ցն ցանկու(թ)ե(ան)ց։
¹⁹սոքա են նշաւակեալք շնչաւո́րք, որ զորդին ո́չ ունիցին։

²⁰Այլ մեք սի́րելիք՝ եղիցուք շինել զանձինս սրբու(թեամ)բն հաւատոց ՛ի հոգին ս(ուր)բ. կացցո́ւք յաղօթս,
²¹պահել զանձինս սիրովն ա(ստուածո)յ. ա́կն ունել ողորմու(թ)ե(ան)ն տ(եառ)ն մերոյ յ(իսու)սի ք(րիստո)սի ՛ի կեանսն յաւիտենական։
²²Եւ ոմանց դատապարտելոց լինիջի́ք կշտամբի́չք,
²³եւ զոմանս ապրեցուցանիջի́ք՝ յափշտակեալ ՛ի հրոյ. եւ ոմանց ողորմեսջի́ք երկիւղիւ դատել, եւ զպատմուճանն որ ՛ի մարմնոյն իցէ աղտեղեալ։
²⁴Եւ այնմ որ կարօղն իցէ պահել զձեզ անարատս եւ անբիծս, հաստատեալ առաջի իւրոց փառաց աներկեւա́նն ցնծու(թեամ)բ

²⁵միոյն ա(ստուածո)յ եւ փրկչին մերոյ յ(իսու)սի ք(րիստո)սի տ(եառ)ն մերոյ՝ փա́ռք, մեծու(թ)ի(ւն), զօրու(թ)ի(ւն), եւ իշխանու(թ)ի(ւն)՝ յառա́ջ քան զամ(ենայն) յաւիտեանս, եւ այժմ եւ յամենա́յն յաւիտեանս. ա́մէն։