¹ՅԱՌԱՋՆՈՒՄ ԱՄԻՆ ԿԻՒՐՈՍԻ արքայի պարսից, ՛ի կատարե́լ բանին տ(եառ)ն ՛ի բերանոյ երեմիայի մարգարէի. զարթո́յց տ(է)ր զոգին կիւրոսի թագաւորին պարսից, եւ ե́տ հրաման պատուիրանի յա(մենայ)ն թագաւորու(թ)ե(ան) իւրում. եւ գրեաց առ ամենեսեան օրինակ զա́յս։
²Ա́յսպէս ասէ կիւրոս թագաւոր պարսից. զա(մենայ)ն թագաւորու(թ)ի(ւն)ս երկրի ե́տ ինձ տ(է)ր ա(ստուա)ծ երկնից. եւ նա́ հրամայեաց ինձ առնել եւ շինել նմա տաճար յե(րուսաղէ)մ հրէաստանի։
³Ո́ ոք եւ իցէ́ ՛ի ձեզ յա(մենայ)ն ժողովրդեան տ(եառ)ն, ը(ստ) որում է́ ա(ստուա)ծ ն(ո)ր(ա) ը(ստ) նմա՝ ելցէ́ յե(րուսաղէ)մ հրէաստանի, եւ շինեսցէ́ զտուն տ(եառ)ն ա(ստուծո)յ ի(սրաէ)լի. եւ ինքն ա(ստուա)ծ որ բնակեալ է յե(րուսաղէ)մ, եղիցի́ ընդ նմա։

⁴Եւ զա(մենայ)ն պատրաստու(թ)ի(ւն) իւր առցէ ը(ստ) իւր, եւ տարցի ՛ի տեղին յայն ուր ինքն բնակեսցէ. եւ առցէ այր ը(ստ) իւր զա(մենայ)ն կազմած իւր՝ որ ինչ եւ իցէ, արծաթեղէն եւ ոսկեղէն, եւ զա́յլ կահ եւ զանասուն՝ հանդերձ ընկերօք իւրեանց առցեն ը(ստ) իւրեանս ՛ի պատրաստու(թ)ի(ւն) տաճարին տ(եառ)ն ա(ստուծո)յ յե(րուսաղէ)մ։
⁵Եւ յարեան իշխանք հայրապետաց որդւոցն յուդայ եւ բենիամինի, եւ քահանայքն եւ ղեւտացիք ամենեքեան՝ զորոց զարթոյց տ(է)ր ա(ստուա)ծ զոգիս ն(ո)ց(ա) ելանել եւ շինել զտաճարն տ(եառ)ն ա(ստուծո)յ յե(րուսաղէ)մ։
⁶Եւ ամենեքեան որ շուրջ էին զնոքօք՝ օգնէին եւ զօրացուցանէին զձեռս ն(ո)ց(ա)՝ տալով արծա́թ եւ ոսկի, եւ զկահ եւ զանասուն, եւ ընծայիւք եւ պատարագօք լցուցանէին զն(ո)ս(ա)։

⁷Եւ թագաւորն կիւրոս ե́տ բերել զա(մենայ)ն սպասս եւ զկահ տաճարին տ(եառ)ն զոր ա́ռ նաբուքոդոնոսոր յե(րուսաղէ)մէ. եւ ետ ՛ի պահ ՛ի տուն աստուածոց իւրոց.
⁸ետ բերել զայն ա(մենայ)ն կիւրոս թագաւոր պարսից ՛ի ձեռն միթրադատայ գանձաւորի, եւ համարեալ՝ ետ ցսամանասար իշխան յուդայ։
⁹Եւ ա́յս է թիւ համարուցն, զոհարանք ոսկեղէնք երեսուն, եւ զոհարանք սպասուն արծաթեղէնք՝ հազար քսան եւ ինն.
¹⁰սկաւառակք ոսկիք՝ երեսուն, եւ արծաթեղէնք՝ կրկին հազար.
¹¹ա(մենայ)ն կահք ոսկեղէնք եւ արծաթեղէնք՝ հինգ հազար եւ չորեքհարիւր։

¹Ա́յս են որդիքն ի(սրաէ)լի, ըստ իւրաքանչիւր տեղեացն, որ ելանէին ՛ի գերութ(են)էն զոր գերեաց նաբուքոդոնոսոր թագաւոր բաբելացւոց ՛ի բաբելոն, զորս եւ դարձոյց կիւրոս ՛ի բաբելոնէ յե(րուսաղէ)մ եւ ՛ի հրէաստան՝ ա́յր յիւրաքանչիւր քաղաք։
²Եւ որք էին ելեալ ը(ստ) զորաբաբելի, յեսուս, նեեմի, սարեաս, հռէի, ղեաս, մարդոքէոս, բաղասան, մասփար, բագուար, հռէում, բաանայ։ Ա́յս է թիւ ժողովրդեան որդւոցն ի(սրաէ)լի։
³Որդիք փորոսայ՝ երկու հազար հարիւր եւթանասուն եւ երկու։
⁴որդիք սափատայ՝ չորեքհարիւր եւթանասուն եւ երկու։
⁵որդիք արեսայ՝ եւթն հարիւր եւթանասուն եւ վեց։

⁶որդիք նեփթաղիմի մովաբացւոյ, եւ որդւոց յեսուայ, եւհռովաբայ՝ երկու հազար ութհարիւր եւ երկոտասան։
⁷Որդիք յեղամայ՝ երկուհազար երկերիւր յիսուն եւ չորս։
⁸որդիք զատոնայ՝ ինն հարիւր քառասուն եւ հինգ։
⁹որդիք քորբայ՝ եւթնհարիւր յիսուն։
¹⁰որդիք բանեայ՝ հազար քառասուն եւ ութ։
¹¹որդիք բիբեայ՝ ութհարիւր քսան եւ երեք։
¹²Որդիք արգեայ՝ երեքհազար երեքհարիւր քսան եւ երկու։
¹³որդիք ադոնիկամայ՝ ութ հարիւր եւթանասուն եւ եւթն։
¹⁴որդիք բոսերայ՝ երկու հազար ութհարիւր եւ վեց։
¹⁵որդիք ադդինեայ՝ չորեքհարիւր յիսուն եւ չորս։

¹⁶Որդիք ազերեզեկիայ՝ իննսուն եւ վեց։
¹⁷որդիք բեսսեայ՝ երեք հարիւր քսան եւ երեք։
¹⁸որդիք գաբերի՝ իննսուն եւ հինգ։
¹⁹որդիք բեթղեհէմ՝ հարիւր քսան եւ երեք։
²⁰որդիք նետափայ՝ յիսուն եւ վեց։
²¹որդիք անաթովթ՝ հարիւր քսան եւ ութ։
²²որդիք ասմովթ՝ քառասուն եւ երկու։
²³Որդիք կարիաթարիմ քափիրայ եւ բերովթ՝ եւթնհարիւր քառասուն եւ երեք։
²⁴որդիք հռասամայ եւ գայեբայ՝ հազար քսան եւ մի։
²⁵որդիք մաքմաս հարիւր քսան եւ երկու։
²⁸որդիք բեթեղեայ եւ յեգեայ՝ չորեքհարիւր քսան եւ երեք։
²⁹որդիք նաբովթ՝յիսուն եւ երկու։
³⁰որդիք մակեբիս՝ հարիւր յիսուն եւ վեց։

³¹որդիք եղամարայ՝ հազար երկերիւր յիսուն եւ չորս։
³²որդիք երամ՝ երեք հարիւր քսան։
³³որդիք զիդղոն զովգադ ՛ի ղեւոնայ՝ եւթն հարիւր քսան եւ հինգ։
³⁴որդիք յերիքոյ՝ երեքհարիւր քառասուն եւ հինգ։
³⁵որդիք սեննայ՝ երեքհազար վեցհարիւր երեսուն։
³⁶Եւ որդիք քահանայիցն, որդիք յեդուայ տանն յեսուայ յովսեդեկեանց՝ իննհարիւր եւթանասուն եւ երեք։
³⁷որդիք եմեր՝ հազար յիսուն եւ երկու։
³⁸որդիք փասուր՝ հազար երկերիւր քառասուն եւ հինգ։
³⁹որդիք երեմ՝հազար եւթնհարիւր։
⁴⁰Եւ ղեւտացիքն, որդիք յեսու եւ կարմիէլ որդւոցն սեգուիա՝ եւթանասուն եւ չորս։

⁴¹Եւ որ էին սաղմոսասացք եւ երգեցիկք. որդիքն ասափայ՝ հարիւր քսան եւ ութ։
⁴²Որդիք դռնապանացն. որդիք էղում. որդիք ատտեր. որդիք տեղմոն. որդիք ակուբբ. որդիք ատիտայ. որդիք սուբայի. ամենեքեան հարիւր երեսուն եւ ինն։
⁴³Եւ նաթանայ՝ որդիք առաղայ. որդիք ասուփայ. որդիք տաբովթ.
⁴⁴որդիք կերաւս. որդիք սիայ. որդիք փագովն։
⁴⁵որդիք ղաբանայ, որդիք ագաբայ, որդիք ակուբ։
⁴⁶որդիք ադաբ. որդիք սաղամէի. որդիք անան.
⁴⁷որդիք գեդդէլ. որդիք գաար. որդիք հռագիայ.
⁴⁸Որդիք հռասովն. որդիք նեկովդան. որդիք գազամ։
⁴⁹որդիք գազայ. որդիք փասէ. որդիք բասի.

⁵⁰որդիք ասենայ. որդիք մովանիմ. որդիք նեփուսիմ.
⁵¹որդիք բակութ. որդիք ակուփայ. որդիք արուր.
⁵²որդիք բաւաղովթ. որդիք միդայ. որդիք արսայ.
⁵³որդիք բարկոս.որդիք սիսարայ. որդիք թամայ.
⁵⁴որդիք նեսուայ. որդիք ատուփայ։
⁵⁵Որդիք ծառայի́ց սողոմոնի. որդիք սոտէ. որդիք ասոփերաթ. որդիք փակդուրայ.
⁵⁶որդիք յեզայ. որդիք կերդովն. որդիք կերդիէլ.
⁵⁷որդիք սափատիայ. որդիք ատտիղ. որդիք փաքերովթայ ասաբում. որդիք եմէի։
⁵⁸Ամենայն որդիք նաթանայ, եւ որդիք ծառայից սողոմոնի, երեքհարիւր իննսուն եւ երկու։

⁵⁹Եւ ա́յս են ելեալքն ՛ի թեղմեղէք թեղարեսա, քերուբ՝ եդար՝ եմեր։ եւ ո́չ կարացին պատմել զտուն հարցն իւրեանց, եթէ իցէ զաւակ ն(ո)ց(ա) յի(սրաէ)լի։
⁶⁰Որդիք գաւազայ. որդիք տուբիու. որդիք նեկովդայ, վեցհարիւր յիսուն եւ երկու։
⁶¹Եւ յորդւոց քահանայիցն՝ որդիք աբաիայ. որդի ակուս. որդիք բերզեղայի. իբրեւ առին ՛ի դստերացն բերզեղայի գաղադացւոյ իւրեանց կանայս, եւ եղեւ մոռացումն անուանց ն(ո)ց(ա)։
⁶²Եւ խնդրեցաւ ազգահամար գրոց ն(ո)ց(ա)՝ եւ ո́չ գտաւ, եւ որոշեցին զն(ո)ս(ա) ՛ի քահանայիցն։

⁶³եւ ասէ անամեսիթա ցն(ո)ս(ա), չէ́ արժան ձեզ ուտել ՛ի սրբութե(ան) սրբու(թ)ե(ան)ցն՝ մինչեւ յարիցէ քահանայապետ՝ եւ յայտնեալ ցուցցէ, եւ նովաւ լուսաւորեսցի ա(մենայ)ն մինչեւ ՛ի սպառ։
⁶⁴Եւ էր ա(մենայ)ն եկեղեցին միանգամայն, չորք բեւրք եւ երկուհազար եւ երեքհարիւր վաթսուն.
⁶⁵առանց ծառայից եւ աղախնաց իւրեանց. եւ կրտսերք ն(ո)ց(ա) եւթն հազար երեք հարիւր երեսուն եւ հինգ։ եւ երգիչք սաղմոսասաց ն(ո)ց(ա) արք եւ կանայք՝ երկերիւր։
⁶⁶Ձիք ն(ո)ց(ա)՝ եւթն հարիւր երեսուն եւ վեց։ ջորիք ն(ո)ց(ա)՝ երկերիւր քառասուն եւ եւթն։
⁶⁷ուղտք ն(ո)ց(ա)՝ չորեքհարիւր երեսուն եւ հինգ։ էշք ն(ո)ց(ա)՝ վեցհազար եւթն հարիւր քսան։

⁶⁸Եւ իշխանք հայրապետացն որք եկին ՛ի տունն տ(եառ)ն յե(րուսաղէ)մ, նպաստաւորեցան ՛ի տունն ա(ստուծո)յ ՛ի պատրաստութի(ւն) շինութե(ան) ն(ո)ր(ա).
⁶⁹որչափ եւ է́ր ՛ի զօրու(թ)ի(ւն) ն(ո)ց(ա), ետուն ՛ի կազմած գանձու գործաւորու(թ)ե(ա)ն. ոսկի՝ դիդրաքմայս վեց բեւր եւ հազար, եւ հարիւր պատմուճանս քահանայիցն։
⁷⁰Եւ նստան քահանայքն եւ ղեւտացիքն, եւ ՛ի ժողովրդոցն, եւ երգեցիկքն, եւ դռնապանքն, եւ նաթանացիքն ՛ի քաղաքս իւրեանց. եւ ա(մենայ)ն ի(սրա)էլ յիւրաքանչիւր քաղաքս։

¹Եւ ժամանեաց եհաս ամիսն եւթներորդ. եւ էին որդիքն ի(սրաէ)լի յիւրաքանչիւր քաղաքս. եւ ժողովեցան ա(մենայ)ն ժողովուրդն իբրեւ զմի այր յե(րուսաղէ)մ։
²Եւ յարեաւ յեսու յովսեդեկեանց՝ եւ եղբարք ն(ո)ր(ա) քահանայք. եւ զորաբաբէլ որդի սաղաթիելի, եւ եղբարք ն(ո)ր(ա) վեց. եւ շինեցին սեղա́ն զոհից տ(եառ)ն ա(ստուծո)յ ի(սրաէ)լի մատուցանել ՛ի վերայ ն(ո)ր(ա) ողջակէզս. ըստ գրելոցն յօրէնսն մովսիսի առնն ա(ստուծո)յ։
³եւ պատրաստեցին զզոհարանն ը(ս)տ կազմու(թ)ե(ան) իւրում. վ(ա)ս(ն) զի կասկածէին յազգաց երկրին. եւ մատուցին ՛ի վ(ե)ր(այ) ն(ո)ր(ա) ողջակէզս վաղվաղակի տ(եառ)ն ա(ստուծո)յ իւրեանց. մի ընդ առաւօտս, եւ մի՝ ընդ երեկոյս։

⁴Եւ արարին զտօն տաղաւարահարացն ըստ գրելոցն, եւ ողջակէզս օրըստօրէ ՛ի մի թուեալ ո(ր)պ(էս) եւ պատուիրեալ էր ն(ո)ց(ա)։
⁵եւ մատուցանէին ա́յլեւս ողջակէզս յամսագլուխս, եւ ՛ի շաբաթս, եւ յա(մենայ)ն տօնս տարեկանաց տ(եառ)ն սրբութե(ան)ց. եւ զա(մենայ)ն ակամայիցն զոր մեղանչէին տ(եառ)ն։
⁶Եւ յառաջնում ամսեանն եւթներորդի սկսան մատուցանել ողջակէզս տ(եառ)ն ա(ստուծո)յ։ եւ տանն ո́չ եւս էր հիմն արկեալ։
⁷Եւ ետուն արծաթ քարահատացն եւ հիւսանցն, եւ կերակուրս եւ ըմպելիս եւ ձէթ՝ սիդոնացւոց՝ եւ տիւրացւոց, եւ բերէին փա́յտս մայրս ՛ի լիբանանէ ը(ստ) ծով ՛ի յոպպէ՝ ո(ր)պ(էս) եւ հրամայեաց ն(ո)ց(ա) կիւրոս թագաւոր պարսից։

⁸Եւ յերկրորդ ամի ելանելոյն ն(ո)ց(ա) յորժամ եկին ՛ի տաճարն տ(եառ)ն յե(րուսաղէ)մ յամսեանն երկրորդի՝ սկսաւ զորաբաբէլ սաղաթիելեանց՝ եւ յեսու յովսեդեկեանց, եւ եղբարք ն(ո)ց(ա), եւ քահանայքն եւ ղեւտացիքն եւ ա(մենայ)ն եկեալքն ՛ի գերութ(են)էն յե(րուսաղէ)մ. եւ կացուցին զղեւտացիսն ՛ի քսանամենից եւ ՛ի վեր՝ վերակացուս ՛ի վ(ե)ր(այ) գործոց տանն տ(եառ)ն։
⁹Եւ յեսու, եւ որդիք ն(ո)ր(ա) եւ եղբարք ն(ո)ր(ա). կադմիէլ եւ որդիք ն(ո)ր(ա). եւ որդիք յուդայ վերակացուք ՛ի վ(ե)ր(այ) գործոյ տանն տ(եառ)ն. որդիք ենադադ եւ եղբարք նորա ղեւտացիք։

¹⁰Եւ արկին հիմն, եւ սկսան շինել զտունն տ(եառ)ն. եւ կային քահանայքն զգեցեալ զպատմուճանսն, եւ հարկանէին զփողս իւրեանց. եւ ղեւտացիքն որդիք ասափայ ծնծղայիւք օրհնէին զտ(է)ր ա(ստուա)ծ՝ ո(ր)պ(էս) եւ կարգեաց դաւիթ թագաւոր ի(սրաէ)լի։
¹¹եւ ասեն այր ցընկեր իւր. խոստովա́ն եղերուք՝ եւ գոհացարո́ւք զտ(թեն)է, զի քաղցր է զի յաւիտեան է ողորմութի(ւն) ն(ո)ր(ա) ՛ի վ(ե)ր(այ) ի(սրաէ)լի։ Եւ ա(մենայ)ն ժողովուրդն մեծաձայն օրհնէին զտ(է)ր ա(ստուա)ծ ի(սրաէ)լի. վ(ա)ս(ն) զի անկան հիմունք տանն տ(եառ)ն։

¹²եւ բազումք ՛ի քահանայիցն՝ եւ յղեւտացւոցն, եւ յիշխանաց՝ եւ ՛ի հազարապետացն՝ եւ ՛ի ծերոցն՝ որոց տեսեալէր զտաճարն տ(եառ)ն. եւ յայնժամ տեսին աչօք իւրեանց զհիմնն ն(ո)ր(ա), լային մեծաձայն. եւ ժողովուրդքն ա(մենայ)ն նշանակէին զուրախու(թ)ի(ւն), եւ բարձրացուցանէին զձայնս իւրեանց։
¹³եւ ո́չոք էր ՛ի ժողովրդեանն որ կարէր գիտել՝ եւ լսել զձայն ուրախութե(ա)ն. վ(ա)ս(ն) զի ժողովուրդն աղաղակէր մեծաձայն, եւ լսելի լինէր ձայնն մինչեւ ՛ի հեռուստ տեղիս։

¹Եւ լուա́ն որք նեղէին զյուդայ եւ զբենիամին, եթէ որդիքն ի(սրաէ)լի ելեալքն ՛ի գերութ(են)էն շինե́ն զտունն ա(ստուծո)յ ի(սրաէ)լի.
²եւ մերձեցան առ զորաբաբէլ եւ առ իշխանս հայրապետացն, եւ ասեն ցնոսա. շինեսցո́ւք եւ մեք ընդ ձեզ, եւ ո(ր)պ(էս) եւ դուք խնդրեսցուք ՛ի տ(թեն)է ա(ստուծո)յ ձերմէ. քանզի եւ մեք նոյնպէս զոհեմք զոհս, յօրէ յորմէ ասորդան թագաւոր ասորւոց ած զմեզ այսր։

³Եւ ասեն ցն(ո)ս(ա) զորաբաբէլ՝ եւ յեսու յովսեդեկեանց՝ եւ մնացորդք իշխանաց հայրապետացն ի(սրաէ)լի. ո́չ է արժան մեզ եւ ձեզ հասարակ շինել զտուն տ(եառ)ն ա(ստուծո)յ մերոյ, մեք մեզէ́ն իսկ շինեսցուք զտուն տ(եառ)ն ա(ստուծո)յ ի(սրաէ)լի, ո(ր)պ(էս) հրամայեաց մեզ կիւրոս թագաւոր պարսից։
⁴Եւ ժողովուրդք երկրին այնորիկ լքուցանէին զձեռս ժողովրդեանն հրէասատանի, եւ խափանէին զն(ո)ս(ա) ՛ի շինելոյ.
⁵եւ կալեալ վարձաւորս՝ խորհէին զն(ո)ս(ա) խափանել զա(մենայ)ն աւուրս կիւրոսի թագաւորու(թ)ե(ա)ն պարսից, մինչեւ յաւուրս դարեհի պարսից արքայի։

⁶՛Ի թագաւորութե(ա)ն ասարսոյերու պասից՝ իսկզբան թագաւորու(թ)ե(ան) ն(ո)ր(ա) գրեցին թուղթ որք բնակեալ էին ՛ի հրէաստանի եւ յե(րուսաղէ)մ։
⁷եւ գրեցին յաւուրս արսասէսի՝ միթրիդատէս, տաբեեղ, հանդերձ եւ ա́յլ ծառայիւք ն(ո)ր(ա) հարկահանօքն, եւ գրեցին գիր ասորերէն. եւ էր զնա թարգմանեալ հռէում բաաղտիմ։
⁸Եւ ա́յս են բանք թղթոյն զոր առաքեցին նոքա առ արսասաս թագաւոր։ ծառայք քո որ եմք բնակեալ յա́յսմ կողմն գետոյն. հռէում բաաղտեմ, եւ սամսայի գրիչ, եւ այլեւս ծառայակիցք մեր, գեենէս, սփսաթ, աքայիլէ, տարփաղէէ, ափերսէէ, ոքուէէ, բաբելոնէէ, սուսանա, քեէդաւեէ։

⁹եւ այլ մնացեալ ազգք, զորս բնակեցոյց ասենափար մեծ եւ պատուական ՛ի քաղաքս սոմորոմ, այսինքն սամարիա յայս կողմն գետոյն։
¹⁰առ արսասա թագաւոր խաղաղութի(ւն)։ Այժմ գիտութի(ւն) լիցի քեզ թագաւոր՝ որ եթէ քաղաքն այն շինեսցի, եւ պարիսպք ն(ո)ր(ա) կանգնեսցին, հա́րկս քեզ ո́չոք տայ.
¹¹այլեւ ընդդիմադա́րձ եւս լիցին թագաւորաց. եւ զայնպիսի յանդգնու(թ)ի(ւն) մեք ը(ստ)դէմ թագաւորաց՝ ո́չ կամիմք տեսանել։ եւ վ(ա)ս(ն) այսր ա(մենայ)նի գրաեաք առ ձեզ թագաւոր.

¹²զի տեսցե́ս եւ արասցես, եւ գտցես ՛ի գիրս յիշատակարանաց հարցն քոց, եւ գիտացեալ եթէ քաղաքս այս ապստամբողաց է. եւ յա(մենայ)ն ժամ ընդդէ́մ կացին թագաւորաց, եւ ապաստա́ն են ա(մենայ)ն փախստէից յա(մենայ)ն ժամանակս յաւիտենից. եւ վ(ա)ս(ն) այսորիկ քաղաքս այս իսկ աւերեցաւ։
¹³Արդ տուաք մեք քեզ գիտել թագաւոր, եթէ քաղաքս այս շինեսցի՝ եւ պարիսպք սորա կանգնեսցին՝ չէ́ քեզ խաղաղու(թ)ի(ւն)։
¹⁴Եւ առաքեաց թագաւորն առ հռեում բաաղտեմա՝ եւ կամսայի գրչի, եւ այլ ծառայակցաց ն(ո)ց(ա) որք բնակեալէին ՛ի սամարիա, եւ մնացոեդացն յայնկողմն գետոյն, եւ ասէ։ Խաղաղութի(ւն) ընդ ձեզ.

¹⁵զհարկահանս զորս առաքեցէք առիս, մտեալ առաջի իմ եւ տեղեկացուցեալ ինձ զա(մենայ)ն.
¹⁶հասի́ ՛ի վ(ե)ր(այ), եւ գտի զի քաղաքդ այդ յաւիտեանս ժամանակաց ապստա́մբ է, եւ ընդդէմ թագաւորաց լեա́լ է.
¹⁷եւ թագաւորք հզօրք եւ բռնաւորք կացեալ են յե(րուսաղէ)մ, բռնացեալ կալեալ զայն կողմն արեւմտից՝ յա́յն կողմն եփրատ գետոյ։ Արդ՝ դիք ՛ի վերայ դոցա հարկս եւ հա́սս, զի մի́ եւ այլ կամակարեալ բռնասցին։
¹⁸արդ ա́յժմ տուեալ ձեզ տեղեկութի(ւն), երթա́յք արգելէ́ք եւ խափանեցէ́ք զգործս ն(ո)ց(ա), զի մի́ շինեսցի քաղաքն։
¹⁹եւ մի́ ներէք ն(ո)ց(ա) եւ թողացուցանէք, այլ փոյթ յանձին կալեալ պահանջե́լ զա(մենայ)ն հարկս եւ զհասս. զի մի́ երբէք բազմասցին եւ զօրասցին, եւ լիցին ընդդէ́մ թագաւորաց։

²⁰Յայնժամ հարկահան արսասաս թագաւորի՝ ա́յսինքն է արտաշիսի՝ բերեալ կարդաց զգիրն առաջի հռեսիմայ՝ եւ սամայի գրչի, եւ ծառայակցաց ն(ո)ր(ա)։ եւ ելեալ փութապէս յե(րուսաղէ)մ եւ ՛ի հրէաստան մեծաւ զօրու(թեամ)բ՝ եւ այրուձիով՝ արգելին եւ խափանեցին զհրէայսն ՛ի շինելոյ։
²¹Յայնժամ խափանեալ դատարկացա́ւ գործ տաճարին տ(եառ)ն ա(ստուծո)յ յե(րուսաղէ)մ. եւ էր դատարկացեալ մինչեւ յերկրորդ ամն դարեհի արքայի պարսից։

¹Եւ մարգարէանային անգեաս եւ զաքարիաս ադդովայ, մարգարէանային ՛ի վերայ հրէաստանի եւ ե(րուսաղէ)մի յանուն տ(եառ)ն ա(ստուծո)յ ի(սրաէ)լի։
²Յայնժամ յարեան զորաբաբէլ սաղաթիելեանց, եւ յեսու յովսեդեկեանց՝ եւ սկսան շինել զտուն տ(եառ)ն ա(ստուծո)յ ի(սրաէ)լի, եւ միաբանեալ ընդ ն(ո)ս(ա) մարգարէքն ա(ստուծո)յ օգնէի́ն ն(ո)ց(ա)։
³Յա́յնմ ժամանակի եկն առ ն(ո)ս(ա) թաթանա իշխան կողմանց գետոյն եփրատու, եւ սաթրաբուզան, եւ ծառայակիցք ն(ո)ց(ա), եւ ասեն ցն(ո)ս(ա). ո՞ հրամայեաց ձեզ շինել զտունս զայս, եւ կամ ո՞յր բանիւ կանգնեցէք զաշտարակս դորա
⁴եւ կամ զի՞նչ անուանք են արանցն այնոցիկ որք են առաջնորդք շինելոյ զքաղաքս զայս։

⁵Եւ էին աչք տ(եառ)ն ա(ստուծո)յ ՛ի վ(ե)ր(այ) հրէիցն դարձելոցն ՛ի գերութ(են)էն. եւ ո́չ խափանեցին զնոսա մինչեւ տացեն գիտե́լ դարեհի արքայի։ եւ յայնժամ առաքեցին զհարկահանս վ(ա)ս(ն) իրացս այսոցիկ՝ զի տեղեկասցին գրով։
⁶Եւ ա́յս է գրեալն։ Թաթանա իշխան կողմանց գետոյն, եւ սաթրաբուզան՝ եւ ծառայակիցք ն(ո)ր(ա), փարսաքեէ եւ ռեսիմ.
⁷դարեհի թագաւորի խաղաղու(թ)ի(ւն) բազում.
⁸գիտու(թ)ի(ւն) լիցի թագաւորիդ, զի երթեալ մեր յերկիրն հրեաստանի ՛ի քաղաքն ե(րուսաղ)էմ, տեսաք զտաճարն տ(եառ)ն ա(ստուծո)յ մեծի, զի շինէին ընտիր քարամբք, եւ փայտս պահանկս դնէին յորմսն. եւ գործն էր յաջողակ, եւ յառաջէր ՛ի ձեռն ն(ո)ց(ա)։

⁹Յայնժամ հարցաք ցծերս ն(ո)ց(ա) եւ ասեմք, ո՞ հրամայեաց ձեզ շինել զտունս զայս, եւ կամ ո՞յր բանիւ հաստատէք զդա։
¹⁰եւ խնդրեալ զանուանս առաջնորդացն, զի տացուք տեղեկու(թ)ի(ւն) ձեզ. եւ զի գրեսցուք զանուանս արանց իշխանաց ն(ո)ց(ա)։
¹¹Եւ զա́յս պատասխանի արարեալ հրէիցն ասեն ցմեզ։ Մեք եմք ծառա́յք տ(եառ)ն ա(ստուծո)յ երկնի եւ երկրի, եւ շինեմք զտունս զայս ո(ր)պ(էս) եւ է́ր շինեալ յառաջ քան զբազում ամս, զոր շինեաց թագաւորն ի(սրաէ)լի մեծն սողոմոն. ըստ այնմ օրինակի եւ մեք հաստատեմք զսա։

¹²վ(ա)ս(ն) զի հարքն մեր բարկացուցին զա(ստուա)ծ երկնի եւ երկրի. եւ ե́տ զն(ո)ս(ա) ՛ի ձեռս նաբուքոդոնոսորայ արքային բաբելացւոց եւ քաղդեացւոց, եւ զտունս զայս քակեաց, եւ զժողովուրդն պանդխտեցոյց ՛ի բաբելոն։
¹³Եւ յառաջնում ամի կիւրոսի թագաւորի բաբելացւոց, կիւրոս թագաւոր հրամայեաց շինել զտունս զայս տ(եառ)ն ա(ստուծո)յ։
¹⁴եւ զկահ տանս այսորիկ զարծաթեղէնս եւ զոսկեղէնս՝ զորս նաբուքոդոնոսոր ա́ռ յե(րուսաղէ)մէ, եւ եկն եբեր ՛ի տուն աստուածոց իւրոց. առեալ զայն կիւրոսի թագաւորի ՛ի տանէ թագաւորին, եւ ետ ցսամանասար գանձաւոր.
¹⁵եւ ասէ ցնա, զա(մենայ)ն սպասդ եւ զկահ ա́ռ եւ ե́րթ յե(րուսաղէ)մ ՛ի տուն տ(եառ)ն որ է անդ։ եւ տա́ր գի́ր զկահդ ՛ի տեղւոջ իւրում։

¹⁶յայնժամ սամանասար եկն՝ եւ արկ զհիմն տաճարիս տ(եառ)ն ա(ստուծո)յ յե(րուսաղէ)մ. եւ յայնմ հետէ շինեմք, եւ ո́չ եւս է կատարեալ։
¹⁷Արդ եթէ բարւո́ք թուի քեզ թագաւոր, ա́յց արա եւ տե́ս ՛ի տունս պահպանութե(ան) գրոց յիշատակարանաց թագաւորաց բաբելացւոց. զի գիտասցես թէ արդարեւ կիւրոս թագաւորն հրամայեաց շինել զտունս տ(եառ)ն ՛ի հրեաստանի յե(րուսաղէ)մ. եւ տեղեկացեալ քո թագաւոր վ(ա)ս(ն) իրացս այսոցիկ՝ առաքեսջի́ր առ մեզ։

¹Յայնժամ դարեհ թագաւոր ա́յց արար՝ խնդրեաց եւ եգիտ ՛ի տունս թագաւորաց գրոց յիշատակարանացն ՛ի բաբելոնի։
²եւ գտեալ յամաթստի քաղաքի բատանացւոց՝ գլուխ մի գրոյ տաւմարի. եւ զայս ինչ գրեալ էր ՛ի գիրս յիշատակարանին։
³Յամին առաջնում կիւրոսի. կիւրոս թագաւոր հրաման ետ վ(ա)ս(ն) տանն տ(եառ)ն որ յե(րուսաղէ)մ. ասէ, շինեսցի́ տաճարն տ(եառ)ն, եւ տեղին ուր զոհեն զզոհսն տ(եառ)ն։ եւ ե́տ զչափ բարձրու(թ)ե(ա)ն կանգունս վաթսուն, եւ լայնու(թ)ե(ա)ն կանգունս վաթսուն.
⁴եւ կարգք երեք ՛ի զօրաւոր քարանց. եւ կարգ մի փայտեղէն. եւ ա́յսպէս շինեսցի եւ յարկցի ա(մենայ)ն տաճարն։

⁵Եւ զկահ տանն տ(եառ)ն՝ զարծաթեղէնս եւ զոսկեղէնս զոր եբեր նաբուքոդոնոսոր ՛ի տանէ տ(եառ)ն յե(րուսաղէ)մէ՝ եւ ե́դ ՛ի բաբելոն. արդ տացին ՛ի բա́ց՝ եւ տարցին ՛ի տաճարն տ(եառ)ն յե(րուսաղէ)մ. եւ երթեալ տարցին ՛ի տեղի իւր ՛ի տունն ա(ստուծո)յ ուր լեալ էր։
⁶Յայնժամ դարեհ ետ զգիր հրամանիս իշխանաց կողմանց գետոյն. սաթրաբուզանայ եւ ծառայակցացն ն(ո)ր(ա) ՛ի կողմանս գետոյն, եւ ե́ւս ՛ի հեռագոյն տեղիս։
⁷Եւ արդ յայսմ հետէ թո́յլ տուք շինել զտունն ա(ստուծո)յ, իշխանացն հրէից եւ ծերոցն ի(սրաէ)լի, եւ շինեսցե́ն զտունն ա(ստուծո)յ ՛ի տեղւոջ իւրում։

⁸եւ ի́մ հրամայեալ՝ մի́ ոք արգելցէ զծերսն ի(սրաէ)լի ՛ի շինել զտուն տ(եառ)ն ա(ստուծո)յ իւրեանց։ եւ յիշխանութ(են)է թագաւորութե(ան) իմոյ որ են հարկահանք կողմանց գետոյն ա(մենայ)ն զգուշութ(եամ)բ տացե́ն զծախս արանցն այնոցիկ՝ եւ մի́ խափանեսցեն։
⁹եւ զորդիս ցլուց՝ եւ խոյս, եւ ամիկս յողջակէզս տ(եառ)ն ա(ստուծո)յ երկնից. ցորեան, եւ աղ, եւ գինի, եւ ձէթ, ո(ր)պ(էս) եւ հրամայեսցեն քահանայապետքն յե(րուսաղէ)մ. եւ լիցի անխափա́ն տուեալ օր ըստ օրէ ո(ր)պ(էս) եւ խնդրեսցեն։
¹⁰եւ մատուսցեն պատարագ ՛ի հոտ անուշից տ(եառ)ն ա(ստուծո)յ երկնից, եւ արասցեն աղօթս վ(ա)ս(ն) կենաց թագաւորի՝ եւ որդւոց ն(ո)ր(ա)։

¹¹Եւ յինէն ել հրամանս այս. եւ ա(մենայ)ն մարդ որ կացցէ ընդդէմ հրամանի իմոյ՝ քակեսցի́ տուն ն(ո)ր(ա), եւ առեալ փայտ ՛ի տանէ ն(ո)ր(ա) ուղղեսցեն՝ եւ բեւեռեսցեն զայրն ՛ի նմա որ եկաց ընդդէմ հրամանի իմոյ. եւ եղիցի նմա ՛ի նախատինս յաւիտենից։
¹²Եւ ա(ստուա)ծ՝ որոյ բնակեալէ անուն ն(ո)ր(ա) անդ՝ ելցէ եւ աւերեսցէ զթագաւորութի(ւն)ն եւ զժողովուրդն, որ յանդգնեցաւ ձգել զձեռն իւր եւ արգելուլ ապականել զտունն ա(ստուծո)յ որ յե(րուսաղէ)մ։ ես դարե́հ թագաւոր՝ եդի զհրամանս զայս, եւ մի́ ոք իշխեսցէ անցանել։
¹³Յա́յնմ ժամանակի իշխան կողմանց գետոյն՝ եւ սաթրաբուզան եւ ծառայակիցք ն(ո)ր(ա), առ որս առաքեաց դարեհ թագաւոր, վաղվաղակի կատարէին զհրամանս ն(ո)ր(ա)։

¹⁴եւ ծերքն հրէից՝ եւ ղեւտացիքն շինէին. ՛ի ժամանակս մարգարէութե(ա)ն անգեայ՝ եւ զաքարիայ որդւոյ ադդովայ։
¹⁵Եւ որ օր երե́ք էր ամսոյն ադարայ՝ յամին վեցերորդի դարեհի արքայի կատարեցա́ւ տաճարն։
¹⁶Եւ արարին որդիքն ի(սրաէ)լի քահանայիքն՝ եւ ղեւտացիքն, եւ որք ելեալ էին ՛ի գերու(թեն)է նաւակատիս տանն տ(եառ)ն մեծաւ ուրախու(թեամ)բ։
¹⁷Եւ մատուցանէին ՛ի նաւակատիս տանն տ(եառ)ն զուարակս հարիւր, խոյս երկերիւր, գառինս չորեքհարիւր. եւ ամիկս յայծեաց վ(ա)ս(ն) մեղաց ա(մենայ)ն ի(սրաէ)լի, երկոտասան՝ ըստ թուոյ ցեղիցն ի(սրաէ)լի։

¹⁸Եւ կացուցին զքահանայսն ըստ տեղեաց իւրեանց, եւ զղեւտացիսն ըստ վիճակի բաժանմանն իւրեանց ՛ի սպասաւորութի(ւն) տ(եառ)ն ա(ստուծո)յ յե(րուսաղէ)մ. երկու հազար երկերիւր որպէս եւ գրեալ է ՛ի գիրս մովսիսի։
¹⁹Եւ արարին որդիքն ի(սրաէ)լի ելեալք ՛ի գերու(թեն)էն զզատիկն տ(եառ)ն ՛ի չորեքտասաներորդ ամսոյն առաջնոյ։
²⁰եւ սրբեցան քահանայքն եւ ղեւտացիք. եւ եղեն ամենեքեան սուրբք. եւ զենին զզատիկն տ(եառ)ն, ա(մենայ)ն որք ելեալ էին ՛ի գերութէն, եւ եղբարք իւրեանց եւ քահանայք։
²¹եւ կերան որդիքն ի(սրաէ)լի զզատիկն ամենեքեան որք որոշեալէին ՛ի պղծութե(ան)ց ազգաց երկրին. եւ որք եկեալէին առ ն(ո)ս(ա) խնդրել զտ(է)ր ա(ստուա)ծ ի(սրաէ)լի։

²²Եւ արարին զտօն բաղարջակերացն զեւթն օր, եւ ուրա́խ եղեն յ(թ)ե(ան)մ. վ(ա)ս(ն) զի ուրախ արար զն(ո)ս(ա) տ(է)ր ա(ստուա)ծ ի(սրաէ)լի։ եւ տ(է)ր դարձոյց զսիրտ թագաւորին ասորւոց առ ն(ո)ս(ա) զի օգնեսցէ եւ զօրացուսցէ զձեռս ն(ո)ց(ա) ՛ի գործ տաճարին տ(եառ)ն ա(ստուծո)յ ի(սրաէ)լի։

¹Եւ յետ բանիցս այսոցիկ ՛ի թագաւորու(թ)ե(ա)ն արտաշէսի արքայի պարսից, ե́լ եզրա որդի սարուայ, որդւոյ ազարիայ, որդւոյ քեղկեայ.
²որդւոյ սեղումայ, որդւոյ սադովկայ, որդւոյ աքիտովբայ.
³որդւոյ սամարիայ, որդւոյեզրայ, որդւոյ մարովթսայ.
⁴որդւոյ զարեայ, որդւոյ ոզիայ, որդւոյ բովկայ.
⁵որդւոյ աբիսուայ, որդւոյ փենեէսի, որդւոյ եղիազարու, որդւոյ ահարոնի առաջին քահանայի։
⁶Ա́յս եզրա՝ որ ել ՛ի բաբելոնէ։ եւ սա էր գրիչ արագագիր օրինացն մովսիսի զոր ետ տ(է)ր ա(ստուա)ծ ի(սրաէ)լի. եւ ետ նմա թագաւորն զա(մենայ)ն որինչ խնդրեաց ՛ի նմանէ. զի ձեռն տ(եառ)ն ա(ստուծո)յ է́ր ը(ստ) նմա։

⁷Եւ ելին ընդ նմա յորդւոցն ի(սրաէ)լի՝ եւ ՛ի քահանայից՝ եւ յղեւտացւոց, եւ յերգեցիկ պաշտօնէից, եւ ՛ի դռնապանաց՝ եւ ՛ի նաթանայացւոցն յե(րուսաղէ)մ։ Յամին եւթներորդի արտաշիսի թագաւորի.
⁸ելին յե(րուսաղէ)մ յամսեանն հինգերորդի, որ էր ամ եւթներորդ թագաւորին։
⁹եւ յամսամտին հինգերորդ ամսեանն ե́կն եզրա յե(րուսաղէ)մ. վ(ա)ս(ն) զի ձեռն տ(եառ)ն ա(ստուծո)յ բարութ(եամ)բ էր ընդ ն(ո)ս(ա)։
¹⁰Եւ ե́դ եզրա ՛ի սրտի իւրում խնդրել զօրէնսն տ(եառ)ն, եւ գրել զնա, եւ ուսուցանել ի(սրաէ)լի զհրամանս եւ զդատաստանս։

¹¹Եւ ա́յս են իրք հրամանի զոր ետ արտաշէս թագաւոր եզրի քահանայի եւ գրչի գրոց բանի օրինացն տ(եառ)ն, եւ հրամանաց ն(ո)ր(ա) ՛ի վ(ե)ր(այ) ի(սրաէ)լի։
¹²Արտաշէս թագաւորաց թագաւոր, եզրի գրչի օրինացն տ(եառ)ն ա(ստուծո)յ երկնից.
¹³ա(մենայ)ն հաստատութ(եամ)բ ետու ես հրաման ՛ի վ(ե)ր(այ) ամենեցուն որ են ը(ստ) թագաւորութ(եամ)բ իմով, եւ ժողովրդոցն ի(սրաէ)լի, եւ քահանայից եւ ղեւտացւոցն, զի ելցեն ամենեքեան յե(րուսաղէ)մ ը(ստ) քեզ։
¹⁴Յերեսաց թագաւորի, եւ եւթն խորհրդակցացն առաքեցաւ գիրս այս, ա́յց առնել հրէիցն՝ եւ ե(րուսաղէ)մացւոցն առաջնորդու(թեամ)բ եզրի, որոյ են օրէնք ա(ստուծո)յ ՛ի ձեռին իւրում։

¹⁵Եւ հրամայեաց թագաւորն տա́լ ՛ի տուն տ(եառ)ն արծաթ եւ ոսկի, հանդերձ խորհրդակցօք իւրովք յե(րուսաղէ)մ, եւ դնել ՛ի տաճարին առաջի տ(եառ)ն ա(ստուծո)յ ի(սրաէ)լի։
¹⁶եւ ա(մենայ)ն որոյ գտցի արծաթ եւ ոսկի՝ հրէայք որք իցեն պանդուխտք ՛ի բաբելոն՝ ժողովուրդք եւ քահանայք, առցե́ն՝ը իւրեանս եւ տարցին ՛ի տուն տ(եառ)ն յե(րուսաղէ)մ։
¹⁷Եւ ամենեքեան որք ելցեն՝ պատրաստեսցեն զա́յս օրինակ, ո(ր)պ(էս) եւ գրեցաք. Զուարակս, խոյս, գառինս, եւ զզոհս եւ զնուէրս իւրեանց. եւ մատուսցեն ՛ի վ(ե)ր(այ) սեղանոյ տ(եառ)ն ա(ստուծո)յ իւրեանց յե(րուսաղէ)մ։

¹⁸Ե́ւս առաւել վ(ա)ս(ն) քո՝ ասէ, եւ վ(ա)ս(ն) եղբարց քոց արարի բարութի(ւն), եւ թողի́ զարծաթ եւ զոսկի, որպէս վայելէ́ ա(ստուծո)յ ձերոյ՝ արարէ́ք։
¹⁹եւ զկահ տուեալ քեզ ՛ի սպասաւորութի(ւն) տանն տ(եառ)ն, ա́ռ ընդ քեզ՝ եւ տա́ր յե(րուսաղէ)մ։
²⁰եւ զաւելորդսն տաջի́ր ՛ի պահեստ գանձու տան թագաւորաց։
²¹Ե́ս արտաշէս թագաւոր ետու հրաման ա(մենայ)ն գանձաւորաց որ իցեն յա́յն կողմն եփրատ գետոյն, զա(մենայ)ն ինչ զոր եւ խնդրեսցէ ՛ի ձէնջ եզրա քահանայ եւ գրիչ օրինացն տ(եառ)ն ա(ստուծո)յ երկնից, տաջի́ք ՛ի տուն տ(եառ)ն ա(ստուծո)յ ն(ո)ր(ա)։
²²Պատրա́ստ արարէք արծաթ՝ տաղանտս հարիւր. եւ ցորեան՝ քոռս հարիւր, եւ գինի՝ նո́յնչափ, եւ ձէթ՝ նո́յնչափ։

²³եւ մի́ ոք կացցէ ընդդէմ հրամանաց թագաւորի։ Զա(մենայ)ն ինչ զոր հրամայեցի ՛ի տուն տ(եառ)ն ա(ստուծո)յ երկնից եւ երկրի՝ այս եղիցի։ եւ մի́ ոք ձեռնարկեսցէ խափանե́լ ՛ի տանէ տ(եառ)ն ա(ստուծո)յ ի(սրաէ)լի. զի մի́ եղիցի բարկութի(ւն) ՛ի տ(թեն)է ա(ստուծո)յ ՛ի վերայ թագաւորու(թ)ե(ան) իմոյ՝ եւ որդւոյ իմոյ։
²⁴Եւ ետու ձեզ գիտել թէ ա(մենայ)ն որ իցեն ՛ի քահանայից եւ յղեւտացւոց՝ եւ ՛ի սաղմոսերգողաց՝ դռնապանացն եւ նաթանացւոցն, եւ որք իցեն սպասաւորք տանն ա(ստուծո)յ՝ մի́ տացեն հարկս, եւ մի́ ոք իշխեսցէ ծառայեցուցանել զն(ո)ս(ա)։

²⁵Եւ դու եզրա՝ որոյ է իմաստու(թ)ի(ւն) ա(ստուծո)յ ՛ի ձեռին քում, կացո́ գրիչս եւ դատաւորս՝ զի դատեսցեն զա(մենայ)ն ժողովուրդս որ են յա́յն կողմն գետոյն, եւ ուսուսցեն ամենեցուն որք ո́չ գիտիցեն զօրէնս ա(ստուծո)յ քոյ։ Եւ ամենեքեան որք ո́չ գիտիցեն.
²⁶եւ ամենեքեան որք ո́չ առնիցեն ըստ օրինացն տ(եառ)ն՝ եւ ը(ս)տ օրինաց թագաւորին, մատնեալք լիցին ՛ի դատաստան ըստ գործոց իւրեանց, եթէ ՛ի մահ, եթէ ՛ի տանջանս, եթէ ՛ի տուգանս, եւ եթէ ՛ի կապանս։
²⁷Օրհնեա́լ է տ(է)ր ա(ստուա)ծ հարցն մերոց՝ որ արկ զայս ՛ի սիրտ թագաւորին, եւ փառաւորեաց զանուն տ(եառ)ն ա(ստուծո)յ մերոյ որ է յե(րուսաղէ)մ։

²⁸եւ արար առիս զողորմու(թ)ի(ւն)՝ եւ պատուեաց զիս առաջի թագաւորին եւ խորհրդակցաց ն(ո)ր(ա), եւ առաջի ա(մենայ)ն իշխանաց թագաւորին։ եւ ես զօրացայ. վ(ա)ս(ն) զի ձեռն տ(եառ)ն ա(մենայ)ն բարու(թեամ)բ է́ր ընդիս. ժողովեցի զա(մենայ)ն իշխանս ի(սրաէ)լի ելանել ընդիս։

¹Եւ ա́յս են իշխանք հայրապետացն որ ելանէին ընդիս ՛ի թագաւորու(թ)ե(ա)ն արտաշէսի թագաւորի բաբելացւոց։
²Յորդւոցն փենեէսի՝ գեթսոն. յորդւոցն իթամարայ՝ դանիէլ. յորդւոցն դաւթայ՝ յատուս։
³յորդւոցն նաաքա՝ նիա։ յորդւոցն փորոսայ՝ զաքարիա, եւ ը(ստ) նմա արք հարիւր յիսուն։
⁴յորդւոցն փաաթմովաբ՝ եղիանա որդի զարա, եւ ընդ նմա երկերիւր արանց։
⁵յորդւոցն զատուէլի՝ սեքենիա որդի ազիելի, եւ ընդ նմա երեք հարիւր արանց։
⁶յորդւոցն ագինայ՝ աբէն որդի յովնաթանայ, եւ ընդ նմա յիսուն արանց։
⁷յորդւոցն եղամի՝ իսաիաս որդի աթաղիայ, եւ ընդ նմա եւթանասուն արանց։

⁸յորդւոցն սափատիայ՝ զամբդիա որդի միքայելի, եւ ընդ նմա եւթանասուն արանց։
⁹յորդւոցն յովաբայ՝ բադիա որդի յեւելի, եւ ը(ստ) նմա երկերիւր եւ ութտասն արանց։
¹⁰յորդւոցն բաանայ սեղիմութ որդի յովսեփու, եւ ընդ նմա հարիւր վաթսուն արանց։
¹¹յորդւոցն բաբէի՝ զաքարիաս որդի բաբի, եւ ընդ նմա քսան եւ ութ արանց։
¹²յորդւոցն ադոնիկամայ եւ ազդադայ եւ յովնան որդի սակատանայ, եւ ը(ստ) նմա հարիւր եւ տասն արանց։
¹³Յորդւոցն ադոնիկամ՝ էսքարի, եւ ա́յս են անուանք ն(ո)ց(ա), եղիփաղաթ, յէիեղ, եւ սամա, եւ ընդ նմա վաթսուն արանց։
¹⁴յորդւոցն բադուի՝ ութայի, եւ զաբութ, եւ ընդ նմա եւթանասուն արանց։

¹⁵Եւ ժողովեցի զն(ո)ս(ա) առ եզր գետոյն որ գայ յեւի, եւ առեալ անդ օթեւանս աւուրս երիս. եւ ՛ի բազմութի(ւն) ժողովրդեանն յորդւոց քահանայիցն, եւ յորդւոցն ղեւեայ ո́չ գտի զոք։
¹⁶Եւ առաքեցի առ եղիազար, եւ առ արիէլ, եւ առ սեմեայ. եւ զառնաամ, եւ զարիբ, եւ զեղնաթան, եւ զնաթան, եւ զզաքարիա, եւ զմէսողաամ, եւ զյովարիբ, եւ զյեղամաթամ.
¹⁷եւ իմացուցեալ ածին զն(ո)ս(ա) առաջի իշխանացն որ էին ՛ի տեղւոջ գանձաւորացն, եւ եդի բանս ՛ի բերանս ն(ո)ց(ա) խօսել ընդ եղբարս իւրեանց. նաթանիմ, որ էր ՛ի տեղի գանձաւորաց զորս ածին առ մեզ. որք երգէին ՛ի տան ա(ստուծո)յ մերոյ։

¹⁸եւ եկին առ մեզ. քանզի էր ձեռն տ(եառ)ն ՛ի բերութի(ւն) ընդ մեզ. Յորդւոցն ղեւեայ որդւոյ ի(սրաէ)լի. եւ զառաջինն եկին առ մեզ որդիք ն(ո)ր(ա) եւ եղբարք ն(ո)ր(ա) ութեւտասն։
¹⁹Եւ ասեբիա եւ յեսեա որդի մերարեայ, եւ եղբարք ն(ո)ր(ա) եւ որդիք ն(ո)ր(ա)՝ արք քսան։
²⁰Եւ ՛ի նաթանայ զոր ետ դաւիթ եւ իշխանքն ՛ի ծառայութի(ւն) ղեւտացւոցն, եւ ՛ի նաթանայիմ երկերիւր եւ քսան. ամենեքեան ժողովեցան ըստ անուան իւրեանց։
²¹Եւ քարոզեցաք անդ պա́հս առ եզր գետոյն առիս, եւ մատուցաք անդ աղօթս առաջի տ(եառ)ն ա(ստուծո)յ մերոյ, խնդրել ՛ի նմանէ ճանապարհ ուղղու(թ)ե(ան)՝ մե́զ եւ որդւոց մերոց՝ եւ ա(մենայ)նի որ ընդ մեզ։

²²վ(ա)ս(ն) զի ամաչեցաք խնդրել ՛ի թագաւորէն հեծեալս ապրեցուցանել զմեզ ՛ի թշնամեացն մերոց ՛ի ճանապարհին. վ(ա)ս(ն) զի ասացաք ցթագաւորն ա́յսպէս, եթէ ձեռն տ(եառ)ն մերոյ օգնէ ամենեցուն որ խնդրեն զնա ՛ի բարութի(ւն). եւ զօրու(թ)ի(ւն) ն(ո)ր(ա) եւ բարկու(թ)ի(ւն) ն(ո)ր(ա) ՛ի վերայ ամենեցուն ոյք թողուն զնա։
²³եւ պահեցաք, եւ խնդրեցաք յա(ստուծո)յ մերոյ վ(ա)ս(ն) այսր ա(մենայ)նի՝ եւ լուաւ տ(է)ր։
²⁴Եւ առաքեցաք յիշխանացն քահանայից երկոտասան, զսարաբիա, եւ զասաբիա, եւ ընդ նոսա յեղբարց ն(ո)ց(ա) տասն։

²⁵եւ կշռեցաք եւ տուա́ք ցն(ո)ս(ա) զարծաթ եւ զոսկի, եւ զսպաս առաջաւորու(թ)ե(ան) տանն ա(ստուծո)յ մերոյ. զոր բարձրացոյց զմեզ թագաւորն եւ խորհրդակիցք ն(ո)ր(ա) եւ իշխանք ն(ո)ր(ա), եւ ա(մենայ)ն ի(սրա)էլ որ միանգամ էին անդ։
²⁶եւ կշռեալ ետու ցն(ո)ս(ա) արծաթ տաղանտս՝ վեցհարիւր յիսուն, եւ կահ արծաթոյ՝ հարիւր, եւ ոսկւոյ՝ տաղանտս հարիւր։
²⁷եւ այլ կահ ոսկւոյ՝ քսան եւ երեք, եւ կահ պղնձոյ սուրբ եւ մաքուր ոսկեզօծ։
²⁸Եւ ասացի ցն(ո)ս(ա), եւ դուք սրբեալք տ(եառ)ն ա(ստուծո)յ էք, եւ ա(մենայ)ն կահ սուրբ է տ(եառ)ն, եւ ոսկեղէնք եւ արծաթեղէնք ընտրեալք տ(եառ)ն ա(ստուծո)յ հարցն մերոց.

²⁹արթո́ւն կացէք եւ պահեցէ́ք՝ մինչեւ կշռեսջիք զդոսա առաջի իշխանաց քահանայիցն եւ ղեւտացւոցն, եւ իշխանաց հայրապետացն ի(սրաէ)լի՝ որ են յե(րուսաղէ)մ ՛ի խորանս տան տ(եառ)ն։
³⁰Եւ առեալ քահանայիցն եւ ղեւտացւոցն զհամար ոսկւոյ եւ արծաթոյ՝ եւ զկահս ՛ի տանել յե(րուսաղէ)մ ՛ի տուն ա(ստուծո)յ մերոյ։
³¹Եւ յարուցեալ չուեցա́ք ՛ի գետոյն էոս՝ որ օր երկոտասան էր ամսոյն առաջնոյ, եւ եկեալ հասաք յե(րուսաղէ)մ. եւ ձեռն տ(եառ)ն ա(ստուծո)յ մերոյ է́ր ընդ մեզ, եւ փրկեաց զմեզ ՛ի ձեռաց թշնամեաց մերոց, եւ ՛ի պատերազմողաց զճանապարհայն։
³²եւ եկաք յե(րուսաղէ)մ, եւ հանգեաք անդ աւուրս երիս։

³³եւ յաւուրն չորրորդի կշռեալ տուաք զարծաթ եւ զոսկի եւ զկա́հ ՛ի տուն տ(եառ)ն ա(ստուծո)յ մերոյ, ՛ի ձեռն մարեմովթ որդի ոնիայ քահանայի, եւ որ է́ր ը(ստ) նմա եղիազար որդի փենեէսի, եւ յովաբաթ որդի յեսուայ, եւ նովադիա որդի բանեայ եւ ա́յլ ղեւտացիք։
³⁴Եւ էր թուով եւ համարով ա(մենայ)ն, եւ գրեցաւ ա(մենայ)ն կշիռ համարոյն բովանդակ։
³⁵Եւ ՛ի ժամանակին յայնմիկ որք եկեալէին ՛ի գերութ(են)էն որդիք պանդխտութե(ան), մատուցին ողջակէզս տ(եառ)ն ա(ստուծո)յ ի(սրաէ)լի, զուարակս՝ երկոտասան վ(ա)ս(ն) ա(մենայ)ն ի(սրաէ)լի. խոյս՝ իննսուն եւ վեց. գառինս՝ եւթանասուն եւ եւթն. ամիկս վ(ա)ս(ն) մեղաց՝ երկոտասան։ Զա́յս ա(մենայ)ն ողջակէզս մատուցին տ(եառ)ն ա(ստուծո)յ։

³⁶եւ ետուն զգիր կարասւոյն, զոր հրամայեալ էր թագաւորին ցիշխանս կողմանց գետոյն եփրատու. եւ փառաւորեցին զժողովուրդն եւ զտաճարն ա(ստուծո)յ։

¹Եւ ՛ի կատարել այսր ա(մենայ)նի՝ մերձեցա́ն առիս իշխանքն եւ ասեն, ո́չ որոշեցան ժողովուրդն ի(սրաէ)լի եւ քահանայքն եւ ղեւտացիքն ՛ի ժողովրդոց՝ եւ յերկրէ՝ որ են հեռագոյն ՛ի նոցանէ. քանանացին, եւ քետացին, եւ փերեզացին, եւ յեբուսացին, եւ ամմոնացին, եւ մովաբացին, եւ եգիպտացին, եւ ամովրհացին։
²Քանզի արարին կանա́յս ՛ի դստերաց ն(ո)ց(ա), ինքեա́նք եւ որդիք իւրեանց. եւ խառնակեալ պղծեցաւ սերմն սրբու(թ)ե(ան) ն(ո)ց(ա) ը(ստ) ժողովուրդ երկրին այնորիկ. եւ եղեւ սկիզբն անօրենութե(ան)ս այսորիկ յիշխանացն։
³Եւ եղեւ յորժամ լուա́յ ես զբանս զայսոսիկ՝ պատառեցի զհանդերձս իմ, եւ փետեցի́ զհերս եւ զմօրուսս իմ, եւ այնպէս նստէի ՛ի սուգ։

⁴Եւ ժողովեցան առիս ամենեքեան որք էին երկիւղածք յա(ստուծո)յ ի(սրաէ)լի. որք էին ժողովեալք յելիցն պանդխտութե(ան). եւ ես ա́յնպէս նստէի ՛ի սուգ մինչեւ ՛ի ժամ զոհի́ երեկոյին։
⁵Եւ ՛ի զոհի երեկոյին՝ յարեա́յ ՛ի տառապանաց իմոց եւ պատառեալ հանդերձիւք իմովք, խոնարհեալ կորանայի ՛ի վ(ե)ր(այ) ծնգաց իմոց. եւ տարածեալ ամբարձեալ զձեռս իմ առ տ(է)ր ա(ստուա)ծ,
⁶եւ ասեմ. Ա(ստուա)ծ իմ եւ տ(է)ր՝ ամաչե́մք եւ զարհուրի́մք ՛ի քէն. բարձրացո́ տ(է)ր ա(ստուա)ծ իմ զերեսս իմ առ քեզ. վ(ա)ս(ն) զի անօրէնութի(ւն)ք մեր բազմացան ՛ի վ(ե)ր(այ) գլխոց մերոց, եւ մե́ղք մեծացան եւ բարձրացան մինչեւ յերկինս.

⁷յամա́ց եւ ՛ի ժամանակաց հարցն մերոց, եւ եմք մեք ՛ի մեղս մեծամեծս մինչեւ ցայսօր. եւ վ(ա)ս(ն) մեղաց մերոց մատնեցե́ր զմեզ եւ զթագաւորս մեր, եւ զորդիս մեր՝ ՛ի ձեռն թագաւորացն հեթանոսաց, եւ ՛ի սուր եւ ՛ի գերու(թ)ի(ւն) եւ ՛ի յափշտակու(թ)ի(ւն), եւ յամօթ երեսաց մերոց եղեա́ք մինչեւ յօրս յայս։
⁸Եւ այժմ գթու(թ)ի(ւն)ք քո եղե́ն ՛ի վ(ե)ր(այ) մեր տ(է)ր ա(ստուա)ծ մեր, եւ շնորհեցեր մեզ փրկութի(ւն), եւ հաստատեցե́ր զմեզ ՛ի տեղի սրբութե(ան) քոյ, եւ լուսաւորեցեր զաչս մեր այսօր տ(է)ր ա(ստուա)ծ մեր. եւ ետուր մեզ կենդանութի(ւն) փոքր ՛ի շատէ ՛ի ծառայու(թ)ե(ա)ն մերում։

⁹վ(ա)ս(ն) զի ծառա́յ եղաք. եւ ՛ի ծառայութե(ա)ն մերում ո́չ թողեր զմեզ տ(է)ր ա(ստուա)ծ մեր, եւ խոնարհեցան առ մեզ ողորմու(թ)ի(ւն)ք քո առաջի թագաւորին պարսից տա́լ զմեզ ՛ի կենդանութի(ւն), եւ բարձրացուցանել զտուն ա(ստուծո)յ մերոյ, կանգնե́լ եւ շինել զանապատս զայս. եւ արկանել ցանգ եւ պարիսպ ամրութե(ան) յուդայ եւ ե(րուսաղէ)մի։
¹⁰Եւ արդ զի՞նչ տացուք պատասխանի առաջի քո տ(է)ր՝ եւ զհրամանօք,
¹¹զոր ետո́ւր ՛ի ձեռն ծառայից քոց մարգարէից, ասելով ա́յսպէս. եթէ երկիրն յոր մտանելոց ես ժառանգել զնա, է́ երկիր պղծեալ ՛ի պղծութե(ան)ց ազգաց երկրին այնորիկ, եւ աղտեղութ(եամ)բք իւրեանց լցին զնա։

¹²Եւ արդ՝ մի́ առնուցուս ՛ի դստերաց ն(ո)ց(ա) կանայս որդւոց քոց, եւ զդստերս քո մի́ տաս կանայս որդւոց ն(ո)ց(ա), եւ մի́ խնդրեսցես առնել խաղաղութի(ւն) ընդ ն(ո)ս(ա) զա(մենայ)ն ժամանակս. եւ եղիջիր դու զօրաւոր ուտել զբարութի(ւն) երկրին, եւ ժառանգեսցեն որդիք քո զերկիրն զայն յաւիտեա́նս ժամանակաց։
¹³Եւ որինչ միանգամ ա́նցք անցին ընդ մեզ վ(ա)ս(ն) գործոց մերոց, եւ չարութե(ան) մեղաց մերոց. այլ դո́ւ տ(է)ր բազում անգամ թողեր զմեղս մեր, եւ ետուր մեզ այսպիսի́ զաւակ եւ արմատ։

¹⁴եւ մեք դարձեալ խոտորեցաք անցեալ զօրինօք քովք, եւ խառնակեցա́ք ընդ աղտեղութի(ւն)ս հեթանոսաց երկրին. եւ ո́չ բարկացար մեզ ՛ի կորուսանել զմեզ մինչեւ ցայս վայր, եթէ ո́չ մնասցէ արմա́տ եւ զաւակ անուան մեր։
¹⁵Տ(է)ր ա(ստուա)ծ ի(սրաէ)լի՝ դու արդա́ր եւ ճշմարիտ ես, որ ո́չ սպառեցեր զզաւակ մեր. այլ մնաց մեր արմա́տ եւ զաւակ մինչեւ ցայսօր։ եւ արդ ահաւասիկ ե́մք այսօր առաջի քո յանօրէնու(թ)ի(ւն)ս մեր, եւ ո́չ եւս կերեմք ամբառնալ զգլուխ մեր՝ եւ կա́լ առաջի երեսաց քոց. զի բազմացա́ն անօրէնութի(ւն)ք մեր եւ չարիք՝ առաւե́լ քան զգլուխս մեր։

¹Եւ յորժամ եկա́ց եզրաս յաղօթս հանդերձ խոստովանութ(եամ)բս այսոքիւք, եւ ողբովք մեծամեծօք անկեալ էր ՛ի վ(ե)ր(այ) երեսաց երկրի առաջի տ(եառ)ն. ժողովեցա́ն առ նա ա(մենայ)ն որ էին յե(րուսաղէ)մ ժողովուրդ բազում, ա́րք եւ կանայք՝ երիտասարդք եւ կուսանք, եւ ողբայր ժողովուրդն, եւ համբարձին զձայնս լալոյ իւրեանց։
²Եւ պատասխանի ետ յեքոնիա որդի եղեայ որդւոյն եղամայ, եւ ասէ ցեզրա՝ մեք մեղա́ք առ տ(է)ր ա(ստուա)ծ մեր, եւ արարաք զկանայս յայլազգեաց երկրիս այսորիկ. եւ այժմ ե́ն անօրէնութի(ւն)ք այսօր ՛ի մէջ ի(սրաէ)լի։

³Եւ արդ՝ ուխտեսցուք ուխտս առաջի տ(եառ)ն ա(ստուծո)յ մերոյ հանե́լ զա(մենայ)ն կանայս այլազգիս, եւ զզաւակս որ ՛ի ն(ո)ց(ա)նէ։ եւ արդ՝ ո(ր)պ(էս) կամիս արի́ եւ կեցո́ զսոսա օրինօքն տ(եառ)ն ա(ստուծո)յ. եւ ո(ր)պ(էս) պատուիրանք հրամայեն,
⁴արի́ եւ լուիցուք ՛ի բերանոյ քումմէ, եւ մեք ընդ քեզ. զօրացի́ր եւ արա́ ո(ր)պ(էս) եւ հրամայեալէ ՛ի տ(թեն)է ա(ստուծո)յ։
⁵Եւ յարուցեալ եզրայ երդմնեցոյց զիշխանս ցեղից քահանայից եւ ղեւտացւոց. եւ զա(մենայ)ն ի(սրա)էլ առնէր ըստ այսմ օրինակի երդման։
⁶Եւ յարուցեալ եզրայ յերեսաց տանն ա(ստուծո)յ, երթեալ ՛ի տուն գանձին առ յոհան որդի եղիսուբայ՝ հաց ո́չ եկեր, եւ ջուր ո́չ արբ, եւ ողբացեալ ՛ի վ(ե)ր(այ) անօրէնութե(ա)ն՝ եւ մեծամեծաց մեղաց բազմութե(ա)ն։

⁷Եւ քարո́զ կարգային ՛ի հրէաստանի եւ յե(րուսաղէ)մ,
⁸ա(մենայ)ն ոք՝ որ ո́չ եկեսցէ յե(րուսաղէ)մ մինչեւ յերիս աւուրս, յիշխանաց եւ ՛ի ծերոցն՝ եղիցի նզովեա́լ, եւ ա(մենայ)ն ստացուածք ն(ո)ր(ա), եւ ինքն ՛ի բա́ց եղիցի յեկեղեցւոյ ժողովրդոցն ի(սրաէ)լի։
⁹Եւ ժողովեցան ա(մենայ)ն արք յուդայ եւ բենիամինին յե(րուսաղէ)մ յերիս աւուրս, յիններորդ ամսեանն որ օր քսան էր ամսոյն. եւ նստան ա(մենայ)ն ժողովուրդն ՛ի հրապարակի տան տ(եառ)ն. եւ էին զարհուրեալք ՛ի բանից ն(ո)ր(ա), եւ ՛ի ցրտու(թեն)է ձմերայնոյն։
¹⁰Եւ յարուցեալ եզրայ ասէ ցնոսա. դո́ւք էք որ մեղայք, եւ արարէք կանայս զդստերս այլազգեաց. եւ յաւելիք զմեղս եւ զանօրէնու(թ)ի(ւն)ս ՛ի վ(ե)ր(այ) ի(սրաէ)լի։

¹¹եւ արդ՝ տուք զօրհնու(թ)ի(ւն) տ(եառ)ն ա(ստուծո)յ հարցն մերոց, եւ արարէ́ք զհաճոյսն առաջի ն(ո)ր(ա). եւ զատեալ որոշեցա́յք յա(մենայ)ն հեթանոսաց երկրի, եւ ՛ի կանանց այլազգեաց զորս արարէք։
¹²Եւ պատասխանի ետուն ա(մենայ)ն եկեղեցին՝ եւ ասեն. մե́ծ է բանս այս զոր ասես դու ՛ի վ(ե)ր(այ) մեր։
¹³վ(ա)ս(ն) զի ժողովուրդ բազումք եմք, եւ ժամանակս ձմե́ռն է. եւ ո́չ կարեմք կալ արտաքոյ, եւ գործդ ո́չ է զմի օր կամ զերկու, վ(ա)ս(ն) զի սաստիկ մեղաք յիրս յայս։

¹⁴Կացցե́ն իշխանք յա(մենայ)ն տեղիս եւ ՛ի քաղաքս, եւ որոց իցէ արարեալ կանայս յայլազգեաց՝ եկեսցեն ՛ի ժամանակն, զոր ծերքն եւ հայրապետքն կարգեսցեն ՛ի քաղաքս քաղաքս՝ եւ դատեալ քաւեսցեն զմեղս զայս ՛ի մէնջ, եւ դարձուսցեն զբարկութի(ւն) ա(ստուծո)յ ՛ի մէնջ որ վ(ա)ս(ն) բանիս այսորիկ։
¹⁶Եւ արարին ա́յսպէս որ ելեալ էին ՛ի գերութ(են)էն. եւ ընտրեաց եզրաս արս իշխանս ՛ի հայրապետաց տանն իւրոյ՝ զարս անուանիս. եւ շրջեցան յամսամտի տասներորդ ամսոյն՝ եւ վճարեցին։
¹⁷եւ որոշեցին զա(մենայ)ն արս որք ունէին կանայս յայլազգեացն մինչեւ ՛ի մո́ւտ ամսոյն առաջնոյ։

¹⁸Եւ գտան յորդւոցն քահանայիցն որք ունէին զկանայս՝ յայլազգեացն. յորդւոցն յեսովայ յովսեդեկեանց, եւ եղբօր ն(ո)ր(ա) մանասէի եւ եղիազարու, յարիր՝ եւ գադաղիա։
¹⁹եւ սկսան հանել զկանայս այլազգեացն՝ յինքեանց։ եւ մատուցին իւրաքանչիւր՝ խո́յս վ(ա)ս(ն) թողութե(ան) մեղացն անգիտութե(ան)։
²⁰Եւ յորդւոցն երամ՝ մասիս,եղիա, սամարիա, եւ եղոզիաս։
²²եւ յորդւոցն փասուր՝ եղիանաս, մասիէլ, միսայէլ, նաթանայէլ, յովզաբաթ, եւ եղասա։
²³եւ յորդւոցն ղեւտացւոց՝ յեւզաբաթ, սամութ, կովղիա՝ այս է՝ կովղիտոս, եւ ափեթիաս, եւ յուդաս. եւ եղեազար։
²⁴Եւ ՛ի սաղմոսերգացն՝ եղիսափ. եւ ՛ի դռնապանացն՝ կողէմ, էտեղէս, եւ ուրի։

²⁵Եւ յի(սրաէ)լէ, յորդւոցն փորոսայ՝ հռամայիա, յավիա, մեղքիա, էակիմ, եղեազար, ասաբիա, նիբանիա։
²⁶Եւ յորդւոցն եղամ՝ մատտաթանիա, զաքարիա, յաւեղ, աբդիա, երիմովթ, եղիա։
²⁷Եւ յորդւոցն զաթուայ՝ եղիոնէ, եղիսաբ, մատթանա, յարմովթ, զաբադ, զազիա։
²⁸Եւ յորդւոցն բաբէի՝ յոհան, անանի, եւզաբուոթաղի։
²⁹Եւ յորդւոցն բանի՝ մոսողամ, մաղաք, ադիաս, իասուբ, սաաղ, հռեմովթ։
³⁰Եւ յորդւոցն փաաթ մովաբ՝ ադնէքաղել, բանայիա, մասեա, մատթա, բեսեէլ, մանասէ։
³¹Եւ յորդւոցն երամ՝ եղիեզի, եսիա, մեղքիա, սամերաս, սիմէոն,
³²բենիամին, մաղուք սմարիա։

³³Եւ յորդւոցն ասէմ՝ մատթանիա, մատաթիա, զարաթ, եղիփաղէթ, յերեմի, մաասէ, սամէի։
³⁴Եւ յորդւոցն բանի՝ մովադիա, ամրամ, ուէլ,
³⁵բանեա, բադաիա, քեղիա,
³⁶ուանիա, մարիովթ, եղիասիբ,
³⁷մաթանիա, մաթանա։
³⁸Եւ արարին որդիքն բանի, եւ որդիքն սեմէի,
³⁹սեղեմիաս, նաթան, ադազիաս,
⁴⁰մաքնա, գայադու, սէսէարու,
⁴¹եզրիէլ, սաղամիաս, սամարիաս,
⁴²սեղում, ատարիաս, յովսէփ։
⁴³Յորդւոցն աբուրէ՝ իէուէլ, մատաթիաս, զաբաթ, զեբիննաս, յագայի, յադէ, յովեդ, բանայիա։
⁴⁴Ա́յսք էին ամենեքեան որ ունէին զկանայս յայլազգեացն, եւ ծնան ՛ի նոցանէ ուստերք եւ դստերք։