¹ԵՒ ԽՕՍԵՑԱ́Ւ ՏԷՐ ԸՆԴ մովսիսի՝ յանապատին սինայի, ՛ի խորանն վկայութե(ան), ՛ի միո́ւմ ամսեանն երկրորդի. յամին երկրորդի ելանելոյ նոցա յերկրէն եգիպտացւոց. ասէ։
²Առէ́ք զհամար ա(մենայ)ն ժողովրդեան որդւոցն ի(սրաէ)լի, ըստ ազգս։ ըստ տա́նց նահապետաց, ը(ս)տ թուոց յանուանէ՝ ըստ գլխոցն ն(ո)ց(ա).
³ա(մենայ)ն արրու ՛ի քսանամենից եւ ՛ի վեր, ա(մենայ)ն որ ելանիցէ ՛ի զօրսդ ի(սրաէ)լի, հանդէ́ս առնել ն(ո)ց(ա) հանդերձ զօրութ(եամ)բ իւրեանց։ դո́ւ եւ ահարոն առնիցէք ն(ո)ց(ա) հանդէս։
⁴եւ ընդ ձե́զ լիցին իւրաքանչիւր ըստ ցեղի, իւրաքանչիւր իշխան, ը(ս)տ տանց նահապետաց լինիցին։
⁵Եւ ա́յս են անուանք արանցն՝ որ յանդիմա́ն լինիցին ընդ ձեզ։ Ռուբինի՝ եղիսուր որդի սադիուրայ։

⁶Շմաւոնի՝ սաղամիէլ որդի սուրիսադայի։
⁷Յուդայի՝ նաասոն որդի ամինադաբայ։
⁸Իսաքարայ՝ նաթանայէլ որդի սովդարայ։
⁹Զաբուղոնի՝ եղիաբ որդի քելլոնայ։
¹⁰Որդւոցն յովսեփայ, Եփրեմի՝ եղիսամայ որդի եմիուդայ։ Մանասէի՝ գամաղիէլ որդի փադասուրայ։
¹¹Բենիամինի՝ աբիդան որդի գեդէոնի։
¹²Դանայ՝ աքիեզեր որդի միսագանայ։
¹³Նափթաղիմայ՝ աքիրէ որդի ենանայ։
¹⁴Գադայ՝ եղիասփան որդի ռագուէլի։
¹⁵Ասերայ՝ փագիէլ որդի եքրանայ։
¹⁶Սոքա́ են անուանիք ժողովրդեանն. իշխա́նք ցեղիցն ըստ նահապետաց հազարապե́տք ի(սրաէ)լի։
¹⁷Եւ առին մովսէս եւ ահարոն զարսն զայնոսիկ՝ որք յանուանէն կոչեցան։

¹⁸եւ զամենայն ժողովուրդն ժողովեցին ՛ի միում ամսեանն երկրորդի, յամին երկրորդի։ Եւ մտին ՛ի հանդէս ըստ ազգաց իւրեանց, ըստ նահապետաց իւրեանց, ըստ թուոյ անուանց ն(ո)ց(ա), ՛ի քսանամենից եւ ՛ի վեր. ա(մենայ)ն արրու ըստ գլխո́ց իւրեանց.
¹⁹որպէս հրամայեաց տ(է)ր մովսիսի. եւ մտին ՛ի հանդէս յանապատին սինայ։
²⁰Եւ եղեն որդիք Ռուբինի՝ անդրանկանն ի(սրաէ)լի, ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլխոց իւրեանց, ա(մենայ)ն արու ՛ի քսանամենից եւ ՛ի վեր, ա(մենայ)նի որ ելանէր ՛ի զօրսն ի(սրաէ)լի, հանդէս ն(ո)ց(ա)
²¹յազգէն ռուբինի, քառասուն եւ վեց հազար եւ հինգ հարիւր։

²²Եւ որդւոցն Շմաւոնի ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլուխս իւրեանց, ա(մենայ)ն արու ՛ի քսանամենից եւ ՛ի վեր, ա(մենայ)ն որ ելանէր ՛ի զօրս ի(սրաէ)լի հանդէս ն(ո)ց(ա)
²³՛ի ցեղէն շմաւոնի, յիսուն եւ ինն հազար եւ երեք հարիւր։
²⁴Եւ որդւոցն Յուդայ՝ ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց ն(ո)ց(ա), ըստ գլխոց իւրեանց, ա(մենայ)ն արու՝ ՛ի քսանամենից եւ ՛ի վեր, ա(մենայ)ն որ ելանէր ՛ի զօրս հանդէս ն(ո)ց(ա)
²⁵՛ի ցեղէն յուդայ՝ եւթանասուն եւ չորք հազարք եւ վեց հարիւր։

²⁶Եւ որդւոցն Իսաքարայ՝ ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլխոց իւրեանց, ա(մենայ)ն արու ՛ի քսանամենից եւ ՛ի վեր, ա(մենայ)նի որ ելանէր ՛ի զօրու հանդէս ն(ո)ց(ա)
²⁷՛ի ցեղէն իսաքարայ, յիսուն եւ չորք հազարք եւ չորեքհարիւր։
²⁸Եւ որդւոցն Զաբուղոնի, ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլխոց իւրեանց ա(մենայ)ն արու ՛ի քսանամենից եւ ՛ի վեր, ա(մենայ)ն որ ելանէր ՛ի զօրու հանդէս ն(ո)ց(ա)
²⁹՛ի ցեղէն զաբուղոնի, յիսուն եւ եւթն հազար եւ չորեքհարիւր։

³⁰Եւ որդւոցն յովսեփայ՝ որդւոց Եփրեմի՝ ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց իւրեանց, ըստ գլխոց ն(ո)ց(ա), ա(մենայ)ն արու ՛ի քսանամենից եւ ՛ի վեր, ա(մենայ)ն որ ելանէր ՛ի զօրու հանդէս ն(ո)ց(ա)
³¹՛ի ցեղէն եփրեմի, քառասուն հազար եւ հինգհարիւր։
³²Եւ որդւոցն Մանասէի՝ ըստ ազգս իւրեանց, ը(ս)տ գունդս իւրեանց, ըստ տանց նահապետաց իւրեանց, ը(ս)տ թուոյ անուանց իւրեանց, ըստ գլխոց իւրեանց, ա(մենայ)ն արու ՛ի քսանամենից եւ ՛ի վեր, ա(մենայ)ն որ ելանէր ՛ի զօրու հանդէս ն(ո)ց(ա)
³³՛ի ցեղէն մանասէի, երեսուն եւ երկու հազար եւ երեք հարիւր։

³⁴Եւ որդւոցն Բենիամինի՝ ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ը(ս)տ թուոյ անուանց նոցա, ըստ գլխոց իւրեանց, ամենայն արու ՛ի քսանամենից եւ ՛ի վեր, ա(մենայ)ն որ ելանէր ՛ի զօրու հանդէս ն(ո)ց(ա)
³⁵՛ի ցեղէն բենիամինի, երեսուն եւ հինգ հազար եւ չորեքհարիւր։
³⁶Եւ որդւոցն Գադայ՝ ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ը(ս)տ թուոյ անուանց ն(ո)ց(ա) ը(ս)տ թուոյ անուանց ն(ո)ց(ա), ըստ գլխոց իւրեանց, ա(մենայ)ն արու ՛ի քսանամենից եւ ՛ի վեր, ա(մենայ)նի որ ելանէր ՛ի զօրու հանդէս ն(ո)ց(ա)
³⁷՛ի ցեղէն գադայ, քառասուն եւ հինգ հազար եւ վեց հարիւր եւ յիսուն։

³⁸Եւ որդւոցն Դանայ՝ ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ըստ թուոյ անուանց ն(ո)ց(ա), ըստ գլխոց իւրեանց, ա(մենայ)ն արու ՛ի քսանամենից եւ ՛ի վեր, ա(մենայ)ն որ ելանէր ՛ի զօրու հանդէս ն(ո)ց(ա)
³⁹՛ի ցեղէն դանայ, վաթսուն եւ երկու հազարք եւ եւթն հարեւր։
⁴⁰Եւ որդւոցն Ասերայ՝ ըստ ազգս իւրեանց, ըստ գունդս իւրեանց, ըստ տանց նահապետաց իւրեանց, ը(ս)տ թուոյ անուանց ն(ո)ց(ա), ըստ գլխոց իւրեանց, ա(մենայ)ն արու ՛ի քսանամենից եւ ՛ի վեր, ա(մենայ)նի որ ելանէր ՛ի զօրու հանդէս նոցա
⁴¹՛ի ցեղէն ասերայ, քառասուն եւ մի հազար եւ չորեքհարիւր։

⁴²Եւ որդւոցն Նեփթաղիմայ՝ ը(ս)տ ազգս իւրեանց, ը(ս)տ գունդս իւրեանց, ըստ տանց նահապետաց իւրեանց, ըստ թուոյ անուանց ն(ո)ց(ա), ըստ գլխոց իւրեանց, ամենայն արու ՛ի քսանամենից եւ ՛ի վեր, ա(մենայ)նի որ ելանէր ՛ի զօրու հանդէս ն(ո)ց(ա)
⁴³՛ի ցեղէն նեփթաղիմայ, յիսուն եւ երեք հազարք եւ չորեքհարիւր։
⁴⁴Ա́յս է հանդէս՝ զոր արարին մովսէս եւ ահարոն եւ իշխանքն ի(սրաէ)լի, երկոտասան իշխանք. ա́յր մի ըստ միում ազգի, ըստ ցեղից տանց նահապետաց իւրեանց էին։
⁴⁵Եւ եղեւ ա(մենայ)ն հանդէս որդւոցն ի(սրաէ)լի հանդերձ զօրու իւրեանց ՛ի քսանամենից եւ ՛ի վեր, ա(մենայ)ն որ ելանէր ՛ի պատերազմ ՛ի միջոյ ի(սրաէ)լի։

⁴⁶Եւ եղեն ա(մենայ)ն անցեալքն ՛ի հանդիսին վեց հարիւր հազար, եւ երեքհազար եւ վեց հարեւր եւ յիսուն։
⁴⁷Բայց ղեւտացիքն ՛ի ցեղէ ազգի իւրեանց ո́չ անցին ՛ի հանդիսի ընդ որդիսն ի(սրաէ)լի։
⁴⁸Խօսեցաւ տ(է)ր ընդ մովսիսի՝ եւ ասէ։
⁴⁹Տեսջի́ր զազգն ղեւեայ մի́ խառնեսցես ընդ ն(ո)ս(ա) ՛ի հանդէս, եւ զհամար ն(ո)ց(ա) մի́ առնուցուս ՛ի մէջ որդւոցն ի(սրաէ)լի։
⁵⁰եւ կացուսցես զղեւտացիսն ՛ի վ(ե)ր(այ) խորանին վկայու(թ)ե(ան), եւ ՛ի վ(ե)ր(այ) ա(մենայ)ն կահի ն(ո)ր(ա), եւ ՛ի վ(ե)ր(այ) ա(մենայ)նի որ ինչ է ՛ի նմա։ Եւ նոքա́ բարձցեն զխորանն, եւ զա(մենայ)ն կահ ն(ո)ր(ա). եւ նոքա́ պաշտեսցեն ՛ի նմա. եւ շո́ւրջ զխորանաւն բանակսցին։

⁵¹Եւ ՛ի չուել խորանին՝ իջուսցե́ն զնա ղեւտացիքն, եւ ՛ի բանակել խորանին՝ կանգնեսցեն զնա ղեւտացիքն. եւ այլազգի որ մերձեսցի ՛ի նա՝ մեռցի́։
⁵²Եւ բանակեսցին որդիքն ի(սրաէ)լի ա́յր ըստ իւրաքանչիւր կարգի, եւ ա́յր ըստ իւրաքանչիւր նահապետու(թ)ե(ան) հանդերձ զօրո́ւ իւրեանց։
⁵³Բայց ղեւտացիքն բանակեսցի́ն շուրջ զխորանա́ւն վկայու(թ)ե(ան) յանդիման տ(եառ)ն. եւ ո́չ լինիցին մեղք ՛ի մէջ որդւոցն իսրայէլի։ եւ պահեսցեն ղեւտացիքն զպահպանութի(ւն) խորանին վկայութե(ան)։
⁵⁴Եւ արարին որդիքն իսրայէլի ըստ ամենայնի, որպէս պատուիրեա́ց տ(է)ր մովսիսի եւ ահարոնի նո́յնպէս եւ արարին։

¹Եւ խօսեցաւ տ(է)ր ընդ մովսիսի եւ ընդ ահարոնի՝ եւ ասէ։
²Ա́յր իւրաքանչիւր՝ զհե́տ նշանի գնդի իւրոյ գնասցեն, ըստ տանց նահապետաց իւրեանց, ըստ բանակաց իւրեանց բանակեսցին որդիքն ի(սրաէ)լի։
³Եւ որ յառաջագոյնն բանակեսցին յարեւելից կողմանէ՝ ցե́ղ բանակին Յուդայ իցէ՝ հանդերձ զօրուն իւրեանց, եւ իշխան որդւոցն յուդայ նաասոն՝ որդի ամինադաբայ.
⁴եւ զօրք ն(ո)ր(ա) անցեալք ՛ի հանդիսի, եւթանասուն եւ չորք հազարք եւ վեց հարիւր։
⁵Եւ որք բանակիցեն զհետ ն(ո)ց(ա)՝ ցեղն Իսաքարայ իցէ, եւ իշխան որդւոցն իսաքարայ, նաթանայէլ որդի սեդիովրայ.
⁶եւ զօրք ն(ո)ր(ա) անցեալք ՛ի հանդիսի՝ յիսուն եւ չորք հազար եւ չորեք հարիւր։

⁷Եւ բանակեսցին առ նոքօք ցեղն Զաբուղոնի, եւ իշխան որդւոցն զաբուղոնի եղիաբ որդի քելլոնի.
⁸եւ զօրք նորա անցեալք ՛ի հանդիսի՝ յիսուն եւ եւթն հազար եւ չորեքհարիւր։
⁹Ամենեքեան անցեալք ՛ի հանդիսի բանակին յուդայ, հարիւր եւ ութսուն եւ վեց հազար եւ չորեքարեւր, հանդերձ զօրուն իւրեանց յառաջագո́յն չուեսցեն։
¹⁰Գունդ բանակին Ռուբինի ընդ հարաւակողմն, եւ զօրն ն(ո)ց(ա). եւ իշխան որդւոցն ռուբինի, եղիսուր որդի սեդիուրայ.
¹¹եւ զօրն ն(ո)ր(ա) անցեալք ՛ի հանդիսի՝ քառասուն եւ վեց հազար եւ հինգ հարիւր։
¹²Եւ բանակեսցին առ նովաւ ցեղն Շմաւոնի. եւ իշխան որդւոցն շմաւոնի սաղամիէլ որդի սուրիսադայի.

¹³եւ զօրն նորա անցեալք ՛ի հանդիսի՝ յիսուն եւ ինն հազար եւ երեք հարիւր։
¹⁴Եւ բանակեալք առ նովաւ ցեղն Գադայ. եւ իշխան որդւոցն գադայ, եղիաբ որդի ռագուէլի.
¹⁵եւ զօր ն(ո)ր(ա) անցեալք ՛ի հանդիսի քառասուն եւ հինգ հազար եւ վեց հարիւր եւ յիսուն։
¹⁶Ամենեքեան անցեալք ՛ի հանդիսի ցեղին ռուբինի, հարիւր յիսուն եւ մի հազար եւ չորեքհարիւր եւ յիսուն, հանդերձ զօրուն իւրեանց երկրո́րդք չուեսցեն։
¹⁷Եւ խաղասցէ խորանն վկայու(թ)ե(ան) եւ բանա́կ ղեւտացւոցն ՛ի մէջ բանակացն, որպէս բանակեցին՝ նո́յնպէս եւ չուեսցեն, իւրաքանչիւր զհետ միմեանց ըստ պետու(թ)ե(ան)։

¹⁸Եւ գունդ բանակին Եփրեմի ընդ ծովակողմն հանդերձ զօրուն իւրեանց. եւ իշխան որդւոցն եփրեմի՝ եղիսամա որդի սեմիուդայ.
¹⁹եւ զօրն նոցա անցեալք ՛ի հանդիսի, քառասուն հազար եւ հինգ հարիւր։
²⁰Եւ որ բանակեցին զհետ ն(ո)ց(ա)՝ ցե́ղն Մանասէի իցէ. եւ իշխան որդւոցն Մանասէի՝ գամաղիէլ որդի փադասուրայ.
²¹եւ զօրն ն(ո)ր(ա) անցեալք ՛ի հանդիսի՝ երեսուն եւ երկու հազար եւ երեք հարիւր։
²²Եւ որ բանակիցեն զհետ ն(ո)ց(ա)՝ գունդն Բենիամինի իցէ. եւ իշխան որդւոցն բենիամինի, աբիդան որդի գեդէոնի.
²³եւ զօր ն(ո)ր(ա) անցեալք ՛ի հանդիսի, երեսուն եւ հինգ հազար եւ չորեքհարիւր։

²⁴Ամենեքին անցեալք ՛ի հանդիսի բանակին եփրեմի, հարիւր եւ ութ հազար եւ երկերիւր, հանդերձ զօրուն իւրեանց՝ երրո́րդ չուեսցեն։
²⁵Եւ գունդ բանակին Դանայ ընդ հիւսւսի հանդերձ զօրուն իւրեանց. եւ իշխան որդւոցն դանայ՝ աքիեզեր որդի միսադանայ.
²⁶եւ զօր ն(ո)ր(ա) անցեալք ՛ի հանդիսի, վաթսուն եւ երկու հազարք եւ եւթն հարիւր։
²⁷Եւ որ բանակեսցին զհետ ն(ո)ր(ա) ա́զգն Ասերայ իցէ. եւ իշխան որդւոցն ասերայ փաքիէլ որդի եքրանայ.
²⁸եւ զօր ն(ո)ր(ա) անցեալք ՛ի հանդիսի, քառասուն եւ մի հազար եւ հինգ հարիւր։

²⁹Եւ որ բանակեսցին զհետ ն(ո)ր(ա) ցե́ղն Նեփթաղիմա́յ իցէ. եւ իշխան որդւոցն նեփթաղէմի՝ աքիրէ որդի ենանայ.
³⁰եւ զօրն նորա անցեալք ՛ի հանդիսի՝ յիսուն եւ երեք հազարք եւ չորեքհարիւր։
³¹Ամենեքեան անցեալք ՛ի հանդիսի բանակին դանայ, հարիւր յիսուն եւ եւթն հազար եւ վեց հարիւր. հանդերձ զօրուն իւրեանց յետո́յ չուեսցեն ըստ գունդս իւրեանց։
³²Ա́յս է հանդէս որդւոցն ի(սրաէ)լի. ը(ս)տ տանց նահապետաց իւրեանց ա(մենայ)ն հանդէս բանակացն հանդերձ զօրօք իւրեանց. վեց հարիւր հազար, եւ երեք հազար եւ վեց հարիւր եւ յիսուն։
³³Բայց ղեւտացիքն ո́չ անցին ընդ նոսա ՛ի հանդիսի. որպէս պատուիրեաց տ(է)ր մովսիսի։

³⁴Եւ արարին որդիքն իսրայէլի զամենայն՝ որպէս հրամայեաց տ(է)ր մովսիսի՝ ա́յնպէս բանակէին ըստ գունդս իւրեանց, եւ ա́յնպէս չուէին իւրաքանչիւր զհե́տ ցեղից իւրեանց ըստ տա́նց նահապետաց իւրեանց։

¹Եւ ա́յս ազգ են ահարոնի, յաւուր յորում խօսեցաւ տ(է)ր ընդ մովսիսի ՛ի լերինն սինայի։
²Եւ ա́յս են անուանք որդւոցն ահարոնի քահանայի. անդրանիկ՝ նաբադ եւ աբիուդ, եղիազար, եւ իթամար։
³եւ ա́յս են անուանք որդւոցն ահարոնի քահանայիցն օծելոց. զորոց կատարեցին զձեռս իւրեանց քահանայանալ։
⁴Եւ վախճանեցան նաբադ եւ աբիուդ առաջի տ(եառ)ն՝ մինչ մատուցանէին զհո́ւրն օտար առաջի տ(եառ)ն յանապատին սինայի, եւ որդիք ո́չ էին ն(ո)ց(ա). եւ քահանայացա́ն եղիազար եւ իթամար ընդ ահարոնի ը(ստ) հօրն իւրեանց։
⁵Եւ խօսեցաւ տ(է)ր ը(ստ) մովսիսի՝ եւ ասէ.

⁶ա́ռ զազգն ղեւեայ, եւ կացուսցե́ս զնոսա առաջի ահարոնի քահանայի, եւ պաշտեսցե́ն զնա։
⁷եւ պահեսցե́ն զպահպանու(թ)ի(ւն)ս ն(ո)ր(ա), եւ զպահպանութի(ւն)ս որդւոցն ի(սրաէ)լի առաջի խորանին վկայութե(ան) գործե́լ զգործ խորանին։
⁸Եւ պահեսցե́ն զա(մենայ)ն սպաս խորանին վկայութե(ան), եւ զպահպանութի(ւն)ս որդւոցն ի(սրաէ)լի, եւ զամենայն գործ խորանին։
⁹եւ տացես զղեւտացիսն ահարոնի եղբօր քում եւ որդւոցն ն(ո)ր(ա) քահանայից. հատուցո́ւմն տուեալ լիցին նոքա յորդւոցն ի(սրաէ)լի։

¹⁰Եւ զահարոն եւ զորդիս ն(ո)ր(ա) կացուսցե́ս ՛ի վ(ե)ր(այ) խորանին վկայութե(ան) եւ պահեսցեն զպահպանու(թ)ի(ւն)ն իւրեանց. եւ զա(մենայ)ն ինչս սեղանոյն, եւ որ ինչ ՛ի ներքս քան զվարագոյրն իցէ։ եւ այլազգի որ մերձենայցէ՝ մեռցի́։
¹¹Եւ խօսեցաւ տ(է)ր ընդ մովսիսի՝ եւ ասէ.
¹²եւ ե́ս ահա առի́ զղեւտացիսն ՛ի միջոյ որդւոցն ի(սրաէ)լի փոխանակ ա(մենայ)ն անդրանկան որ բանայ զարգանդ ՛ի միջոյ որդւոցն ի(սրաէ)լի. փրկա́նք նոցա լիցին. եւ եղիցին ինձ ղեւտացիքն։
¹³Զի ի́մ է ա(մենայ)ն անդրանիկ. յաւուր յորում հարի́ զա(մենայ)ն անդրանիկ յերկրին եգիպտացւոց, սրբեցի́ ինձ զա(մենայ)ն անդրանիկս ի(սրաէ)լի ՛ի մարդո́յ մինչեւ յանասուն. ի́մ լիցին՝ զի ե́ս եմ տ(է)ր։

¹⁴Եւ խօսեցաւ տ(է)ր ը(ստ) մովսիսի յանապատին սինայի՝ եւ ասէ։
¹⁵Հանդէ́ս արա որդւոցն ղեւեայ. ըստ տանց նահապետաց իւրեանց, ըստ գունդս իւրեանց, ըստ ազգս իւրեանց, ա(մենայ)ն արուի՝ յամսօրէից եւ ՛ի վե́ր առնիցէք հանդէս։
¹⁶Եւ արարին ն(ո)ց(ա) հանդէս մովսէս եւ ահարոն, ըստ բարբառոյ տ(եառ)ն՝ որպէս եւ հրամայեաց ն(ո)ց(ա) տ(է)ր։
¹⁷Եւ սոքա́ են որդիք ղեւեայ ըստ անուանց իւրեանց, գեթսոն, կահաթ, եւ մերարի։
¹⁸Եւ ա́յս են անուանք որդւոցն գեթսոնի, ըստ գունդս իւրեանց. ղոբենի, եւ սեմէի։
¹⁹Եւ որդիք կահաթու ը(ս)տ գունդս իւրեանց, ամրամ, եւ սահառ, քեբրոն, եւ ոզիէլ։
²⁰Եւ որդիք մերարեայ ըստ գունդս իւրեանց, մոոլի, եւ մուսի։

²¹Սոքա́ են գունդք ղեւտացւոց ըստ տանց նահապետաց իւրեանց. Գեթսոնի, գունդն ղոբենեայ, եւ գունդն սեմեայ. սոքա են գունդք գեթսոնի,
²²եւ հանդէս ն(ո)ց(ա) ըստ թուոյ ա(մենայ)ն արուի, յամսօրէից եւ ՛ի վեր, հանդէս ն(ո)ց(ա). եւթն հազար եւ հինգ հարիւր։
²³Եւ ա́յս գունդք գեթսոնի՝ յետո́յ խորանին ը(ստ) ծովակողմն բանակեսցին։
²⁴Եւ իշխան տա́ն նահապետաց գնդին գեթսոնի՝ եղիսափան որդի գեիղայ։
²⁵եւ պահպանու(թ)ի(ւն) որդւոցն գեթսոնի ՛ի խորանին վկայու(թ)ե(ան)։
²⁶խորա́նն եւ արտախուրակք եւ նուարտանք խորանին վկայութե(ան), եւ առագաստք սրահին, եւ վարագոյրք դրան խորանին. եւ ա́յլ եւս աւելորդ ա(մենայ)ն գործոյն նոցա։

²⁷Եւ կահաթու՝ գո́ւնդ մի ամրամայ, եւ գո́ւնդ մի սահառայ, եւ գո́ւնդ մի քեբրոնի, եւ գո́ւնդ մի ոզիէլի։ սոքա են գունդք կահաթու՝
²⁸ըստ թուոյ ա(մենայ)ն արուի յամսօրէից եւ ՛ի վեր, ութ հազար եւ երեք հարիւր. որ պահիցե́ն զպահպանութի(ւն) սրբութեցն։
²⁹Եւ գունդք որդւոցն կահաթու բանակեսցին ՛ի կողմանէ́ խորանին ընդ հարաւ։
³⁰եւ իշխան տան նահապետաց գնդին կահաթու, եղիսափան որդի ոզիէլի։
³¹Եւ պահպանութի(ւն) ն(ո)ց(ա)՝ տապանակն, եւ սեղանն, եւ աշտանակն, եւ զոհանոցքն, եւ կահք սրբութե(ան)ցն որովք պաշտէինն, եւ սրսկապանն, եւ ա(մենայ)ն գործի ն(ո)ց(ա)։

³²Եւ իշխան ՛ի վերայ իշխանացն ղեւտացւոցն, եղիազա́ր որդի ահարոնի քահանայի կացցէ́, պահե́լ զպահպանութի(ւն)ս սրբու(թ)ե(ան)ցն։
³³Եւ մերարեայ գունդն մոողեայ. եւ գունդն մուսեայ. սոքա́ են գունդք մերարեայ, եւ հանդէս ն(ո)ց(ա)՝
³⁴ըստ թուոյ ա(մենայ)ն արուի յամսօրէից եւ ՛ի վեր, վեց հազար եւ երկերիւր։
³⁵Եւ իշխան տան նահապետաց գնդին մերարեայ, սուրիէլ որդի աբիքեայ, ՛ի կողմանէ խորանին բանակեսցին ընդ հիւսւսի,
³⁶եւ հանդէս ն(ո)ց(ա)։ Եւ պահպանութի(ւն) որդւոցն մերարեայ, խոյակք խորանին եւ նիգք ն(ո)ր(ա), եւ սիւնակք ն(ո)ր(ա)՝ խարիսխք ն(ո)ր(ա), եւ ա(մենայ)ն կահք նոցունց, եւ գործի նոցուն,

³⁷եւ սիւնք սրահին շուրջանակի, եւ խարի́սխք ն(ո)ց(ա), եւ ցիցք նոցա, եւ ապաւանդակք ն(ո)ց(ա)։
³⁸Եւ որ բանակիցին յանդիման խորանին վկայութե(ան) յարեւելից կողմանէ՝ մովսէս եւ ահարոն իցեն, եւ որդիք ն(ո)ր(ա), պահեսցեն զպահպանու(թ)ի(ւն)ս սրբութե(ան)ցն ՛ի պահպանութի(ւն)ս որդւոցն ի(սրաէ)լի, եւ այլազգի որ մերձենայցէ ՛ի նա՝ մեռցի́։
³⁹Ամենայն հանդէս ղեւտացւոցն որոց արարին հանդէս մովսէս եւ ահարոն բանիւ տ(եառ)ն. ըստ գունդս իւրեանց, ա(մենայ)ն արու՝ յամսօրէից եւ ՛ի վեր, քսանեւերկու հազարք։
⁴⁰Եւ խօսեցաւ տ(է)ր ընդ մովսիսի՝ եւ ասէ. հանդէ́ս արա ա(մենայ)ն աանդրանկան արուի ա(մենայ)ն որդւոցն ի(սրաէ)լի յամսօրէից եւ ՛ի վեր. եւ կա́լ զթիւ ն(ո)ց(ա) յանուանէ։

⁴¹Եւ առցե́ս զղեւտացիսն ի́նձ, զի ե́ս եմ տ(է)ր. փոխանակ ա(մենայ)ն անդրանկաց որդւոցն ի(սրաէ)լի. եւ զանասուն ղեւտացւոցն, փոխանակ անդրանկաց անասնոց որդւոցն ի(սրաէ)լի։
⁴²եւ արա́ր մովսէս հանդէս ո(ր)պ(էս) պատուիրեաց տ(է)ր, ա(մենայ)ն անդրանկաց որդւոցն (թ)ի(ւն)Լի։
⁴³Եւ եղեն ա(մենայ)ն արուք անդրանիկք որդւոցն ի(սրաէ)լի, ըստ թուոյ յանուանէ յանսօրէից եւ ՛ի վեր, ՛ի հանդիսէ անտի նոցա, քսան եւ երկու հազարք եւ երկերիւր եւթանասուն եւ երեք։
⁴⁴Եւ խօսեցաւ տ(է)ր ընդ մովսիսի՝ եւ ասէ.

⁴⁵ա́ռ զղեւտացիսն փոխանակ ա(մենայ)ն անդրանկաց որդւոցն ի(սրաէ)լի. եւ զանասուն ղեւտացւոցն փոխանակ անասնոց ն(ո)ց(ա). եւ եղիցին ինձ ղեւտացիքն. զի ե́ս եմ տ(է)ր։
⁴⁶Եւ զփրկանս զերկերիւրոց եւ զեւթանասնից եւ զերիցն աւելորդաց քան զղեւտացիսն, յանդրանկաց որդւոցն ի(սրաէ)լի
⁴⁷առցես հինգ սիկղ ըստ գլուխ ըստ սրբու(թ)ե(ան) երկդրամենին. առցես քսա́ն դանգ՝ առ սիկղ.
⁴⁸եւ տացես զարծաթն ահարոնի եւ որդւոցն ն(ո)ր(ա), փրկանս ընդ աւելորդացն ՛ի նոցանէ։
⁴⁹Եւ ա́ռ մովսէս զարծաթն զփրկանս աւելորդացն ՛ի նոցանէն ՛ի փրկանս ղեւտացւոցն,

⁵⁰յանդրանկաց որդւոցն ի(սրաէ)լի. եւ ա́ռ զարծաթն հազար եւ երեքհարիւր եւ վաթսուն եւ հինգ սիկղ ըստ սրբութե(ան) սկեղն։
⁵¹Եւ ետ մովսէս զփրկանս աւելորդացն ահարոնի́ եւ որդւոց նորա ըստ բանի տ(եառ)ն. որպէս հրամայեաց տ(է)ր մովսիսի։

¹Եւ խօսեցաւ տ(է)ր ընդ մովսիսի եւ ընդ ահարոնի՝ եւ ասէ։
²Կա́լ զթիւ գլխոց որդւոցն կահաթու ՛ի միջոյ որդւոցն ղեւեայ, ըստ գունդս իւրեանց, ը(ս)տ տա́նց նահապետաց իւրեանց՝
³՛ի քսան եւ ՛ի հինգ ամենից եւ ՛ի վեր մինչեւ ցյիսնամեանս. ա(մենայ)ն որ մտանիցէ ՛ի սպաս գործել զա(մենայ)ն գո́րծ ՛ի խորանին վկայութե(ան)։
⁴Եւ ա́յս իցէ գործ որդւոցն կահաթու ՛ի միջոյ որդւոցն ղեւեայ, ըստ գունդս իւրեանց, ըստ տանց նահապետացն ՛ի խորանին վկայութե(ան)՝ սրբութի(ւն) սրբութե(ան)ցն։
⁵Եւ մտցէ́ ահարոն եւ որդիք իւր յորժամ խաղայցէ բանակն. եւ իջուսցեն զվարագոյրն հովանոց, եւ ծածկեսցեն նովաւ զտապանակ վկայութե(ա)ն,

⁶եւ դիցեն ՛ի վ(ե)ր(այ) ն(ո)ր(ա) զնուարտանն մաշկեղէն զկապուտակ, եւ արկցեն զնովաւ ձո́րձ համակ կապուտակ ՛ի վերուստ կողմանէ, եւ ագուսցեն զլծակսն։
⁷Եւ ՛ի վ(ե)ր(այ) զառաջաւորի սեղանոյն արկցեն հանդերձ համա́կ ծիրանի. եւ զափսէսն, եւ զտուփսն, եւ զճաշակսն, եւ զնուիրանոցսն որովք նուիրեսցեն. եւ հա́ցքն հանապազորդք ՛ի վ(ե)ր(այ) ն(ո)ր(ա) կացցեն։
⁸եւ արկցեն զնովաւ հանդերձ կարմիր, եւ ծածկեսցեն զնա մաշկեղէն նուարտանաւ կապուտակաւ, եւ ագուսցեն ՛ի նմա զլծակսն։

⁹Եւ առցեն հանդերձ կապուտակ, եւ ծածկեսցեն զաշտանա́կն լուսոյ՝ եւ զերկոսին ճրագարանսն ն(ո)ր(ա), եւ զունելիս ն(ո)ր(ա), եւ զբազմակալս ն(ո)ր(ա), եւ զա(մենայ)ն ամանս իւղոյն որովք պաշտեսցենն։
¹⁰եւ արկցեն զնա եւ զա(մենայ)ն կա́հ ն(ո)ր(ա) ՛ի նուարտան մաշկեղէն կապուտակ. եւ դիցեն զնա ՛ի վ(ե)ր(այ) լծակացն։
¹¹Եւ զսեղանն ոսկի ծածկեսցեն հանդերձիւ կապուտակաւ, եւ արկցեն ՛ի վ(ե)ր(այ) ն(ո)ր(ա) նուարտա́ն մաշկեղէն կապուտակ, եւ ագուսցեն ՛ի նմա զլծա́կս ն(ո)ր(ա)։

¹²Եւ առցեն զա(մենայ)ն զկա́հ պաշտամանն՝ որովք պաշտիցեն ՛ի սրբութի(ւն)սն, եւ արկցեն՝ ՛ի հանդերձս կապուտակս. եւ ծածկեսցե́ն զայն մաշկեղէն նուարտանաւ կապուտակաւ. եւ դիցեն ՛ի վ(ե)ր(այ) լծակացն։
¹³Եւ զնուարտանն դիցեն ՛ի վ(ե)ր(այ) սեղանոյն. եւ ծածկեսցեն զնա հանդերձիւ համա́կ ծիրանեաւ.
¹⁴եւ դիցեն ՛ի վ(ե)ր(այ) ն(ո)ր(ա) զսպա́սն որովք պաշտիցեն ՛ի վ(ե)ր(այ) ն(ո)ր(ա), եւ զբուրուառս, եւ զմսահանս, եւ զտաշտսն, եւ զծածկիչսն, եւ զա(մենայ)ն սպաս սեղանոյն. եւ արկցեն ՛ի վ(ե)ր(այ) ն(ո)ր(ա) նուարտան մաշկեղէն կապուտակ. եւ անցուսցեն ը(ստ) նա զլծակսն։

¹⁵Եւ առցեն հանդերձ ծիրանի եւ ծածկեսցեն զաւազանն, եւ զխարիսխս ն(ո)ր(ա). եւ արկցեն զնովաւ մա́շկ կապուտակ, եւ դիցեն ՛ի վ(ե)ր(այ) լծակացն։ Եւ կատարեսցեն ահարոն եւ որդիք ն(ո)ր(ա) ծածկե́լ զսրբութի(ւն)սն, եւ զա(մենայ)ն կա́հ սրբութե(ա)ն ՛ի չուել բանակին։ եւ ապա́ մտցեն որդիքն կահաթու բառնալ, եւ մի́ մերձեսցին ՛ի սրբութի(ւն)սն՝ զի մի́ մեռանիցին։ Զա́յն բառնայցեն որդիք կահաթու ՛ի խորանէ անտի վկայութե(ան)։
¹⁶Եւ ոստիկան եղիազար որդիահարոնի քահանայի. զեւղն լուսոյ, եւ զխունկսն հանդերձանաց, եւ զզոհն հանապազորդ. զեւղն օծութե(ան), եւ զհանդերձ ա(մենայ)ն խորանին եւ որ ինչ ՛ի նմա. եւ որ ՛ի սրբութե(ա)ն, եւ յա(մենայ)ն սրբութի(ւն)սն։

¹⁷Եւ խօսեցաւ տ(է)ր ընդ մովսիսի եւ ընդ ահարոնի՝ եւ ասէ։
¹⁸Մի́ սատակիցէք զգունդն կահաթու ՛ի միջոյ ղեւտացւոցն. զա́յս ինչ արասջիք նոցա, եւ կեցցեն եւ մի́ մեռանիցին
¹⁹՛ի մերձենալ ն(ո)ց(ա) ՛ի սրբութի(ւն) սրբութե(ան)ցն. ահարոն եւ որդիք ն(ո)ր(ա) մտցեն ՛ի ներքս, եւ կարգեսցեն զն(ո)ս(ա) իւրաքանչիւր ըստ բեռին իւրում.
²⁰եւ մի́ մտցեն վայրապար տեսանել զսրբութի(ւն) սրբու(թ)ե(ան)ցն, զի մի́ մեռանիցին։
²¹Եւ խօսեցաւ տ(է)ր ընդ մովսիսի՝ եւ ասէ։
²²Կա́լ դու զհամար որդւոցն գեթսոնի, ըստ անուանց նահապետաց իւրեանց, ը(ս)տ գնդից իւրեանց

²³՛ի քսան եւ ՛ի հինգ ամենից եւ ՛ի վե́ր մինչեւ ցյիսնամեանս, եւ արասցեն ն(ո)ց(ա) հանդէս. ա(մենայ)ն որ մտանիցէ ՛ի սպաս, գործել զգործ խորանին վկայու(թ)ե(ան)։
²⁴Ա́յս իցէ սպասաւորու(թ)ի(ւն) գնդին գեթսոնի, ՛ի մտանել ՛ի հարկ եւ ՛ի բառնալ.
²⁵եւ բարձցեն զվերնափեղկս խորանին, եւ զխորանն վկայու(թ)ե(ան), եւ զարտախուրակս ն(ո)ր(ա), եւ զնուարտանս ն(ո)ր(ա) կապուտակեայս որ ՛ի նմա ՛ի վերո́ւստ կողմանէ. եւ զվարագոյր խորանին վկայու(թ)ե(ան),
²⁶եւ զառագաստ սրահին, եւ որինչ ՛ի վ(ե)ր(այ) խորանին վկայու(թ)ե(ան). եւ զապարումսն, եւ զա(մենայ)ն կահ սպասուն որովք պաշտիցենն։

²⁷Եւ արասցեն ը(ս)տ բերանոյ ահարոնի եւ որդւոց ն(ո)ր(ա). եղիցի սպասաւորու(թ)ի(ւն) որդւոցն գեթսոնի ըստ ա(մենայ)ն սպասաւորու(թ)ե(ան) իւրեանց, եւ ըստ ա(մենայ)ն գործոց իւրեանց. եւ արասջիք ն(ո)ց(ա) հանդէ́ս յանուանէ, եւ ա(մենայ)նի որինչ բառնայցի ՛ի նոցանէ։
²⁸Ա́յս իցէ սպասաւորու(թ)ի(ւն) որդւոցն գեթսոնի ՛ի խորանին վկայութե(ան), եւ պահպանու(թ)ի(ւն) ն(ո)ց(ա) ՛ի ձեռն իթամարայ որդւոյ ահարոնի քահանայի։
²⁹Եւ որդւոցն մերարեայ ը(ս)տ գնդից իւրեանց, ըստ տանց նահապետաց իւրեանց, արասջի́ք ն(ո)ց(ա) հանդէս,
³⁰՛ի քսան եւ ՛ի հինգ ամենից եւ ՛ի վեր, մինչեւ ցյիսնամեանս՝ արասջի́ք նոցա հանդէս. ա(մենայ)ն որ մտանիցէ ՛ի սպա́ս գործոյ խորանին վկայութե(ան)։

³¹Եւ ա́յս իցէ պահպանութի(ւն)ք բեռանցն որ բառնայցին ՛ի նոցանէ, ըստ ա(մենայ)ն գործոց նոցա ՛ի խորանին վկայութե(ան). զխոյա́կս խորանին, եւ զնիգս, եւ զսիւնակս ն(ո)ր(ա), եւ զխարիսխս ն(ո)ր(ա). եւ զվարագոյրն, եւ զխարիսխս ն(ո)ր(ա). եւ զսիւնս ն(ո)ց(ա).
³²եւ զվարագոյր դրան խորանին. եւ զսիւնս սրահին շուրջանակի, եւ զխարիսխս ն(ո)ց(ա). եւ զսիւնս վարագուրին դրան սրահին, եւ զխարիսխս նոցա, եւ զցիցս ն(ո)ց(ա), եւ զապաւանդակս ն(ո)ց(ա), եւ զա(մենայ)ն կահ ն(ո)ց(ա), եւ զա(մենայ)ն սպաս ն(ո)ց(ա)։ Եւ յանուանէ հանդէ́ս առնիցէք ն(ո)ց(ա). եւ ա(մենայ)ն կահի պահպանութե(ան) որ բառնայցի ՛ի նոցանէ։

³³Ա́յս իցէ սպասաւորու(թ)ի(ւն) գնդի որդւոցն մերարեայ, յա(մենայ)ն ՛ի գործս իւրեանց ՛ի խորանին վկայու(թ)ե(ան)՝ ՛ի ձեռն իթամարայ որդւոյ ահարոնի քահանայի։
³⁴Եւ արարին հանդէս մովսէս եւ ահարոն եւ իշխանքն ի(սրաէ)լի որդւոցն կահաթու ըստ գնդից իւրեանց, ը(ս)տ տանց նահապետաց իւրեանց՝
³⁵՛ի քսան եւ ՛ի հինգ ամենից եւ ՛ի վեր մինչեւ ցյիսնամեանս, ա(մենայ)ն որ մտանէր ՛ի սպաս, եւ գործէր գո́րծ ՛ի խորանին վկայու(թ)ե(ան)։
³⁶եւ եղեւ ն(ո)ց(ա) հանդէս ը(ս)տ գնդից իւրեանց, երկու հազար եւ եւթն հարեւր եւ յիսուն։

³⁷Ա́յս է հանդէս գնդին կահաթու. ա(մենայ)ն որ մտանէր ՛ի սպաս խորանին վկայու(թ)ե(ան). ո(ր)պ(էս) եւ արարին հանդէս մովսէս եւ ահարոն բանիւ տ(եառ)ն ՛ի ձեռն մովսիսի։
³⁸Եւ անցին ՛ի հանդիսի որդիքն գեթսոնի ը(ս)տ գնդից իւրեանց, ը(ս)տ տանց նահապետաց իւրեանց՝
³⁹՛ի քսան եւ ՛ի հինգ ամենից եւ ՛ի վեր մինչեւ ցյիսնամեանս, ա(մենայ)ն որ մտանէր պաշտել եւ գործել գործ ՛ի խորանին վկայու(թ)ե(ան)։
⁴⁰եւ եղեւ հանդէս ն(ո)ց(ա) ը(ս)տ գնդից իւրեանց, ը(ս)տ տանց նահապետաց իւրեանց, երկու հազար եւ վեց հարեւր եւ երեսուն։

⁴¹Ա́յս է հանդէս գնդի որդւոցն գեթսոնի, ա(մենայ)ն որ պաշտէր ՛ի խորանին վկայութե(ան), որոց արարին հանդէս մովսէս եւ ահարոն, ըստ բանի տ(եառ)ն ՛ի ձեռն մովսիսի։
⁴²Անցին ՛ի հանդիսի եւ գունդք որդւոցն մերարեայ՝ ըստ գնդից իւրեանց, ըստ տանց նահապետաց իւրեանց՝
⁴³՛ի քսան եւ ՛ի հինգ ամենից եւ ՛ի վեր մինչեւ ցյիսնամեանս. ա(մենայ)ն որ մտանէր պաշտել ՛ի գործ խորանին վկայութե(ան).
⁴⁴եւ եղեւ հանդէս ն(ո)ց(ա) ըստ գնդից իւրեանց, ըստ տանց նահապետաց իւրեանց, երեք հազար եւ երկերիւր։
⁴⁵Ա́յս է հանդէս գնդի որդւոցն մերարեայ. որոց արարին հանդէս մովսէս եւ ահարոն ըստ բանի տ(եառ)ն ՛ի ձեռն մովսիսի։

⁴⁶Ամենեքին անցեալք ՛ի հանդիսի, որոց արարին հանդէս մովսէս եւ ահարոն եւ իշխանքն ի(սրաէ)լի ղեւտացւոցն, ը(ս)տ գնդից իւրեանց, ըստ տանց նահապետաց իւրեանց՝
⁴⁷՛ի քսան եւ ՛ի հինգ ամենից եւ ՛ի վեր մինչեւ ցյիսնամեանս. ա(մենայ)ն որ մտանէր ՛ի գործ սրբութե(ան)ցն, եւ ՛ի գործ կրելեաց խորանին վկայութե(ան)։
⁴⁸եղեն անցեալք ՛ի հանդիսի ութ հազար եւ հինգ հարիւր եւ ութսուն՝ ըստ բանի տ(եառ)ն։
⁴⁹Արար նոցա հանդէս տ(է)ր ՛ի ձեռն մովսիսի. ա́յր ըստ առնէ ՛ի վերայ գործոյ իւրեանց, ՛ի վերայ բեռանցն զոր ինքեանք բառնային. եւ անցին ՛ի հանդիսի՝ որպէս հրամայեաց տ(է)ր մովսիսի։

¹Խօսեցաւ տ(է)ր ընդ մովսիսի՝ եւ ասէ.
²հրամա́ն տուր որդւոցն ի(սրաէ)լի, եւ արձակեսցե́ն ՛ի բաց զա(մենայ)ն բորոտ ՛ի բանակէ անտի, եւ զա(մենայ)ն սերմնակաթ, եւ զա(մենայ)ն պղծեալ յոգի,
³յարուէ մինչեւ ցէգ. արձակեցէ́ք ՛ի բաց բանակէ անտի. եւ մի́ պղծեսցեն զբանակս իւրեանց՝ յոր ե́սդ իջանեմ։
⁴Եւ արարի́ն այնպէս որդիքն ի(սրաէ)լի, եւ արձակեցին զնոսա ՛ի բա́ց ՛ի բանակէ անտի, ո(ր)պ(էս) խօսեցաւ տ(է)ր ընդ մովսիսի, այնպէս արարին որդիքն ի(սրաէ)լի։
⁵Խօսեցաւ տ(է)ր ընդ մովսիսի՝ եւ ասէ.
⁶խօսեա́ց ընդ որդիսդ ի(սրաէ)լի՝ եւ ասասցես. Ա́յր կամ կի́ն, որ ոք արասցէ յա(մենայ)ն մարդկեղէն մեղաց, եւ արհամարհելով արհամարհիցէ՝ եւ յանցանիցէ անձնն այն,

⁷խոստովա́ն լիցի զմեղս իւր զոր արար. եւ հատուսցէ ընդ յանցանացն զգլուխն, եւ զհինգերորդ եւս մասն ն(ո)ր(ա) յաւելցէ́ ՛ի նոյն, եւ տացէ́ այնմ որում յանցեաւն։
⁸Ապա թէ չիցէ́ ոք առնն մերձաւորիչ հատուցանել նմա զյանցանաց ն(ո)ր(ա). եւ ընդ յանցանացն որ ինչ ընծայիցի տ(եառ)ն, այն քահանայի́ն եղիցի. բա́ց ՛ի խոյէ քաւութե(ա)ն՝ որով քաւիցէ վ(ա)ս(ն) իւր։
⁹Եւ ա(մենայ)ն պտուղ ըստ ա(մենայ)նի որ սրբիցի յորդւոցն ի(սրաէ)լի՝ զոր ինչ մատուցանիցեն տ(եառ)ն, քահանայի́ն եղիցի։
¹⁰Եւ յիւրաքանչիւր սրբելոց անտի, նորա́ լիցին. եւ ա́յր ոք որ տացէ քահանային՝ նորա լիցին։
¹¹Խօսեցաւ տ(է)ր ընդ մովսիսի՝ եւ ասէ.

¹²խօսեա́ց ընդ որդիսդ ի(սրաէ)լի՝ եւ ասասցե́ս ցդոսա։ Ա́ռն ուրուք առն՝ եթէ յանցանիցէ կին իւր՝ եւ արհամարհիցէ զնա։
¹³եւ ննջեսցէ́ ոք ընդ նմա արու(թեամ)բ սերման. եւ վրիպիցի յաչաց առն իւրոյ՝ եւ թաքուցանիցէ. եւ նա պղծեա́լ իցէ, եւ վկայ ո́չ գուցէ զնմանէ, եւ յղի ո́չ իցէ։
¹⁴Եւ հասանիցէ ՛ի վ(ե)ր(այ) առն ն(ո)ր(ա) ոգի նախանձու. եւ նախա́նձ բերիցէ ընդ կնոջ իւրում, եւ նա՝ ո́չ իցէ պղծեալ։ կամ հասանիցէ ՛ի վ(ե)ր(այ) ն(ո)ր(ա) ոգի́ նախանձու, եւ նախա́նձ բերիցէ ընդ կնոջ իւրում. եւ նա՝ իցէ́ պղծեալ։

¹⁵Ածցէ́ այրն զկին իւր առ քահանայն՝ եւ մատուսցէ́ վ(ա)ս(ն) ն(ո)ր(ա) քահանայն պատարագ, զտասներորդ գրուի ալեր գարեղէն, եւ եւղ՝ մի́ արկցէ ՛ի նա, եւ կնդրուկ՝ մի́ դիցէ ՛ի վ(ե)ր(այ) ն(ո)ր(ա). զի զոհ նախանձաւորութե(ան) է։ զո́հ յիշատակի, զո́հ յիշատակելոյ զմեղս
¹⁶մատուսցէ քահանայն, եւ կացուսցէ́ զկինն առաջի տ(եառ)ն։
¹⁷եւ առցէ́ քահանայն ջուր սուրբ կենդանի խեցեղէն ամանաւ. եւ ՛ի հողոյ անտի որ իցէ առ յատակաւ խորանին վկայութե(ան)՝ առեալ քահանայն արկցէ́ ՛ի ջուրն։
¹⁸Եւ կացուսցէ́ քահանայն զկինն առաջի տ(եառ)ն. եւ մերկացուսցէ́ զգլուխ կնոջն, եւ տացէ́ ՛ի ձեռս ն(ո)ր(ա) զզոհ յիշատակին, զզո́հ նախանձաւորութե(ա)ն. եւ ՛ի ձեռին քահանային կացցէ ջուրն յանդիմանու(թ)ե(ան) նզովին այնորիկ,

¹⁹եւ երդմնեցուսցէ́ զնա քահանայն՝ եւ ասասցէ́ ցկինն. եթէ չիցէ́ ննջեցեալ ընդ քեզ առն, եթէ չիցե́ս յանցուցեալ եւ պղծեալ առ արամբ քով, քաւեա́լ լիջիր ՛ի ջրոյդ յանդիմանութե(ան) նզովիդ այդորիկ։
²⁰ապա թէ յանցուցեալ իցես առ արամբ քով, կամ պղծեալ իցես. եւ տուեալ իցէ ուրուք զարութի(ւն) իւր ՛ի քեզ, առա́նց առն քոյ։
²¹Եւ երդմնեցուսցէ́ քահանայն զկինն՝ երդմամբ նզովիս այսորիկ. եւ ասասցէ́ քահանայն ցկինն. տացէ́ զքեզ տ(է)ր ՛ի նզո́վս եւ յերդումն ՛ի մէջ ժողովրդեան քոյ, ՛ի տալ տ(եառ)ն զբարձս քո ՛ի քակտումն, եւ զորովա́յն քո յուռուցումն։
²²եւ մտցէ ջուրս նզովեալ յորովայն քո, ուռուցանե́լ զմէջ քո, եւ քակե́լ զբարձս քո։ եւ ասասցէ́ կինն. եղիցի́ եղիցի։

²³Եւ գրեսցէ́ քահանայն զնզովս զայսոսիկ ՛ի մատենի. եւ լուասցէ́ ՛ի ջուրն յանդիմանութե(ան) նզովիցն։
²⁴եւ տացէ ըմպել կնոջն զջուրն յանդիմանու(թ)ե(ան) նզովից։ եւ մտցէ́ ՛ի նա ջուրն յանդիմանութե(ան) նզովեալ։
²⁵Եւ առցէ́ քահանայն ՛ի ձեռանէ կնոջն զզոհ նախանձաւորութե(ա)ն, եւ դիցէ́ զզոհն առաջի տ(եառ)ն. եւ մատուսցէ́ առ սեղանն։
²⁶եւ առցէ́ բռամբ քահանայն ՛ի զոհէ յիշատակին ն(ո)ր(ա), եւ հանցէ զա́յն ՛ի սեղանն. եւ ապա́ արբուսցէ կնոջն զջուրն յանդիմանութե(ան)։
²⁷Եւ եղիցի եթէ պղծեալ իցէ՝ եւ ծածկելով ծածկեա́լ իցէ յառնէն նորա. եւ մտանիցէ ՛ի նա ջուրն յանդիմանութե(ան) նզովեալ. ուռուսցէ́ զորովայն ն(ո)ր(ա), եւ քակեսցի́ն բարձք ն(ո)ր(ա). եւ եղիցի կինն՛ի նզո́վս ՛ի մէջ ժողովրդեանն իւրոյ։

²⁸Ապա թէ չիցէ́ պղծեալ կինն՝ եւ սո́ւրբ իցէ, քաւեա́լ լիցի՝ եւ ընկալցի́ սերմն։
²⁹Ա́յս օրէ́ն իցէ նախանձաւորութե(ան), որոյ յանցուցեալ իցէ կին՝ որ առնակին իցէ եւ պղծիցի։
³⁰կամ ա́յր յորոյ վերայ հասանիցէ ոգի նախանձու, եւ ՛ի նախա́նձ մտանիցէ ընդ կնոջ իւրում։ Կացուսցէ զկինն առաջի տ(եառ)ն, եւ արասցէ́ նմա քահանայն ըստ ա(մենայ)ն օրինիս այսորիկ.
³¹եւ քաւեա́լ լիցի այրն ՛ի մեղա́ց անտի. եւ կինն ընկալցի զմեղս իւր։

¹Խօսեցաւ տ(է)ր ընդ մովսիսի՝ եւ ասէ։
²խօսեա́ց ընդ որդիսդ ի(սրաէ)լի՝ եւ ասասցես։ Ա́յր կամ կին, որ մե́ծ ինչ ուխտս ուխտեսցէ սրբել զսրբութի(ւն) տ(եառ)ն։
³՛ի գինւոյ եւ ՛ի ցքւոյ սրբեսցի. եւ զքացախ ցքւոյ մի́ արբցէ, եւ զխաղող ն(ո)ր(ա) եւ զչամիչ մի́ կերիցէ։
⁴զա(մենայ)ն աւուրս ուխտին իւրոյ յա(մենայ)նէ զինչ եւ լինիցի յորթոյ, զգինի, ՛ի չամչոյ մինչեւ ցթինն մի́ կերիցէ
⁵զա(մենայ)ն աւուրս սրբու(թ)ե(ա)ն։ եւ սրբիչ՝ մի́ ածիցէ զգլխով իւրով. մինչեւ լցցի́ն աւուրքն զորս ուխտեաց տ(եառ)ն՝ սո́ւրբ կացցէ, աճեցուցեալ զվա́րսս մազոյ գլխոյ իւրոյ,
⁶զա(մենայ)ն աւուրս ուխտին իւրոյ տ(եառ)ն։ Յոգի վախճանեալ մի́ մտցէ

⁷՛ի հօր, եւ ՛ի մօր, յեղբօր, եւ ՛ի քեռ. մի́ պղծեսցի նոքօք ՛ի մահու նոցա. զի ուխտ տ(եառ)ն ՛ի վ(ե)ր(այ) գլխոյ նորա է.
⁸զա(մենայ)ն աւուրս ուխտին իւրոյ սո́ւրբ կացցէ տ(եառ)ն։
⁹Եւ եթէ յանկարծ մեռանիցի ոք ՛ի վերայ ն(ո)ր(ա), առժամայն պղծեսցի գլուխ ուխտի ն(ո)ր(ա)։ եւ գերծցէ́ զգլուխ իւր յաւուր յորում սրբիցի. եւ յաւուրն եւթներորդի գերծցի́։
¹⁰եւ յաւուրն ութերորդի ածցէ երկուս տատրա́կս, կ(ա)մ երկուս ձագս աղաւնեաց առ քահանայն ՛ի դուռն խորանին վկայութե(ան)։
¹¹Եւ արասցէ քահանայն զմին վ(ա)ս(ն) մեղաց, եւ զմին յողջակէզ. եւ քաւեսցէ́ վ(ա)ս(ն) ն(ո)ր(ա) քահանայն ը(ստ) մեղացն զոր մեղաւ յոգի. եւ սրբեսցէ́ զգլուխ իւր յաւուր յայնմիկ.

¹²զի յա́յնմ աւուր սրբեաց տ(եառ)ն զաւուրս ուխտին իւրոյ։ Եւ ածցէ գառն մի տարեւոր վ(ա)ս(ն) յանցանացն. եւ աւուրքն առաջինք անհամա́րք լիցին. զի պղծեցա́ւ գլուխ ուխտի նորա։
¹³Եւ ա́յս օրէն իցէ ուխտաւորին, յաւուր յորում կատարիցէ զաւուրս ուխտին իւրոյ. ածցէ́ ՛ի դուռն խորանին վկայու(թ)ե(ան).
¹⁴եւ մատուսցէ զպատարագն իւր տ(եառ)ն, գառն մի տարեւոր անարա́տ յողջակէզ, եւ որոջ մի տարեւո́ր անարատ վ(ա)ս(ն) մեղաց, եւ խո́յ մի անարատ ՛ի փրկութի(ւն).
¹⁵եւ խան մի բաղարջաց նաշհւոյ. եւ պա́նս զանգեալ իւղով, եւ քաքարս բաղարջս օծեալս իւղով, եւ զզոհս ն(ո)ց(ա), եւ զնուէրս իւրեանց։

¹⁶Եւ մատուսցէ քահանայն առաջի տ(եառ)ն, եւ արասցէ́ զվ(ա)ս(ն) մեղացն ն(ո)ց(ա). եւ զողջակէզն ն(ո)ր(ա),
¹⁷եւ զխոյն արասցէ́ զոհ փրկութե(ան) տ(եառ)ն ՛ի վ(ե)ր(այ) խանին բաղարջոյ։ եւ արասցէ քահանայն զզոհն նորա, եւ զնուէրս ն(ո)ր(ա)։
¹⁸Եւ գերծցէ́ ուխտաւորն առ դրան խորանին վկայու(թ)ե(ան) զգլուխ ուխտին իւրոյ. եւ դիցէ́ զմազն ՛ի հուրն որ ՛ի վ(ե)ր(այ) զոհին փրկութե(ան)։
¹⁹Եւ առցէ քահանայն զերին եփեալ ՛ի խոյէ անտի. եւ պա́ն մի բաղարջ ՛ի խանէն, եւ քաքար մի բաղարջ, եւ դիցէ քահանայն ՛ի վ(ե)ր(այ) ձեռաց ուխտաւորին, յետ գերծելոյ ն(ո)ր(ա) զգլուխն իւր։

²⁰եւ մատուսցէ զայն քահանայն ընծա́յ առաջի տ(եառ)ն, եւ եղիցի ս(ուր)բ։ քահանային եղիցի ՛ի վ(ե)ր(այ) երբծոյն նուիրի, եւ ՛ի վ(ե)ր(այ) երւոյն հասի։ եւ ապա́ արբցէ ուխտաւորն գինի։
²¹Ա́յս օրէն իցէ ուխտաւորի որ ուխտիցէ ոք տ(եառ)ն, եւ զպատարագ իւր վ(ա)ս(ն) ուխտից. թո́ղ զայն որ ինչ գտանիցէ ձեռն իւր. ըստ կարի́ ուխտին իւրոյ՝ զոր ուխտիցէ ըստ օրինի սրբութե(ան) տ(եառ)ն։
²²Խօսեցաւ տ(է)ր ընդ մովսիսի՝ եւ ասէ.
²³խօսեա́ց ընդ ահարոնի եւ ընդ որդիս ն(ո)ր(ա) եւ ասասցես։ Ա́յսպէս օրհնեսջիք զորդիսդ ի(սրաէ)լի. եւ ասասջիք ն(ո)ց(ա).
²⁴եւ դիցեն զանուն իմ ՛ի վերայ որդւոցն ի(սրաէ)լի, եւ ե́ս տ(է)ր օրհնեցից զն(ո)ս(ա).

²⁵Օրհնեսցէ́ զքեզ տ(է)ր՝ եւ պահեսցէ́ զքեզ.
²⁶եւ երեւեցուսցէ́ զերեսս իւր ՛ի քեզ, եւ ողորմեսցի́ քեզ.
²⁷ամբարձցէ տ(է)ր զերեսս իւր ՛ի քեզ, եւ տացէ քեզ խաղաղութի(ւն)։

¹Եւ եղեւ յաւուր յորում կատարեաց մովսէս առ ՛ի կանգնելոյ զխորանն. եւ օծ զնա զա(մենայ)ն սպասս ն(ո)ր(ա). եւ զզոհանոցսն, եւ զա(մենայ)ն սպաս ն(ո)ր(ա). եւ օծ զն(ո)ս(ա) եւ սրբեաց զն(ո)ս(ա)։
²Եւ մատուցին իշխանքն ի(սրաէ)լի՝ երկոտասան իշխան տանց նահապետաց ն(ո)ց(ա)։ նոքա́ էին իշխանք ցեղիցն, եւ նոքա́ կային ՛ի վ(ե)ր(այ) ոստիկանու(թ)ե(ա)ն։
³Եւ մատուցին զընծայս իւրեանց առաջի տ(եառ)ն։ վե́ց սայլս զարդարեալս, եւ եզինս երկոտասանս. սայլ մի յերկուց իշխանաց, եւ զուարակ յիւրաքանչի́ւր ումեքէ. եւ ածի́ն առաջի խորանին։
⁴Խօսեցաւ տ(է)ր ընդ մովսիսի՝ եւ ասէ։

⁵ա́ռ զայդ ՛ի դոցանէ, եւ եղիցին ՛ի գործ սպասաւորու(թ)ե(ան) խորանին վկայու(թ)ե(ան). եւ տացե́ս զայդ ցղեւտացիսն, իւրաքանչիւր ը(ս)տ իւրո́ւմ սպասաւորու(թ)ե(ան)։
⁶Եւ առեալ մովսիսի զսայլսն եւ զեզինսն ե́տ ցղեւտացիսն։
⁷Սայլս երկուս եւ եզինս չորս՝ ե́տ ցորդիսն գեթսոնի ըստ սպասաւորու(թ)ե(ա)ն իւրեանց։
⁸Եւ սայլս չորս եւ եզինս ութ՝ ետ ցորդիսն մերարեայ ըստ սպասաւորու(թ)ե(ան) իւրեանց, ՛ի ձեռն իթամարայ որդւոյ ահարոնի քահանայի։
⁹Եւ ցորդիսն կահաթու ո́չինչ ետ. զի զսպասաւորու(թ)ի(ւն) սրբու(թ)ե(ան)ց սրբու(թ)ե(ան)ցն ունէին, եւ յուսս իւրեանց բառնային։

¹⁰Եւ մատուցին իշխանքն ՛ի նաւակատիս սեղանոյն, յաւուր յորում օծ զնա. եւ բերին իշխանքն զընծայս իւրեանց առաջի սեղանոյն։
¹¹Եւ ասէ տ(է)ր ցմովսէս. մի մի իշխան, մի մի օ́ր մատուսցեն զընծայս իւրեանց ՛ի նաւակատիս սեղանոյն։
¹²Եւ մատուցանէր զընծայս իւր յաւուրն առաջնում նաասոն որդի ամինադաբայ՝ իշխան ցեղին յուդայ,
¹³մատոյց զընծայսն իւր։ Կո́նք մի արծաթի՝ ՛ի հարիւր եւ յերեսուն կշռորդէ, տաշտ մի արծաթի՝ յեւթանասուն սկեղէ ըստ սրբութե(ան) սկեղն. երկոքին լի́ նաշհւով զանգելով ընդ իւղոյ ՛ի զոհ։
¹⁴Տուփ մի ոսկի ՛ի տասն դահեկանէ լի́ խնկով։
¹⁵զուարակ մի յանդւոյ, խոյ մի, գառն մի տարեւոր յողջակէզ,
¹⁶նոխազ մի յայծեաց վ(ա)ս(ն) մեղաց։

¹⁷եւ ՛ի զոհ փրկու(թ)ե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ նաասոնի որդւոյ ամինադաբայ։
¹⁸Եւ յաւուրն երկրորդի մատոյց նաթանայէլ որդի սովդարայ՝ իշխան ցեղին իսաքարայ.
¹⁹եւ մատոյց զընծայս իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի՝ յեւթնասուն սկեղէ ը(ս)տ սրբու(թ)ե(ան) սկեղն. երկոքեան լի հաշհւով զանգելով ը(ստ) իւղոյ ՛ի զոհ։
²⁰Տուփ մի ՛ի տասն դահեկանէ լի խնկով։
²¹զուարակ մի յանդւոյ, խոյ մի, գառն մի տարեւոր յաղջակէզ.
²²նոխազ մի յայծեաց վ(ա)ս(ն) մեղաց։
²³եւ ՛ի զոհ փրկու(թ)ե(ան) երինջս երկուս, խոյս հինգ,նոխազս հինգ, որոջս տարեւորս հինգ։ Ա́յս ընծայ նաթանայելի որդւոյ սովդարայ։

²⁴Եւ յաւուրն երրորդի, իշխան որդւոցն զաբուղոնի, եղիաբ որդի քելլոնի,
²⁵զընծայսն իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբութե(ան) սկեղն. երկոքին լի́ հաշհւով զանգելով ընդ իւղոյ ՛ի զոհ։
²⁶Տուփ մի ՛ի տասն դահեկանէ լի́ խնկով։
²⁷զուարակ մի յանդւոյ, խոյ մի, գառն մի տարեւոր յողջակէզ,
²⁸նոխազ մի յայծեաց վ(ա)ս(ն) մեղաց.
²⁹եւ ՛ի զոհ փրկու(թ)ե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ եղիաբու որդւոյ քելլոնի։
³⁰Եւ յաւուրն չորրորդի իշխան որդւոցն ռուբինի՝ եղիսուր որդի սեդիուրայ,

³¹զընծայս իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբու(թ)ե(ան) սկեղն. երկոքին լի́ նաշհւով զանգելով ընդ իւղոյ ՛ի զոհ։
³²Տուփ մի ՛ի տասն դահեկանէ լի́ խնկով։
³³զուարակ մի յանդւոյ, խոյ մի, գառն մի տարեւոր յողջակէզ,
³⁴եւ նոխազ մի յայծեաց վ(ա)ս(ն) մեղաց.
³⁵եւ ՛ի զոհ փրկու(թ)ե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Այս ընծայ եղիսուրայ որդւոյ սեդիուրայ։
³⁶Եւ յաւուրն հինգերորդի՝ իշխան որդւոցն շմաւոնի, սաղամիէլ՝ որդի սուրիսադայի,

³⁷զընծայս իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբու(թ)ե(ան) սկեղն. երկոքին լի հաշհւով զանգելոյ ընդ իւղոյ ՛ի զոհ։
³⁸Տուփ մի ՛ի տասն դահեկանէ լի́ խնկով։
³⁹զուարակ մի յանդւոյ, խոյ մի, գառն մի տարեւոր յողջակէզ.
⁴⁰եւ նոխազ մի յայծեաց վ(ա)ս(ն) մեղաց.
⁴¹եւ ՛ի զոհ փրկու(թ)ե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ սաղամիէլի որդւոյ սուրիսադայի։
⁴²Եւ յաւուրն վեցերորդի՝ իշխան որդւոցն գադայ, եղիսափան որդի ռագուելի

⁴³զընծայս իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբու(թ)ե(ան) սկեղն. երկոքին լի́ նաշհւով զանգելով ընդ իւղոյ։
⁴⁴Տուփ մի ՛ի տասն դահեկանէ լի́ խնկով.
⁴⁵զուարակ մի յանդւոյ, խոյ մի, գառն մի տարեւոր յողջակէզ,
⁴⁶եւ նոխազ մի յայծեաց վ(ա)ս(ն) մեղաց.
⁴⁷եւ ՛ի զոհ փրկութե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ եղիսափանայ որդւոյ ռագուելի։
⁴⁸Եւ յաւուրն եւթներորդի իշխան որդւոցն եփրեմի, եղիսամա որդի սեմիուդայ,

⁴⁹զընծայսն իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբու(թ)ե(ան) սկեղն. երկոքին լի́ նաշհւով զանգելով ընդ իւղոյ ՛ի զոհ։
⁵⁰Տուփ մի ՛ի տասն դահեկանէ լի́ խնկով.
⁵¹զուարակ մի յանդւոյ, խոյ մի, գառն մի տարեւոր յողջակէզ,
⁵²նոխազ մի յայծեաց վ(ա)ս(ն) մեղաց.
⁵³եւ ՛ի զոհ փրկութե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ՝ եղիսամայ որդւոյ սեմիուդայ։
⁵⁴Եւ յաւուրն ութերորդի՝ իշխան որդւոցն մանասէի, գամաղիէլ որդի փադասուրայ
⁵⁵զընծայսն իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբու(թ)ե(ան) սկեղն. երկոքին լի́ նաշհւով զանգելով ը(նդ) իւղոյ ՛ի զոհ։

⁵⁶Տուփ մի ՛ի տասն դահեկանէ լի խնկով.
⁵⁷զուարակ մի յանդւոյ, խոյ մի, գառն մի տարեւոր յողջակէզ,
⁵⁸եւ նոխազ մի յայծեաց վ(ա)ս(ն) մեղաց.
⁵⁹եւ ՛ի զոհ փրկու(թ)ե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ գամաղիէլի որդւոյ փադասուրայ։
⁶⁰Եւ յաւուրն իններորդի իշխան որդւոցն բենիամինի. աբիդան որդի գեթսոնի,
⁶¹զընծայս իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբու(թ)ե(ան) սկեղն. երկոքին լի նաշհւով զանգելով ընդ իւղոյ ՛ի զոհ։
⁶²Տուփ մի ՛ի տասն դահեկանէ լի խնկով.
⁶³զուարակ մի յանդւոյ, խոյ մի, գառն մի տարեւոր յողջակէզ,

⁶⁴եւ նոխազ մի յայծեաց վ(ա)ս(ն) մեղաց.
⁶⁵եւ ՛ի զոհ փրկու(թ)ե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ աբիդանայ որդւոյ գեթսոնի։
⁶⁶Եւ յաւուրն տասներորդի իշխան որդւոցն դանայ՝ աքիեզեր որդի ամիսադայի,
⁶⁷զընծայսն իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբու(թ)ե(ան) սկեղն. երկոքին լի նաշհւով զանգելով ընդ իւղոյ ՛ի զոհ։
⁶⁸Տուփ մի ՛ի տասն դահեկանէ լի խնկով.
⁶⁹զուարակ մի յանդւոյ, խոյ մի, գառն մի տարեւոր յողջակէզ,
⁷⁰եւ նոխազ մի յայծեաց վ(ա)ս(ն) մեղաց.

⁷¹եւ ՛ի զոհ փրկու(թ)ե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ աքիեզերայ՝ որդւոյ ամիսադայի։
⁷²Եւ յաւուրն մետասաներորդի իշխան որդւոցն ասերայ՝ փագիէլ որդի եքրանայ,
⁷³զընծայս իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբու(թ)ե(ան) սկեղն. երկոքին լի նաշհւով զանգելով ընդ իւղոյ ՛ի զոհ։
⁷⁴Տուփ մի ՛ի տասն դահեկանէ լի խնկով.
⁷⁵զուարակ մի յանդւոյ, խոյ մի, գառն մի տարեւոր յողջակէզ,
⁷⁶եւ նոխազ մի յայծեաց վ(ա)ս(ն) մեղաց.
⁷⁷եւ ՛ի զոհ փրկու(թ)ե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ փագիէլի որդւոյ եքրանայ։

⁷⁸Եւ յաւուրն երկոտասաներորդի՝ իշխան որդւոցն նեփթաղիմայ՝ աքիրան որդի էնանայ,
⁷⁹զընծայսն իւր։ Կոնք մի արծաթի ՛ի հարիւր եւ յերեսուն կշռորդէ. տաշտ մի արծաթի յեւթանասուն սկեղէ ըստ սրբու(թ)ե(ան) սկեղն. երկոքին լի նաշհւով զանգելով ընդ իւղոյ ՛ի զոհ։
⁸⁰Տուփ մի ՛ի տասն դահեկանէ լի խնկով.
⁸¹զուարակ մի յանդւոյ, խոյ մի, գառն մի տարեւոր յողջակէզ,
⁸²նոխազ մի յայծեաց վ(ա)ս(ն) մեղաց.
⁸³եւ ՛ի զոհ փրկու(թ)ե(ան) երինջս երկուս, խոյս հինգ, նոխազս հինգ, որոջս տարեւորս հինգ։ Ա́յս ընծայ աքիրանայ որդւոյ էնանայ։

⁸⁴Ա́յս է օրէն նաւակատեաց սեղանոյն յաւուրն յորում օծ զնա, յիշխանաց որդւոցն ի(սրաէ)լի։ Կոնք արծաթիք երկոտասան. տաշտք արծաթիք երկոտասան. տուփք երկոտասան.
⁸⁵՛ի հարիւր եւ յերեսուն սկեղէ կոնք մի. յեւթանասուն սկեղէ տաշտ մի։ Ամենայն արծաթ սպասուցն՝ երկու հազար եւ չորեքհարիւր սիկղ ըստ սրբութե(ան) սկեղն։
⁸⁶Տուփք ոսկիք երկոտասանք լի́ խնկով։ ա(մենայ)ն ոսկի տփոցն՝ հարիւր եւ քսան դահեկան։
⁸⁷Եւ ա(մենայ)ն արջառ յողջակէզ. զուարակք երկոտասանք. խոյք երկոտասանք. գառինք տարեւորք անարատք երկոտասան. եւ զոհք ն(ո)ց(ա) եւ նուէրք նոցին. եւ նոխազք յայծեաց վ(ա)ս(ն) մեղաց երկոտասանք.

⁸⁸եւ ա(մենայ)ն արջառք ՛ի զոհ ողջակիզին երկոտասանք. երինջք քսան եւ չորս, խոյք վաթսուն, նոխազք վաթսուն, որոջք տարեւորք անարատք վաթսուն։ Ա́յս են նաւակատիք սեղանոյն յետ կատարելոյ զձեռս ն(ո)ց(ա),
⁸⁹՛ի մտանելն մովսիսի ՛ի խորանն վկայու(թ)ե(ան) խօսել ընդ նմա։ Եւ լուան զբարբառն տ(եառ)ն ՛ի խօսելն ընդ նմա ՛ի վերուստ ՛ի քաւու(թեն)է անտի՝ ՛ի միջոյ երկուց քերոբէիցն որ էին ՛ի վ(ե)ր(այ) տապանակին վկայու(թ)ե(ան), ՛ի միջոյ երկուց քերովբէիցն, եւ խօսէր ընդ նմա։

¹Եւ խօսեցաւ տ(է)ր ընդ մովսիսի՝ եւ ասէ։
²խօսեա́ց ընդ ահարոնի եւ ասասցես ցնա։ Յորժամ դնիցես զճրագունսն ՛ի միոջէ կողմանէ երեսաց աշտանակին, լուցանիցին եւթանեքին ճրագարանքն։
³Եւ արա́ր այնպէս ահարոն։ ՛ի միոջէ կողմանէ հանդէպ աշտանակին էլո́յց զճրագարանս ն(ո)ր(ա). ո(ր)պ(էս) հրամայեաց տ(է)ր մովսիսի։
⁴Եւ ա́յս է կազմած աշտանակին։ ձո́յլ ոսկի բուն ն(ո)ր(ա). եւ շուշանք ն(ո)ր(ա) ձո́յլ համակ, ըստ օրինակին ո(ր)պ(էս) եցոյց տ(է)ր մովսիսի՝ ա́յնպէս արարին զաշտանակն։
⁵Խօսեցաւ տ(է)ր ընդ մովսիսի՝ եւ ասէ։
⁶ա́ռ դու զղեւտացիսն ՛ի միջոյ որդւոցն ի(սրաէ)լի եւ սրբեսցես զն(ո)ս(ա).

⁷եւ ա́յպէս արասցես ն(ո)ց(ա) զսրբութի(ւն)ն իւրեանց։ Ցանեսցես զնոքօք ջո́ւր սրբու(թ)ե(ան). եւ ածցի ածելի́ ՛ի վ(ե)ր(այ) ա(մենայ)ն մարմնոց ն(ո)ց(ա), եւ լուասցեն զձորձս իւրեանց, եւ սո́ւրբք եղիցին։
⁸Եւ առցես զուարակ մի յանդւոյ, եւ ըստ նմին զո́հ նաշիհ զանգեալ իւղով։ եւ առցես ո́րթ տարեւոր յանդւոյ վ(ա)ս(ն) մեղաց.
⁹եւ տարցիս զղեւտացիսն առաջի խորանին վկայութե(ան), եւ ժողովեսցե́ս զա(մենայ)ն ժողովուրդ որդւոց ի(սրաէ)լի.
¹⁰եւ մատուսցեն զղեւտացիսն առաջի տ(եառ)ն. եւ դիցեն որդիքն ի(սրաէ)լի զձեռս իւրեանց ՛ի վ(ե)ր(այ) ղեւտացւոցն։

¹¹Եւ զատուսցէ́ ահարոն զղեւտացիսն ՛ի հատուցումն առաջի տ(եառ)ն յորդւոցն ի(սրաէ)լի. եւ եղիցին գործել զգործ խորանին առաջի տ(եառ)ն։
¹²Եւ ղեւտացիքն դիցեն զձեռս իւրեանց ՛ի վ(ե)ր(այ) գլխոյ զուարակացն. եւ արասցես զմին վ(ա)ս(ն) մեղաց, եւ զմին յողջակէզ տ(եառ)ն քաւե́լ վ(ա)ս(ն) ն(ո)ց(ա)։
¹³եւ կացուսցես զղեւտացիսն առաջի տ(եառ)ն, եւ առաջի ահարոնի, եւ առաջի որդւոց ն(ո)ր(ա). եւ տացես զն(ո)ս(ա) հատուցո́ւմն առաջի տ(եառ)ն։
¹⁴եւ զատուսցես զղեւտացիսն ՛ի միջոյ որդւոցն իսրայէլի, եւ եղիցին ի́նձ։
¹⁵Եւ ապա́ մտցեն ղեւտացիքն գործե́լ զգործ խորանին վկայու(թ)ե(ան). եւ սրբեսցե́ս զն(ո)ս(ա), եւ տացե́ս զն(ո)ս(ա) հատուցումն առաջի տ(եառ)ն.

¹⁶զի հատուցո́ւմն հատուցեալ են նոքա ինձ ՛ի միջոյ որդւոցն ի(սրաէ)լի. փոխանակ ա(մենայ)ն անդրանկաց որ բանան զա(մենայ)ն արգանդ յորդւոցն ի(սրաէ)լի. առի զն(ո)ս(ա) Ի́նձ։
¹⁷Զի ի́մ է ա(մենայ)ն անդրանիկ որդւոցն ի(սրաէ)լի, ՛ի մարդոյ մինչեւ յանասուն. յաւուր յորում հարի զա(մենայ)ն անդրանիկ յերկրին եգիպտացւոց, եւ սրբեցի զն(ո)ս(ա) ինձ,
¹⁸եւ առի́ զղեւտացիսն փոխանակ ա(մենայ)ն անդրանկաց որդւոցն ի(սրաէ)լի։
¹⁹Եւ ետու զղեւտացիսն հատուցումն տուեալս՝ ահարոնի եւ որդւոց նորա ՛ի միջոյ որդւոցն ի(սրաէ)լի, գործել զգո́րծ որդւոցն ի(սրաէ)լի ՛ի խորանին վկայութե(ան). եւ քաւե́լ վ(ա)ս(ն) որդւոցն ի(սրաէ)լի մերձենալով ՛ի սրբու(թ)ի(ւն)սն։

²⁰Եւ արարի́ն մովսէս եւ ահարոն, եւ ա(մենայ)ն ժողովուրդ որդւոցն ի(սրաէ)լի ղեւտացւոցն՝ ո(ր)պ(էս) պատուիրեաց տ(է)ր մովսիսի վ(ա)ս(ն) ղեւտացւոցն, նո́յնպէս եւ արարին նոցա որդիքն ի(սրաէ)լի։
²¹Եւ սրբեցա́ն ղեւտացիքն, եւ լուացի́ն զհանդերձս, եւ ետուն զանձինս ահարոնի ՛ի հատուցումն առաջի տ(եառ)ն. եւ քաւեա́ց վ(ա)ս(ն) նոցա ահարոն սրբե́լ զն(ո)ս(ա)։
²²Եւ ապա́ մտին ղեւտացիքն պաշտել զպաշտօն իւրեանց ՛ի խորանին վկայու(թ)ե(ան), առաջի ահարոնի եւ առաջի որդւոց ն(ո)ր(ա). ո(ր)պ(էս) պատուիրեաց տ(է)ր մովսիսի վ(ա)ս(ն) ղեւտացւոցն. նո́յնպէս եւ արարին ն(ո)ց(ա)։
²³Եւ խօսեցաւ տ(է)ր ընդ մովսիսի՝ եւ ասէ։

²⁴Ա́յս ինչ է որ վ(ա)ս(ն) ղեւտացւոցն իցէ։ ՛ի քսան եւ հինգ ամենից եւ ՛ի վեր, մտցեն գործե́լ ՛ի խորանին վկայու(թ)ե(ան).
²⁵եւ ՛ի յիսնամենից ՛ի բա́ց կացցեն ՛ի պաշտամանէ անտի՝ եւ ո́չ եւս գործեսցեն.
²⁶եւ պաշտեսցէ եղբա́յր ն(ո)ր(ա) ՛ի խորանին վկայութե(ան)։ պահե́լ պահեսցէ զպահպանութի(ւն)ս, բայց գործ ինչ՝ մի́ գործեսցէ։ ա́յնպէս արասցես ղեւտացւոցն ՛ի պահպանութի(ւն)ս իւրեանց։

¹Խօսեցաւ տ(է)ր ընդ մովսիսի յանապատին սինայի, յամին երկրորդի ելանելոյ ն(ո)ց(ա) յեգիպտոսէ յամսեանն առաջնում՝ եւ ասէ։
²Ասա́ եւ արասցե́ն որդիքն ի(սրաէ)լի զզատիկն ՛ի ժամանակի իւրում.
³՛ի չորեքտասաներորդում աւուր ամսոյն առաջնոյ, արասցեն զայն ընդ երե́կս. ըստ ժամանակս. ըստ օրինի իւրում, ըստ պայմանի́ իւրում առնիցեն զնա։
⁴Եւ խօսեցաւ մովսէս ընդ որդիսն ի(սրաէ)լի առնե́լ զզատիկն,
⁵՛ի սկսանել չորեքտասաներորդի աւուր ամսոյն յանապատին սինայի, ո(ր)պ(էս) հրամայեաց տ(է)ր մովսիսի՝ ա́յնպէս արարին որդիքն ի(սրաէ)լի։
⁶Եւ եկին արք՝ որ ո́չ էին ս(ուր)բ ոգւով մարդոյ. եւ ո́չ կարէին առնել զզատիկն յաւուր յայնմիկ։

⁷եւ մատեա́ն առաջի մովսիսի եւ ահարոնի յաւուր յայնմիկ, եւ ասեն ցն(ո)ս(ա) արքն այնոքիկ. մեք անսո́ւրբք եմք յոգի մարդոյ. արդ՝ մի́ յետնեսցուք ՛ի մատուցանելոյ պատարագ տ(եառ)ն ՛ի ժամանակի իւրում ՛ի մէջ որդւոցն իսրայելի։
⁸Ասէ ցն(ո)ս(ա) մովսէս. կացէ́ք այդր, եւ լուայց՝ թէ զի՞նչ տացէ հրաման տ(է)ր վ(ա)ս(ն) ձեր։
⁹Եւ խօսեցաւ տ(է)ր ընդ մովսիսի եւ ասէ.
¹⁰խօսեա́ց ը(ստ) որդիսդ ի(սրաէ)լի՝ եւ ասասցես. Մա́րդ ոք մարդ՝ որ լինիցի անսուրբ յոգի մարդոյ. եւ կամ թէ ՛ի հեռի ճանապարհի ոք իցէ ՛ի ձէնջ յազգս ձեր. արասցէ զզատիկն տ(եառ)ն

¹¹յամսեա́նն երկրորդի. ՛ի չորեքտասաներորդում աւուր ընդ երեկս արասցէ́ զնա բաղարջով եւ եղեգո́վ կերիցէ զնա։
¹²եւ մի́ թողուցուն ինչ ՛ի նմանէ յայգ. եւ ոսկր մի́ բեկանիցեն ՛ի նմանէ. ըստ օրինի զատիկն արասցեն զնա։
¹³Եւ մարդ ոք՝ որ սո́ւրբ իցէ, եւ ՛ի հեռաւոր ճանապարհի ո́չ իցէ, եւ հեղգասցի́ առնել զզատիկն, սատակեսցի́ անձն այն ՛ի ժողովրդենէ իւրմէ։ զի զպատարագ տ(եառ)ն ո́չ մատոյց ՛ի ժամանակի իւրում. զմեղս իւր ընկալցի մարդն այն։
¹⁴Եւ եթէ յարեսցի ՛ի ձեզ եկ ոք յերկրին ձերում, եւ առնիցէ զզատիկն տ(եառ)ն, ըստ օրինակի́ զատկին՝ եւ ըստ պայմանի́ իւրում արասցէ զնա։ Օրէն՝ մի եւ նոյն կացցէ ձեզ, եկի́ն եւ բնակի երկրին։

¹⁵Եւ յաւուրն յորում կանգնեցաւ խորանն, ծածկեա́ց ամպ զխորանն եւ զտունն վկայութե(ան). եւ ընդ երեկս լինէր ՛ի խորանին իբրեւ զտեսի́լ հրոյ մինչեւ ցառաւօտ։
¹⁶Այնպէս լինէր հանապազ. ա́մպ ծածկէր զնա ՛ի տուէ, եւ տեսի́լ հրոյ ՛ի գիշերի։
¹⁷Եւ յորժամ վերանայր ամպն ՛ի խորանէ́ անտի, ապա́ չուէին որդիքն ի(սրաէ)լի. եւ ՛ի տեղւոջ յորում զտեղի́ առնոյր ամպն՝ ա́նդ բանակէին որդիքն ի(սրաէ)լի։
¹⁸Հրամանա́ւ տ(եառ)ն բանակէին որդիքն ի(սրաէ)լի, եւ հրամանաւ տ(եառ)ն չուէին։

¹⁹Զա(մենայ)ն աւուրս յորս հովանի́ ունիցի ամպն ՛ի վերայ խորանին, բանակեսցին որդիքն ի(սրաէ)լի. եւ յորժամ ձգիցի ամպն ՛ի վերայ խորանին աւուրս բազումս, պահեսցեն որդիքն ի(սրաէ)լի զպահպանութի(ւն) տ(եառ)ն՝ եւ մի́ չուեսցեն։
²⁰Եւ եղիցի յորժամ հովանութի(ւն) տ(եառ)ն՝ եւ մի́ չուեսցեն։
²¹Եւ եղիցի յորժամ հովանի́ ունիցի ամպն զաւուրս թուով ՛ի վերայ խորանին. ըստ բանի́ տ(եառ)ն բանակեսցեն, եւ ըստ բանի́ տ(եառ)ն չուեսցեն։
²²Եւ եղիցի յորժամ լինիցի ամպն յերեկորեայ մինչեւ ցառաւօտ, եւ եթէ վերանայցէ ամպն ընդ առաւօտն. չուեսցե́ն զցերեկ կամ զցայգ։ եւ եթէ ո́չ վերասցի ամպն՝ ո́չ չուեսցեն։

²³Եւ եթէ ամսօրեայ ժամանակ յաճախիցէ ամպն, եւ հովանի́ լիցի ՛ի վ(ե)ր(այ) ն(ո)ր(ա), բանակեսցեն որդիքն ի(սրաէ)լի՝ եւ մի́ չուեսցեն։
²⁴զի ըստ հրամանի́ տ(եառ)ն չուեսցեն, եւ զպահպանու(թ)ի(ւն)ս տ(եառ)ն պահեսցեն հրամանա́ւ տ(եառ)ն ՛ի ձեռն մովսիսի։

¹Խօսեցաւ տ(է)ր ընդ մովսիսի՝ եւ ասէ.
²արա́ դու քեզ երկուս փողս կռածոյս, արծաթի́ս աեասցես զն(ո)ս(ա). եւ եղիցին քեզ ա́չդ առնելոյ ժողովրդեանն, եւ չուելո́յ բանակացն։
³եւ հարկանիցեն փո́ղ նոքօք, եւ ժողովեսցի́ ա(մենայ)ն ժողովուրդն ՛ի դուռն խորանին վկայու(թ)ե(ան)։
⁴Եւ եթէ ՛ի միում հարկանիցեն փող՝ եկեսցեն առ քեզ իշխանքն զօրավարքն ի(սրաէ)լի։
⁵Եւ հարջի́ք փող ազդեցու(թ)ե(ան), եւ չուեսցեն բանակքն բանակեալք ընդ արեւելս։

⁶Եւ հարկանիցէք զերկրո́րդ փողն ազդեցութե(ան), եւ չուեսցեն բանակքն բանակեալք ընդ հարաւ։ Եւ հարկանիցէք զերրո́րդ փողն ազդեցութե(ան), եւ չուեսցեն բանակքն բանակեալք ընդ ծովակողմն։ Եւ հարկանիցէք զչորրո́րդ փողն ազդեցու(թ)ե(ան), եւ չուեսցեն բանակքն բանակեալք ընդ հիւսւսի։ ազդեցու(թ)ե(ա́ն) փող հարկանիցեն ՛ի չուելն իւրեանց։
⁷Եւ յորժամ ժողովիցէք զժողովուրդն՝ եւ հարկանիցէք փող՝ եւ ո́չ ազդեցութե(ան)։
⁸Եւ որդիքն ահարոնի քահանայք հարցեն փող, եւ եղիցի ձեզ օրէ́ն յաւիտենական յազգս ձեր։
⁹Եւ եթէ ելանիցէք ՛ի պատերազմ յերկրի ձերում, ընդդիմակացացն որ կայցեն ձեզ հակառակ, ազդեսջի́ք փողով եւ յիշատակեսջի́ք առաջի տ(եառ)ն. եւ ապրիցէք ՛ի թշնամեացն ձերոց։

¹⁰Եւ յաւուրս ուրախութե(ան) ձերոյ, եւ յամսագլո́ւխս ձեր հարկանիցէք փող. եւ ՛ի վ(ե)ր(այ) ողջակիզա́ցն, եւ ՛ի վ(ե)ր(այ) զոհիցն փրկութե(ան)ց ձերոց. եւ եղիցի ձեզ յիշատա́կ առաջի տ(եառ)ն ձերոյ. ե́ս եմ տ(է)ր ա(ստուա)ծ ձեր։
¹¹Եւ եղեւ յամին երկրորդի յամսեանն երկրորդի՝ որ օր քսա́ն էր ամսոյն՝ վերացա́ւ ամպն ՛ի խորանէն վկայութե(ան)։
¹²Եւ չուեցին որդիքն ի(սրաէ)լի հանդերձ աղխի́ւքն իւրեանց յանապատէն սինայի։ եւ եկաց ամպն յանապատին փառանու։
¹³եւ չուեցի́ն որդիքն ի(սրաէ)լի ըստ բանի տ(եառ)ն ՛ի ձեռն մովսիսի։
¹⁴Եւ չուեցին նախ գունդք բանակի որդւոցն յուդայ յառաջագոյն զօրուն իւրեանց. եւ ՛ի վ(ե)ր(այ) զօրացն ն(ո)ց(ա) նաասոն որդի ամինադաբայ։

¹⁵եւ ՛ի վ(ե)ր(այ) զօրաց որդւոցն իսաքարայ՝ նաթանայէլ որդի սովգովրայ։
¹⁶եւ ՛ի վ(ե)ր(այ) զօրու ցեղի որդւոցն զաբուղոնի՝ եղիաբ որդի քելլոնի։
¹⁷Եւ իջուցանէին զխորանն, եւ չուէին։ որդիքն գեթսոնի եւ որդիքն մերարեայ բառնային զխորանն։
¹⁸Եւ չուէին գունդք բանակի որդւոցն ռուբինի հանդերձ զօրուն իւրեանց. եւ ՛ի վ(ե)ր(այ) զօրու ն(ո)ց(ա) էղիսուր որդի սեդիուրայ.
¹⁹եւ ՛ի վերայ զօրու ցեղի որդւոցն շմաւոնի՝ սաղամիէլ որդի սուրիսադայի։
²⁰եւ ՛ի վ(ե)ր(այ) զօրու ցեղի որդւոցն գադայ էղիսափան որդի ռագուելի։
²¹Եւ չուեսցեն որդիքն կահաթու բարձեալ զսրբու(թ)ի(ւն)սն. եւ կանգնեսցեն զխորանն մինչեւ այլքն հասանիցեն։

²²Եւ չուեսցեն գունդք բանակին եփրեմայ հանդերձ զօրուն իւրեանց. եւ ՛ի վ(ե)ր(այ) զօրու ն(ո)ց(ա) եղիսամայ որդի սեմուդայի։
²³Եւ ՛ի վերայ զօրու ցեղի որդւոցն մանասէի գամաղիէղ որդի փադասուրայ։
²⁴եւ ՛ի վ(ե)ր(այ) ցեղի որդւոցն բենիամինի աբիդան որդի գեդէոնի։
²⁵Եւ չուեցին գունդք բանակի որդւոցն դանայ յետո́յ քան զամենայն բանակսն հանդերձ զօրուն իւրեանց. եւ ՛ի վ(ե)ր(այ) զօրու ն(ո)ց(ա) աքիեզեր որդի ամիսադայի։
²⁶եւ ՛ի վերայ ցեղի որդւոցն ասերայ փագեէլ որդի եքրանայ։
²⁷եւ ՛ի վ(ե)ր(այ) ցեղի որդւոցն նեփթաղիմայ աքիրան որդի ենանայ։
²⁸Ա́յս են զօրք որդւոցն ի(սրաէ)լի. եւ չուեցին հանդերձ զօրուն իւրեանց։

²⁹Եւ ասէ́ մովսէս ցյոբաբ որդի ռագուելի մադիանացի ցաներս մովսիսի։ ահա մեք չուեմք ՛ի տեղին զոր ասաց տ(է)ր տա́լ զնա մեզ. ե́կ ընդ մեզ, եւ բարի́ արասցուք քեզ. զի տ(է)ր խոստացաւ բարու(թ)ի(ւն)ս ի(սրաէ)լի։
³⁰Եւ նա ասէ՝ ո́չ երթայց անդր, այլ յերկիրն իմ եւ յա́զգն իմ գնացից։
³¹Եւ ասէ ցնա. մի́ թողուր զմեզ. քանզի էիր ընդ մեզ յանապատին. եւ եղիցես ընդ մեզ ծե́ր։
³²եւ եղիցի թէ երթայցես ը(ստ) մեզ, եւ լինիցին բարու(թ)ի(ւն)քն զոր ինչ արասցէ մեզ տ(է)ր բարի, արասցո́ւք եւ քեզ։
³³Եւ չուեցին ՛ի լեռնէ անտի տ(եառ)ն երեքօրեայ ճանապարհ. եւ տապանակ ուխտին տ(եառ)ն յառաջագո́յն քան զն(ո)ս(ա) երթայր երեքօրեա́յ ճանապարհաւ, դիտել նոցա հանգիստ։

³⁴Եւ ամպն հովանի́ ունէր ՛ի վերայ նոցա ՛ի տուէ ՛ի չուել նոցա ՛ի բանակէ անտի։
³⁵Եւ եղեւ ՛ի չուել տապանակին՝ ասէ́ մովսէս։ Արի́ տ(է)ր՝ եւ ցրուեսցին թշնամիք քո, փախիցե́ն ամենայն ատելիք քո։
³⁶Եւ ՛ի դադարելն ասէ։ Դարձի́ր տ(է)ր ՛ի հազարաւորս եւ ՛ի բիւրաւո́րս իսրայէլի։

¹Եւ ժողովուրդն տրտնջէ́ր չարաչա́ր առաջի տ(եառ)ն. եւ լուաւ տ(է)ր եւ բարկացաւ սրտմտութ(եամ)բ։ Եւ բորբոքեցաւ ՛ի նոսա հո́ւր ՛ի տ(թեն)է։. եւ եկե́ր զմասն ինչ բանակին։
²Եւ աղաղակեա́ց ժողովուրդն առ մովսէս, եւ յաղօթս եկաց մովսէս առ տ(է)ր. եւ դադարեա́ց հուրն։
³Եւ կոչեցաւ անուն տեղւո́յն այնորիկ հրայրեաց։ զի բորբոքեցաւ ՛ի նոսա́ հուրն ՛ի տ(թեն)է։
⁴Եւ խառնաղանճն որ էր ՛ի միջի ն(ո)ց(ա) ցանկացա́ն ցանկու(թ)ի(ւն). եւ նստեալ լային որդիքն ի(սրաէ)լի՝ եւ ասէին. Ո՞ տացէ մեզ մի́ս ուտելոյ.
⁵զի յիշեցաք զձո́ւկնն զոր ուտէաք յեգիպտոս ձրի́, եւ զսեխն, եւ զմեղրապոպ, եւ զպրասն, եւ զսոխն եւ զխստոր։

⁶եւ արդ՝ աւասիկ նքողեալ են անձինք մեր. եւ ո́չ ուրեք՝ բայց միայն ՛ի մանանայն են աչք մեր։
⁷Եւ մանանայն էր իբրեւ զսերմն գնձոյ սպիտակ. եւ տեսիլ ն(ո)ր(ա) իբրեւ զտեսի́լ սառին.
⁸եւ շրջէր ժողովուրդն եւ քաղէ́ին, եւ աղային յերկանի, եւ լեսուին յանգանի, եւ եփէին ՛ի պուտան, եւ առնէին նկա́նս. եւ էր քաղցրու(թ)ի(ւն) ն(ո)ր(ա) իբրեւ զխորիսխ իւղո́յ եւ մեղու։
⁹եւ յորժամ իջանէր ցօղ ՛ի բանակն զցայգ, իջանէ́ր եւ մանանայն ՛ի վ(ե)ր(այ) ն(ո)ր(ա)։
¹⁰Լուաւ մովսէս զլալիւն նոցա ըստ գնդի́ց իւրեանց, զիւրաքանչիւր առ դրա́ն վրանի իւրոյ։ եւ բարկացա́ւ սրտմտութ(եամ)բ տ(է)ր յոյժ։ եւ առաջի մովսիսի չա́ր թուեցաւ։

¹¹Եւ ասէ մովսէս ցտ(է)ր. ընդէ՞ր՝ տ(է)ր չարչարեցեր զծառայս քո, եւ հի՞մ ոչ գտի շնորհ առաջի քո, արկանե́լ զինեւ զբարկութի(ւն) ժողովրդեանս այսորիկ.
¹²միթէ ե՞ս յղացայ զա(մենայ)ն ժողովուրդս զայս, կամ թէ՝ ե՞ս ծնայ զսոսա. զի ասե́ս ցիս՝ թէ ա́ռ զդա ՛ի գո́գ քո, ո(ր)պ(էս) առնուցու դայեակ զստնդիաց, տանել յերկիրն զոր երդուար հարցն ն(ո)ց(ա)։
¹³Եւ արդ՝ ուստի՞ է ինձ միս՝ տալ ա(մենայ)ն ժողովրդեանս այսմիկ. զի լա́ն զինեւ եւ ասեն՝ տո́ւր մեզ միս զի կերիցուք։
¹⁴Ո́չ կարեմ ես միա́յն կրեր զժողովուրդս զայս. զի ծանրագո́յն քան զիս է բանդ։
¹⁵եթէ ա́յդպէս առնիցես ընդիս՝ սպա́ն իսկ զիս եթէ հաճո́յ իցէ քեզ. եթէ գտի շնորհս եւ ողորմութի(ւն) առ ՛ի քէն, զի մի́ տեսից զչարչարանս իմ։

¹⁶Եւ ասէ տ(է)ր ցմովսէս. ժողովեա́ ինձ եւթանասուն այր ՛ի ծերոցն ի(սրաէ)լի. զոր դո́ւ գիտես եթէ նոքա իցեն ծերագոյնք ժողովրդեանն, եւ ընտիրք ն(ո)ց(ա). եւ հանցե́ս զն(ո)ս(ա) ՛ի խորանն վկայութե(ան), եւ կացցեն անդ ընդ քեզ։
¹⁷Եւ իջի́ց անդր եւ խօսեցայց ընդ քեզ, եւ առի́ց ՛ի հոգւոյդ որ ՛ի քե́զ է եւ արկից զնոքօք. եւ բարձցե́ն ընդ քեզ զյանդգնու(թ)ի(ւն) ժողովրդեանդ այդորիկ. եւ ո́չ կրեսցես զդոսա դու միայն։
¹⁸Եւ ցժողովուրդն ասասցես. սրբեցարո́ւք առ վաղիւ՝ եւ կերիջիք միս. զի լացէք առաջի տ(եառ)ն՝ եւ ասացէք. ո́ ջամբրեսցէ մեզ միս. զի լա́ւ էր մեզ յեգիպտոս։ Եւ տացէ́ ձեզ տ(է)ր միս ուտելոյ, եւ կերիջի́ք միս։

¹⁹ո́չ զմի օր ուտիցէք, եւ ո́չ զերկուս. եւ ո́չ զհինգ օր, եւ ո́չ զտասն, եւ ո́չ զքսան օր։
²⁰այլ զամսօրեայ աւուրս ուտիցէք. մինչեւ ելանիցէ ընդ ռընգո́ւնս ձեր. եւ եղիցի ձեզ ՛ի դառնու(թ)ի(ւն). զի հեստեցէք տ(եառ)ն որ է ՛ի միջի ձերում, եւ լացէք առաջի նորա, եւ ասէիք՝ ընդէ՞ր է́ր մեզ ելանել յեգիպտոսէ։
²¹Եւ ասէ մովսէս. վեցհարիւր հազար հետեւակա́ց է ժողովուրդն՝ յորոց միջի եմ ես. եւ դու ասես մի՞ս տաց ն(ո)ց(ա), եւ կերիցեն ամսօրեա́յ ժամանակ։
²²միթէ արջա́ռ եւ ոչխար սպանանիցի՝ եւ բաւակա́ն լինիցի ն(ո)ց(ա)։ կամ թէ ա(մենայ)ն ձուկն ծովու ժողովիցի՝ եւ բաւակա́ն լինիցի նոցա։

²³Եւ ասէ տ(է)ր ցմովսէս. միթէ ձեռն տ(եառ)ն չիցէ՞ բաւական. ա́յժմ տեսանիցես եթէ հասանիցէ ՛ի վ(ե)ր(այ) քո բանս իմ՝ եթէ ոչ։
²⁴Եւ ե́լ մովսէս եւ խօսեցաւ ընդ ժողովրդեանն զպատգամս տ(եառ)ն. եւ ժողովեա́ց եւթանասուն այր ՛ի ծերոց ժողովրդեանն, եւ կացո́յց զն(ո)ս(ա) շուրջ զխորանաւն։
²⁵Եւ է́ջ տ(է)ր ամպով, եւ խօսեցաւ տ(է)ր ընդ մովսիսի. եւ ա́ռ ՛ի հոգւոյն որ ՛ի նմա, եւ արկ զեւթանասուն արամբքն զծերովք։ Եւ իբրեւ հանգեա́ւ հոգին ՛ի վ(ե)ր(այ) ն(ո)ց(ա), եւ մարգարէացա́ն ՛ի բանակին, եւ այլ ո́չ եւս յաւելին։
²⁶եւ մնացին երկո́ւ արք ՛ի բանակին. անուն միումն ելդադ, եւ անուն երկրորդին մովդադ, եւ հանգեա́ւ ՛ի վ(ե)ր(այ) ն(ո)ց(ա) հոգին. եւ նոքա էին ՛ի գրելոց անտի՝ եւ ո́չ եկին ՛ի խորանն,

²⁷եւ մարգարէացան ՛ի բանակին։ Եւ ընթացեալ պատանի մի՝ պատմեաց մովսիսի՝ եւ ասէ ցնա. ելդադն եւ մովդադն մարգարէացա́ն ՛ի բանակին։
²⁸Պատասխանի տուեալ յեսուսայ որդւոյ նաւեայ պաշտօնէին մովսիսի ընտրելոյ՝ եւ ասէ. տէ́ր մովսէս, արգե́լ զն(ո)ս(ա)։
²⁹եւ ասէ ցնա մովսէս. մի́ արկաներ դու ինձ նախանձուկս. եւ ո՞ տայր զա(մենայ)ն ժողովուրդս տ(եառ)ն մարգարէս. յորժամ տա́յր տ(է)ր զոգին իւր ՛ի վ(ե)ր(այ) ն(ո)ց(ա)։
³⁰եւ գնաց մովսէս ՛ի բանակն, ինքն եւ ծերքն ի(սրաէ)լի։
³¹Եւ ել հողմ ՛ի տ(թեն)է եւ խաղացոյց յա́յս կոյս զլորամարգին ՛ի ծովէն. եւ անկա́ւ զբանակաւն, աւուր գնաց աստի, եւ աւուր գնաց անտի́ շուրջ զբանակաւն, իբրեւ ցերկուս կանգունս յերկրէ։

³²Եւ յարուցեալ ժողովուրդն զտի́ւն ողջոյն, եւ զգիշերն ողջոյն. եւ զտիւն ողջոյն ՛ի վաղի́ւ անդր, ժողովեցին զլորամարգին. որ սակաւ ժողովեաց՝ տա́սն քոռ. եւ սպանին եւ ապխտեցին իւրեանց ապուխտս ապո́ւխտս շուրջ զբանակաւն։
³³Մինչդեռ միսն յատամունս ն(ո)ց(ա) էր՝ յառա́ջ քան զպակասելն, եւ տ(է)ր բարկացա́ւ ժողովրդեանն, եւ եհա́ր տ(է)ր զժողովուրդն հարուածս մեծամեծս յոյժ։
³⁴Եւ կոչեցաւ անուն տեղւոյն այնորիկ գերեզմանք ցանկութե(ան). զի ա́նդ թաղեցին զժողովուրդն ցանկացօղ։ Եւ ՛ի գերեզմանացն ցանկութե(ան) չուեա́ց ժողովուրդն յասերովթ։

¹Եւ բամբասեցին մարիամ եւ ահարոն զմովսէս վասն կնոջն եթեովպացւոյ՝ զոր ա́ռ մովսէս. զի կին եթեովպացի́ առ։
²եւ ասեն՝ թէ ընդ մովսիսի միա՞յն խօսեցաւ տ(է)ր. ոչ ապաքէն եւ ընդ մե՞զ խօսեցաւ։ եւ լուա́ւ տ(է)ր։
³Եւ այրն մովսէս հե́զ էր յոյժ քան զա(մենայ)ն մարդիկ՝ որ էին ՛ի վերայ երկրի։
⁴Եւ ասէ տ(է)ր նո́յնժամայն՝ ցմովսէս եւ ցահարոն եւ ցմարիամ. ելէ́ք դուք երեքին ՛ի խորանն վկայութե(ան)։ եւ ելի́ն երեքին ՛ի խորանն վկայութե(ան)։
⁵Եւ էջ տ(է)ր սեամբ ամպոյ, եւ եկաց առ դրան խորանին վկայութե(ան). եւ կոչեցան ահարոն եւ մարիամ։ եւ ելին երկոքեան։

⁶Եւ ասէ ցն(ո)ս(ա) տ(է)ր. լուարո́ւք բանից իմոց. եթէ լինիցի́ մարգարէ ՛ի ձէնջ տ(եառ)ն, տեսլեա́մբ երեւեցայց նմա, եւ երազով խօսեցա́յց ը(ստ) նմա։
⁷Ո́չ այնպէս ո(ր)պ(էս) ծառայն իմ մովսէս՝ որ յա(մենայ)ն տան իմում հաւատարի́մ է։
⁸բերան ՛ի բերան խօսեցայց ը(ստ) նմա, երեսօք եւ ո́չ առակօք. եւ զփառսն տ(եառ)ն ետես։ եւ ընդէ՞ր ոչ երկերուք բամբասել զծառայն իմ մովսէս։
⁹Եւ եղեւ բարկութի(ւն) սրտմտութե(ան) տ(եառ)ն ՛ի վ(ե)ր(այ) ն(ո)ց(ա)՝ եւ գնացին։
¹⁰եւ ամպն վերացաւ ՛ի խորանէ անտի։ եւ ահա մարիամ բորոտեալ էր իբրեւ զձիւն. եւ հայեցաւ ահարոն ը(ստ) մարիամ, եւ ահա՝ բորոտեալ էր։

¹¹Եւ ասէ ահարոն ցմովսէս. խնդրե́մ ՛ի քէն տ(է)ր, մի́ ածեր ՛ի վ(ե)ր(այ) մեր մեղս. զի անգիտացա́ք. եւ քանզի մեղաք՝
¹²մի́ լինիցի հանգոյն մահու, իբրեւ զվիժած որ ելանիցէ յարգանդէ մօր՝ եւ ուտիցէ զկէս մարմնոյ ն(ո)ր(ա)։
¹³Եւ աղաղակեաց մովսէս առ տ(է)ր՝ եւ ասէ. խնդրե́մ ՛ի քէն ա(ստուա)ծ, բժշկեա́ զնա։
¹⁴Եւ ասէ տ(է)ր ցմովսէս. եթէ հօր իւրոյ թքանելով թքեալէր ընդ երե́սս ն(ո)ր(ա)՝ չամաչէ՞ր զեւթն օր։ մեկնեսցի́ զեւթն օր արտաքոյ բանակին՝ եւ ապա́ մտցէ։
¹⁵Եւ զատուցաւ մարիամ արտաքո́յ բանակին զեւթն օր։ եւ ժողովուրդն ո́չ չուեաց՝ մինչեւ սրբեցաւ մարիամ։

¹Եւ ապա́ չուեաց ժողովուրդն յասերովթայ, եւ բանակեցաւ յանապատին փառանու։
²Խօսեցաւ տ(է)ր ընդ մովսիսի՝ եւ ասէ։
³Առաքեա́ արս՝ եւ լրտեսեսցեն զերկիրն քանանացւոց, զոր ե́ս տաց որդւոցն ի(սրաէ)լի ՛ի կալուածս. այր մի՝ ըստ ցեղի, ըստ տանց նահապետաց իւրեանց առաքեսցե́ս զն(ո)ս(ա)՝ զա(մենայ)ն գլխաւորս ՛ի նոցանէ։
⁴Եւ առաքեաց զն(ո)ս(ա) մովսէս յանապատէն փառանու՝ ըստ բանին տ(եառ)ն. ամենեքին ա́րք գլխաւորք էին նոքա յորդւոցն ի(սրաէ)լի։ Եւ այս են անուանք նոցա։
⁵Ցեղին ռուբինի, սաղամիէլ որդի աքուրայ։
⁶Ցեղին շմաւոնի, սափատ որդի սուրեայ։
⁷Ցեղին յուդայ, քաղէբ որդի յեփոնեայ։

⁸Ցեղին իսաքարայ, գաղամ որդի յովսեփայ։
⁹Ցեղին եփրեմայ, աւսէս որդի նաւեայ։
¹⁰Ցեղին բենիամինի, փաղտի որդի ռափուայ։
¹¹Ցեղին զաբուղոնի, յուդիէլ որդի սուդիայ։
¹²Ցեղին յովսեփայ՝ որդւոցն մանասէի, գադդէ որդի սուսայ։
¹³Ցեղին դանայ, ամիէլ որդի գամայի։
¹⁴Ցեղին ասերայ, սաթուր որդի միքայելի։
¹⁵Ցեղին նեփթաղիմայ, աբի որդի յաբիայ։
¹⁶Ցեղին գադայ, գուդիէլ որդի մակքեայ։
¹⁷Ա́յս անուանք են արանցն՝ զոր առաքեաց տ(է)ր լրտեսել զերկիրն քանանացւոց. եւ անուանեաց մովսէս զանուն աւսեայ որդւոյ նաւեայ՝ Յեսու։

¹⁸Եւ առաքեաց զնոսա մովսէս յանապատէն փառանու լրտեսե́լ զերկիրն քանանացւոց։ եւ ասէ ցն(ո)ս(ա). ելէ́ք ընդ անապատդ, եւ ամբարձա́յք ՛ի լեառնն,
¹⁹եւ տեսջիք զերկիրն զի՞նչ իցէ. եւ զժողովուրդն որ նստի ՛ի նմա, եթէ զօրաւորագո՞յն իցէ՝ թէ անաւագ, եթէ սակա՞ւք իցեն՝ եթէ բազումք։
²⁰Եւ զի՞նչ իցէ երկիրն յորում նոքա բնակեալ իցեն, եթէ բարի՞ իցէ՝ եթէ չար. եւ զի՞նչ իցեն քաղաքքն յորս նոքա բնակեալ են. պարսպաւո՞րք են՝ եթէ անպարիսպք։
²¹եւ զի՞նչ իցէ երկիրն, պարա́րտ իցէ՝ եթէ տկար. եթէ իցէ՞ ՛ի նմա ծաւատունկ՝ եթէ ոչ։ եւ ժրասջի́ք ՛ի պտղոյ երկրին։ Եւ աւուրք գարնայնո́յ էին աւուրքն խայծուածոյ խաղողոյ։

²²Եւ ելեալ լրտեսեցին զերկիրն յանապատէն սինայ մինչեւ ցրոոբ ՛ի մուտս եփրաթայ։
²³ելին ը(ստ) անապատն՝ եւ եկին մինչեւ ցքեբրոն։ եւ ա́նդ աքիման, եւ սէսի, եւ թաղամի, եւ ա́զգքն ենակայ։ եւ քեբրոն եւթն ամաւ յառաջագոյն շինեալ էր քան զտայանիս եգիպտացւոց։
²⁴եւ եկին մինչեւ ցձորն ողկուզոյ, եւ լրտեսեցին զնա. եւ հատի́ն անտի ո́ւռ որթոյ, եւ ողկոյզ մի խաղողոյ ՛ի նմա, եւ բարձին զնա լծակօք՝ եւ ՛ի նռանէ́ եւ ՛ի թզոյ։
²⁵եւ անուանեցին զանուն տեղւոյն՝ ձո́ր ողկուզոյ. վ(ա)ս(ն) ողկուզին զոր հատին անտի որդիքն ի(սրաէ)լի։
²⁶Եւ դարձան անդրէն որդիքն ի(սրաէ)լի լրտեսեալ զերկիրն յե́տ աւուրց քառասնից.

²⁷եւ եկեալ հասին առ մովսէս եւ առ ահարոն, եւ առ ա(մենայ)ն ժողովուրդ որդւոցն ի(սրաէ)լի յանապատն փարան կադէս. եւ ետուն նոցա զրոյց եւ ա(մենայ)ն ժողովրդեանն։ Եւ ցուցին զպտուղ երկրին,
²⁸եւ պատմեցին ն(ո)ց(ա), եւ ասեն ցնա. չոգա́ք յերկիր յոր առաքեցեր զմեզ, երկիր՝ որ բղխէ զկաթն եւ զմեղր. եւ ա́յս է պտուղ ն(ո)ր(ա)։
²⁹Բայց ազգն սաստի́կ էր որ բնակեալէին ՛ի նմա. եւ քաղաքք ամուրք եւ պարսպաւորք եւ մեծամե́ծք յոյժ։ եւ զազգն ենակայ տեսա́ք անդ։
³⁰Եւ ամաղէկ բնակեալ էր յերկրին ընդ հարաւակողմն. եւ քետացին եւ խեւացին եւ յեբուսացին եւ ամովրհացին բնակեալ էին առ լերամբքն, եւ քանանացին՝ առ ծովեզերբն եւ առ յորդանանու։

³¹Լռեցո́յց քաղէբ զժողովուրդն ՛ի մովսիսէ, եւ ասէ ցն(ո)ս(ա). ո́չ այդպէս է. այլ ելանելով ելցուք եւ ժառանգեսցուք զնա. զի կարօղ եմք յաղթել ն(ո)ց(ա)։
³²Եւ արքն որ ընդ նմա երթեալ էին՝ ասէին. ո́չ ելցուք, քանզի ո́չ կարեմք երթալ ՛ի վ(ե)ր(այ) ազգին, զի զօրագոյն քան զմեզ է յոյժ։
³³Եւ զարհուրեցուցին երկրաւն զոր լրետեսցին՝ զորդիսն ի(սրաէ)լի՝ եւ ասեն. ը(ստ) երկիրն ընդ որ մե́ք անցաք լրտեսել զնա, երկիր՝ մարդածա́խ է բնակչաց իւրոց. եւ զա(մենայ)ն զազգն զոր տեսաք ՛ի նմա՝ արք յաղթահասակք են։
³⁴տեսաք անդ՝ եւ սկա́յս, եւ էաք յաչս նոցա իբրեւ մարախ։

¹Եւ ձայն բարձին ա(մենայ)ն ժողովուրդն, եւ ելա́ց ազգն զգիշերն զայն ողջոյն.
²եւ տրտնջեա́ց ժողովուրդն զմովսիսէ եւ զահարոնէ ա(մենայ)ն որդւովքն ի(սրաէ)լի։ Եւ ասէ ցն(ո)ս(ա) ա(մենայ)ն ժողովուրդն. լա́ւ էր եթէ մեռեալ էաք յերկրին եգիպտացւոց. կամ թէ աստէն յանապատի́ աստ իսկ մեռանէաք.
³եւ ընդէ՞ր տանիցի զմեզ տ(է)ր յերկիրն յայն անկանել մեզ պատերազմաւ. եւ կանայք մեր եւ որդիք մեր լինիցին ՛ի յափշտակութի(ւն). եւ արդ լա́ւ իցէ մեզ դառնալ անդրէն յեգիպտոս։
⁴Եւ ասէ այր ցընկեր. արասցո́ւք զօրավար, եւ դարձցո́ւք յեգիպտոս։
⁵Եւ անկան մովսէս եւ ահարոն ՛ի վ(ե)ր(այ) երեսաց իւրեանց առաջի ա(մենայ)ն որդւոցն ի(սրաէ)լի։

⁶Բայց յեսու որդի նաւեայ, եւ քաղէբ որդի յեփոնեայ ՛ի լրտեսաց երկրին՝ պատառեցին զհանդերձս իւրեանց,
⁷եւ խօսեցան ը(ստ) ա(մենայ)ն ժողովրդեան որդւոցն ի(սրաէ)լի՝ եւ ասեն։ Երկիր զոր մեք լրտեսեցաք՝ երկիր բարի́ է յոյժ.
⁸եթէ հաճեսցի́ միայն ընդ մեզ ա(ստուա)ծ, եւ տարցի յերկիրն յայն, եւ տացէ զնա մեզ. երկիր է՝ որ բղխէ զկա́թն եւ զմեղր։
⁹բայց ՛ի տ(թեն)է միայն ապստամբք մի́ լինիցիք, եւ ՛ի ժողովրդենէ երկրին մի́ երկնչիջիք. քանզի կերակո́ւր մեր են։ Զի մեկնեցաւ ՛ի նոցանէ տ(է)ր եւ ը(ստ) մե́զ է տ(է)ր. մի́ զանգիտիցէք ՛ի նոցանէ։

¹⁰Եւ ասաց ա(մենայ)ն ժողովուրդն քարկոծե́լ զն(ո)ս(ա) քարամբք։ եւ փառք տ(եառ)ն երեւեցան ամպով ՛ի վ(ե)ր(այ) խորանին վկայու(թ)ե(ան) յանդիման ա(մենայ)ն որդւոցն ի(սրաէ)լի։
¹¹Եւ ասէ տ(է)ր ցմովսէս, մինչեւ յե՞րբ բարկացուցանէ զիս ժողովուրդդ. եւ մինչեւ յե՞րբ ոչ հաւատան ինձ ա(մենայ)ն նշանօք զոր արարի ՛ի մէջ ն(ո)ց(ա)։
¹²թո́յլ տուր ինձ՝ եւ հարի́ց զդոսա մահուամբ, եւ կորուսի́ց զդոսա. եւ զքեզ եւ զտո́ւն հօր քոյ արարից յա́զգ մեծ եւ ՛ի բազում քան զայդ։
¹³Եւ ասէ մովսէս ցտ(է)ր. իսկ արդ՝ լսիցեն եգիպտացիքն՝ եթէ դու հաներ զօրու(թեամ)բ քո մեծաւ զժողովուրդս զայս ՛ի նոցանէ։

¹⁴այլ եւ ա(մենայ)ն բնակիչք երկրիս այսորիկ լսիցեն՝ թէ դո́ւ տ(է)ր ՛ի ժողովրդեանս յայսմիկ ես՝ որ դէ́մ յանդիման երեւիս դու տ(է)ր. եւ ամպ քո կա́յ ՛ի վ(ե)ր(այ) դոցա. եւ սեամբ ամպոյ երթա́ս դու առաջի դոցա ՛ի տուէ, եւ սեամբ հրոյ ՛ի գիշերի
¹⁵եւ սատակիցես զժողովուրդս քո զայս՝ իբրեւ զա́յր մի. Եւ խօսեսցին ազգքն որ լուան զանուանէ քումմէ, եւ ասիցեն.
¹⁶վ(ա)ս(ն) զի ո́չ կարէր տանել տ(է)ր զժողովուրդն զայն՝ յերկիրն զոր երդուաւ ն(ո)ց(ա), արկ զնոսա տապա́ստ յանապատի անդ։
¹⁷Եւ արդ բարձրասցի́ ձեռն քո տ(է)ր, որպէս խօսեցար եւ ասացեր։

¹⁸թէ տ(է)ր երկայնամիտ է եւ բազում ողորմ եւ ճշմարիտ, բառնայ զանօրէնութի(ւն)ս եւ զանիրաւու(թ)ի(ւն)ս եւ զմեղս, եւ սրբելով ո́չ սրբէ զպարտաւորն. հասուցանել զմեղս հարանց յորդիս մինչեւ յերիս եւ ՛ի չորս ազգս։
¹⁹Թո́ղ զմեղս ժողովրդեան քոյ, ըստ մեծի ողորմութե(ան) քում. որպէս ներեցեր դոցա յեգիպտոսէ մինչեւ ցա́յժմ։
²⁰Եւ ասէ տ(է)ր ցմովսէս. ներեցի́ց դոցա ըստ բանի քում.
²¹բայց կենդանի́ եմ ես, եւ կենդանի́ է անուն իմ. եւ լցցեն փառք տ(եառ)ն զա(մենայ)ն երկիր։
²²Զի ա(մենայ)ն արք որ տեսին զփառսն իմ, եւ զնշանս զոր արարի ես յեգիպտոս եւ յանապատիս յայսմիկ, եւ փորձեցին զիս՝ այս տասն անգամ, եւ ո́չ լուան ձայնի իմում։

²³թէ տեսանիցեն զերկիրն զոր երդուայ հարցն ն(ո)ց(ա). այլ որդիք ն(ո)ց(ա) որ են ա́ստ ընդիս՝ որ ո́չ գիտեն զչար կամ զբարի, ա(մենայ)ն մանուկ տխմար՝ նոցա́ տաց երկիրն. եւ ամենեքին որ բարկացուցին զիս՝ ո́չ տեսցեն զնա։
²⁴Բայց քաղէբ ծառա́յ իմ յորում եղեւ հոգի ա́յլ, եւ եկն զհետ իմ. տարա́յց զնա յերկիրն՝ յոր եմուտ. եւ զաւա́կ ն(ո)ր(ա) ժառանգեսցէ զնա։
²⁵Եւ ամաղէկ եւ քանանացին բնակեալ են ՛ի ձորն։ բայց դուք վաղիւ դարձարո́ւք եւ չուեցէ́ք յանապատէն ընդ ճանապարհ կարմիր ծովուն։
²⁶Խօսեցաւ տ(է)ր ընդ մովսիսի եւ ընդ ահարոնի՝ եւ ասէ.
²⁷մինչեւ յե՞րբ զժողովուրդդ զայդ զչա́ր կրիցեմ. եւ դոքա տրտնջե́ն առաջի իմ։ Զտրտունջ որդւոցն ի(սրաէ)լի որ տրտնջեն զձէնջ՝ լուա́յ։

²⁸արդ՝ ասասցես ցն(ո)ս(ա). կենդանի́ եմ ես ասէ տ(է)ր, եթէ ո́չ ո(ր)պ(էս) խօսեցայք յականջս իմ, նո́յնպէս արարից ձեզ։
²⁹յանապատի́ս յայսմիկ անկցին ոսկերք ձեր, եւ ա(մենայ)ն հանդէս ձեր, եւ մտեալքն ՛ի ձէնջ ՛ի համար՝ ՛ի քսանամենից եւ ՛ի վեր որ տրտնջեցին զինէն։
³⁰թէ́ մտցեն յերկիրն՝ յոր համբարձի զձեռն իմ բնակեցուցանել զձեզ ՛ի նմա. բայց քաղէբ՝ որդի յեփոնեայ, եւ յեսու նաւեան։
³¹Եւ զորդիսն զորմէ ասացէք թէ ՛ի յափշտակութի(ւն) լինիցին, տարա́յց զն(ո)ս(ա) յերկիրն. եւ ժառանգեսցե́ն զնա, յորմէ դո́ւքն յափրացարուք։
³²եւ ոսկերք ձեր անկցին աստէ́ն յանապատիս.

³³եւ որդիք ձեր ճարակեսցի́ն յանապատի աստ՝ ա́մս քառասուն, եւ բարձցե́ն զպոռնկութի(ւն) ձեր, մինչեւ մաշեսցի́ն ոսկերք ձեր յանապատի աստ։
³⁴ըստ թուոյ աւուրցն քառասնից. օ́ր ը(ստ) տարւոյ ընդունիցիք զմեղս ձեր զքառասուն ամ, եւ ծանիջի́ք զսրտմտութի(ւն) բարկութե(ան) իմոյ։
³⁵Ե́ս տ(է)ր խօսեցայ. եթէ ո՞չ արարից ժողովրդեանդ այդմիկ չարի յարուցելոյ ՛ի վ(ե)ր(այ) իմ. յանապատի́ աստ ծախիցին, եւ աստէն մառանիցին։
³⁶Եւ արքն զորս առաքեաց մովսէս լրտեսել զերկիրն, եւ եկեալ բամբասեցին զնմանէ առ ժողովրդեանն, հանել համբա́ւ չար զերկրէն.
³⁷մեռա́ն արքն այնոքիկ՝ որ հանին համբաւ չա́ր զերկրէն, չարաչա́ր հարուածովք առաջի տ(եառ)ն։

³⁸Եւ յեսու որդի նաւեայ՝ եւ քաղէբ որդի յեփոնեայ միա́յն ապրեցան յարանցն յայնցանէ որ երթեալ էին լրտեսել զերկիրն։
³⁹Եւ խօսեցա́ւ մովսէս զպատգամս զայս առ ա(մենայ)ն որդիսն ի(սրաէ)լի, եւ սո́ւգ առ ժողովուրդն յոյժ.
⁴⁰եւ կանխեալ ընդ առաւօտն ելի́ն ՛ի գլուխ լերինն. եւ ասեն, ահաւասիկ կամք մեք՝ ելցո́ւք ՛ի տեղին զոր ասաց տ(է)ր՝ զի մեղաք։
⁴¹Եւ ասէ մովսէս. ընդէ՞ր անցէք զբանիւ տ(եառ)ն՝ եւ ո́չ աջողեսցի ձեզ.
⁴²մի́ ելանէք՝ զի ո́չ է տ(է)ր ընդ ձեզ, եւ անկանիցի́ք առաջի թշնամեաց ձերոց.
⁴³զի ամաղէկ եւ քանանացին ե́ն անդ առաջի ձեր, եւ անկանիցիք սրով. փոխանակ զի դարձայք յետս եւ հեստեցէք տ(եառ)ն, եւ ո́չ լինիցի տ(է)ր ընդ ձեզ։

⁴⁴Եւ անսաստեալ ելին ՛ի գլուխ լերինն. բայց տապանակ կտակարանացն տ(եառ)ն՝ եւ մովսէս ո́չ շարժեցան ՛ի բանակէ անտի։
⁴⁵Էջ ամաղէկ եւ քանանացին՝ որ բնակեալ էր ՛ի լերինն. եւ հարին զն(ո)ս(ա), եւ կոտորեցին զնոսա մինչեւ ցհերմա եւ դարձան անդրէն ՛ի բանակն։

¹Խօսեցաւ տ(է)ր ընդ մովսիսի՝ եւ ասէ.
²խօսեա́ց ը(ստ) որդիսդ ի(սրաէ)լի՝ եւասասցե́ս ցդոսա։ Յորժամ մտանիցէք յերկրին բնակութե(ան) ձերոյ զոր ե́ս տաց ձեզ.
³եւ առնիցէք ողջակէզ տ(եառ)ն՝ եւ ողջ ընծայ ՛ի զոհ, մեծացուցանել զուխտն կամ զկամաւն, կամ ՛ի տօնս ձեր առնել հո́տ անուշից տ(եառ)ն, եթէ յարջառո́յ եւ եթէ ՛ի հօտից։
⁴Եւ բերցէ որ մատուցանիցէ զպատարագն իւր տ(եառ)ն, զոհ նաշհւոյ զտասանորդ գրուին՝ զանգեալ իւղով չորրորդաւ դորակին.
⁵եւ գինի ՛ի նուէր զչորրո́րդ դորակին առնիցէք, ըստ զոհին կամ ըստ ողջակիզին, առ գա́ռն մի ա́յնչափ առնիցես ընծայ ՛ի հոտ անուշից տ(եառ)ն։

⁶Եւ խոյին՝ յորժամ առնիցես զնա յողջակէզ կամ ՛ի զոհ, արասցե́ս զզոհ նաշհւոյն, երկո́ւս տասանորդս զանգեալ իւղով երկրորդի́ւ դորակին.
⁷եւ գինի ՛ի նուէր զերկրորդ դորակին մատուցանիցէք ՛ի հո́տ անուշից տ(եառ)ն։
⁸Ապա թէ յարջառո́ց առնիցէք յողջակէզ կամ ՛ի զոհ, մեծացուցանել զո́ւխտն ՛ի փրկու(թ)ի(ւն) տ(եառ)ն,
⁹մատուսցէ ըստ զուարակին զո́հ նաշհւոյ՝ երիս տասանորդս զանգեալ իւղով կիսո́վ դորակին.
¹⁰եւ գինի ՛ի նուէր՝ կէ́ս դորակին, ընծայ ՛ի հո́տ անուշից տ(եառ)ն։
¹¹Ա́յնպէս առնիցես
¹²միւոմ զուարակին, կամ միո́ւմ խոյին, կամ միո́ւմ գառինն, յօգեաց կամ յայծեաց ը(ս)տ թուոյ ն(ո)ց(ա), ո(ր)պ(էս) զինչ առնիցէք՝ նո́յնպէս արասջիք միումն ըստ իւրաքանչիւր թուոց ն(ո)ց(ա).

¹³ա(մենայ)ն բնա́կն նո́յնպէս արասցէ. նոյնպիսի ընծա́յս մատուցանել ՛ի հոտ անուշից տ(եառ)ն։ Եւ եթէ եկ ոք յարեսցի ՛ի ձեզ յերկրին ձերում, որ լինիցի առ ձեզ յազգս ձեր, արասցէ ընծայ ՛ի հոտ անուշից տ(եառ)ն։
¹⁴Ո(ր)պ(էս) դուքն առնիցէք՝ նո́յնպէս առնիցէ եւ եկն, եւ ժողովուրդն տ(եառ)ն։
¹⁵օրէն մի եւ նո́յն կացցէ ձե́ր եւ եկացն՝ որ յարիցին ՛ի ձեզ. օրէն յաւիտենական յազգս ձեր. ո(ր)պ(էս) եւ դուքն իցէք, եւ ե́կն լինիցի առաջի տ(եառ)ն. օրէն մի եւ նո́յն կացցէ, եւ իրաւունք մի եւ նո́յն լինիցին՝ ձե́ր եւ եկին որ յեցեալ իցէ ՛ի ձեզ։
¹⁶Խօսեցաւ տ(է)ր ընդ մովսիսի՝ եւ ասէ.
¹⁷խօսեա́ց ընդ որդիսդ ի(սրաէ)լի՝ եւ ասասցես ցդոսա։
¹⁸՛Ի մտանել ձեր յերկիրն յոր ե́ս տարայց զձեր,

¹⁹եւ եղիցի յորժամ ուտիցէք դուք ՛ի հացէ երկրին, առջիք հա́ս ՛ի նուէր տ(եառ)ն զառաջին զանդուածոյ ձերոյ.
²⁰եւ տարջի́ք զհա́ց հասին տ(եառ)ն, զատուսջի́ք զայն տ(եառ)ն որպէս զհա́սն ՛ի կալոյ.
²¹նո́յնպէս եւ զայն զատուցանիցէք զառաջին զանգուածոյն ձերոյ. եւ տաջիք տ(եառ)ն հա́ս յազգս ձեր։
²²Իսկ յորժամ յանցանիցէք, եւ ո́չ առնիցէք զա(մենայ)ն զպատուիրանս զայսոսիկ՝ զոր խօսեցաւ տ(է)ր ընդ մովսիսի.
²³ո(ր)պ(էս) հրաման ետ ձեզ տ(է)ր ՛ի ձեռն մովսիսի, յօրէ յորմէ հրամա́ն ետ ձեզ տ(է)ր եւ յառ յապա́ ժամանակս յա́զգս ձեր։

²⁴Եւ եղիցի եթէ յաչաց ժողովրդեանն վրիպիցի́ ակամայ ինչ, արասցէ ժողովուրդն զուարակ մի յանդւոյ անարատ յողջակէզ ՛ի հո́տ անուշից տ(եառ)ն. եւ զո́հ ըստ նմին, եւ նուէ́ր ը(ս)տ նմին պայմանի, եւ նոխազ մի յայծեաց վ(ա)ս(ն) մեղաց։
²⁵եւ քաւեսցէ́ քահանայն վ(ա)ս(ն) ա(մենայ)ն ժողովրդեան որդւոցն ի(սրաէ)լի. եւ թողցի́ ն(ո)ց(ա)՝ զի ակամայ է։ Եւ նոքա մատուսցեն զպատարա́գն իւրեանց ընծա́յ տ(եառ)ն. վ(ա)ս(ն) մեղաց իւրեանց առաջի տ(եառ)ն յաղագս ակամայիցն իւրեանց։
²⁶եւ թողցի́ ա(մենայ)ն ժողովրդեան որդւոցն ի(սրաէ)լի. եւ եկի́ն յեցելոյ ՛ի ձեզ. զի ամենա́յն ժողովրդեանն է ակամայն։

²⁷Եւ եթէ մի́ անձն մեղիցէ ակամայ, մատուսցէ ալո́ջ մի տարեւոր վ(ա)ս(ն) մեղաց.
²⁸եւ քաւեսցէ́ քահանայն ՛ի վ(ե)ր(այ) անձին ակամայեցելոյ, եւ մեղուցելոյ առաջի տ(եառ)ն ակամայ, քաւե́լ վ(ա)ս(ն) ն(ո)ր(ա)։
²⁹բնակին որդւոցն ի(սրաէ)լի, եւ եկի́ն յեցելոյ ՛ի ն(ո)ս(ա), օրէն մի եւ նոյն կացցէ որ ինչ առնիցէ́ ոք ակամայ։
³⁰Եւ անձն՝ որ առնիցէ ձեռամբ հպարտութի(ւն) ՛ի բնակաց կամ յեկաց, բարկացոյց նա զա(ստուա)ծ. սատակեսցի́ անձնն այն ՛ի ժողովրդենէ իւրմէ։
³¹զի զբանն տ(եառ)ն խոտեաց, եւ զպատուիրանս ն(ո)ր(ա) ցրեաց. ջնջելո́վ ջնջեսցի անձն այն ՛ի ժողովրդենէ իւրմէ՝ զի մեղք ն(ո)ր(ա) ՛ի նմա́ են։

³²Եւ էին որդիքն ի(սրաէ)լի յանապատի անդ. եւ գտին ա́յր մի որ քաղէր փա́յտ յաւուր շաբաթու։
³³Եւ մատուցին զնա որք գտինն զի քաղէր փա́յտ յաւուր շաբաթու՝ առ մովսէս եւ ահարոն, եւ առ ա(մենայ)ն ժողովուրդ որդւոցն ի(սրաէ)լի։
³⁴եւ ետուն զնա ՛ի պահ. զի ո́չ ընտրեցին թէ զի՞նչ առնիցեն նմա։
³⁵Եւ խօսեցաւ տ(է)ր ը(ստ) մովսիսի՝ եւ ասէ. մահո́ւ մեռցի այրն, քարա́մբք քարկոծեսցեն զնա ա(մենայ)ն ժողովուրդն։
³⁶Եւ հանին զնա ա(մենայ)ն ժողովուրդն արտաքոյ բանակին. եւ քարկոծեցի́ն զնա ա(մենայ)ն ժողովուրդն արտաքոյ բանակին՝ որպէս հրամայեաց տ(է)ր մովսիսի։
³⁷Խօսեցաւ տ(է)ր ընդ մովսիսի՝ եւ ասէ.

³⁸խօսեա́ց ընդ որդիսն ի(սրաէ)լի՝ եւ ասասցե́ս ցն(ո)ս(ա), զի արասցեն իւրեանց ծո́պս ՛ի տրտունս հանդերձից իւրեանց յա́զգս իւրեանց. եւ դնիցէք ՛ի վ(ե)ր(այ) ծոպից տըտնոցն ասղանի́ կապուտակ։
³⁹Եւ լինիցի այն ձեզ ՛ի ծո́պսն, եւ տեսանիցէ́ք զայն, եւ յիշիցէք զա(մենայ)ն զպատուիրանս տ(եառ)ն առնե́լ զն(ո)ս(ա). եւ ո́չ խոտորիցիք զկնի մտաց եւ աչաց ձերոց, որով դո́ւքն պոռնկիք զկնի ն(ո)ց(ա)։
⁴⁰Զի յիշիցէք եւ առնիցէ́ք զա(մենայ)ն զպատուիրանս իմ. եւ եղիջիք սո́ւրբք ա(ստուծո)յ ձերում.
⁴¹զի ե́ս եմ տ(է)ր ա(ստուա)ծ ձեր՝ որ հանի զձեզ յերկրէն եգիպտացւոց լինե́լ ձեզ ա(ստուա)ծ. ե́ս եմ տ(է)ր ա(ստուա)ծ ձեր։

¹Եւ խօսեցա́ւ կորխ՝ որդի սահառայ որդւո́յ կահաթու որդւոյ ղեւեայ. եւ Դաթան եւ աբիրոն որդիք եղիաբայ որդւոյ ռուբինի, եւ աւնան որդի փաղեթայ որդւոյ ռուբինի։
²եւ կացին հակառակ մովսիսի. եւ երկերիւր եւ յիսուն այր յորդւոցն ի(սրաէ)լի գլխաւորք ժողովրդեանն՝ խորհրդականք խորհրդոց, եւ արք անուանիք։
³Կուտեցա́ն ՛ի վ(ե)ր(այ) մովսիսի եւ ահարոնի՝ եւ ասեն. Շա́տ լիցի ձեզ. զի ա(մենայ)ն ժողովուրդն եւ ամենեքեան սո́ւրբք են. եւ տ(է)ր ՛ի միջի ն(ո)ց(ա). եւ արդ՝ ընդէ՞ր ճոխացեալ էք ՛ի վ(ե)ր(այ) ժողովրդեանդ տ(եառ)ն։
⁴Եւ լուեալ մովսիսի՝ անկաւ ՛ի վ(ե)ր(այ) երեսաց իւրոց.

⁵եւ խօսեցաւ ընդ կորխայ եւ ընդ ա(մենայ)ն ժողովրդեան ն(ո)ր(ա), եւ ասէ. Յա́յց ել եւ ծանեաւ ա(ստուա)ծ զիւրսն, եւ զսուրբս. եւ մերձեցո́յց ապ ինքն. եւ զոր ո́չն ընտրեաց՝ ո́չ մերձեցոյց առ ինքն։
⁶Արդ զա́յս արարէք. առէ́ք ձեզ զբուրուառս ձեր. կո́րխ եւ ա(մենայ)ն ժողովուրդ իւր.
⁷եւ դի́ք ՛ի ն(ո)ս(ա) հուր, եւ արկէ́ք ՛ի ն(ո)ս(ա) խունկ՝ առաջի́ տ(եառ)ն ՛ի վաղիւ. եւ եղիցի այր զոր ընտրեսցէ տ(է)ր՝ նա́ է սուրբ. շա́տ լիցի ձեզ որդիք ղեւեայ։
⁸Եւ ասէ մովսէս ցկորխ. լուարո́ւք ինձ որդիք ղեւեայ.

⁹միթէ փո́քր ինչ իցէ ձեզ այդ. զի զատո́յց զձեզ ա(ստուա)ծ ի(սրաէ)լի ՛ի ժողովրդենէ իւրմէ, եւ մերձեցո́յց զձեզ առ ինքն պաշտե́լ զպաշտօն խորանին տ(եառ)ն. եւ կա́լ առաջի ժողովրդեանն պաշտել զնա.
¹⁰եւ մերձեցոյց զքեզ առ ինքն, եւ զա(մենայ)ն եղբա́րս քո զորդի́սն ղեւեայ ընդ քեզ. եւ քահանայանա՞լ եւս խնդրես։
¹¹Եւ ա́յդպէս դո́ւ եւ ժողովուրդ քո գումարեալ էք զա(ստուծո)յ. եւ ահարոն ո՞վ է զի տրտնջէ́ք զնմանէ։
¹²Եւ առաքեաց մովսէս կոչել զդաթան եւ զաբիրոն զորդիսն եղիաբու. եւ ասեն, ո́չ եկեսցուք.
¹³միթէ փո՞քր իցէ այն՝ զի հանե́ր զմեզ յերկրէն որ բղխէր զկաթն եւ զմեղր, սպանանել զմեզ յանապատի աստ. եւ արդ՝ սաստե՞ս եւս մեզ. եւ դո՞ւ ես իշխան.

¹⁴միթէ՝ յերկի՞րն որ բղխէր զկաթն եւ զմեղր՝ տարար զմեզ. եւ ետուր մեզ անդ ժառանգութի(ւն) անդո́ց եւ այգեաց. եթէ զա́չս մեր բրեսցես՝ ո́չ եկեսցուք առ քեզ։
¹⁵Եւ ծանրացասումն եղեւ յոյժ, եւ ասէ ցտ(է)ր. մի́ հայիր ՛ի զո́հսն ն(ո)ց(ա). զի զցանկալի ինչ ուրուք ՛ի նոցանէ ես ո́չ առի, եւ ո́չ զոք ՛ի նոցանէ չարչարեցի։
¹⁶Եւ ասէ մովսէս ցկորխ. սրբեա́ զժողովուրդ քո, եւ եղիջիք պատրա́ստք առաջի տ(եառ)ն՝ դու եւ ահարոն առ վաղիւ.
¹⁷եւ առէք իւրաքանչիւր զբուրուառ իւր, եւ դիջիք ՛ի վերայ ն(ո)ց(ա) խո́ւնկս. եւ մատուսջիք առաջի տ(եառ)ն իւրաքանչիւր զբուրուա́ռ իւր. զերկերիւր եւ զյիսուն բուրուառսն. եւ դո́ւ եւ ահարոն զիւրաքանչի́ւր բուրուառ իւր։

¹⁸Եւ եդին ՛ի ն(ո)ս(ա) հուր, եւ արկին ՛ի ն(ո)ս(ա) խունկ, եւ կացին առ դրան խորանին վկայութե(ան) մովսէս եւ ահարոն։
¹⁹Եւ կուտեաց ՛ի վ(ե)ր(այ) ն(ո)ց(ա) կո́րխ զա(մենայ)ն ժողովուրդն իւր ՛ի դո́ւռն խորանին վկայու(թ)ե(ան)։ եւ երեւեցան փա́ռք տ(եառ)ն ա(մենայ)ն ժողովրդեանն։
²⁰Եւ խօսեցաւ տ(է)ր ընդ մովսիսի եւ ը(ստ) ահարոնի՝ եւ ասէ.
²¹մեկնեցարո́ւք ՛ի միջոյ ժողովրդեանդ այդորիկ, եւ սատակեցից զդոսա միանգամայն։
²²Անկա́ն՝ ՛ի վ(ե)ր(այ) երեսաց իւրեանց՝ եւ ասեն. ա(ստուա)ծ ա(ստուա)ծ հոգւոց եւ ա(մենայ)ն մարմնոյ. եթէ մի́ մարդ մեղաւ, ՛ի վերայ ա(մենայ)ն ժողովրդեա՞նդ գայցէ բարկութի(ւն) տ(եառ)ն։

²³Եւ խօսեցաւ տ(է)ր ընդ մովսիսի եւ ասէ,
²⁴խօսեա́ց ընդ ժողովրդեանն եւ ասասցես. զատարո́ւք շուրջ զժողովրդեամբդ կորխայ եւ դաթանայ եւ աբիրոնի։
²⁵Եւ յարեաւ մովսէս եւ գնա́ց առ դաթան եւ աբիրոն, եւ գնացին ընդ նմա ա(մենայ)ն ծերքն ի(սրաէ)լի։
²⁶եւ խօսեցաւ ընդ ժողովրդեանն՝ եւ ասէ. մեկնեցարո́ւք ՛ի վրանա́ց արանց խստասրտացդ այդոցիկ, եւ մի́ մերձենայցէք յինչ ՛ի դոցա. զի մի́ կորնչիցիք ընդ ա(մենայ)ն մեղս դոցա։
²⁷Եւ մեկնեցան ՛ի ժողովրդենէն կորխայ շուրջ զնոքօք. եւ դաթան եւ աբիրոն ելին կային առ դրան վրանաց իւրեանց, եւ կանայք ն(ո)ց(ա) եւ մանկունք իւրեանց՝ եւ ա́ղխն իւրեանց։

²⁸Եւ ասէ մովսէս, այսո́ւ գիտասջիք, եթէ տ(է)ր առաքեաց զիս գործե́լ զա(մենայ)ն գործս զայսոսիկ. եւ եթէ ո́չ յինէ́ն ինչ է.
²⁹եթէ ըստ մահո́ւ ա(մենայ)ն մարդկան մեռանիցին դոքա, կամ ը(ս)տ հանդիսի ա(մենայ)ն մարդկան լինիցի հանդէ́ս ն(ո)ց(ա). ապա զիս տ(է)ր ո́չ առաքեաց։
³⁰Այլ թէ նորանշա́ն ինչ ցուցցէ տ(է)ր, եւ բացեալ երկրի զբերա́ն իւր կլանիցէ զդոսա, եւ զտո́ւնս դոցա, եւ զա(մենայ)ն ինչ որ դոցա́ իցէ. եւ իջանիցեն կենդանւոյն ՛ի դժոխս, գիտասջիք՝ եթէ բարկացուցի́ն արքդ այդոքիկ զտ(է)ր։
³¹Եւ իբրեւ դադարեաց ՛ի խօսելոյ զբանս զայսոսիկ. պատառեցա́ւ երկիր ՛ի ներքոյ ն(ո)ց(ա),
³²եւ բացա́ւ երկիր եւ եկուլ զն(ո)ս(ա)՝ եւ զտունս ն(ո)ց(ա). եւ զմարդիկն որ էին ընդ կորխայ՝ եւ զանասունս ն(ո)ց(ա)։

³³Եւ իջին նոքա եւ որ ինչ է́ր ն(ո)ց(ա) կենդանւոյն ՛ի դժոխս. եւ ծածկեաց զն(ո)ս(ա) երկիրն. եւ կորեան ՛ի միջոյ ժողովրդեանն։
³⁴եւ ա(մենայ)ն ի(սրա)էլ որ շուրջ զնոքօք էր՝ փախեան ՛ի ձայնէ նոցա. զի համարէին թէ գուցէ կլանիցէ եւ զնոսա́ երկիրն։
³⁵Եւ ել հուր ՛ի տ(թեն)է՝ եւ եկե́ր զերկերիւր եւ զյիսո́ւն այրն՝ որ մատուցանէին զխուկսն։
³⁶Եւ ասէ տ(է)ր ցմովսէս եւ ցեղիազար ցորդին ահարոնի ցքահանայ.
³⁷բարձէ́ք զբուրուառսդ պղնձիս ՛ի միջոյ այրեցելոցդ, եւ զհո́ւրդ օտար ցրուեսցես ՛ի բա́ց. զի սրբեցա́ն

³⁸բուրուառքդ մեղաւորացդ այդոցիկ յոգի́ս իւրեանց։ Եւ արասցես զայդ դրուա́գս կռածոյս նուարտա́նս սեղանոյն. զի մատուցա́ն առաջի տ(եառ)ն եւ սրբեցան. եւ եղիցին ՛ի նշանա́կ որդւոցն ի(սրաէ)լի։
³⁹Եւ ա́ռ եղիազար որդի ահարոնի քահանայի զբուրուառսն պղնձիս՝ զորս մատուցին այրեցեալքն, եւ արա́ր դրուագս սեղանոյն
⁴⁰յիշատա́կ որդւոցն ի(սրաէ)լի. զի մի́ մերձենայցէ այլազգի ոք՝ որ չիցէ́ ՛ի զաւակէ ահարոնի դնել խունկս առաջի տ(եառ)ն. զի մի́ լինիցի իբրեւ զկո́րխ եւ զխուժան ն(ո)ր(ա). որպէս խօսեցաւ տ(է)ր ՛ի ձեռն մովսիսի։
⁴¹Եւ տրտնջեցին որդիքն ի(սրաէ)լի ՛ի վաղիւ անդր զմովսիսէ եւ զահարոնէ, եւ ասեն. դո́ւք կոտորեցէք զժողովուրդն տ(եառ)ն։

⁴²Եւ եղեւ ՛ի կուտել ժողովրդեանն ՛ի վ(ե)ր(այ) մովսիսի եւ ահարոնի, դիմեցի́ն ՛ի խորանն վկայութե(ան), եւ զնոսա ծածկեաց ամպն. եւ երեւեցա́ն փառքն տ(եառ)ն։
⁴³եւ կացին մովսէս եւ ահարոն յանդիման խորանին վկայու(թ)ե(ան)։
⁴⁴Եւ խօսեցաւ տ(է)ր ընդ մովսիսի եւ ընդ ահարոնի՝ եւ ասէ.
⁴⁵մեկնեցարո́ւք ՛ի միջոյ ժողովրդեանդ այդորիկ՝ եւ սատակեցի́ց զդոսա միանգամայն։ եւ անկան ՛ի վ(ե)ր(այ) երեսաց իւրեանց։
⁴⁶Եւ ասէ մովսէս ցահարոն. ա́ռ դու զբուրուառն, եւ դիցե́ս ՛ի նմա հուր ՛ի սեղանոյ անտի, եւ ա́րկ ՛ի նա խունկ, եւ տա́ր վաղավաղակի ՛ի բանակն, եւ քաւեսցե́ս վ(ա)ս(ն) ն(ո)ց(ա)։ քանզի ել բարկութի(ւն) ՛ի տ(թեն)է, եւ սկսաւ սատակել զժողովուրդն։

⁴⁷Եւ ա́ռ ահարոն որպէս խօսեցա́ւ ընդ նմա́ մովսէս. եւ ընթացաւ ՛ի ժողովուրդ անդր, եւ ահա սկսեա́լ էր սատակումն ՛ի ժողովրդեանն. Եւ արկ զխունկն, եւ քաւեա́ց վ(ա)ս(ն) ժողովրդեանն.
⁴⁸եւ եկաց ՛ի մէջ մեռելո́ց եւ կենդանեաց. եւ դադարեաց սատակումնն։
⁴⁹Եւ եղեն մեռեալք ՛ի սատակմանն չորեքտասան հազար եւ եւթն հարիւր. թո́ղ զմեռեալսն վ(ա)ս(ն) կորխայ։
⁵⁰Եւ դարձաւ ահարոն առ մովսէս ՛ի դուռն խորանին վկայութե(ան), եւ դադարեա́ց սատակումնն։

¹Եւ խօսեցաւ տ(է)ր ընդ մովսիսի՝ եւ ասէ.
²խօսեա́ց դու ընդ որդիսդ ի(սրաէ)լի, եւ առցես ՛ի նոցանէ գաւազանս ըստ տա́նց նահապետաց իւրեանց, յա(մենայ)ն իշխանաց իւրեանց. ը(ս)տ տանց ազգաց իւրեանց, երկոտասան գաւազան. եւ զիւրաքանչիւր անուն գրեսցես ՛ի վերայ գաւազանի իւրոյ։
³Եւ զանունն ահարոնի գրեսցե́ս ՛ի վ(ե)ր(այ) իւրո́յ գաւազանի։ եւ իցէ գաւազան մի́ ը(ս)տ ցեղի́ց ի(սրաէ)լի՝ զոր ՛ի տանց նահապետաց իւրեանց տացեն։
⁴եւ դիցե́ս զն(ո)ս(ա) ՛ի խորանին վկայու(թ)ե(ան) որովք երեւեցա́յց քեզ անդ։
⁵Եւ եղիցի մարդոյ զոր ընտրեցից՝ գաւազանն իւր ծաղկեսցի́։ եւ բարձի́ց յինէն զտրտունջ որդւոցն ի(սրաէ)լի զոր տրտնջեն նոքա զձէնջ։

⁶Եւ խօսեցաւ մովսէս ընդ որդիսն ի(սրաէ)լի, եւ ետուն ցնա ա(մենայ)ն իշխանքն ն(ո)ց(ա) զգաւազանս իւրեանց. գաւազան միոյ իշխանի ըստ տանց նահապետաց իւրեանց. երկոտասան գաւազան. եւ գաւազանն ահարոնի ՛ի մէջ գաւազանացն ն(ո)ց(ա)։
⁷Եւ եդ մովսէս զգաւազանսն առաջի տ(եառ)ն ՛ի խորանին վկայու(թ)ե(ան)։
⁸եւ եղեւ ՛ի վաղիւ անդր մտին մովսէս եւ ահարոն ՛ի խորանն վկայութե(ան)։ Եւ ահա դալարացա́ւ գաւազանն ահարոնի ՛ի տանն ղեւեայ, եւ արձակեաց շառաւի́ղ, եւ ծաղկեաց ծաղիկ, եւ երեւեցո́յց ընկո́յզ։
⁹Եւ եհա́ն մովսէս զգաւազանսն յերեսաց տ(եառ)ն առ ա(մենայ)ն որդիսն ի(սրաէ)լի, եւ տեսին. եւ ա́ռ իւրաքանչիւրոք զգաւազան իւր։

¹⁰Եւ ասէ տ(է)ր ցմովսէս. դի́ր զգաւազանդ ահարոնի առաջի վկայու(թ)ե(ան)ցն ՛ի պահե́ստ, ՛ի նշանա́կ որդւոցն անհնազանդից. եւ դադարեսցէ́ տրտնջիւն դոցա յինէն՝ եւ մի մեռանիցին։
¹¹Եւ արարին մովսէս եւ ահարոն, որպէս հրամա́ն ետ տ(է)ր մովսիսի՝ նո́յնպէս եւ արարին։
¹²Եւ խօսեցա́ն որդիքն իսրայէլի ընդ մովսիսի՝ եւ ասեն. ահաւասիկ սատակի́մք, կորնչիմք, ծախի́մք։
¹³ամենայն որ մերձենայ ՛ի խորանն վկայութե(ան) տ(եառ)ն, մեռանի. մինչեւ ՛ի սպառ մեռանիցի՞մք։

¹Եւ խօսեցաւ տ(է)ր ընդ ահարոնի՝ եւ ասէ. դո́ւ եւ որդիք քո, եւ տուն նահապետու(թ)ե(ան) քոյ ընդ քեզ առնուցուք զմեղս սրբութե(ան)ցն. եւ դո́ւ եւ որդի́ք քո առնուցուք զմեղս քահանայու(թ)ե(ան) ձերոյ։
²Եւ զեղբարս քո զցե́ղն ղեւեայ զգո́ւնդ հօր քոյ մատուսցես առ քեզ, եւ յաւելցին ՛ի քեզ. եւ պաշտեսցե́ն զքեզ։ Եւ դո́ւ եւ որդիք քո ը(ստ) քեզ, յանդիման խորանին վկայութե(ան).
³եւ պահեսցե́ն զպահպանութի(ւն)ս քո, եւ զպահպանու(թ)ի(ւն)ս խորանին վկայու(թ)ե(ան). բայց ՛ի սպա́սն իմ ՛ի ս(ուր)բ՝ եւ ՛ի սեղանն մի́ մերձեսցին, զի մի́ մեռանիցին. եւ նոքա, եւ դուք։

⁴Եւ յաւելցի́ն ՛ի քեզ, եւ պահեսցե́ն զպահպանութի(ւն)ս խորանին վկայութե(ան), ըստ ա(մենայ)ն պաշտաման խորանին. եւ օտարազգի մի́ մերձեսցի առ քեզ։
⁵Եւ պահեսջի́ք զպահպանու(թ)ի(ւն)ս սրբութե(ան)ցն, եւ զպահպանութի(ւն)ս սեղանոյն. եւ ո́չ եւս լինիցի բարկութի(ւն) յորդիսն ի(սրաէ)լի։
⁶Եւ ես՝ առի́ զեղբարս ձեր զղեւտացիս ՛ի միջոյ որդւոցն ի(սրաէ)լի՝ փոխանա́կս տուեալ տ(եառ)ն. պաշտե́լ զպաշտօն խորանին վկայու(թ)ե(ան)։
⁷Եւ դու եւ որդիք քո ընդ քեզ պահեսջի́ք զքահանայու(թ)ի(ւն) ձեր ըստ ա(մենայ)ն պայմանի սեղանոյն, եւ զներքի́ն կողմն վարագուրին. եւ պաշտեսջի́ք զպաշտօն քահանայու(թ)ե(ան) ձերոյ։ եւ այլազգին որ մերձենայցէ՝ մեռցի́։

⁸Խօսեցաւ տ(է)ր ընդ ահարոնի՝ եւ ասէ. ես ահաւասիկ ետո́ւ ձեզ զպահեստ պտղոց իմոց. յա(մենայ)ն նուիրելո́ցն ինձ յորդւոցն ի(սրաէ)լի՝ քե́զ ետու զայն ՛ի պատիւ, եւ որդւոց քոց յետ քո, օրէ́ն յաւիտենական։
⁹Եւ ա́յս եղիցի ձեզ ՛ի նուիրելոց սրբութե(ան)ցն ընծայից, յա(մենայ)ն պատարագաց ն(ո)ց(ա), եւ յա(մենայ)ն զոհիցն ն(ո)ց(ա), եւ յա(մենայ)նէ առ ՛ի յանցանացն ն(ո)ց(ա), եւ յա(մենայ)նէ առ ՛ի մեղաց ն(ո)ց(ա). զոր տայցեն ինձ յա(մենայ)ն սրբու(թ)ե(ան)ցն՝ քե́զ լիցի եւ որդւոց քոց։
¹⁰՛Ի սրբու(թ)ի(ւն) սրբու(թ)ե(ան)ցն կերիջիք զա(մենայ)ն։ ա(մենայ)ն արու ուտիցէ́ զայն. դո́ւ եւ որդիք քո՝ զի սրբու(թ)ի(ւն)ք եղիցին քեզ.

¹¹եւ ա́յն եղիցի ձեզ ՛ի պտղոյ տրոցն ն(ո)ց(ա), յա(մենայ)ն նուիրաց որդւոցն (թ)ի(ւն)ի, քե́զ ետու զայն. եւ ուստերաց եւ դստերաց քոց ընդ քեզ, օրէն յաւիտենական. ա(մենայ)ն սուրբ ՛ի տան քում կերիցէ զայն։
¹²Եւ զա(մենայ)ն պտուղ իւղոյ, եւ զա(մենայ)ն պտուղ գինւո́յ եւ ցորենոյ՝ զոր տացեն տ(եառ)ն զպտուղ իւրեանց. քե́զ ետու զայն ա(մենայ)ն։
¹³եւ առաջինք արմտեաց երկրին իւրեանց զոր մատուսցեն տ(եառ)ն՝ քե́զ լիցին. եւ ա(մենայ)ն ս(ուր)բ ՛ի տան քում կերիցէ́ զայն։
¹⁴եւ ա(մենայ)ն նուիրեալն յորդւոցն ի(սրաէ)լի քե́զ լիցի։

¹⁵Եւ ա(մենայ)ն որ բանայ զարգանդ՝ յա(մենայ)ն մարմնոյ, զոր մատուցանիցեն տ(եառ)ն ՛ի մարդոյ մինչեւ յանասուն՝ քեզ լիցի։ այլ փրկելո́վ փրկեսցես զանդրանիկս մարդկան. եւ զանդրանիկս անասնոց անսրբոց փրկեսցե́ս.
¹⁶եւ փրկանք ն(ո)ր(ա) յամսօրէի́ց եւ ՛ի վեր, եւ գին ն(ո)ր(ա) հինգ սիկղ ը(ս)տ սրբու(թ)ե(ան) սկեղն, որ է քսա́ն դանգ։
¹⁷Բայց զանդրանիկս արջառոց, եւ զանդրանիկս օդեաց, եւ զանդրանիկս այծեաց, ո́չ փրկեսցես՝ զի սո́ւրբ են. եւ զարիւն ն(ո)ց(ա) հեղցե́ս առ սեղանովն. եւ զճարպն հանցես ընծայ ՛ի հոտ անուշից տ(եառ)ն.
¹⁸եւ միսն եղիցի քո́, որպէս երբո́ւծ նուիրին՝ եւ երին աջոյ քեզ լիցի։

¹⁹Զա(մենայ)ն ինչ հա́ս ՛ի սրբու(թ)ե(ան)ցն զոր հանցեն տ(եառ)ն որդիքն ի(սրաէ)լի՝ քեզ ետու եւ որդւոց քոց, եւ ուստերաց եւ դստերաց քոց ընդ քեզ, օրէ́ն յաւիտենական. քանզի ո́ւխտ աղի́ է առաջի տ(եառ)ն. քե́զ եւ զաւակի քում յետ քո։
²⁰Եւ խօսեցաւ տ(է)ր ընդ ահարոնի՝ եւ ասէ. յերկրի ն(ո)ց(ա)՝ մի́ ժառանգեսցես. եւ բաժին քո ընդ նոսա՝ մի́ լիցի. զի ե́ս եմ բաժին քո եւ ժառանգութի(ւն) ՛ի մէջ որդւոցն ի(սրաէ)լի։
²¹Եւ որդւոցն ղեւեայ՝ ահա ետո́ւ զա(մենայ)ն տասանորդս ի(սրաէ)լի ՛ի ժառանգութի(ւն). եւ փոխանակ պաշտաման ն(ո)ց(ա) զոր նոքա́յն պաշտիցեն ՛ի խորանին վկայու(թ)ե(ան).
²²եւ մի́ եւս մերձեսցին որդիքն ի(սրաէ)լի ՛ի խորանն վկայութե(ան) ընդունել զմեղս մահաբերս։

²³Եւ պաշտեսցէ́ ղեւտացին զպաշտօն խորանին վկայութե(ան), եւ նոքա́ առցեն զմեղս ն(ո)ց(ա). օրէ́ն յաւիտենական յազգս իւրեանց ՛ի մէջ որդւոցն ի(սրաէ)լի. եւ մի́ ժառանգեսցեն ժառանգու(թ)ի(ւն)։
²⁴Զտասանորդս որդւոցն ի(սրաէ)լի՝ զոր զատուսցեն տ(եառ)ն հաս, ետո́ւ ղեւտացւոցն ՛ի ժառանգութի(ւն). վ(ա)ս(ն) այսորիկ ասացի նոցա թէ ՛ի մէջ որդւոցն ի(սրաէ)լի՝ մի́ ժառանգեսցեն վիճակ։
²⁵Խօսեցաւ տ(է)ր ընդ մովսիսի՝ եւ ասէ։
²⁶Ընդ ղեւտացիսն խօսեսցիս՝ եւ ասասցես ցնոսա. եթէ առնուցուք յորդւոցն ի(սրաէ)լի տասանո́րդս զոր ետու ձեզ, հանիցէ́ք եւ դուք անտի հա́ս տ(եառ)ն, զտասանո́րդս ՛ի տասանորդէ.
²⁷եւ համարեսցի ձեզ հասն ձեր իբրեւ զցորեան ՛ի կալոյ, եւ իբրեւ զպտուղ ՛ի հնձանէ։

²⁸Ա́յնպէս եւ դուք հանիցէք ՛ի հասից անտի տ(եառ)ն, յա(մենայ)ն տասանորդա́ց ձերոց՝ զոր առնուցուք յորդւոցն ի(սրաէ)լի, եւ տայցէք ՛ի նոցանէ հա́ս տ(եառ)ն. ահարոնի քահանայի.
²⁹յա(մենայ)ն տրոցն ձերոց հանիցէք հա́ս. եւ յա(մենայ)ն պտղոց զնուիրեալն ՛ի նմանէ։
³⁰Եւ ասասցես ցն(ո)ս(ա). յորժամ հանիցէ́ք զպտուղն ՛ի նմանէ, համարեսցի ղեւտացւոցն իբրեւ զարդի́ւնս ՛ի կալոյ, եւ իբրեւ զպտուղ ՛ի հնձանէ։
³¹եւ կերիջիք զայն յա(մենայ)ն տեղւոջ, դո́ւք եւ տո́ւնք ձեր. զի վարձ ձե́ր է այն, փոխանակ պաշտամանցն ձերոց ՛ի խորանին վկայութե(ան)։
³²Եւ մի́ առնուցուք վ(ա)ս(ն) այնոցիկ մեղս։ եւ յորժամ հանիցէք զպտուղն ՛ի նմանէ զսրբութի(ւն) որդւոցն ի(սրաէ)լի. ո́չ պղծիցէք՝ զի մի́ մեռաիցիք։

¹Խօսեցաւ տ(է)ր ընդ մովսիսի եւ ընդ ահարոնի՝ եւ ասէ։
²Ա́յս որոշումն է օրինացն՝ զոր պատուիրեաց տ(է)ր մովսիսի՝ եւ ասէ։ խօսեա́ց ը(ստ) որդիսն ի(սրաէ)լի՝ եւ առցեն առ քեզ երինջ մի կարմի́ր անարա́տ, յորում ո́չ գուցէ բիծ ինչ, եւ ո́չ իցէ մտեալ ընդ լծով։
³Եւ տացես զնա ցեղիազա́ր քահանայ։ եւ հանցեն զնա արտաքո́յ բանակին ՛ի տեղի ս(ուր)բ։ եւ սպանցե́ն զնա առաջի ն(ո)ր(ա)։
⁴եւ առցէ́ եղիազար յարենէ ն(ո)ր(ա), եւ ցանեսցէ́ յանդիման խորանին վկայու(թ)ե(ան) յարենէ ն(ո)ր(ա) եւթն անգամ.
⁵եւ այրեսցեն զնա առաջի ն(ո)ր(ա). եւ մո́րթ ն(ո)ր(ա), եւ մի́ս ն(ո)ր(ա), եւ արի́ւն ն(ո)ր(ա) հանդերձ ապաւառա́ւ ն(ո)ր(ա) այրեսցի́։

⁶Եւ առցէ քահանայն փա́յտ եղեւնեայ, եւ զոպա եւ կարմիր. եւ արկցեն ՛ի մէջ այրեցածի երընջուն։
⁷եւ ողողեսցէ զհանդերձս իւր քահանայն, եւ լուասցէ́ զմարմին իւր ջրով, եւ ապա́ մտցէ ՛ի բանակն. եւ անսո́ւրբ լիցի քահանայն մինչեւ ցերեկոյ։
⁸եւ որ այրիցէն զնա, ողողեսցէ́ զհանդերձս իւր, եւ լուասցէ́ զմարմին իւր ջրով, եւ անսո́ւրբ լիցի մինչեւ ցերեկոյ։
⁹Եւ ժողովեսցէ ա́յր ս(ուր)բ զմոխիր երընջուն, եւ կուտեսցէ́ արտաքոյ բանակին ՛ի սուրբ տեղւոջ. եւ եղիցի ժողովրդեան որդւոցն ի(սրաէ)լի ՛ի պահե́ստ ջուր որսկման՝ զի սրբու(թ)ի(ւն) է։

¹⁰Եւ լուասցէ́ զմարմին իւր որ ժողովիցէ զմոխիր երընջուն, եւ ողողեսցէ́ զհանդերձս իւր. եւ անսո́ւրբ լիցի մինչեւ ցերեկոյ. եւ եղիցի ժողովրդեան որդւոցն ի(սրաէ)լի եւ եկացն յեցելոց ՛ի ն(ո)ս(ա), օրէն յաւիտենական։
¹¹Եւ որ մերձենայցէ ՛ի մեռեալ անձին մարդոյ, անսո́ւրբ լիցի զեւթն օր.
¹²եւ սրբեսցի́ նա յաւուրն երրորդի՝ եւ յաւուրն եւթներորդի, եւ ապա́ սո́ւրբ լիցի։ ապաթէ ո́չ սրբեսցի յաւուրն երրորդի եւ յաւուրն եւթներորդի, մի́ լիցի սուրբ։
¹³Ա(մենայ)ն որ մերձենայցէ ՛ի մեռեալ անձն ՛ի մարդոյ որ մեռանիցի, եւ ո́չ սրբեսցի՝ զխորանն տ(եառ)ն պղծեաց. սատակեսցի́ անձնն այն յի(սրա)էլէ. զի ջուրն սրսկման ո́չ սրսկեցաւ ՛ի վ(ե)ր(այ) ն(ո)ր(ա), անսո́ւրբ է զի պղծութի(ւն) իւր ՛ի նմա́ է։

¹⁴Եւ ա́յս օրէն իցէ մարդոյ որ մեռանիցի ՛ի տան. ա(մենայ)ն որ մտցէ ՛ի տունն, եւ որ ինչ կայցէ ՛ի տանն, անսո́ւրբ լիցին զեւթն օր.
¹⁵եւ ա(մենայ)ն աման՝ բա́ց որ ո́չ իցէ խփեալ կամ սերեկեալ, պի́ղծ լիցի։
¹⁶Եւ ա(մենայ)ն որ մերձենայցէ ը(ստ) երեսս դաշտի ՛ի վիրաւոր կամ ՛ի մեռեալ՝ կամ յոսկր մարդոյ կամ ՛ի գերեզման, պի́ղծ լիցի զեւթն օր։
¹⁷Եւ առցեն պղծելոյն ՛ի մոխրոյ այրեցելո́յն սրբութե(ան). եւ արկցեն ՛ի վ(ե)ր(այ) ն(ո)ր(ա) ջո́ւր յամանի.
¹⁸եւ առցեն զոպա́, եւ թացցէ ՛ի ջուրն ա́յր սուրբ, եւ ցանեսցէ́ զտամբն,եւ զկահիւն, եւ զամանովքն, եւ զանձամբքն որ իցեն անդ. եւ զմերձեցելովքն յոսկր մարդոյ, կամ ՛ի վիրաւոր, կամ ՛ի մեռեալ, կամ ՛ի գերեզման։

¹⁹եւ ցանեսցէ սո́ւրբ զպղծովն՝ յաւուրն երրորդի եւ յաւուրն եւթներորդի. եւ սրբեսցի́ յաւուրն եւթներորդի. եւ ողողեսցէ զհանդերձս իւր, եւ լուասցէ́ զմարմին իւր ջրով. եւ անսո́ւրբ լիցի մինչեւ ցերեկոյ։
²⁰Եւ մարդ՝ որ պղծիցի եւ ո́չ սրբեսցի, սատակեսցի անձնն այն ՛ի ժողովրդենէ իւրմէ. զի զսրբութի(ւն)ն տ(եառ)ն պղծեաց, եւ ջուր սրսկման ո́չ սրսկեցաւ զնովաւ, անսուրբ է.
²¹եւ եղիցի ձեզ այն օրէ́ն յաւիտենական։ Եւ որ սրսկէ զջուրն սրսկման՝ լուասցէ́ զձորձս իւր. եւ որ մերձենայցէ ՛ի ջուրն սրսկման, անսո́ւրբ լիցի մինչեւ ցերեկոյ։
²²Եւ յա(մենայ)ն ինչ յոր մերձենայցէ պղծեալն, անսո́ւրբ լիցի մինչեւ ցերեկոյ։ եւ անձն որ մերձենայցէ ՛ի նա, անսո́ւրբ լիցի մինչեւ ցերեկոյ։

¹Եւ եկին որդիքն ի(սրաէ)լի ա(մենայ)ն ժողովրդեամբն յանապատն սինայի, յառաջնում ամսեանն. եւ բանակեցաւ ժողովուրդն ՛ի կադէս։ Եւ վախճանեցաւ անդ մարիամ, եւ ա́նդ թաղեցաւ։
²Եւ ո́չ գոյր անդ ջուր ըմպելոյ ժողովրդեանն. եւ կուտեցան ՛ի վ(ե)ր(այ) մովսիսի եւ ահարոնի.
³եւ բամբասեաց ժողովուրդն զմովսէս՝ եւ ասեն. լա́ւ էր թէ մեռեալէաք ՛ի կորստեան եղբարց մերոց առաջի տ(եառ)ն։
⁴Եւ ընդէ՞ր ածէք զժողովուրդս տ(եառ)ն յա́յս անապատ կոտորե́լ զմեզ՝ եւ զանասուն մեր.
⁵եւ ընդէ՞ր հանէք զմեզ յերկրէն եգիպտացւոց, գա́լ ՛ի տեղիս յայս չար. ՛ի տեղի ուր ո́չ սերմն սերմանի, եւ ո́չ սեխենիք, եւ ո́չ այգիք, եւ ո́չ նռնենիք, եւ ո́չ ջո́ւր գոյ ըմպելոյ։

⁶Եւ մտին մովսէս եւ ահարոն յերեսաց ժողովրդեանն ՛ի դուռն խորանին վկայութե(ան), եւ անկան ՛ի վ(ե)ր(այ) երեսաց իւրեանց։ Եւ երեւեցան փառքն տ(եառ)ն ՛ի վ(ե)ր(այ) ն(ո)ց(ա)։
⁷եւ խօսեցաւ տ(է)ր ընդ մովսիսի՝ եւ ասէ։
⁸Ա́ռ դու զգաւազանն, եւ եկեղեցացո́ զժողովուրդն, դո́ւ եւ ահարոն եղբայր քո. եւ բարբառեսջի́ք ՛ի վ(ե)ր(այ) վիմին յանդիման ն(ո)ց(ա), եւ տացէ́ զջուրս իւր. եւ հանջիք ն(ո)ց(ա) ջո́ւր ՛ի վիմէ անտի. եւ արբուսջի́ք ժողովրդեանն եւ անասնո́ց ն(ո)ց(ա)։
⁹Եւ ա́ռ մովսէս զգաւազանն յանդիման տ(եառ)ն՝ ո(ր)պ(էս) հրամայեաց նմա տ(է)ր։

¹⁰եւ ժողովեցին մովսէս եւ ահարոն զժողովուրդն հանդէպ վիմին։ Եւ ասէ ցն(ո)ս(ա). լուարո́ւք ինձ անհաւանք. միթէ ՛ի վիմէ՞ս յայսմանէ հանիցեմ ձեզ ջուր։
¹¹Եւ ամբարձեալ մովսիսի զձեռն իւր, եհա́ր զվէմն երկի́ցս անգամ. եւ ել ջուր բազում. եւ արբ ժողովուրդն եւ անասուն ն(ո)ց(ա)։
¹²Եւ ասէ տ(է)ր ցմովսէս եւ ցահարոն. փոխանակ զի ո́չ հաւատացէք դուք ինձ, սո́ւրբ առնել զիս առաջի որդւոցն ի(սրաէ)լի. վ(ա)ս(ն) այդորիկ ո́չ տանիցիք դուք զժողովուրդդ յերկիրն՝ զոր ետո́ւ դոցա։
¹³Ա́յն է ջուր բամբասանաց. զի բամբասեցին որդիքն ի(սրաէ)լի առաջի տ(եառ)ն. եւ սրբեցա́ւ ՛ի նոսա։

¹⁴Եւ առաքեաց մովսէս հրեշտա́կս ՛ի կադէսայ առ արքայն եդոմայ՝ եւ ասէ. Այսպէս ասէ եղբայր քո ի(սրա)էլ. դու ինքնի́ն գիտես զա(մենայ)ն աշխատութի(ւն)ս որ գտին զմեզ։
¹⁵եւ ո(ր)պ(էս) իջին հարքն մեր յեգիպտոս. եւ պանդխտեցաք յեգիպտոս աւուրս բազումս, եւ չարչարեցին զմեզ եգիպտացիքն, եւ զհարսն մեր,
¹⁶եւ բողոքեցա́ք առ տ(է)ր. եւ լուա́ւ տ(է)ր ձայնի մերում, եւ առաքեալ հրեշտակ եհա́ն զմեզ յեգիպտոսէ։ եւ արդ՝ եմք մեք ՛ի կադէս քաղաքի, ՛ի կողմն մի ՛ի սահմանաց քոց։
¹⁷Եւ արդ՝ անցցո́ւք ընդ երկիրս քո։ եւ ո́չ անցցուք ընդ անդս քո, եւ ո́չ ընդ այգիս քո, եւ ո́չ արբցուք ջուր ՛ի ջրհորոց քոց։ Ճանապարհ զարքունի́ գնասցուք. ո́չ խոտորեսցուք յաջ կամ յահեակ, մինչեւ անցցո́ւք ըստ սահմանս քո։

¹⁸Եւ ասէ ցնա եդոմէ. մի́ անցցես ընդիս. ապա թէ ոչ՝ պատերազմա́ւ ելից ընդդէմ քո։
¹⁹Եւ ասեն ցնա որդիքն ի(սրաէ)լի, առ լերա́մբդ անցցուք. եւ եթէ արբցուք ՛ի ջրոյ քումմէ ե́ս եւ խաշինք իմ, տացուք քեզ զգինս։ արդ՝ ո́չինչ են իրքդ, անցցուք առ լերամբդ։
²⁰եւ նա ասէ, ո́չ անցցես ընդիս։ Եւ ել եդոմ ընդդէմ նոցա ծա́նր ամբոխիւ եւ հզօր ձեռամբ։
²¹եւ ո́չ կամեցաւ եդոմ տա́լ անց ի(սրաէ)լի ընդ սհամանս իւր. եւ խոյս ետ ի(սրա)էլ ՛ի նմանէ։
²²Եւ չուեցին ՛ի կադէսայ. եւ եկին որդիքն ի(սրաէ)լի ա(մենայ)ն ժողովրդեամբն ՛ի հովր լեառն։
²³Եւ խօսեցաւ տ(է)ր ընդ մովսիսի եւ ընդ ահարոնի ՛ի հովր լերինն, ՛ի սհամանս երկրին եդովմայեցւոց՝ եւ ասէ.

²⁴Յաւելցի́ ահարոն առ ժողովուրդ իւր, զի մի́ մտցէ յերկիրն զոր ետու որդւոցն ի(սրաէ)լի. քանզի բարկացուցէք զիս ՛ի վերայ ջուրցն բամբասանացն։
²⁵Ա́ռ դու զահարոն՝ եւ զեղիազար զորդի ն(ո)ր(ա). եւ հա́ն զն(ո)ս(ա) ՛ի հովր լեառն յանդիման ա(մենայ)ն ժողովրդեանն.
²⁶եւ մերկացո́ յահարոնէ զպատմուճան ն(ո)ր(ա), եւ զգեցուսցես եղիազարո́ւ որդւոյ ն(ո)ր(ա)։ եւ ահարոն յաւելեալ մեռցի́ անդ։
²⁷Եւ արար մովսէս ո(ր)պ(էս) եւ հրամայեաց նմա տ(է)ր, եւ եհան զնա ՛ի հովր լեառն առաջի ա(մենայ)ն ժողովրդեանն։
²⁸եւ մերկացո́յց յահարոնէ զհանդերձս նորա, եւ զգեցոյց զն(ո)ս(ա) եղիազարո́ւ որդւոյ նորա։

²⁹Եւ մեռաւ ահարոն ՛ի գլուխ լերինն։ եւ իջին մովսէս եւ եղիազար ՛ի լեռնէ անտի։
³⁰եւ ետես ա(մենայ)ն ժողովուրդն թէ վախճանեցաւ ահարոն. եւ լացին զահարոն երեսուն օր ա(մենայ)ն տուն ի(սրաէ)լի։

¹Եւ լուաւ քանանաիս արքայ արադայ՝ որ բնակեալ էր առ անապատաւն. եթէ եկն ի(սրա)էլ զճանապարհն աթարինայ. եւ ետ պատերա́զմ ընդ ի(սրաէ)լի. եւ ա́ռ ՛ի նոցանէ գերի։
²Եւ ուխտեաց ի(սրա)էլ ուխտ տ(եառ)ն՝ եւ ասէ. եթէ մատնիցե՞ս ընդ ձեռամբ իմով զազգն զայն, նզովեցի́ց զնա եւ զքաղաքս նորա։
³Եւ լուաւ տ(է)ր ձայնի ի(սրաէ)լի, եւ մատնեաց զքանանացին ՛ի ձեռս ն(ո)ր(ա). եւ նզովեա́ց զնա եւ զքաղաքս ն(ո)ր(ա). եւ կոչեաց զանուն տեղւոյն այնորիկ նզո́վս։
⁴Եւ չուեալ ՛ի հովր լեռնէ ընդ ճանապարհ կարմիր ծովուն, պատեցան զեդոմաւ. եւ յոգնեցաւ ժողովուրդն ՛ի ճանապարհին.

⁵եւ բամբասեաց ժողովուրդն զա(ստուա)ծ եւ զմովսէս՝ եւ ասեն. ընդէ՞ր հաներ զմեզ յեգիպտոսէ կոտորել զմեզ յանապատիս յայսմիկ. զի ո́չ գոյ հաց եւ ո́չ ջուր. եւ անձինք մեր տաղտկացեա́լ են ՛ի սնոտի հացէս։
⁶Եւ առաքեաց տ(է)ր ՛ի ժողովուրդն օ́ձս կոտորիչս, եւ հարկանէին զժողովուրդն. եւ մեռա́ւ ժողովուրդ բազում յորդւոցն ի(սրաէ)լի։
⁷Եւ եկին առ մովսէս եւ ասեն. մեղա́ք՝ զի խօսեցաք չար զտ(թեն)է եւ զքէն։ արդ՝ կա́ց յաղօթս առ տ(է)ր, եւ բարձցէ́ ՛ի մէնջ զօձսդ։ եւ եկա́ց մովսէս յաղօթս առ տ(է)ր վասն ժողովրդեանն։
⁸Եւ ասէ տ(է)ր ցմովսէս. արա́ դու քեզ օձ, եւ դիցե́ս զնա ՛ի վ(ե)ր(այ) նշանակի. եւ եղիցի յորժամ հարկանիցէ օձ զմարդ, ա(մենայ)ն օձահար որ տեսանիցէ զնա՝ կեցցէ́։

⁹Եւ արար մովսէս օձ պղնձի, եւ կացոյց զնա ՛ի վերայ նշանակին։ եւ լինէր՝ յորժամ հարկանէր օձ զմարդ, հայէ́ր ընդ օձն պղնձի, եւ կեա́յր։
¹⁰Եւ չուեցին որդիքն ի(սրաէ)լի եւ եկին բանակեցան յաբովթ։
¹¹եւ չուեալ յաբովթայ բանակեցան յաքեղգայի յայնկոյս անապատին՝ որ է́ յանդիման մովաբայ յարեւելից կողմանէ։
¹²անտի չուեցին՝ եւ բանակեցան ՛ի ձորն զարեգ։
¹³Անտի́ չուեալ բանակեցան յա́յնկոյս առնովնայ յանապատին, առ ելիւք սահմանացն ամովրհացւոց. քանզի առնովն սհաման է մովաբացւոց։ ընդ մովաբացին եւ ը(ստ) ամովրհացին։
¹⁴վ(ա)ս(ն) այնորիկ ասի ՛ի գրի։ Պատերազմ տ(եառ)ն՝ զովգ հրձիգ արար եւ զձորն առնովնայ,

¹⁵եւ հաստատեաց զձորսն բնակեալս յարոյէր, որ առ ընթե́ր կայ սահմանացն մովաբու։
¹⁶Եւ անտի քան զնա ջրհորն. ա́յն է՝ ջրհորն զորմէ ասաց տ(է)ր ցմովսէս, ժողովեա́ զժողովուրդն՝ եւ տաց ն(ո)ց(ա) ջուր ըմպելոյ։
¹⁷Յայնժամ օրհնեաց ի(սրա)էլ զօրհնութի(ւն)ս զայս ՛ի վ(ե)ր(այ) ջրհորոյն։ Նուագեցէ́ք նմա
¹⁸զջրհորն զոր իշխանք փորեցին, եւ տաշեցին զնա թագաւորք ազգաց ՛ի թագաւորու(թ)ե(ան) իւրեանց՝ եւ ՛ի տիրել իւրեանց։ Եւ ՛ի ջրհորոյ անտի ՛ի մանթանին։
¹⁹եւ ՛ի մանթանինայ ՛ի մանայէլ. եւ ՛ի մանայէլէ ՛ի բամովթ։
²⁰Եւ ՛ի բամովթայ յանայէն, որ է ՛ի դաշտին մովաբայ, ՛ի կատարէ կոփածուին՝ որ հայի ընդ անապատն։

²¹Եւ առաքեաց մովսէս հրեշտակս առ արքայն ամովրհացւոց բանի́ւք խաղաղու(թ)ե(ան)՝ եւ ասէ։
²²Անցցո́ւք ը(նդ) երկիր քո. զճանապարհա́յն գնասցուք. ո́չ կոտորեսցուք յանդս եւ ո́չ յայգիս. եւ ո́չ արբցուք ջուր ՛ի ջրհորոց քոց. ճանապարհ զարքունի́ գնասցուք մինչեւ անցցուք ընդ սահմանս քո։
²³Եւ ո́չ ետ սեհոն անցանել ի(սրաէ)լի ը(նդ) սահմանս իւր։ եւ ժողովեաց սեհոն զա(մենայ)ն ժողովուրդն իւր. եւ ել տա́լ պատերազմ ընդ ի(սրաէ)լի յանապատին. եւ եկն ՛ի սիասար, եւ ե́տ պատերազմ ը(նդ) ի(սրաէ)լի։
²⁴Եւ եհա́ր զնա ի(սրա)էլ կոտորմամբ սրոյ, եւ տիրեցին երկրի նորա յառնովնայ մինչեւ ցյաբովկ. մինչեւ ցոերդիսն ամմոնայ. զի յազե́ր է սահման որդւոցն ամոնայ։

²⁵Եւ ա́ռ ի(սրա)էլ զա(մենայ)ն քաղաքսն զայնոսիկ, եւ բնակեցաւ ի(սրա)էլ յա(մենայ)ն քաղաքս ամուրհացւոց։ Յեսեբոն եւ յա(մենայ)ն արուարձանեայս ն(ո)ր(ա).
²⁶քանզի եսեբոն էր քաղաք սեհոնի արքայի ամովրհացւոց. եւ նա́ նախ ետ պատերազմ ընդ արքային մովաբու, եւ ա́ռ զա(մենայ)ն երկիրն ն(ո)ր(ա) յարոյերայ մինչեւ ցառնոն։
²⁷Վ(ա)ս(ն) այնորիկ ասեն ա(մենայ)ն առակարկուք. եկա́յք յեսեբոն զի շինեցաւ, եւ հանդերձեցա́ւ քաղաքն սեհոնի.
²⁸զի հո́ւր ել յեսեբոնայ՝ եւ բո́ց ՛ի քաղաքէն սեհոնի, եւ եկեր մինչեւ ցմովաբ. եւ լափեա́ց զարձանս առնովնայ։

²⁹Վա́յ քեզ մովաբ։ կորեար ժողովուրդ քամովսայ. եւ մատնեցա́ն ուստերք ն(ո)ց(ա) ՛ի փախուստ, եւ դստերք ն(ո)ց(ա) ՛ի գերու(թ)ի(ւն) թագաւորին ամովրհացւոց.
³⁰եւ զաւակ ն(ո)ց(ա) սատակեսցի́ յեսեբոնէ մինչեւ ցդեբոն. եւ կանայք ն(ո)ց(ա) բորբոքեցան հրով ՛ի վ(ե)ր(այ) մովաբու։
³¹Եւ բնակեաց ի(սրա)էլ յա(մենայ)ն քաղաքս ամուրհացւոցն։
³²Եւ առաքեաց մովսէս լրտեսել զազեր. եւ առի́ն զնա եւ զաւանս ն(ո)ր(ա), եւ հանին զամուրհացին որ բնակեալ էր ՛ի նմա։
³³եւ կրկնեցան ելին ընդ ճանապարհն ՛ի բասան։ Եւ ել՝ ո́վդ թագաւոր բասանու ընդդէմ ն(ո)ց(ա), եւ ա(մենայ)ն ժողովուրդ ն(ո)ց(ա) ՛ի պատերազմ յեգրային։

³⁴Եւ ասէ տ(է)ր ցմովսէս. մի́ երկնչիր ՛ի նմանէ, զի ՛ի ձեռս քո մատնեցի զնա́ եւ զա(մենայ)ն ժողովուրդն ն(ո)ր(ա), եւ զա(մենայ)ն երկիր ն(ո)ր(ա). եւ արասցես ընդ նա՝ ո(ր)պ(էս) արարեր ընդ սեհոն արքայ ամովրհացւոց՝ որ բնակեալ էր յեսեբոն։
³⁵Եւ եհա́ր զնա եւ զորդիս ն(ո)ր(ա), եւ զա(մենայ)ն ժողովուրդն նորա. մինչեւ ամենեւին չմնալոյ ՛ի նոցանէն ապրեալ։ եւ ժառանգեցին զերկիրն ն(ո)ց(ա)։

¹Եւ չուեալ որդւոցն ի(սրաէ)լի բանակեցան յարեւմտից մովաբու առ յորդանանաւ յանդիմա́ն երիքովի։
²Եւ տեսեալ բաղակայ որդւոյ սեպփովրայ զա(մենայ)ն զոր արար ի(սրա)էլ ը(ստ) ամովրհացին,
³երկեաւ մովաբ յոյժ ՛ի ժողովրդենէ անտի, զի բազո́ւմ էին։ եւ զանգիտեաց մովաբ յերեսաց որդւոցն ի(սրաէ)լի։
⁴Եւ ասէ մովաբ ցծերակոյտն մադիամու. արդ՝ լիզանէ ժողովուրդս այս զա(մենայ)ն որ շուրջ զմեւք են, ո(ր)պ(էս) լիզանէ արջառ զդեղ դալա́ր ՛ի դաշտի։ Եւ բաղակ որդի սեպփովրայ էր արքայ մովաբու ՛ի ժամանակի յայնմիկ։

⁵եւ առաքեաց հրեշտակս առ բաղաամ որդի բեովրայ՝ առ փաթուրն. որ էր առ գետեզե́րբ երկրին որդւոց ազգին իւրոյ. կոչե́լ զնա եւ ասել, ահա՝ ա́զգ ել յեգիպտոսէ, եւ ծածկեաց զերեսս երկրի. եւ նստի́ սա մօտ առիս։
⁶Եւ արդ՝ ե́կ անէ́ծ դու ինձ զժողովուրդս զայս. զի զօրագոյն քան զիս է́ սա։ թերեւս կարասցուք հարկանե́լ ՛ի սոցանէ, եւ հանի́ց զսա յերկրէ իմմէ։ քանզի գիտե́մ թէ զոր օրհնես դու՝ օրհնեա́լ է, եւ զոր անիծանես՝ անիծեա́լ։
⁷Եւ գնացի́ն ծերակոյտն մովաբու եւ ծերակոյտն մադիամու, եւ ըղձութի(ւն)ք ՛ի ձեռս ն(ո)ց(ա)։ եկին առ բաղաամ, եւ ասացին նմա զպատգամսն բաղակայ։

⁸եւ ասէ ցնոսա. ագարո́ւք աստ զայս գիշեր, եւ արարից ձեզ պատասխանի́ իրացդ, ինչ զոր տ(է)ր խօսեսցի ընդիս։ եւ ագան իշխանքն մովաբու առ բաղաամու։
⁹Եւ եկն ա(ստուա)ծ առ բաղաամ եւ ասէ ցնա. զի՞ են արքդ այդոքիկ առ քեզ։
¹⁰եւ ասէ բաղաամ ցա(ստուա)ծ բաղակ որդի սեպփովրայ արքայ մովաբու առաքեա́ց զդոսա առիս եւ ասէ.
¹¹ահա ա́զգ ել յեգիպտոսէ եւ ծածկեաց զերեսս երկրի, եւ նստի́ սա մօտ առիս. արդ՝ ե́կ անէծ դու զսոսա ինձ, թերեւս կարացից հարկանել զսա՝ եւ հանից զսա յերկրէ իմմէ։
¹²Եւ ասէ ա(ստուա)ծ ցբաղաամ. մի́ երթար ընդ ն(ո)ս(ա). եւ մի́ անիծանիցես զժողովուրդն՝ քանզի օրհնեա́լ է։

¹³Եւ յարուցեալ բաղաամ ընդ առաւօտն, ասէ ցիշխանսն բաղակայ. գնացէ́ք անդրէն առ տէրն ձեր. զի ո́չ թողու զիս ա(ստուա)ծ գալ ընդ ձեզ։
¹⁴Եւ յարուցեալ իշխանքն մովաբու եկին առ բաղակ՝ եւ ասեն. ո́չ կամեցաւ բաղաամ գալ ընդ մեզ։
¹⁵Եւ յաւել առաքել բաղակ իշխանս բազումս եւ պատուականագոյնս քան զն(ո)ս(ա)։
¹⁶եկին առ բաղաամ, եւ ասեն ցնա. ա́յսպէս ասէ բաղակ սեպփովրեան. աղաչե́մ զքեզ՝ մի́ դանդաղիցիս գալ առիս.
¹⁷զի պատուելով պատուեցի́ց զքեզ, եւ զոր ինչ ասիցես արարի́ց քեզ. եւ արդ՝ ե́կ անէ́ծ ինձ զժողովուրդս զայս։

¹⁸Պատասխանի ետ բաղաամ եւ ասէ ցիշխանսն բաղակայ. եթէ տացէ ինձ բաղակ լի́ տամբ իւրով արծաթ եւ ոսկի, ո́չ կարացից անցանել զբանիւ տ(եառ)ն ա(ստուծո)յ, առնել զնա փոքր կամ մեծ մտօք իմովք։
¹⁹Եւ արդ՝ ագերո́ւք դուք աստ զգիշերս զայս. եւ գիտացի́ց զի́նչ յաւելցէ տ(է)ր խօսել ընդիս։
²⁰Եւ եկն ա(ստուա)ծ առ բաղաամ ՛ի գիշերին՝ եւ ասէ ցնա. եթէ կոչե́լ զքեզ եկեալ են արքդ այդոքիկ, արի́ երթ զկնի դոցա. բայց զբանն որ ե́ս խօսեցայց ընդ քեզ՝ զա́յն արասցես։
²¹Եւ յարուցեալ բաղաամ ընդ առաւօտն հանդերձեաց զէշ իւր, եւ գնա́ց ընդ իշխանսն մովաբու։

²²Եւ բարկացաւ սրտմտու(թեամ)բ ա(ստուա)ծ ընդ երթալն նորա. եւ եկաց հրեշտակ ա(ստուծո)յ լինե́լ նմա բանսարկու։ եւ նա հեծեալ էր ՛ի վերայ իշոյ իւրոյ, եւ երկո́ւ պատանիք ն(ո)ր(ա) ընդ նմա։
²³Եւ տեսեալ իշոյն զհրեշտակ ա(ստուծո)յ զի կայր նմա ընկիճեալ ՛ի ճանապարհին, եւ սուսեր մե́րկ ՛ի ձեռին իւրում, խուսեա́ց էշն ՛ի ճանապարհէն՝ եւ երթայր ընդ դաշտն։ եւ եհար գաւազանաւ զէշն ուղղե́լ զնա ՛ի ճանապարհն։
²⁴Եւ եկաց հրեշտակն ա(ստուծո)յ յառուամէջս այգեացն. եւ է́ր ցանգ աստի՝ եւ ցանգ անտի։
²⁵եւ տեսեալ իշոյն զհրեշտակն ա(ստուծո)յ՝ նեղեաց զինքն ը(ստ) որմնն եւ ճմլեաց զոտն բաղաամու. եւ յաւե́լ եւս հարկանել զնա։

²⁶Եւ յաւել հրեշտակն ա(ստուծո)յ երթալ կալ ՛ի նե́ղ տեղւոջ. ուստի ո́չ գոյր խուսել յա́ջ կամ յահեակ։
²⁷Եւ տեսեալ իշոյն զհրեշտակն ա(ստուծո)յ, նստաւ ընդ բաղաամու. եւ բարկացաւ բաղաամ, եւ եհա́ր զէշն գաւազանաւ։
²⁸Եւ եբա́ց ա(ստուա)ծ զբերան իշոյն, եւ ասէ́ ցբաղաամ. զի՞նչ արարի քեզ զի հարեր զիս այս երի́ցս անգամ։
²⁹Եւ ասէ բաղաամ ցէշն. փոխանակ զի խա́ղ արարեր զիս։ եւ եթէ է́ր սուր ՛ի ձեռին իմում, արդ եւ խոցեալ էր իմ զքեզ։
³⁰Եւ ասէ էշն ցբաղաամ. ո՞չ ես այն էշ եմ քո՝ յորում հեծանէիր ՛ի մանկութ(են)է քումմէ մինչեւ ցայսօր ժամանակի. միթէ յուլանալով յուլացա՞յ ինչ երբէք առնել քեզ այսպէս։ եւ նա ասէ՝ ոչ։

³¹եւ եբա́ց ա(ստուա)ծ զաչս բաղաամու, եւ ետե́ս զհրեշտակն տ(եառ)ն ընկիճեալ նմա ՛ի ճանապարհին, եւ սուսեր մե́րկ ՛ի ձեռին իւրում։ եւ անկեալ ՛ի վ(ե)ր(այ) երեսաց իւրոց երկիր եպագ նմա։
³²Եւ ասէ ցնա հրեշտակն ա(ստուծո)յ. ը(ստ)է՞ր հարեր դու ցէշդ՝ այս երի́ցս անգամ. եւ ահա ելի́ ես ՛ի բանսարկութի(ւն) քեզ, զի ո́չ է ճանապարհդ քո ուղիղ առաջի իմ.
³³եւ տեսեալ զիս իշոյդ՝ խուսափեա́ց յինէն այս երի́ցս անգամ. եւ եթէ չէ́ր խուսափեալ յինէն, արդ՝ իմ զքեզ սպանեալ էր, եւ զդա ապրեցուցեալ։
³⁴Եւ ասէ բաղաամ ցհրեշտակն տ(եառ)ն. մեղա́յ. զի ո́չ գիտէի՝ թէ դու ինձ ընկիճեալ կայցես ՛ի ճանապարհիս։ եւ արդ՝ եթէ չիցէ́ քեզ հաճոյ՝ դարձա́յց անդրէն։

³⁵Եւ ասէ հրեշտակն ա(ստուծո)յ ցբաղաամ. ե́րթ դու ընդ արսդ ը(ստ) այդոսիկ. բայց բանի զոր ես ասացից քեզ, ա́յնմ զգոյշ լինիջիր խօսելոյ։ եւ գնաց բաղաամ ը(ստ) իշխանսն բաղակայ։
³⁶Եւ լուեալ բաղակայ եթէ գա́յ բաղաամ, ե́լ նմա ը(ստ) առաջ ՛ի քաղաքն մովաբու՝ որ է ՛ի սահմանս առնոնայ յեզեր միում սահմանացն։
³⁷Եւ ասէ բաղակ ցբաղաամ. ո՞չ առաքեցի առ քեզ կոչել զքեզ. ընդէ՞ր ո́չ գայիր առիս, որպէս թէ ո՞չ էի արդեւք կարօղ պատուել զքեզ։
³⁸Եւ ասէ բաղաամ ցբաղակ. ահաւասիկ եկի́ առ քեզ. արդ՝ կարօ՞ղ իցեմ խօսել բա́ն ինչ, բայց եթէ զոր արկանիցէ ա(ստուա)ծ ՛ի բերան իմ զա́յն խօսեցայց։
³⁹Եւ գնաց բաղաամ ընդ բաղակայ, եւ եկն ՛ի քաղաքս հանգրուանացն։

⁴⁰Եւ եզեն բաղակ զարջառ եւ ոչխար, եւ առաքեաց բաղաամու եւ իշխանացն որ ընդ նմա էին։
⁴¹եւ իբրեւ ա́յգ եղեւ, առեալ ընդ իւր բաղակայ զբաղաամ եհա́ն զնա յարձանն բահաղու. եւ եցո́յց նմա անտի զմասն ինչ ժողովրդեանն։

¹Եւ ասէ բաղաամ ցբաղակ. շինեա́ ինձ աստ եւթն բագին., եւ պատրաստեա́ դու ինձ աստ՝ եւթն զուարակ եւ եւթն խոյ։
²Եւ արար բաղակ որպէս եւ ասաց նմա բաղաամ. եւ եհան զուարակ եւ խոյ ՛ի բագինն։
³Եւ ասէ բաղաամ ցբաղակ. կա́ց ՛ի վ(ե)ր(այ) զոհիդ քո, եւ ես երթայց՝ թերեւս յայտնեսցի́ ինձ ա(ստուա)ծ ընդ առա́ջ ելեալ. եւ բան զոր ցուցցէ ինձ՝ պատմեցի́ց քեզ։ եւ եկաց բաղակ ՛ի վ(ե)ր(այ) զոհին իւրոյ։ Եւ գնաց բաղաամ հարցանել զա(ստուա)ծ։
⁴եւ երթայր ուղղորդ. եւ երեւեցաւ ա(ստուա)ծ բաղաամու։ եւ ասէ բաղաամ, եւթն բագին պատրաստեցի, եւ հանի զուարակ եւ խոյ ՛ի բագին մի։
⁵Եւ արկ ա(ստուա)ծ բա́ն ՛ի բերան բաղաամու, եւ ասէ. դարձի́ր առ բաղակ, եւ ա́յսպէս խօսեսցիս։

⁶եւ դարձաւ առ նա. եւ նա կա́յր ՛ի վ(ե)ր(այ) ողջակիզացն իւրոց. եւ ա(մենայ)ն իշխանքն մովաբացւոց ընդ նմա։
⁷Եւ եղեւ հոգի ա(ստուծո)յ ՛ի վ(ե)ր(այ) ն(ո)ր(ա), եւ ամբարձեալ զառակս իւր՝ ասէ։ ՛Ի միջագետա́ց կոչեաց զիս բաղակ արքայ մովաբացւոց, ՛ի լերանցն արեւելից, եւ ասէ՝ եկ նզովեա́ դու ինձ զյակոբ. եւ ե́կ անէ́ծ ինձ զի(սրա)էլ։
⁸Զի՞նչ նզովեցից՝ զոր ո́չ նզովէ տ(է)ր. կամ զի՞չ անիծեցից՝ զոր ոչ անիծանէ ա(ստուա)ծ.
⁹զի ՛ի լերա́նց տեսի զնա, եւ ՛ի բլրոց յառաջագոյն հայեցայ ՛ի նա։ եւ ահա ժողովուրդ բնակեսցէ առանձինն, եւ ընդ ազգս մի́ համարեսցի։

¹⁰Ո́ ճշգրտեաց զզաւակն յակոբայ, եւ ո́ համարեսցի զգունդսն ի(սրաէ)լի. մեռցի́ անձն իմ ընդ անձինս արդարոցն, եւ եղիցի զաւա́կ իմ իբրեւ զզաւակ նոցա։
¹¹Եւ ասէ բաղակ ցբաղաամ. զի՞նչ գործեցեր ընդիս. յանիծանել թշնամեաց կոչեցի զքեզ, եւ դու օրհնեցեր օրհնութի՞։
¹²Եւ ասէ բաղաամ ցբաղակ. ո́չ ապաքէն զինչ արկանիցէ ա(ստուա)ծ ՛ի բերան իմ՝ զայն զգուշացայց խօսել։
¹³Եւ ասէ ցնա բաղակ. ե́կ դարձեալ ընդիս յա́յլ տեղի, ուստի ո́չ տեսանիցես զնա. այլ զմա́սն ինչ ՛ի նմանէ տեսանիցես. եւ զամենեսեան ո́չ տեսանիցես, եւ անէ́ծ ինձ զնա անտի։
¹⁴Եւ ա́ռ գնաց զնա յագարակս գիտանոցին, ՛ի կատա́ր կոփածոյին, եւ շինեաց անդ եւթն բագին, եւ եհան զուարակ եւ խո́յ ՛ի բագինն։

¹⁵Եւ ասէ բաղաամ ցբաղակ. կա́ց ՛ի վ(ե)ր(այ) զոհիդ քոյ, եւ ես երթայց հարցանե́լ զա(ստուա)ծ։
¹⁶Եւ ը(ստ) առա́ջ եղեւ ա(ստուա)ծ բաղաամու, եւ արկ բան ՛ի բերա́ն ն(ո)ր(ա). եւ ասէ, դարձի́ր անդրէն առ բաղակ, եւ ա́յսպէս խօսեսցիս։
¹⁷եւ դարձաւ առ նա. եւ նա կա́յր ՛ի վ(ե)ր(այ) ողջակիզին իւրոյ, եւ ա(մենայ)ն իշխանքն մովաբացւոց ը(ստ) նմա։ Եւ ասէ ցնա բաղակ. զի՞նչ խօսեցաւ տ(է)ր։
¹⁸եւ ամբարձեալ զառակս իւր՝ ասէ։ Արի́ բաղակ եւ լո́ւր. ո́ւնկն դիր վկայդ որդիդ սեպփովրայ.
¹⁹ո́չ իբրեւ զմարդ է ա(ստուա)ծ ՛ի զարթնուլ, եւ ո́չ իբրեւ զորդի մարդոյ ՛ի սպառնալ, դու ասացեր թէ ո́չ արասցէ, խօսեսցի եւ ո́չ կացուսցէ։
²⁰ահա՝ յօրհնե́լ առեալ եմ. օրհնեցից եւ ո́չ դարձուցից։

²¹Ո́չ լիցի աշխատութի(ւն) ՛ի յակոբ, եւ մի́ երեւեսցի վաստակ ՛ի մէջ ի(սրաէ)լի։ տ(է)ր ա(ստուա)ծ ն(ո)ր(ա) ը(ստ) նմա́. փառաւորու(թ)ի(ւն)ք իշխանաց ՛ի նմա.
²²եւ ա(ստուա)ծ որ եհա́ն զն(ո)ս(ա) յեգիպտոսէ՝ իբրեւ փա́ռք միեղջեւրու ՛ի վ(ե)ր(այ) ն(ո)ր(ա)։
²³Զի ո́չ գոն հմայք ՛ի յակոբ՝ եւ ո́չ ըղձութի(ւն)ք ՛ի մէջ ի(սրաէ)լի. ըստ ժամանակի պատմեսցի յակոբայ՝ եւ ի(սրաէ)լի զինչ կատարելոց իցէ ա(ստուա)ծ։
²⁴Ահա ժողովուրդն իբրեւ զկորի́ւն առիւծու յարիցէ, իբրեւ զառեւծ նազեսցի. եւ ո́չ ննջիցէ մինչեւ կերիցէ ո́րս, եւ զարիւն վիրաւորաց արբցէ։
²⁵Եւ ասէ բաղակ ցբաղաամ. մի́ անիծանելով անիծաներ ինձ զնա, եւ մի́ օրհնելով օրհնեսցես զնա։

²⁶Պատասխանի́ ետ բաղաամ եւ ասէ ցբաղակ. ո՞չխօսեցայ ընդ քեզ բանս՝ եւ ասեմ, թէ զոր ինչ խօսեսցի ընդիս ա(ստուա)ծ՝ զա́յն արարից։
²⁷Եւ ասէ բաղակ ցբաղաամ. ե́կ տարայց զքեզ յա́յլ տեղի՝ թերեւս հաճո́յ լիցի ա(ստուծո)յ, եւ անիծանիցե́ս ինձ զն(ո)ս(ա) անտի։
²⁸եւ տարաւ բաղակ զբաղաամ ՛ի կատարն փոգովրայ՝ որ ձգի յանապատն։
²⁹Եւ ասէ բաղաամ ցբաղակ. շինեա́ ինձ աստ եւթն բագին, եւ պատրաստեա́ ինձ աստ եւթն զուարակ եւ եւթն խոյ։
³⁰Եւ արար բաղակ որպէս եւ ասաց նմա բաղաամ, եւ եհա́ն զուարակ եւ խոյ ՛ի բագինն։

¹Եւ տեսեալ բաղաամու թէ բարւոք թուի առաջի տ(եառ)ն օրհնել զի(սրա)էլ, ո́չ չոգաւ ըստ սովորութե(ա)ն ընդ առա́ջ հմայիցն, դարձո́յց զերեսս իւր յանապատն։
²Եւ ամբարձեալ բաղաամու զաչս իւր ետես զի(սրա)էլ բանակեալ ըստ ցեղի́ց ցեղի́ց։ եւ եղեւ հոգի ա(ստուծո)յ ՛ի վ(ե)ր(այ) ն(ո)ր(ա),
³եւ ամբարձեալ զառակս իւր՝ ասէ. Ասէ́ բաղաամ որդի բէովրայ.
⁴ասէ այրն ճշմարտապէս. որ զտեսիլ ա(ստուծո)յ ետես ՛ի քուն աչօք իւրովք բացօք։
⁵Իբրեւ զի գեղեցի́կ են տունք քո յակոբ եւ խորանք քո ի(սրա)էլ.
⁶իբրեւ զանտա́ռս հովանաւորս, եւ իբրեւ զբուրաստա́նս առ գետովք, եւ իբրեւ զխորա́նս զոր կանգնեաց տ(է)ր, եւ իբրեւ զմա́յրս ՛ի գնացս ջուրց։

⁷Եւ ելցէ́ այր ՛ի զաւակէ ն(ո)ր(ա), եւ տիրեսցէ́ ազգաց բազմաց. եւ բարձրասցի́ քան զովգայ թագաւորութի(ւն) ն(ո)ր(ա). եւ աճեսցէ́ թագաւորութի(ւն) նորա։
⁸ա(ստուա)ծ առաջնորդեա́ց նմա յեգիպտոսէ. իբրեւ փառք միեղջեւրու ՛ի վ(ե)ր(այ) ն(ո)ր(ա)։ կերիցէ́ զազգս թշնամեաց իւրոց, եւ զպարարտութի(ւն) ն(ո)ց(ա) ուղղածո́ւծ արասցէ. եւ նետիւք իւրովք նետաձի́գ լիցի ՛ի թշնամիս։
⁹եւ բազմեալ հանգեա́ւ իբրեւ զառեւծ, եւ իբրեւ զկորիւն առիւծու, եւ ո́ յարուցանիցէ զնա. օրհնիչք քո՝ օրհնեսցին, եւ անիծիչք քո՝ անիծցի́ն։
¹⁰Եւ բարկացաւ բաղակ բաղաամու, եւ ծա́փ զծափի հարկանէր. եւ ասէ բաղակ ցբաղաամ. անիծանե́լ զթշնամիս իմ կոչեցի զքեզ, եւ ահա օրհնելով օրհնեցե́ր զնա՝ այս երի́ցս անգամ։

¹¹Եւ արդ՝ փախի́ր դու ՛ի տեղի քո։ ասացի պատուե́լ զքեզ, եւ վրիպեցո́յց զքեզ տ(է)ր ՛ի փառաց։
¹²Եւ ասէբաղաամ ցբաղակ. ո՞չ եւ ընդ հրեշտակսն քո զոր առաքեցեր առ իս՝ խօսեցայ եւ ասացի.
¹³թէ տացէ ինձ բաղակ լի́ տամբ իւրով արծաթ եւ ոսկի, ո́չ կարիցեմ անցանել զբանիւ տ(եառ)ն, առնել զնա չար կամ բարի յանձնէ իմմէ. այլ զորինչ ասիցէ ա(ստուա)ծ՝ զա́յն խօսեցայց։
¹⁴եւ արդ՝ ահա գնա́մ ՛ի տեղի իմ։ Ե́կ տաց քեզ խրատ, թէ զի́նչ առնելոց է ժողովուրդն այն ընդ ժողովուրդ քո ՛ի վախճանի աւուրց։
¹⁵եւ ամբարձեալ զառակս իւր՝ ասէր։ Ասէ́ բաղաամ որդի բէովրայ. ասէ այրն ճշմարտապէս.

¹⁶որ լուաւ զպատգամս ա(ստուծո)յ, եւ հմո́ւտ է գիտու(թ)ե(ան) բարձրելոյ. եւ զտեսիլ ա(ստուծո)յ ետես ՛ի քուն աչօք իւրովք բացօք։
¹⁷Ցուցի́ց նմա՝ եւ ո́չ այժմ. երանեցի́ց, եւ ո́չ ՛ի մօտոյ։ Ծագեսցէ́ ա́ստղն յակոբայ, եւ յարիցէ ա́յր յ(թ)ի(ւն)լէ, եւ հարցէ́ զիշխանս մովաբայ. եւ առցէ աւա́ր զա(մենայ)ն որդիս սեթայ։
¹⁸եւ եղիցի նմա եդոմն ժառանգութի(ւն) եսաւա́յ թշնամոյ իւրոյ. եւ ի(սրա)էլ արար զօրութ(եամ)բ։
¹⁹եւ յարիցէ ա́յր ՛ի յակոբայ, եւ կորուսցէ զապրեալսն ՛ի քաղաքէ անտի։
²⁰Եւ տեսեալ զամաղէկ, ամբարձեալ զառակս իւր՝ ասէ. գլո́ւխ ազգաց ամաղէկ, եւ զաւակ նոցա կորիցէ́։
²¹Եւ տեսեալ զկինեցին, ամբարձեալ զառակս իւր՝ ասէ. հզօ́ր է բնակութի(ւն) քո. եւ թէ դիցես ՛ի քարանձաւս զբոյն քո,

²²եւ թէ լիցի ՛ի բէովր բոյն խարդախութե(ան) քոյ, ասորեստանեայք գերեսցեն։
²³Եւ ամբարձեալ զառակս իւր ասէ. Ո́ ոք կեցցէ յորժամ դնիցէ զայն ա(ստուա)ծ,
²⁴եւ ելցէ ՛ի ձեռաց կիտացւոց, եւ չարչարեսցեն զասուր. եւ չարչարեսցեն զեբրայեցիս։ եւ ինքեանք միանգամա́յն կորիցեն։
²⁵Եւ յարուցեալ բաղաամ դարձա́ւ ՛ի տեղի իւր։ եւ բաղակ գնաց ը(ստ) իւր կողմն։

¹Եւ բանակեցաւ ի(սրա)էլ ՛ի սատտիմ։. եւ պղծեցաւ ժողովուրդն պոռնկել ընդ դստերսն մովաբու։
²եւ կոչեցին զն(ո)ս(ա) ՛ի զոհս կռոց իւրեանց, եւ եկե́ր ժողովուրդն ՛ի զոհից ն(ո)ց(ա), եւ երկի́ր պագին կռոց ն(ո)ց(ա)։
³եւ նուիրեցաւ ի(սրա)էլ բէլփադովրայ. եւ բարկացաւ սրտմտու(թեամ)բ տ(է)ր ՛ի վ(ե)ր(այ) ի(սրաէ)լի։
⁴Եւ ասէ տ(է)ր ցմովսէս. ա́ռ զա(մենայ)ն իշխանս ժողովրդեանդ, եւ առակեա́ զդոսա առաջի տ(եառ)ն յանդիման արեգական. եւ դարձցի սրտմտու(թ)ի(ւն) բարկու(թ)ե(ան) տ(եառ)ն յի(սրաէ)լէ։
⁵Եւ ասէ մովսէս ցցեղսն ի(սրաէ)լի. կոտորեցէ́ք իւրաքանչիւր զընտանի իւր զնուիրեալ բէլփագովրայ։

⁶Եւ ահա այր ի(սրա)էլացի, գա́յր ածէր զեղբայր իւր առ կին մադիանացի յանդիմա́ն մովսիսի, եւ յանդիման ա(մենայ)ն ժողովրդեան որդւոցն ի(սրաէ)լի. եւ ն(ո)ք(ա) լային առ դրան խորանին վկայութե(ան)։
⁷Եւ տեսեալ փենեէսի որդւոյ եղիազարու որդւոյ ահարոնի քահանայի, յարեա́ւ ՛ի միջոյ ժողովրդեանն, եւ առեալ գեղարդն ՛ի ձեռն իւր,
⁸եւ եմուտ զհետ առնն ի(սրա)էլացւոյ ՛ի հնոցն, եւ խոցեաց զերկոսին զայրն ի(սրա)էլացի՝ եւ զկինն ընդ արգանդ իւր. եւ դադարեա́ց հարուածն յորդւոցն ի(սրաէ)լի։
⁹Եւ եղեն մեռեալքն ՛ի հարուածոցն յայնցանէ քսան եւ չորք քազարք։
¹⁰Եւ խօսեցաւ տ(է)ր ը(ստ) մովսիսի՝ եւ ասէ.

¹¹փենեէս՝ որդի եղիազարու, որդւոյ ահարոնի քահանայի՝ ցածոյց զսրտմտութի(ւն) իմ յորդւոցն ի(սրաէ)լի, ՛ի նախանձեցուցանե́լ ինձ զնախանձն իմ ՛ի ն(ո)ս(ա). եւ ո́չ սատակեցից զորդիսդ ի(սրաէ)լի նախանձու իմով։
¹²Եւ արդ՝ ա́յսպէս ասասցես. ահա ես տա́ց նմա ուխտ խաղաղութե(ան).
¹³եւ եղիցի նմա եւ զաւակի́ ն(ո)ր(ա) յետ ն(ո)ր(ա) ուխտ քահանայու(թ)ե(ան) յաւիտենական. փոխանակ զի քինախնդիր եղեւ ա(ստուծո)յ իւրում. եւ քաւեաց վ(ա)ս(ն) որդւոցն ի(սրաէ)լի։
¹⁴Եւ անուն առն ի(սրա)էլացւոյ հարելոյ որ հարաւ ընդ կնոջն մադիանացւոյ՝ զամբրի որդի սաղովմայ, իշխան տան ազգի որդւոցն շմաւոնի։

¹⁵եւ անուն կնոջն մադիանացւոյ հարելոյ՝ քազբի դուստր սուրայ իշխանի ազգի́ն ամովթայ՝ տան նահապետութե(ան) մադիամու։
¹⁶Եւ խօսեցաւ տ(է)ր ընդ մովսիսի՝ եւ ասէ.
¹⁷խօսեա́ց ընդ որդիսն (թ)ի(ւն)Լի՝ եւ ասասցես. թշնամեցա́յք ը(ստ) մադիանացիսն, եւ հարկանիցէ́ք զն(ո)ս(ա).
¹⁸զի թմնամի́ են նոքա ընդ ձեզ նենգութ(եամ)բ. որ նենգեցին զձեզ փոգորաւ, եւ քաղբեաւ դստերբ իշխանին մադիամու քերբն իւրեանց հարելով յաւուրն հարուածոց վ(ա)ս(ն) փոգովրայ։

¹Եւ եղեւ յետ հարուածոցն։
²Կա́լ զհամար ա(մենայ)ն ժողովրդեան որդւոցն ի(սրաէ)լի, ՛ի քսանամենից եւ ՛ի վեր. ըստ տանց նահապետաց իւրեանց, ա(մենայ)ն որ ելանիցէ յի(սրաէ)լէ տալ պատերազմ։
³Եւ խօսեցան մովսէս եւ եղիազար քահանայ, յռաբովթ մովաբու առ յորդանանաւ յանդիման երեքոյի՝ եւ ասեն։
⁴՛Ի քսանամենից եւ ՛ի վեր, ո(ր)պ(էս) հրաման ետ տ(է)ր մովսիսի. դու եւ որդիքն ի(սրաէ)լի ելեալքդ յեգիպտոսէ
⁵կազմեցարո́ւք։ Ռուբէն անդրանիկ ի(սրաէ)լի. եւ որդիք ռուբինի, ենոք, եւ գունդն ենոքայ. փալլուս, եւ գունդն փալլուսայ. քարմի, եւ գունդն քարմեայ։
⁶ասրոմ, եւ գունդն ասրոմայ։

⁷Սոքա են գունդք ռուբինի. եւ եղեւ հանդէս ն(ո)ց(ա). քառասուն եւ երեք հազարք եւթն հարիւր եւ երեսուն։
⁸Եւ որդիք փալլուսայ եղիաբ.
⁹եւ որդիք եղիաբու՝ յամուէլ, եւ դաթան եւ աբիրոն. սոքա էին անուանիք ժողովրդեանն. եւ սոքա են՝ որ յարեան ՛ի վ(ե)ր(այ) մովսիսի եւ ահարոնի ՛ի ժողովրդեանն կորխայ յարուցելոց հակառակ տ(եառ)ն,
¹⁰եւ բացեալ երկրի զբերան իւր եկո́ւլ զնոսա, եւ զկորխ՝ մահուամբ ժողովրդեանն իւրոյ. յորժամ եկեր հուր զերկերիւր եւ զյիսունսն. եւ եղեն ՛ի նշաւակ։
¹¹եւ որդիքն կորխայ ո́չ մեռան։
¹²Եւ որդիք Շմաւոնի. եւ գունդք որդւոցն շմաւոնի, յամուէլ, եւ գունդ մի յամուէլի. յամին, եւ գունդ մի յամինայ. յաքին, եւ գունդ մի յաքինայ.

¹³զարա, եւ գունդ մի զարայի. մաւուլ, եւ գունդ մի մաւուլայ։
¹⁴Ա́յս են գունդք շմաւոնի ՛ի հանդիսի իւրեանց. քսանեւերկու հազարք եւ երեք հարիւր։
¹⁵Եւ որդիք Գադայ՝ ըստ գնդից իւրեանց. սափոն, եւ գունդ մի սափոնայ. անգի, եւ գունդ մի անգեայ. սունի, եւ գունդ մի սունեայ.
¹⁶ազենի, եւ գունդ մի ազենեայ. ադդի, եւ գունդ մի ադդեայ.
¹⁷արուադի, եւ գունդն արուադեայ. արիէլ, եւ գունդ մի արիէլի։
¹⁸Սոքա́ են գունդք որդւոցն գադայ ՛ի հանդիսի իւրեանց. քառասուն եւ չորք հազարք եւ հինգհարիւր։
¹⁹Եւ որդիք Յուդայ՝ էր, եւ աւնան, եւ սելոմ, եւ փարէս, եւ զարա։ եւ մեռան՝ է́ր եւ աւնան յերկրին քանանացւոց։

²⁰Եւ եղեն որդիք յուդայի ըստ գնդից իւրեանց. սելոմ, եւ գունդ մի սելոմայ. փարէս, եւ գունդ մի փարէսի. զարա, եւ գունդ մի զարայի։
²¹Եւ եղեն որդիք փարէսի. ասրոն, եւ գունդ մի ասրոնի. յամուէլ, եւ գունդ մի յամուէլի։
²²Սոքա́ են գունդք յուդայ ըստ հանդիսի իւրեանց. եւթանասուն եւ վեց հազար եւ հինգհարիւր։
²³Եւ որդիք Իսաքարու՝ ըստ գնդից իւրեանց. թովլա, եւ գունդ մի թովլայի. փուա, եւ գունդ մի փուայի.
²⁴յասուր, եւ գունդ մի յասուրայ. ամրան, եւ գունդ մի ամրանայ։
²⁵Սոքա́ են գունդք իսաքարու ՛ի հանդիսի իւրեանց. վաթսուն եւ չորք հազարք եւ երեք հարիւր։

²⁶Եւ որդիք Զաբուղոնի՝ ըստ գնդից իւրեանց. սարեդ, եւ գունդ մի սարեդայ. ալլոն, եւ գունդ մի ալլոնի. աղէլ, եւ գունդ մի աղէլայ։
²⁷Սոքա́ են գունդք զաբուղոնի ՛ի հանդիսէ իւրեանց. վաթսուն հազար եւ հինգ հարիւր։
²⁸Եւ որդիք յովսեփայ ը(ս)տ գնդից իւրեանց՝ մանասէ, եւ եփրեմ։
²⁹Եւ որդիք Մանասէի. մաքիր, եւ գունդ մի մաքիրայ։ եւ մաքիր ծնաւ զգաղաադ. գաղաադ, եւ գունդ մի գաղաադու։
³⁰Եւ որդիք գաղաադու. աքիեզեր, եւ գունդ մի աքիեզերայ. քեղէգ, եւ գունդ մի քեղեգեայ.
³¹եսրիէլ, եւ գունդ մի եսրիելի. սիւքէմ, եւ գունդ մի սիւքեմայ.
³²սիմայի, եւ գունդ մի սիմայեայ. ոփեր, եւ գունդ մի ոփերայ։

³³սաղպաադայ որդւոյ սփերայ ո́չ եղեն ուստերք, այլ դստերք։ եւ անուն դստերացն սաղպաադայ. մաաղա, եւ նուա, եւ էգղա, եւ մեղքա, եւ թերսա։
³⁴Ա́յս գունդք մանասէի ՛ի հանդիսէ իւրեանց. յիսուն եւ երկու հազարք եւ եւթնհարիւր։
³⁵Եւ ա́յս են որդիք Եփրեմայ. սուտաղա, եւ գունդ մի սուտաղայի. տանաք, եւ գունդ մի տանաքայ։
³⁶Սոքա́ են որդիք սուտաղայի. եդեն, եւ գունդ մի եդենայ։
³⁷Ա́յս գունդք եփրեմայ ՛ի հանդիսէ իւրեանց. երեսուն եւ երեք հազարք եւ հինգ հարիւր։ սոքա́ են գունդք յովսեփայ ը(ս)տ գնդից իւրեանց։
³⁸Եւ որդիք Բենիամինի ըստ գնդից իւրեանց. բալէ, եւ գունդ մի բալեայ. ասբեր, եւ գունդ մի ասբերայ. յաքերան, եւ գունդ մի յաքերանայ.

³⁹սափան, եւ գունդ մի սափանայ։
⁴⁰Եւ եղեն որդիք բալեայ. ադար, եւ նոյեման, եւ գունդ մի նոյեմանեայ։
⁴¹Ա́յս որդիք բենիամինի, ըստ գնդից իւրեանց ՛ի նադիսէ իւրեանց. երեսուն եւ հինգհազար եւ հինգհարիւր։
⁴²Եւ որդիք Դանայ՝ ըստ գնդից իւրեանց. սամի, եւ գունդ մի սամեայ։ ա́յս են գունդք դանայ ըստ գնդից իւրեանց։
⁴³ա(մենայ)ն գունդք սամեայ ըստ հանդիսի իւրեանց, վաթսուն եւ չորք հազարք եւ վեցհարիւր։
⁴⁴Եւ որդիքն Ասերայ՝ ը(ս)տ գնդից իւրեանց. յամին, եւ գունդ մի յամինայ. յեսու, եւ գունդ մի յեսուայ. բարա, եւ գունդ մի բարայի.
⁴⁵քոբէր, եւ գունդ մի քոբերայ. մելքիէլ, եւ գունդ մի մելքիելի։
⁴⁶Եւ անուն դստերն ասերայ՝ սարա։

⁴⁷Սոքա́ են գունդք ասերայ ՛ի հանդիսէ իւրեանց. քառասուն եւ երեք հազարք եւ վեցհարիւր։
⁴⁸Եւ որդիք Նեփթաղիմայ՝ ըստ գնդից իւրեանց. ասէլ, եւ գունդ մի ասելի. գաւնի, եւ գունդ մի գաւնեայ։
⁴⁹յասեր, եւ գունդ մի յասերայ. սելլեմ, եւ գունդ մի սելլեմայ։
⁵⁰Ա́յս գունդք նեփթաղիմայ ՛ի հանդիսէ իւրեանց, քառասուն հազար եւ երեք հարիւր։
⁵¹Ա́յս է հանդէս որդւոցն ի(սրաէ)լի. վեցհարիւր հազար, եւ հազար մի. եւ եւթն հարիւր եւ երեսուն։
⁵²Եւ խօսեցաւ տ(է)ր ընդ մովսիսի՝ եւ ասէ։
⁵³Դոցա́ բաժանեսցի երկիրն ժառանգել ը(ս)տ թուոյ անուանց.

⁵⁴ըստ բազմաց՝ բազմացուսցե́ս զժառանգու(թ)ի(ւն)ն. եւ ը(ս)տ սակաւուց՝ սակաւացուսցես զժառանգու(թ)ի(ւն) իւրեանց։ իւրաքանչիւր ո(ր)պ(էս) եւ անցին ՛ի հանդիսի՝ տացի́ ժառանգութի(ւն)ն իւրեանց։
⁵⁵Վիճակօք ժառանգեսցի երկիրն, ըստ անուանց, ըստ ցեղից նահապետաց իւրեանց ժառանգեսցեն։
⁵⁶վիճակաւ բաժանեսցեն զժառանգութի(ւն) ն(ո)ց(ա) ՛ի մէջ բազմաց եւ սակաւուց։
⁵⁷Եւ որդիքն Ղեւեայ ըստ գնդից իւրեանց. գեթսոն, եւ գունդ մի գեթսոնի. կահաթ, եւ գունդ մի կահաթու. մերարի, եւ գունդ մի մերարեայ։
⁵⁸Սոքա́ են գունդք որդւոց ղեւեայ. գունդ մի ղուբինի, եւ գունդ մի քեբրոնի. եւ գունդ մի կորխ. գունդ մի մուսի։ Եւ կահաթ ծնաւ զամրամ.

⁵⁹եւ անուն կնոջ ն(ո)ր(ա) յովքաբեթ՝ դուստր ղեւեայ. որ ծնաւ զսոսա ղեւեայ յեգիպտոս։ եւ ծնաւ ամրամայ զահարոն, եւ զմովսէս, եւ զմարիամ քոյր ն(ո)ց(ա)։
⁶⁰Եւ ծնան ահարոնի նաբադ եւ աբիուդ, եղիազար եւ իթամար։
⁶¹եւ մեռան նաբադ եւ աբիուդ, ՛ի մատուցանել իւրեանց զհուրն օտար առաջի տ(եառ)ն յանապատին սինայի։
⁶²Եւ եղեն ՛ի հանդիսէն իւրեանց քսան եւ երեք հազարք. ա(մենայ)ն արու յամսօրէից եւ ՛ի վեր։ քանզի ո́չ անցին ՛ի հանդիսի ՛ի մէջ որդւոց ի(սրաէ)լի. զի ո́չ էր նոցա տուեալ վիճակ ՛ի մէջ որդւոցն ի(սրաէ)լի։
⁶³Եւ ա́յս է հանդէս մովսիսի եւ եղիազարու քահանայի. որ արարին հանդէս որդւոցն ի(սրաէ)լի յռաբովթ մովաբու առ յորդանանու՝ յանդիման երեքոյի։

⁶⁴Եւ ընդ նոսա մի այր ո́չ գոյր յանցելոցն ՛ի հանդիսի ՛ի մովսիսէ եւ յահարոնէ՝ զոր արարին հանդէս որդւոցն ի(սրաէ)լի յանապատին սինայի։
⁶⁵Քանզի ասաց զնոցանէ տ(է)ր թէ մահո́ւ մեռանիցին յանապատին, եւ ո́չ մնաց ՛ի նոցանէ եւ ո́չ մի. բայց քաղէբ որդի յեփոնեայ, եւ յեսու որդի նաւեայ։

¹Եւ մատեան դստերքն սաղպաադու որդւոյ ոփերայ, որդւոյ գաղաադու, որդւոյ մաքիրայ, ՛ի գնդէն մանասէի որդւոցն յովսեփայ. եւ այս են անուանք ն(ո)ց(ա). մաաղա, եւ նուա, եւ եգղա, եւ մեղքա, եւ թերսա։
²Կացին առաջի մովսիսի եւ առաջի եղիազարու քահանայի եւ առաջի իշխանացն, եւ առաջի ա(մենայ)ն ժողովրդեանն ՛ի դրան խորանին վկայութե(ան)՝ եւ ասեն։
³Հա́յր մեր մեռաւ յանապատի անդ. եւ նա ո́չ էր ՛ի մէջ ժողովրդեանն գումարելոց առաջի տ(եառ)ն ՛ի ժողովրդեանն կորխայ, որ վ(ա)ս(ն) մեղաց իւրոց մեռաւ. եւ որդիք՝ ո́չ են ն(ո)ր(ա).

⁴Եւ արդ՝ մի́ ջնջեսցի անուն հօր մերոյ ՛ի միջոյ ցեղի իւրոյ՝ վ(ա)ս(ն) զի ո́չ գոյր ն(ո)ր(ա) որդի. տո́ւք մեզ ժառանգութի(ւն) ՛ի մէջ եղբարց հօր մերոյ։
⁵Եւ մատոյց մովսէս զդատաստան ն(ո)ց(ա) առաջի տ(եառ)ն։
⁶Եւ խօսեցաւ տ(է)ր ընդ մովսիսի՝ եւ ասէ։
⁷ուղի́ղ խօսեցան դստերքն սաղպաադու. տալով տացե́ս նոցա կալուածս ժառանգու(թ)ե(ան) ՛ի մէջ եղբարց հօր իւրեանց, եւ դիցես զվիճակ հօրն իւրեանց զնոքօք։
⁸Եւ ընդ որդիսն ի(սրաէ)լի խօսեսցիս եւ ասասցես. ա́յր ոք՝ եթէ մեռանիցի, եւ ուստր ո́չ գուցէ նորա, տացէ́ զժառանգութի(ւն) իւր դստեր իւրում։

⁹եւ եթէ ո́չ գուցէ ն(ո)ր(ա) դուստր, տաջի́ք զժառանգութի(ւն) ն(ո)ր(ա) եղբօր իւրում։
¹⁰Եւ եթէ ո́չ գուցեն ն(ո)ր(ա) եղբարք, տաջի́ք զժառանգութի(ւն) ն(ո)ր(ա) հօրեղբօր իւրոյ.
¹¹եւ եթէ ո́չ գուցեն եղբարք հօր ն(ո)ր(ա), տաջի́ք զժառանգու(թ)ի(ւն)ն ընտանւոյ մերձաւորի նորա. ՛ի ցեղէ́ն ն(ո)ր(ա) ժառանգեսցէ զնորայն. եւ եղիցի ա́յդ որդւոցն իսրայէլի իրաւո́ւնք դատաստանի, որպէս հրաման ետ տ(է)ր մովսիսի։
¹²Եւ ասէ տ(է)ր ցմովսէս. ե́լ դու ՛ի լեառնն որ յայնկոյս է՝ ՛ի լեա́ռն ՛ի նաբաւ՝ եւ տե́ս զերկիրն քանանացւոց զոր ե́ս տաց որդւոցն ի(սրաէ)լի ՛ի կալուած.
¹³տեսցե́ս զնա՝ եւ յաւելցիս առ ժողովուրդ քո եւ դո́ւ, ո(ր)պ(էս) յաւելաւ ահարոն եղբայր քո ՛ի հովր լերինն։

¹⁴Վասն զի անցէք զբանիւ իմով յանապատին ՛ի սին. ՛ի հակառակել ժողովրդեանն առ ՛ի ս(ուր)բ առնելոյ զիս. եւ ո́չ արարէք զիս ս(ուր)բ ՛ի վ(ե)ր(այ) ջրոցն յանդիման ն(ո)ց(ա). ա́յն է ջուր հակառակութե(ան) յանապատին ՛ի սին։
¹⁵Եւ ասէ մովսէս ցտ(է)ր.
¹⁶տեսցէ́ տ(է)ր ա(ստուա)ծ հոգւոց եւ ա(մենայ)ն մարմնոյ՝ ա́յր ՛ի վ(ե)ր(այ) ժողովրդեանս այսորիկ,
¹⁷որ ելանիցէ առաջի սոցա, եւ որ հանիցէ եւ մուծանիցէ զսոսա. եւ մի́ լինիցի ժողովուրդս տ(եառ)ն իբրեւ զոչխար՝ որոց ո́չ իցէ հովիւ։
¹⁸Եւ խօսեցաւ տ(է)ր ընդ մովսիսի՝ եւ ասէ. ա́ռ դու քեզ զյեսու որդի նաւեայ՝ զայր յորում գո́յ հոգի, եւ դիցես զձեռս քո ՛ի վ(ե)ր(այ) ն(ո)ր(ա).

¹⁹եւ կացուսցես զնա յանդիման եղիազարու քահանայի. եւ պատուիրեսցես վ(ա)ս(ն) ն(ո)ր(ա) յանդիման ն(ո)ց(ա).
²⁰եւ տացե́ս ՛ի փառաց քոց ՛ի վերայ ն(ո)ր(ա), զի լուիցեն նմա որդիքն ի(սրաէ)լի։
²¹Եւ կացցէ առաջի եղիազարու քահանայի, եւ հարցցե́ն ՛ի նմանէ զիրաւունս յայտնութե(ան)ց առաջի տ(եառ)ն, ըստ բանի բերանոյ ն(ո)ր(ա) ելանիցեն, եւ ըստ բանի բերանոյ նորա մտանիցեն. ինքն եւ որդի́քն ի(սրաէ)լի միաբան, եւ ա(մենայ)ն ժողովուրդն։
²²Եւ արար մովսէս ո(ր)պ(էս) պատուիրեաց նմա տ(է)ր. եւ առեալ զյեսու կացոյց առաջի եղիազարու որդւոյ ահարոնի քահանայի, եւ առաջի ա(մենայ)ն ժողովրդեանն.

²³եւ եդ զձեռս իւր ՛ի վերայ ն(ո)ր(ա), եւ արար զնա յանձն՝ որպէս պատուիրեաց տ(է)ր մովսիսի։

¹Եւ խօսեցաւ տ(է)ր ընդ մովսիսի՝ եւ ասէ։
²Պատուիրեա́ որդւոցն ի(սրաէ)լի, եւ ասասցես ցն(ո)ս(ա). զպատարագս իմ եւ զդահամունս իմ, եւ զընծայս իմ ՛ի հոտ անուշից՝ զգուշասջիք մատուցանե́լ ՛ի տօնս իմ։
³Եւ ասասցե́ս ցն(ո)ս(ա). ա́յս են ընծայք զոր մատուցանիցէք տ(եառ)ն. գառինս երկուս անարատս հանապազ յողջակէզ անպակաս։
⁴զմի գառնն արասցե́ս ընդ առաւօտս, եւ զերկրորդ գառնն արասցես ընդ երեկոյս։
⁵Եւ արասցես տասանո́րդ դրուի նաշիհ զանգեալ իւղով մղելով՝ չորրորդաւ դորակի,
⁶ողջակէզ անպակասութե(ան). ո(ր)պ(էս) լինէր ՛ի լերինն սինայի ՛ի հո́տ անուշից տ(եառ)ն։

⁷Եւ նուէր նորուն չորրորդ դորակին առ մի գառն ՛ի սրբութե(ա)ն. եւ նուիրեսցե́ս զնուէրն ըմպելի տ(եառ)ն։
⁸եւ զգառնն երկրորդ արասցես ընդ երեկոյս. ըստ զոհին իւրում եւ ըստ նուիրին իւրում արասջիք ՛ի հո́տ անուշից տ(եառ)ն։
⁹Եւ յաւուրն շաբաթուց մատուսջիք երկո́ւս գառինս տարեւորս անարատս, եւ երկո́ւս տասանորդս նաշհւոյ զանգելոյ իւղով ՛ի զոհ.
¹⁰եւ զնուէ́ր ողջակիզին շաբաթուց ՛ի շաբաթս, եւ ՛ի վ(ե)ր(այ) հանապազորդ ողջակիզին, եւ զնորո́ւն նուէր։
¹¹Եւ յամսամուտս մատուսջիք ողջակէզս տ(եառ)ն, զուարակս երկուս յանդւոյ, եւ խոյ մի. գառինս տարեւորս եւթն.

¹²եւ երի́ս տասանորդս նաշհւոյ զանգելոյ իւղով առ զուարակ մի. եւ երկուս տասանորդս նաշհւոյ զանգեալ իւղով առ խոյ մի։
¹³եւ տասանորդ նաշհւոյ զանգեալ իւղով առ գառն մի, ՛ի հո́տ անուշից ընծայ տ(եառ)ն։
¹⁴Եւ նուէր ն(ո)ց(ա) կէ́ս դորակին գինւոյ լիցի առ զուարակ մի, եւ երրորդ դորակին լիցի առ խո́յ մի, եւ չորրորդ դորակին լիցի առ գա́ռն մի։ ա́յս ողջակէզք իցեն ամիս յամսոյ՝ յամիսս տարւոյն։
¹⁵եւ նոխա́զ մի յայծեաց տ(եառ)ն, վ(ա)ս(ն) մեղաց իւրեանց ՛ի վ(ե)ր(այ) հանապազո́րդ ողջակիզին առնիցի, եւ նուէրն ն(ո)ր(ա)։
¹⁶Եւ յամսեանն առաջնում, ՛ի չորեքտասաներորդում աւուր ամսեանն՝ զատի́կ տ(եառ)ն.

¹⁷եւ ՛ի հնգետասաներորդում աւուր նորո́ւն ամսոյ՝ տօն. զեւթն օր բաղա́րջ կերիջիք.
¹⁸եւ օրն առաջին կոչեցեալ սո́ւրբ լիցի ձեզ. զա(մենայ)ն գործ սպասաւորութե(ան) մի́ գործիցէք։
¹⁹Եւ մատուսջի́ք ողջակէզս եւ ընծայս տ(եառ)ն. զուարակս երկուս յանդւոյ, եւ խոյ մի. գառինս տարեւորս անարատս եւթն։
²⁰Եւ զո́հ ն(ո)ց(ա), նաշիհ զանգեալ իւղով՝ երի́ս տասանորդս առ զուարակ մի. եւ երկո́ւս տասանորդս առ խոյ մի։
²¹եւ տասանորդ տասանորդ արասցես առ գառն մի եւթանեցունց գառանցն.
²²եւ նոխա́զ մի յայծեաց վ(ա)ս(ն) մեղաց, քաւե́լ վ(ա)ս(ն) ն(ո)ց(ա).
²³թո́ղ զհանապազորդ առաւօտին ողջակէզն, որ է ողջակէզ յաճախու(թ)ե(ան)։

²⁴Զայս ըստ ա́յսմ օրինակի արասջի́ք աւուր աւուր՝ զեւթն օր, պատարագ ողջակէզ ՛ի հոտ անուշից տ(եառ)ն. ՛ի վ(ե)ր(այ) հանապազորդ ողջակիզին առնիցէք զնուէր նորին։
²⁵եւ օրն եւթներորդ կոչեցեալ սո́ւրբ եղիցի ձեզ. զա(մենայ)ն գործ սպասաւորու(թ)ե(ան) մի́ գործիցէք ՛ի նմա։
²⁶Եւ յաւուրն նուիրեաց յորժամ մատուցանիցէք զոհ տ(եառ)ն զեւթներորդացն, կոչեցեալ սո́ւրբ եղիցի ձեզ. զա(մենայ)ն գործ սպասաւորութե(ան) մի́ գործիցէք։
²⁷Եւ մատուսջիք ողջակէ́զս ՛ի հոտ անուշից տ(եառ)ն. զուարակս երկուս յանդւոյ եւ խոյ մի, գառինս տարեւորս անարատս եւթն։

²⁸Եւ զո́հ ն(ո)ց(ա) նաշիհ զանգեալ իւղով երե́ք տասանորդք առ զուարակ մի, եւ երկու տասանորդք առ խոյ մի,
²⁹եւ տասանորդ տասանորդ առ գառն մի, եւթանեցունց գառանցն.
³⁰եւ նոխազ մի յայծեաց վ(ա)ս(ն) մեղաց, քաւել վ(ա)ս(ն) ձեր. թո́ղ զհանապազորդ ողջակէզն,
³¹եւ զզոհս ն(ո)ց(ա) զոր առնիցէք, եւ զնուէրս ն(ո)ց(ա). եւ անարա́տք լինիցին ձեզ։

¹Եւ յամսեանն եւթներորդի որ օր մի́ իցէ ամսոյն, եւ կոչեցեալ սո́ւրբ եղիցի ձեզ. զա(մենայ)ն գործ սպասաւորութե(ան) մի́ գործիցէք. օ́ր նշանակելոյ եղիցի ձեզ։
²Եւ արասջիք ողջակէ́զ ՛ի հոտ անուշից տ(եառ)ն. զուարակ մի յանդւոյ, խոյ մի, գառինս տարեւորս անարատս եւթն.
³եւ զո́հ ն(ո)ց(ա) նաշիհ զանգեալ իւղով, երի́ս տասանորդս առ զուարակ մի, եւ երկուս տասանորդս առ խոյ մի.
⁴եւ տասանորդ տասանորդ առ գառն մի եւթանեցունց գառանցն.
⁵եւ նոխազ մի յայծեաց վ(ա)ս(ն) մեղաց՝ քաւե́լ վ(ա)ս(ն) ձեր։
⁶թո́ղ զողջակէզն ամսամտիցն, եւ զոհքն ն(ո)ց(ա), եւ նուէրք իւրեանց ըստ պայմանի́ իւրեանց ՛ի հոտ անուշից տ(եառ)ն։

⁷Եւ ՛ի տասներորդի նորին ամսոյ, կոչեցեալ սո́ւրբ եղիցի ձեզ, եւ լլկեսջի́ք զանձինս ձեր. զա(մենայ)ն գործ սպասաւորութե(ան) մի́ գործիցէք։
⁸մատուսջի́ք ողջակէզս ՛ի հոտ անուշից ընծայս տ(եառ)ն. զուարակ մի յանդւոյ, խոյ մի, գառինս տարեւորս անարատս եւթն.
⁹եւ զոհ ն(ո)ց(ա) նաշիհ զանգեալ իւղով, երիս տասանորդս առ զուարակ մի, եւ երկուս տասանորդս առ խոյ մի.
¹⁰եւ տասանորդ տասանորդ առ գառն մի, եւթանեցունց գառանցն։
¹¹եւ նոխազ մի յայծեաց վ(ա)ս(ն) մեղաց՝ քաւե́լ վ(ա)ս(ն) ձեր. թո́ղ զվ(ա)ս(ն) մեղացն եւ քաւու(թ)ե(ան), եւ զողջակէզսն հանապազորդս՝ եւ զզոհս ն(ո)ր(ա). եւ զնուէր նորին ըստ պայմանի իւրում ՛ի հոտ անուշից ընծա́յ տ(եառ)ն։

¹²Եւ յաւուրն հնգետասաներորդի նորին եւթներորդի ամսոյ, կոչեցեալ սո́ւրբ եղիցի ձեզ. զա(մենայ)ն գործ սպասաւորութե(ան) մի́ գործիցէք, եւ տօնեսջի́ք զնա տօն տ(եառ)ն զեւթն օր։
¹³եւ մատուսջիք ողջակէ́զս ընծայս ՛ի հոտ անուշից տ(եառ)ն։ Յաւուրն առաջնում զուարակս յանդւոյ երեքտասան. խոյս երկուս. գառինս տարեւորս չորեքտասան, անարա́տք լինիցին։
¹⁴եւ զոհք ն(ո)ց(ա) նաշի́հ զանգեալ իւղով, երիս տասանորդս առ զուարակ մի, երեքտասանեցունց զուարակացն. եւ երկուս տասանորդս առ խոյ մի, երկոցունց խոյոցն.
¹⁵եւ տասանորդ տասանորդ առ մի մի գառն չորեքտասանեցունց գառանցն։

¹⁶եւ նոխազ մի յայծեաց վ(ա)ս(ն) մեղաց։ թո́ղ զհանապազորդ ողջակէզս եւ զզոհս եւ զնուէրս ն(ո)ց(ա)։
¹⁷Եւ յաւուրն երկրորդի զուարակս երկոտասան, խոյս երկուս, գառինս տարեւորս անարատս չորեքտասան։
¹⁸եւ զո́հք նոցա՝ եւ նուէրք զուարակին, եւ խոյոցն, եւ գառանցն՝ ըստ թուոյ ն(ո)ց(ա) եւ ըստ պայմանի իւրեանց։
¹⁹եւ նոխազ մի յայծեաց վ(ա)ս(ն) մեղաց. թո́ղ զհանապազորդ ողջակէզն, եւ զզոհս նոցա, եւ զնուէրս իւրեանց։
²⁰Եւ յաւուրն երրորդի զուարա́կս մետասան, եւ խոյս երկուս. գառինս տարեւորս անարատս չորեքտասան.
²¹եւ զոհ ն(ո)ց(ա) եւ նուէր զուարակացն, եւ խոյոցն, եւ գառանց, ըստ թուոյ ն(ո)ց(ա).

²²եւ քօշ մի յայծեաց վ(ա)ս(ն) մեղաց. թո́ղ զհանապազորդ ողջակէզս նոցա, եւ զնուէրս իւրեանց։
²³Եւ յաւուրն չորրորդի զուարակս տասն, եւ խոյս երկուս. գառինս տարեւորս անարատս չորեքտասան.
²⁴եւ զոհք ն(ո)ց(ա) եւ նուէրք զուարակացն, եւ խոյոցն, եւ գառանց, ըստ թուոյ ն(ո)ց(ա) եւ ըստ պայմանի իւրեանց.
²⁵եւ նոխազ մի յայծեաց վ(ա)ս(ն) մեղաց. թո́ղ զհանապազորդ ողջակէզս, եւ զզոհս ն(ո)ց(ա), եւ զնուէրս իւրեանց։
²⁶Եւ յաւուրն հինգերորդի զուարակս ինն, եւ խոյս երկուս, որոջս տարեւորս անարատս չորեքտասան.
²⁷եւ զոհք ն(ո)ց(ա) եւ նուէրք զուարակացն եւ խոյոց, եւ գառանց, ըստ թուոյ ն(ո)ց(ա), եւ ըստ պայմանի իւրեանց.

²⁸եւ նոխազ մի յայծեաց վ(ա)ս(ն) մեղաց. թո́ղ զհանապազորդ ողջակէզսն, եւ զզոհս ն(ո)ց(ա), եւ զնուէրս իւրեանց։
²⁹Եւ յաւուրն վեցերորդի զուարակս ութ, խոյս երկուս, գառինս տարեւորս անարատս չորեքտասան.
³⁰եւ զոհք ն(ո)ց(ա) եւ նուէրք զուարակացն, եւ խոյոց, եւ գառանց, ըստ թուոյ ն(ո)ց(ա), եւ ըստ պայմանի իւրեանց.
³¹եւ նոխազ մի յայծեաց վ(ա)ս(ն) մեղաց. թո́ղ զհանապազորդ ողջակէզսն, եւ զզոհս ն(ո)ց(ա), եւ զնուէրս իւրեանց։
³²Եւ յաւուրն եւթներորդի զուարակս եւթն, խոյս երկուս, գառինս տարեւորս անարատս չորեքտասան.
³³եւ զոհք ն(ո)ց(ա) եւ նուէրք զուարակացն, եւ խոյոց, եւ գառանց, ըստ թուոյ ն(ո)ց(ա), եւ ըստ պայմանի իւրեանց.

³⁴եւ նոխազ մի յայծեաց վ(ա)ս(ն) մեղաց. թո́ղ զհանապազորդ ողջակէզսն, եւ զզոհս ն(ո)ց(ա), եւ զնուէրս իւրեանց։
³⁵Եւ յաւուրն ութերորդի ե́լք լիցին ձեզ. զա(մենայ)ն գործ սպասաւորութե(ան) մի́ գործիցէք ՛ի նմա։
³⁶եւ մատուսջիք ողջակէզս ՛ի հոտ անուշից ընծայս տ(եառ)ն, զուարակ մի, խոյ մի, գառինս տարեւորս անարատս եւթն.
³⁷եւ զոհք ն(ո)ց(ա) եւ նուէրք զուարակիցն, եւ խոյից, եւ գառանց, ըստ թուոյ ն(ո)ց(ա), եւ ըստ պայմանի իւրեանց.
³⁸եւ նոխազ մի յայծեաց վ(ա)ս(ն) մեղաց. թո́ղ զհանապազորդ ողջակէզսն, եւ զզոհս ն(ո)ց(ա), եւ զնուէրս իւրեանց։

³⁹Զա́յս առնիցէք ՛ի տօնս ձեր տ(եառ)ն. թո́ղ զուխտսն ձեր, եւ զողջակէզսն ձեր, եւ զկամայականսն ձեր, եւ զզոհսն ձեր, եւ զնուէրսն ձեր, եւ զփրկու(թ)ի(ւն)ն ձեր։

¹Եւ խօսեցաւ մովսէս ընդ որդիսն ի(սրաէ)լի՝ որպէս պատուիրեաց տ(է)ր մովսիսի։
²եւ խօսեցաւ մովսէս ընդ իշխանս որդւոցն ի(սրաէ)լի՝ եւ ասէ. Ա́յս բան է՝ զոր հրամայեաց տ(է)ր։
³ա́յր ոք ա́յր՝ եթէ ուխտիցէ ուխտ տ(եառ)ն, կամ երդնուցու երդումն սահմանու, կամ սահմանիցէ ինչ վ(ա)ս(ն) անձին իւրոյ, մի́ արասցէ ապա́խտ զբան իւր. այլ զա(մենայ)ն ինչ որ ելանիցէ ՛ի բերանոյ իւրմէ՝ արասցէ́։
⁴Եւ եթէ կին ոք՝ ուխտիցէ ուխտ տ(եառ)ն, կամ սահմանիցէ սահման ինչ ՛ի տան հօր իւրոյ ՛ի մանկու(թ)ե(ան) իւրում.

⁵եւ լսիցէ հայր ն(ո)ր(ա) զուխտս ն(ո)ր(ա), եւ զսահմանս ն(ո)ր(ա) զոր սահմանեաց զանձնէ իւրմէ, եւ լռեսցէ նմա հայր ն(ո)ր(ա), կացցեն ա(մենայ)ն ուխտք ն(ո)ր(ա). եւ ա(մենայ)ն սահմանքն զոր սահմանեաց զանձէ իւրմէ՝ հաստատեսցին նմա։
⁶Եւ եթէ ո́չ առնուցու յանձն հայր ն(ո)ր(ա)՝ յաւուր յորում լսիցէ զա(մենայ)ն ուխտս նորա, եւ զսահմանսն զոր սահմանեաց զանձնէ իւրմէ, մի́ կացցեն։ եւ տ(է)ր անպա́րտ արասցէ զնա, զի ո́չ առ յանձն հայր ն(ո)ր(ա)։
⁷Ապա թէ լինելով լինիցի ա́ռն, եւ ուխտք իւր ՛ի նմա́ իցեն ըստ ուխտելոյ շրթանց իւրոց, զոր սահմանեաց զանձնէ իւրմէ.

⁸եւ լսիցէ այրն ն(ո)ր(ա), եւ լռիցէ նմա յաւուրն յորում լսիցէ, ա́յնպէս կացցեն ա(մենայ)ն ուխտք ն(ո)ր(ա), եւ սահմանքն ն(ո)ր(ա)՝ զոր սահմանեաց զանձնէ իւրմէ, հաստատեսցին։
⁹Ապա թէ ո́չ առնուցու յանձն այր ն(ո)ր(ա)՝ յաւուր յորում լսիցէն, ա(մենայ)ն ուխտքն ն(ո)ր(ա) եւ ա(մենայ)ն սահմանքն զոր սահմանեաց զանձնէ իւրմէ, մի́ հաստատեսցին։ զի այրն ո́չ առ յանձն. եւ տ(է)ր անպա́րտ արասցէ զնա։
¹⁰Եւ ուխտք այրւո́յ կամ հանելոյ, զոր ուխտիցէ զանձնէ իւրմէ՝ հաստատեսցին նմա։
¹¹Ապա թէ ՛ի տան ա́ռն իւրոյ իցեն ուխտք ն(ո)ր(ա), կամ սահմանն զոր սահմանիցէ երդմամբ զանձնէ իւրմէ.

¹²եւ լսիցէ այր ն(ո)ր(ա) եւ լռիցէ նմա, եւ առնուցու նմա յանձն, կացցե́ն ա(մենայ)ն ուխտք ն(ո)ր(ա). եւ ա(մենայ)ն սահմանք ն(ո)ր(ա)՝ զոր սահմանեաց զանձնէ իւրմէ՝ հաստատեսցի́ն նմա։
¹³Եւ եթէ խափանելով խափանեսցէ́ այրն ն(ո)ր(ա)՝ յորում աւուր լսիցէ զա(մենայ)ն ինչ որ ելանիցէ ՛ի շրթանց ն(ո)ր(ա)՝ ըստ ուխտի́ց ն(ո)ր(ա) եւ ըստ սահմանացն ն(ո)ր(ա) զանձնէ իւրմէ, մի́ հաստատեսցի նմա. զի այր ն(ո)ր(ա) զանցո́յց. եւ տ(է)ր անպա́րտ արասցէ զնա։
¹⁴Զամենայն ուխտ, եւ զա(մենայ)ն երդումն կապոյ առ լլկելո́յ զանձն, ա́յր ն(ո)ր(ա) հաստատեսցէ նմա, եւ ա́յր ն(ո)ր(ա) զանցուսցէ։

¹⁵Եւ եթէ լռելով լռեսցէ նմա. օրըստօրէ հաստատեսցէ́ նմա զա(մենայ)ն ուխտսն իւր, եւ զսահմանսն կացուսցէ́ նմա. վ(ա)ս(ն) զի լռեաց նմա յաւուրն յորում լուաւ։
¹⁶եւ եթէ զանցուցանելով զանցուսցէ́ այրն ն(ո)ր(ա) յետ աւուրն յորում լուաւ, ընկալցի́ զմեղս իւր։
¹⁷Ա́յս իրաւունք են զոր պատուիրեաց տ(է)ր մովսիսի, ընդ ա́յր եւ ընդ կին իւր. ընդ հա́յր եւ ընդ դուստր իւր՝ ՛ի մանկւոթե(ա)ն ՛ի տան հօր իւրոյ։

¹Խօսեցաւ տ(է)ր ընդ մովսիսի՝ եւ ասէ։
²ա́ռ զվրէժ որդւոցդ ի(սրաէ)լի ՛ի մադիանացւոցն. եւ ապա յաւելցիս ՛ի ժողովուրդ քո։
³Եւ խօսեցաւ մովսէս ընդ ժողովրդեանն՝ եւ ասէ. վառեցէ́ք ՛ի ձէնջ արս՝ ճակատել առաջի տ(եառ)ն ՛ի վերայ մադիամու. հասուցանել զվրէժ ՛ի տն(թեն)է մադիամու.
⁴հազա́ր այր ՛ի ցեղէ, յա(մենայ)ն ցեղիցն ի(սրաէ)լի, առաքեցէ́ք տալ պատերազմ։
⁵Եւ համարեցան ՛ի հազարաւորացն ի(սրաէ)լի հազա́ր այր ՛ի ցեղէ. երկոտասա́ն հազար վառեալ ՛ի պատերազմ։

⁶Եւ արձակեաց զն(ո)ս(ա) մովսէս, հազա́ր այր ՛ի ցեղէ հանդերձ զօրու իւրեանց. եւ զփենէէս որդի եղիազարու որդւոյ ահարոնի քահանայի, եւ զսպասն սրբու(թ)ե(ան), եւ փողքն ազդեցու(թ)ե(ան) ՛ի ձեռս ն(ո)ց(ա)։
⁷Եւ ճակատեցան ընդդէմ մադիանացւոցն. ո(ր)պ(էս) հրամայեաց տ(է)ր մովսիսի։ Եւ կոտորեցին զա(մենայ)ն արու,
⁸եւ զթագաւորսն մադիանացւոց կոտորեցին հանդերձ վիրաւորօք ն(ո)ց(ա). եւ զեւին, եւ զսուր, եւ զրոկոմ, եւ զուր, եւ զռոբոք, զհինգ թագաւորս մադիամու։ եւ զբաղաամ որդի բէովրայ սպանին սրով, հանդերձ վիրաւորօք ն(ո)ց(ա)։

⁹Եւ զկանայս մադիամու, եւ զաղխն ն(ո)ց(ա), եւ զանասուն ն(ո)ց(ա), եւ զա(մենայ)ն ստացուածս ն(ո)ց(ա), եւ զզօրս ն(ո)ց(ա) առին յաւարի։
¹⁰եւ զա(մենայ)ն քաղաքս նոցա տամբք իւրեանց, եւ զաւանս ն(ո)ց(ա) հրձի́գ արարին.
¹¹եւ առին զա(մենայ)ն աւար ն(ո)ց(ա). եւ զա(մենայ)ն կապուտ ն(ո)ց(ա) ՛ի մարդոյ մինչեւ յանասունս։
¹²Եւ ածին առ մովսէս եւ առ եղիազար քահանայ, եւ առ ա(մենայ)ն որդիսն ի(սրաէ)լի, զգերին եւ զկապուտ եւ զաւար բանակին յռաբովթ մովաբ, որ է յանդիման երեքոյի առ եզերբ յորդանանու։
¹³Եւ ելին մովսէս եւ եղիազար քահանայ, եւ ա(մենայ)ն իշխանք ժողովրդեանն ընդ առաջ ն(ո)ց(ա) արտաքո́յ բանակին։

¹⁴եւ բարկացաւ մովսէս ՛ի վ(ե)ր(այ) ոստիկանաց զօրուն՝ հազարապետաց եւ հարիւրապետաց, եկելոց ՛ի ճակատէ պատերազմին։
¹⁵Եւ ասէ ցն(ո)ս(ա) մովսէս. ընդէ՞ր ապրեցուցէք զա(մենայ)ն էգ.
¹⁶զի նոքա́ էին որդւոցն ի(սրաէ)լի ը(ս)տ բանիցն բաղաամու, առ ՛ի վրիպեցուցանելոյ, եւ արհամարհելոյ զբան տ(եառ)ն վ(ա)ս(ն) փոգովրայ. եւ եղեւ հարուած ՛ի ժողովրդեանն տ(եառ)ն։
¹⁷Եւ արդ՝ կոտորեցէ́ք զա(մենայ)ն արու յա(մենայ)ն աղխիդ. եւ զա(մենայ)ն կին որոյ գիտացեալ է զարութի(ւն) արուի՝ կոտորեցէ́ք։
¹⁸եւ զա(մենայ)ն զաղխ կանանց, որ ո́չ իցէ գիտացեալ զարութի(ւն) արուի՝ ապրեցուցէ́ք։

¹⁹Եւ դուք բնակեցարո́ւք արտաքոյ բանակին զեւթն օր։ ա(մենայ)նի որոյ սոանեա́լ իցէ եւ մերձեալ ՛ի վիրաւոր, սրբեսցի́ յաւուրն երրորդի, եւ յաւուրն եւթներորդի. դո́ւք եւ գերիդ ձեր։
²⁰եւ ա(մենայ)ն հանդերձ, եւ ա(մենայ)ն անօթ մաշկեղէն, եւ ա(մենայ)ն գործ մազագործ, եւ զա(մենայ)ն կահ փայտակերտ սրբեսջի́ք։
²¹Եւ ասէ եղիազար քահանայ ցարս զօրուն եկելոց ՛ի ճակատէ պատերազմին. ա́յս իրաւունք օրինի են զոր հրամայեաց տ(է)ր մովսիսի։
²²բա́ց յոսկւոյ եւ յարծաթոյ, եւ ՛ի պղնձոյ, եւ յերկաթոյ, եւ ՛ի կապարոյ, եւ յանագէ.
²³ա(մենայ)ն որ անցանէ ընդ հուր՝ եւ սրբեսցի́. այլ եւ ջրո́վն սրսկման սրբեսցի. եւ ա(մենայ)ն որ ո́չ անցանիցէ ընդ հուր, եւ լուանայցի ջրով.

²⁴լուասջի́ք զհանդերձս յաւուրն եւթներորդի, եւ սո́ւրբք լինիջիք. եւ ապա մտանիցէք ՛ի բանակն։
²⁵Եւ խօսեցաւ տ(է)ր ընդ մովսիսի՝ եւ ասէ.
²⁶ա́ռ զհամար աւարի գերութե(ան)դ ՛ի մարդոյ մինչեւ յանասուն. դո́ւ եւ եղիազար քահանայ, եւ իշխանք նահապետա́ց ժողովրդեանդ։
²⁷եւ բաժանեցէ́ք զաւարդ ՛ի մէջ պատերազմողացդ ելելոցդ ՛ի պատերազմ. եւ ՛ի մէջ ա(մենայ)ն ժողովրդեանդ։
²⁸Եւ առջի́ք հա́ս տ(եառ)ն յա(մենայ)ն արանց պատերազմողաց երթելոց ՛ի պատերազմ. ոգի́ մի՝ ՛ի հինգ հարիւրոց՝ ՛ի մարդո́յ եւ յանասնոյ, եւ յարջառոյ եւ յոչխարէ եւ յայծեաց.

²⁹եւ զկէ́ս նոցա առնուցուս, եւ տացե́ս եղիազարու քահանայի զպտուղսն տ(եառ)ն։
³⁰Եւ ՛ի կիսոյ որդւոցն իսրայէլի առցես մի ՛ի յիսնէ, ՛ի մարդոյ եւ յանասնոյ յարջառոյ եւ յոչխարէ եւ յիշոյ, եւ յա(մենայ)ն անասնոյ. եւ տացես զայն ղեւտացւո́ցն որ պահիցեն զպահպանութի(ւն)ս խորանին տ(եառ)ն։
³¹Եւ արարին մովսէս եւ եղիազար քահանայ՝ ո(ր)պ(էս) հրամայեաց տ(է)ր մովսիսի։
³²եւ եղեւ աւելո́րդ աւարին զոր ածին յաւարի ա́րքն պատերազմօղք։ յոչխարաց վեցհարեւր հազար, եւ եւթանասուն եւ հինգ հազար.
³³եւ արջառ՝ եւթանասուն եւ երկու հազարք.
³⁴եւ էշք՝ վաթսուն եւ մի հազար։

³⁵եւ ոգիք մարդկան՝ ՛ի կանանց որ ո́չ գիտէին զարու(թ)ի(ւն) առն, ա(մենայ)ն ոգիք՝ երեսուն եւ երկու հազարք։
³⁶Եւ եղեւ կէ́ս աւարին երթելոցն ՛ի պատերազմ ՛ի թուոյ ոչխարացն՝ երեքհարեւր եւ երեսուն հազար, եւ եւթն հազար եւ հինգ հարիւր։
³⁷Եւ եղեւ հա́սն տ(եառ)ն յոչխարէ, վեցհարեւր եւ եւթանասուն եւ հինգ.
³⁸եւ արջառ երեսուն եւ վեց հազար, եւ հասն տ(եառ)ն եւթանասուն եւ երկու.
³⁹եւ էշք՝ երեսուն հազար եւ հինգ հարեւր, եւ հասն տ(եառ)ն վաթսունեւմի.
⁴⁰եւ ոգիք մարդկան՝ վեշտասան հազար, եւ հա́ս ՛ի նոցանէ տ(եառ)ն երեսուն եւ երկու ոգիք։
⁴¹Եւ ետ մովսէս զհասն տ(եառ)ն զնուէրն ա(ստուծո)յ եղիազարո́ւ քահանայի. ո(ր)պ(էս) հրաման ետ տ(է)ր մովսիսի.

⁴²զհասարակած որդւոցն ի(սրաէ)լի, զորս բաժանեաց մովսէս յարանցն պատերազմողաց։
⁴³Եւ եղեւ հասարակած ՛ի ժողովրդենէ անտի. յոչխարէ երեքհարեւր եւ երեսուն հազար, եւ եւթն հազար եւ հինգ հարեւր.
⁴⁴եւ արջառ՝ երեսուն եւ վեց հազար.
⁴⁵եւ էշք՝ երեսուն հազար եւ հինգ հարեւր.
⁴⁶եւ ոգիք մարդկան՝ վեշտասան հազար։
⁴⁷Եւ ա́ռ մովսէս ՛ի հասարակածէ որդւոցն ի(սրաէ)լի. մի ՛ի յիսնէ, ՛ի մարդոյ եւ յանասնոյ. եւ ետ զայն ղեւտացւոցն որ պահէին զպահպանու(թ)ի(ւն) խորանին տ(եառ)ն. ո(ր)պ(էս) հրաման ետ տ(է)ր մովսիսի։
⁴⁸Եւ մատեան առ մովսէս ա(մենայ)ն վերակացուք հազարապետու(թ)ե(ան) զօրուն, հազարապետք եւ հարիւրապետք,

⁴⁹եւ ասեն ցմովսէս. Ծառա́յք քո կալան զհամար արանց պատերազմողաց առ ՛ի մէնջ, եւ ո́չ ծախեցաւ ՛ի նոցանէ եւ ո́չ մի.
⁵⁰եւ բերաք մատուցանել ընծա́յ տ(եառ)ն։ այր՝ որոյ գտանիցի ոսկի մեհեւանդ, կամ ապարանջանք, եւ մատանի, եւ կշտապանակ, եւ փողոշուկ ընդելուզեալ. քաւե́լ վ(ա)ս(ն) մեր առաջի տ(եառ)ն։
⁵¹Եւ առին մովսէս եւ եղիազար քահանայ զոսկին ՛ի նոցանէ, զա(մենայ)ն անօթ գործեալ,
⁵²զոր եղեւ ա(մենայ)ն ոսկի հասին զոր հանին տ(եառ)ն. վեշտասան հազար եւ եւթնհարեւր եւ յիսուն սիկղ՝ ՛ի հազարապետաց անտի.
⁵³եւ արք պատերազմօղք որ ածին աւար, իւրաքանչի́ւր ումեք։

⁵⁴Եւ առին մովսէս եւ եղիազար քահանայ զոսկին, ՛ի հազարապետաց անտի, եւ ՛ի հարեւրապետաց, եւ տարան ՛ի խորանն վկայութե(ան). յիշատա́կ առ ՛ի յորդւոցն ի(սրաէ)լի առաջի տ(եառ)ն։

¹Եւ անասուն բազո́ւմ էր որդւոցն ի(սրաէ)լի, որդւոցն ռուբինի, եւ որդւոցն գադայ զեղեա́լ յոյժ։ եւ տեսին զերկիրն յազերայ, եւ զերկիրն գաղաադու. եւ էր տեղին՝ տեղի́ խաշանց։
²Եւ մատուցեալ որդիքն ռուբինի եւ որդիքն գադայ՝ ասեն ցմովսէս եւ ցեղիազար քահանայ, եւ ցիշխանս ժողովրդեանն։
³Ատարովթ եւ դեբոն, եւ յազեր, եւ նեմբրա, եւ եսեբոն, եւ էլէալէթ, եւ սեբամա, եւ նաբաւ, եւ բեան.
⁴երկիրն զոր մատնեաց տ(է)ր առաջի որդւոցն ի(սրաէ)լի, երկիր՝ անասնոց է. եւ ծառայից քոց խաշի́նք են։
⁵եւ ասեն. եթէ գտաք շնորհս առաջի քո, տացի́ երկիրն այն ծառայից քոց ՛ի կալուած. եւ մի́ անցուցաներ զմեզ ընդ յորդանան։

⁶Եւ ասէ մովսէս ցորդիսն գադայ եւ ցորդիսն ռուբինի. եղբարք ձեր երթայցեն ՛ի պատերազմ, եւ դուք նստիցի՞ք աստ։
⁷եւ ընդէ՞ր խոտորեցուցանէք զսիրտ որդւոցն ի(սրաէ)լի չանցանել յերկիրն՝ զոր տ(է)ր տալոց է նոցա։
⁸Ո՞չ այդպէս արարին հարքն ձեր՝ յորժամ առաքեցի զն(ո)ս(ա) ՛ի կադէսբառնեայ դիտել զերկիրն.
⁹եւ ելին ՛ի ձորն ողկուզի, եւ դիտեցին զերկիրն. եւ զանգիտեցուցի́ն զսիրտս որդւոցն ի(սրաէ)լի, զի մի́ մտանիցեն յերկիրն զոր ե́տ ն(ո)ց(ա) տ(է)ր։
¹⁰Եւ բարկացաւ սրտմտութ(եամ)բ տ(է)ր յաւուր յայնմիկ, եւ երդուաւ՝ եւ ասէ։
¹¹մի́ տեսցեն արք որ ելին յեգիպտոսէ՝ ՛ի քսանամենից եւ ՛ի վեր, որ գիտիցեն զչար եւ զբարի. զերկիրն զոր երդուայ տալ աբրաամու եւ սահակայ եւ յակոբայ. զի ո́չ եկին զհետ իմ։

¹²բայց քաղէբ՝ որդի յեփոնեայ զատուցեալն, եւ յեսու որդի նաւեայ, զի եկին տ(եառ)ն։
¹³եւ բարկացաւ սրտմտու(թեամ)բ տ(է)ր ՛ի վ(ե)ր(այ) ի(սրաէ)լի, եւ յածեցոյց զն(ո)ս(ա) յանապատին ա́մս քառասուն. մինչեւ սատակեցաւ ա(մենայ)ն ազգն որ արարին զչարիս առաջի տ(եառ)ն։
¹⁴Եւ արդ՝ դուք յարուցեա́լ էք փոխանակ հարց ձերոց, ժողովք մարդկան մեղաւորաց, յաւելո́ւլ միւսանգամ ՛ի սրտմտութի(ւն) բարկութե(ան) տ(եառ)ն ՛ի վ(ե)ր(այ) ի(սրաէ)լի։
¹⁵զի դարձեալ էք ՛ի նմանէ, յաւելուլ միւսանգամ քանե́լ նմա զձեզ յանապատ. եւ անօրինիք յա(մենայ)ն ժողովուրդս յայս։

¹⁶Եւ մատեան առաջի նորա՝ եւ ասեն։ դադա́րս ոչխարաց մերոց շինեսցուք՝ եւ անասնոց մերոց, եւ քաղաքս աղխից մերոց։
¹⁷եւ մեք վառեսցուք առաջի տ(եառ)ն, առաջապա́հք երթիցուք որդւոցն ի(սրաէ)լի, մինչեւ հանցուք զն(ո)ս(ա) յիւրաքանչիւր տեղի։ եւ բնակեսցէ աղխն մեր ՛ի քաղաքս պարսպաւորս վ(ա)ս(ն) բնակչաց երկրիս։
¹⁸Եւ ո́չ դարձցուք ՛ի տունս մեր՝ մինչեւ բաժանեսցին որդիքն ի(սրաէ)լի զիւրաքանչիւր ժառանգութի(ւն)։
¹⁹եւ ո́չ եւս ժառանգեսցուք ՛ի մէջ ն(ո)ց(ա) յանցի́ցն յորդանանու եւ անդր. զի ունիմք զվիճակս մեր յա́յս կոյս յորդանանու յարեւելից։
²⁰Եւ ասէ ցն(ո)ս(ա) մովսէս. եթէ առնիցէք ըստ բանիդ ըստ այդմիկ. եթէ վառիցիք առաջի տ(եառ)ն ՛ի պատերազմ.

²¹եւ անցցէ́ ձեր ա(մենայ)ն վառեալ ընդ յորդանան առաջի տ(եառ)ն, մինչեւ սատակիցի թշնամին ն(ո)ր(ա) առաջի ն(ո)ր(ա),
²²եւ նուաճեսցի երկիրն առաջի տ(եառ)ն, եւ ապա́ դառնայցէք, քաւեա́լ լիջիք առաջի տ(եառ)ն եւ յի(սրա)էլէ. եւ եղիցի երկիրս այս ձեզ ՛ի կալուած առաջի տ(եառ)ն։
²³Ապա թէ ո́չ առնիցէք այդպէս, յանցաւո́ր գտանիցիք առաջի տ(եառ)ն. եւ ծանիջի́ք զմեղս ձեր՝ յորժամ հասանիցեն ձեզ չարիք։
²⁴Եւ շինեսջիք դուք ձեզ քաղա́քս աղխին ձերոյ, եւ դադա́րս խաշանց ձերոց. եւ որինչ ե́լ ՛ի բերանոյ ձերմէ առնիցէ́ք։
²⁵Եւ խօսեցան որդիքն ռուբինի եւ որդիքն գադայ ը(ստ) մովսիսի՝ եւ ասեն։ արասցե́ն ծառայք քո՝ որպէս հրամայեաց մեզ տէրդ մեր.

²⁶աղխ մերե եւ կանայք մերե եւ ամենայն անասուն մեր՝ կացցե́ն ՛ի քաղաքս գաղաադու.
²⁷եւ ծառայք քո անցցե́ն վառեալք եւ կազմեալք առաջի տ(եառ)ն ՛ի պատերազմ, ո(ր)պ(էս) եւ տէ́րդ ասէ։
²⁸Եւ յանդիման արար ն(ո)ց(ա) մովսէս զեղիազար քահանայ, եւ զյեսու որդի նաւեայ, եւ զիշխանս նահապետաց ցեղիցն ի(սրաէ)լի։
²⁹Եւ ասէ ցն(ո)ս(ա) մովսէս. եթէ անցցեն որդիքդ ռուբինի եւ որդիքդ գադայ ընդ ձեզ ըստ յորդանան, ա(մենայ)ն վառեալ ՛ի պատերազմ առաջի տ(եառ)ն, եւ տիրեցէք երկրին, տաջի́ք դոցա զերկիրն գաղաադու ՛ի կալուածս։

³⁰Ապա թէ ո́չ անցցեն ը(ստ) ձեզ վառեալք ՛ի պատերազմ առաջի տ(եառ)ն, անցուսջիք զա́ղխ դոցա եւ զկանայս դոցա, եւ զանասուն դոցա յառաջագոյն քան զձեզ յերկիրն քանանացւոց. եւ ժառանգեսցեն ընդ ձեզ յերկիրն քանանացւոց։
³¹Պատասխանի ետուն որդիքն ռուբինի եւ որդիքն գադայ՝ եւ ասեն. զորինչ ասէ տէրդ ցծառայս իւր՝ արասցո́ւք։
³²մեք անցցուք վառեալք յերկիրն քանանացւոց, եւ տաջի́ք մեզ կալուածս յա́յս կոյս յորդանանու։

³³Եւ ետ մովսէս որդւոցն գադայ եւ որդւոցն ռուբինի՝ եւ կիսոյ ցեղին մանասէի որդւոցն յովսեփայ, զթագաւորութի(ւն)ն սեհոնի արքային ամովրհացւոց, եւ զթագաւորութի(ւն)ն ովգայ արքային բասանու. զերկիրն եւ զքաղաքս սահմանօք իւրովք, եւ զքաղաքս երկրին շուրջանակի։
³⁴Եւ շինեցին որդիքն գադայ զգեբոն, եւ զաստարովթ,
³⁵եւ զարոեր, եւ զեսոփար, եւ զյազեր։
³⁶եւ բարձրացուցին զն(ո)ս(ա). եւ զնամրան, եւ զբաւթառան, քաղաքս ամուրս եւ գադարս հօտից։
³⁷Եւ որդիքն ռուբինի շինեցին զեսեբոն, եւ զեզիեղէթ, եւ զկարիեթեմ.
³⁸եւ զբեէղմոն. շուրջ ամրացուցեալս, եւ զսեբամայ. եւ անուանեցին ը(ս)տ անուանց իւրեանց զանունս քաղաքացն՝ զոր շինեցին։

³⁹Եւ գնաց որդի մաքիրայ որդւոյ մանասէի ՛ի գաղաադ՝ եւ ա́ռ զնա, եւ կորոյս զամովրհացին որ բնակեալ էր ՛ի նմա։
⁴⁰եւ ետ մովսէս զգաղաադ մաքիրայ որդւոյ մանասէի. եւ բնակեցաւ անդ։
⁴¹Եւ յայիր մանասեան չոգաւ՝ ա́ռ զքաղաքս նոցա, եւ անուանեաց զն(ո)ս(ա) աւանս յայիրայ։
⁴²Եւ նաբաւ գնաց՝ եւ ա́ռ զկանաթ եւ զաւանս ն(ո)ր(ա), եւ անուանեաց զն(ո)ս(ա) նաբաւթ ըստ անուան իւրոյ։

¹Եւ ա́յս են բանակեաղք որդւոցն ի(սրաէ)լի՝ յորմէհետէ ելին յերկրէն եգիպտացւոց հանդերձ զօրուն իւրեանց ՛ի ձեռն մովսիսի եւ ահարոնի։
²Եւ գրեաց մովսէս զչո́ւս ն(ո)ց(ա), եւ զբանակեաղս իւրեանց բանիւ տ(եառ)ն։ եւ ա́յս են բանակեաղք գնացից ն(ո)ց(ա)։
³Չուեցին յռամեսեայ յամսեանն առաջնում, ՛ի հնգետասաներորդում աւուր՝ ամսոյն առաջնոյ. զայգոյ զատկին ելի́ն որդիքն ի(սրաէ)լի բարձրացեալ ձեռամբ առաջի ա(մենայ)ն եգիպտացւոցն։
⁴եւ եգիպտացիքն թաղեցին զա(մենայ)ն մեռեալսն ՛ի նոցանէ. զորս կոտորեաց տ(է)ր զա(մենայ)ն անդրանիկս յերկրին եգիպտացւոց. եւ ՛ի դի́ս ն(ո)ց(ա) արար վրէժխնդու(թ)ի(ւն) տ(է)ր.
⁵եւ չուեալ որդւոցն ի(սրաէ)լի յռամեսսեայ բանակեցան ՛ի սոկքովթ։

⁶Եւ չուեալ ՛ի սոկքովթայ՝ բանակեցան ՛ի բովթան, որ է մասն ինչ անապատին։
⁷Չուեցին ՛ի բովթանայ, եւ բանակեցան առ բերանովն եպիրովթայ, որ է յանդիման բէելսեփոնայ, եւ բանակեցան հանդէպ մակդովղայ։
⁸Չուեցին հանդէպ եպիրովթայ, եւ անցին ընդ մէջ ծովուն յանապատն, եւ գնացին նոքա երեքօրեայ ճանապարհ ընդ անապատն, եւ բանակեցան զգառն աղբերբքն։
⁹Չուեցին ՛ի դառն աղբիւրացն՝ եւ եկին յեղիմ. եւ էին յեղիմ երկոտասան ակն ջրոց, եւ եւթանասուն ծառ արմաւենեաց. եւ բանակեցան ա́նդ առ ջրովն։
¹⁰Չուեցին յեղիմայ, եւ բանակեցան զափամբ կարմիր ծովուն։
¹¹Չուեցին ՛ի կարմիր ծովէն, եւ բանակեցան յանապատին ՛ի սին։

¹²Չուեցին ՛ի սին անապատէն եւ բանակեցան ՛ի հռափա։
¹³Չուեցին ՛ի հռափայ, եւ բանակեցան յելիմ։
¹⁴Չուեցին յելիմայ, եւ բանակեցան յռափիդին. եւ ո́չ գոյր ջուր ըմպելոյ ժողովրդեանն։
¹⁵Չուեցին յռափիդիմայ, եւ բանակեցան յանապատն ՛ի սինայ։
¹⁶Չուեցին յանապատէն սինայ, եւ բանակեցան ՛ի գերեզմանս ցանկութե(ան)։
¹⁷Չուեցին ՛ի գերեզմանացն ցանկու(թ)ե(ան), եւ բանակեցան յասերովթ։
¹⁸Չուեցին յասերովթայ, եւ բանակեցան յռաթամա։
¹⁹Չուեցին յռաթամայ, եւ բանակեցան յռեմոնփարէս։

²⁰Չուեցին յռեմոնփարեսայ, եւ բանակեցան ՛ի ղեբոնա։
²¹Չուեցին ՛ի ղեբոնայ, եւ բանակեցան ՛ի դէսսա։
²²Չուեցին ՛ի դէսսայէ, եւ բանակեցան ՛ի մակէղղաթ։
²³Չուեցին՛ի մակէղղաթայ, եւ բանակեցան ՛ի սովփար։
²⁴Չուեցին ՛ի սովփարայ, եւ բանակեցան ՛ի քարադաթ։
²⁵Չուեցին ՛ի քարադաթայ, եւ բանակեցան ՛ի մակելովթ։
²⁶Չուեցին ՛ի մակելովթայ, եւ բանակեցան ՛ի կատտաաթ։
²⁷Չուեցին՛ի կատտաաթայ, եւ բանակեցան ՛ի կարաաթ։
²⁸Չուեցին ՛ի կարաաթայ, եւ բանակեցան ՛ի մատեկա։
²⁹Չուեցին ՛ի մատեկայ, եւ բանակեցան ՛ի սելմոնա։

³⁰Չուեցին ՛ի սելմոնայ, եւ բանակեցան ՛ի մասուրութ։
³¹Չուեցին ՛ի մասուրութայ, եւ բանակեցան ՛ի բանեա։
³²Չուեցին ՛ի բանեայ, եւ բանակեցան ՛ի լերինն գադգադ։
³³Չուեցին ՛ի լեռնէ անտի գադգադայ, եւ բանակեցան յետէբաթա։
³⁴Չուեցին յետէբաթայ, եւ բանակեցան յեբրոն։
³⁵Չուեցին յեբրոնայ, եւ բանակեցան ՛ի գասիոնգաբեր։
³⁶Չուեցին ՛ի գասիոնգաբերայ, եւ բանակեցան յանապատին ՛ի սին։
³⁷Չուեցին ՛ի սին անապատէ, եւ բանակեցան յանապատին փարանու, ա́յն է կադէս։ Չուեցին ՛ի կադէսայ, եւ բանակեցան ՛ի հովր լերինն, մերձ առ երկրաւն եդոմայ։

³⁸Եւ ել ահարոն քահանայ ՛ի լեառնն հրամանաւ տ(եառ)ն՝ եւ մեռաւ անդ. ՛ի քառասներորդի ամի ելանելոյ որդւոցն ի(սրաէ)լի յերկրէն եգիպտացւոց. յամսեանն հինգերորդի՝ որ օր մի էր ամսոյն։
³⁹Եւ ահարոն էր հարեւր եւ քսան եւ երից ամաց յորժամ մեռա́ւ ՛ի հովր լերինն։
⁴⁰Եւ լուաւ քանանէ́ս արքայ արադայ, եւ ինքն բնակեալ էր յերկրին քանանացւոց, յորժամ մտանէին որդիքն ի(սրաէ)լի, եւ ետ պատերազմ ընդ ի(սրաէ)լի, եւ ա́ռ ՛ի նոցանէ գերի։
⁴¹Չուեցին ՛ի հովր լեռնէ, եւ բանակեցան ՛ի սելմոնա։
⁴²Չուեցին ՛ի սելմոնայ, եւ բանակեցան ՛ի փենով։
⁴³Չուեցին ՛ի փենովայ, եւ բանակեցան յոբովթ։

⁴⁴Չուեցին յոբովթայ, եւ բանակեցան ՛ի գայի՝ յայն կոյս սահմանացն մովաբու։
⁴⁵Չուեցին ՛ի գայեայ, եւ բանակեցան ՛ի դէմոնգադ։
⁴⁶Չուեցին ՛ի դէմոնգադայ, եւ բանակեցան ՛ի գեղմոնդէբղաթէմ։
⁴⁷Չուեցին ՛ի գեղմոնդէբղաթեմայ, եւ բանակեցան ՛ի լերինն սաբարիմ յանդիման նաբաւայ։
⁴⁸Չուեցին ՛ի լերանցն նաբաւայ, եւ բանակեցան յարեւմտից մովաբու առ յորդանանու յանդիման երեքոյի։
⁴⁹եւ բանակեցան զյորդանանու ՛ի մէջ եսիմովթայ. մինչեւ ցմեղսատով յարեւմտից մովաբու։
⁵⁰Եւ խօսեցաւ տ(է)ր ընդ մովսիսի յարեւմտից մովաբու առ յորդանանու յանդիման երեքոյի՝ եւ ասէ։

⁵¹Խօսեա́ց ընդ որդիսդ ի(սրաէ)լի՝ եւ ասասցես ցդոսա. դուք ահաւադիկ անցանէ́ք ընդ յորդանան յերկրին քանանացւոց.
⁵²եւ կորուսջի́ք զա(մենայ)ն բնակիչս երկրին յերեսաց ձերոց. եւ կործանեսջի́ք զդիտանոցս երկրի նոցա. եւ զա(մենայ)ն կուռս ձուլածոյս ն(ո)ց(ա) կորուսջի́ք. եւ զա(մենայ)ն զարձանս նոցա՝ բառնայցէ́ք ՛ի միջոյ։
⁵³Եւ կորուսջի́ք զբնակիչս երկրին, եւ բնակեսջի́ք դուք ՛ի նմա. զի ձե́զ ետու զերկիրն ն(ո)ց(ա) ՛ի վիճակ,
⁵⁴ըստ ցեղից ձերոց, ըստ բազմաց՝ բազմացուցանիջի́ք զկալուածս իւրեանց. եւ ըստ սակաւուց՝ սակաւացուսջի́ք զկալուածս իւրեանց։ Ո(ր)պ(էս) ելանիցէ յանուն ուրուք՝ ա́նդ լինիցի. ըստ ցեղի́ց նահապետութե(ան) ձերոյ ժառանգեսջիք։

⁵⁵Եւ եթէ ո́չ կորուսանէք զբնակիչս երկրին յերեսաց ձերոց, եղիցին զոր թողուցուքն ՛ի նոցանէ՝ խո́չ յական ձերում, եւ նե́տք ՛ի կողս ձեր. եւ եղիցին ձեզ թշնամի́ք յերկրին յորում դուք բնակիցէք.
⁵⁶եւ եղիցի որպէս խորհէի առնել նոցա՝ արարից ձե́զ։

¹Եւ խօսեցաւ տ(է)ր ընդ մովսիսի՝ եւ ասէ։
²Պատուիրեա́ որդւոցն ի(սրաէ)լի՝ եւ ասասցե́ս ցն(ո)ս(ա). դուք մտանէք յերկիրն քանանացւոց, եւ ա́յն լիցի ձեզ ՛ի ժառանգութի(ւն). երկիրն քանանու հանդերձ սահմանօք իւրովք։
³Եւ եղիցի ձեզ կողմն ընդ հարաւ ՛ի սինն անապատէ մինչեւ մօտ յեդոմ։ եւ եղիցին ձեզ սահմանքն որ ընդ հարա́ւ իցեն, ՛ի մասնէ աղի ծովուն յարեւելի́ց կողմանէ։
⁴Եւ պատիցին սահմանքն ձեր ՛ի հարաւոյ՝ ընդ սա́րն ակրաբինայ, եւ անցցեն յենակ, եւ եղիցին ե́լք ն(ո)ր(ա) ընդ հարաւոյ կողմն կադէսբառնեայ. եւ ելցեն յաւանն արադայ, եւ անցցեն յասեմոն։

⁵Եւ պատիցին սահմանքն յասեմոնայ ձորոյն եգիպտացւոց. եւ եղիցին ելք նորա ընդ ծովն.
⁶եւ սահմանք ծովուն ձե́զ լիցին։ ծովն մեծ սահմա́ն իցէ. եւ ա́յն լիցին ձեզ սահմանք ծովուն։
⁷Եւ ա́յս լիցին ձեզ սահմանք ընդ կողմն հիւսւսոյ. ՛ի մեծէ́ ծովէն չափեսջիք ձեզ զլեռնլեռնայն.
⁸եւ ՛ի լեռնէ անտի չափեսջիք զնոյն մինչեւ ՛ի մուտսն եմաթայ. եւ եղիցին ելքն նորա սահմանք արադաքոյ.
⁹եւ ելանիցէ առ սահմանօքն եփրոնայ. եւ եղիցին ելք ն(ո)ր(ա) ասիրնայիդ. ա́յն լիցին ձեզ սահմանք ՛ի հիւսւսոյ։
¹⁰Եւ չափեսջիք ձեզ սահմա́նս յարեւելից, յասիռնայիդայ ցսեպփամար.

¹¹եւ իջանիցեն սահմանքն ՛ի սեպփամարայ ցբեղայ, յարեւելից կողմանէ աղբերացն. եւ իջցեն սահմանքն ՛ի բեղայ մինչեւ ցծովն քենարայ յարեւելից կողմանէ.
¹²եւ իջանիցեն սահմանքն մինչեւ ցյորդանան. եւ ե́լք ն(ո)ր(ա) լիցին ծովն աղի. ա́յն ա(մենայ)ն երկիր լինիցի ձեզ, եւ սահմանք ն(ո)ր(ա) շուրջանակի։
¹³Եւ պատուիրեաց մովսէս որդւոցն ի(սրաէ)լի՝ եւ ասէ. ա́յս է երկիրն զոր ժառանգիցէք զսա վիճակաւ. ո(ր)պ(էս) հրաման ետ տ(է)ր տա́լ զնա ինն ցեղիցն, եւ կիսոյ ցեղին մանասէի։
¹⁴Վասն զի ա́ռ որդւոցն ռուբինի եւ ցեղ որդւոցն գադայ՝ ըստ տանց նահապետաց իւրեանց.
¹⁵եւ կէս ցեղին մանասէի զվիճակս իւրեանց յա́յնկոյս յորդանանու յանդիման երեքոյ ՛ի հարաւոյ ընդ կողմն արեւելից։

¹⁶Եւ խօսեցաւ տ(է)ր ընդ մովսիսի՝ եւ ասէ։
¹⁷Ա́յս անուանք են արանցն՝ որ ժառանգեցուցանիցեն ձեզ զերկիրն. Եղիազար քահանայ, եւ յեսու նաւեան,
¹⁸եւ մի մի իշխան ՛ի ցեղէ առնուցուք ժառանգեցուցանել ձեզ զերկիրն։
¹⁹Եւ ա́յս անուանք են արանց։ Ցեղին յուդայ՝ քաղէբ որդի յեփոնեայ։
²⁰Ցեղին շմաւոնի, սաղամիէլ որդի եմիուդայ։
²¹Ցեղին բենիամինի, ելդադ որդի քասղովդայ։
²²Ցեղին դանայ, իշխան բակքիր որդի եգղայ։
²³Որդւոցն յովսեփայ, ցեղի որդւոցն մանասէի իշխան, անիէլ որդի սուփիդայ։
²⁴Ցեղի որդւոցն եփրեմի իշխան, կամուէլ որդի սաբաթայ։

²⁵Ցեղին զաբուղոնի իշխան, եղիսափան որդի փառնաքայ։
²⁶Ցեղի որդւոցն իսաքարայ իշխան, փաղաիէլ որդի ոզիայ։
²⁷Ցեղի որդւոցն ասերայ իշխան, աքիովր որդի սելովմա։
²⁸Ցեղին նեփթաղիմայ իշխան, փագայէլ որդի մէուդայ։
²⁹Սոքա́ են որոց հրաման ետ տ(է)ր բաժանել որդւոցն ի(սրաէ)լի զերկիրն քանանացւոց։

¹Եւ խօսեցաւ տ(է)ր ընդ մովսիսի յարեւմուտս մովաբու՝ առ եզերբ յորդանանու յանդիման երեքոյի՝ եւ ասէ։
²Հրաման տուր որդւոցն ի(սրաէ)լի. եւ տացեն ղեւտացւոցն ՛ի վիճակաց կալուածոց իւրեանց քաղա́քս բնակու(թ)ե(ան)ց, եւ բուրաստանս շուրջ զքաղաքօք իւրեանց տացեն ղեւտացւոցն։
³Եւ եղիցին ն(ո)ց(ա) քաղաքք բնակութե(ան). եւ զատուցեալքն նոցա եղիցին խաշանց ն(ո)ց(ա), եւ ա(մենայ)ն չորքոտանեաց ն(ո)ց(ա)։
⁴Եւ արուարձա́նք քաղաքացն զորս տայցէք ղեւտացւոցն ՛ի պարսպէ քաղաքին. եւ արտաքոյ քաղաքին երկո́ւս հազարս կանգունս շուրջանակի։

⁵Եւ չափեսջի́ք արտաքոյ քաղաքին, յարեւելից կողմանէ երկուս հազարս կանգունս. եւ ընդ ծովակողմն երկուս հազարս կանգունս. եւ ընդ կողմն հիւսւսի՝ երկուս հազարս կանգունս. եւ ընդ կողմն հարաւոյ՝ երկուս հազարս կանգունս։ եւ քաղաքք ՛ի մէջ այնորիկ լինիցի ձեզ։ եւ զարուարձանս քաղաքացն։
⁶Եւ զքաղաքսն զորս տայցէք ղեւտացւոցն զվեց քաղաքս ապաստանից զոր տայցէք՝ փախչել անդր սպանողին։ եւ առ այնու քառասուն եւ երկուս քաղաքս։
⁷ընդ ա(մենայ)ն քաղաքս՝ քառասուն եւ ութ քաղաք տայցէք ղեւտացւոցն։ եւ զնոսա՝ եւ զբուրաստանս իւրեանց։

⁸Եւ զքաղաքս՝ զոր տայցէք ՛ի կալուածոց որդւոցն ի(սրաէ)լի. ՛ի բազմաց՝ բազումս, եւ ՛ի սակաւուց՝ սակաւս. ըստ իւրաքանչիւր ժառանգու(թ)ե(ան) զոր ժառանգիցեն, տացեն ՛ի քաղաքա́ց անտի ղեւտացւոցն։
⁹Եւ խօսեցաւ տ(է)ր ընդ մովսիսի՝ եւ ասէ.
¹⁰խօսեա́ց ընդ որդիսն ի(սրաէ)լի՝ եւ ասասցես ցն(ո)ս(ա)։ Դուք աւադիկ անցանէ́ք ընդ յորդանան յերկիրն քանանացւոց,
¹¹եւ զատուսջի́ք ձեզ քաղաքս, որ լինիցին ձեզ ապաստանաց՝ փախչել անդ սպանողին։ Ա(մենայ)ն որ հարկանիցէ զանձն ուրուք ակամայ,
¹²եղիցին ձեզ քաղա́քք ապաստանի ՛ի մերձաւորէ արեանն. եւ մի́ մեռանիցի սպանօղն՝ մինչեւ անցցէ առաջի ժողովրդեանն ՛ի դատաստանի։

¹³Եւ քաղաքքն զոր տայցէք՝ վե́ց քաղաքք ապաստանի լինիցին ձեզ.
¹⁴երիս քաղաքս տաջիք յա́յն կոյս յորդանանու, եւ երիս քաղաքս տաջիք յերկիրն քանանացւոց։
¹⁵Եւ եղիցի այն ապաւինութի(ւն) որդւոցն ի(սրաէ)լի, եկին եւ պանդխտի ՛ի միջի ձերում, եւ եղիցին քաղաքքն այնոքիկ ապաստանք, փախչել անդր ա(մենայ)նի որ հարկանիցէ զանձն ուրուք ակամայ։
¹⁶Եւ եթէ երկաթեղէն անօթով ոք հարկանիցէ՝ եւ սպանանիցէ զնա, սպանօղ է. մահո́ւ մեռցի սպանօղն։
¹⁷Եւ եթէ բռնաքարու որով մեռանիցի́ ոք հարկանիցէ զնա եւ մեռանիցի, սպանօղ է. մահո́ւ մեռցի սպանօղն։

¹⁸Եւ եթէ փայտեղէն անօթով ՛ի ձեռանէ որով մեռանիցի ոք՝ հարկանիցէ զնա եւ մեռանիցի, սպանօղ է. մահո́ւ մեռցի սպանօղն։
¹⁹Մերձաւոր արեանն սպանիցէ զսպանօղն. յորժամ պատահեսցէ նմա սպանցէ́ զնա։
²⁰Եւ եթէ առ թշնամու(թ)ե(ան) մղեսցէ զնա. եւ ձգեսցէ նմա զա(մենայ)ն անօթ խարդախութ(եամ)բ եւ մեռանիցի.
²¹կամ առ քինա́լ հարկանիցէ զնա ձեռամբ իւրով եւ մեռանիցի, մահո́ւ մեռցի որ եհարն. սպանօղ է, մահո́ւ մեռցի սպանանիցէն. մերձաւոր արեա́նն սպանցէ́ զսպանօղն ՛ի պատահելն ն(ո)ր(ա) նմա։
²²Ապա թէ վրիպակաւ՝ եւ ո́չ առ թշնամու(թ)ե(ան) մղեսցէ զնա, եւ ձգեսցէ նմա զա(մենայ)ն անօթ եւ ո́չ խարդախութ(եամ)բ.

²³կամ զա(մենայ)ն քար որով մեռանիցի, եւ ո́չ գիտութ(եամ)բ հարկանիցէ զնա՝ եւ մեռանիցի. եւ նա ո́չ էր ն(ո)ր(ա) թշնամի, եւ ո́չ խնդրէր չար առնել նմա.
²⁴դատեսցի́ ժողովուրդն ՛ի մէջ հարկանելեացն, եւ ՛ի մէջ մերձաւորի արեանն ը(ս)տ դատաստանա́ցս այսոցիկ.
²⁵եւ ապրեցուսցէ́ ժողովուրդն զսպանօղն ՛ի մերձաւորէ արեանն։ Եւ յուղարկեսցէ́ զնա ժողովուրդն անդրէն ՛ի քաղաքն ապաստանի յոր ապաւինեալն էր. եւ բնակեսցէ անդ մինչեւ մեռանիցի քահանայն մեծ զոր օծին իւղովն սրբութե(ան)։
²⁶Եւ եթէ ելանելով ելանիցէ սպանօղն ըստ սահմանս քաղաքին յոր ապաւինեալն էր.

²⁷եւ գտցէ զնա մերձաւոր արեանն արտաքոյ սահմանաց քաղաքին ապաստանի իւրոյ, սպանցէ́ մերձաւոր արեանն զսպանօղն. եւ մի́ լիցի մահապարտ։
²⁸Վասն այնորիկ ՛ի քաղաքի ապաստանին իւրոյ բնակեսցէ՝ մինչեւ մեռանիցի քահանայն մեծ. եւ յե́տ մեռանելոյ քահանային մեծի, դարձցի անդրէն սպանօղն յերկիր կալուածոց իւրոց։
²⁹Եւ եղիցի այս ձեզ յիրաւունս դատաստանի յա́զգս ձեր, յա(մենայ)ն բնակու(թ)ե(ան) ձերում։
³⁰Ա(մենայ)ն որ հարկանիցէ զանձն. վկայի́ւք սպանցեն զսպանօղն. եւ մի́ միայն վկայ՝ մի́ վկայեսցէ սպանանելոյն զանձն։

³¹Եւ փրկանս ընդ անձին ՛ի սպանողէն՝ որ մահապարտ իցէ, մի́ առնուցուք. այլ մահո́ւ մեռանիցի։
³²Եւ մի́ առնուցուք փրկանս վ(ա)ս(ն) փախչելոյ ՛ի քաղաքն ապաստանի, առ միւսանգամ բնակելոյ յերկրին, մինչեւ մեռանիցի քահանայն մեծ։
³³Եւ մի́ շաղախիցէք զերկիրն. եւ ո́չ քաւիցի երկիրն յարենէն հեղլոյ ՛ի վերայ ն(ո)ր(ա), եթէ ոչ արեա́մբն հեղլով։
³⁴Եւ մի́ պղծիցէք զերկիրն յորում բնակիցէք ՛ի նմա. յորում ե́ս բնակեցայց ՛ի միջի ձերում. զի ե́ս եմ տ(է)ր ա(ստուա)ծ ձեր, որ բնակիցեմ ՛ի մէջ որդւոցն ի(սրաէ)լի։

¹Եւ մատեան իշխանք ցեղի որդւոցն գաղաադու որդւոյ մաքիրայ՝ որդւոյ մանասէի ՛ի ցեղէ որդւոցն յովսեփու. եւ խօսեցան առաջի մովսիսի, եւ առաջի եղիազարու քահանայի, եւ առաջի իշխանաց տանց նահապետաց որդւոցն ի(սրաէ)լի,
²եւ ասեն. Տեառնդ մերում հրամա́ն ետ տ(է)ր, տա́լ զերկիրն ժառանգութե(ան) վիճակ որդւոցն ի(սրաէ)լի, եւ տեա́ռնդ հրաման ետ տ(է)ր՝ տալ ժառանգութի(ւն) դստերացն սաղպաադու եղբօր մերում։
³Եւ արդ՝ եթէ լինիցին միո́ւմ ցեղիցն ի(սրաէ)լի կանայք. եւ բառնայցէ՞ վիճակ ն(ո)ց(ա) ՛ի կալուածոց հօրն իւրեանց. եւ յաւելուցու ՛ի ժառանգու(թ)ի(ւն) ա́յնր ցեղի որոց լինիցին կանայք. եւ ՛ի վիճակէ ժառանգութե(ան) մերոյ բառնայցէ՞։

⁴եւ եթէ լինիցի թողութի(ւն) որդւոցն ի(սրաէ)լի, յաւելուցու ժառանգութի(ւն) ն(ո)ց(ա) ՛ի ժառանգութի(ւն) ցեղի, որոց լինիցին կանայք. եւ ՛ի ժառանգու(թեն)է ցեղի ազգիս մերոյ բառնայցէ ժառանգութի(ւն) ն(ո)ց(ա)։
⁵Եւ պատուիրեաց մովսէս որդւոցն ի(սրաէ)լի հրամանաւ տ(եառ)ն՝ եւ ասէ. առ ա́յն զոր ասաց ցնա ցեղ որդւոցն յովսեփայ։
⁶Ա́յս բա́ն է զոր հրաման ետ տ(է)ր դստերացն սաղպաադու, եւ ասէ։ Որոց հաճոյ թուեսցի յաչս ն(ո)ց(ա)՝ եղիցին նոքա կանայք. բայց ՛ի ցեղէ հօրն իւրեանց եղիցին կանայք։
⁷Եւ մի́ փոխեսցի ժառանգու(թ)ի(ւն) որդւոցն ի(սրաէ)լի ցեղէ ՛ի ցեղ. զի յիւրաքանչիւր ժառանգութի(ւն) հայրենի ցեղի իւրոյ յարիցեն որդիքն ի(սրաէ)լի։

⁸Եւ ա(մենայ)ն օրիորդ մերձաւոր ժառանգութե(ան) ՛ի ցեղից որդւոցն ի(սրաէ)լի միո́ւմ ումեք յագականէ հօր իւրոյ լինիցի կին. զի մերձաւորեցուսցեն որդիքն ի(սրաէ)լի զիւրաքանչիւր հայրենի ժառանգութի(ւն) իւր։
⁹Եւ մի́ փոխեսցի վիճակ ՛ի ցեղէ յա́յլ ցեղ. այլ իւրաքանչիւր յի́ւր ժառանգութի(ւն) յարիցեն որդիքն ի(սրաէ)լի։
¹⁰Եւ որպէս հրաման ետ տ(է)ր մովսիսի, ա́յնպէս արարին դստերքն սաղպաադու։
¹¹Եւ եղեն թերսա, եգղա, եւ մեղքա, եւ նուա, եւ մաաղա, դստերքն սաղպաադու՝ հօր եղբարց որդւոց իւրեանց կանայք։
¹²՛ի ցեղէն մանասէի որդւոցն յովսեփայ եղեն կանայք։ եւ եղեն ժառանգութի(ւն)ք նոցա յազգատոհմի հօրն իւրեանց։

¹³Ա́յս են պատուիրանք եւ իրաւո́ւնք եւ դատաստա́նք զոր պատուիրեաց տ(է)ր ՛ի ձեռն մովսիսի, յարեւմուտս մովաբու, առ եզերբ յորդանանու յանդիման երեքոյի։