¹Պատգամք ամովսայ որ եղեն յակկարիմ թեկուայ, զորս ետես ՛ի վերայ ե(րուսաղէ)մի. Յաւուրս ողիայ արքայի հրէաստանի, եւ յաւուրս յարոբովամայ որդւոյ յովասայ արքայի ի(սրայէ)լի։ Երկուք ամօք յառաջ քան զգետնաշարժն. եւ ասէ։
²ՏԷՐ ՛Ի ՍԻՈվՆԷ ԲԱՐԲԱՌԵՑԱՒ, եւ յե(րուսաղէ)մէ ետ զձա́յն իւր. եւ սո́ւգ առին արօտք հօտից. եւ ցամաքեցա́ն բարձունք կարմելայ։
³Եւ ասէ́ տ(է)ր ՛ի վ(ե)ր(այ) երիցն անօրէնութե(ան)ցն դամասկեայ, եւ ՛ի վ(ե)ր(այ) չորիցն՝ ո́չ դարձայց ՛ի նմանէ։ փոխանակ զի կտրէին զյղիս գաղաադացւոց սղոցօք երկաթեօք։
⁴Եւ առաքեցից հո́ւր ՛ի տունն ազայելի, եւ կերիցէ զհիմունս որդւոյ ադերայ։

⁵եւ խորտակեցից զնիգս դամասկեայ. եւ սատակեցից զբնակիչս դաշտացն աւնայ. եւ կոտորեցից զազգն յարանց խառանու. եւ գերեսցի ժողովուրդն ասորւոց՝ ասէ տ(է)ր·
⁶Ա́յսպէս ասէ տ(է)ր, ՛ի վ(ե)ր(այ) երից ամպարշտութե(ան)ցն գազայ, եւ ՛ի վ(ե)ր(այ) չորիցն՝ ո́չ դարձայց ՛ի նոցանէն. փոխանակ զի գերեցին զգերու(թ)ի(ւն) սողոմոնի արգելուլ յեդովմ։
⁷Եւ առաքեցից հո́ւր ՛ի վերայ պարսպացն գազայ, եւ կերիցէ զհիմունս ն(ո)ր(ա)։
⁸եւ սատակեցից զբնակիչս յազովաայ, եւ բարձցի́ ազգն յասկաղոնէ. եւ ածի́ց զձեռն իմ ՛ի վ(ե)ր(այ) ակկարոնի, եւ կորիցեն մնացորդք այլազգեացն ասէ́ տ(է)ր տ(է)ր։

⁹Ա́յսպէս ասէ տ(է)ր. ՛ի վ(ե)ր(այ) երից ամպարշտու(թ)ե(ան)ցն ծուրայ, եւ ՛ի վ(ե)ր(այ) չորիցն՝ ո́չ դարձայց ՛ի նմանէ։ փոխանակ զի արգելին զգերու(թ)ի(ւն)ն սողոմոնի յեդոմ, եւ ո́չ յիշեցին զուխտ եղբարց։
¹⁰Եւ առաքեցից հո́ւր ՛ի վ(ե)ր(այ) պարսպացն ծուրայ, եւ՝ կերիցէ́ զհիմունս ն(ո)ր(ա)։
¹¹Ա́յսպէս ասէ տ(է)ր. ՛ի վ(ե)ր(այ) երից ամպարշտու(թ)ե(ան)ցն եդոմայ, եւ ՛ի վ(ե)ր(այ) չորիցն՝ ո́չ դարձայց ՛ի նոցանէ։ փոխանակ զի հալածեա́ց սրով զեղբայր իւր, եւ ապականեաց զեղբայր յերկրի. եւ յափշտակեաց ՛ի վկայութի(ւն) զսոսկո́ւմն իւր. եւ զյանդգնու(թ)ի(ւն) իւր պահեաց ՛ի հակառակու(թ)ի(ւն)։
¹²Եւ առաքեցից հո́ւր ՛ի թեման, եւ կերիցէ հուր զհիմունս պարսպաց ն(ո)ր(ա)։

¹³Այսպէս ասէ տ(է)ր. ՛ի վ(ե)ր(այ) երից ամպարշտութե(ան)ց որդւոցն ամոնայ, եւ ՛ի վ(ե)ր(այ) չորիցն՝ ո́չ դարձայց ՛ի ն(ո)ց(ա)նէ։ փոխանակ զի հերձոյին զյղիս գաղաադացւոց,զի ընդարձակեսցեն զսահմանս իւրեանց։
¹⁴Բորբոքեցից հո́ւր ՛ի վ(ե)ր(այ) պարսպացն հռաբայ, եւ կերիցէ́ զհիմունս ն(ո)ր(ա) աղաղակաւ յաւուր պատերազմի. եւ շարժեսցի յաւուր վախճանի իւրոյ։
¹⁵եւ գնասցեն ՛ի գերու(թ)ի(ւն) թագաւորք ն(ո)ց(ա). քուրմք ն(ո)ց(ա)՝ եւ իշխանք ն(ո)ց(ա) ՛ի միասին, ասէ տ(է)ր տ(է)ր։

¹Ա́յսպէս ասէ տ(է)ր. ՛ի վ(ե)ր(այ) երից ամպարշտու(թ)ե(ան)ցն մովաբու, եւ ՛ի վ(ե)ր(այ) չորիցն՝ ո́չ դարձայց ՛ի նմանէն։ փոխանակ զի այրեցին զոսկերս թագաւորացն եդովմայեցւոց ՛ի մոխրե́լ։
²Առաքեցի́ց հուր ՛ի վ(ե)ր(այ) մովաբու, եւ կերիցէ հուր զհիմունս քաղաքաց ն(ո)ր(ա). եւ մեռցի ՛ի տկարու(թ)ե(ան) մովաբ, աղաղակաւ եւ ձայնիւ փողոյ։
³եւ սատակեցից զդատաւո́ր ՛ի նմանէ, եւ զա(մենայ)ն իշխանս նորա կոտորեցից ընդ նմին՝ ասէ տ(է)ր։
⁴Ա́յսպէս ասէ տ(է)ր. ՛ի վ(ե)ր(այ) երից ամպարշտու(թ)ե(ան)ց որդւոցն յուդայ, եւ ՛ի վ(ե)ր(այ) չորիցն՝ ո́չ դարձայց ՛ի նմանէն։ փոխանակ զի մերժեցին զօրէնս տ(եառ)ն, եւ զհրամանս ն(ո)ր(ա) ո́չ պահեցին. եւ մոլորեցուցին զն(ո)ս(ա) սնոտեօք իւրեանց զոր արարին, զորոց զհե́տ գնացին հարքն ն(ո)ց(ա)։

⁵Առաքեցից հո́ւր ՛ի վ(ե)ր(այ) հրեաստանի՝ եւ կերիցէ́ զհիմունս ե(րուսաղէ)մի։
⁶Ա́յսպէս ասէ տ(է)ր. ՛ի վ(ե)ր(այ) երից ամպարշտու(թ)ե(ան)ցն ի(սրայէ)լի, եւ ՛ի վ(ե)ր(այ) չորիցն՝ ո́չ դարձայց ՛ի նմանէ։ փոխանակ զի վաճառեցին զարդա́րն արծաթոյ, եւ զտնանկն ընդ կօշկաց։
⁷որ կոխեն զհող երկրի. եւ կռփէին զգլուխս աղքատաց, եւ զճանապարհս խոնարհաց թիւրէին։ եւ հայր եւ որդի առ մի բոզ մտանէին, զի պղծեսցեն զանուն ա(ստուծո)յ իւրեանց։
⁸Եւ զձորձս իւրեանց առագա́ստ ձգէին ընդ ինքեանս՝ եւ ընդ սեղանն. եւ գինի զրպարտու(թ)ե(ան)ց ըմպէին ՛ի տա́ն աստուծոյ իւրեանց։

⁹Բայց ես բարձի́ զամովրհացին յերեսաց ն(ո)ր(ա). որոյ բարձրութի(ւն) իւր բարձրու(թ)ի(ւն) մայրի, եւ հզօր էր իբրեւ զկաղնի. եւ բարձի́ զպտուղ ն(ո)ր(ա) ՛ի վերուստ, եւ զարմատս ն(ո)ր(ա)՝ ՛ի ներքուստ։
¹⁰Եւ ես հանի զձեզ յերկրէն եգիպտացւոց, եւ շրջեցուցի զձեզ յանապատ ամս քառասուն՝ ժառանգեցուցանել զերկիրն ամովրհացւոց։
¹¹Եւ առի́ յորդւոց ձերոց ՛ի մարգարէս,եւ յերիտասարդաց ձերոց յուխտաւորս. միթէ ո՞չ իցեն այդ որդիք ի(սրայէ)լի՝ ասէ տ(է)ր։
¹²Եւ արբուցանէիք ուխտաւորացն իմոց ըմպել գինի, եւ մարգարէիցն պատուիրէիք զի մի́ մարգարէասցին։

¹³Վ(ա)ս(ն) այդորիկ ահաւասիկ ես հոլովեցուցանեմ ՛ի ներքոյ ձեր՝ զոր օրինակ հոլովի սայլ լի օրանաւ։
¹⁴եւ կորիցէ փախուստ յընթացողէն. եւ որ զօրաւորն իցէ մի́ զօրասցի ՛ի զօրու(թ)ե(ան) իւրում, եւ պատերազմօղն մի́ զօրասցի ՛ի զօրու(թ)ե(ան) իւրում, եւ պատերազմօղն մի́ ապրեցուսցէ զանձն իւր։
¹⁵եւ աղեղնաւորն՝ մի́ կարասցէ ունել զդէմ։ եւ որ արագն իցէ ոտիւք՝ մի́ ապրեսցի, եւ հեծեալն՝ մի́ ապրեցուսցէ զանձն իւր։
¹⁶եւ մի́ գտցի սիրտ իւր ՛ի զօրութի(ւն)։ մերկն հալածեսցի յաւուր յայնմիկ՝ ասէ տ(է)ր։

¹Լուարո́ւք զպատգամս զայս զոր խօսեցաւ տ(է)ր ՛ի վ(ե)ր(այ) ձեր տունդ ի(սրայէ)լի. եւ ՛ի վ(ե)ր(այ) ա(մենայ)ն ազգաց զորս հանի յերկրէն եգիպտացւոց։
²Բայց զձեզ ընտրեցի յա(մենայ)ն ազգաց երկրի. վ(ա)ս(ն) այնորիկ ՛ի ձէնջ խնդրեցից զվրէժ ա(մենայ)ն չարեա́ց ձերոց։
³Թէ գնասցե՞ն ամենեւին երկու ՛ի միասին, թէ ոչ ճանաչիցեն զմիմեանս։
⁴եթէ գոչիցէ՞ առեւծ յանտառէ՝ եւ ո́չ իցէ որս արարեալ ն(ո)ր(ա)։ եթէ տայցէ՞ կորիւն առիւծու զձայն իւր ՛ի մայրւոյ իւրմէ, եւ ո́չ ինչ իցէ յափշտակեալ ն(ո)ր(ա)։
⁵եթէ անկանիցի՞ թռչուն ՛ի յերկիր առանց որսորդի։ եթէ ճայթիցէ՞ որոգայթ ՛ի վ(ե)ր(այ) երկրի՝ եւ ո́չ ինչ իցէ ըմբռնեալ։

⁶եթէ հարկանիցի՞ փող ՛ի քաղաքի, եւ ազգն ո́չ խռովեսցի։ եթէ իցե՞ն չարիք ՛ի քաղաքի՝ եւ տ(եառ)ն չիցէ արարեալ։
⁷Վ(ա)ս(ն) այնորիկ ո́չ արասցէ տ(է)ր ա(ստուա)ծ ի́րս ինչ, եթէ ոչ յայտնեսցէ զխրատն ծառայից իւրոց մարգարէից։
⁸Առե́ւծ գոչիցէ՝ եւ ո՞վ իցէ որ ո́չ սարսիցէ։ Տ(է)ր ա(ստուա)ծ խօսեցաւ՝ եւ ո՞վ իցէ որ ո́չ մարգարէասցի։
⁹Պատմեցէ́ք ՛ի գաւառս ասորեստանեայց. եւ ՛ի գաւառս երկրին եգիպտացւոց, եւ ասացէ́ք՝ ժողովեցարո́ւք ՛ի լեառն շամրնի, եւ տեսէ́ք սքանչելիս բազումս ՛ի մէջ ն(ո)ր(ա). եւ զբռնութի(ւն) ՛ի մէջ ն(ո)ր(ա)։
¹⁰եւ ո́չ ծանեաւ զլինելոց եղե́ռն իւր՝ ասէ տ(է)ր. որ գանձէին անօրէնու(թ)ի(ւն) եւ թշուառութի(ւն) ՛ի գաւառս իւրեանց։

¹¹Վ(ա)ս(ն) այնորիկ ա́յսպէս ասէ տ(է)ր ա(ստուա)ծ ցտիւրոս, երկի́րդ որ շուրջ զքե́ւ է՝ աւերեսցի. եւ խորտակեսցի ՛ի քէն ա(մենայ)ն զօրութի(ւն) քո, եւ յափշտակեսցին գաւառք քո։
¹²Զի ա́յսպէս ասէ տ(է)ր. զոր օրինակ թէ կարասցէ թափել հովիւ ՛ի բերանո́յ առիւծու՝ աքեա́ցս երկուս, կամ բլթա́կ մի ունկան. ա́յնպէս զերծցին որդիքն ի(սրայէ)լի որ բնակեալ են ՛ի սամարիա, դէմյանդիման ազգին, եւ ՛ի մէջ դամասկացւոց։
¹³Քահանայք լուարո́ւք եւ վկայու(թ)ի(ւն) դի́ք տանդ յակովբայ՝ ասէ տ(է)ր ամենակալ։
¹⁴Զի յաւուր յայնմիկ յորժամ խնդրեցից զվրէժ ամպարշտու(թ)ե(ան)ցն ի(սրայէ)լի ՛ի նմանէ, առից վրէժ եւ զսեղանոյն բեթելայ. եւ փշրեսցին եղջեւրք սեղանոյն՝ եւ անկցին յերկիր։

¹⁵Եւ խորտակեցից զապարանս թեւաւորս, ՛ի վ(ե)ր(այ) ամարաստուն ապարանիցն. եւ ապականեսցին ապարանքն փղոսկրեայք. եւ բազում եւ այլ ապարանք անկցին՝ ասէ տ(է)ր։

¹Լուարո́ւք զբան տ(եառ)ն երինջք բասանու՝ որ էք ՛ի լերինս շամրնի. որ զրկէք զաղքատս, եւ առ ոտն հարկանէք զտնանկն. որ ասէիք ցտեարս ձեր՝ մատուցէ́ք մեզ գինի զի արբցուք։
²Երդնո́ւ տ(է)ր ՛ի սրբու(թ)ի(ւն)ս իւր. եթէ ահա աւուրք եկեսցեն ՛ի վ(ե)ր(այ) ձեր, եւ առցեն զձեզ զինուք, եւ զդոսա որ ը(ստ) ձեզդ են արկցեն ՛ի սա́նս ջեռուցեալս։
³եւ ելանիցէք մերկք միմեա́նց դէմ ը(ստ)դէմ, եւ անկանիցիք ՛ի լերինն ռեմանայ՝ ասէ տ(է)ր։
⁴Մտէ́ք ՛ի բեթէլ՝ եւ ամպարշտեցայք, եւ ՛ի գաղգաղա յաճախեցէ́ք ամպարշտել. եւ մատուցէ́ք զզոհս ձեր ընդ առաւօտս, եւ յերիր աւուր զտասանորդս ձեր։
⁵Ընթեռնոյին օրէնս արտաքոյ, եւ կոչէին խոստովանութի(ւն)ս։ պատմեցէ́ք թէ զայս սիրեցին որդիքն ի(սրայէ)լի՝ ասէ տ(է)ր։

⁶Եւ ես արկի́ զձեւք ցաւ ատամանց յա(մենայ)ն քաղաքս ձեր, եւ կարօտու(թ)ի(ւն) հացի յա(մենայ)ն տեղիս ձեր. եւ ո́չ դարձարուք առիս՝ ասէ տ(է)ր։
⁷Եւ արգելի́ ՛ի ձէնջ զանձրեւ՝ երիւք ամսօք յառաջ քան զկութս. ՛ի մի քաղաք տեղացից, եւ ՛ի միւս քաղաք ո́չ տեղացից. մի վիճակ թացից՝ եւ ՛ի միւս յորում ո́չ տեղացից՝ ցամաքեսցի́։
⁸Եւ ժողովեսցին երկու եւ երեք քաղաք ՛ի մի քաղաք ըմպել ջուր, եւ մի́ յագեսցին. եւ ո́չ դարձարուք առիս՝ ասէ տ(է)ր։
⁹Հարի́ զձեզ տապով, եւ արկի́ զձեւք դալուկն։ եւ յաճախեցէք ՛ի պարտէզս ձեր, եւ յայգիս եւ ՛ի թզենիս ձեր՝ եւ ՛ի ձիթենիս. եւ եկեր թրթուր։ սակայն եւ այնպէս ո́չ դարձարուք առիս՝ ասէ տ(է)ր։

¹⁰Առաքեցի ՛ի վ(ե)ր(այ) ձեր մա́հ ՛ի ճանապարհին եգիպտացւոց, եւ կոտորեցի սրով զերիտասարդս ձեր հանդերձ գերու(թեամ)բ երիվարաց ձերոց. եւ ծախեցի զբանակս ձեր հրով բարկու(թ)ե(ան) իմոյ։ սակայն եւ այնպէս ո́չ դարձարուք առիս՝ ասէ տ(է)ր։
¹¹Կործանեցի́ զձեզ՝ ո(ր)պ(էս) կործանեաց ա(ստուա)ծ զսոդոմ եւ զգոմոր. եւ եղերուք իբրեւ զխանձող զերծեալ ՛ի հրոյ։ սակայն եւ այնպէս ո́չ դարձարուք առիս՝ ասէ տ(է)ր։
¹²Վ(ա)ս(ն) այնորիկ ա́յսպէս արարից զքեզ ի(սրայ)էլ։ բայց զի ա́յսպէս առնելոց եմ քեզ՝ պատրաստեա́ կարդա́լ զանուն տ(եառ)ն ա(ստուծո)յ քոյ ի(սրայէ)լի։
¹³Զի ահաւասիկ ե́ս եմ որ հաստատեմ զերկինս, եւ հաստատեմ զհողմս։

¹⁴եւ պատմէ ՛ի մէջ մարդկան զօծեալ իւր. առնէ առաւօտ եւ մէգ, եւ ելանէ ՛ի վ(ե)ր(այ) բարձանց երկրի. տ(է)ր ա(ստուա)ծ ամենակալ անուն է ն(ո)ր(ա)։

¹Լուարո́ւք զբանս զայս զոր ես առի́ց ՛ի վ(ե)ր(այ) ձեր ողբս։ Անկա́ւ տունդ ի(սրայէ)լի, եւ ո́չ եւս յաւելուցու յառնել։
²Կոյս ի(սրայէ)լի կործանեցաւ յերկրի իւրում, եւ չի́ք ոք որ կանգնիցէ զնա։
³քանզի ա́յսպէս ասէ տ(է)ր տ(է)ր. ՛Ի քաղաքէ յորմէ ելանէին հազարք՝ մնասցէ հարեւր, եւ յորմէ ելանէին հարեւր՝ մնասցէ տասն տանդ ի(սրայէ)լի։
⁴Քանզի այսպէս ասէ տ(է)ր առ տունդ ի(սրայէ)լի. խնդրեցէ́ք զիս եւ կեցջիք։
⁵եւ մի́ խնդրէք զբեթէլ, եւ ՛ի գաղգաղա մի́ մտանէք, եւ ՛ի ջրհորն երդման մի́ ելանէք. զի գաղգաղա գերելով գերեսցի, եւ բեթէլ եղիցի իբրեւ զչեղեալ։
⁶Խնդրեցէ́ք զտ(է)ր եւ կեցջիք. զի մի́ բորբոքեսցի իբրեւ զհուր տունն յովսեփայ՝ եւ կերիցէ զնա. եւ ոչո́ք իցէ որ շիջուցանիցէ։

⁷Որ առնէ ՛ի բարձունս իրաւունս, եւ արդարու(թ)ի(ւն) եդ յերկրի։
⁸որ առնէ զա(մենայ)ն եւ նորոգէ, եւ դարձուցանէ յայգ զստուերս մահու, եւ զտիւ ՛ի գիշե́ր մթացուցանէ։ որ կոչէ զջուրս ծովու՝ եւ հեղու ՛ի վ(ե)ր(այ) երեսաց երկրի. տ(է)ր ամենակալ անուն է ն(ո)ր(ա)։
⁹որ բաշխէ զբեկումն ՛ի վ(ե)ր(այ) զօրու(թ)ե(ան), եւ ածէ զթշուառու(թ)ի(ւն) ՛ի վ(ե)ր(այ) ամրոցաց։
¹⁰Ատեցին ՛ի դրունս զյանդիմանիչս, եւ զբանս սուրբս պի́ղծս արարին։
¹¹Վ(ա)ս(ն) այնորիկ փոխանակ զի կռփէիք զաղքատս, եւ կաշառս ընտրանաւ առնոյք ՛ի նոցանէն. ապարանս զարդարեա́լս շինեսջիք՝ եւ մի́ բնակեսջիք ՛ի ն(ո)ս(ա)։ այգիս ցանկալիս տնկեսջիք՝ եւ զգինի ն(ո)ց(ա)՝ մի́ արբջիք։

¹²զի գիտացի ես զբազում ամպարշտութի(ւն)ս ձեր. եւ սաստի́կ են մեղք ձեր։ Առ ո́տս կոխէիք զարդարն առնլով փոխանակս, եւ խոտորեցուցանէիք զաղքատն ՛ի դրունս։
¹³Վ(ա)ս(ն) այնորիկ որ իմաստունն է՝ ՛ի ժամանակին յայնմիկ լռեսցէ, զի ժամանակն չա́ր է։
¹⁴Խնդրեցէ́ք զբարի եւ մի́ զչար՝ զի կեցջիք, եւ եղիցի ընդ ձեզ տ(է)ր ա(ստուա)ծ ամենակալ։ զոր օրինակ ասացէքն՝
¹⁵թէ ատեցաք զչարիս, եւ սիրեցաք զբարիս։ Հաստատեցէ́ք զիրաւունս ՛ի դրունս ձեր, զի ողորմեսցի տ(է)ր ա(ստուա)ծ մնացորդաց յովսեփայ։

¹⁶Վ(ա)ս(ն) այդորիկ ա́յսպէս ասէ տ(է)ր ա(ստուա)ծ ամենակալ. յա(մենայ)ն հրապարակս կո́ծ, եւ յա(մենայ)ն ճանապարհս ասասցի վա́յ վա́յ։ կոչեսցի մշակ ՛ի սուգ եւ ՛ի կոծ եւ ՛ի ձայնարկուս։
¹⁷եւ յա(մենայ)ն ճանապարհս կոծ. քանզի անցի́ց ընդ մէջ քո՝ ասէ տ(է)ր։
¹⁸Վա́յ որ ցանկայ աւուրն տ(եառ)ն. զի՞ կայ ձեր եւ աւուր տ(եառ)ն. եւ նա խաւա́ր է, եւ ո́չ լոյս։
¹⁹Զոր օրինակ թէ փախիցէ մարդ յերեսաց առիւծու, եւ պատահեսցէ նմա արջ, եւ փախնուցու ՛ի տուն՝ եւ յեցուսցէ ձեռս իւր յորմն, եւ հարկանիցէ զնա ոձ։
²⁰ո՞չ ապաքէն խաւա́ր է օր տ(եառ)ն՝ եւ ո́չ լոյս. աղջամղջին՝ եւ ո́չ գոյ ՛ի նմա ճաճանչ։
²¹Ատեցի́ մերժեցի́ զտօնս ձեր. եւ ՛ի տարեկանս ձեր ո́չ հոտոտեցայց։

²²զի թէ մատուցանէք զողջակէղս եւ զզոհս ձեր՝ ո́չ ընկալայց, եւ յերեւելիս փրկութե(ան)ց ձերոց ես ո́չ հայեցայց։
²³՛Ի բա́ց արա յինէն զձայն երգոց քոց. եւ զնուագս սրընգաց քոց ես ո́չ լուայց։
²⁴եւ յորդեսցեն իբրեւ զջո́ւր իրաւունք, եւ արդարու(թ)ի(ւն) իբրեւ զհեղեղ անհուն։
²⁵Միթէ սպա՞նդ եւ զոհս մատուցէք ինձ յանապատի́ անդ զքառասուն ամ տո́ւնդ ի(սրայէ)լի։
²⁶եւ առէք զվրանն մողոքայ՝ եւ զաստղ աստուածոյն ձերոյ զհռեմփայ, զպատկերս ն(ո)ց(ա) զոր արարէք ձեզ։
²⁷Եւ փոխեցից զձեզ անդր քան զդամասկոս՝ ասէ տ(է)ր, ա(ստուա)ծ ամենակալ անո́ւն է ն(ո)ր(ա)

¹Վա́յ որ անգոսնեն զսիոն, եւ յուսացեալ իցեն ՛ի լեա́ռն շամրնի։ կթեցին զիշխանու(թ)ի(ւն)ս ազգաց, եւ մտին ՛ի ն(ո)ս(ա) տունդ ի(սրայէ)լի։
²Անցէ́ք ամենեքին ՛ի քանան՝ եւ տեսէ́ք. եւ անցէ́ք անտի ՛ի մեծն եմա́թ հռաբայ, եւ իջէ́ք ՛ի գէթ այլազգեաց, զօրաւորս քան զա(մենայ)ն քաղաքսն այնորիկ, եթէ իցեն մեծ սահմանք ն(ո)ց(ա) քան զսահմանս ձեր։
³Որ գայքդ յօր չարեաց. որ մերձենայքդ հասանել ՛ի շաբաթս ստութե(ան)ց։
⁴Որ ննջէ́քդ ՛ի գահոյս փղոսկրեայս, եւ փափկանայք յանկողինս ձեր. եւ ուտէք ուլս ՛ի հօտից, եւ որթս դիեցիկս յանդւոց։
⁵Որ կայթս հարկանէիք ը(ստ)դէմ սրընդաց. զորս իբրեւ հաստատունս համարեցայք՝ եւ ո́չ անցաւորս։

⁶եւ ըմպէք պարզեալ գինի. եւ անոյշ իւղով օծանիք. եւ ո́չ ցաւէր ձեզ վասն բեկմանն յովսեփու։
⁷Վ(ա)ս(ն) այնորիկ արդ ՛ի գերութի(ւն) վարեսցին յիշխանու(թեն)է բռնաւորաց, եւ հատցի խըխընջիւն երիվարացն եփրեմայ։
⁸Զի երդուա́ւ տ(է)ր յանձն իւր. եւ ասէ տ(է)ր ա(ստուա)ծ զօրու(թ)ե(ան)ց՝ թէ գարշեցուցից զա(մենայ)ն հպարտութի(ւն)ս յակոբայ, եւ զաշխարհս ն(ո)ր(ա) ատեցից. եւ բարձից զքաղաքս ն(ո)ր(ա) ա(մենայ)ն բնակչօք։
⁹Եւ եղիցի եթէ մնասցէն տա́ն այր՝ ՛ի տասն միում, եւ մեռանիցին.
¹⁰եւ մնացորդքն առնուցուն զընտանիս իւրեանց, եւ իջանեն հանել զոսկե́րս ն(ո)ց(ա) ՛ի տանէ անտի. եւ ասասցեն ցա́յնոսիկ որք կայցեն առաջի տանն. եթէ ա՞յլ ինչ մնաց ա́յդր առ քեզ։

¹¹եւ նա ասասցէ՝ թէ ո́չ. եւ մի́ ասասցէ թէ լո́ւռ լեր. վ(ա)ս(ն) ա́յնորիկ է՝ զի ո́չ անուանէին զանուն տ(եառ)ն։
¹²Զի ահաւասիկ տ(է)ր հրամա́ն տացէ, եւ հարցէ զմե́ծ ապարանսն կործանմամբ, եւ զփոքր ապարանս պատառմամբ։
¹³Իցէ՞ թէ արշաւեսցեն երիվարք ընդ վէմս, կամ հանդարտիցեն ՛ի մէջ մատակաց. զի խոտորեցէք զիրաւունս ՛ի ցասումն, եւ զպտուղ արդարութե(ան) ՛ի դառնութի(ւն)։
¹⁴եւ ուրա́խ լինէիք յոչինչ բանս։ Ոյք ասէին՝ եթէ ո́չ զօրու(թեամ)բ մերով եղեն մեզ եղջեւրք։

¹⁵Վասն այդորիկ ահաւադիկ ես յարուցից ՛ի վ(ե)ր(այ) ձեր տունդ ի(սրայէ)լի՝ ասէ տ(է)ր զօրութե(ան)ց, ազգ մի՝ որ նեղեցեն զձեզ՝ զի մի́ եւս մտանիցէք յեմաթ, եւ մինչեւ ՛ի հեղեղատն արեւմտից։

¹Ա́յսպէս եցոյց ինձ տ(է)ր տ(է)ր. եւ ահա ծնունդ մարախոյ գա́յր ը(ստ) առաւօտս. եւ ահա ջորեակ մի գո́վգ արքայ։
²եւ եղիցի եթէ վախճանեսցէ ուտել զխոտերկրին։ Եւ ասեմ՝ տ(է)ր տ(է)ր խնայեա́. քանզի ո՞վ իցէ որ կանգնեսցէ զյակոբ, զի սակաւաւո́ր է։
³ապաշաւեա́ տ(է)ր ՛ի վ(ե)ր(այ) այդորիկ։ եւ այդ եւս մի́ լիցի՝ ասէ տ(է)ր։
⁴Ա́յսպէս եցոյց ինձ տ(է)ր տ(է)ր. եւ ահա կոչեաց դատաստան հրով տ(է)ր տ(է)ր. եւ եկեր զխորս բազումս, եւ եկեր զվիճակն։
⁵Եւ ասեմ՝ տ(է)ր տ(է)ր դադարեցո́ զայդ. քանզի ո՞վ է որ յարուցանէ զյակոբ, զի սակաւաւո́ր է։
⁶ապաշաւեա́ տ(է)ր ՛ի վ(ե)ր(այ) այդորիկ. եւ այդ եւս մի́ լիցի՝ ասէ տ(է)ր։

⁷Ա́յսպես եցոյց ինձ տ(է)ր տ(է)ր. եւ ահա այր մի կայր ՛ի վ(ե)ր(այ) ադամանտեա́յ պարսպի, եւ ՛ի ձեռին իւրում ադամանա։
⁸եւ ասէ ցիս տ(է)ր. զի՞նչ տեսանես ա́մովս։ եւ ասեմ ադամա́նտ։ Եւ ասէ ցիս տ(է)ր. ահաւասիկ ես հաստատեցից ադամանտ ՛ի մէջ ժողովրդեան իմոյ ի(սրայէ)լի, եւ ո́չ եւս յաւելից անցուցանել զնովաւ։
⁹եւ ապականեսցին բագինք կատակութե(ան), եւ մեհեանք ի(սրայէ)լի աւերեսցին։ եւ յարեայց ՛ի վերայ տանն յերոբովամայ սրո́վ։
¹⁰Եւ առաքեաց ամասիա քուրմ բեթելայ առ յերոբովամ արքայ ի(սրայէ)լի՝ եւ ասէ. ժողովս կուտէ ՛ի վ(ե)ր(այ) քո ամովս ՛ի մէջ տանս ի(սրայէ)լի, եւ երկիրս ո́չ կարէ հանդարտել ա(մենայ)ն բանից ն(ո)ր(ա)։

¹¹Զի ա́յսպէս ասէ ամովս.յերոբովամ սրով վախճանեսցի, եւ ի(սրայ)էլ գերելո́վ գերեսցի յերկրէ իւրմէ։
¹²Եւ ասէ ամասիա ցամովս. տեսանօղդ՝ տո́ւր տեղի, գնա́ յերկիրն հրեաստանի. անդ կեա́ց՝ եւ անդէ́ն մարգարէասջիր։
¹³՛ի բեթէլ մի́ եւս յաւելուցուս մարգարէանալ՝ զի սրբութի(ւն) թագաւորի է, տո́ւն թագաւորու(թ)ե(ան)։
¹⁴Պատասխանի ետ ամովս եւ ասէ ցամասիա. ես ո́չ մարգարէ էի՝ եւ ո́չ որդի մարգարէի, այլ հովի́ւ էի, եւ թութ քաղէի։
¹⁵եւ ա́ռ զիս տ(է)ր ՛ի հօտից, եւ ասէ ցիս տ(է)ր. գնա́ դու եւ մարգարէա́ ՛ի վ(ե)ր(այ) ժողովրդեա́ն իմում ի(սրայէ)լի։
¹⁶Եւ արդ՝ լո́ւր զպատգամս տ(եառ)ն. դու ասես մի́ մարգարէանար ՛ի վ(ե)ր(այ) ի(սրայէ)լի. եւ մի́ ժողովս ժողովեր ՛ի վ(ե)ր(այ) տանն յակովբու։

¹⁷վասն այդորիկ ա́յսպէս ասէ տ(է)ր տ(է)ր. կին քո ՛ի քաղաքի́դ պոռնկեսցի. եւ ուստերք քո եւ դստերք քո ՛ի սո́ւր անկցին. եւ երկի́րդ քո լարաբաժին բաժանեսցի. եւ դու յերկրի պղծում վախճանեսցիս. եւ ի(սրայ)էլ գերելո́վ գերեսցի յերկրէ իւրմէ։

¹Ա́յսպէս եցոյց ինձ տ(է)ր տ(է)ր, եւ ահա գործի հաւորսաց
²եւ ասէ՝ զինչ տեսանես ամովս։ եւ ասեմ՝ գործի հաւորսաց։ Եւ ասէ ցիս տ(է)ր. հասեա́լ է վախճան ՛ի վ(ե)ր(այ) ժողովրդեան իմոյ ի(սրայէ)լի. եւ ո́չ եւս յաւելցին անցուցանել զնովաւ։
³եւ ողբասցեն յարկք տաճարին յաւուր յայնմիկ՝ ասէ տ(է)ր. բազումք անկանիցին, եւ յա(մենայ)ն տեղիս արկից լռութի(ւն)։
⁴Լուարո́ւք զայս, որք նեղէիք զտնանկն ընդ առաւօտս, եւ զրկէիք զաղքատ յերեկորեայ։
⁵եւ ասէիք՝ ե՞րբ անցցէ ամիսս եւ շահեսցուք, եւ շաբաթս՝ եւ բացցուք զգանձս, եւ առնել զչափ փոքր, եւ մեծացուցանել զկշիռս, եւ առնել կշիռս ստութե(ան)։

⁶ստանալ արծաթով զաղքատս, եւ զտնանկս ՛ի գնոց կօշկաց. եւ յամենայն ՛ի վաճառս մեր շահեսցուք։
⁷Երդնո́ւ տ(է)ր ՛ի վ(ե)ր(այ) հպարտութե(ա)ն յակովբու. թէ ո́չ մոռասցին ՛ի սպառ ա(մենայ)ն գործք ձեր։
⁸եւ ՛ի վ(ե)ր(այ) այդորիկ խռովեսցի́ երկիր. սո́ւգ առցեն ա(մենայ)ն բնակիչք ն(ո)ր(ա). եւ ելցէ իբրեւ զգետ վախճան ն(ո)ր(ա), եւ իջցէ իբրեւ զգետն եգիպտացւոց։
⁹Եւ եղիցի յաւուր յայնմիկ ասէ տ(է)ր տ(է)ր՝ մտցէ́ արեգակն ՛ի միջօրէի, եւ խաւարեսցի յերկրի լոյս ՛ի տուէ։

¹⁰եւ դարձուցից ՛ի սուգ զտօնս ձեր, եւ զա(մենայ)ն երգս ձեր յողբս։ եւ ածից ՛ի վ(ե)ր(այ) ա(մենայ)ն հասակաց քո́ւրձ. եւ ՛ի վ(ե)ր(այ) ա(մենայ)ն գլխոց կնդու(թ)ի(ւն)։ եւ արարից նմա իբրեւ սուգ սիրելւոյ, եւ որոց ընդ նմա́յն իցեն իբրեւ օր ցաւոց։
¹¹Ահա աւուրք գա́ն ասէ տ(է)ր տ(է)ր. եւ առաքեցից սո́վ յերկիր. ո́չ սով հացի, եւ ո́չ ծարաւ ջրոյ. այլ սով լսելո́յ զբանն տ(եառ)ն։
¹²Եւ խռովեսցին ջուրք ՛ի ծովէ́ մինչեւ ՛ի ծով, եւ ՛ի հիւսւսոյ մինչեւ յարեւելս. ընթասցին խնդրել զբանն տ(եառ)ն, եւ մի́ գտցեն։
¹³Յաւուր յայնմիկ նեղեսցին կոյսք գեղեցիկ եւ երիտասարդք ՛ի ծարաւոյ.

¹⁴ոյք երդնոյին ՛ի քաւութի(ւն)ս շամրնի, եւ ասէին՝ կենդանի́ է աստուած քո դա́ն, եւ կենդանի́ է աստուած քո բերսաբեէ. եւ կործանեսցին, եւ մի́ եւս կանգնեսցին։

¹Տեսի́ զտ(է)ր զի կայր ՛ի վ(ե)ր(այ) սեղանոյ՝ եւ ասէ. բախեա́ զսեղանդ՝ եւ շարժեսցին դրանդիք, եւ կտրեա́ արկ ՛ի գլուխս ամենեցուն. եւ զմնացորդս ն(ո)ց(ա) սրո́վ կոտորեցից. եւ մի́ ապրեսցէ ՛ի նոցանէն փախուցեալն. եւ մի́ զերծցի ՛ի ն(ո)ց(ա)նէ զերծեալն։
²Զի եթէ ծածկեսցին ՛ի դժոխս, անտի́ ձեռն իմ կորզեսցէ զն(ո)ս(ա)։ եւ եթէ ելանիցեն յերկինս, եւ անտի́ իջուցից զն(ո)ս(ա). եւ եթէ թաքիցեն ՛ի բարձունս կարմելայ, եւ անտի́ յուղեցից եւ առից զն(ո)ս(ա)։
³Եւ եթէ ընկեսցին յաչաց իմոց ՛ի խորս ծովու, եւ անդ հրամայեցից վիշապին խայթել զն(ո)ս(ա)։

⁴եւ եթէ գնայցեն ՛ի գերու(թ)ի(ւն) առաջի թշնամեաց իւրեանց, եւ անդ հրաման տաց սրոյ՝ եւ սատակեսցէ զն(ո)ս(ա)։ Եւ հաստատեցից ՛ի վ(ե)ր(այ) ն(ո)ց(ա) զաչս իմ ՛ի չարութի(ւն) եւ ո́չ ՛ի բարութի(ւն)։
⁵եւ տ(է)ր ա(ստուա)ծ ամենակալ որ մերձենայ յերկիր եւ շարժէ զնա, եւ սո́ւգ առցեն ա(մենայ)ն բնակիչք ն(ո)ր(ա). եւ ելցէ իբրեւ զգե́տ վախճան ն(ո)ր(ա), եւ իջցէ իբրեւ զգետն եգիպտացւոց։
⁶Որ շինէ յերկինս զհամբառնալ իւր, եւ զաւետիս իւր յերկիր հաստատէ. որ կոչէ զջուրս ծովու՝ եւ հեղու զնա ՛ի վ(ե)ր(այ) երեսաց երկրի. տ(է)ր ամենակալ անուն է ն(ո)ր(ա)։

⁷Ոչ ապաքէն իբրեւ զորդիս եթւովպացւոց էք դուք ինձ որդիք ի(սրայէ)լի՝ ասէ տ(է)ր։ ո՞չ զի(սրայ)էլ հանի յերկրէն եգիպտացւոց, եւ զայլազգիս՝ ՛ի գամրաց, եւ զասորիս ՛ի բոթորայ։
⁸Ահաւասիկ աչք տ(եառ)ն ՛ի վ(ե)ր(այ) թագաւորու(թ)ե(ան)դ մեղաւորաց. եւ բարձի́ց զդա յերեսաց երկրէ։ սակայն ՛ի սպառ ո́չ ջնջեցի́ց զտունն յակոբու՝ ասէ տ(է)ր։
⁹Զի ահաւասիկ ես հրաման տամ, եւ ցրուեցի́ց զձեզ ընդ ա(մենայ)ն ազգս տո́ւնդ ի(սրայէ)լի։ զոր օրինակ հոսի հոսչաւ, եւ մի́ անկցի մանրուած ն(ո)ր(ա) յերկիր։
¹⁰Սրո́վ վախճանեսցին ա(մենայ)ն մեղաւորք ժողովրդեան իմոյ. որք ասէին՝ ո́չ մերձեսցին՝ եւ ոչ հասցեն ՛ի վ(ե)ր(այ) մեր չարիք։

¹¹Յաւուր յայնմիկ կանգնեցի́ց զխորանն դաւթի զանկեալն, եւ կանգնեցից զկործանեալս ն(ո)ր(ա). եւ զյատակեալս ն(ո)ր(ա) վերստին կանգնեցից. եւ շինեցից զնա ըստ աւուրցն յաւիտենից։
¹²Որպէս զի խնդրեսցեն զիս մնացորդք մարդկան. եւ ա(մենայ)ն ազգք յորոց վ(ե)ր(այ) կոչեցեալ է անուն իմ. ասէ տ(է)ր՝ որ առնէ զայս։
¹³Ահա աւուրք գա́ն ասէ տ(է)ր, եւ հասցեն կալք կթոց, եւ խայծեսցի́ խաղաղ ՛ի հարաւունս. եւ բղխեսցե́ն լերինք զքաղցրութի(ւն), եւ ա(մենայ)ն բլուրք անտառախի́տք եղիցին։
¹⁴Եւ դարձուցի́ց զգերու(թ)ի(ւն) ժողովրդեան իմոյ ի(սրայէ)լի, եւ շինեսցեն զքաղաքս ապականեալս եւ բնակեսցեն. եւ տնկեսցեն այգիս, եւ արբցեն զգինի ն(ո)ց(ա)։ արասցեն պարտէզս՝ եւ կերիցեն զպտուղ ն(ո)ց(ա)։

¹⁵եւ տնկեցի́ց զն(ո)ս(ա) յերկրի իւրեանց. եւ մի́ եւս մերժեսցին յերկրէ իւրեանց, զոր ետու ես ն(ո)ց(ա)՝ ասէ տ(է)ր ա(ստուա)ծ ամենակալ։