¹ԵՒ Ա́ՅՍ ԵՆ ԲԱՆՔ ԹՂԹՈՅՆ զոր գրեա́ց բարուք որդի ներեայ որդւոյ մաասայ որդւոյ սեդեկիայ որդւոյ ասադայ, որդւոյ քեղկեայ ՛ի բաբելովն։
²Յամին հինգերորդի՝ որ օր եւթն էր ամսոյն, ՛ի ժամանակի յորում առին քաղդէացիքն զե(րուսաղէ)մ, եւ այրեցին զնա հրով։
³Եւ ընթերցա́ւ բարուք զբանս թղթոյս այսորիկ յականջս յեքոնիայ որդւոյ յովակիմայ արքայի յուդայ, եւ յականջս ա(մենայ)ն ժողովրդեանն որ գային ՛ի մատեանն։
⁴եւ յականջս զօրացն, եւ որդւոց թագաւորացն. եւ յականջս ծերոցն. եւ յականջս ա(մենայ)ն ժողովրդեանն, ՛ի փոքուէ մինչեւ ցմեծամեծս. ամենեցուն որ բնակեալէին ՛ի բաբելովն, առ սո́ւդ գետով։

⁵եւ լային եւ պահէին, եւ կային յաղօթս առաջի տ(եառ)ն։
⁶Եւ ժողովեցին արծաթ ըստ իւրաքանչիւր կարի։
⁷եւ առաքեցին յե(րուսաղէ)մ առ յովակիմ որդի քեղկեայ՝ որդւոյ սաղովմայ առ քահանայ. եւ առ ա́յլ քահանայս գտեալս ընդ նմա յե(րուսաղէ)մ։
⁸Յառնուլ ն(ո)ր(ա) զսպաս տանն տ(եառ)ն որ ել ՛ի տաճարէն՝ դարձուցանել յերկիրն յուդայ, ՛ի տասներորդում սիւան ամսոյ զսպասն արծաթեղէնս՝ զոր արա́ր սեդեկիա որդի յովսիայ արքայի յուդայ.
⁹յետ գերելոյ նաբուքոդոնոսորայ արքայի բաբելացւոց՝ զյեքոնիա եւ զիմխանսն՝ եւ զկալանաւորակապսն՝ եւ զզօրաւորսն՝ եւ զժողովուրդ երկրին՝ յե(րուսաղէ)մ. եւ տարաւ զն(ո)ս(ա) ՛ի բաբելոն։

¹⁰Եւ ասեն, ահաւասիկ առաքեցաք առ ձեզ արծաթ. եւ գնեցէ́ք արծաթոյդ ողջակէզս՝ եւ զվ(ա)ս(ն) մեղացն, եւ կնդրուկ՝ եւ արարէ́ք մաննա. եւ հանէ́ք ՛ի սեղանն տ(եառ)ն ա(ստուծո)յ մերոյ։
¹¹Եւ աղօթս արարէ́ք ՛ի վ(ե)ր(այ) կենաց նաբուքոդոնոսորայ արքայի բաբելացւոց, եւ ՛ի վ(ե)ր(այ) կենաց բաղտասարայ որդւոյ ն(ո)ր(ա). զի եղիցին աւուրք ն(ո)ց(ա) իբրեւ զաւուրս երկնից ՛ի վ(ե)ր(այ) երկրի։
¹²Եւ տացէ մեզ տ(է)ր զօրութի(ւն), եւ լուսաւո́ր արասցէ զաչս մեր. եւ կեցցուք ընդ հովանեաւ նաբուքոդոնոսորայ արքային բաբելացւոց, եւ ընդ հովանեաւ բաղտասարայ որդւոյ ն(ո)ր(ա). եւ ծառայեսցո́ւք ն(ո)ց(ա) աւուրս բազումս, եւ յոցուք շնորհս առաջի ն(ո)ց(ա)։

¹³Աղօ́թս արարէք եւ ՛ի վերայ մեր առ տ(է)ր ա(ստուա)ծ մեր. զի մեղաք տ(եառ)ն ա(ստուծո)յ մերում, եւ ո́չ դարձաւ սրտմտութի(ւն) տ(եառ)ն եւ բարկութի(ւն) ն(ո)ր(ա) ՛ի մէնջ մինչեւ ցա́յսօր։
¹⁴Եւ ընթերցջի́ք զթուղթդ զայդ զոր առաքեցաք առ ձեզ, դնե́լ ՛ի տունդ տ(եառ)ն՝ յաւուրս տօնի, եւ յաւուրս ժամանակի։
¹⁵Եւ ասասջի́ք, տ(եառ)ն ա(ստուծո)յ մերոյ արդարու(թ)ի(ւն) է, եւ մեր՝ ամօթ երեսաց, ո(ր)պ(էս) յաւուրս յայսմիկ ա́ռն յուդայ՝ եւ բնակչաց ե(րուսաղէ)մի։
¹⁶եւ թագաւորաց մերոց, եւ իշխանաց մերոց, եւ քահանայից մերոց, եւ մարգարէից մերոց, եւ հարց մերոց առաջի տ(եառ)ն։

¹⁷զի անհնազանդ եղաք նմա, եւ ո́չ լուաք ձայնի տ(եառ)ն ա(ստուծո)յ մերոյ գնա́լ ըստ հրամանաց տ(եառ)ն՝ զոր ե́դ առաջի մեր։
¹⁸յօրէ յորմէ եհան տ(է)ր զհարսն մեր յերկրէն եգիպտացւոց մինչեւ ցայսօր էաք անհնազանդք տ(եառ)ն ա(ստուծո)յ մերոյ, եւ խուսափեալք չլսել ձայնի ն(ո)ր(ա)։
¹⁹Եւ պատեցան զմեւք չարիքն, եւ նզո́վք զոր կարգեաց տ(է)ր ՛ի ձեռն մովսիսի ծառայի իւրոյ, յաւուր յորում եհան զհարսն մեր յերկրէն եգիպտացւոց՝ տա́լ մեզ զերկիրդ որ բղխէ զկաթն եւ զմեղր՝ ո(ր)պ(էս) եւ այսօր։
²⁰Եւ ո́չ լուաք ձայնի տ(եառ)ն ա(ստուծո)յ մերոյ ըստ ա(մենայ)ն բանից մարգարէիցն զոր առաքեաց առ մեզ։

²¹եւ գնացաք իւրաքանչիւր ըստ մտաց սրտի իւրոյ չարի, հարկել աստուածոց օտարաց, առնել չար առաջի տ(եառ)ն ա(ստուծո)յ մերոյ։

¹Եւ կացոյց տ(է)ր զբանս իւր զոր խօսեցաւ ՛ի վ(ե)ր(այ) մեր, եւ ՛ի վ(ե)ր(այ) դատաւորաց մերոց որ դատէին զի(սրայ)էլ, եւ ՛ի վ(ե)ր(այ) թագաւորաց մերոց, եւ ՛ի վ(ե)ր(այ) իշխանաց մերոց, եւ ՛ի վ(ե)ր(այ) ա́ռն ի(սրայէ)լի եւ յուդայ։
²ածել ՛ի վ(ե)ր(այ) մեր չարիս մեծամեծս, որ ո́չ երբէք գործեցան ՛ի ներքոյ ա(մենայ)ն երկնից, ո(ր)պ(էս) արարա́ւ ի(սրայէ)լի՝ ըստ գրելոցն յօրէնսն մովսիսի։
³ուտել մեզ զմարմին որդւոց մերոց, եւ ա́ռն զմարմին դստեր իւրոյ։
⁴Եւ մատնեաց զմեզ ՛ի ստրկու(թ)ի(ւն) ա(մենայ)ն թագաւորաց որ շուրջ զմեւք էին. ՛ի նախատինս եւ յանապատ ՛ի մէջ ա(մենայ)ն ժողովրդոց շուրջանակի՝ ուր ցրուեաց զմեզ տ(է)ր անդր։

⁵եւ եղաք ՛ի վայր՝ եւ ո́չ ՛ի վեր. զի մեղաք տ(եառ)ն ա(ստուծո)յ մերոյ առ ՛ի չլսելոյ ձայնի ն(ո)ր(ա)։
⁶Տ(եառ)ն ա(ստուծո)յ մերոյ արդարու(թ)ի(ւն). եւ մեր՝ եւ հարցն մերոց ամօ́թ երեսաց, ո(ր)պ(էս) եւ յաւուրս յայսմիկ։
⁷զոր խօսեցաւ տ(է)ր ՛ի վ(ե)ր(այ) մեր զա(մենայ)ն չարիսս զայսոսիկ որ եկին ՛ի վ(ե)ր(այ) մեր։
⁸Եւ ո́չ աղաչեցաք զերեսս տ(եառ)ն, դառնալ իւրաքանչիւր ՛ի խորհրդոց սրտի իւրոյ չարի։
⁹եւ զարթեա́ւ տ(է)ր ՛ի վ(ե)ր(այ) չարեացն, զորս զարթոյց տ(է)ր ՛ի վ(ե)ր(այ) մեր. զի արդար է տ(է)ր յա(մենայ)ն ՛ի գործս իւր՝ զոր պատուիրեաց մեզ։

¹⁰եւ ո́չ լուաք ձայնի ն(ո)ր(ա) երթալ զհետ հրամանաց տ(եառ)ն զոր ետ առաջի մեր։
¹¹Եւ արդ տ(է)ր ա(ստուա)ծ ի(սրայէ)լի. որ հաներ զժողովուրդ քո յերկրէն եգիպտացւոց, հզօր ձեռամբ՝ նշանօք եւ արուեստիւք՝ եւ մեծամեծ զօրութ(եամ)բք՝ եւ բարձր բազկաւ, եւ արարեր քեզ անուն ո(ր)պ(էս) յաւուր յայսմիկ։
¹²Մեղա́ք ամպարշտեցա́ք՝ անիրաւեցաք տ(է)ր ա(ստուա)ծ մեր յա(մենայ)ն իրաւունս քո։
¹³դարձցի սրտմտութի(ւն) քո ՛ի մէնջ. զի մնացաք նուազք ՛ի մէջ հեթանոսաց՝ ուր ցրուեցեր զմեզ անդր։
¹⁴Լուր տ(է)ր աղօթից մերոց, եւ խնդրուածոց մերոց, եւ փրկեա́ զմեզ վ(ա)ս(ն) անուան քոյ. եւ տո́ւր մեզ շնորհս առաջի գերչաց մերոց։

¹⁵զի ծանիցէ ա(մենայ)ն երկիր՝ թէ դո́ւ ես տ(է)ր ա(ստուա)ծ մեր. զի անուն քո կոչեցաւ ՛ի վ(ե)ր(այ) ի(սրայէ)լի, եւ ՛ի վ(ե)ր(այ) ազգի ն(ո)ր(ա)։
¹⁶Տ(է)ր՝ նայեա́ց ՛ի տաճարէ սրբոյ քումմէ, եւ խորհեա́ց զմեզ. խոնարհեցո́ տ՝ր զունկն քո՝ եւ լո́ւր.
¹⁷բա́ց զաչս քո՝ եւ տե́ս. զի ո́չ եթէ մեռեալք ՛ի դժոխս որոց առան ոգիք ՛ի միջոյ ն(ո)ց(ա), տացեն փառաւորութի(ւն) եւ իրաւունս տ(եառ)ն։
¹⁸այլ անձինք տրտմեալք յանհնարին տրտմու(թ)ի(ւն)ս, որ գնան կորացեալք՝ եւ հիւանդացեալք, եւ աչք առկայծեալք՝ եւ անձինք քաղցեալք՝ տացեն քեզ փառս եւ արդարու(թ)ի(ւն)։
¹⁹Տ(է)ր՝ ո́չ եթէ առ իրաւանց հարցն մերոց եւ թագաւորաց մերոց արկանեմք գութս առաջի քո տ(է)ր ա(ստուա)ծ մեր։

²⁰զի ածեր զսրտմտութի(ւն) քո եւ զբարկու(թ)ի(ւն) քո ՛ի վ(ե)ր(այ) մեր, ո(ր)պ(էս) եւ խօսեցար ՛ի ձեռն ծառայից քոց մարգարէից. եթէ
²¹ա́յսպէս ասէ տ(է)ր, խոնարհեցուցէ́ք զպարանոցս ձեր, եւ հարկեցարո́ւր արքային բաբելացւոց. եւ նստարո́ւք յերկրին զոր ետու հարցն ձերոց։
²²եւ եթէ ոչ լուիցէք ձայնի տ(եառ)ն հարկել արքային բաբելացւոց, պակա́ս արարից ՛ի քաղաքացդ յուդայ եւ արտաքոյ ե(րուսաղէ)մի՝
²³զձայն ուրախութե(ան), եւ զձայն ցնծու(թ)ե(ան), զձայն փեսայի եւ զձայն հարսին. եւ եղիցի ա(մենայ)ն երկիրդ յանապատ ՛ի բնակչաց։

²⁴Եւ ո́չ լուաք ձայնի քում հարկել արքային բաբելացւոց։ եւ կացուցեր զբանս քո զոր խօսեցար ՛ի ձեռն ծառայիցն քոց մարգարէից, հանել զոսկերս թագաւորացն մերոց, եւ զոսկերս հարց մերոց ՛ի տեղւոջէ իւրեանց։
²⁵Եւ ահա անկեա́լ կան ՛ի տօթի տունջեան, եւ ՛ի ցուրտ գիշերոյ. եւ մեռան ՛ի ցաւս չարաչարս՝ ՛ի սով եւ ՛ի սուր եւ ՛ի գերութի(ւն)։
²⁶եւ արարեր զտաճարն քո յորոյ վ(ե)ր(այ) կոչեցաւ անուն քո, ո(ր)պ(էս) յաւուրս յայսմիկ՝ վ(ա)ս(ն) չարու(թ)ե(ան) տանն ի(սրայէ)լի եւ տանն յուդայ։
²⁷Եւ արարեր ընդ մեզ տ(է)ր ա(ստուա)ծ մեր ըստ ա(մենայ)ն հեզութե(ան) քում, եւ ըստ ա(մենայ)նի մեծի գթու(թ)ե(ան) քոյ։

²⁸ո(ր)պ(էս) խօսեցար ՛ի ձեռն ծառայի քոյ մովսիսի, յաւուր պատուիրելոյ քոյ նմա գրե́լ զօրէնս քո առաջի որդւոցն ի(սրայէ)լի։
²⁹եւ ասել՝ եթէ ոչ լուիցէք ձայնի իմում. եթէ ոչ շըռինդդ մեծ եւ յոյժ դարձցի ՛ի փոքրկութի(ւն) ՛ի մէջ ազգաց ուր ցրուեցից զձեզ անդր։
³⁰զի գիտեմ եթէ ո́չ լսիցեն ինձ, զի ժողովուրդ խստապարանո́ց է. եւ դարձուցանեն զսիրտս իւրեանց յերկրին պանդխտու(թ)ե(ան) իւրեանց։
³¹Եւ ծանիցեն՝ թէ ե́ս եմ տ(է)ր ա(ստուա)ծ ն(ո)ց(ա). եւ տաց ն(ո)ց(ա) սիրտ՝ եւ ականջս լսելոյ։
³²եւ օրհնեսցեն զիս յերկրին գերութե(ան) իւրեանց. եւ յիշեսցեն զանուն իմ։

³³եւ դարձցին ՛ի խստութ(են)է պարանոցի իւրեանց, եւ յիրաց չարեաց իւրեանց. զի յիշեսցեն զճանապարհս հարց իւրեանց մեղուցելոց առաջի իմ։
³⁴Եւ դարձուցից զն(ո)ս(ա) յերկիրն զոր երդուայ տա́լ հարցն ն(ո)ց(ա) աբրահամու եւ սահակայ եւ յակոբայ, եւ տիրեսցեն նմա. եւ բազմացուցից զն(ո)ս(ա), եւ ո́չ նուազեսցին։
³⁵եւ հաստատեցից ն(ո)ց(ա) ո́ւխտ յաւիտենական լինել ինձ ն(ո)ց(ա) յա(ստուա)ծ, եւ նոքա եղիցին ինձ ՛ի ժողովուրդ։ եւ ո́չ եւս խախտեցից զժողովուրդ իմ զի(սրայ)էլ յերկրէն զոր ետու ն(ո)ց(ա)։

¹Տ(է)ր ամենակալ՝ ա(ստուա)ծ ի(սրայէ)լի, անձինք նեղեալք՝ եւ հոգիք ձանձրացեալք աղաղակեն առ քեզ։
²Լո́ւր տ(է)ր եւ ողորմեա́ց, զի ա(ստուա)ծ ողորմած ես. եւ ողորմեա́ց՝ զի մեղաք առաջի քո։
³զի դու բնակեալես յաւիտեան, եւ մեք կորստակա́նք յաւիտեան։
⁴Տ(է)ր ամենակալ՝ ա(ստուա)ծ ի(սրայէ)լի, լո́ւր աղօթից մեռելոցն ի(սրայէ)լի, եւ որդւոցն մեղուցելոց առաջի քո. որք ո́չ լուան ձայնի տ(եառ)ն ա(ստուծո)յ իւրեանց. եւ պատեցին զմեզ չարիք։
⁵Մի́ յիշեր զանիրաւութի(ւն)ս հարցն մերոց, այլ յիշեա́ զձեռն քո, եւ զանուն քո ՛ի ժամանակի յայսմիկ։
⁶զի դո́ւ տ(է)ր ա(ստուա)ծ մեր. եւ օրհնեսցուք զքեզ տ(է)ր։

⁷Զի վ(ա)ս(ն) այսորիկ ետուր զերկեւղ քո ՛ի սիրտս մեր կարդա́լ զանուն քո. եւ օրհնեսցո́ւք զքեզ ՛ի գերութե(ան)ս մերում. զի դարձուցաք ՛ի սիրտս մեր զա(մենայ)ն անիրաւութի(ւն)ս հարցն մերոց մեղուցելոց առաջի քո։
⁸Ահաւասիկ մեք այսօր ՛ի գերու(թ)ե(ան) մերում. ուր ցրուեցեր զմեզ այսր ՛ի նախատինս՝ եւ ՛ի նզովս՝ եւ ՛ի պարտիսս ըստ ա(մենայ)ն անօրէնութե(ան)ց հարց մերոց՝ որ ապստամբեցին ՛ի տ(եառն)է ա(ստուծո)յ մերմէ։
⁹Լո́ւր ի(սրայ)էլ զպատուէրս կենաց. ո́ւնկնդիք ճանաչել զիմաստու(թ)ի(ւն)։
¹⁰զի́նչ է (թ)ի(ւն)էլ. զի՞ է զի յերկիրդ թշնամեաց ես։
¹¹հնացար յերկրի օտարութե(ան), խառնակեցար ընդ դիակունս. համարեցար ընդ իջեալս ՛ի դժոխս։
¹²թողե́ր զերկիրն իմաստութե(ան)։

¹³եթէ ՛ի ճանապարհն ա(ստուծո)յ գնացեալէիր, բնակեալ էիր խաղաղութ(եամ)բ յաւիտեանս ժամանակաց։
¹⁴Ուսի́ր՝ ո՞ւր է իմաստու(թ)ի(ւն), ո՞ւր է զօրու(թ)ի(ւն), ո՞ւր է հանճար, ճանաչել միանգամայն՝ թէ ո՞ր են կեանք երկայնակեացք. ո՞ւր է լոյս աչաց եւ խաղաղու(թ)ի(ւն)։
¹⁵ո՞ եգիտ զտեղի ն(ո)ր(ա), եւ ո՞ եմուտ ՛ի գանձս ն(ո)ր(ա)։
¹⁶Ո՞ւր են իշխանք հեթանոսաց՝ եւ որ տիրէին գազանաց երկրի։
¹⁷որ ընդ թռչունս երկնից ճախրէին.
¹⁸եւ գանձէին արծաթ եւ ոսկի՝ յոր յուսացան մարդիկ. եւ ո́չ գոյր բաւ ստացուածոց ն(ո)ց(ա). եւ որք գործեն զարծաթն եւ զոսկին, եւ հոգան. եւ ո́չ գոն հանգամանք գործոց ն(ո)ց(ա)։

¹⁹ապականեցան եւ ՛ի դժոխս իջին. եւ ա́յլք փոխանակ ն(ո)ց(ա) կանգնեցան։
²⁰Երիտասարդք տեսին լո́յս, եւ բնակեցին յերկրի. եւ զճանապարհս իմաստութե(ան) ո́չ ծանեան։
²¹եւ ո́չ ՛ի միտ առին զշաւիղս ն(ո)ր(ա), եւ ո́չ կացին ՛ի վ(ե)ր(այ) ն(ո)ր(ա). որդիք ն(ո)ց(ա) ՛ի ճանապարհէ ն(ո)ր(ա) հեռի́ եղեն։
²²Ո́չ լու եղեւ ՛ի քանան, եւ ո́չ երեւեցաւ ՛ի թեման։
²³եւ ո́չ որդիքն հագարու խնդրեն զիմաստու(թ)ի(ւն)։ վաճառականք մերանայ եւ թեմանայ. եւ առասպելախօսք՝ եւ քննիչք իմաստութե(ան) զճանապարհն իմաստութե(ան) ո́չ ծանեան, եւ ո́չ յուշ եղեն ն(ո)ց(ա) շաւիղք ն(ո)ր(ա)։

²⁴Ո́վ ի(սրայ)էլ՝ ո(ր)պ(էս) զի մեծ է տունն ա(ստուծո)յ, եւ ընդարձակ է տեղի ստացուածոց նորա։
²⁵մեծ է՝ եւ ո́չ գոյ բաւ. բա́րձր եւ անչափ։
²⁶Ա́նդ ծնան սկայքն անուանիք, իսկզբանէ եղեալք մեծամեծք, հմո́ւտք պատերազմաց։
²⁷ո́չ եթէ զն(ո)ս(ա) ընտրեաց ա(ստուա)ծ, եւ ո́չ զճանապարհ իմաստութե(ան) ետ ն(ո)ց(ա)։
²⁸եւ կորեան առ ՛ի չգոյէ իմաստու(թ)ե(ան), եւ սատակեցան վ(ա)ս(ն) անմտութե(ան) իւրեանց։
²⁹Ո՞ ել յերկինս եւ ա́ռ զնա՝ եւ իջոյց զնա յամպոց։
³⁰ո́ անց յայնկոյս ծովու՝ եւ եգիտ զնա, եւ բերիցէ զնա ընդ ընտիրս ոսկւոյ։
³¹չի́ք որ գիտէ զճանապարհս ն(ո)ր(ա), եւ ո́չ որ զմտա́ւ ածիցէ զշաւիղս ն(ո)ր(ա)։

³²Այլ որ գիտէն զա(մենայ)ն՝ նա́ ճանաչէ զնա, եգիտ զնա իմաստու(թեամ)բ իւրով. եւ որ կազմեաց զերկիր յաւիտեանս ժամանակաց, ելի́ց զսա անասնօք եւ չորքոտանեօք։
³³Որ առաքէ զլոյս՝ եւ գնայ. կոչեաց զնա՝ եւ նա լուա́ւ նմա գողու(թեամ)բ։
³⁴եւ աստեղք ծագեցին յիւրաքանչիւր պահպանութե(ան)՝ եւ ուրա́խ եղեն։
³⁵կոչեաց զն(ո)ս(ա)՝ եւ ասեն, ահա́ւասիկ կամք. ծագեցին ուրախութ(եամ)բ արարչի իւրեանց։
³⁶Սա́ է Ա(ստուա)ծ մեր՝ ընդ որում ո́չ համարեսցի այլ։
³⁷եգիտ զա(մենայ)ն ճանապարհս իմաստութե(ան). եւ ետ զնա յակոբու ծառայի իւրում, եւ ի(սրայէ)լի սիրեցելոյ ՛ի նմանէ։
³⁸Յետ այսորիկ յերկրի երեւեցաւ՝ եւ ընդ մարդկան շրջեցաւ։

¹Ա́յս են գիրք հրամանաց ա(ստուծո)յ, եւ օրէնք որ կան յաւիտեան։ Ամենեքին որ ընդունին զնա կեա́ն, եւ որք թողուն զնա մեռցի́ն։
²Դա́րձ յակովբ՝ եւ բո́ւռն հար զնմանէ, ընդ ծագումն առաջի լուսոյ ն(ո)ր(ա)։
³մի́ տար այլում զփառս քո, եւ մի́ զօգուտ ազգի օտարոտւոյ։
⁴Երանի́ է մեզ ի(սրայ)էլ, զի հաճոյքն ա(ստուծո)յ ծանօթք մե́ր են։
⁵Քաջալերեա́ց ժողովուրդ իմ. յիշեա́ ի(սրայ)էլ։
⁶զի վաճառեցարուք յազգս՝ եւ ո́չ ՛ի կորուստ. փոխանակ զի բարկացուցէք դուք զա(ստուա)ծ՝ մատնեցայք հակառակորդաց։
⁷քանզի զայրացուցէք զարարիչ ձեր. զոհեցէք դիւաց՝ եւ ո́չ ա(ստուծո)յ։

⁸Մոռացարուք զկերակրիչն ձեր զա(ստուա)ծ յաւիտեան. տրտմեցուցէք եւ զդայեակն ձեր զե(րուսաղէ)մ։
⁹զի ետես զեկեալ ՛ի վերայ ձեր զբարկութի(ւն) յա(ստուծո)յ՝ եւ ասէ։
¹⁰տեսի զգերու(թ)ի(ւն) ուստերաց եւ դստերաց իմոց, զոր ա(ստուա)ծ ՛ի վ(ե)ր(այ) ն(ո)ց(ա) յաւիտենականն։
¹¹սնուցի զն(ո)ս(ա) ուրախու(թեամ)բ, եւ յուղարկեցի զն(ո)ս(ա) լալո́վ եւ սգով։
¹²Մի́ ոք ոտնահա́ր լիցի այրւոյս, որ մնացի միայնացեա́լս ՛ի բազմաց. թափո́ւր եղէ վ(ա)ս(ն) բազում մեղաց որդւոց իմոց. զի խոտորեցան յօրինացն ա(ստուծո)յ,
¹³եւ զիրաւունս ն(ո)ր(ա) ո́չ ծանեան. եւ ո́չ գնացին ՛ի ճանապարհս պատուիրանաց ա(ստուծո)յ, եւ ո́չ ՛ի շաւիղս խրատու արդարու(թ)ե(ան) ն(ո)ր(ա) ելին։

¹⁴Եկեսցեն պանդուխտք սիովնի, եւ յիշեսցեն զգերութի(ւն) ուստերաց եւ դստերաց իմոց զոր ա(ստուա)ծ ՛ի վ(ե)ր(այ) նոցա յաւիտենականն։
¹⁵ած ՛ի վ(ե)ր(այ) ն(ո)ց(ա) ա́զգ հեռաւոր, ազգ լի́րբ եւ այլալեզու.
¹⁶որ ո́չ ակն ածէին ՛ի ծերոյն, եւ ո́չ ողորմէին տղայոյն. տարան զսիրելիս այրւոյս, եւ ՛ի դստերաց թափո́ւր արարին զմնացեալս։
¹⁷եւ ես՝ զի չէի ձեռնհաս օգնել ձեզ։
¹⁸որ ած զչարիսն ՛ի վերայ, փրկեսցէ́ զձեզ ՛ի ձեռաց թշնամեաց ձերոց։
¹⁹Գնացէ́ք որդեակք գնացէ́ք, զի ես մնացի աւերա́կ։
²⁰մերկացայ զպատմուճան խաղաղութե(ան), եւ զգեցայ զքո́ւրձ խնդրուածոց իմոց. աղաղակեցի առ յաւիտենականն յաւուրս իմ։

²¹Քաջալերեցարո́ւք որդեակք. գոչեցէ́ք առ ա(ստուա)ծ եւ փրկեսցէ զձեզ ՛ի բռնու(թեն)է ձեռաց թշնամեաց։
²²զի ես յուսացայ ՛ի յաւիտենականն վասն փրկու(թ)ե(ան) ձերոյ. եւ եկն ինձ ուրախու(թ)ի(ւն) ՛ի սրբոյն ՛ի վ(ե)ր(այ) ողորմութե(ա)ն, որ եկեսցէ ձեզ ընդ հուպ ՛ի յաւիտենականէ փրկչէ́ ձերմէ։
²³զի յուղարկեցի զձեզ սգով եւ լալով՝ եւ տացէ ինձ ա(ստուա)ծ զձեզ ցնծու(թեամ)բ եւ ուրախու(թեամ)բ յաւիտեանս։
²⁴Զի ո(ր)պ(էս) այժմ տեսին պանդուխտքն սիովնի զգերութի(ւն) ձեր. նոյնպէս տեսցեն ընդ հո́ւպ յա(ստուծո)յ զփրկութի(ւն)ն ձեր, որ եկեսցէ ՛ի վ(ե)ր(այ) ձեր փառօք մեծօք՝ եւ լուսաւորութ(եամ)բ ՛ի յաւիտենականէն։

²⁵Ո́րդեակք՝ երկայնամի́տ եղերուք ՛ի վ(ե)ր(այ) բարկութե(ան) հասելոյ ձեզ յա(ստուծո)յ։ հալածեաց զքեզ թշնամին քո, եւ տեսցես զկորուստ ն(ո)ր(ա) ընդ հո́ւպ, եւ ելցես ՛ի վ(ե)ր(այ) պարանոցի նորա։
²⁶Փափկասունք իմ գնացին զճանապարհս խիստ. վարեցան իբրեւ զհօտ յափշտակեալ ՛ի թշնամեաց։
²⁷Քաջալերեցարո́ւք որդեակք՝ եւ գոչեցէ́ք առ ա(ստուա)ծ, զի եղիցի ձեզ յիշատա́կ ՛ի վարչէն։
²⁸զի ո(ր)պ(էս) եղեն ձեր միտք մոլորեալք յա(ստուծո)յ. տասնպատիկ եղերուք դառնա́լ եւ խնդրել զնա։
²⁹զի ո́ր ածն ՛ի վ(ե)ր(այ) ձեր չարիս, ածցէ́ ՛ի վ(ե)ր(այ) ձեր զյաւիտենական ուրախութի(ւն)ն հանդերձ փափկութ(եամ)բն ձերով։

³⁰Քաջալերեա́ց ե(րուսաղ)էմ, մխիթարեսցէ զքեզ որ անուանեաց զքեզ։
³¹եղո́ւկ որ չարչարեացն զքեզ, եւ որ խնդացին ընդ կործանումն քո։
³²Եղո́ւկ են քաղաքքն որոց ծառայեցին մանկունք քո. եւ եղո́ւկ է որ ընկալաւ զորդիսն քո։
³³զի ո(ր)պ(էս) խնդաց նա ՛ի վ(ե)ր(այ) կործանման քոյ, եւ ուրա́խ եղեւ յանկանելն քում. նոյնպէս տրտմեսցի ՛ի վ(ե)ր(այ) աւերածին իւրոյ։
³⁴Եւ բարձի́ց ՛ի նմանէ զուրախու(թ)ի(ւն) բազում խրախճանուեն. եւ դարձուցից ՛ի սո́ւգ զպերճութի(ւն) ն(ո)ր(ա)։
³⁵եկեսցէ ՛ի վ(ե)ր(այ) ն(ո)ր(ա) հո́ւր ՛ի յաւիտենականէն աւո́ւրս բազումս. եւ եղիցի բնակութի(ւն) դիւաց զբազում ժամանակս։

³⁶Հայեա́ց ը(ստ) արեւելս ե(րուսաղ)էմ, եւ տե́ս զեկեալ ուրախութի(ւն)ն քեզ յա(ստուծո)յ։
³⁷ահաւադիկ գա́ն որդիքն քո զորս յուղարկեցեր. գան ժողովեալք յարեւելից մինչեւ ՛ի մուտս արեւու բաի́ւ սրբոյն. խնդացեալք փառօքն ա(ստուծո)յ։

¹Մերկեա́ ե(րուսաղ)էմ զհանդերձ սգոյ եւ լալականաց քոց. եւ զգեցի́ր զվայելչու(թ)ի(ւն) փառացն ա(ստուծո)յ՝ յաւիտեան։
²ա́րկ զքեւ զկրկնոցն արդարութե(ան) յա(ստուծո)յ. դի́ր խոյր ՛ի գլուխ քո զփառաց յաւիտենականին։
³Զի ցուցցէ́ ա(ստուա)ծ ՛ի ներքոյ երկնից զա(մենայ)ն լուսաւորու(թ)ի(ւն)ս քո.
⁴եւ կոչեսցի քեզ անուն յա(ստուծո)յ յաւիտեան՝ խաղաղու(թ)ի(ւն), արդարութի(ւն)՝ եւ փառք ա(ստուա)ծպաշտութե(ան)։
⁵Արի́ ե(րուսաղ)էմ, եւ կա́ց ՛ի վ(ե)ր(այ) բարձու, եւ հայեա́ց ընդ արեւելս, եւ տե́ս ժողովեալ զորդիսն քո յարեւելից մինչեւ յարեւմուտս՝ բանիւ սրբոյն զուարճացեալս յա(ստուծո)յ յիշատակօք։

⁶Զի ելին ՛ի քէն հետեւա́կք՝ վարեալք ՛ի թշնամեաց. եւ ածցէ զն(ո)ս(ա) առ քեզ ա(ստուա)ծ ամբարձեալս փառօք իբրեւ զաթոռ թագաւորու(թ)ե(ան)։
⁷Զի հրաման ետ ա(ստուա)ծ խոնարհել ա(մենայ)ն լերանց բարձանց, եւ բլրոց մշտնջենաւորաց, եւ լնո́ւլ ձորոց ՛ի հարթութի(ւն) երկրի. զի գնասցէ ի(սրայ)էլ զգուշու(թեամ)բ փառացն ա(ստուծո)յ։
⁸եւ հովանի́ լիցին նմա ա(մենայ)ն անտառք. եւ ա(մենայ)ն փայտ անուշու(թ)ե(ան) ի(սրայէ)լի հրամանաւ ա(ստուծո)յ։
⁹Զի առաջնորդեսցէ ա(ստուա)ծ ի(սրայէ)լի ուրախու(թեամ)բ լուսով փառաց իւրոց հանդերձ ողորմութ(եամ)բ եւ արդարութ(եամ)բ ՛ի նմանէ։