¹ԵՒ ԵՂԵՒ ՅԵՏ ՎԱԽՃԱՆԵԼՈՅՆ մովսիսի ծառայի տ(եառ)ն, խօսեցա́ւ տ(է)ր ընդ յեսուայ որդւոյ նաւեայ պաշտօնէի մովսիսի, եւ ասէ։
²Մովսէս ծառայ իմ վախճանեցաւ. արդ յարուցեալ անցցե́ս ընդ այդ յորդանան՝ դու եւ ա(մենայ)ն ժողովուրդ քո յերկրին զոր ե́ս տաց որդւոցն ի(սրաէ)լի։
³Յամենայն տեղիս յոր հասանիցեն գնացք ոտից ձերոց ձե́զ տաց զնա, որպէս խօսեցայ ընդ մովսիսի.
⁴զանապա́տն, զլիբանաներն, մինչեւ ցգե́տն մեծ ցգե́տն եփրատ. զա(մենայ)ն երկիրն քետացւոց, մինչեւ ցծո́վն վերջին, ՛ի մտից արեւու՝ ձե́զ լիցին սահմանքն։
⁵եւ ո́չ ոք կացցէ ընդդէմ ձեր զա(մենայ)ն աւուրս կենաց քոց։ Եւ ո(ր)պ(էս) էի ընդ մովսիսի, նո́յնպէս եղէց եւ ը(ստ) քեզ. եւ ո́չ թողից զքեզ՝ եւ ո́չ անտես արարից զքեզ.

⁶զօրացի́ր եւ քաջ լեր։ զի դո́ւ բաժանեսցես ժողովրդեանդ այդմիկ երկրին զոր երդուայ հարցն քոց տա́լ դոցա։
⁷Արդ զօրացի́ր եւ քա́ջ լեր յոյժ, պահե́լ եւ առնել ըստ ա(մենայ)ն պատուիրանացն ո(ր)պ(էս) պատուիրեաց քեզ մովսէս ծառայ իմ. եւ մի́ խոտորիցիս ՛ի նոցանէ յա́ջ կամ յահեակ, զի խելամո́ւտ լիցիս ա(մենայ)նի զինչ եւ գործեսցես։
⁸Եւ մի́ մերժիցես զգիր օրինացս այսոցիկ ՛ի բերանոյ քումմէ, եւ խոկասցե́ս ՛ի դոսա ՛ի տուէ եւ ՛ի գիշերի. զի իմասցի́ս առնել զա(մենայ)ն գրեալսդ ՛ի դմա. եւ ապա́ աջողեսցիս եւ ուղղեսցես զճանապարհս քո, եւ ապա́ խելամուտ լինիցիս։

⁹Ահա պատուիրե́մ քեզ. զօրացի́ր եւ քա́ջ լեր. մի́ զանգիտիցես. եւ մի́ երկնչիցիս. զի ընդ քե́զ է տ(է)ր ա(ստուա)ծ քո յա(մենայ)ն տեղիս ուր եւ երթայցես։
¹⁰Եւ պատուիրեա́ց յեսու դպրաց ժողովրդեանն՝ եւ ասէ. մտէ́ք ՛ի մէջ բանակի ժողովրդեանդ, եւ հրաման տուեալ ժողովրդեանդ ասացէք։
¹¹Պատրաստեցէ́ք ձեզ պաշար. զի ա́յլ եւս երեք աւուրք, եւ անցանէ́ք դուք ը(ստ) այդ յորդանան, մտանել ունել զերկիրն զոր տ(է)ր ա(ստուա)ծ հարցն ձերոց տացէ́ ձեզ ՛ի ժառանգու(թ)ի(ւն)։
¹²Եւ ընդ ռուբինի եւ ընդ գադայ եւ ընդ կիսոյ ցեղին մանասէի խօսեցա́ւ յեսու եւ ասէ։

¹³Յիշեցէ́ք զբանն տ(եառ)ն զոր պատուիրեաց ձեզ մովսէս ծառայ ն(ո)ր(ա)՝ եւ ասէ. Տ(է)ր ա(ստուա)ծ ձեր զետեղեցո́յց զձեզ, եւ ետ ձեզ զերկիրս զայս.
¹⁴կանայք ձեր եւ մանկունք ձեր եւ անասունք ձեր՝ բնակեսցեն յերկիրս զոր ետ ձեզ մովսէս յայսկոյս յորդանանու։ Բայց դուք զինեալք անցանիցէք յառաջագոյն քան զեղբարս ձեր, եւ ա(մենայ)ն զօրաւոր զօրութ(եամ)բ, եւ լինիցիք ն(ո)ց(ա) մարտակիցք.

¹⁵մինչեւ զետեղեցուսցէ́ տ(է)ր ա(ստուա)ծ ձեր զեղբարս ձեր ո(ր)պ(էս) եւ զձե́զդ. եւ ժառանգեսցեն եւ նոքա́ զերկիրն՝ զոր տ(է)ր ա(ստուա)ծ մեր տացէ́ ն(ո)ց(ա). եւ դառնայցէք յիւրաքանչիւր ժառանգութի(ւն). եւ ժառանգեցէ́ք զնա՝ զոր ե́տ ձեզ մովսէս ծառայ տ(եառ)ն յայսկոյս յորդանանու յարեւելից։
¹⁶Եւ պատասխանի տուեալ ասեն ցյեսու. զա(մենայ)ն զոր միանգա́մ պատուիրես մեզ արասցո́ւք.
¹⁷եւ յա(մենայ)ն տեղիս ուր առաքիցես զմեզ՝ երթիցո́ւք. եւ ըստ ա(մենայ)նի որպէս լսէաք մովսիսի՝ նո́յնպէս լուիցուք եւ քե́զ։ Բայց միայն տ(է)ր ա(ստուա)ծ մեր եղիցի ընդ քեզ՝ որպէս է́ր ընդ մովսիսի։

¹⁸եւ այր որ անհնազա́նդ իցէ քեզ՝ եւ ո́չ լսիցէ բանից քոց, որպէս ինչ եւ հրաման տացես նմա՝ մեռցի́. բայց միայն զօրացիր եւ քա́ջ լեր։

¹Եւ առաքեաց յեսու որդի նաւեայ ՛ի սատիմայ երկո́ւս երիտասարդս լրտեսե́լ զերկիրն գաղտ. եւ ասէ, ելէ́ք լրտեսեցէք զերկիրն եւ զերիքո́վ։ Եւ գնացեալ երկուց երիտասարդացն եկի́ն յերիքով. եւ մտեալ ՛ի տուն կնոջ պոռնկի́ միոջ՝ որում անուն էր ռահաբ. եւ ա́նդ կալան օթեվանս։
²Ա́զդ եղեւ թագաւորին երիքովայ, եւ ասեն. ահա ա́րք մտեալ են այսր զցայգս յորդւոցն ի(սրաէ)լի լրտեսե́լ զերկիրս։
³Եւ առաքեաց թագաւորն երիքովայ՝ եւ ասէ ցռահաբ. հա́ն այսր զարսդ մտեալսդ առ քեզ՝ որ եկին ՛ի տուն քո զցայգ, զի լրտեսե́լ զա(մենայ)ն երկիրս եկին։
⁴Եւ առեալ կնոջն զերկոսին արսն թաքո́յց զն(ո)ս(ա). եւ խօսեցաւ ընդ նոսա եւ ասէ. մտին առիս արք, եւ ես ո́չ գիտէի ուստի́ իցեն.

⁵եւ ընդ առնուլ դրանն ընդ աղջամուղջս առաւօտին ելի́ն արքն արտաքս՝ եւ ո́չ գիտեմ յո́ գնացին. պնդեցարո́ւք ստէպ զհետ ն(ո)ց(ա)՝ թերեւս հասանիցէք ն(ո)ց(ա)։
⁶Եւ եհան զն(ո)ս(ա) ՛ի տանիս, եւ թաքոյց զն(ո)ս(ա) ը(ստ) խրձա́մբք կտաւոյ՝ զոր դիզեալ էր իւր ՛ի տանիս։
⁷Եւ պնդեցա́ն արքն զկնի ն(ո)ց(ա) զճանապարհն յորդանանու ՛ի հո́ւնն, եւ դուռն փակեցա́ւ։ Եւ եղեւ իբրեւ ելին խնդրանկքն զհետ ն(ո)ց(ա).
⁸եւ մինչչեւ ՛ի քուն մտեալ էր ն(ո)ց(ա), ել ինք առ ն(ո)ս(ա) ՛ի տանիսն, եւ ասէ ցն(ո)ս(ա)։
⁹Գիտե́մ զի ե́տ ձեզ տ(է)ր զերկիրս. քանզի անկաւ ա́հ ձեր ՛ի վ(ե)ր(այ) մեր, եւ զի հաշեցան ամենեքեան որ բնակեալ էին յերկրիս յայսմիկ յերեսաց ձերոց.

¹⁰քանզի լուաք թէ ցամաքեցո́յց տ(է)ր զծովն կարմիր յերեսաց ձերոց, յելանելն ձեր յեգիպտոսէ, եւ զոր ինչ արարէք ը(ստ) երկուս թագաւորսն ամովրհացւոց, որ էին յայնկոյս յորդանանու ընդ սեհոնի եւ ընդ ովգայ՝ զոր սատակեցէք։
¹¹Եւ իբրեւ լուաք մեք՝ զարհուրեցա́ք սրտիւք մերովք, եւ ո́չ եւս գոյ շունչ յումեք ՛ի մէնջ յերեսաց ձերոց. զի տ(է)ր ա(ստուա)ծ ձեր՝ նա́ է ա(ստուա)ծ յերկինս ՛ի վեր եւ յերկիր ՛ի խոնարհ։
¹²Եւ արդ՝ երդուարո́ւք ինձ ՛ի տ(է)ր ա(ստուա)ծ. զի առնեմ ձեզ ողորմութի(ւն). եւ արասջի́ք եւ դո́ւք ողորմութի(ւն) տան հօր իմոյ. եւ տո́ւք ինձ նշա́ն ճշմարիտ.
¹³եւ ապրեցուցէ́ք զտուն հօր իմոյ, եւ զմայր իմ եւ զեղբարս իմ եւ զքորս իմ, եւ զա(մենայ)ն որինչ իցեն նոցա. եւ փրկեսջի́ք զանձն իմ ՛ի մահուանէ։

¹⁴Եւ ասեն ցնա արքն. անձի́նք մեր փոխանակ ձեր ի մահ, եթէ ո́չ պատմիցէք զբանս զայս զմէնջ։ եւ նա ասէ. եղիցի յորժամ մատնեսցէ́ ձեզ տ(է)ր զքաղաքս, արասջի́ք ընդ իս ողորմութի(ւն) եւ ճշմարտու(թ)ի(ւն)։
¹⁵Եւ կախեա́ց զնոսա չուանաւ ընդ պատուհանն. քանզի տուն ն(ո)ր(ա) ՛ի պարսպին էր՝ եւ ինքն բնակեալ էր ՛ի պարսպին։
¹⁶Եւ ասէ ցնոսա. զլեռն լեռնա́յն գնասջիք, զի մի́ պատահեսցեն ձեզ խնդրակքն. եւ թաքիջի́ք անդ զերիս աւուրս, մինչեւ դարձցի́ն խնդրակքն յետո́յ ձերմէ. եւ ապա երթիջիք զճանապարհն ձեր։
¹⁷Եւ ասեն արքն ցնա, քաւեա́լ եմք մեք յերդմանէդ՝ զոր երդմնեցուցեր զմեզ։

¹⁸ահա մեք մտանիցեմք ՛ի մա́սն ինչ քաղաքիդ, եւ դու դնիցես նշանակ զլա́րդ կարմիր, եւ կապեսցե́ս զպատուհանէդ ընդ որ զմե́զ իջուցեր, եւ զհայր քո եւ զմայր քո եւ զեղբարս քո, եւ զա(մենայ)ն տուն հօր քո ժողովեսցես առ քե́զ ՛ի տունս յայս։
¹⁹Եւ եղիցի ա(մենայ)ն որ ելանէ ՛ի տանէ քումմէ արտաքս՝ ինքն եղիցի անձին իւրում պարտական. եւ մեք քաւեա́լ լիցուք յերդմանէդ քումմէ յայդմանէ։ եւ որ միանգամ լինիցին ընդ քե́զ ՛ի տան քում, մե́ք լիցուք պարտականք՝ եթէ ձեռն ուրուք մերձեսցի ՛ի նա։
²⁰Ապա թէ ոք մեղանչեսցէ մեզ, եւ յայտնեսցե́ս զբանս մեր զայսոսիկ, քաւեալ լիցուք յարդմանէդ քումմէ յայդմանէ։

²¹Եւ ասէ՝ եղիցի́ ըստ բանիդ ձերում, նո́յնպէս եղիցի։ եւ արձակեա́ց զնոսա եւ գնացին։ Եւ կապեաց նշա́ն կարմիր ՛ի պատուհանին։
²²եւ գնացի́ն եւ եկին ՛ի լեռնակողմն, եւ կացին անդ զերի́ս աւուրս, մինչեւ դարձան խնդրակքն։ եւ յուզեցին խնդրակքն զա(մենայ)ն ճանապարհն՝ եւ ո́չ գտին։
²³Եւ դարձա́ն երկոքին երիտասարդքն եւ իջին ՛ի լեռնէ անտի, եւ եկին յա́յն կոյս. եւ հասին առ յեսու որդի նաւեայ, եւ պատմեցին զա(մենայ)ն անցսն որ անցին ընդ ն(ո)ս(ա)։
²⁴եւ ասեն ցյեսու՝ թէ մատնեա́ց տ(է)ր ա(ստուա)ծ ՛ի ձեռս մեր զա(մենայ)ն երկիրն, եւ զարհուրեցա́ն ա(մենայ)ն բնակիչք երկրին ՛ի մէնջ։

¹Եւ կանխեա́ց յեսու ընդ առաւօտն, եւ չուեցին ՛ի սատիմայ եւ եկին մինչեւ ցյորդանան, ի́նքն եւ ա(մենայ)ն որդիքն ի(սրաէ)լի. եւ բանակեցա́ն անդ յառաջ քան զանցանելն։
²Եւ եղեւ յետ երից աւուրց, անցին դպիրքն ընդ բանակն,
³եւ պատուիրեցին ժողովրդեանն եւ ասեն. յորժամ տեսանիցէք զտապանակ ուխտին տ(եառ)ն ա(ստուծո)յ ձերոյ, եւ զքահանա́յսն մեր, եւ զղեւտացիսն որ բարձեալ ունիցին զնա՝ եւ դուք խաղասջիք ՛ի տեղեաց ձերոց եւ գնասջի́ք զհետ ն(ո)ր(ա)։

⁴Բայց հեռագո́յն լինիցի ընդ ձեզ եւ ընդ ն(ո)ս(ա)՝ որչափ կանգունք երկո́ւց հազարաց, զտեղի́ առնուցուք եւ ո́չ մերձենայցէք ՛ի նա. զի գիտիցէք զճանապարհն ընդ որ երթայցէք. զի ո́չ էք երթալոց զճանապարհ երէկին եւ եռանդի։
⁵Եւ ասէ յեսու ցժողովուրդն. սրբեցարո́ւք առ վաղիւ. զի վաղիւ արասցէ ձեզ տ(է)ր սքանչելիս։
⁶Եւ խօսեցա́ւ յեսու ընդ քահանայսն՝ եւ ասէ. առէ́ք զտապանակ ուխտին տ(եառ)ն, եւ գնացէ́ք յառաջագոյն առաջի ժողովրդեանն։ եւ բարձին քահանայքն զտապանակ ուխտին տ(եառ)ն՝ եւ երթային առաջի ժողովրդեանն։

⁷Եւ ասէ տ(է)ր ցյեսու. յաւուր յայսմիկ սկի́զբն արարից բարձրացուցանե́լ զքեզ առաջի ա(մենայ)ն որդւոցն ի(սրաէ)լի. զի ծանիցեն թէ որպէս էի́ ընդ մովսիսի, նո́յնպէս եղէց եւ ը(ստ) քեզ։
⁸Եւ արդ՝ պատուիրեա́ քահանայիցն որ բառնան զտապանակ ուխտին՝ եւ ասասցե́ս. յորժամ մտանիցէ́ք յեզր ջրոյն յորդանանու, կացջի́ք ՛ի ներքս ՛ի յորդանան։
⁹Եւ ասէ յեսու ցորդիսն ի(սրաէ)լի. մատերո́ւք այսր եւ լուարո́ւք զպատգամս տ(եառ)ն ա(ստուծո)յ մերոյ։
¹⁰Եւ ասէ յեսու. այնո́ւ գիտասջիք եթէ տ(է)ր կենդանի́ է ՛ի ձեզ. եւ սատակելով սատակեսցէ́ յերեսաց ձերոց՝ զքանանացին, եւ զքետացի, եւ զխեւացի, եւ զփերեզացի, եւ զգերգեսացի, եւ զամովրհացի, եւ զյեբուսացի։

¹¹ահաւասիկ տապանակ ուխտին տ(եառ)ն ա(մենայ)ն երկրի անցանէ առաջի ձեր ընդ յորդանան։
¹²Եւ արդ՝ յառա́ջ կալարուք ՛ի ձէնջ ա́րս երկոտասան յորդւոցդ ի(սրաէ)լի, այր մի յիւրաքանչիւր ցեղէ.
¹³եւ եղիցի իբրեւ մխիցին ոտք քահանայիցն կրելեաց զտապանակ ուխտին տ(եառ)ն ա(մենայ)ն երկրի ՛ի ջուրն յորդանանու, պակասեսցէ́ ջուրն որ իջանէ ՛ի վերուստ, կացցէ́ իբրեւ զկարկառակո́յտ մի։
¹⁴Եւ եղեւ իբրեւ չուեաց ժողովուրդն ՛ի խորանաց իւրեանց անցանե́լ ընդ յորդանան. եւ քահանայքն բարձին զտապանակ ուխտին տ(եառ)ն առաջի ա(մենայ)ն ժողովրդեանն։

¹⁵Եւ իբրեւ մտանէին քահանայքն որ կրէին զտապանակ ուխտին ՛ի յորդանան, եւ ոտք քահանայիցն կրելեաց տապանակին մխեցա́ն յեզր ջրոյն յորդանանու, եւ յորդանան լցեա́լ գայր դարիւ եւ դարիւ ո(ր)պ(էս) յաւուրս հնձոց ցորենոյ.
¹⁶եւ կացին ջուրքն որ իջանէին ՛ի վերուստ՝ միաձոյլք, անջրպետեալք, հեռացեա́լք յոյժ յոյժ. յադամիտէս քաղաքէ՝ որ է մա́սն կարիաթարիմայ. եւ որ իջանէինն՝ իջին ՛ի ծովն արաբացւոց ՛ի ծովն աղի, մինչեւ ՛ի սպա́ռ նուազելոյ։ եւ ժողովուրդն կա́յր յանդիման երեքոյի։

¹⁷Եւ կացին քահանայքն որ կրէին զտապանակ ուխտին տ(եառ)ն ՛ի վերայ ցամաքի ՛ի մէջ յորդանանու պատրաստութ(եամ)բ։ Եւ ա(մենայ)ն որդիքն ի(սրաէ)լի անցին ընդ ցամաք, մինչեւ վախճանեաց ա(մենայ)ն ժողովուրդն անցանել ընդ յորդանան։

¹Եւ իբրեւ վախճանեա́ց ա(մենայ)ն ժողովուրդն անցանե́լ ը(ստ) յորդանան. Խօսեցաւ տ(է)ր ընդյեսու եւ ասէ.
²առեալ քեզ ՛ի ժողովրդենէ անտի ա́րս երկոտասան, այր մի յիւրաքանչի́ւր ցեղէ,
³հրամա́ն տուր ն(ո)ց(ա) եւ ասասցես. առէ́ք դուք ձեզ այտի ՛ի միջոյ յորդանանու յոտնատեղեաց քահանայիցդ պատրաստական քարինս երկոտասան, եւ տարջի́ք ընդ ձեզ. եւ դիջի́ք ՛ի մէջ բանակին ձերոյ՝ ուր բանակիջիք զայս գիշեր։
⁴Եւ կոչեա́ց յեսու ա́րս երկոտասան ՛ի փառաւորաց որդւոցն ի(սրաէ)լի՝ մի յիւրաքանչիւր ցեղէ,

⁵եւ ասէ ցնոսա յեսու։ Մատերո́ւք առաջի իմ յանդիման տ(եառ)ն ՛ի մէջ յորդանանու, եւ առեալ բարձցեն անտի իւրաքանչիւրոք քա́ր մի ՛ի վ(ե)ր(այ) ուսոց իւրոց ըստ թուոյ ցեղիցն ի(սրաէ)լի.
⁶զի լինիցին ն(ո)ք(ա) ձեզ կա́լ ՛ի նշանակ հանապազորդ։ զի յորժամ հարցանիցէ́ ցքեզ առ վաղիւ որդին քո եւ ասիցէ. զի՞նչ են քարինքս այսոքիկ ձեզ,
⁷պատմեսցե́ս դու որդւոյն քում եւ ասիցես, թէ՝ զի պակասեաց գետն յորդանան յերեսաց տապանակի ուխտին տ(եառ)ն ա(մենայ)ն երկրի՝ մինչ անցանէ́ր ընդ յորդանան, նուազեա́ց ջուրն յորդանանու։ եւ եղիցին ձեզ քարինքս այսոքիկ ՛ի յիշատա́կ ՛ի մէջ որդւոցն ի(սրաէ)լի, մինչեւ ցյաւիտեան։

⁸Եւ արարին որդիքն ի(սրաէ)լի ո(ր)պ(էս) պատուիրեաց տ(է)ր յեսուայ. եւ առեալ երկոտասան քարինս ՛ի միջոյ յորդանանու՝ որպէս եւ հրամա́ն ետ տ(է)ր յեսուայ ՛ի վախճանի անցանելոյ որդւոցն ի(սրաէ)լի։ եւ տարան զն(ո)ս(ա) ընդ իւրեանս ՛ի բանակն եւ եդին զնոսա անդ։
⁹Եւ կանգնեա́ց յեսու ա́յլ եւս երկոտասան քարինս անդէն ՛ի յորդանան, ՛ի տեղւոջ ուր կացին ոտք քահանայիցն որ կրէին զտապանակ ուխտին տ(եառ)ն. եւ են ա́նդ մինչեւ ցայսօր ժամանակի։
¹⁰Եւ կացին անդ քահանայքն որ բարձեալ ունէին զտապանակ ուխտին տ(եառ)ն ՛ի մէջ յորդանանու՝ մինչեւ վախճանեաց յեսու զա(մենայ)ն զոր պատուիրեաց տ(է)ր յեսուայ պատմե́լ ժողովրդեանն՝ ըստ ա(մենայ)նի զոր պատուիրեաց մովսէս յեսուայ։ եւ փութացաւ ժողովուրդն՝ եւ անց։

¹¹Եւ եղեւ իբրեւ վախճանեաց ա(մենայ)ն ժողովուրդն անցանել, անց եւ տապանակ ուխտին տ(եառ)ն, եւ երկոտասան քարինքն առաջի նոցա։
¹²Անցին եւ որդիքն ռուբինի եւ գադայ՝ եւ կէս ցեղին մանասէի կազմեա́լք առաջի որդւոցն ի(սրաէ)լի, ո(ր)պ(էս) պատուիրեա́ց նոցա մովսէս։
¹³Չո́րք բեւրք վառեալք ՛ի կռիւ, անցի́ն առաջի տ(եառ)ն ՛ի պատերազմ ընդ երիքո́վ քաղաքի։
¹⁴Յաւուր յայնմիկ աճեցո́յց տ(է)ր զյեսու առաջի ա(մենայ)ն ազգին ի(սրաէ)լի. եւ երկնչէին ՛ի նմանէ ո(ր)պ(էս) երկնչէին ՛ի մովսիսէ՝ որչափ ժամանակս եւ եկաց։
¹⁵Եւ խօսեցա́ւ տ(է)ր ընդ յեսուայ՝ եւ ասէ.
¹⁶հրամա́ն տուր քահանայիցդ՝ որ բարձեալ ունին զտապանակ ուխտին վկայութե(ան)՝ ելանել ՛ի յորդանանէ։

¹⁷Եւ հրամա́ն ետ յեսու քահանայիցն եւ ասէ. ելէ́ք ՛ի յորդանանէ։
¹⁸Եւ եղեւ իբրեւ ելին քահանայքն որ բարձեալ ունէին զտապանակ ուխտին տ(եառ)ն ՛ի միջոյ յորդանանու, եւ եդին զոտսն քահանայքն ՛ի ցամաքի, դիմեա́ց ջուրն յորդանանու ՛ի տեղի իւր, եւ գնա́յր ո(ր)պ(էս) յերէկն եւ յեռանդ ը(ստ) ա(մենայ)ն ատակս ն(ո)ր(ա)։
¹⁹Եւ ե́լ ժողովուրդն ՛ի յորդանանէ ՛ի տասներորդում աւուր ամսո́յն առաջնոյ։ եւ բանակեցան որդիքն ի(սրաէ)լի ՛ի գաղգաղա յարեւելից կողմանէ երիքովի։
²⁰եւ զերկոտասան քարինսն զոր առին ՛ի յորդանանէ, կանգնեա́ց յեսու ՛ի գաղգաղա։
²¹Եւ ասէ ցորդիսն ի(սրաէ)լի. յորժամ հարցանիցեն որդիքն ձեր առ վաղիւ եւ ասասցեն, զի՞նչ են քարինքս այսոքիկ.

²²պատմեսջի́ք որդւոցն ձերոց թէ՝ ցամաքա́ւ անց ի(սրա)էլ ընդ յորդանան,
²³՛ի ցամաքեցուցանե́լ տ(եառ)ն ա(ստուծո)յ մերոյ զջուրսն յորդանանու յերեսաց ն(ո)ց(ա) մինչեւ անցին։
²⁴Որպէս արար տ(է)ր ա(ստուա)ծ մեր ընդ ծո́վն կարմիր, զոր ցամաքեցո́յց տ(է)ր ա(ստուա)ծ մեր առաջի մեր մինչեւ անցաք.
²⁵զի ծանիցեն ամենայն ազգք երկրի՝ թէ զօրութիւն տ(եառ)ն զօրաւո́ր է։ եւ զի դուք պաշտիցէք զտ(է)ր ա(ստուա)ծ մեր զամենայն ժամանակս։

¹Եւ եղեւ իբրեւ լուան ա(մենայ)ն թագաւորք ամովրհացւոց, որ էին յա́յն կոյս յորդանանու առ ծովեզերբն. եւ թագաւորքն փիւնիկեցւոց որ առ ծովեզերբն. եթէ ցամաքեցո́յց տ(է)ր ա(ստուա)ծ զյորդանան գետ առաջի որդւոցն ի(սրաէ)լի յանցանելն ն(ո)ց(ա), հաշեցա́ն սիրտք ն(ո)ց(ա) եւ զարհուրեցան, եւ ո́չ գոյր ՛ի նոսա իմաստութի(ւն) եւ ո́չ մի՝ յերեսաց որդւոցն ի(սրաէ)լի։
²Ընդ այնո́ւ ժամանակաւ ասէ տ(է)ր ցյեսու. արա́ դու քեզ սուր ՛ի գայլախա́զ վիմէ՝ եւ նստեալ թլփատեսցե́ս զորդիսն ի(սրաէ)լի կրկնակի։
³Եւ արա́ր իւր յեսու սո́ւրս քարեղէնս գայլախազեայս, եւ թլփատեա́ց զորդիսն ի(սրաէ)լի ՛ի տեղւոջ՝ որ կոչէր բլո́ւր անթլփատից։

⁴Եւ զորօրինակ յապաւեաց յեսու զորդիսն ի(սրաէ)լի որ էին ՛ի ճանապարհի անդ, որ բնաւ չէին թլփատեալք յելելոցն յեգիպտոսէ, զամենեսեան թլփատեա́ց յեսու։ Եւ այս ժողովուրդ է զոր թլփատեաց յեսու. ա(մենայ)ն ժողովրդեանն ելելոց յեգիպտոսէ զարո́ւ մանուկ։ քանզի ա(մենայ)ն արք պատերազմողք մեռա́ն յանապատին անդէն ՛ի ճանապարհին, յելանելն իւրեանց յերկրէն եգիպտացւոց։
⁵զի թլփատեալք էին ա(մենայ)ն ժողովուրդն որ ելին, եւ ա(մենայ)ն ժողովուրդն որ ծնան յանապատին ՛ի ճանապարհին ելանելոյ ն(ո)ց(ա) յերկրէն եգիպտացւոց։

⁶Քանզի զքառասուն եւ զերկուս ամս շրջեցաւ ի(սրա)էլ յանապատին աբդարեայ. վ(ա)ս(ն) որոյ անթլփա́տք էին բազումք ՛ի պատերազմողացն ելելոց յերկրէն եգիպտացւոց՝ որք անհնազանդեցան պատուիրանացն ա(ստուծո)յ։ Որոց եւ սահմանեա́ց տ(է)ր չտեսանե́լ զերկիրն զոր երդուաւ հարցն ն(ո)ց(ա) տալ ն(ո)ց(ա). զերկիր՝ որ բղխէ զկաթն եւ զմեղր։
⁷եւ փոխանակ ն(ո)ց(ա) տարաւ զորդիս ն(ո)ց(ա)՝ զոր թլփատեաց յեսու. քանզի անթլփատք էին. վ(ա)ս(ն) լինելոյ ն(ո)ց(ա) անթլփա́տս ՛ի ճանապարհին։
⁸Եւ իբրեւ թլփատեցաւ ա(մենայ)ն ազգն, հանդարտութի(ւն) կալեալ նստա́ն անդէն ՛ի բանակին մինչեւ ողջացան։

⁹Եւ ասէ տ(է)ր ցյեսու. յաւուր յայսմիկ բարձի́ զնախատինս եգիպտացւոց ՛ի ձէնջ։ եւ կոչեաց զանուն տեղւոյն այնորիկ գաղգաղա́ մինչեւ ցայսօր։
¹⁰եւ անդ բանակեցան որդիքն ի(սրաէ)լի։
¹¹եւ կերան ՛ի ցորենոյ երկրին զայգոյ բաղա́րջ եւ նորի։
¹²Յաւուր յայնմիկ պակասեա́ց մանանայն, յետ ուտելոյ ն(ո)ց(ա) ՛ի ցորենոյ երկրին. եւ ո́չ եւս գտանէր որդւոցն ի(սրաէ)լի մանանայ։ եւ ժողովեցին զպտուղ երկրին փիւնիկեցւոց ՛ի տարւոջն յայնմիկ։
¹³Եւ եղեւ մինչ էր յեսու յերիքով, ամբարձեալ զաչս իւր ետե́ս, զի կայր առաջի ն(ո)ր(ա) ա́յր, եւ սուսեր մե́րկ ՛ի ձեռին ն(ո)ր(ա)։ եւ մատուցեալ յեսուայ՝ ասէ ցնա. մե՞ր ես՝ թէ ՛ի թշնամեաց մերոց։

¹⁴Եւ նա ասէ ցնա. ես զօրավա́ր եմ զօրու տ(եառ)ն, եւ ա́յժմ եկի։
¹⁵եւ անկա́ւ յեսու ՛ի վերայ երեսաց իւրոց եւ երկիր եպագ, եւ ասէ ցնա՝ տ(է)ր զի՞նչ հրաման տացես ծառայի քում։
¹⁶Եւ ասէ զօրավարն տ(եառ)ն ցյեսու. լո́յծ զկօշիկս քո յոտից քոց, զի տեղիդ յորում կաս՝ ս(ուր)բ է։ եւ արա́ր այնպէս։

¹Եւ երիքով փակեա́լ եւ ամրացեալ էր յերեսաց որդւոցն ի(սրաէ)լի, եւ ո́չ ոք ելանէր ՛ի նմանէ, եւ ո́չ ոք մտանէր։
²Եւ ասէ տ(է)ր ցյեսու. ահա ե́ս տամ ՛ի ձե́ռս քո զերիքով՝ եւ զթագաւորն որ ՛ի նմա, եւ զզօրաւո́րս զօրութ(եամ)բ։
³Բայց դու՝ ա́ծ պատեա́ զնովաւ զա(մենայ)ն մարտիկս շուրջանակի յոբելինա́ւն, ՛ի լսել ձեզ զձայն եղջեւր փողոյ։ եւ եղիցի իբրեւ հարկանիցէք զփողն՝ պատեսջի́ք զքաղաքն ա(մենայ)ն արք պատերազմողք շուրջ զքաղաքաւն մի́ անգամ։ ա́յսպէս առնիցէ́ք զվե́ց օր։
⁴եւ եւթն քահանայ առցեն զեւթնափո́ղսն եղջերեայս յոբելեան առաջի տապանակին։ Եւ յաւուրն եւթներորդի պատեսջիք զքաղաքն եւթն անգամ. եւ քահանայքն հարցե́ն զփողսն եղջերեայս.

⁵եւ աղաղակեսցեն առհասարակ ա(մենայ)ն ժողովուրդն. եւ յաղաղակելն նոցա կործանեսցի́ն ինքնին պարիսպք քաղաքին ՛ի ներքոյ ն(ո)ց(ա). եւ մտցէ ա(մենայ)ն ժողովուրդն դիմեալ իւրաքանչի́ւր հանդէպ երեսաց իւրոց ՛ի քաղաքն։
⁶Եւ եմուտ յեսու որդի նաւեայ առ քահանայսն՝ եւ ասէ ցն(ո)ս(ա). առէ́ք զտապանակ ուխտին, եւ եւթն քահանայք՝ առցեն եւթն փող եղջերեայ յոբելեան առաջի տապանակին տ(եառ)ն։
⁷եւ խօսեցա́ւ ընդ նոսա եւ ասէ. պատուէ́ր տուք ժողովրդեանն անցանե́լ պատել զքաղաքն. եւ մարտիկքն երթիցեն վառեալք առաջի տապանակին տ(եառ)ն։

⁸Եւ եղեւ իբրեւ պատուիրեաց ժողովրդեանն. եւ եւթանեքին քահանայքն որ ունիցին եւթն փողս նուիրականս, անցցե́ն նոյնպէս առաջի տ(եառ)ն՝ եւ ազդեսցեն ուժգին. եւ տապանակ ուխտին տ(եառ)ն երթիցէ́ զհետ նոցա.
⁹եւ մարտիկքն երթիցեն առաջի́, եւ քահանայքն՝ եւ որ հարկանիցեն զփողսն եղջերեայս, վերջապահք զկնի́ տապանակին տ(եառ)ն, հարկանելով զփո́ղսն եղջերեայս երթիցեն։
¹⁰Եւ ժողովրդեանն պատուէ́ր ետ յեսու եւ ասէ. մի́ աղաղակիցէք, եւ մի́ ոք լուիցէ զբարբառ ձեր, եւ մի́ ելանիցէ բա́ն ՛ի բերանոյ ձերմէ, մինչեւ յօրն յորում ինքն ա́զդ արասցէ աղաղակելոյ, եւ ապա́ աղաղակեսջիք։
¹¹Եւ շո́ւրջ եկեալ տապանակի ուխտին տ(եառ)ն զքաղաքաւն, գնա́ց անդրէն ՛ի բանակն՝ եւ ա́նդ ագաւ։

¹²Եւ յաւուրն երկրորդի յարեա́ւ յեսու ընդ առաւօտն. եւ բարձին քահանայքն զտապանակն տ(եառ)ն։
¹³եւ եւթն քահանայքն առին եւթն փողս նուիրականս, եւ երթային առաջի տ(եառ)ն. եւ քահանայքն հարին զփողսն. եւ ա́յլ եւս ամբոխն ա(մենայ)ն։ եւ գնացին դարձեալ անդրէն ՛ի բանակն։ եւ ապա́ մտանէին մարտիկքն, եւ ա́յլ եւս ամբոխն զկնի տապանակի ուխտին տ(եառ)ն։ եւ երթային եւ հարկանէին զփողսն եղջերեայս։
¹⁴եւ պատեցին զքաղաքն յաւուրն երկրորդի միանգամ ՛ի մօտոյ։ եւ գնացին դարձեալ անդրէն ՛ի բանակն։ Ա́յնպէս արարին զվեց օր։
¹⁵Եւ եղեւ յաւուրն եւթներորդի, յարեա́ն ընդ ե́լս առաւօտուն եւ պատեցին զքաղաքն ը(ս)տ նմին օրինակի եւթն անգամ։

¹⁶եւ եղեւ յեւթներորդո́ւմ նուագի պատելոյն, հարին քահանայքն զփողսն. եւ ասէ յեսու ցորդիսն ի(սրաէ)լի. ա́րդ աղաղակեցէ́ք, քանզի մատնեաց տ(է)ր ՛ի ձեռս մեր զքաղաքս։
¹⁷Եւ եղիցի քաղաքն նզովեա́լ, ինքն եւ ա(մենայ)ն որ ինչ ՛ի նմա իցէ ՛ի տ(թեն)է զօրու(թ)ե(ան)ց։ բայց զռահաբ պոռնիկ ապրեցուսջի́ք, զնա եւ զա(մենայ)ն որ ինչ իցէ ՛ի տան ն(ո)ր(ա), զի թաքո́յց զհրեշտակսն զոր արձակեցաք։
¹⁸Այլ դուք զգո́յշ լինիջիք ՛ի նզովիցն. գուցէ́ ցանկացեալք առնուցուք ինչ դուք ՛ի նզովից անտի. եւ առնիցէք զբանակ որդւոցդ ի(սրաէ)լի ՛ի նզովս, եւ ջնջիցէք զմեզ։
¹⁹Ամենայն ոսկի եւ արծաթ եւ պղինձ եւ երկաթ եղիցի սո́ւրբ տ(եառ)ն, ՛ի գանձ տ(եառ)ն մտցէ։

²⁰Եւ աղաղակեա́ց ժողովուրդն, եւ հարին քահանայքն զփողսն. իբրեւ լուաւ ժողովուրդն զձայն փողոյն՝ աղաղակեաց ա(մենայ)ն ժողովուրդն առ հասարակ մեծ եւ ուժգին աղաղակաւ։ եւ անկա́ւ պարիսպն շուրջանակի. եւ ել ա(մենայ)ն ժողովուրդն ՛ի քաղաքն իւրաքանչիւր հանդէպ իւր. եւ առին զքաղաքն.
²¹եւ նզովեցին զնա, եւ որ ինչ է́ր ՛ի քաղաքին յառնէ մինչեւ ցկին, եւ յերիտասարդէ մինչեւ ցծեր, եւ յարջառոյ մինչեւ ցոչխար, եւ ցէշ. արկի́ն ՛ի բերան սրոյ։
²²Եւ ցերկո́ւս երիտասարդսն որ լրտեսեցին զերկիրն՝ ասէ յեսու. մտէ́ք ՛ի տուն կնոջն պոռնկի, եւ հանէ́ք զնա անտի, եւ զա(մենայ)ն ինչ որ ն(ո)ր(ա) իցէ՝ որպէս եւ երդուա́յք նմա։

²³Եւ մտին երկու երիտասարդքն որոց լրտեսեա́լ էր զքաղաքն՝ ՛ի տուն կնոջն, եւ հանի́ն զռահաբ պոռնիկ, եւ զհայր ն(ո)ր(ա) եւ զմայր ն(ո)ր(ա). եւ զեղբարս ն(ո)ր(ա), եւ զա(մենայ)ն որ ինչ է́ր ն(ո)ր(ա), եւ զա(մենայ)ն ազգատոհմն ն(ո)ր(ա). եւ կացուցին զնա արտաքոյ բանակին ի(սրաէ)լի։
²⁴Եւ քաղաքն այրեցա́ւ հրով եւ ա(մենայ)ն ինչ որ ՛ի նմա էր. բա́ց յոսկւոյ եւ յարծաթոյ եւ ՛ի պղնձոյ եւ յերկաթոյ, զոր ետուն ՛ի գա́նձ տ(եառ)ն մուծանել։
²⁵Եւ զռախա́բ պոռնիկ, եւ զտուն ն(ո)ր(ա) հայրենի, եւ զա(մենայ)ն ինչ որ սորա́ էր ապրեցոյց յեսու. եւ բանակեցաւ ՛ի մէջ ի(սրաէ)լի մինչեւ ցայսօր ժամանակի. վ(ա)ս(ն) զի թաքոյց զլրտեսսն զոր առաքեաց յեսու յաւուր յայնմիկ լրտեսե́լ զերիքով։

²⁶Եւ նզովեաց յեսու յաւուր յայնմիկ զերիքով եւ ասէ. անիծեա́լ լիցի մարդն առաջի տ(եառ)ն, որ կանգնեսցէ եւ շինեսցէ զքաղաքն զերիքով. անդրանկաւ իւրով դնե́լ զհիմունս ն(ո)ր(ա), եւ կրտսերաւ իւրով կանգնեսցէ զդրունս պարսպի նորա։ Եւ ա́յնպէս արար ազան բեթէլացի, աբիրոնաւ անդրանկա́ւ իւրով եդ զհիմունս ն(ո)ր(ա), եւ զերծելով կրսերով իւրով կանգնեաց զդրունս ն(ո)ր(ա)։
²⁷Եւ է́ր տ(է)ր ընդ յեսուայ, եւ է́ր անուն ն(ո)ր(ա) ընդ ա(մենայ)ն երկիր։

¹Եւ յանցեա́ն որդիքն ի(սրաէ)լի յանցանս, եւ գողացա́ն ՛ի նզովից անտի։ եւ ա́ռ աքար որդի քարմեայ՝ որդւոյ զամբրեայ, որդւոյ զարայի՝ ՛ի ցեղէ յուդայ՝ ՛ի նզովից անտի. եւ բարկացա́ւ սրտմտու(թեամ)բ տ(է)ր որդւոցն ի(սրաէ)լի։
²Եւ առաքեա́ց յեսու արս յերիքովէ ՛ի գայի՝ որ է յանդիման բեթէլայ, եւ ասէ ցնոսա. լրտեսեցէ́ք զգայի։ եւ ելին արքն եւ լրտեսեցի́ն զգայի։
³եւ դարձան առ յեսու եւ ասեն. մի́ ելցէ ա(մենայ)ն ժողովուրդս, այլ իբրեւ երկո́ւ հազարք կամ երե́ք հազարք արանց ելցեն՝ եւ պաշարեսցեն զքաղաքն. մի́ տանիր անդ զա(մենայ)ն ժողովուրդն՝ զի սակա́ւք են։
⁴Եւ ելին անդր ՛ի ժողովրդենէն իբրեւ երեքհազարք եւ փախեան յերեսաց արանցն գայեայ.

⁵եւ կոտորեցին ՛ի նոցանէ արք գայեայ արս՝ երեսուն եւ վեց. եւ հալածեցի́ն զն(ո)ս(ա) ՛ի դրանէն մինչեւ խորտակեցին զն(ո)ս(ա). եւ վիրաւորեցին ՛ի զառիվայրին. եւ պակասեցա́ւ սիրտ ժողովրդեանն եւ եղեն իբրեւ զջուր։
⁶Եւ պատառեա́ց յեսու զհանդերձս իւր, եւ անկա́ւ ՛ի վերայ երեսաց իւրոց յերկիր առաջի տապանակին տ(եառ)ն մինչեւ ցերեկոյ, ի́նքն եւ ծերքն ի(սրաէ)լի. եւ արկին հո́ղ զգլխովք իւրեանց։
⁷Եւ ասէ յեսու. աղաչեմ զքեզ տ(է)ր տ(է)ր. ընդէ՞ր իսկ բնաւ անցանելով անցոյց ծառայ քո զժողովուրդս զայս ընդ յորդանան. մատնել զսոսա ամովրհացւո́ցն՝ եւ կորուսանել զմեզ։ լա́ւ էր թէ անդէն զետեղեալ եւ բնակեալ էաք առ եզերբ յորդանանու։

⁸յի́ս տ(է)ր. եւ արդ զի՞նչ արարից՝ որովհետեւ կորացո́յց իսրայէլ զպարանոց իւր առաջի թշնամեաց իւրոց։
⁹եւ լուեալ քանանացւոցն եւ ա(մենայ)ն բնակչաց երկրին պատեսցե́ն զմեզ եւ սատակեսցեն յերկրէ։ եւ զի՞նչ արասցես զանուն քո մեծ։
¹⁰Եւ ասէ տ(է)ր ցյեսու. յո́տն կաց, զի՞ անկեալ կաս ՛ի վերայ երեսաց քոց.
¹¹մեղա́ւ ժողովուրդն, եւ անց զուխտիւ իմով զոր ուխտեցի ն(ո)ց(ա). եւ գողացան եւ առին ՛ի նզովիցն, ստեցի́ն, եւ արկին յամանս իւրեանց։
¹²եւ ո́չ եւս կարիցեն որդիքն ի(սրաէ)լի կալ առաջի թշնամեաց իւրեանց. այլ դարձուսցեն զպարանոցս առաջի թշնամեաց իւրեանց՝ զի եղեն ՛ի նզո́վս. եւ ո́չ եւս յաւելից լինել ընդ ձեզ, եթէ ոչ բառնայցէ́ք զնզովսդ զայդ ՛ի միջոյ ձերմէ։

¹³Արի́ սրբեա́ զժողովուրդդ, եւ արասցես սրբե́լ առ վաղիւ. Ա́յսպէս ասէ տ(է)ր ա(ստուա)ծ ի(սրաէ)լի. նզո́վք են ՛ի ձեզ ի(սրա)էլ. ո́չ կարիցէք կալ առաջի թշնամեաց ձերոց, մինչեւ բառնայցէք զնզովսն ՛ի ձէնջ։
¹⁴Եւ ժողովեսջի́ք ամենեքեան ը(ստ) առաւօտն ըստ ցեղիցն ձերոց. եւ եղիցի ցեղն՝ զոր ցուցցէ տ(է)ր, մատուսջի́ք ըստ տոհմից. եւ զտոհմն՝ զոր յանդիմանեսցէ տ(է)ր, մատուսջի́ք ըստ տա́նց. եւ տուն՝ զոր յանդիմանեսցէ տ(է)ր, մատուսջի́ք ը(ս)տ արա́նց։
¹⁵եւ որ յանդիմանեսցի ՛ի նզովսն, այրեսցի́ ինքն հրով՝ եւ ա(մենայ)ն տուն իւր, եւ ա(մենայ)ն ինչ որ ն(ո)ր(ա) իցէ. զի անց զուխտիւն տ(եառ)ն, եւ արար անօրէնութի(ւն) ՛ի մէջ ի(սրաէ)լի։

¹⁶Եւ կանխեաց յեսու ընդ առաւօտն, եւ մատոյց զժողովուրդն ը(ս)տ ցեղիցն իւրեանց, եւ յանդիմանեցա́ւ ցեղն յուդայի.
¹⁷եւ մատուցաւ ցեղն յուդայի ը(ս)տ տոհմից, եւ յանդիմանեցաւ տունն զարայի. եւ մատուցաւ տոհմն զարայի ը(ս)տ արանց, եւ յանդիմանեցա́ւ զամբրի́.
¹⁸եւ մատուցաւ տուն ն(ո)ր(ա) ը(ս)տ արանց, եւ յանդիմանեցա́ւ աքար որդի քարմեայ, որդւոյ զամբրեայ, որդւոյ զարայի, ՛ի ցեղէն յուդայ։
¹⁹Եւ ասէ յեսու ցաքար. որդեա́կ իմ, տո́ւր փառս այսօր տ(եառ)ն ա(ստուծո)յ ի(սրաէ)լի, եւ տո́ւր խոստովանութի(ւն), եւ պատմեա́ ինձ զինչ գործեցեր. եւ մի́ թաքուցաներ յինէն։

²⁰Պատասխանի ետ աքար եւ ասէ ցյեսու. արդարեւ ե́ս մեղայ առաջի տ(եառ)ն ա(ստուծո)յ ի(սրաէ)լի. զայս ինչ եւ զայս գործեցի։
²¹տեսի յաւարին ամղան մի նկարէն գեղեցիկ, եւ երկերիւր երկրդամեան արծաթոյ, եւ լեզու մի ոսկի՝ որոյ յիսուն երկդրամեան էր ձոյլ ն(ո)ր(ա). եւ ցանկացեալ ն(ո)ց(ա) առի́. եւ ահաւանիկ թաքուցեալ կայ ը(ստ) հողով ՛ի վրանի իմում. եւ արծաթն թաքուցեալ կայ ՛ի ներքոյ ն(ո)ց(ա)։
²²Եւ առաքեաց յեսու հրեշտակս արս եւ ընթացան ՛ի վրանն ՛ի բանակն. եւ ա́նդ թաքուցեալ կայր ՛ի վրանի ն(ո)ր(ա). եւ արծաթն ՛ի ներքոյ ն(ո)ց(ա)։
²³հանի́ն զայն ՛ի վրանէ անտի եւ բերին առ յեսու եւ առ ծերսն ի(սրաէ)լի՝ եւ եդին առաջի տ(եառ)ն։

²⁴Եւ ա́ռ յեսու զաքար զորդի զարայի, եւ եհան զնա ՛ի ձորն աքովրայ, եւ զուստերս ն(ո)ր(ա) եւ զդստերս ն(ո)ր(ա), եւ զարջառ ն(ո)ր(ա), եւ զէշ ն(ո)ր(ա), եւ զա(մենայ)ն զոչխարս նորա, եւ զվրանս ն(ո)ր(ա), եւ զա(մենայ)ն ինչ ն(ո)ր(ա). եւ ամենայն ի(սրա)էլ ը(ստ) նմա. եւ ած զնա յեմակս աքովրայ։
²⁵Եւ ասէ յեսու ընդէ՞ր սատակեցեր զմեզ. սատակեսցէ́ զքեզ տ(է)ր ըստ աւուրս ըստ այսմիկ։ Եւ քարկոծեցին զնա ա(մենայ)ն ի(սրա)էլ քատամբք, եւ այրեցին զն(ո)ս(ա) հրով. եւ քարկոծեցին զն(ո)ս(ա) քարամբք.
²⁶եւ կուտեցին ՛ի վերայ ն(ո)ց(ա) կարկառ մեծ քարանց մինչեւ ցայսօր. եւ դադարեաց տ(է)ր ՛ի սրտմտութ(են)է բարկութե(ան) իւրոյ. վ(ա)ս(ն) այնորիկ անուանեաց զնա եմա́կ աքովրայ մինչեւ ցայսօր։

¹Եւ ասէ տ(է)ր ցյեսու. մի́ երկնչի́ր եւ մի́ զանգիտիցես. ա́ռ դու ընդ քեզ զա(մենայ)ն արս պատերազմողս, եւ յարուցեալ ելցես ՛ի գայի. ահա ե́ս տա́մ ՛ի ձեռս քո զթագաւորն գայեայ եւ զժողովուրդ ն(ո)ր(ա), եւ զքաղաք ն(ո)ր(ա) եւ զերկիր ն(ո)ր(ա).
²եւ արասցե́ս ընդ գայի եւ ընդ թագաւորն ն(ո)ր(ա), զոր օրինակ արարեր ընդ երիքով եւ ընդ թագաւորն ն(ո)ր(ա). եւ զաւար ն(ո)ր(ա) եւ զանասուն ն(ո)ր(ա) ածցե́ս յաւարի։ եւ կացուսցե́ս քեզ դարանամուտս քաղաքին զկնի ն(ո)ր(ա)։
³Եւ յարեա́ւ յեսու՝ եւ ա(մենայ)ն ժողովուրդն պատերազմող, ելանել ՛ի գայի. եւ ընտրեաց յեսու երեսուն հազար արանց զօրաւորս զօրու(թեամ)բ, եւ առաքեաց զն(ո)ս(ա) զցայգ։

⁴Եւ պատուիրեաց ն(ո)ց(ա) եւ ասէ. տեսէ́ք, զի դուք դարանամո́ւտ լինիցիք յետուստ քաղաքին, եւ մի́ կարի հեռի լինիջիք ՛ի քաղաքէն. եւ կացջիք պատրա́ստք ամենեքին։
⁵եւ ես եւ ա(մենայ)ն ժողովուրդն որ ընդիս՝ մօտեսցուք ՛ի քաղաքն. եւ եղիցի յորժամ ելանիցեն բնակիչքն գայեայ ընդդէմ մեր իբրեւ զառաջինն, փախիցո́ւք յերեսաց ն(ո)ց(ա).
⁶եւ իբրեւ ելցեն զկնի մեր, մեկնեսցուք զն(ո)ս(ա) ՛ի քաղաքէ անտի. եւ ասիցեն թէ փախեա́ն յերեսաց մերոց իբրեւ զառաջինն։
⁷Եւ իբրեւ փախիցուք յերեսաց ն(ո)ց(ա), դուք յարիջի́ք ՛ի դարանէ անտի, եւ մտջիք ՛ի քաղաքն, եւ հարջի́ք զքաղաքն. եւ տացէ́ զն(ո)ս(ա) տ(է)ր ա(ստուա)ծ ի(սրաէ)լի ՛ի ձեռս մեր։

⁸Եւ եղիցի յորժամ առնուցուք զքաղաքն, այրեսջի́ք զնա հրով. ըստ ա́յսմ օրինակի առնիջիք՝ ահա պատուիրեցի́ ձեզ։
⁹Եւ առաքեա́ց զն(ո)ս(ա) յեսու, եւ գնացին ՛ի դարանն, եւ մտին ղօղեցան ՛ի մէջ բեթելայ եւ ՛ի մէջ դանայ ՛ի ծովակողմանէն գայեայ։ եւ ագա́ւ յեսու զայն գիշեր ՛ի մէջ ժողովրդեանն։
¹⁰Եւ կանխեալ յեսու ընդ առաւօտն արար հանդէս ժողովրդեանն. եւ ե́լ ինքն եւ ծերքն ի(սրաէ)լի առաջի ժողովրդեանն ՛ի վ(ե)ր(այ) գայեայ։
¹¹եւ ա(մենայ)ն զօր պատերազմօղ ելի́ն ը(ստ) ն(ո)ս(ա), եւ գնացին ելին եկին հանդէպ քաղաքին յարեւելից կողմանէ, եւ դարանամուտք քաղաքին ՛ի ծովակո́յս կողմանէ, եւ բանակեցան ՛ի հիւսւսոյ գայեայ. եւ ձո́ր ընդ մէջ ն(ո)ց(ա) եւ գայեայ։

¹²Եւ ա́ռ հինգ հազար արանց, եւ եմոյծ զն(ո)ս(ա) ՛ի դարան՝ ընդ բեթա́ւն եւ ընդ ծովն գայեայ։
¹³եւ արկ զժողովուրդն եւ զա(մենայ)ն բանակն ՛ի հիւսւսոյ քաղաքին, եւ վերջ ն(ո)ց(ա) ՛ի ծովակողմն քաղաքին. եւ անց յեսու զգիշերն զայն ընդ էջ ձորոյն։
¹⁴Եւ եղեւ իբրեւ ետես թագաւորն գայեայ, փութացաւ կանխեաց եւ ել ընդդէմ ն(ո)ց(ա). եւ արք քաղաքին երթային հանդէպ ն(ո)ց(ա) ՛ի պատերազմ. ինքն եւ ա(մենայ)ն ժողովուրդ իւր ՛ի ժամանակին յանդիման արաբայ. եւ ինքն ո́չ գիտէր եթէ դարան գործեալ իցէ նմա յետուստ քաղաքին։
¹⁵Իբրեւ ետես յեսու՝ դարձա́ւ անդրէն ընդ կրուկն, եւ ա(մենայ)ն ի(սրա)էլ յերեսաց ն(ո)ց(ա) փախեա́ն ընդ ճանապարհ անապատին։

¹⁶Եւ ստիպեաց ա(մենայ)ն ժողովուրդ երկրին երթա́լ զհետ նորա. եւ պնդեցան երթալ զկնի որդւոցն ի(սրաէ)լի. եւ նոքա մեկնեցան ՛ի քաղաքէ անտի։
¹⁷եւ ո́չ մնաց ՛ի գայի եւ ՛ի բեթէլ՝ որ ո́չ պնդեցաւ զհետ ի(սրաէ)լի. եւ թողին զքաղաքն ՛ի բա́ց, եւ յարձակեցան զհետ ի(սրաէ)լի։
¹⁸Եւ ասէ տ(է)ր ցյեսու. ձգեա́ զձեռն քո գայիսոնաւդ որ ՛ի ձեռին քում ՛ի վերայ քաղաքին, զի ՛ի ձե́ռս քո մատնեցի զնա. եւ դարանակալքն ելցե́ն վաղվաղակի ՛ի տեղւոջէ իւրեանց։ Եւ ձգեաց յեսու զգայիսոնն եւ զձեռս իւր ՛ի վերայ քաղաքին։
¹⁹եւ դարանակալքն յարեա́ն վաղվաղակի ՛ի տեղւոջէ իւրեանց՝ եւ ելի́ն իբրեւ ձգեաց զձեռնն, եւ մտին ՛ի քաղաքն՝ եւ առին զնա. եւ փութացեալ այրեցին զքաղաքն հրով։

²⁰Եւ հայեցեալ բնակչացն գայեայ ՛ի թիկունս իւրեանց, տեսանէին զի ելանէ́ր ծուխ քաղաքին մինչեւ յերկինս. եւ ո́չ եւս ուրեք գոյր ն(ո)ց(ա) փախուստ՝ այսր կամ անդր. եւ ժողովուրդն որ թաքուցեալ էր յանապատն՝ յարեա́ն ՛ի վերայ հետամտացն։
²¹Եւ յեսու եւ ա(մենայ)ն ժողովուրդն իբրեւ տեսին թէ առին դարանակալքն զքաղաքն, եւ զի ելանէ́ր ծուխ քաղաքին մինչեւ յերկինս. դարձա́ն անդրէն ընդ կրուկն, եւ հարին զարսն գայեայ.
²²եւ նոքա ելին ՛ի քաղաքէ անտի ընդառաջ նոցա, եւ եղեն ՛ի մէ́ջ բանակին. նոքա անտի, եւ սոքա աստի՝ եւ հարին զն(ո)ս(ա) մինչեւ չմնալոյ ՛ի ն(ո)ց(ա)նէ ապրեալ եւ փախստական։
²³Եւ զթագաւորն գայեայ ձերբակա́լ արարին կենդանւոյն, եւ ածի́ն առ յեսու։

²⁴Եւ իբրեւ դադարեցին որդիքն ի(սրաէ)լի ՛ի կոտորելոյ զա(մենայ)ն գայացիս, զորս ՛ի դաշտս, զորս ՛ի լերինս զառիվայրին մինչեւ հալածեցին զն(ո)ս(ա). եւ անկան ամենեքին ՛ի սո́ւր սուսերի մինչեւ ՛ի սպառ։ Եւ դարձա́ւ յեսու ՛ի գայի, եւ եհա́ր զնա սրով սուսերի։
²⁵եւ եղեն անկեալք յաւուր յայնմիկ յառնէ մինչեւ ցկին՝ երկոտասա́ն հազար, ա(մենայ)ն բնակիչքն գայեայ։
²⁶Եւ յեսու ո́չ դարձոյց զձեռն իւր զոր ձգեաց գայիսոնաւն՝ մինչեւ նզովեա́ց զա(մենայ)ն բնակիչսն գայացւոց.
²⁷բա́ց յանասնոյ եւ յաւարէ քաղաքին զոր աւարեցին որդիքն ի(սրաէ)լի ըստ հրամանի́ տ(եառ)ն՝ ո(ր)պ(էս) հրամայեաց տ(է)ր յեսուայ։

²⁸եւ այրեա́ց յեսու զքաղաքն հրով եւ արար զնա բլո́ւր հողոյ՝ անշէն յաւիտեան մինչեւ ցայսօր։
²⁹Եւ զթագաւորն գայեայ կախեա́ց զերկճի́ւղ փայտէ. եւ է́ր ՛ի վ(ե)ր(այ) փայտին կախեալ մինչեւ ցերեկոյ. եւ ընդ մտանել արեգականն հրամայեաց յեսու եւ իջուցին զնա ՛ի փայտէ անտի, եւ ընկեցին զնա ՛ի գո́ւբ առ դրան քաղաքին. եւ կուտեցին ՛ի վ(ե)ր(այ) ն(ո)ր(ա) կարկա́ռ քարանց մինչեւ ցա́յսօր։
³⁰Յայնժամ շինեաց յեսու սեղան տ(եառ)ն ա(ստուծո)յ ի(սրաէ)լի ՛ի լերինն գեբաղ

³¹ո(ր)պ(էս) պատուիրեաց մովսէս ծառայ տ(եառ)ն որդւոցն ի(սրաէ)լի. զորօրինակ գրեալ է յօրէնսն մովսիսի. Սեղան յողջո́ց քարանց՝ յորս ո́չ մերձեալ իցէ երկաթ. եւ ա́նդ եհան ողջակէզ տ(եառ)ն եւ զո́հ փրկութե(ան)։
³²Եւ գրեա́ց յեսու ՛ի վ(ե)ր(այ) քարանցն զերկրորդումն օրինաց զօրէնսն մովսիսի, զոր գրեաց առաջի որդւոցն ի(սրաէ)լի։
³³Եւ ա(մենայ)ն ի(սրա)էլ, եւ ծերք ն(ո)ց(ա) եւ դատաւորք ն(ո)ց(ա)՝ եւ դպիրք ն(ո)ց(ա), երթային աստի անտի հանդէպ տապանակին. եւ քահանայքն ղեւտացիք բարձին զտապանակ ուխտին տ(եառ)ն, եւ եկն եւ բնակ։ Եւ էին կէսք ՛ի նոցանէ մե́րձ ՛ի լեառն գարիզին, եւ կէսք ՛ի նոցանէ մե́րձ ՛ի լեառն գեբաղ. որպէս պատուիրեաց մովսէս ծառայ տ(եառ)ն, օրհնե́լ նախ զժողովուրդն։

³⁴եւ ապա́ ընթերցաւ զա(մենայ)ն բանս օրինացս այսոցիկ, զօրհնու(թ)ի(ւն)ս եւ զանէծս՝ ըստ ա(մենայ)ն գրելոցն յօրէնսն մովսիսի։
³⁵Եւ ո́չ էր բան յա(մենայ)նէ զոր պատուիրեաց մովսէս յեսուայ՝ զոր ո́չ ընթերցաւ յեսու յականջս ա(մենայ)ն եկեղեցւոյն ի(սրաէ)լի, արանց եւ կանանց եւ մանկանց, եւ եկա́ցն յեցելոցն յի(սրա)էլ։

¹Իբրեւ լուան ա(մենայ)ն թագաւորքն ամովրհացւոց որ յայնկոյս յորդանանու՝ որ լեռնայինք եւ որ դաշտայինք, եւ որ յա(մենայ)ն ծովեզեր ծովուն մեծի. եւ որք առ լիբանաներբն,, եւ քետացիքն՝ եւ ամովրհացիք՝ եւ գերգեսացիք՝ եւ քանանացիք՝ եւ փերեզացիք՝ եւ խեւացիք՝ եւ յեբուսացիք.
²եկին ՛ի միասին տա́լ պատերազմ ընդ յեսուայ եւ ընդ ի(սրաէ)լի՝ ամենեքին առ հասարակ։
³Եւ բնակիչքն գաբաւոնի լուան՝ զոր ինչ արար յեսու ընդ իրիքո́վ եւ ընդ գայի։
⁴արարին նոքա խորամանկութ(եամ)բ՝ եկեալք պաշարովք եւ պատրաստութ(եամ)բ։ առին քուրձս հնացեալս ՛ի վերայ ուսոց իւրեանց, եւ տիկս գինւոյ հնացեա́լս եւ պատառատունս կարկատեալս.

⁵եւ անկանուրդք կօշկաց ն(ո)ց(ա)՝ հողաթափք իւրեանց հնացեալք եւ կարկատեալք յոտս իւրեանց. եւ հանդերձք իւրեանց հնացեալք զանձամբք իւրեանց. եւ հաց պաշարի իւրեանց չորացեալ եւ ճըճեկեր.
⁶եւ եկին առ յեսու ՛ի բանակն ի(սրաէ)լի ՛ի գաղգաղա։ Եւ ասեն ցյեսու եւ ցա(մենայ)ն ի(սրա)էլ. յերկրէ́ հեռաստանէ եկեալ եմք, եւ արդ՝ դիք ը(ստ) մեզ ուխտ։ Եւ ասեն որդիքն ի(սրաէ)լի ցքոռացին.
⁷տե́ս՝ գուցէ́ առիս բնակեալ իցես, եւ զիա՞րդ դնեմք ընդ քեզ ուխտ։
⁸Եւ ասեն ցյեսու. ծառա́յք քո եմք։ եւ ասէ ցն(ո)ս(ա) յեսու, ուստի՞ էք դուք, եւ ուստի՞ եկեալ էք։

⁹եւ ասեն ցնա. յերկրէ́ հեռաստանէ յոյժ եկին ծառայք քո յանուն տ(եառ)ն ա(ստուծո)յ քոյ. զի լուաք զանո́ւն ն(ո)ր(ա), եւ զոր ինչ արար ընդ եգիպտոս,
¹⁰եւ զոր ինչ արար ընդ երկուս թագաւորսն ամովրհացւոց որ էին յայնկոյս յորդանանու, ընդ սեհոն թագաւորն եսեբոնի, եւ ընդ ովգ թագաւորն բասանու՝ որ բնակեալէր յաստարովթ եւ յեդրային։
¹¹Եւ խօսեցա́ն ընդ մեզ ծերքն մեր, եւ ա(մենայ)ն բնակիչք երկրին մերոյ եւ ասեն. առէ́ք ձեզ պաշար ճանապարհի՝ եւ երթա́յք ընդառաջ ն(ո)ց(ա), եւ ասասջիք ցնոսա, ծառա́յք ձեր եմք, եւ արդ դի́ք ընդ մեզ ուխտ։

¹²զի զհա́ցս զայս մեր, ջե́րմ առաք պաշար ՛ի տանց մերոց յաւուր յորում ելաք ՛ի տանց մերոց եւ եկաք առ ձեզ. եւ արդ՝ չորացաւ եւ եղեւ ճըճեկեր։
¹³եւ տիկքս զոր լցաք գինւով ՝ նո́րք էին՝ եւ պատառեցան, եւ ձո́րձք մեր եւ կօշիկք մաշեցան, ՛ի բազում երկայն ճանապարհէն։
¹⁴Եւ առին իշխանքն զպաշա́ր ն(ո)ց(ա)՝ եւ զտ(է)ր ո́չ հարցին։
¹⁵եւ արար ընդ ն(ո)ս(ա) խաղաղութի(ւն) յեսու. եւ ուխտեաց ն(ո)ց(ա) ուխտ տարացուցանե́լ զն(ո)ս(ա). եւ երդուա́ն նոցա իշխանք ժողովրդեանն։
¹⁶Եւ եղեւ յետ երից աւուրց զհետ ուխտելոյ ն(ո)ց(ա) զուխտն, լուան եթէ մօտաւորք են, եւ անդէն առ նոսա́ բնակեն։

¹⁷Չուեցին որդիքն ի(սրաէ)լի՝ եւ ելին ՛ի քաղաքս ն(ո)ց(ա) յաւուրն երրորդի. եւ քաղաքք ն(ո)ց(ա) էին գաբաւոն եւ կեփիրոն եւ բերովթ, եւ քաղաքք յարիմայ։
¹⁸Եւ ո́չ մարտեան ընդ նոսա որդիքն ի(սրաէ)լի. քանզի երդուա́ն նց ա(մենայ)ն իշխանք ժողովրդեանն ՛ի տ(է)ր ա(ստուա)ծ ի(սրաէ)լի։ եւ տրտնջեցին ա(մենայ)ն ժողովուրդն զիշխանացն։
¹⁹Եւ ասեն ա(մենայ)ն իշխանքն ցա(մենայ)ն ժողովուրդն. մեք երդուա́ք նոցա ՛ի տ(է)ր ա(ստուա)ծ ի(սրաէ)լի, եւ ո́չ կարեմք ստել ն(ո)ց(ա)։
²⁰արդ՝ զա́յս արասցո́ւք նոցա ապրեցուցանե́լ զնոսա, եւ ստասցուք զն(ո)ս(ա). եւ մի́ եկեսցէ ՛ի վ(ե)ր(այ) մեր բարկութի(ւն) վ(ա)ս(ն) երդմանն զոր երդուաք ն(ո)ց(ա)։

²¹Եւ ասեն ցն(ո)ս(ա) իշխանքն. կեցցե́ն, եւ լինիցին փայտաբերք եւ ջրակիրք ա(մենայ)ն ժողովրդեանդ։ եւ եղեն փայտակոտորք եւ ջրաբերք՝ ո(ր)պ(էս) եւ ասացին նոցա իշխանքն։
²²Եւ կոչեաց զն(ո)ս(ա) միահամո́ւռ յեսու, եւ խօսեցա́ւ ընդ ն(ո)ս(ա) եւ ասէ. ընդէ՞ր խաբեցէք զիս եւ ասացէք՝ հեռի́ եմք ՛ի ձէնջ յոյժ, եւ դու գաւառակա́նք էք բնակչացս որ ՛ի միջի մերում։
²³եւ արդ՝ անիծեալք էք. եւ մի́ պակասեսցէ́ ՛ի ձէնջ ծառա́յ փայտակոտոր եւ ջրկիր ինձ՝ եւ ա(ստուծո)յ իմում։

²⁴Պատասխանի ետուն եւ ասեն ցյեսու. ազդեցու(թեամ)բ ա́զդ եղեւ մեզ, զորինչ հրամայեաց տ(է)ր ա(ստուա)ծ քո մովսիսի ծառայի իւրոյ, տալ ձե́զ զերկիրս զայս, եւ սատակել զմեզ եւ զա(մենայ)ն բնակիչս սորա յերեսաց ձերոց. եւ երկեաք յոյժ վ(ա)ս(ն) անձանց մերոց յերեսաց ձերոց, եւ արարա́ք զիրն զայն։
²⁵եւ արդ աւասիկ ե́մք ընդ ձեռամբ ձերով. ո(ր)պ(էս) հաճոյ է ձեզ եւ ո(ր)պ(էս) կամիք առնել՝ արարէք։
²⁶Եւ արարին ն(ո)ց(ա) այնպէս. եւ ապրեցո́յց զնոսա յեսու յաւուր յայնմիկ ՛ի ձեռաց որդւոցն ի(սրաէ)լի, եւ ո́չ կոտորեցին զնոսա։

²⁷Եւ կացոյց զն(ո)ս(ա) յաւուր յայնմիկ փայտակոտորս եւ ջրակիրս ա(մենայ)ն ժողովրդեանն՝ եւ սեղանոյն ա(ստուծո)յ մինչեւ ցայսօր ժամանակի. եւ ՛ի տեղւոջն զոր ընտրեսցէ տ(է)ր։

¹Եւ իբրեւ լուաւ ադոնիբեղեկ թագաւորն եմ(թ)ի(ւն), թէ ա́ռ յեսու զգայի, եւ սատակեա́ց զնա. զորօրինակ արար ընդ երիքով եւ ընդ թագաւորն ն(ո)ր(ա), նոյնպէս արար ընդ գայի եւ ընդ թագաւոր նորա. եւ զի անձնատո́ւրք եղեն բնակիչք գաբաւոնի առ յեսու եւ առ ի(սրա)էլ՝ եւ եղեն ՛ի մէջ ն(ո)ց(ա).
²զարհուրեցա́ն յանձինս իւրեանց յոյժ. քանզի գիտէին թէ քաղաք մե́ծ է գաբաւոն ո(ր)պ(էս) զմի ՛ի մայրաքաղաքաց թագաւորացն. քանզի նա մեծ էր քան զգայի, եւ ա(մենայ)ն արք ն(ո)ր(ա) զօրաւորք։
³Եւ առաքեաց ադոնիբեղեկ արքայ ե(րուսաղէ)մի առ ելամ արքայ քեբրոնի, եւ առ քերամ արքայ յերիմութայ, եւ առ յեփիէ արքայ լաքիսայ, եւ առ դաբիր արքայ ոգողոմայ, եւ ասէ։

⁴Եկա́յք ելէ́ք առիս եւ օգնեցէք ինձ. եւ տացուք պատերա́զմ ը(ստ) գաբաւոնի. զի անձնատո́ւրք եղեն առ յեսու եւ առ որդիսն ի(սրաէ)լի։
⁵Եւ գումարեցան եւ ելին հինգ թագաւորքն յեբուսացւոց. թագաւորն ե(րուսաղէ)մի, եւ թագաւորն քեբրոնի, եւ թագաւորն յերիմութայ, եւ թագաւորն ղաքիսայ, եւ թագաւորն ոգողոմայ. ինքեա́նք եւ ա(մենայ)ն ժողովուրդ ն(ո)ց(ա), եւ նստան զգաբաւոնիւ եւ պաշարեցին զնա։
⁶Եւ առաքեցին բնակիչք գաբաւոնի առ յեսու ՛ի բանակն ի(սրաէ)լի ՛ի գաղգաղա՝ եւ ասեն. մի́ թողացուսցես զձեռն քո ՛ի ծառայից քոց, ե́լ առ մեզ վաղվաղակի եւ ապրեցո́ զմեզ, եւ օգնեա́ մեզ. զի ժողովեա́լ են ՛ի վ(ե)ր(այ) մեր ա(մենայ)ն թագաւորք ամովրհացւոց որ բնակեալ են ՛ի լեռնակողմանն։

⁷Եւ ել յեսու ՛ի գաղգաղայ, ինքն եւ ա(մենայ)ն զօրն պատերազմօղ ընդ նմա. եւ ա(մենայ)ն որ կարող էր զօրու(թեամ)բ։
⁸Եւ ասէ տ(է)ր ցյեսու. մի́ երկնչիցիս ՛ի նոցանէ, զի ՛ի ձե́ռս քո մատնեցից զնոսա. եւ ո́չ ժուժկալեսցէ ՛ի նոցանէ եւ ո́չ մի ոք առաջի ձեր։
⁹Եւ եհաս ՛ի վերայ ն(ո)ց(ա) յեսու յանկարծակի́ զցայգն ա(մենայ)ն՝ եկեալ ՛ի գաղգաղայ։
¹⁰Եւ զարհուրեցո́յց զնոսա տ(է)ր յերեսաց ի(սրաէ)լի. եւ եբե́կ զնոսա բեկումն մեծ ՛ի գաբաւոն. եւ հալածեցին զնոսա ընդ ճանապարհ զառիվայրին բեթորոնայ, եւ կոտորեցին զնոսա մինչեւ յազեկայ եւ ցմակետայ։

¹¹Եւ ՛ի փախչելն ն(ո)ց(ա) յերեսաց որդւոցն ի(սրաէ)լի ընդ զառիվայրն բեթորոնայ, Եւ տ(է)ր արկ ՛ի վերայ ն(ո)ց(ա) քարինս կարկտի յերկնից մինչեւ ցյազեկայ. եւ եղեն բազումք այնոքիկ որ մեռան ՛ի քարանց կարկտին, քան զայնոսիկ զորս կոտորեցին որդիքն ի(սրաէ)լի սրով պատերազմի։
¹²Յայնժամ խօսեցաւ յեսու ընդ տ(եառ)ն՝ յաւուր յորում մատնեա́ց տ(է)ր ա(ստուա)ծ զամովրհացին ընդ ձեռամբ որդւոցն ի(սրաէ)լի. ՛ի ժամանակին յորում խորտակեաց զն(ո)ս(ա) ՛ի գաբաւոն, եւ խորտակեցան յերեսաց ի(սրաէ)լի։ Եւ ասէ յեսու, կացցէ́ արեգակն հանդէպ գաբաւոնի եւ լուսին հանդէպ ձորոյն եղոնայ։

¹³եւ կացին արեգակն եւ լուսին ՛ի կայի́ իւրեանց. մինչեւ էառ ա(ստուա)ծ զվրէժ ՛ի թշնամեաց ն(ո)ց(ա)։ Ո՞չ ապաքէն գրեա́լ է այս ՛ի գիրս ուղղութե(ան). եւ եկա́ց արեգակն ՛ի մէջ երկնից, եւ ո́չ խաղաց ը(ստ) արեւմուտս, մինչեւ ցկատարո́ւմն աւուր միոյ։
¹⁴Եւ ո́չ եղեւ այսպիսի օր, ո́չ յառաջ եւ ոչ յետոյ լսե́լ ա(ստուծո)յ ձայնի մարդոյ. զի տ(է)ր պատերազմեցաւ խառն ընդ ի(սրաէ)լի։
¹⁵եւ դարձաւ յեսու եւ ա(մենայ)ն ի(սրա)էլ ընդ նմա ՛ի բանակն ՛ի գաղգաղա։
¹⁶Եւ փախեա́ն հնգեքին թագաւորքն այնոքիկ՝ եւ թաքեան ՛ի յայրին ՛ի մակետայ։
¹⁷Եւ ա́զդ եղեւ յեսուայ՝ եւ ասեն. գտան հինգ թագաւորքն թաքուցեա́լք ՛ի յայրի անդ ի մակետայ։

¹⁸եւ ասէ յեսու. թաւալեցուցէ́ք վէմս մեծամե́ծս ՛ի բերան այրին, եւ կացուցէ́ք ՛ի վերայ ն(ո)ց(ա) արս պահե́լ զնոսա.
¹⁹բայց դուք մի́ դադարէք ՛ի պնդելոյ զհետ թշնամեաց ձերոց. եւ հասէ́ք ՛ի վերջս ն(ո)ց(ա), եւ մի́ տայք թոյլ մտանել ՛ի քաղաքս իւրեանց. քանզի մատնեաց զնոսա տ(է)ր ա(ստուա)ծ ՛ի ձեռս մեր։
²⁰Եւ եղեւ իբրեւ դադարեաց յեսու եւ ա(մենայ)ն որդիքն ի(սրաէ)լի ՛ի կոտորելոյ զն(ո)ս(ա) կոտորո́ւմն մեծ յոյժ մինչեւ ՛ի սպառ. եւ ապրեալքն որ ապրեցան ՛ի նոցանէ՝ մտին ՛ի քաղաքս ամուրս։
²¹Եւ դարձա́ւ ա(մենայ)ն ժողովուրդն ՛ի բանակն առ յեսու ՛ի մակեդայ ողջանդամք, եւ ո́չոք կռնչեաց յորդւոցն ի(սրաէ)լի լեզուաւ իւրով։
²²Եւ ասէ յեսու. բացէք զայրն եւ հանէ́ք առիս զհնգեսին թագաւորսն յայրէ անտի։

²³եւ արարին ա́յնպէս. եւ հանի́ն առ նա զհնգեսին թագաւորսն յայրէ անտի, զթագաւորն ե(րուսաղէ)մի, եւ զթագաւորն քեբրոնի, եւ զթագաւորն յերիմութայ, եւ զթագաւորն ղաքիսայ, եւ զթագաւորն ոդողոմայ։
²⁴Եւ իբրեւ հանին զնոսա առ յեսու. եւ կոչեաց յեսու զա(մենայ)ն ի(սրա)էլ եւ յառաջամարտիկս երթա́լ ընդ նմա։ եւ ասէ ցն(ո)ս(ա), մատի́ք յառաջ՝ եւ դի́ք զոտս ձեր ՛ի վ(ե)ր(այ) պարանոցաց ն(ո)ց(ա). եւ մատուցեալ եդին զոտս իւրեանց ՛ի վ(ե)ր(այ) պարանոցաց ն(ո)ց(ա)։
²⁵Եւ ասէ ցնոսա յեսու. մի́ երկնչիք ՛ի նոցանէ՝ եւ մի́ զանգիտիցէք, քաջացարո́ւք եւ զօրացարո́ւք, զի այսպէս արասցէ տ(է)ր ընդ ա(մենայ)ն թշնամիս ձեր՝ ընդ որս դո́ւք մարտնչիցիք։

²⁶Եւ կոտորեա́ց զնոսա յեսու, եւ կախեաց զն(ո)ս(ա) հնգեսին զփայտից. եւ կային կախեա́լ զփայտիցն մինչեւ ցերեկոյ։
²⁷Եւ եղեւ ընդ արեւմուտն, հրամայեաց յեսու եւ իջուցին զնոսա ՛ի փայտիցն. եւ ընկեցին յա́յրն յորս փախուցեալ անկեալ էին. եւ թաւալեցուցին քարինս մեծամեծս ՛ի վ(ե)ր(այ) այրին մինչեւ ցայսօր ժամանակի։
²⁸Եւ զմակետա առին յաւուր յայնմիկ, եւ կոտորեցին զնա սրո́վ սուսերի. եւ զթագաւորն ն(ո)ց(ա), եւ սատակեցին զնա՝ եւ զա(մենայ)ն շնչաւոր որ ՛ի նմա. եւ ո́չ ոք մնաց ՛ի նմանէ ապրեալ եւ փախուցեալ։ եւ արա́ր ընդ թագաւորն մակեդայ, զորօրինակ արար ընդ թագաւորն երիքովի։

²⁹Եւ գնաց յեսու եւ ա(մենայ)ն ի(սրա)էլ ընդ նմա ՛ի մակեդայէ ՛ի ղեբնա։ եւ պաշարեցին զղեբնա,
³⁰եւ մատնեաց զնա տ(է)ր ՛ի ձեռս ի(սրաէ)լի. եւ ա́ռ զնա, եւ զթագաւոր նորա, եւ կոտորեաց զնա սրով սուսերի, եւ զա(մենայ)ն շնչաւոր որ ՛ի նմա. եւ ո́չ մնաց ՛ի նմանէ ո́չ մի ապրեալ եւ փախստական. եւ արար ընդ թագաւորն ն(ո)ր(ա) զորօրինակ արար ընդ թագաւորն երիքովի։
³¹Եւ գնաց յեսու եւ ա(մենայ)ն ի(սրա)էլ ընդ նմա ՛ի ղեբնայէ ՛ի ղաքիս, եւ նստաւ զնովաւ եւ պաշարեաց զնա.
³²եւ մատնեաց տ(է)ր զղաքիս ՛ի ձեռս ի(սրաէ)լի, եւ ա́ռ զնա յաւորն երկրորդի, եւ կոտորեաց զնա բերանով սրոյ, եւ սատակեաց զնա, զորօրինակ արար ընդ ղեբնան։

³³Յայնժամ ել եղամ արքայ գազերայ օգնել ղաքիսայ. եւ եհար զնա յեսու սրով սուսերի եւ զզօրս ն(ո)ր(ա) մինչեւ չմնա́լ ՛ի ն(ո)ց(ա)նէ, ապրեալ եւ փախստական։
³⁴Եւ չուեա́ց յեսու եւ ա(մենայ)ն ի(սրա)էլ ընդ նմա ՛ի ղաքիսայ յոդողամ, եւ նստաւ զնովաւ եւ պաշարեաց զնա. եւ մատնեաց զնա տ(է)ր ՛ի ձեռս ի(սրաէ)լի,
³⁵եւ ա́ռ զնա յաւուր յայնմիկ, եւ կոտորեաց զնա սրով սուսերի, եւ զա(մենայ)ն շնչաւոր որ ՛ի նմա յաւուր յայնմիկ կոտորեցին, զորօրինակ արարին ընդ ղաքիս։
³⁶Եւ չուեա́ց յեսու եւ ա(մենայ)ն ի(սրա)էլ ընդ նմա յոդողոմայ ՛ի քեբրոն, եւ նստա́ւ զնովաւ,

³⁷եւ առին զնա, եւ հարին զնա բերանով սուսերի. եւ զթագաւորն ն(ո)ր(ա), եւ զա(մենայ)ն շնչաւոր որ ՛ի նմա, եւ ՛ի նմա ո́չ ոք էր ապրեալ. եւ արարին ընդ նմա ո(ր)պ(էս) արարին ընդ ոդողամ. եւ սատակեցին զնա եւ զա(մենայ)ն շնչաւոր, եւ զա(մենայ)ն ինչ որ ՛ի նմա։
³⁸Եւ դարձա́ւ յեսու եւ ա(մենայ)ն ի(սրա)էլ ՛ի դաբիր, եւ նստեալ զնովաւ,
³⁹առին զնա եւ զթագաւորն ն(ո)ր(ա), եւ զա(մենայ)ն զօրս ն(ո)ր(ա). եւ հարին զնա բերանով սրոյ, եւ սատակեցին զնա եւ զա(մենայ)ն շնչաւոր որ ՛ի նմա. եւ ո́չ թողին եւ ո́չ մի ապրեալ. զոր օրինակ արարին ընդ քեբրոն նո́յնպէս արարին ընդ դաբիր եւ ընդ թագաւորն ն(ո)ր(ա). եւ որպէս արարին ը(ստ) ղեբնա եւ ը(ստ) թագաւորն ն(ո)ր(ա)։

⁴⁰Եւ եհա́ր յեսու զա(մենայ)ն երկիրն լեռնական եւ զնագեբ, եւ զդաշտականսն, եւ զասեդովթ եւ զա(մենայ)ն թագաւորս ն(ո)ր(ա). եւ ո́չ եթող ՛ի նմանէ ապրեալ, եւ զա(մենայ)ն շնչաւոր սատակեցի́ն ՛ի նմանէ. զորօրինակ պատուիրեաց տ(է)ր ա(ստուա)ծ ի(սրաէ)լի։
⁴¹Եւ կոտորեա́ց զն(ո)ս(ա) յեսու, ՛ի կադէսբառնեայ մինչեւ ցգազա. եւ զա(մենայ)ն երկիրն գոսոմայ մինչեւ ցգաբաւոն.
⁴²եւ զա(մենայ)ն թագաւորսն ն(ո)ց(ա). եւ զերկիր ն(ո)ց(ա) ա́ռ յեսու միանգամայն. զի տ(է)ր ա(ստուա)ծ ի(սրաէ)լի համագո́ւնդ կռուէր ընդ ի(սրաէ)լի։
⁴³Եւ դարձաւ յեսու եւ ա(մենայ)ն ի(սրա)էլ ընդ նմա ՛ի բանա́կն ՛ի գաղգաղայ։

¹Իբրեւ լուաւ յաբին արքայ սուրայ, առաքեա́ց առ յոբաբ արքայ մառոնայ, եւ առ արքայն սէմերոնի, եւ առ արքայն աքիփայ.
²եւ առ թագաւորս մեծի սիդոնայ ՛ի լեռնայինսն, եւ յռաբաթ հանդէպ քեներեթայ։ Եւ ՛ի դաշտայինն, եւ ՛ի նաբեթովր, եւ ՛ի ծովեզերեայս
³քանանացիս յարեւելից կողմանէ. ՛ի ծովեզերեայսն ամովրհացւոց, եւ ՛ի քետացիս, եւ ՛ի փերեզացիս, եւ յեբուսացիս որ ՛ի լերինն, եւ ՛ի խեւացիսն որ ընդ ահերմոնի́ւ ՛ի մասեփայ։
⁴Եւ ելին ինքեանք եւ թագաւորք իւրեանց ընդ նոսա. եւ զօր բազում իբրեւ զաւազ առ ափն ծովու բազմութ(եամ)բ, եւ երիվարք եւ կառք բազում յոյժ.

⁵գումարեցա́ն ա(մենայ)ն թագաւորքն այնոքիկ եւ եկին ՛ի միասին. եւ բանակեցա́ն միանգամայն առ ջրովն մառոնայ տա́լ պատերազմ ընդ ի(սրաէ)լի։
⁶Եւ ասէ տ(է)ր ցյեսու. մի́ երկնչիր յերեսաց ն(ո)ց(ա), զի վաղիւ ՛ի սո́յն ժամու մատնեցի́ց ես զամենեսեան զն(ո)ս(ա) վանեալս առաջի որդւոցն ի(սրաէ)լի. զերիվարս ն(ո)ց(ա) կարթակոտո́րս արասցես, եւ զկառս ն(ո)ց(ա) այրեսցե́ս հրով։
⁷Եւ եկն յեսու եւ ա(մենայ)ն զօրն պատերազմօղ ընդ նմա, ՛ի վ(ե)ր(այ) ն(ո)ց(ա) ՛ի ջուրն մառոնայ յանկարծօրէն. եւ անկան ՛ի վ(ե)ր(այ) ն(ո)ց(ա) ՛ի լեռնակողմանն։

⁸եւ մատնեա́ց զն(ո)ս(ա) տ(է)ր ընդ ձեռամբ ի(սրաէ)լի. եւ կոտորեալ զնոսա արարին հալածակա́ն մինչեւ ցմեծն սիդոն, եւ մինչեւ ցմասրեփովթմայիմ, եւ մինչեւ ցդաշտն մասեփայ ընդ արեւելս. եւ կոտորեա́ց զնոսա մինչեւ չմնալոյ ՛ի ն(ո)ց(ա)նէ ապրեալ։
⁹Եւ արա́ր ընդ ն(ո)ս(ա) յեսու որպէս պատուիրեաց նմա տ(է)ր. զերիվարս ն(ո)ց(ա) կարթակոտո́րս արար, եւ զկառս նոցա այրեա́ց հրով։
¹⁰Եւ դարձա́ւ յեսու ՛ի ժամանակին յայնմիկ, եւ ա́ռ զասովր եւ զթագաւորն ն(ո)ր(ա), եւ սպան զնա։ զի ասովր էր նախիշխան ա(մենայ)ն թագաւորութե(ան)ցն այնոցիկ։
¹¹եւ կոտորեցին զա(մենայ)ն շնչաւոր որ ՛ի նմա սրո́վ սուսերի, եւ սատակեցին զամենեսին. եւ ո́չ մնաց ՛ի նմա շնչաւոր։ Եւ զասովր այրեցին հրով.

¹²եւ զա(մենայ)ն քաղաքս թագաւորութե(ան)ցն այնոցիկ, եւ զթագաւորս ն(ո)ց(ա) ա́ռ յեսու, եւ կոտորեաց զն(ո)ս(ա) սրով սուսերի, եւ սատակեաց զնոսա. զոր օրինակ հրամայեա́ց ն(ո)ց(ա) մովսէս ծառայ տ(եառ)ն։
¹³Այլ զա(մենայ)ն քաղաքս հողացուցեալս ՛ի ն(ո)ց(ա)նէ ո́չ այրեաց ի(սրա)էլ, բայց միայն զասուր զոր այրեաց յեսու.
¹⁴եւ զա(մենայ)ն կապուտ ն(ո)ր(ա) եւ զանասուն առին իւրեանց յաւարի որդիքն ի(սրաէ)լի. բայց զն(ո)ս(ա) զամենեսին սատակեցին սրով սուսերի մինչեւ կորուսին զնոսա, եւ ո́չ թողին ՛ի նոցանէ եւ ո́չ մի շնչաւոր.

¹⁵զոր օրինակ հրամայեաց տ(է)ր մովսիսի ծառայի իւրում. եւ ո(ր)պ(էս) պատուիրեաց մովսէս յեսուայ՝ նո́յնպէս արար յեսու. եւ ո́չ անց եւ ո́չ զիւիք յա(մենայ)նէ զոր պատուիրեաց նմա մովսէս։
¹⁶Եւ ա́ռ յեսու զա(մենայ)ն երկիրն զայն, զլեռնակողմնն, եւ զա(մենայ)ն երկիրն նագեբ, եւ զա(մենայ)ն երկիրն գոսոմ, եւ զդաշտայինն եւ զարեւմտեայն, եւ զլեառնն ի(սրաէ)լի, եւ զհովիտս ն(ո)ր(ա) որ առ լերամբն.
¹⁷՛ի լեռնէն աքեղայ եւ ցելսն սուրայ, մինչեւ ցբաաղգադ։ եւ զդաշտայինն լիբանանու առ ոտամբն ահերմոնի։ եւ զթագաւորս նոցա. եւ զամենեսին ա́ռ եւ կոտորեա́ց։
¹⁸Եւ աւուրս բազո́ւմս արար յեսու ընդ ա(մենայ)ն թագաւորսն ը(ստ) այնոսիկ պատերազմ։

¹⁹եւ ո́չ էր քաղաք զոր ո́չ մատնեաց տ(է)ր որդւոցն ի(սրաէ)լի, բաց ՛ի խեւացւոցն որ բնակեալ էր ՛ի գաբաւոն. զամենեսին ա́ռ պատերազմաւ։
²⁰Զի ՛ի տ(թեն)է կարծրանային սիրտք ն(ո)ց(ա) պատահել պատերազմաւ ի(սրաէ)լի՝ զի սատակեսցին։ եւ մի́ տացի ն(ո)ց(ա) ողորմու(թ)ի(ւն), այլ զի սատակեսցին ո(ր)պ(էս) խօսեցաւ տ(է)ր ընդ մովսիսի։
²¹Եւ ե́կն յեսու ՛ի ժամանակին յայնմիկ՝ եւ սատակեա́ց զենակիմսն, ՛ի լեռնակողմն քեբրոնի, եւ դաբիրայ, եւ յանովբայ՝ եւ յա(մենայ)ն լեռնէն ի(սրաէ)լի, եւ յա(մենայ)ն լեռնէն յուդայ, հանդերձ քաղաքօ́ք նոցա. եւ սատակեա́ց զն(ո)ս(ա) յեսու,
²²եւ ո́չ մնաց յենակիմացն յորդւոցն ի(սրաէ)լի, բայց միայն ՛ի գազա, եւ ՛ի գէթ, եւ յասեդովթ մնացին։

²³Եւ ա́ռ յեսու զա(մենայ)ն երկիրն որպէս պատուիրեաց տ(է)ր մովսիսի. եւ ետ յեսու ժառանգու(թ)ի(ւն) ի(սրաէ)լի վիճակաւ ըստ ցեղից ն(ո)ց(ա)։ եւ դադարեա́ց երկիրն պատերազմել։

¹Եւ ա́յս են թագաւորք՝ զորս կոտորեաց մովսէս եւ որդիքն ի(սրաէ)լի, եւ ժառանգեցին զերկիրն ն(ո)ց(ա) յայնկոյս յորդանանու յարեւմտից կողմանէ, ՛ի ձորոյն առնովնայ մինչեւ ցլեա́ռնն ահերմոն, եւ զա(մենայ)ն զարաբա յարեւելից կողմանէ·
²Զսեհոն թագաւոր ամովրհացւոց որ բնակեա́լ էր յեսեբոն, եւ տիրէր յարոէրայ մինչեւ ցձորն առնովնայ՝ յեզերբ ձորոյն, եւ զկէսն գաղաադու մինչեւ ցհեղեղատն յաբովկայ. սահմանք որդւոցն ամոնայ։
³եւ արաբա մինչեւ ցծովն քէներեթայ, եւ ընդ արեւելս մինչեւ ցծովն աղի, յերեւելից ընդ ճանապարհն ասեմովթայ. ՛ի թեմանայ որ է ընդասեդովթաւ ՛ի փասգայնէ։
⁴Եւ սահմանք ովգայ արքայի բասանու՝ որ մնացեալ էր ՛ի սկայից անտի. որ բնակեալ էր յաստարովթ եւ յեդրային։

⁵իշխա́ն ՛ի լեռնէն ահերմոնի եւ ՛ի սեղքայ. եւ զա(մենայ)ն բասան մինչեւ ՛ի սահմանս գէսուրայ, եւ մաքաթի, եւ զկէս գաղաադու սահմանացն սեհոնի արքայի եսեբոնայ։
⁶Եւ մովսէս ծառայ տ(եառ)ն եւ որդիքն ի(սրաէ)լի հարի́ն զնոսա. եւ ետ զայն մովսէս ծառայ տ(եառ)ն ՛ի ժառանգութի(ւն) ռուբինի եւ գադայ, եւ կիսոյ ցեղին մանասէի։
⁷Եւ ա́յս են թագաւորք ամովրհացւոց զոր կոտորեա́ց յեսու եւ որդիքն ի(սրաէ)լի յա́յնկոյս յորդանանու՝ առ ծովեզերբն գաղաադու ՛ի դաշտին լիբանանու մինչեւ ցլեառնն աղովկայ յելսն աէիրայ։ Եւ ետ զնա յեսու ցեղիցն ի(սրաէ)լի ՛ի ժառանգութի(ւն) ըստ վիճակաց ն(ո)ց(ա).

⁸՛ի լերինն եւ ՛ի դաշտի, եւ յարաբա, եւ յասեդովթ, եւ յանապատին եւ ՛ի նագեբ։ զքետացին, եւ զամովրհացին, եւ զքանանացին, եւ զփերեզացին, եւ զխեւացին, եւ զգերգեսացին, եւ զյեբուսացին։
⁹Զթագաւորն երիքովայ զմի։ զթագաւորն գայեայ որ մերձ ՛ի բեթէլ զմի։
¹⁰Զթագաւորն երուսաղէմի զմի։ զթագաւորն քեբրոնի զմի։
¹¹Զթագաւորն յերիմութայ զմի։ զթագաւորն ղաքիսայ զմի։
¹²Զթագաւորն եդղոնի զմի։ զթագաւորն գազերայ զմի։
¹³Զթագաւորն դաբիրայ զմի։ զթագաւորն գեսեմայ զմի։
¹⁴Զթագաւորն հերմեայ զմի։ զթագաւորն աբերայ զմի։
¹⁵Զթագաւորն ղոբնայ զմի։ զթագաւորն ոդողոմայ զմի։

¹⁶Զթագաւորն մակեդայ զմի։
¹⁷Զթագաւորն թափուայ զմի։ զթագաւորն ոփերայ զմի։
¹⁸Զթագաւորն նափեկայ զմի։ զթագաւորն ասովրայ զմի։
¹⁹Զթագաւորն սամրոնայ զմի։ զթագաւորն մառովնայ զմի։ զթագաւորն ասքափայ զմի։
²⁰Զթագաւորն թանաքայ զմի։ զթագաւորն մակեդդովայ զմի։
²¹Զթագաւորն կեդեսայ զմի։ զթագաւորն յեկնոմա́յ զքերմեղայն զմի։
²²Զթագաւորն դովրայ զնափեդովրայ զմի։ զթագաւորն գեղիմայ զգեղգեղայն զմի։
²³Զթագաւորն թերայ զմի։ Ամենեքեան սոքա թագաւորք քսանեւինն։

¹Եւ յեսու ծերացեա́լ եւ անցեա́լ զաւուրբք։ Եւ ասէ տ(է)ր ցյեսու. դու ծերացեա́լ ես եւ անցեալ զաւուրբք. եւ երկիր բազո́ւմ մնացեալ է ՛ի ժառանգութ(են)է։
²Եւ ա́յս է երկիրն մնացեալ. ա(մենայ)ն սահմանք փղշտացւոց. գէսուրի.
³եւ քանանացին, յանշինէ́ անտի ընդդէմ եգիպտոսի, մինչեւ ՛ի սհամանս ակկարոնի, ընդ աջմէ քանանացւոյն համարի հնգից թագաւորացն փղշտացւոց. գազացւոյն, եւ ազովտացւոյն. եւ խեւացւոյն ՛ի թեմանայ։
⁴Եւ ա(մենայ)ն երկրին քանանացւոյն, գազայ, եւ սիդոնացիք մինչեւ ցյափեկա մինչեւ ցսահմանս ամովրհացւոյն։

⁵եւ զա(մենայ)ն երկիրն արաբա ՛ի փղշտացւոց՝ եւ զա(մենայ)ն լիբանան յելիցն արեւու, ՛ի գաղգաղա՝ առ ոտամբ լերինն ահերմոնի մինչեւ ցմուտս եմաթայ.
⁶ամենայն որ բնակեալ իցէ զլեռնակողմնն, ՛ի լիբանանէ մինչեւ ՛ի մասերեփ թովթմայիմ։ Եւ զա(մենայ)ն սիդոնացիս. ե́ս սատակեցից զն(ո)ս(ա) յերեսաց որդւոցն ի(սրաէ)լի. բայց դու բաժանեա́ զն(ո)ս(ա) ՛ի ժառանգութի(ւն) ի(սրաէ)լի. որպէս պատուիրեցի քեզ։
⁷Եւ արդ՝ բաժանեա́ զերկիրս զայս ՛ի ժառանգութի(ւն) ինն ցեղիցն, եւ կիսոյ ցեղին մանասէի։ ՛ի յորդանանէ մինչեւ ցծովն մեծ ընդ կողմն արեւմտից՝ տացես զնա եւ ծովն մեծ սահմանեսցէ։

⁸Եւերկու ցեղիցն՝ եւ կիսոյ ցեղին մանասէի՝ որ են ընդ ռուբինի եւ ը(ստ) գադայ որ առին զժառանգութի(ւն) իւրեանց զոր ետ մովսէս յայնկոյս յորդանանու յարեւելից. բաժանեաց ն(ո)ց(ա) մովսէս ծառայ տ(եառ)ն,
⁹յարոերայ՝ որ է առ եզերբ հեղեղատին առնովնայ, եւ զքաղաքն որ է ՛ի մէջ ձորոյն, եւ զա(մենայ)ն միսովր, ՛ի մեդաբայ մինչեւ ցդեբոն։
¹⁰զա(մենայ)ն քաղաքսն սեհոնի արքայի ամովրհացւոց որ թագաւորեաց յեսեբոն, մինչեւ ցսահմանս որդւոցն ամոնայ։
¹¹եւ զգաղաադայինն, եւ զսահմանս գեսուրայ, եւ զմաքաթեայ, եւ զա(մենայ)ն լեառնն ահերմոն. եւ զա(մենայ)ն բասանաստան մինչեւ ցսեղքա։

¹²Եւ զա(մենայ)ն թագաւորութի(ւն)ն ովգայ ՛ի բասան, որ թագաւորեաց յաստարովթ եւ յեդրային. նա́ մնաց ՛ի մնացորդաց սկայիցն. եւ եհար զնա մովսէս՝ եւ սատակեաց։
¹³Եւ ո́չ սատակեցին որդիքն ի(սրաէ)լի զգեսուրի, եւ զմաքաթի, եւ զքանանացին. եւ բնակէր թագաւորն գեսուրայ եւ մաքաթեայ ՛ի մէջ որդւոցն ի(սրաէ)լի մինչեւ ցայսօր։
¹⁴Բայց ցեղին ղեւեայ ո́չ տուաւ բաժին եւ ժառանգութի(ւն). զի տ(է)ր ա(ստուա)ծ ի(սրաէ)լի է́ ն(ո)ց(ա) ժառանգութի(ւն)՝ որպէս ասաց ն(ո)ց(ա) տ(է)ր։ Եւ ա́յս են բաժինք զոր բաժանեաց մովսէս որդւոցն ի(սրաէ)լի, յռաբովթ մովաբ յայնկոյս յորդանանու յանդիման երեքոյի։
¹⁵Եւ ե́տ մովսէս ըստ ցեղին ռուբինի եւ ըստ տոհմից ն(ո)ց(ա)։

¹⁶եւ եղեն սահմանք ն(ո)ց(ա) յարոէրայ՝ որ կայ յանդիման ձորոյն առնովնայ, եւ քաղաքն ՛ի ձորն առնովնայ, եւ ա(մենայ)ն միսովր. եւ մեդաբայ
¹⁷մինչեւ ցգեբոն. եւ զա(մենայ)ն քաղաքս ն(ո)ց(ա) որ են ՛ի միսովր, եւ զգեբոն, եւ զբամովթբայա́ղ. եւ զտունս բաելմովթայ.
¹⁸եւ զյասա, եւ զկեդմովթ, եւ զմեփայաթ.
¹⁹եւ զկարիաթեմ, եւ զսեբամա, եւ զսարթ, եւ զսիովր ՛ի լերինն ենակայ։
²⁰եւ զբեթփագովր. եւ զասեգովթփասգայ, եւ զբեթսիմովթ, եւ զա(մենայ)ն քաղաքս միսովրայ,

²¹Եւ զա(մենայ)ն թագաւորութի(ւն)ն սեհոնի արքայի ամովրհացւոց, որ թագաւորեաց յեսեբոն. զոր եհար մովսէս, զնա́ եւ զիշխանս մադիամու, եւ ղեւի, եւ զրոկոմ, եւ զսուր, եւ զուր, եւ զռովբէ. եւ զիշխանս պարասիոնացն զբնակեալս յերկրին։
²²Եւ զբաղաամ բէովրեան զհարցուկն, կոտորեցին որդիքն ի(սրաէ)լի սրով ՛ի միո́ւմ վայրկենի։
²³եւ եղեն սահմանքն ռուբինի յորդանան սհաման։ Ա́յս է ժառանգութի(ւն) որդւոցն ռուբինի ըստ տոհմից իւրեանց, քաղաքք եւ աւանք նոցա։
²⁴Եւ ետ մովսէս որդւոցն գադայ ըստ տոհմից իւրեանց.
²⁵եւ եղեն ն(ո)ց(ա) սահմանք յազերայ, եւ ա(մենայ)ն քաղաքք գաղաադու. եւ կէս երկրի որդւոցն ամովնայ մինչեւ ցարոէր որ է յանդիման արաբայ.

²⁶եւ յեսեբոնայ մինչեւ ցհռամովթ՝ առ մասփայիւ. եւ բոտանիմ, եւ մանայեմ մինչեւ ցսահմանս դաբիրայ։
²⁷Եւ յեմակն եւ բեթարամ, եւ բեթնամրա, եւ սովքով, եւ սափոն. եւ զա́յլ եւս թագաւորութի(ւն)ն սեհոնի արքայի եսեբոնայ. յորդանան սահման է. մինչ ցեզր ծովուն քեներեթայ, յայնկոյս յորդանանու յարեւելից։
²⁸Ա́յս է ժառանգութի(ւն) որդւոցն գադայ ը(ս)տ տոհմից իւրեանց. ըստ քաղաքաց ն(ո)ց(ա)՝ եւ ագարակք նոցին։
²⁹Եւ ետ մովսէս կիսոյ ցեղին մանասէի. եւ եղեւ կիսոյ ցեղի որդւոցն մանասէի, ը(ս)տ տոհմից իւրեանց։

³⁰եւ եղեն սահմանք ն(ո)ց(ա) ՛ի մանայեմայ, եւ ա(մենայ)ն բասան. եւ ա(մենայ)ն թագաւորութի(ւն)ն ովգայ արքայի բասանու, եւ ա(մենայ)ն աւանք յայիրայ, որ են ՛ի բասանաստանի. վաթսուն քաղաք։
³¹եւ կէս գաղաադու, եւ յաստարովթ, եւ յեգրային, քաղաքք թագաւորութե(ա)ն ովգայ ՛ի բասանաստանի։ Եւ տուան որդւոցն մաքիրայ որդւոյ մանասէի, եւ կիսոց որդւոցն մանասէի ըստ տոհմից իւրեանց։
³²Սոքա́ են զորս ժառանգեցոյց մովսէս յայնկոյս յորդանանու յռաբովթ մովաբ յայնմ կողմանէ յորդանանու հանդէպ երիքոյի յարեւելից։

³³Եւ ցեղին ղեւեայ ո́չ ետ մովսէս ժառանգութի(ւն). զի տ(է)ր ա(ստուա)ծ ի(սրաէ)լի ինքնին է ժառանգութի(ւն) ն(ո)ց(ա)՝ ո(ր)պ(էս) խօսեցաւ ընդ ն(ո)ս(ա)։

¹Եւ սոքա́ են որ ժառանգեցուցին որդւոցն ի(սրաէ)լի յերկրին քանանացւոց, որոց ժառանգեցուցին։ Եղիազար քահանայ, եւ յեսու նաւեան, եւ իշխանք նահապետութե(ան) ցեղից որդւոցն ի(սրաէ)լի։
²եւ վիճակօք ժառանգեցուցին. զոր օրինակ պատուիրեաց տ(է)ր ՛ի ձեռն յեսուայ, իննեցունց ցեղիցն, եւ կիսոյ ցեղին։
³Քանզի ետ մովսէս ժառանգութի(ւն) երկուց ցեղիցն եւ կիսոյ ցեղին յայնկոյս յորդանանու։ Եւ ղեւտացւոցն ո́չ ետ ժառանգութի(ւն) ՛ի մէջ ն(ո)ց(ա)։
⁴Զի էին որդիքն յովսեփու երկու ցեղք, մանասէ եւ եփրեմ. եւ ո́չ տուաւ բաժին յերկիրն ղեւտացւոցն, այլ քաղաքք բնակելոյ, եւ զատուցեալս ըստ նոցին խաշանց նոցա.

⁵զորօրինակ պատուիրեաց տ(է)ր մովսիսի, նո́յնպէս արարին որդիքն ի(սրաէ)լի եւ բաժանեցին զերկիրն։
⁶Եւ մատեան որդիքն յուդայ առ յեսու ՛ի գաղգաղայ. եւ ասէ ցնա քաղէբ յեփոնեայ կենեզեան. դու ինքնին գիտես զբանն՝ զոր խօսեցաւ տ(է)ր ընդ մովսիսի առնն ա(ստուծո)յ՝ վ(ա)ս(ն) իմ եւ քո ՛ի կադէսբառնեա։
⁷զի քառասնամեայ էի ես, յորժամ առաքեաց զիս մովսէս ծառայ տ(եառ)ն ՛ի կադէսբառնեայ լրտեսե́լ զերկիրն. եւ բերաք նմա զրոյց ըստ մտաց ն(ո)ր(ա)։
⁸Բայց եղբարքն իմ որ ելին ընդիս՝ թիւրեցին զմիտս ժողովրդեանն. բայց ես յաւելա́յ երթալ զհետ տ(եառ)ն ա(ստուծո)յ իմոյ։

⁹եւ երդուաւ մովսէս յաւուր յայնմիկ եւ ասէ. յերկիրն յոր հասեր՝ քե́զ լիցի ՛ի ժառանգութի(ւն) եւ որդւոց քոց յաւիտեան. զի յաւելայ երթա́լ զհետ տ(եառ)ն ա(ստուծո)յ իմոյ։
¹⁰Եւ արդ կերակրեա́ց զիս տ(է)ր ո(ր)պ(էս) ասաց՝ ա́յս ամք քառասներորդ հինգերորդ է՝ յորմէհետէ խօսեցաւ տ(է)ր զբանս զայս ընդ մովսիսի. եւ շրջեցաւ ի(սրա)էլ յանապատին։ Եւ արդ աւասիկ ե́մ ես այսօր ամաց ութսուն եւ հնգից.
¹¹եւ կարո́ղ եմ այսօր՝ ո(ր)պ(էս) յորժամ առաքեաց զիս մովսէս, նո́յնպէս եւ արդ կարօղ եմ մտանել եւ ելանել ՛ի պատերազմ։

¹²Եւ այժմ խնդրե́մ ՛ի քէն զլեառնն զայն՝ ո(ր)պ(էս) ասաց տ(է)ր յաւուր յայնմիկ. զի դու ինքնին լուար զբանս զայս յաւուր յայնմիկ։ եւ արդ ա́ւանիկ ենակիմք են անդ, եւ քաղաքք ամուրք եւ մեծամեծք. արդ եթէ տ(է)ր ընդի́ս է՝ սատակեցից զն(ո)ս(ա) որպէս ասաց ինձ տ(է)ր։
¹³Եւ օրհնեա́ց զնա յեսու. եւ ե́տ զքեբրոն քաղեբայ որդի յեփոնեայ կենեզացւոյ ՛ի ժառանգութի(ւն)։
¹⁴Վ(ա)ս(ն) այնորիկ եղեւ քեբրոն քաղեբայ որդւոյ յեփոնեայ կենեզացւոյ ՛ի ժառանգութի(ւն). վ(ա)ս(ն) երթալոյ ն(ո)ր(ա) զհետ հրամանի տ(եառ)ն ա(ստուծո)յ ի(սրաէ)լի։
¹⁵եւ անուն քեբրոնի է́ր յառաջ քաղաք՝ արբոկ։ նա́ էր մայր քաղաքաց ենակիմանցն։ եւ երկիրն դադարեա́ց ՛ի պատերազմէ։

¹Եւ եղեն սահմանք ցեղից որդւոցն յուդայ, ըստ տոհմի իւրեանց ՛ի սահմանացն եդոմայեցւոց, ՛ի սինն անապատէ մինչեւ ՛ի կադէս,
²ը(ս)տ հարաւակողմն. եւ եղեն ն(ո)ց(ա) սահմանք ՛ի հարաւոյ մինչեւ յեզր ծովուն աղւոյ, ՛ի սարոյն որ իջանէ ՛ի հարաւակողմն.
³եւ անցանեն մինչեւ ՛ի զառ ՛ի վայրին ակրաբիմայ, եւ պատին զսինաքաւ, եւ վերանան ՛ի հարաւոյ ցկադէսբառնեա, եւ ելանեն ՛ի հովն եւ ձգին առ ադդարաւ, եւ պատին առ արեւմտիւքն կադեսայ։
⁴եւ երթան ցասեմոնա, եւ հանեն մինչեւ ցձորն եգիպտացւոց. եւ եղիցին նոքա ե́լք սահմանացն ընդ ծովակողմն։ Ա́յս են ն(ո)ց(ա) սահմանք ՛ի հարաւոյ։

⁵Եւ սահմանք յարեւելից ա(մենայ)ն ծովն աղի, մինչեւ ցեզրն յորդանանու։ Եւ սահմանք ն(ո)ց(ա) ընդ հիւսւսի. ՛ի սարոյ ծովուն եւ յեզերէ յորդանանու.
⁶հասանեն սահմանքն ՛ի բէթագղա, եւ շրջին առ հիւսւսով ցբէթարաբու, եւ վերանան սահմանքն առ բէովն վիմաւ որդւոցն ռուբինի։
⁷եւ ելանեն սահմանքն առ չորրորդ մասամբ ձորոյն աքովրայ. եւ ընդ հարաւակողմն, եւ իջանեն ՛ի գաղգաղ, որ է հանդէպ մատուցին եղոմիմա, եւ ընդ հարաւակողմն. եւ հասանէ սահմանն ՛ի ջուր արեգ աղբեր. եւ եղիցին նոցա ելք, աղբերն ռովգեզայ։

⁸եւ ելանեն սահմանքն ՛ի ձոր որդւոցն ենովմայ ՛ի թիկանց յեբուսայ ՛ի հարաւոյ, ա́յն է երուսաղէմ։ եւ հասանեն սահմանքն ՛ի գլուխ լերինն՝ որ է հանդէպ ձորոյն ենովմայ ՛ի ծովակոյս կողմանէ՝ որ է յեզեր երկրին ռափայնոց ընդ հիւսւսի։
⁹Եւ հանէ սահմանն ՛ի գլխոյ լերինն յաղբեր ջրոյն ափովթայ, եւ հատանէ լեառնն եփրեմի ՛ի գայի. եւ հանէ սահմանն ՛ի բաաղ. ա́յն է քաղաք յարիմայ։
¹⁰Եւ պատի սահմանն ՛ի բաաղայ ընդ ծովակողմն ասարէս ՛ի լեառնն սէիր, եւ պատի զթիկամբք քաղաքին յարիմայ ՛ի հիւսւսոյ. ա́յն է քաղսոն. եւ իջուցանէ յարեգ քաղաք, եւ անցանէ ՛ի հարաւ։

¹¹եւ հատանէ սահմանն ՛ի թիկանց ակկարոնի ընդ հիւսւսի։ եւ հանեն սահմանքն ՛ի սարքայովնայ, եւ անցանեն առ լերամբ երկրին բաաղայ, եւ հատանեն ցաբնեղ։ եւ եղիցին ելք սահմանաց ն(ո)ց(ա) ընդ ծովակողմն.
¹²եւ զսահման ն(ո)ց(ա) ՛ի ծովէ՝ ծո́վն մեծ զատանէ։ Ա́յս են սահմանք որդւոցն յուդայ շուրջանակի, ըստ տոհմից իւրեանց։
¹³Եւ քաղեբայ որդւոյ յեփոնեայ ե́տ բաժին ՛ի մէջ որդւոցն յուդայ հրամանաւ ա(ստուծո)յ. եւ ե́տ նմա յեսու զքաղաքն արբոկ, զմայր քաղաքացն ենակայ, ա́յն է քեբրոն։
¹⁴եւ սատակեա́ց զնոսա անտի քաղէբ որդի յեփոնեայ, զերիս որդիսն ենակայ, զսուսի, զթովմայի, եւ զքիման, զծնունդս ենակայ։

¹⁵Եւ ե́լ անտի քաղէբ ՛ի վ(ե)ր(այ) բնակչացն դաբիրայ. եւ անուն դաբիրայ՝ էր յառաջագոյն քաղաք նամակաց։
¹⁶Եւ ասէ քաղէբ. որ ոք առցէ զքաղաքն նամակաց, եւ տիրեսցէ նմա, տա́ց նմա զասքա դուստր իմ կնութե(ան)։
¹⁷Եւ ա́ռ զնա գոթոնիէլ որդի կենեզի, եղբայր քաղեբայ կրտսեր. եւ ե́տ նմա զասքա դուստր իւր կնութե(ան)։
¹⁸Եւ եղեւ յերթալն ն(ո)ր(ա) խորհեցաւ ընդ նա՝ եւ ասէ. խնդրեցի́ց ՛ի հարե իմմէ ագարակ։ եւ աղաղակեա́ց յիշոյ անտի,։ եւ ասէ ցնա քաղէբ՝ զի՞ քեզ։
¹⁹եւ ասէ ցնա. տո́ւր ինձ օրհնու(թ)ի(ւն). զի յերկիր նագեբ ետուր զիս, տո́ւր ինձ գողաթմայիմ. եւ ետ նմա քաղէբ զգողաթն վերին՝ եւ զգողաթն ներքին։
²⁰Ա́յս է ժառանգու(թ)ի(ւն) ցեղի որդւոցն յուդայ, ը(ս)տ տոհմից իւրեանց։

²¹Եւ եղեն ն(ո)ց(ա) քաղաքք։ քաղաք առաջին ցեղի որդւոցն յուդայ ՛ի սահմանս եդոմայ յանապատին։ Կասբեէղ, եւ եդրային եւ յագուր.
²²եւ կինա, եւ դէմոնա, եւ ադադա.
²³եւ կադէս, եւ իթնանզիփ.
²⁴եւ տէղէմ, եւ բաաղովթ.
²⁵եւ քաղաքն ասեբոն, այն է ասովր։
²⁶Ամամ, եւ սամաս, եւ մովղադա.
²⁷եւ ասէրգադդա, եւ բեթփաղէթ.
²⁸եւ ասարսուղա, եւ բերսաբէէ. եւ աւանք ն(ո)ց(ա), եւ ագարակք ն(ո)ց(ա)։
²⁹Բաաղա, եւ աւիմ, եւ ասեմ։
³⁰եւ եղթովղադ, եւ քուղ, եւ երմա,
³¹եւ սիկեղէկ, եւ մադեբենա, եւ սանսաննա.
³²եւ ղամովթ, եւ սէղէմի, եւ ռեմոն. քաղաքք քսանեւինն՝ եւ աւանք ն(ո)ց(ա)։
³³՛Ի դաշտավայրս, եսթաւուղ, եւ սարաա, եւ ասնա։

³⁴եւ ռամոն, եւ զանով, եւ ադիաթեմ, եւ ենայիմ,
³⁵եւ յերիմութ, եւ ոդողամ, եւ ներմա, եւ սոքով, եւ ազեկա։
³⁶եւ սարգարիմ, եւ գադերա. եւ ագարակք ն(ո)ց(ա). քաղաքք չորեքտասանք եւ աւանք նոցա։
³⁷Սենան, եւ ադասա, եւ մակդաղգադ,
³⁸եւ գաղաան, եւ մասփա, եւ յեքթրայեղ։
³⁹եւ ղաքիս, եւ բազկաթ, եւ ագղոմ,
⁴⁰եւ քաբբա, եւ ղամաս, եւ քասղոմ,
⁴¹եւ գադերովթ, եւ բեթղագոն, եւ նովմա, եւ մակեդդա. քաղաքք վեշտասան եւ աւանք ն(ո)ց(ա)։
⁴²Ղեբնա, եւ աթեր,
⁴³եւ յեփթա, եւ ասեննա, եւ նեսիբ,
⁴⁴եւ կէիղա, եւ աքեզիբ, եւ մարեսա, եւ եղէմովմ. քաղաքք ինն, եւ աւանք ն(ո)ց(ա)։

⁴⁵Ակկարոն, եւ աւանք ն(ո)ր(ա), եւ ագարակք ն(ո)ր(ա)։
⁴⁶եւ յակկարոնէ յէմէն, եւ ա(մենայ)ն արուարձանք ազդարովդայ. եւ աւանք ն(ո)ց(ա) եւ ագարակք ն(ո)ց(ա)։
⁴⁷Գազա, եւ աւանք ն(ո)ր(ա) եւ ագարակք նորա, մինչեւ ցհեղեղատն եգիպտոսի. եւ ծովն մեծ զատուցանէ։
⁴⁸Եւ ՛ի լեռնավայրսն՝ սափիր, եւ յեթեր, եւ սովքով։
⁴⁹եւ գեննա. եւ լեառնն ահերմոն. եւ քաղաքն նամակաց. ա́յն է դաբիր։
⁵⁰եւ անովբ եւ եսթեմով, եւ անիմ.
⁵¹եւ դոսոմ, եւ քիղուոն, եւ գեղոն. քաղաքք մետասան, եւ աւանք ն(ո)ց(ա)։
⁵²Երեբ, եւ եսան. եւ երումա.
⁵³եւ յանում, եւ բեթթափուէ, եւ ափակա.
⁵⁴եւ քամմատա. եւ քաղաքքն արբոկ. այն է քեբրոն, եւ սիովր. քաղաքք ինն, եւ աւանք ն(ո)ց(ա)։

⁵⁵Մաւոն, եւ քերմէղ, եւ զիփ, եւ յետտա.
⁵⁶եւ յեզրայէղ, եւ յեկտա, եւ զանովաեկիմ,
⁵⁷եւ գաբաա, եւ թամնա. քաղաքք ինն, եւ աւանք ն(ո)ց(ա)։
⁵⁸Աղուղ, եւ բեթսուր, եւ գեդովր,
⁵⁹եւ մարովթ, եւ բեթանովթ, եւ եղթեկեն. քաղաքք վեց, եւ աւանք ն(ո)ց(ա)։ Թեկով, եւ եփրաթա. ա́յն է բեթղահէմ, եւ բագովր, եւ ետամ, եւ կուղովն, եւ տատամի, եւ սովրէս, եւ կարեմ, եւ գաղղիմ, եւ բեթեր, եւ մանոքով։ քաղաքք մետասան, եւ աւանք նոցա։
⁶⁰Կարիաթբաաղ. նա́ է քաղաք յարիմայ, եւ արաբա. քաղաքք երկու, եւ աւանք ն(ո)ց(ա), եւ ագարակք իւրեանց։
⁶¹Բէթբարգիս, եւ բէթարաբա, եւ մադովն, եւ սովքովա։

⁶²եւ նեբսան. եւ ք(ա)ղ(ա)քք աղտիցն, եւ ենգադիս. ք(ա)ղա(ա)քք եւթն, եւ աւանք ն(ո)ց(ա)։
⁶³Եւ յեբուսացին բնակե(ա)լ էր յ(երուսաղ)էմ, եւ ո́չ կարացին որդիքն յուդայ մարտնչել ը(ստ) ն(ո)ս(ա). եւ բնակեցան յեբուսացիքն ը(ստ) որդիսն յուդայ յ(երուսաղ)էմ մինչեւ ցայսօր։

¹Եւ եղեն որդւոցն յովսեփայ սահմանք, ՛ի յորդանանէ հանդէպ երիքոյի, ՛ի ջրոյ անտի որ հանդէպ երիքոյի, յարեւելից ընդ անապատն. եւ ամբառնան յերիքովէ ՛ի լեռնակողմ անապատին ՛ի բեթեղղուզ։
²եւ ելանէ ՛ի բեթէղղուզայ, եւ անցանեն առ սահմանօքն արքիատարովթայ։
³Եւ ելանեն ընդ ծովակողմն ՛ի սահմանս յեփաղթեայ, մինչեւ ցսահմանս բեթորոնայ ներքնոյ, եւ մինչեւ ցգազեր. եւ եղիցին ելք ն(ո)ց(ա) ը(ստ) ծովակողմն։
⁴եւ ժառանգեցին որդիքն յովսեփայ՝ եփրեմ եւ մանասէ։
⁵Եւ եղեն սահմանք որդւոցն եփրեմայ ըստ տոհմից իւրեանց։ եւ եղեն սահմանք ժառանգութե(ան) ն(ո)ց(ա), յարեւելից՝ աստարովթ, եւ ադար, մինչեւ ցբեթորոնն վերին, եւ ցգաղեր։

⁶եւ անցանեն սահմանքն ընդ ծովակողմն ՛ի քամովթ ՛ի հիւսւսոյ. եւ պատիցի սահմանն ընդ արեւելս ՛ի թենաթսելով. եւ անցանէ յարեւլից առ յանովաւ։
⁷եւ իջցէ յանովայ յաստարովթ, եւ ՛ի նաարաթա. եւ աւանք ն(ո)ց(ա)։ Եւ անցցեն առ երիքոյիւ, եւ հանցեն ՛ի յորդանան.
⁸եւ ՛ի թափուեա անցցեն սահմանքն ՛ի ծովակողմն ՛ի հեղեղատն կանայ. եւ եղիցին ելք ն(ո)ր(ա) ՛ի ծովակողմն։ Ա́յս է ժառանգութի(ւն) ցեղի որդւոցն եփրեմի ը(ս)տ տոհմից իւրեանց։
⁹Եւ քաղաքքն զատուցեալք որդւոցն եփրեմի, ՛ի մէջ ժառանգութե(ան) որդւոցն մանասէի։ եւ ա(մենայ)ն քաղաքք եւ աւանք ն(ո)ց(ա)։

¹⁰Եւ ո́չ կորոյս եփրեմ զքանանացին բնակեալ ՛ի գազեր. եւ բնակէր քանանացին ՛ի մէջ եփրեմայ մինչեւ ցայսօր։ Մինչեւ ել փարաւոն արքայ եգիպտացւոց եւ ա́ռ զքաղաքն՝ եւ այրեաց զնա հրով. եւ զքանանացին եւ զփերեզացին զբնակեալն ՛ի գազեր խոտեաց. եւ ետ զնա փարաւոն պաշտակա́ն դստեր իւրում. եւ եղեն ծառա́յք հարկատուրք։

¹Եւ եղեն սահմանք ցեզի որդւոցն մանասէի. զի նա́ էր անդրանիկ յովսեփայ, մաքիրա́յ անդրանկանն մանասէի հօր գաղաադու, քանզի այր պատերազմօ́ղ էր, գաղաադայինն ՛ի բասանաստան։
²Եւ եղեւ այլոց որդւոցն մանասէի, ըստ տոհմից իւրեանց, որդւոցն աքիեզերայ, եւ որդւոցն քեղկեայ, եւ որդւոցն երիէղեայ, եւ որդւոցն եքէմայ, եւ որդւոցն սեմիրայեայ, եւ որդւոցն ոփերայ։ Սոքա́ են որդիք մանասէի որդւոյ յովսեփայ արո́ւք ըստ տոհմից իւրեանց։
³Եւ սաղպաադայ որդւոյ ոփերայ, որդւոյ գաղաադու, որդւոյ մաքիրայ, որդւոյ մանասէի, ո́չ գոյին ն(ո)ր(ա) ուստերք, այլ դստերք։ Եւ ա́յս են անուանք դստերաց սաղպաադայ. մաաղա, եւ նուա, եւ էգղա, եւ մեղքա, եւ թերսա։

⁴Կացին առաջի եղիազարու քահանայի, եւ առաջի յեսուայ որդւոյ նաւեայ, եւ առաջի իշխանացն՝ եւ ասեն։ Ա(ստուա)ծ պատուիրեաց ՛ի ձեռն մովսիսի տա́լ մեզ ժառանգու(թ)ի(ւն) ՛ի մէջ եղբարց մերոց. եւ տուա́ւ ն(ո)ց(ա) ժառանգու(թ)ի(ւն) հրամանաւ տ(եառ)ն ՛ի մէջ եղբարց հօր իւրեանց։
⁵Եւ ել վիճակ մանասէի դաշտն ղաբեկայ, եւ գաղաադի, եւ բասանա, որ է յա́յնկոյս յորդանանու։
⁶Զի դստերք որդւոց մանասէի ժառանգեցին վիճակ ՛ի մէջ եղբարց իւրեանց. եւ երկիրն գաղաադու եղեւ որդւոցն մանասէի մնացելոցն։
⁷Եւ եղեն սահմանք որդւոցն մանասէի, յասերմաքովթայ, որ է հանդէպ սեքեմայ, եւ երթան սահմանքն ցյամին, եւ ցասեբ՝ եւ յաղբեւրն թափթովթայ. մանասէի եղիցի երկիր թափթովթայ։

⁸եւ թափթովթա ՛ի սահմանս մանասէի որդւոցն եփրեմայ։
⁹եւ իջանեն սահմանքն ՛ի ձորն կանայի ընդ հարաւակողմն հանդէպ ձորոյն յայիրայ. եւ բեւեկին եփրեմայ ՛ի մէջ քաղաքին մանասէի։ Եւ սահմանք մանասէի ը(ստ) հիւսւսի ցհեղեղատն։ եւ եղիցին ն(ո)ր(ա) ելք ծովն,
¹⁰՛ի հարաւակողմն կուսէ եփրեմայ, եւ ՛ի հիւսւսոյ մանասէի. եւ եղիցի ծո́վն սհաման ն(ո)ց(ա)։ եւ յասեր յա́ր՝ իցեն ՛ի հիւսւսոյ կողմանէ. եւ յիսաքար՝ յարեւելից կողմանէ։

¹¹եւ եղիցի մանասէ ընդ իսաքա́ր եւ ընդ ասեր։ Բաթսան, եւ աւանք ն(ո)ց(ա). եւ ամբղան եւ դստերք նորա. բնակիչք ենդովրայ, եւ աւանք ն(ո)ր(ա). եւ բնակիչք մակեդդովայ, եւ աւանք ն(ո)ր(ա). եւ բնակիչք տանաքայ, եւ աւանք ն(ո)ր(ա). եւ երրորդ նափեթայ, եւ աւանք ն(ո)ր(ա)։
¹²Եւ ո́չ կարացին որդիք մանասէի սատակել զքաղաքսն զայնոսիկ։ եւ սկսաւ քանանացին բնակել յերկրին յայնմիկ։
¹³Եւ եղեւ իբրեւ յաղթահարեցին որդիքն ի(սրաէ)լի, արարին զքանանացին հնազա́նդս. բայց սատակելով ո́չ սատակեցին զն(ո)ս(ա)։
¹⁴Ընդդէ́մ դարձան որդիք յովսեփայ յեսուայ՝ եւ ասեն. ընդէ՞ր ժառանգեցուցեր մեզ մի ժառանգութի(ւն) եւ մի վիճակ. եւ ես ժողովուրդ բազո́ւմ եմ. եւ ա(ստուա)ծ օրհնեա́ց զիս։

¹⁵Ասէ ցնոսա յեսու. եթէ ժողովուրդ բազո́ւմ ես դու, ե́լ յանտառն՝ եւ սրբեա́ դու քեզ զերկիրն, զփերեզացիսն եւ զռափայինսն։ եթէ նե՞ղ իցէ քեզ լեառնդ եփրեմի։
¹⁶Եւ ասեն որդիքն յովսեփայ, չէ́ մեզ բաւական լեառնն եփրեմայ։ եւ անդ ընտիր ընտի́րք երիվարաց, եւ զէ́ն ա(մենայ)ն քանանացւոցն բնակելոյ յերկիր ընդիս. ՛ի բեթսան եւ յաւանս ն(ո)ր(ա), եւ ՛ի ձօրն յեզրայեղի։
¹⁷եւ խօսեցաւ յեսու ընդ որդիւսն յովսեփայ, ընդ եփրեմի եւ ընդ մանասէի՝ եւ ասէ. թէ ժողովուրդ բազո́ւմ ես դու, եւ զօրու(թ)ի(ւն) բազո́ւմ ունիս. մի́ լիցի քեզ մի վիճակ.

¹⁸անտա́ռն եղիցի քեզ, զի անտա́ռ է եւ սրբեսցես զնա. եւ եղիցին քե́զ ելք ն(ո)ր(ա) յորժամ սատակեսցես զքանանացին։ զի թէպէտ եւ երիվարք ընտի́րք իցեն ն(ո)ր(ա), եւ զօրագո́յն քան զքեզ իցէ, դո́ւ յաղթահարեսցես զնա։

¹Եւ եկեղեցացա́ւ ա(մենայ)ն ժողովուրդ որդւոցն ի(սրաէ)լի ՛ի սելով եւ կանգնեցին անդ զխորանն վկայութե(ան). եւ երկիրն նուաճեցա́ւ ՛ի նոցանէ։
²Եւ մնացին որդիքն ի(սրաէ)լի՝ եւ ո́չ ժառանգեցին եւթն ցեղն։
³Եւ ասէ ցնոսա յեսու. մինչեւ յե՞րբ մեղկիցէք չմտանել ժառանգել զերկիրն զոր ետ ձեզ տ(է)ր ա(ստուա)ծ հարցն մերոց։
⁴տո́ւք ինձ երի́ս արս ՛ի ցեղէ, եւ առաքեցից զն(ո)ս(ա), եւ յարուցեալ անցանիցեն ընդ երկիրն, եւ գրեսցեն զնա առաջի իմ՝ թէ ո՞(ր)պ(էս) պարտ իցէ բաժանել զնա։ Եւ եկին առ նա։
⁵եւ բաժանեաց ն(ո)ց(ա) եւթն մասն։ Յուդայ կացցէ ն(ո)ց(ա) սահման ՛ի հարաւոյ. եւ որդիքն յովսեփայ կացցեն ՛ի սահմանս իւրեանց ՛ի հիւսւսոյ։

⁶եւ դուք բաժանեցէ́ք զերկիրն եւթն բաժին՝ եւ բերէ́ք առիս այսր. եւ հանից ձեզ վիճակ աստ առաջի տ(եառ)ն ա(ստուծո)յ։
⁷Զի ո́չ գոյ ընդ ձեզ բաժին որդւոցն ղեւեայ. զի քահանայու(թ)ի(ւն) տ(եառ)ն է բաժին ն(ո)ր(ա)։ եւ գադ, եւ ռուբէն, եւ կէս ցեղին մանասէի առի́ն զժառանգութի(ւն) իւրեանց յա́յնկոյս յորդանանու յարեւելս՝ զոր ե́տ ն(ո)ց(ա) մովսէս ծառայ տ(եառ)ն։
⁸եւ յարուցեալ արքն գնացին։ Եւ պատուիրեա́ց յեսու արանցն երթելոց աշխարհադիտե́լ զերկիրն. եւ ասէ. անցէ́ք գնացէ́ք եւ աշխարհադիտեցէ́ք զերկիրն, եւ եկեսջիք առիս այսր. եւ հանից ձեզ վիճակս առաջի տ(եառ)ն ՛ի սեղով։

⁹Եւ գնացին արքն եւ շրջեցա́ն ընդ երկիրն, եւ աշխարհադիտեցի́ն զերկիրն, եւ տեսին զնա. եւ գրեցին ըստ քաղաքաց իւրեանց եւթն բաժին ՛ի մատենի. եւ բերին առ յեսու ՛ի բանակն ՛ի սեղով։
¹⁰Եւ արկ ն(ո)ց(ա) յեսու վիճակ ՛ի սեղով առաջի տ(եառ)ն, եւ բաժանեա́ց անդ զերկիրն որդւոցն ի(սրաէ)լի՝ ըստ բաժանմանց իւրեանց։
¹¹Եւ ել նախ վիճակն բենիամինին ը(ս)տ տոհմից իւրեանց. եւ էին սահմանք վիճակի նոցա ՛ի մէջ յուդայ՝ եւ ՛ի մէջ որդւոցն յովսեփայ։
¹²Եւ եղեն սահմանք ն(ո)ց(ա) ՛ի հիւսւսոյ յորդանանու. եւ ամբարձին սահմանքն ՛ի հարաւոյ երեքոյի ընդ հիւսւսի, եւ ամբարձցին ՛ի լեառնն ընդ ծովակողմն. եւ եղիցին ն(ո)ր(ա) ելք մաբդարայինն բեթաւան.

¹³եւ անցցեն անրի սահմանքն ղուզայ, ՛ի թիկանց ղուզայ ՛ի հարաւոյ կողմանէ, այն է բեթէղ։ եւ իջցեն սահմանքն ցաստարովթ ագարայ ՛ի լեռնակողմն, որ է ՛ի հարաւոյ բեթորոնայ ներքնոյ։
¹⁴Եւ անցցեն սահմանքն եւ պատեսցեն առ եզե́րբն որ հայի ը(ստ) ծով ՛ի հարաւոյ, ՛ի լեռնէն որ հանդէպ բեթորոնի է ընդ հարաւոյ։ եւ եղիցին ն(ո)ր(ա) ելք ՛ի կարիաթբաազ. ա́յն է կարիաթարիմ քաղաք որդւոցն յուդայ. եւ ա́յն է եզր ընդ ծովակողմն,
¹⁵եւ եզր ընդ հարաւ յեզերէ կարիաթբաազայ. եւ անցանեն սահմանքն ՛ի գային, եւ ելցեն յաղբեւր ջրոցն նափթովայ։

¹⁶Եւ իջցեն սահմանքն յեզր լերինն՝ որ է յանդիման հովտացն որդւոցն ենովմայ, որ է մասն ենակայ՝ ռափայնոցն ՛ի հիւսւսի. եւ իջցեն ՛ի գայի ենովմայ ՛ի թիկանց յեբուսայ ՛ի հարաւոյ. եւ իջցեն յաղբեւրն ռովգեղայ։
¹⁷Եւ հատցեն ընդ հիւսւսի, եւ անցցեն յաղբեւրն ՛ի բեթսամիւս,
¹⁸եւ պատեսցին առ գալիլովթաւ. որ է հանդէպ զառիվերին եդովմինեաւ. եւ իջցեն ՛ի վէմն բաան, որդւոյ ռուբինի, եւ անցցեն ՛ի թիկանց բեթարաբա ՛ի հիւսւսոյ. եւ իջցեն յարաբիա։
¹⁹եւ իջցեն սահմանքն ՛ի թիկանց բեթագղայ ՛ի հիւսւսոյ ծովու. եւ եղիցին ելք սահմանացն ՛ի սա́ր ծովուն աղւոյ ՛ի հիւսւսոյ, եւ յեզր յորդանանու ՛ի հարաւոյ։

²⁰Ա́յս են սահմանք ն(ո)ց(ա) ՛ի հարաւոյ, եւ յորդանան զատուցանէ ՛ի կողմանէ արեւելից։ Ա́յս է ժառանգութի(ւն) որդւոցն բենիամինի. եւ սահմանք ն(ո)ց(ա) շուրջանակի ը(ս)տ տոհմից իւրեանց։
²¹Եւ եղեն քաղաքք ցեղի որդւոցն բենիամինի ըստ տոհմից իւրեանց։ Յերիքով, ե́ւ բեթագղա, եւ ամենգասիմ,
²²եւ բեթարաբայ, եւ սեմարիմ, եւ բեթէղ.
²³եւ աւիմ, եւ ափար, եւ արփա։
²⁴եւ կարեմ, եւ քափերամին, եւ գաբաա։
²⁵քաղաքք երկոտասան եւ աւանք ն(ո)ց(ա)։
²⁶Գաբաւոն, եւ ռամմա, եւ բերովթ,
²⁷եւ մասփա, եւ կեփիրա, եւ ամուսա,
²⁸եւ ռէկէմ, եւ յերփայէլ, եւ թարաղա։

²⁹եւ սելաղէփ, եւ յեբուս՝ ա́յն է երուսաղէմ. եւ գաբաաթ. եւ քղաքն արեմ. քաղաքք երկոտասան, եւ աւանք ն(ո)ց(ա)։ Ա́յս է ժառանգու(թ)ի(ւն) որդւոցն բենիամինի ը(ս)տ տոհմի́ց իւրեանց։

¹Եւ ել երկրորդ վիճակն շմաւոնի ցեղի որդւոցն շմաւոնի ըստ տոհմից իւրեանց։ եւ եղեւ ժառանգու(թ)ի(ւն) ն(ո)ց(ա) ՛ի մէջ վիճակի որդւոցն յուդայի։
²Եւ եղեւ վիճակ ն(ո)ց(ա), բերսաբէէ, եւ սաբէէ, եւ մովղադա,
³եւ ասերսուաղ, եւ բաթուղ, եւ բովղա, եւ ասոմ,
⁴եւ էղթուղաադ, եւ երմա.
⁵եւ սիկեղա, եւ բեթամ, եւ մարքաբովթ, եւ ասերսուսիմ.
⁶եւ բեթղաբաթ. եւ ագարակք ն(ո)ց(ա). քաղաքք երկոտասան, եւ աւանք ն(ո)ց(ա)։
⁷Ային, եւ ռեմոն, եւ եթեր, եւ ասան. քաղաքք չորք, եւ աւանք ն(ո)ց(ա)։

⁸եւ ա(մենայ)ն ագարակք շուրջ զքաղաքաւն այնոքիւք, մինչեւ ցբաաղեթ բերամմովթ, ՛ի մուտս յամաթայ ը(ստ) հարաւ։ Ա́յս է ժառանգութի(ւն) ցեղի որդւոցն շմաւոնի ըստ տոհմից իւրեանց.
⁹՛ի վիճակին յուդայ ժառանգութի(ւն) ցեղի որդւոցն շմաւոնի. քանզի եղեւ բաժին որդւոցն յուդայ մե́ծ քան զնոցայն. եւ ժառանգեցին որդիքն շմաւոնի ՛ի մէջ վիճակի ն(ո)ց(ա)։
¹⁰Եւ ել երրորդ վիճակն զաբուղոնի, ըստ տոհմից իւրեանց. Եւ եղեն սահմանք ժառանգութե(ան) ն(ո)ց(ա) մինչեւ ցսարդիթ.
¹¹սահմանք նոցա ծովն, եւ մարաղա. եւ հասցեն ցգաբասթէ. եւ հանդիպեսցին ձորոյ՝ որ է հանդէպ յեկնամայ։

¹²եւ դարձցին ՛ի սարիդա դէմ յանդիման յարեւելից բեթսամեայ, ՛ի սահմանս քասաղովթ բոթորայ, եւ անցցեն ՛ի գաբարաթ. եւ ամբարձցին առ յաբագայիւ։
¹³Եւ անտի պատիցին հանդէպ ընդ արեւելս ձգեալ ՛ի քաղաքն կատասիմ. եւ անցցեն յռեմմոն, յամաթարիման նուայ.
¹⁴եւ պատեսցին զսահմանօքն հիւսւսոյ ցեկանթովն. եւ եղիցին ելք ն(ո)ց(ա) ՛ի գայի՝ յեփթայեղի,
¹⁵եւ ընդ կատտամաթ, եւ ընդ նաաղովղ, եւ ընդ սեմրոն, եւ ընդ յադեղա, եւ ընդ բեթղահէմ. քաղաքք երկոտասան եւ աւանք ն(ո)ց(ա)։
¹⁶Ա́յս է ժառանգութի(ւն) ցեղի որդւոցն զաբուղոնի ը(ս)տ տոհմից իւրեանց քաղաքք ն(ո)ց(ա) եւ աւանք իւրեանց։

¹⁷Եւ իսաքարայ ել չորրորդ վիճակն. որդւոցն իսաքարու ըստ ազգականու(թ)ե(ան) իւրեանց։
¹⁸Եւ եղեն սահմանք ն(ո)ց(ա), յեզրայէղ, եւ աքասեղովթ, եւ սունամ,
¹⁹եւ ափերեմ, եւ սիան,
²⁰եւ ռամաթ, եւ ենդանիմ, եւ ռենաթ, եւ անարեթ,
²¹եւ ռաբբովթ, եւ կեսիոն, եւ այեմէս, եւ ռենաթ, եւ ենգադիս, եւ ենգադդա, եւ բեթմասեմ։
²²եւ կցեսցին սահմանքն ՛ի թաբովթ, եւ ՛ի կասիմ ընդ ծովակողմն, եւ ՛ի բեթսամիւս. եւ եղիցին ելք սահմանաց ն(ո)ց(ա) յորդանան. քաղաքք վեշտասան եւ աւանք ն(ո)ց(ա)։
²³Ա́յս է ժառանգութի(ւն) ցեղի որդւոցն իսաքարու ը(ս)տ տոհմից իւրեանց. քաղաքք եւ ագարակք իւրեանց։

²⁴Եւ ել վիճակն հինգերորդ ցեղի որդւոցն ասերայ ը(ս)տ տոհմից իւրեանց։
²⁵Եւ եղեն սահմանք ն(ո)ց(ա), քեղկաթ, եւ ոողի, եւ բատնէ, եւ աքսափ,
²⁶եւ ամաթ, եւ մասաղ. եւ կցեսցի ՛ի կարմեղ ընդ ծովակողմն. եւ սիովր, եւ ՛ի բաղանայէ։
²⁷եւ դարձցին յարեւելից կողմանէ ՛ի բեթբագովսայ, եւ կցեսցի ՛ի զաբուղոն եւ ՛ի գայի, յեփթայիեղի, ընդ հիւսւսի. եւ մտցեն սահմանքն ՛ի սափաթա բեթամեկ. եւ գնասցեն ընդ սահմանակիցս անայեղի, եւ անցցեն ՛ի քաբովղ, յահեկէ կողմանէ,
²⁸եւ յաքրան, եւ յռովբ, եւ յամմովն, եւ ՛ի կանայի մինչեւ ՛ի սիդոն մեծ։
²⁹Եւ դարձցին սահմանքն յռամա մինչեւ ցքաղաք ամրոցին տիւրացւոց. եւ դարձցին սահմանքն ՛ի սովսա. եւ եղիցին ելք ն(ո)ր(ա) ծովն. եւ վիճակն զիփայ։

³⁰եւ ամմա, եւ ափեկա, եւ ռաւովբա. քաղաքք քսան եւ երկու, եւ աւանք ն(ո)ց(ա)։
³¹Ա́յս է ժառանգութի(ւն) ցեղի որդւոցն ասերայ ըստ տոհմից իւրեանց. քաղաքք նոցա եւ աւանք իւրեանց։
³²Եւ նեփթաղիմայ եւ վիճակն վեցերորդ. որդւոցն նեփթաղիմայ ըստ տոհմից իւրեանց։
³³Եւ եղեն սահմանք ն(ո)ց(ա). մեեղեփ, եւ մայեղովմ, եւ բերսանայիմ, եւ արսոէ, եւ նադէբ, եւ յաբնեղ. մինչեւ ցղակու. եւ եղեն ելք ն(ո)ց(ա) յորդանան։
³⁴եւ դարձցին սահմանքն ՛ի ծովն ազանովթ թաբովր, եւ անցցեն անտի ՛ի կովկ. եւ կցեսցին ՛ի հարաւոյ զաբուղոնի եւ ասերայ. կցեսցին ՛ի ծովակողմն յուդայ, եւ յորդանան յարեւելից կողմանէ։

³⁵Եւ քաղաքք պարսպաւորք տիւրացւոց. տիւրոս, եւ ամաթ, եւ ռեկկաթ, եւ քեներեթ.
³⁶եւ ադամի, եւ ռամմա, եւ ասովր։
³⁷եւ կադէս, եւ եդրային, եւ ակնասովր,
³⁸եւ յարովն. եւ մակդաղիէղ. ովրամ, եւ բեթանաթ, եւ թասմուս. քաղաքք ինն եւ տասն, եւ ագարակք ն(ո)ց(ա)։
³⁹Ա́յս է ժառանգութի(ւն) ցեղի որդւոցն նեփթաղիմայ. ըստ տոհմից իւրեանց, քաղաքք եւ աւանք ն(ո)ց(ա)։
⁴⁰Եւ ցեղի որդւոցն դանայ ըստ տոհմից իւրեանց, ել վիճակն եւթներորդ։
⁴¹Եւ եղեն սահմանք ժառանգութե(ան) ն(ո)ց(ա). սարաա́ եւ եսթաւուղ։
⁴²եւ սաղաբին, եւ յեթղա, եւ թամնա,
⁴³եւ եղթեկով, եւ բաաղովթ.
⁴⁴եւ բանեբարակ. եւ քաղաքք սամէս, եւ յաաղոն,

⁴⁵եւ եղոն, եւ ակկարոն. եւ գաբաթոն, եւ յութ,
⁴⁶եւ գեթրեմոն. եւ ՛ի ծովէն բաղէից, եւ բակրովնա. սահման մերձ յոպպէ։
⁴⁷եւ ել սահման որդւոցն դանայ ՛ի նոցանէն։ Այս է ժառանգու(թ)ի(ւն) ցեղի որդւոցն դանայ՝ ըստ տոհմից իւրեանց, քաղաքք եւ աւանք ն(ո)ց(ա)։ Եւ ո́չ ջնջեցին որդիքն դանայ զամովրհացին զնեղիչն իւրեանց ՛ի լերինն. եւ ո́չ թողուին զնոսա ամովրհացիքն իջանել ՛ի հովիտսն. եւ նեղէին ՛ի նոցանէ զսահմանս բաժնի իւրեանց։ Եւ գնացին որդիքն դանայ եւ ետուն պատերազմ ընդ ղեսեմայ, եւ առին զնա, եւ հարին զնա սրով սուսերի. եւ ժառանգեցին զնա. եւ բնակեցին ՛ի նմա. եւ անուանեցին զղեսեմ, դա́ն ը(ս)տ անուան հօրն իւրեանց։

⁴⁸Ա́յս է ժառանգութի(ւն) ցեղի որդւոցն դանայ ըստ ազգականութե(ան) իւրեանց. քաղաքքս այսոքիկ եւ ագարակք իւրեանց։
⁴⁹Եւ վախճանեցին ժառանգել զերկիրն ըստ սահմանաց իւրեանց. Եւ ամովրհացին տեւեա́ց բնակել յեղոմ, եւ ՛ի սաղամին. եւ ծանրացա́ւ ձեռն եփրեմի ՛ի վերայ ն(ո)ց(ա). եւ եղեն ն(ո)ց(ա) ՛ի հարկատուս։ եւ գնացին նկատել զերկիրն ըստ սահմանաց ն(ո)ց(ա)։ Եւ ետուն որդիքն ի(սրաէ)լի ժապանգու(թ)ի(ւն) յեսուայ որդւոյ նաւեայ ՛ի մէջ իւրեանց
⁵⁰հրամանաւ տ(եառ)ն. եւե տուն նմա զքաղաքն՝ զոր խնդրեաց զթամնաթսարա՝ որ է ՛ի լերինն եփրեմայ. եւ շինեաց զքաղաքն՝ եւ բնակեցաւ ՛ի նմա։

⁵¹Ա́յս են բաժինք՝ զորս բաժանեաց եղիազար քահանայ, եւ յեսու նաւեան, եւ իշխանք նահապետութե(ան)ց ցեղիցն ի(սրաէ)լի, վիճակօքն ՛ի սելով առաջի տ(եառ)ն առ դրան խորանին վկայութե(ան). եւ գնացին նկատե́լ զերկիրն։

¹Խօսեցաւ տ(է)ր ընդ յեսուայ՝ եւ ասէ խօսեա́ց ը(ստ) որդիսն ի(սրաէ)լի, եւ ասասցե́ս։
²Տո́ւք զքաղաքս ապաստանացն զորոց խօսեցայ ը(ստ) ձեզ ՛ի ձեռն մովսիսի։
³ապաստա́ն սպանողի՝ որ սպանանէ զանձն ակամա́յ յանգէտս, եւ եղիցին ձեզ քաղաքք ապաստանի. եւ մի́ մեռցի սպանօղն ՛ի մերձաւորէ արեանն, մինչեւ կացցէ առաջի ժողովրդեանն յատենի։
⁴եւ փախիցէ́ ՛ի մի ՛ի քաղաքացն այնոցիկ. եւ կացցէ ՛ի մուտս դրան քաղաքին, եւ խօսեսցի յականջս ծերո́ց քաղաքին այնորիկ զբանս իւր։ Եւ ժողովեսցեն զնա ժողովուրդն առ ինքեա́նս, եւ տացեն նմա տեղի, եւ բնակեսցէ́ ընդ ն(ո)ս(ա)։

⁵եւ եթէ երթայցէ մերձաւոր արեանն զկնի ն(ո)ր(ա), մի́ մատնեսցեն զսպանօղն ՛ի ձեռս ն(ո)ր(ա). քանզի յանգէ́տս եհար զընկերն իւր, եւ ո́չ ատեայր զնա յերէկն եւ յեռանդ։
⁶Եւ բնակեսցէ́ ՛ի քաղաքին յայնմիկ մինչեւ կացցէ առաջի ժողովրդեանն յատենի, մինչեւ մեռանիցի քահանայն մեծ՝ որ իցէ յաւուրսն յայնոսիկ. եւ ապա́ դարձցի սպանօղն եւ եկեսցէ ՛ի տեղի́ իւր՝ եւ ՛ի տուն իւր, եւ ՛ի քաղաքն ուստի փախեաւ։
⁷Եւ զատուցին զկադէս ՛ի գալիլեա՝ ՛ի լերինն նեփթաղիմայ։ եւ զսիւքեմ ՛ի լերինն եփրեմայ։ Եւ զքաղաքն արբոկ՝ ա́յն է քեբրոն ՛ի լերինն յուդայ։

⁸Եւ յայնկոյս յորդանանու յարեւելից երեքոյի. Եւ ետուն զբոսոր յանապատին ՛ի դաշտի, ՛ի ցեղէն ռուբինի։ եւ զռամովթ ՛ի գաղաադ, ՛ի ցեղէն գադայ։ եւ զգովղան ՛ի բասանաստան ՛ի ցեղէն մանասէի։
⁹Ա́յս են քաղաքք հոյակապք ա(մենայ)ն որդւոցն ի(սրաէ)լի, եւե կին՝ յեցելո́յ ՛ի ն(ո)ս(ա). փախչե́լ անդր ա(մենայ)նի որ հարկանիցէ զանձն ակամայ, զի մի́ մեռանիցի ՛ի ձեռաց մերձաւորի արեանն, մինչեւ կացցէ առաջի ժողովրդեանն յատենի։

¹Եւ մատեան նահապետք որդւոցն ղեւեա́յ առ եղիազա́ր քահանայ, եւ առ յեսու նաւեան, եւ առ նահապետս տոհմից ցեղից որդւոցն ի(սրաէ)լի.
²եւ խօսեցան ը(ստ) ն(ո)ս(ա) ՛ի սեղով յերկրին քանանացւոց՝ եւ ասեն. Հրաման ետ տ(է)ր ՛ի ձեռն մովսիսի՝ տա́լ մեզ քաղաքս բնակելոյ, եւ զանդաստանս ն(ո)ց(ա) անասնոց մերոց։
³Եւ ետո́ւն որդիքն ի(սրաէ)լի ղեւտացւոցն ՛ի ժառնգու(թ)ի(ւն) հրամանաւ տ(եառ)ն, զքա·աքսն զայնոսիկ եւ զանդաստանս ն(ո)ց(ա)։
⁴Եւ ել վիճակ տոհմին կահաթու։ եւ եղեն որդւոցն ահարոնի քահանայիցն ղեւտացւոց, ՛ի ցեղէն յուդայ եւ ՛ի ցեղէն շմաւոնի, եւ ՛ի ցեղէն բենիամինի, վիճակաւ՝ քաղաքք երեքտասանք։

⁵Եւ այլոց որդւոցն կահաթու մնացելոց՝ յազգականութ(են)է ցեղին եփրեմայ, եւ ՛ի ցեղէն դանայ, եւ ՛ի կիսոյ ցեղին մանասէի, վիճակաւ քաղաքք տասն։
⁶Եւ որդւոցն գեթսոնի յազգականու(թեն)է ցեղին իսաքարայ՝ եւ ՛ի ցեղէն ասերայ, եւ ՛ի ցեղէն նեփթաղիմայ, եւ ՛ի կիսոյ ցեղին մանասէի ՛ի բասան, վիճակաւ քաղաքք երեքտասան։
⁷Եւ որդւոցն մերարեայ ըստ տոհմից իւրեանց, ՛ի ցեղէն ռուբինի, եւ ՛ի ցեղէն գադայ, եւ ՛ի ցեղէն զաբուղոնի, վիճակաւ քաղաքք երկոտասան։
⁸Եւ ետուն որդիքն ի(սրաէ)լի ղեւտացւոցն զքաղաքսն զայնոսիկ եւ զանդաստանս ն(ո)ց(ա) զորօրինակ պատուիրեաց տ(է)ր մովսիսի, վճակաւ։

⁹Եւ ետ ցեղ որդւոց յուդայ, եւ ցեղ որդւոցն շմաւոնի, եւ ցեղ որդւոցն բենիամինի զքաղաքսն զայնոսիկ, եւ կոչեցան յանուն
¹⁰եւ յա́զգ որդւոցն ահարոնի, ՛ի տոհմէ կահաթու որդւոցն ղեւեայ. զի ն(ո)ց(ա) ել նախ վիճակն։
¹¹Եւ ետո́ւն ն(ո)ց(ա) զկարիաթարբո́կ զմայր քա·աքացն ենակայ, այն է՝ քեբրոն ՛ի լեառնն յուդայ, եւ զանդաստանս շուրջ զնովաւ,
¹²եւ զագարակս ն(ո)ր(ա), եւ զաւանս ն(ո)ր(ա). զոր ետ յեսու քաղեբայ որդւոյ յեփոնեայ ՛ի կալուած։
¹³Եւ որդւոցն ահարոնի քահանայից, ետուն քաղաքք ապաստանի սպանողի, զքեբրոն, եւ զզատուցեալսն ՛ի նա։ եւ զղեբնա, եւ զզատուցեալսն ՛ի նա։
¹⁴եւ զյեթեր, եւ զզատուցեալսն ՛ի նա։ եւ զյեսթեմով, եւ զզատուցեալսն ՛ի նա։

¹⁵եւ զաղոն, եւ զզատուցեալսն ՛ի նա։ եւ զդաբիր, եւ զզատուցեալսն ՛ի նա։
¹⁶եւ զային, եւ զզատուցեալսն ՛ի նա։ եւ զյետտա, եւ զզատուցեալսն ՛ի նա։ եւ զբեթսամիւս, եւ զզատուցեալսն ՛ի նմա. քաղաքք ինն, յերկուց ցեղիցն այնոցիկ։
¹⁷Եւ ՛ի ցեղէն բենիամինի. զգաբաւոն, եւ զզատուցեալսն ՛ի նա։
¹⁸եւ զանաթովթ, եւ զզատուցեալսն ՛ի նա։ եւ զաղմոն, եւ զզատուցեալսն ՛ի նա։ եւ զգաբեէ՝ եւ զզատուցեալսն ՛ի նա. քաղաքս չորս։
¹⁹Ա(մենայ)ն քաղաքք որդւոց ահարոնի քահանայից, քաղաքք երեքտասա́նք, եւ անդաստանք նոցա։
²⁰Եւ տոհմից որդւոցն կահաթու ղեւտացւոցն՝ մնացելոց յորդւոցն կահաթու։ եւ եղեն քաղաքք սահմանաց նոցա,

²¹՛ի ցեղէն եփրեմայ։ Եւ ետուն ն(ո)ց(ա) քաղաք ապաստանի սպանողի, զսիւքեմ, եւ զզատուցեալսն ՛ի նմա ՛ի լերինն եփրեմայ. եւ զգազեր, եւ զզատուցեալսն ՛ի նմա։
²²եւ զկարսեմ, եւ զզատուցեալսն ՛ի նա։ եւ զվերին բոթորն, եւ զզատուցեալսն ՛ի նա. քաղաքք չորք։
²³՛Ի ցեղէն դանայ. զեղթեկով, եւ զզատուցեալսն ՛ի նա։ եւ զգեբեթովն, եւ զզատուցեալսն ՛ի նա։
²⁴եւ զյաղոն, եւ զզատուցեալսն ՛ի նա։ եւ զգեթրեմոն, եւ զզատուցեալսն ՛ի նա. քաղաքս չորք։
²⁵Եւ կիսոյ ցեղին մանասէի. զթանաք, եւ զզատուցեալսն ՛ի նա։ եւ զբեթսան, եւ զզատուցեալսն ՛ի նա. քաղաքս երկուս։
²⁶Ընդ ա(մենայ)ն՝ քաղաքս տասն, եւ զզատուցեալսն ՛ի ն(ո)ս(ա). տոհմի որդւոցն կահաթու, մնացելոց։

²⁷Եւ որդւոցն գեթսոնայ, ազգականացն ղեւտացւոց, ՛ի կիսոյ ցեղէն մանասէի քաղաքս զատուցեալս սպանողաց. զգովղան ՛ի բասանաստանի, եւ զզատուցեալսն ՛ի նա։ եւ զբեեստարա, եւ զզատուցեալսն ՛ի նա. քաղաքս երկուս։
²⁸՛Ի ցեղէն իսաքարայ. զկեսիոն, եւ զզատուցեալսն ՛ի նա։ եւ զգաբրաթ, եւ զզատուցեալսն ՛ի նա։
²⁹եւ զերիմովթ, եւ զզատուցեալսն ՛ի նա։ եւ զաղբեւրն նամակաց, եւ զզատուցեալսն ՛ի նա. քաղաքս չորս։
³⁰՛Ի ցեղէն ասերայ. զմասաաղ, եւ զզատուցեալսն ՛ի նա։ եւ զաբդոն, եւ զզատուցեալսն ՛ի նա։
³¹եւ զքեղկաթ, եւ զզատուցեալսն ՛ի նա։ եւ զռովբ, եւ զզատուցեալսն ՛ի նա. քաղաքս չորս։

³²Եւ ՛ի ցեղէն նեփթաղիմայ, քաղաքս զատուցեալս սպանողի. զկադէս ՛ի գալիլեայ, եւ զատուցեալսն ՛ի նա։ զեմաթդովր, եւ զատուցեալսն ՛ի նա։ եւ նոյեմոն, եւ զատուցեալսն ՛ի նմա. քաղաքս երիս։
³³Ընդ ա(մենայ)ն քաղաքս գեթսոնի ը(ս)տ տոհմից իւրեանց քաղաքս երեքտասան, եւ զատուցեալք ն(ո)ց(ա)։
³⁴Եւ տոհմի որդւոցն մերարեայ այլո́ցն ղեւտացւոց. ՛Ի ցեղէ որդւոցն զաբուղոնի. զյեկնամ, եւ զանդաստանս ն(ո)ր(ա). զկադէս, եւ զանդաստանս ն(ո)ր(ա). զկարթա, եւ զանդաստանս ն(ո)ր(ա)։
³⁵զդեմնա, եւ զանդաստանս ն(ո)ր(ա)։ զնաաղովղ, եւ զանդաստանս ն(ո)ր(ա). քաղաքս հինգ։

³⁶Եւ յայնկոյս յորդանանու ՛ի հանդիպէ երեքոյի. ՛Ի ցեղէն ռուբինի քաղաքս ապաստանի սպանողի. զբոսոր յանապատին միսովրայ, եւ զանդաստանս ն(ո)ր(ա)։ եւ զյազեր, եւ զանդաստանս ն(ո)ր(ա)։
³⁷զկեդսոն, եւ զանդաստանս ն(ո)ր(ա)։ զմասփա, եւ զանդաստանս ն(ո)ր(ա). քաղաքս չորս։
³⁸Եւ ՛ի ցեղէն գադայ՝ քաղաքս ապաստանի սպանողի. զռամովթ ՛ի գաղաադ, եւ զանդաստանս ն(ո)ր(ա)։ զմանայամ, եւ զանդաստանս ն(ո)ր(ա)։
³⁹զեսեբոն, եւ զանդաստանս ն(ո)ր(ա)։ եւ զազեր, եւ զանդաստանս ն(ո)ր(ա)։
⁴⁰ընդ ա(մենայ)ն քաղաքս չորս։ Ամենայն քաղաքք որդւոցն մերարեայ, ը(ս)տ տոհմից իւրեանց մնացելոց ՛ի ցեղէն ղեւեայ. եւ եղեն սահմանք ն(ո)ց(ա) քաղաքք երկոտասան։

⁴¹Ընդ ա(մենայ)ն քաղաքք ղեւտացւոցն ՛ի մէջ կալուածոց որդւոցն ի(սրաէ)լի քառասուն եւ ո́ւթ քաղաք, եւ անդաստանք ն(ո)ց(ա) շուրջ զքաղաքօքն այնոքիւք.
⁴²քաղաքք եւ անդաստանք շուրջ զքաղաքօքն. նո́յնպէս ամենեցունց քաղաքացն այնոցիկ։ Եւ վախճանեա́ց յեսու բաժանել զերկիրն սահմանօք իւրովք։
⁴³Եւ ե́տ տ(է)ր ի(սրաէ)լի զա(մենայ)ն երկիրն զոր երդուաւ տա́լ հարցն ն(ո)ց(ա), եւ ժառանգեցին զնա, եւ բնակեցին ՛ի նմա։
⁴⁴Եւ հանգոյց զնոսա տ(է)ր շուրջանակի՝ ո(ր)պ(էս) երդուաւ հարցն ն(ո)ց(ա). եւ ո́չ ոք յարեաւ ընդդէմ նոցա ՛ի թշնամեաց իւրեանց. զի զա(մենայ)ն թշնամիս ն(ո)ց(ա) մատնեաց տ(է)ր ՛ի ձեռս ն(ո)ց(ա).

⁴⁵եւ ո́չ սխալեցաւ բան մի յա(մենայ)ն բանից բարեաց, զոր խօսեցաւ տ(է)ր որդւոցն իսրայէլի. այլ ա(մենայ)ն ինչ եղեւ։

¹Յայնժամ կոչեաց յեսու զորդիսն ռուբինի, եւ զորդիսն գադայ, եւ զկէս ցեղին մանասէի,
²եւ ասէ ցնոսա. Դուք ձեզէ́ն լուարուք զա(մենայ)ն ինչ զոր պատուիրեաց ձեզ մովսէս ծառայ տ(եառ)ն. եւ ունկնդիր եղէք բարբառոյ իմոյ ըստ ա(մենայ)նի զոր պատուիրեցի ձեզ,
³եւ ո́չ թողէք զեղբարս ձեր զայնչափ աւուրս. ե́ւս աւելի մինչեւ ցայսօր ժամանակի, պահեցէք զպատուիրանս տ(եառ)ն ա(ստուծո)յ ձերոյ։
⁴Եւ արդ՝ հանգո́յց տ(է)ր ա(ստուա)ծ մեր զեղբարս ձեր՝ ո(ր)պ(էս) եւ ասաց ն(ո)ց(ա). բայց արդ դարձեալ երթա́յք ՛ի տունս ձեր՝ եւ յերկիր կալուածոց ձերոց, զոր ետ ձեզ մովսէս ծառայ տ(եառ)ն յա́յնկոյս յորդանանու։

⁵Այլ զգո́յշ լինիջիք յոյժ, առնելոյ զպատուիրանսն եւ զօրէնսն զոր պատուիրեաց մեզ մովսէս ծառայ տ(եառ)ն. սիրե́լ զտ(է)ր ա(ստուա)ծ մեր՝ եւ գնալ յա(մենայ)ն ճանապարհս ն(ո)ր(ա), պահե́լ զպատուիրանս ն(ո)ր(ա), եւ յարի́լ ՛ի նա, եւ պաշտե́լ զնա յա(մենայ)ն սրտէ ձերմէ՝ եւ յա(մենայ)ն անձնէ ձերմէ։
⁶Եւ օրհնեաց զն(ո)ս(ա) յեսու եւ արձակեա́ց զն(ո)ս(ա)՝ եւ գնացին ՛ի տունս իւրեանց։
⁷Եւ կիսոյ ցեղին մանսէի ետ մովսէս ՛ի բասանաստան, եւ կիսոյն ետ յեսու ընդ եղբարս ն(ո)ց(ա) առ ծովեզերբն։ Եւ յորժամ արձակեաց զն(ո)ս(ա) յեսու ՛ի տունս իւրեանց, եւ օրհնեաց զն(ո)ս(ա),

⁸եւ խօսեցաւ ընդ ն(ո)ս(ա)՝ եւ ասէ. Ընչի́ւք բազմօք երթիցեն ՛ի տունս իւրեանց։ եւ անասուն բազո́ւմ յոյժ, եւ արծաթ եւ ոսկի, եւ պղինձ եւ երկաթ, եւ հանդերձ բազո́ւմ յոյժ. բաժանեցան աւար ՛ի թշնամեաց ընդ եղբարս իւրեանց։
⁹Եւ դարձա́ն, եւ գնացին որդիքն ռուբինի, եւ որդիքն գադայ, եւ կէս ցեղին մանասէի յորդւոցն ի(սրաէ)լի, ՛ի սելովայ յերկրէն քանանցւոց, երթա́լ յերկիրն գաղաադու. յերկիր կալուածոց իւրեանց զոր ժառանգեցին հրամանաւ տ(եառ)ն ՛ի ձեռն մովսիսի։
¹⁰Եւ եկին ՛ի գալիլովթ յորդանանու, որ է յերկրին քանանու, եւ շինեցին որդիքն ռուբինի, եւ որդիքն գադայ, եւ կէս ցեղին մանասէի, սեղա́ն առ եզերբ յորդանանու. սեղան՝ մե́ծ տեսանելով։

¹¹Եւ լուա́ն որդիքն ի(սրաէ)լի՝ եւ ասեն. եթէ ահա շինեցին որդիքն ռուբինի, եւ որդիքն գադայ, եւ կէս ցեղին մանասէի՝ սեղան ՛ի սահմանս երկրին քանանացւոց ՛ի գալիլովթ յորդանանու, յայնկոյս որդւոցն ի(սրաէ)լի։
¹²եւ լուան որդիքն ի(սրաէ)լի։ Եւ ժողովեցան որդիքն ի(սրաէ)լի ՛ի սելով, ելանել տա́լ ընդ ն(ո)ս(ա) պատերազմ։
¹³Եւ առաքեցին որդիքն ի(սրաէ)լի առ որդիսն ռուբինի, եւ առ որդիսն գադայ, եւ առ կէս ցեղին մանասէի ՛ի գաղաադ, զփենէէ́ս զորդի եղիազարու որդւոյ ահարոնի քահանայի։
¹⁴եւ տասն այր յիշխանացն ընդ նմա, մի մի իշխան ՛ի նահապետացն, յա(մենայ)ն ցեղիցն ի(սրաէ)լի. իշխանք տանց նահապետաց էին հազարապետք ի(սրաէ)լի։

¹⁵Եւ եկին առ որդիսն ռուբինի, եւ առ որդիսն գադայ, եւ առ կէս ցեղին մանասէի ՛ի գաղաադ, խօսեցան ընդ ն(ո)ս(ա)՝ եւ ասեն։
¹⁶Ա́յսպէս ասէ ա(մենայ)ն ժողովուրդն տ(եառ)ն. զի՞նչ են յանցանքդ այդոքիկ՝ զոր յանցեայք առաջի տ(եառ)ն ա(ստուծո)յ ի(սրաէ)լի, դառնալ յե́տս ՛ի տ(թեն)է, շինել ձեզ սեղան. եւ լինել ձեզ ապստամբ ՛ի տ(թեն)է ա(ստուծո)յ մերմէ։
¹⁷Միթէ փո՞քր իցեն մեզ մեղքն փեգովրայ՝ զի ո́չ եմք սրբեալ ՛ի նմանէ մինչեւ ցայսօր, եւ եղեն հարուածք ՛ի վերայ ժողովրդեանն տ(եառ)ն։
¹⁸եւ դուք դարձա́յք այսօր ՛ի տ(թեն)է. եւ եղիցի թէ ապստամբիցէք այսօր ՛ի տ(թեն)է. եւ լինիցի վաղիւ բարկու(թ)ի(ւն) ՛ի վերայ ա(մենայ)ն ի(սրաէ)լի։

¹⁹Եւ արդ՝ եթէ փո́քր իցէ ձեզ երկիր կալուածոց ձերոց, անցէ́ք յերկիր կալուածոց տ(եառ)ն, ուր հարեա́լ է խորանն տ(եառ)ն. եւ ժառանգեցէ́ք ՛ի միջի մերում. եւ մի́ լինիք ապստամբք ՛ի տ(թեն)է. եւ մի́ ՛ի մէնջ ապստամբէք. վ(ա)ս(ն) շինելոյ ձերոյ սեղան արտաքոյ քան զսեղան տ(եառ)ն ա(ստուծո)յ մերոյ։
²⁰Ո՞չ ապաքէն աքար՝ զարայեան յանցեաւ յանցանս ՛ի նզովից անտի, եւ ՛ի վ(ե)ր(այ) ա(մենայ)ն ժողովրեանն իլի եղեւ բարկութի(ւն). եւ նա միա́յն էր, միթէ ինքն միա́յն մեռաւ յիւրում ՛ի մեղսն։
²¹Պատասխանի ետուն որդիքն ռուբինի եւ որդիքն գադայ եւ կէս ցեղին մանասէի, խօսեցան ընդ հազարապետսն՝ եւ ասեն։

²²Ա(ստուա)ծ, ա(ստուա)ծ է տ(է)ր. եւ ա(ստուա)ծ ա(ստուա)ծ ինքնին գիտէ։ եւ ի(սրա)էլ ինքնին գիտասցէ. եթէ վ(ա)ս(ն) ապստամբութե(ան) ինչ յանցեա՞ք առաջի տ(եառ)ն, մի́ ապրեցուսցէ զմեզ յաւուրս յայսմիկ.
²³եւ եթէ շինեցաք մեզ սեղան ապստամբելոյ ՛ի տ(թեն)է մերմէ, հանել ՛ի վերայ ն(ո)ր(ա) զո́հ ողջակիզաց. կամ եթէ առնել ՛ի վ(ե)ր(այ) ն(ո)ր(ա) զո́հ փրկութե(ան), տ(է)ր ինքնին խնդրեսցէ։
²⁴Այլ վ(ա)ս(ն) երկիւղի́ արարաք զայս. ասեմք՝ գուցէ խօսեսցին որդիքն ձեր ընդ որդիսն մեր եւ ասիցեն, թէ զի՞ կայ ձեր եւ տ(եառ)ն ա(ստուծո)յ ի(սրաէ)լի։

²⁵եւ սահման եդ տ(է)ր՝ ընդ մեզ եւ ընդ ձեզ որդիք ռուբինի եւ որդիք գադայ՝ զյորդանան. եւ չի́ք ձեզ բաժին ՛ի տ(թեն)է. եւ օտարացուցանիցեն որդիք ձեր զորդիսն մեր՝ զի մի́ պաշտիցեն զտ(է)ր։
²⁶Եւ ասացաք առնել ա́յսպէս։ շինել զսեղանս զայս, ո́չ վ(ա)ս(ն) ողջակիզաց, եւ ո́չ վ(ա)ս(ն) զոհից։
²⁷այլ զի իցէ սա ՛ի վկայութի(ւն) ընդ մեզ եւ ընդ ձեզ. եւ ընդ որդիս մեր յե́տ մեր. պաշտե́լ զպաշտօն տ(եառ)ն առաջի ն(ո)ր(ա), ընծայիւք մերովք, եւ պատարագօք մերովք՝ եւ զոհիւք փրկութե(ան)ց մերոց։ եւ ո́չ ասասցեն որդիք ձեր ցորդիս մեր վաղիւ, թէ ո́չ գոյ ձեզ բաժին ՛ի տ(թեն)է։

²⁸Եւ ասացաք թէ լինիցի երբէք՝ եւ խօսեսցին ընդ մեզ՝ կամ ընդ ազգս մեր վաղիւ. եւ ասիցեն, թէ տեսէ́ք զնմանութի(ւն) սեղանոյ տ(եառ)ն՝ զոր արարին հարքն մեր. ո́չ վ(ա)ս(ն) ողջակիզաց եւ ո́չ վ(ա)ս(ն) զոհից, այլ վկայութի(ւն) ընդ մեզ եւ ընդ ձեզ, եւ ՛ի մէջ որդւոց մերոց։
²⁹Այլ քա́ւ լիցի մեզ ապստամբել ՛ի տ(թեն)է այսօր, առ ՛ի շինելոյ մեզ սեղան զոհից կամ ողջակիզաց, կամ զոհից փրկու(թ)ե(ան), արտաքո́յ քան զսեղան տ(եառ)ն ա(ստուծո)յ մերոյ՝ որ է առաջի խորանի ն(ո)ր(ա)։
³⁰Եւ իբրեւ լուաւ փենէէս քահանայ, եւ ա(մենայ)ն իշխանք ժողովրդեանն, եւ հազարապետքն ի(սրաէ)լի որ էին ընդ նմա զբանսն, զոր խօսեցան որդիքն ռուբինի եւ որդիքն գադայ եւ կէս ցեղին մանասէի, հաճո́յ թուեցաւ նոցա։

³¹Եւ ասէ փենէէս որդի եղիազարու քաանա́յ տ(եառ)ն ցորդիսն ռուբինի եւ ցորդիսն գադայ եւ ցկէս ցեղին մանասէի. այսօր գիտացաք թէ ընդ մե́զ է տ(է)ր. զի ո́չ յանցեայք առաջի տ(եառ)ն զյանցումնդ զայդ. զի ապրեցուցէք զորդիսն ի(սրաէ)լի ՛ի ձերաց տ(եառ)ն։
³²Եւ դարձա́ն փենէէս քահանայ որդի եղիազարու, եւ իշխանք տոհմիցն՝ յորդւոցն ռուբինի եւ յորդւոցն գադայ եւ ՛ի կիսոյ ցեղէն մանասէի, յերկրէն գաղաադու՝ յերկիրն քանանու առ որդիսն ի(սրաէ)լի, եւ ետո́ւն ն(ո)ց(ա) զպատգամսն։

³³Եւ հաճո́յ թուեցաւ բանն որդւոցն ի(սրաէ)լի, եւ օրհնեցին զա(ստուա)ծ որդւոցն ի(սրաէ)լի. եւ խօսեցան ընդ որդիսն ի(սրաէ)լի եւ ասեն. մի́ եւս ելանել ընդ նոսա ՛ի պատերազմ սատակել զերկի́ր որդւոցն ռուբինի եւ որդւոցն գադայ եւ կիսոյ ցեղին մանասէի. եւ բնակեցան ՛ի նմա։
³⁴Եւ անուանեաց յեսու զսեղանն ռուբինի եւ զգադայ եւ զկէս ցեղին մանասէի՝ եւ ասէ́, զի վկայու(թ)ի(ւն) է ՛ի մէջ ն(ո)ց(ա), թէ տ(է)ր՝ ա(ստուա)ծ է ն(ո)ց(ա)։

¹Եւ եղեւ յետ աւուրցն բազմաց, յե́տ հանգուցանելոյ տ(եառ)ն զի(սրա)էլ յա(մենայ)ն թշնամեաց ն(ո)ց(ա) շուրջանակի. եւ յեսու ծերացեալ եւ անցեալ զաւուրբք։
²Կոչեա́ց յեսու միանգամայն զա(մենայ)ն որդիսն ի(սրաէ)լի, եւ զծերակո́յտս ն(ո)ց(ա), եւ զիշխանս ն(ո)ց(ա), եւ զդատաւորս նց, եւ զդպիրս նոցա, եւ ասէ ցն(ո)ս(ա). ես ծերացայ եւ անցի́ զաւուրբք։
³եւ դուք ձեզէն տեսէք զա(մենայ)ն զոր արար տ(է)ր ա(ստուա)ծ մեր ընդ ա(մենայ)ն ազգսն՝ զոր եբարձ յերեսաց ձերոց. զի տ(է)ր ա(ստուա)ծ ինքնի́ն տայր պատերազմ ընդ ձեր։

⁴Եւ արդ տեսէ́ք՝ զի թողի ձեզ զազգսն զմնացեալսն զայնոսիկ ՛ի ժառանգու(թ)ի(ւն) ըստ ցեղից ձերոց, ՛ի յորդանանէ զա(մենայ)ն ազգսն՝ զոր սատակեցին ՛ի ծովէն մեծէ՝ որ զատուցանէ́ ՛ի մտիցն արեւու։
⁵Արդ՝ տ(է)ր ա(ստուա)ծ մեր նա́ սատակեսցէ զն(ո)ս(ա) յերեսաց ձերոց մինչեւ կորիցեն. եւ արձակեսցէ́ ՛ի վերայ ն(ո)ց(ա) զգազանս վայրենիս՝ մինչեւ սատակեսցէ զն(ո)ս(ա), եւ զթագաւորս ն(ո)ց(ա) յերեսաց ձերոց. եւ ժառանգեսջի́ք զերկիր ն(ո)ց(ա)՝ ո(ր)պ(էս) խօսեցաւ տ(է)ր ա(ստուա)ծ մեր ընդ մեզ։
⁶Արդ զօրացարո́ւք յոյժ զգուշանալ եւ առնե́լ զա(մենայ)ն գրեալս ՛ի գիրս օրինացն մովսիսի. զի մի́ խոտորիցիք ՛ի նմանէ յաջ կամ յահեակ։

⁷գուցէ́ մտանիցէք յազգսն մնացեալս յայնոսիկ. եւ անուանք դից ն(ո)ց(ա) մի́ անուանեսցի ՛ի միջի ձերում. մի́ երդնուցուք ՛ի նոսա, եւ մի́ պաշտիցէք զնոսա, եւ մի́ երկիրպագանիցէք ն(ո)ց(ա)։
⁸այլ զհետ տ(եառ)ն ա(ստուծո)յ մերոյ երթիջիք՝ ո(ր)պ(էս) արարէք մինչեւ ցայսօր.
⁹եւ սատակեաց զն(ո)ս(ա) տ(է)ր յերեսաց ձերոց, զազգս մեծամեծս եւ զհզօրս. եւ ո́չ ոք եկաց ընդդէմ ձեր մինչեւ ցայսօր։
¹⁰Մի ՛ի ձէնջ հալածեաց զհազարս. զի տ(է)ր ա(ստուա)ծ ինքնին տայր պատերազմ ընդ ձեր, ո(ր)պ(էս) խօսեցաւ ընդ ձեզ։
¹¹Զգո́յշ լինիջիք յոյժ անձանց ձերոց, սիրե́լ զտ(է)ր ա(ստուա)ծ ձեր։

¹²Ապա թէ դառնալով դառնայցէք, եւ յաւելուցուք յազգսն մնացեալս ՛ի ձէնջ, եւ խնամութի(ւն)ս առնիցէք ընդ ն(ո)ս(ա), եւ խառնակիցիք դուք ընդ ն(ո)ս(ա), եւ նոքա́ ը(ստ) ձեզ։
¹³գիտելո́վ գիտասջիք, զի ո́չ եւս յաւելուցու տ(է)ր սատակել զազգսն զայնոսիկ յերեսաց ձերոց. եւ լինիցին ձեզ յորոգայթս եւ ՛ի գայթագղու(թ)ի(ւն)ս. խո́չ ՛ի գարշապարս ձեր, եւ նե́տք յաչս ձեր, մինչեւ կորնչիցիք յերկրէս բարութե(ան) զոր ե́տ ձեզ տ(է)ր ա(ստուա)ծ ձեր։

¹⁴Եւ ես՝ ահա երթա́մ այսօր զճանապարհ որպէս ամենեքին որ են յերկրի։ եւ ծանիջի́ք յա(մենայ)ն սրտէ ձերմէ եւ յա(մենայ)ն անձնէ ձերմէ. զի ո́չ վրիպեաց բա́ն մի յա(մենայ)ն բանից զոր խօսեցաւ տ(է)ր ա(ստուա)ծ ձեր. այլ ա(մենայ)ն ինչ ե́կն եհաս ձեզ, եւ ո́չ սխալեցաւ ՛ի նոցանէ բան մի։
¹⁵Եւ եղիցի՝ զոր օրինակ եկին ՛ի վ(ե)ր(այ) ձեր ա(մենայ)ն բանք բարիք զոր խօսեցաւ տ(է)ր վ(ա)ս(ն) ձեր. նոյնպէս ածցէ տ(է)ր ՛ի վ(ե)ր(այ) ձեր զա(մենայ)ն բա́նս չարս, մինչեւ սատակեսցէ́ զձեզ յերկրէս բարութե(ան)՝ զոր ետ ձեզ տ(է)ր ա(ստուա)ծ ձեր,

¹⁶յանցանել ձեզ զուխտիւն տ(եառ)ն ա(ստուծո)յ ձերոյ՝ զոր պատուիրեա́ց ձեզ, եւ յերթալ պաշտել զաստուածս օտարս՝ եւ երկիր պագանել ն(ո)ց(ա)։ եւ բարկանայցէ ձեզ տ(է)ր, եւ կորնչիջիք վաղվաղակի յերկրէս բարութե(ան)՝ զոր ե́տ ձեզ տ(է)ր։

¹Եւ ժողովեա́ց յեսու զա(մենայ)ն ցեղսն ի(սրաէ)լի ՛ի սելով. եւ կոչեաց զա(մենայ)ն ծերսն ի(սրաէ)լի, եւ զիշխանս ն(ո)ց(ա), եւ զդպիրս ն(ո)ց(ա), եւ զդատաւորս նոցա, եւ կացին առաջի տ(եառ)ն։
²Եւ խօսեցա́ւ յեսու ընդ ա(մենայ)ն ժողովրդեանն՝ եւ ասէ։ Ա́յսպէս ասէ տ(է)ր ա(ստուա)ծ ի(սրաէ)լի. յայնկոյս գետոյն պանդխտեցան հարքն ձեր յառաջագոյն. թարա՝ հա́յր աբրահամու եւ հա́յր նաքովրայ, եւ պաշտեցին զաստուածս օտարս։
³Եւ առի́ ես զհայր ձեր զաբրաամ յայնմ կողմանէ գետոյն, եւ առաջնորդեցի́ նմա յա(մենայ)ն երկրիդ քանանացւոց, եւ բազմացուցի́ զզաւակ ն(ո)ր(ա).

⁴եւ ետու նմա զիսահակ. եւ ետու սահակայ զյակոբ, եւ զեսաւ։ եւ ետու եսաւայ զլեառնն սէիր ՛ի ժառանգութի(ւն)։ Եւ յակոբ եւ որդիք ն(ո)ր(ա) իջին յեգիպտոս. եւ եղեն անդ յա́զգ մեծ եւ ՛ի բազում եւ ՛ի հզօր, եւ չարչարեցին զն(ո)ս(ա) եգիպտացիքն։
⁵եւ եհար տ(է)ր զեգիպտացիսն նշանօք եւ արուեստիւք՝ զոր արար ՛ի ն(ո)ս(ա).
⁶եւ ապա եհան զձեզ յեգիպտոսէ։ եւ մտէք ՛ի ծովն, եւ պնդեցան եգիպտացիքն զհե́տ հարցն ձերոց կառօք եւ երիվարօք ՛ի ծովն կարմիր։
⁷Եւ աղաղակեցա́ք առ տ(է)ր. եւ եդ զամպն եւ զմէգ ՛ի մէջ մեր եւ ՛ի մէջ եգիպտացւոցն. եւ ած ՛ի վերայ ն(ո)ց(ա) զծովն՝ եւ ծածկեաց զն(ո)ս(ա)։ եւ տեսին աչք մեր զոր արար տ(է)ր ընդ երկիրն եգիպտացւոց։ եւ էիք յանապատի անդ զաւուրս բազումս։

⁸Եւ ած զձեզ յերկիրն ամովրհացւոց բնակելոց յայնկոյս յորդանանու, եւ ետուն ը(ստ) ձեզ պատերազմ. եւ մատնեաց զն(ո)ս(ա) տ(է)ր ՛ի ձեռս ձեր, եւ ժառանգեցէք զերկիրն ն(ո)ց(ա)։ եւ սատակեցէք զն(ո)ս(ա) յերեսաց ձերոց։
⁹Եւ յարեաւ բաղակ սեպփովրայ արքայ մովաբու եւ ետ պատերազմ ընդ ի(սրաէ)լի։ եւ առաքեաց կոչեաց զբաղաամ որդի բեովրայ նզովե́լ զձեզ։
¹⁰եւ ո́չ կամեցաւ տ(է)ր ա(ստուա)ծ քո կորուսանել, եւ օրհնելով օրհնեա́ց զձեզ, եւ ապրեցոյց զձեզ ՛ի ձեռաց ն(ո)ց(ա). եւ մատնեաց զն(ո)ս(ա) ՛ի ձեռս ձեր։

¹¹Եւ անցէք ընդ յորդանան, եւ եկիք յերիքով. եւ պատերազմեցան ընդ ձեզ բնակիչք երիքովի. ամուրհացին եւ քանանացին, եւ փերեզացին, եւ խեւացին, եւ յեբուսացին, եւ քետացին, եւ գերգեսացին։ եւ մատնեա́ց զնոսա ՛ի ձեռս մեր։
¹²Եւ առաքեաց յառաջագոյն քան զմեզ զձիաստացսն, եւ մերժեա́ց զն(ո)ս(ա) յերեսաց ձերոց. զերկոտասան թագաւորս ամովրհացւոց, ո́չ սրով քով եւ ո́չ աղեղամբ քով։
¹³եւ ետ ձեզ տ(է)ր զերկիրս՝ յորում ո́չ վաստակեցէք։ եւ բնակեցէք ՛ի քաղաքս զոր ո́չ շինեցէք, եւ յայգիս եւ ՛ի թզենիս՝ զոր ո́չ տնկեցէք դուք՝ եւ ուտէք։

¹⁴Եւ արդ՝ երկերո́ւք դուք ՛ի տ(թեն)է։ եւ պաշտեցէ́ք զնա ուղղութ(եամ)բ եւ արդարութ(եամ)բ. եւ ՛ի բա́ց արարէք զաստուածս օտարոտիս՝ զոր պաշտեցին հարք ձեր յա́յնկոյս գետոյն, եւ յեգիպտոս. եւ պաշտեցէ́ք զտ(է)ր։
¹⁵Ապա թէ ո́չ իցէ ձեզ հաճոյ պաշտել զտ(է)ր, ընտրեցէ́ք այսօր թէ զո՞ պաշտիցէք. զաստուածս հարցն ձերոց որ յա́յնկոյս գետոյն էին, թէ՞ զաստուածս ամովրհացւոցն, յորոց դո́ւք բնակեալ էք յերկրի նոցա։ Այլ ես՝ եւ տուն իմ պաշտեմ զտ(է)ր՝ զի ս(ուր)բ է։
¹⁶Պատասխանի ետուն ժողովուրդն՝ եւ ասեն. քա́ւ լիցի մեզ թողուլ զտ(է)ր ա(ստուա)ծ մեր՝ եւ պաշտել զաստուածս օտարս.

¹⁷զի տ(է)ր ա(ստուա)ծ մեր, նա́ եհան զմեզ եւ զհարս մեր յերկրէն եգիպտացւոց ՛ի տանէ ծառայութե(ան), եւ արար մեզ զնշանս մեծամեծս զայնոսիկ։ եւ պահեա́ց զմեզ յա(մենայ)ն ճանապարհին յորում գնացաք, եւ յա(մենայ)ն ազգս՝ ընդ որ անցաք։
¹⁸եւ մերժեաց տ(է)ր զամովրհացին եւ զա(մենայ)ն ազգս բնակեալս յերկրին՝ յերեսաց մերոց։ Այլ եւ մե́ք պաշտեսցուք զտ(է)ր. զի նա́ է ա(ստուա)ծ մեր։
¹⁹Եւ ասէ յեսու ցժողովուրդն. ո́չ կարէք դուք պաշտել զտ(է)ր՝ զի ս(ուր)բ է. եւ նա՝ նախանձեալ ո́չ ներիցէ մեղաց եւ անօրէնութե(ան)ց ձերոց.
²⁰յորժամ թողուցուք զտ(է)ր, եւ պաշտիցէք զաստուածս օտարս. եւ հասեալ ՛ի վ(ե)ր(այ) չարչարիցէ զձեզ, եւ ծախեսցէ զձեզ փոխանակ բարեացն՝ զոր արար ձեզ։

²¹Եւ ասէ ժողովուրդն ցյեսու. ո́չ այդպէս, այլ զտ(է)ր պաշտեսցուք։
²²Եւ ասէ յեսու ցժողովուրդն. ահա դուք ձեզէն եղերուք վկայք անձանց ձերոց, զի դուք ընտրեցէք զտ(է)ր պաշտել զնա։ եւ ասեն՝ վկա́յ եմք։
²³Եւ ասէ՝ արդ ՛ի բա́ց արարէք ՛ի ձէնջ զաստուածս օտարոտիս, եւ ուղղեցէ́ք զսիրտս ձեր առ տ(է)ր ա(ստուա)ծ ի(սրաէ)լի։
²⁴Եւ ասէ ժողովուրդն ցյեսու. զտ(է)ր ա(ստուա)ծ մեր պաշտեսցուք, եւ ձայնի́ ն(ո)ր(ա) լուիցուք։
²⁵Եւ ուխտեաց յեսու ո́ւխտ ը(ստ) ժողովրդեանն յաւուր յայնմիկ. եւ ետ նմա օրէնս եւ դատաստա́նս ՛ի սելով առաջի խորանին ա(ստուծո)յ ի(սրաէ)լի։

²⁶Եւ գրեա́ց յեսու զբանս զայսոսիկ ՛ի գիրս օրինաց ա(ստուծո)յ. եւ ա́ռ վէ́մ մեծ, եւ կանգնեաց զնա ՛ի ներքոյ բեւեկնոյն առաջի տ(եառ)ն։
²⁷եւ ասէ յեսու ցա(մենայ)ն ժողովուրդն. ահա վէմս ա́յս եղիցի ձեզ ՛ի վկայութի(ւն). զի սա լուաւ զա(մենայ)ն խօսեցեալսն ՛ի տ(թեն)է զոր խօսեցաւ ընդ ձեզ այսօր։ եւ եղիցի սա ձեզ ՛ի վկայութի(ւն) աւուրց յետնոց՝ յորժամ ստիցէք տ(եառ)ն ա(ստուծո)յ ձերում։
²⁸Եւ արձակեա́ց յեսու զժողովուրդն, եւ գնա́ց իւրաքանչիւր ՛ի տեղի իւր։
²⁹Եւ պաշտեաց ի(սրա)էլ զտ(է)ր զա(մենայ)ն աւուրս յեսուայ, եւ զա(մենայ)ն աւուրս ծերոցն որ ձգեցին զժամանակս ընդ յեսուայ. որք տեսի́ն զա(մենայ)ն գործս տ(եառ)ն՝ զոր արար յի(սրա)էլ։

³⁰Եւ եղեւ յետ այսորիկ մեռանե́լ յեսուայ որդւոյ նաւեայ ծառայի տ(եառ)ն, հարիւր եւ տասն ամաց։
³¹եւ թաղեցին զնա առ սահմանօք ժառանգու(թ)ե(ան) իւրոյ ՛ի թամնասաքար ՛ի լերինն եփրեմայ ՛ի հիւսւսոյ լերինն գայասու։ Եւ անդ եդին ը(ստ) նմա ուր թաղեցին զնա առ ՛ի յիշատակէ զսուրսն քարեղէնս, որով թլփատեա́ց զորդիսն ի(սրաէ)լի ՛ի գաղգաղա, յորժամ եհան զն(ո)ս(ա) յերկրէն եգիպտացւոց՝ ո(ր)պ(էս) հրամայեա́ց տ(է)ր. եւ ա́նդ են մինչեւ ցայսօր ժամանակի։
³²Եւ զոսկերսն յովսեփու հանին որդիքն ի(սրաէ)լի յեգիպտոսէ. եւ թաղեցին զնա ՛ի սիկիմ, ՛ի բաժնի ագարակին զոր ստացաւ յակոբ յամովրհացւոցն բնակելոցն ՛ի սիկիմ, որոջաց հարիւրոց։ եւ ետ զայն յովսեփայ ՛ի բաժնի։

³³Եւ եղեւ յետ այսորիկ վախճանե́լ եղիազարու քահանայի որդւոյ ահարոնի. եւ թաղեցաւ ՛ի գաբաաթ փենէէսի որդւոյ իւրում, զոր ետ նմա ՛ի լերինն եփրեմայ։ Յաւուրսն յայնոսիկ առեալ որդւոցն ի(սրաէ)լի զտապանակ ուխտին ա(ստուծո)յ շրջեցուցանէին ընդ իւրեանս։ Եւ քահանայացաւ փենէէս փոխանակ եղիազարու հօր իւրոյ, մինչեւ մեռաւ՝ եւ թաղեցա́ւ յիւրումն գաբաաթ։ Եւ որդիքն ի(սրաէ)լի գնացին յիւրաքանչիւր տեղիս իւրեանց, եւ յիւրաքանչիւր ք(ա)ղ(ա)քս իւրեանց. եւ պաշտեցին որդիքն (թ)ի(ւն)ի զաստարտն եւ զաստարովթ, եւ զաստուածս ազգացն որ շուրջ զնոքօք։ Եւ մատնեա́ց զն(ո)ս(ա) տ(է)ր ՛ի ձեռս եգղոմայ արքայի մովաբու. եւ տիրեաց ն(ո)ց(ա) ամս ո́ւթ եւ տասն։