¹Յամին երկրորդի դարեհի արքայի. յամսեանն վեցերորդի, որ օր մի էր ամսոյն. Եղեւ բան տ(եառ)ն ՛ի ձեռն Անգէի մարգարէի, եւ ասէ։
²ԽՕՍԵԱ́Ց ԸՆԴ ԶՈՐԱԲԱԲԻԼԻ որդւոյ սաղաթիէլի յազգէ յուդայ, եւ ընդ յեսուայ որդւոյ յովսեդեկեայ քահանայի մեծի՝ եւ ասասցես։
³Ա́յսպէս ասէ տ(է)ր ամենակալ. ժողովուրդդ այդ ասեն. ո́չ է հասեալ ժամանակ շինելոյ զտունն տ(եառ)ն։
⁴Եւ եղեւ բան տ(եառ)ն ՛ի ձեռն անգէի մարգարէի՝ եւ ասէ։
⁵Եթէ ձեզ միայ՞ն իցէ ժամանակ բնակել ՛ի տունս գմբեթայս. եւ տունդ իմ աւե́ր կայ.
⁶եւ արդ՝ ա́յսպէս ասէ տ(է)ր ամենակալ. կարգեցէ́ք զսիրտս ձեր ՛ի ճանապարհս ձեր։

⁷Վարէիք բազում եւ ժողովէիք սակա́ւ. ուտէիք՝ եւ ո́չ յագէիք. ըմպէիք՝ եւ ո́չ լինէր ՛ի յագուրդ. զգենուիք՝ եւ ո́չ ջեռնուիք նոքօք. եւ որ զվարձս իւր ժողովէր՝ ՛ի ծրարս ծակոտեալս ժողովէր։
⁸Ա́յսպէս ասէ տ(է)ր ամենակալ. դի́ք զսիրտս ձեր ՛ի ճանապարհս ձեր,
⁹ելէ́ք ՛ի լեառն,հարէ́ք փայտ, եւ շինեցէ́ք զտունդ. եւ հաճեցա́յց դովաւ՝ եւ փառաւորեցայց՝ ասէ տ(է)ր։
¹⁰Հայեցարուք ՛ի բազում՝ եւ եղեւ սակաւ. եւ դուք ՛ի ներքս ՛ի տունս կրեցէք՝ եւ ես արտա́քս փչեցի զայն։ Վ(ա)ս(ն) այդորիկ ա́յսպէս ասէ տ(է)ր ամենակալ. փոխանակ զի տունդ իմ աւե́ր է, եւ դուք ճեպեալ էք յիւրաքանչիւր տուն իւր։
¹¹Վ(ա)ս(ն) այդորիկ երկինք կալցին զանձրեւ քո. եւ երկիր արգելցէ զարդիւնս իւր.

¹²եւ ածից սո́ւր ՛ի վ(ե)ր(այ) երկրի, եւ ՛ի վ(ե)ր(այ) ցորենոյ. եւ ՛ի վ(ե)ր(այ) գինւոյ, եւ ՛ի վ(ե)ր(այ) իւղոյ, եւ ՛ի վ(ե)ր(այ) ա(մենայ)ն բուսոյ երկրի, եւ ՛ի վ(ե)ր(այ) մարդկան, եւ ՛ի վ(ե)ր(այ) անասնոյ, եւ ՛ի վ(ե)ր(այ) ա(մենայ)ն վաստակոց ձեռաց ն(ո)ց(ա)։
¹³Եւ լուաւ զորաբաբէլ որդի սաղաթիելի յազգէ յուդայ, եւ յեսու յովսեդեկեայ քահանայ մեծ, եւ ա(մենայ)ն մնացորդք ժողովրդեանն ձայնի տ(եառ)ն ա(ստուծո)յ իւրեանց. եւ զպատգամս անգէի մարգարէի, ո(ր)պ(էս) առաքեաց զնա տ(է)ր ա(ստուա)ծ ն(ո)ց(ա) առ ն(ո)ս(ա). եւ երկրեա́ւ ժողովուրդն յերեսաց տ(եառ)ն։
¹⁴Եւ ասէ անգէոս հրեշտակն տ(եառ)ն ՛ի հրեշտակս տ(եառ)ն ցժողովուրդն. ե́ս ընդ ձեզ եմ՝ ասէ տ(է)ր։

¹⁵Եւ զարթոյց տ(է)ր զոգի զորաբաբիլի որդւոյ սաղաթիելի յազգէ յուդայ, եւ զոգի յեսուայ յովսեդեկեայ քահանայի մեծի, եւ զոգի ա(մենայ)ն մնացորդաց ժողովրդեանն. եւ մտանէին եւ գործէին զգործ ՛ի տան տ(եառ)ն ամենակալի ա(ստուծո)յ իւրեանց,

¹՛Ի քսան եւ ՛ի չորս ամսոյն վեցերորդի։
²յամսեանն եւթներորդի, որ օր քսան եւ մի էր ամսոյն։ Խօսեցաւ տ(է)ր ՛ի ձեռն անգէի մարգարէի՝ եւ ասէ.
³ասա́ ցզորաբաբէլ որդի սաղաթիելի յազգէ յուդայ, եւ ցյեսու յովսեդեկեայ քահանայ մեծ, եւ ցա(մենայ)ն մնացորդս ժողովրդեանն։
⁴Ո՞յր ՛ի ձէնջ տեսեալ իցէ զտունս զայս ՛ի փառաւորութե(ան) իւրում զառաջինն. եւ ո՞րպէս արդ տեսանէք զդա ո(ր)պ(էս) զոչինչ առաջի ձեր։
⁵Եւ արդ զօրացի́ր դու զորաբաբել՝ ասէ տ(է)ր,եւ զօրացի́ր յեսու յովսեդեկեայ քահանայ մեծ, եւ զօրացի ա(մենայ)ն ժողովուրդ երկրիդ՝ ասէ տ(է)ր, եւ գործեցէ́ք զի ես ընդ ձե́զ եմ ասէ տ(է)ր ամենակալ։

⁶Եւ բանն զոր ուխտեցի ընդ ձեզ՝ յելանելն յերկրէն եգիպտացւոց։ եւ հոգին իմ որ կա́յ ՛ի միջի ձերում. քաջալերեցարո́ւք։
⁷զի ա́յսպէս ասէ տ(է)ր ամենակալ. Դարձեալ միւսանգամ շարժեցից զերկինս եւ զերկիր, եւ զծով եւ զցամաք։
⁸եւ միանգամայն շարժեցից զա(մենայ)ն ազգս. եւ եկեսցէ ընտիր ընտիր ընչից ա(մենայ)ն ազգաց, եւ լցուցից զտունդ զայդ փառօք՝ ասէ տ(է)ր ամենակալ։
⁹Ի́մ է արծաթ՝ եւ ի́մ է ոսկի, ասէ տ(է)ր ամենակալ։
¹⁰զի մեծ եղիցին փառք տանդ այդորի վերջինդ քան զառաջինն՝ ասէ տ(է)ր ամենակալ։ Եւ ՛ի տեղւոջդ յայդմիկ տա́ց խաղաղութի(ւն)՝ ասէ տ(է)ր ամենակալ. եւ խաղաղու(թ)ի(ւն) ոգւոց փրկու(թ)ի(ւն) ա(մենայ)նի, որ գործիցէ յարուցանել զտաճարդ զայդ։

¹¹՛Ի քսաներորդի եւ չորրորդի, իններորդի ամսեանն. յամի երկրորդի դարեհի. եղեւ բան տ(եառ)ն առ անգէ մարգարէ՝ եւ ասէ։
¹²Ա́յսպէս ասէ տ(է)ր ամենակալ. հա́րց օրէնս ՛ի քահանայիցդ եւ ասասցես։
¹³եթէ առնուցո́ւ մարդ միս սուրբ ՛ի դրօշակ հանդերձի իւրոյ, եւ մերձեսցի ձորձք իւր ՛ի հաց, կամ ՛ի թան, կամ ՛ի գինի, կամ յեւղ, կամ յա(մենայ)ն կերակուրս՝ իցէ՞ թէ սրբեսցի։ պատասխանի ետուն քահանայքն եւ ասեն. ո́չ։
¹⁴Եւ ասէ անգէաս. թէ մերձենայցէ պիղծն՝ կամ անսուրբն ոգւով յա(մենայ)ն ինչ յայնպիսեաց՝ իցէ՞ թէ պղծեսցի։ պատասխանի ետուն քահանայքն եւ ասեն՝ պղծի։

¹⁵Պատասխանի ետ անգէոս եւ ասէ. նո́յնպէս եւ ժողովուրդս այս. նո́յնպէս եւ ազգս այս առաջի իմ ասէ տ(է)ր։ նո́յնպէս եւ ա(մենայ)ն գործք ձեռաց նոցա, որ ինչ մերձենայցէ անդր, պղծեսցի։ վ(ա)ս(ն) առիցն իւրեանց առաւօտնոց. եւ մորմոքեսցին յերեսաց չարեացն իւրեանց. եւ ատեցիք ՛ի դրունս զյանդիմանիչս։
¹⁶Եւ արդ՝ դի́ք ՛ի սիրտ ձեր յօրէ յայսմ հետէ եւ յառաջ. մինչչե́ւ եդեալ քար ՛ի քարի վ(ե)ր(այ) տաճարին տ(եառ)ն։
¹⁷Ո՞վ էիք յորժամ արկանէիք յամանս ձեր քսան քոռ գարւոյ, եւ լինէր տա́սն քոռ գարւոյ. եւ մուծանէիք ՛ի հեծանս ձեր հանել յիսո́ւն մար, եւ լինէր քսան։
¹⁸Հարի́ զձե անպտղու(թեամ)բ՝ եւ խորշակաւ՝ եւ կարկտիւ, եւ զա(մենայ)ն գործս ձեռաց ձերոց. եւ ո́չ դարձարուք առիս՝ ասէ տ(է)ր։

¹⁹Կարգեցէ́ք զսիրտս ձեր յօրէ́ յայսմանէ՝ եւ անդր. ՛ի քսաներորդէ եւ չորրորդէ իններորդի ամսեանդ, եւ յօրէ յայդմանէ յորում անկաւ հիմն տաճարիդ տ(եառ)ն։ Դի́ք ՛ի սիրտս ձեր։
²⁰ի՞ցէ թէ յայտնեսցի ինչ ՛ի վ(ե)ր(այ) կալոյ եւ յորթ, եւ ՛ի թզենի՝ եւ ՛ի նռնենի, եւ ՛ի փա́յտ իւղոյ որ պտուղ ո́չ տային՝ յօրէ յայսմանէ օրհնեցից։
²¹Եւ եղեւ բան տ(եառ)ն կրկին անգամ առ անգէ մարգարէ, ՛ի քսան եւ ՛ի չորս ամսոյն՝ եւ ասէ։
²²ասա́ ցզորաբաբել սաղաթիելի յազգէ յուդայ. Դարձեալ միւսանգամ շարժեմ աերկինս եւ զերկիր, զծով եւ զցամաք։

²³եւկործանեցից զաթոռս թագաւորաց, եւ սատակեցից զզօրութե(ան)ս թագաւորաց. եւ կործանեցից զկառս եւ զհեծեալս. եւ իջցեն երիվարք եւ հեծեալք ն(ո)ց(ա)՝ իւրաքանչիւր սրով առ եղբայր իւր։
²⁴Յաւուր յայնմիկ ասէ տ(է)ր ամենակալ. առի́ց զքեզ զորաբաբէլ սաղաթիելի զծառայ իմ, եւ եդից զքեզ իբրեւ զկնիք։ Զի ընդ քեզ հաճեցայ ասէ տ(է)ր ամենակալ։