¹ԵՒ ԿՈՉԵԱՑ ՏԷՐ ԶՄՈՎՍԷՍ, եւ խօսեցաւ ընդ նմա ՛ի խորանէ անտի վկայու(թ)ե(ան)՝ եւ ասէ. խօսեա́ց դու ը(ստ) որդիսդ ի(սրաէ)լի, եւ ասասցես ցդոսա։
²Ա́յր ոք ՛ի ձէնջ եթէ մատուցանիցէ պատարագ տ(եառ)ն ՛ի խաշանց, յարջառոց կամ յոչխարէ́ մատուցանիցէք զպատարագս ձեր։
³Եթէ ողջակէ́զ իցէ պատարագն նորա յարջառոց, արու անարա́տ մատուսցէ, առ դո́ւրս խորանին վկայութե(ան) ածցէ́ զնա, ընդունելութի(ւն) ՛ի նմանէ՝ առ ՛ի քաւելոյ առաջի տ(եառ)ն։
⁴Եւ դիցէ́ զձեռն իւր ՛ի վերայ գլխոյ ընծային՝ յընդունելութի(ւն) նմա, առ ՛ի քաւելոյ վ(ա)ս(ն) անձին իւրոյ։

⁵Եւ սպանցե́ն զզուարակն առաջի տ(եառ)ն. եւ մատուսցեն քահանայքն որդիքն ահարոնի զարիւնն. եւ հեղցե́ն շուրջ զսեղանովն որ կայցէ առ դրան խորանին վկայու(թ)ե(ան)։
⁶եւ մորթեսցեն զողջակէզն. եւ անդամ անդա́մ յօշեսցեն զնա։
⁷Եւ դիցեն որդիքն ահարոնի քահանայքն հո́ւր ՛ի վերայ սեղանոյն. եւ կուտեսցե́ն փա́յտ ՛ի վերայ հրոյն։ Եւ դիցեն որդիքն ահարոնի քահանայքն
⁸զանդամաթիւն եւ զգլուխն, եւ զճարպն ՛ի վ(ե)ր(այ) փայտին որ կայցէ ՛ի վերայ հրոյն որ է ՛ի * սեղանն։
⁹Եւ զփորոտին եւ զորսն լուասցեն ջրով. եւ դիցեն քահանայքն զա(մենայ)ն ՛ի վերայ սեղանոյն. զի ողջակէ́զ զոհի է ՛ի հոտ անուշից տ(եառ)ն։

¹⁰Ապա թէ յոչխարա́ց իցէ պատարագն տ(եառ)ն, ՛ի գառանց եւ յուլոց ողջակէզ, արո́ւ անարատ մատուցանիցէ զնա։
¹¹Եւ դիցէ զձեռն իւր ՛ի վերայ գլխոյ ն(ո)ր(ա). եւ սպանցե́ն զնա ՛ի կողմանց սեղանոյն ընդ հիւսւսի, առաջի տ(եառ)ն. եւ հեղցեն զարիւնն որդիքն ահարոնի քահանայք շուրջ զսեղանովն։
¹²Եւ յօշեսցեն զնա անդամ անդամ. եւ զգլուխ ն(ո)ր(ա) եւ զճարպ դիցեն քահանայքն ՛ի վերայ փայտին եւ հրոյ՝ որ ՛ի վ(ե)ր(այ) սեղանոյն իցէ։
¹³եւ զփորոտին եւ զոտսն լուասցեն ջրով. եւ մատուսցէ քահանայն զա(մենայ)ն, եւ դիցէ́ ՛ի վերայ սեղանոյն. զի ողջակէզ զոհի է ՛ի հո́տ անուշից տ(եառ)ն։

¹⁴Իսկ եթէ ՛ի թռչնոց մատուցանիցէ յողջակէզ պատարագս տ(եառ)ն, ՛ի տատրակաց կամ յաղաւնեա́ց տարցի պատարագն իւր։
¹⁵Եւ մատուսցէ զնա քահանայն առ սեղանն. եւ խառեսցէ́ զգլուխ ն(ո)ր(ա). եւ դիցէ́ քահանայն ՛ի վերայ սեղանոյն, եւ քամեսցէ́ զարիւնն առ յատակաւ սեղանոյն։
¹⁶Եւ կորզեսցէ́ զարմկունսն թեւօքն հանդերձ. եւ հանցէ́ զնա առ սեղանովն ՛ի տեղի մոխրակուտին։
¹⁷եւ ջաղջախեսցէ զայն ՛ի թեւոցն. եւ ՛ի բաց մի́ զատուսցէ. եւ դիցէ զայն քահանայն ՛ի սեղանն ՛ի վերայ փայտին եւ հրոյ. զի ողջակէ́զ զոհի է ՛ի հոտ անուշից տ(եառ)ն։

¹Եւ անձն ոք՝ եթէ մատուցանիցէ պատարագ տ(եառ)ն, նաշի́հ լիցի պատարագն ն(ո)ր(ա). եւ արկցէ զնովաւ եւղ, եւ դիցէ ՛ի վ(ե)ր(այ) ն(ո)ր(ա) կնդրուկ. զի զո́հ է։
²Եւ տարցի զայն առ քահանայսն որդիս ահարոնի. եւ լցեալ զձեռն իւր ՛ի նաշհւոյ անտի իւղովն հանդերձ, եւ զա(մենայ)ն զկնդրուկն ն(ո)ր(ա), եւ դիցէ քահանայն զյիշատակ ն(ո)ր(ա) ՛ի վ(ե)ր(այ) սեղանոյն զո́հ ՛ի հոտ անուշից տ(եառ)ն։
³Եւ նշխա́րն ՛ի զոհէ անտի՝ ահարոնի եւ որդւոց իւրոց եղիցի. սրբու(թ)ի(ւն) սրբու(թ)ե(ան)ց ՛ի զոհից անտի տ(եառ)ն։
⁴Ապա թէ մատուցանիցէ պատարագ զո́հ եփեալ ՛ի թոնրի. պատարագ տ(եառ)ն ՛ի նաշհւոյ՝ պա́նս բաղարջս, ՛ի նաշհւոյ զանգեալ իւղով, եւ քաքա́րս բաղարջս օծեալ իւղով։

⁵Իսկ եթէ զո́հ ՛ի տապակէ իցէ պատարագն քո. նաշի́հ զանգեալ իւղով, բաղա́րջ լինիցի.
⁶եւ բրդեսցե́ս զայն պատառս պատառս. եւ արկցես ՛ի վ(ե)ր(այ) ն(ո)ց(ա) եւղ. զի զո́հ տ(եառ)ն է։
⁷Ապա թէ զո́հ ՛ի կասկարայից իցէ պատարագն քո, նաշի́հ իւղով գործեսցի.
⁸եւ մատուսցես զզոհն զոր առնիցես ՛ի նոցանէ տ(եառ)ն. եւ տարցի́ս առ քահանայն։ Եւ մատուցեալ քահանայն առ սեղանն,
⁹հանցէ́ ՛ի զոհէն զառ ՛ի յիշատակէ ն(ո)ր(ա). եւ դիցէ քահանայն ՛ի վերայ սեղանոյն ընծայ անուշութե(ան) տ(եառ)ն։
¹⁰Եւ որ մնայցէ ՛ի զոհէ անտի, ահարոնի́ եւ որդւոց ն(ո)ր(ա) լինիցի. սրբութի(ւն) սրբութե(ան)ց ՛ի զոհիցն քոց։

¹¹Զա(մենայ)ն զոհ զոր մատուցանիցէք տ(եառ)ն, ո́չ առնիցէք խմորուն։ զա(մենայ)ն խմորուն, եւ զա(մենայ)ն մեղրեալ՝ մի́ մատուցանիցէք ՛ի նոցանէ պտո́ւղ ՛ի զոհ տ(եառ)ն։
¹²պատարագ պտղոյ մատուցանիցէք զայն տ(եառ)ն. բայց ՛ի սեղանն մի́ ելանիցէ ՛ի հոտ անուշից տ(եառ)ն։
¹³Եւ ա(մենայ)ն պատարագ զոհից ձերոց աղի́ւ տ(եառ)ն յաղեսցի։ մի́ պակասեցուցանէք զա́ղ ուխտին ա(ստուծո)յ ՛ի զոհից ձերոց. ընդ ա(մենայ)ն պատարագս ա́ղ մատուցանիցէք։
¹⁴Իսկ եթէ յառաջին արմտեաց մատուցանիցես պատարագ տ(եառ)ն, մուրկ նո́ր փրկեալ եւ մաքրեալ՝ տ(եառ)ն, մատուսցե́ս զոհ զառաջնոց արմտեաց քոց։

¹⁵եւ արկցես զնովաւ եւղ, եւ դիցես ՛ի վերայ ն(ո)ր(ա) կնդրուկ, զի զո́հ է։
¹⁶Եւ հանցէ́ քահանայն զառ յիշատակէ ն(ո)ր(ա) ՛ի մրկէ անտի հանդերձ իւղովն, եւ զա(մենայ)ն կնդրուկ ն(ո)ր(ա) զի պտուղ տ(եառ)ն է։

¹Ապա թէ զոհ փրկութե(ան) իցէ պատարագ նորա տ(եառ)ն, եթէ յարջառոց մատուցանիցէ, եթէ արո́ւ իցէ, եւ եթէ է́գ իցէ, զանարա́տն մատուսցէ առաջի տ(եառ)ն։
²Եւ դիցէ զձեռս իւր ՛ի վերայ գլխո́յ պատարագին. եւ սպանցէ́ զնա առ դրան խորանին վկայու(թ)ե(ան)։ եւ հեղցեն որդիքն ահարոնի քահանայք զարիւնն ՛ի վերայ սեղանոյ ողջակիզացն շուրջանակի։
³Եւ մատուսցէ ՛ի զոհէն փրկութե(ան) պտուղ տ(եառ)ն. զճարպ թաղանթ քաղրթին, եւ զա(մենայ)ն ճարպ փորոտւոյն։
⁴եւ զերկուս երիկամունսն եւ զճարպն որ ՛ի նոսա, որ առ մսանամբքն իցեն եւ զլերգաբոյթն երիկամամբքն հանդերձ կորզեսցեն։

⁵Եւ հանցեն զա́յն որդիքն ահարոնի քահանայք ՛ի սեղանն յողջակէ́զ ՛ի վերայ փայտին եւ հրոյն, պտուղ անուշից տ(եառ)ն։
⁶Ապա թէ յօդեա́ց իցէ պատարագ նորա զոհ փրկութե(ան) տ(եառ)ն. ա́րու կամ էգ, անարատ մատուսցէ զայն։
⁷Իսկ եթէ գա́ռն մատուցանիցէ զպատարագն իւր, մատուսցէ́ զնա առաջի տ(եառ)ն։
⁸եւ դիցէ զձեռն իւր ՛ի վ(ե)ր(այ) գլխո́յ պատարագին իւրոյ, եւ սպանցէ́ զնա առ դրան խորանին վկայութե(ան). եւ հեղցեն որդիքն ահարոնի քահանայք զարիւնն շուրջ զսեղանովն։
⁹Եւ մատուսցեն ՛ի զոհէն փրկութե(ան) պտուղ տ(եառ)ն, զճարպն եւ զմսանն անարատ,

¹⁰հանդերձ զըստօքն հանցէ ՛ի նմանէ. եւ զճարպ թաղանթ քաղրթին, եւ զա(մենայ)ն ճարպ փորոտւոյն, եւ զերկուս երիկամունսն եւ զճարպն որ ՛ի ն(ո)ս(ա) որ առ մսանամբքն, եւ զլերդաբոյթն հանդերձ երիկամամբք
¹¹կորզեալ՝ հանցէ́ քահանայն ՛ի սեղանն հո́տ անուշից պտուղ տ(եառ)ն։
¹²Իսկ եթէ յայծեաց իցէ պատարագն իւր, մատուսցէ́ առաջի տ(եառ)ն.
¹³եւ դիցէ զձեռն իւր ՛ի վերայ գլխոյ ն(ո)ր(ա). եւ սպանցե́ն զնա առ դրան խորանին վկայութե(ան) առաջի տ(եառ)ն. եւ հեղցեն զնա առ դրան խորանին վկայութե(ան) առաջի տ(եառ)ն. եւ հեղցեն որդիքն ահարոնի քահանայք զարիւնն շուրջ զսեղանովն։
¹⁴Եւ հանցեն ՛ի նմանէ պտուղ տ(եառ)ն զճա́րպն զթաղանթ քաղրթին, եւ զա(մենայ)ն ճարպ փորոտւոյն.

¹⁵եւ զերկուս երիկամունսն, եւ զճարպն ՛ի նոսա՝ որ առ մսանամբքն. եւ զլերգաբոյթն երիկամամբքն հանդերձ կորզեսցէ.
¹⁶եւ հանցէ քահանայն ՛ի սեղանն պտո́ւղ ՛ի հոտ անուշից տ(եառ)ն։
¹⁷օրէն յաւիտենական յազգս ձեր, յամենայն բնակութե(ան) ձերում. զա(մենայ)ն ճարպ եւ զամենայն արիւն մի́ ուտիցէք։

¹Խօսեցաւ տ(է)ր ընդ մովսիսի՝ եւ ասէ։
²Խօսեա́ց դու ընդ որդիսդ ի(սրաէ)լի. եւ ասասցես. անձն եթէ մեղիցէ առաջի տ(եառ)ն ակամայ, յա(մենայ)ն հրամանաց տ(եառ)ն, յորոց ո́չ է արժան առնել՝ եւ առնիցէ́ ինչ ՛ի նոցանէ։
³Եթէ քահանայապետն օծեալ մեղանչիցէ առ ՛ի զժողովուրդն յանցուցանելոյ, մատուսցէ́ վ(ա)ս(ն) մեղաց իւրոց զոր մեղաւ՝ զուարա́կ յանդւոյ անարատ տ(եառ)ն՝ վ(ա)ս(ն) մեղացն։
⁴Եւ ածցէ́ զզուարակն ՛ի դուռն խորանին վկայութե(ան) առաջի տ(եառ)ն. եւ դիցէ զձեռս իւր ՛ի վերայ գլխոյ զուարակին առաջի տ(եառ)ն. եւ սպանցե́ն զզուարակն առաջի տ(եառ)ն։
⁵Եւ առեալ քահանային օծելոյ կատարելոյ ՛ի ձեռս իւր յարենէ զուարակին, եւ տարցի́ զայն ՛ի խորանն վկայու(թ)ե(ան)։

⁶եւ թացցէ քահանայն զմա́տն իւր յարեանն. եւ ցանեսցէ́ յարենէ անտի եւթն անգամ մատամբն իւրով առաջի տ(եառ)ն, առ վարագուրաւն սրբութե(ան)։
⁷Եւ դիցէ́ քահանայն յարենէ զուարակին ՛ի վերայ եղջերաց սեղանոյ խնկոցն հանդերձանաց առաջի տ(եառ)ն՝ որ իցէ ՛ի խորանին վկայութե(ան)։ Եւ զա(մենայ)ն արիւն զուարակին հեղցէ́ առ յատակաւ սեղանոյն ողջակիզաց, որ կայցէ առ դրան խորանին վկայութե(ան)։
⁸Եւ զա(մենայ)ն ճարպ զուարակին մեղաց կորզեսցէ́ ՛ի նմանէ, եւ զճարպ թաղանթ քաղրթին, եւ զա(մենայ)ն ճարպ փորոտւոյն.
⁹եւ զերիկամունսն երկոսին. եւ զճարպն որ ՛ի ն(ո)ս(ա) որ առ մսանամբքն, եւ զլերդաբոյթն երիկամամբքն հանդրձ կորզեսցէ։

¹⁰Զոր օրինակ առնուցու ՛ի զուարակէ զոհի փրկութե(ա)ն. եւ հանցէ́ քահանայն ՛ի սեղանն ողջակիզաց։
¹¹Եւ զմորթ զուարակին եւ զա(մենայ)ն մարմին ն(ո)ր(ա), հանդերձ գլխովն եւ ոտիւքն. եւ քաղրթաւն, եւ ապաւառաւն.
¹²հանցեն ողջո́յն զզուարակն արտաքոյ բանակին ՛ի տեղի մի սո́ւրբ, ուր զմոխիրն հեղուցուն. եւ այրեսցեն զնա ՛ի վերայ փայտի հրով. ՛ի վերայ մոխրակուտին այրեսցի։
¹³Ապա թէ ամենայն ժողովուրդ որդւոցն ի(սրաէ)լի տգիտանայցէ ակամայ. եւ մոռանայցի́ բանն յաչաց ժողովրդեանն. եւ առնիցեն ինչ մի յամենայն պատուիրանաց տ(եառ)ն որ ո́չ առնիցի, եւ յանցանիցե́ն.

¹⁴եւ յայտնիցի ն(ո)ց(ա) մեղքն որ մեղան նովաւ. մատուսցէ́ ժողովուրդն զուարակ անարատ յանդւոց վ(ա)ս(ն) մեղաց. եւ ածցեն զնա՛ի դուռն խորանին վկայու(թ)ե(ան)։
¹⁵եւ դիցեն ծերք ժողովրդեանն զձեռս իւրեանց ՛ի վերայ գլխոյ զուարակին առաջի տ(եառ)ն. եւ սպանցեն զզուարակն առաջի տ(եառ)ն։
¹⁶Եւ տարցի́ քահանայն օծեալ յարենէ զուարակին ՛ի խորանն վկայու(թ)ե(ան),
¹⁷եւ թացցէ́ քահանայն զմատն իւր յարեան զուարակին, եւ ցանեսցէ́ եւթն անգամ առաջի տ(եառ)ն, յանդիման վարագուրին սրբութե(ան).

¹⁸եւ դիցէ́ յարենէ անտի քահանայն ՛ի վերայ եղջերաց սեղանոյն խնկոցն հանդերձանաց. որ կայցէ առաջի տ(եառ)ն ՛ի խորանին վկայութե(ան)։ Եւ զա(մենայ)ն զարիւնն հեղցէ́ առ յատակաւ սեղանոյն ողջակիզաց, որ է́ առ դրան խորանին վկայութե(ան)։
¹⁹եւ զա(մենայ)ն ճարպն կորզեսցէ ՛ի նմանէ՝ եւ հանցէ́՛ի սեղանն։
²⁰Եւ արասցէ́ զուարակին՝ զոր օրինակ արար զուարակին մեղաց, նո́յնպէս արասցէ եւ նմա. եւ քաւեսցէ վ(ա)ս(ն) ն(ո)ց(ա) քահանայն, եւ թողցի́ն նոցա մեղքն։
²¹Եւ հանցեն զզուարակն ողջոյն արտաքոյ բանակին, եւ այրեսցեն զզուարակն. զոր օրինակ այրեցին զառաջի́ն զուարակն, զի վ(ա)ս(ն) մեղաց ժողովրդեանն է։

²²Եւ եթէ իշխանն մեղիցէ, եւ արասցէ մի ինչ ՛ի պատուիրանաց տ(եառ)ն ա(ստուծո)յ՝ որ ո́չ առնիցի, եւ յանցանիցէ ակամայ.
²³եւ յայտնեսցի նմա մեղք զոր մեղաւ. մատուսցէ́ զպատարագն իւր նոխա́զ յայծեաց՝ արու անարատ.
²⁴եւ դիցէ զձեռս իւր ՛ի վերայ գլխոյ նոխազին, եւ սպանցե́ն զնա ՛ի տեղւոջ ուր սպանանիցեն զողջակէզսն առաջի տ(եառ)ն. քանզի մեղա́ց է։
²⁵Եւ առցէ́ քահանայն յարենէ անտի մեղացն՝ մատամբ իւրով եւ դիցէ́ ՛ի վերայ եղջերաց սեղանոյն ողջակիզաց։ Եւ զա(մենայ)ն զարիւն նորա հեղցէ́ առ յատակաւ սեղանոյ ողջակիզացն.

²⁶եւ զա(մենայ)ն զճարպ ն(ո)ր(ա) հանցէ́ ՛ի սեղանն. իբրեւ զճարպ զոհի փրկութե(ա)ն. եւ քաւեսցէ́ վասն ն(ո)ր(ա) քահանայն ՛ի մեղացն իւրոց, եւ թողցի́ նմա։
²⁷Եւ եթէ մեղիցէ անձն ակամայ ՛ի ժողովրդենէ երկրին. յառնե́լ նմա մի ինչ յա(մենայ)ն պատուիրանացն տ(եառ)ն՝ որ ո́չ առնիցի, եւ յանցանիցէ.
²⁸եւ յայտնեսցին նմա մեղքն զոր մեղաւ. մատուսցէ́ զպատարագ իւր՝ ալո́ջ անարատ վ(ա)ս(ն) մեղացն զոր մեղաւ։
²⁹եւ դիցէ զձեռս իւր ՛ի վերայ գլխոյ ն(ո)ր(ա). եւ սպանցե́ն զալոջն վ(ա)ս(ն) մեղացն, ՛ի տեղւոջ ուր սպանանիցեն զողջակէզսն։

³⁰Եւ առցէ́ քահանայն յարենէ մեղացն՝ մատամբ իւրով, եւ դիցէ́ ՛ի վերայ եղջերաց սեղանոյն ողջակիզաց. եւ զա(մենայ)ն արիւն ն(ո)ր(ա) հեղցէ́ առ յատակաւ սեղանոյ ողջակիզացն։
³¹Եւ զա(մենայ)ն զճարպն կորզեսցէ՝ զոր օրինակ կորզիցի ճարպ յողջակիզէ փրկու(թ)ե(ա)ն. եւ հանցէ́ զայն քահանայն ՛ի սեղանն՝ ՛ի հոտ անուշից տ(եառ)ն. եւ քաւեսցէ́ վ(ա)ս(ն) ն(ո)ր(ա) քահանայն, եւ թողցի նմա։
³²Եւ եթէ ոչխա́ր մատուցանիցէ զպատարագն իւր, է́գ՝ անարա́տ մատուսցէ զնա։
³³եւ դիցէ զձեռն իւր ՛ի վերայ գլխոյ ն(ո)ր(ա) որ վ(ա)ս(ն) մեղա́ցն իցէ. եւ սպանցեն զնա ՛ի տեղւոջն՝ ուր սպանանիցեն զողջակէզսն։

³⁴Եւ առեալ քահանային յարենէ ա́յնր՝ որ վ(ա)ս(ն) մեղացն իցէ՝ մատամբն իւրով, եւ դիցէ́ ՛ի վ(ե)ր(այ) եղջերաց սեղանոյ ողջակիզացն. եւ զա(մենայ)ն արիւն ն(ո)ր(ա) հեղցէ́ առ յատակաւ սեղանոյն ողջակիզաց։
³⁵եւ զա(մենայ)ն զճարպ նորա կորզեսցէ՝ զոր օրինակ կորզիցի ճարպ ոչխարին փրկութե(ան)։ եւ դիցէ զայն քահանայն ՛ի վերայ սեղանո́յն յողջակէզ տ(եառ)ն. եւ քաւեսցէ́ վ(ա)ս(ն) ն(ո)ց(ա) քահանայն ՛ի մեղացն զոր մեղաւ, եւ թողցի́ նմա։

¹Եւ եթէ մեղիցէ́ անձն, եւ լուիցէ զբարբառ երդման երդմնեցուցանելոյ, եւ նա եցէ վկայ, կամ թէ ետես, կամ թէ իրագէ́տ իցէ, եւ ո́չ հանցէ ՛ի վեր, մե́ղս ընկալցի։
²Եւ անձն որ մերձեսցի յի́րս պղծութե(ան), կամ ՛ի մեռելոտի, կամ ՛ի գազանաբեկ, կամ ՛ի պիղծ ինչ. կամ ՛ի մեռելոտիս անասնոց պղծոց, կամ ՛ի մեռելոտիս սողնոց պղծոց. եւ անցանիցէ́ զնովաւ։ եւ ինքն պղծիցի եւ յանցանիցէ.
³կամ մերձենայցէ ՛ի պղծու(թ)ի(ւն)ս մարդոյ կամ յա(մենայ)ն պղծու(թ)ի(ւն)ս ն(ո)ր(ա), յոր թէ մերձեցեալ պղծիցի. եւ մոռացօնք լինիցին նմա. եւ յետ այնորիկ ՛ի վերայ հասանիցէ եւ յանցեա́լ իցէ։

⁴Եւ անձն որ ուխտիցէ չա́ր ինչ առնել, կամ բարի. ը(ս)տ ա(մենայ)նի զոր ինչ ուխտիցէ մարդ երդմա́մբ չափ. եւ մոռանայցի այն յաչաց ն(ո)ր(ա). եւ ապա ՛ի վերայ հասանիցէ, եւ մեղանչիցէ միով իւիք ՛ի նոցանէ։
⁵եւ խոստովա́ն լինիցի զմեղսն՝ զոր մեղաւ։
⁶Մատուսցէ́ վ(ա)ս(ն) յանցանացն իւրոց՝ զոր յանցեաւ տ(եառ)ն. եւ վ(ա)ս(ն) մեղացն զոր մեղաւ, է́գ յօդեաց որոջ, ակմ ալո́ջ մի յայծեաց վ(ա)ս(ն) մեղացն. եւ քաւեսցէ́ վ(ա)ս(ն) նորա քահանայն ՛ի մեղաց անտի. եւ թողցին նմա մեղքն։
⁷Ապա թէ չիցէ́ ձեռնհաս՝ լինել բաւական ոչխարաւ, մատուսցէ վ(ա)ս(ն) մեղացն զոր մեղաւ, երկուս տատրակս կ(ա)մ երկուս ծագս աղաւնեաց. մին վ(ա)ս(ն) մեղացն, եւ մին՝ յողջակէզ։

⁸ածցէ առ քահանայն։ Եւ տարցի́ ՛ի ներքս քահանայն նախ՝ զվասն մեղացն, եւ խառեսցէ́ քահանայն զգլուխն յուլանէն՝ եւ մի́ հատցէ։
⁹եւ ցանեսցէ́ յարենէ անտի ա́յնր որ վ(ա)ս(ն) մեղացն իցէ՝ զորմով սեղանոյն. եւ զմնացեալ արիւնն քամեսցէ́ առ յատակաւ սեղանոյն. քանզի վ(ա)ս(ն) մեղա́ց է։
¹⁰Եւ զերկրորդն արասցէ յողջակէ́զ ո(ր)պ(էս) եւ օրէն իցէ. եւ քաւեսցէ́ վ(ա)ս(ն) ն(ո)ր(ա) քահանայն ընդ մեղացն զոր մեղաւ, եւ թողցի́ նմա։
¹¹Եւ եթէ ո́չ գտանիցին ընդ ձեռամբ ն(ո)ր(ա) զոյգք տատրակաց՝ կամ երկու ձագք աղաւնեաց, բերցէ զպատարագն իւր վ(ա)ս(ն) որոյ մեղաւն, զտասանորդ գրուի միոյ նաշիհ վ(ա)ս(ն) մեղացն. եւ եւղ մի́ արկցէ ՛ի նա, եւ կնդրուկ՝ մի́ դիցէ ՛ի վերայ ն(ո)ր(ա), զի վ(ա)ս(ն) մեղաց է։

¹²Եւ տարցի զայն առ քահանայն. եւ առեալ քահանային ՛ի նմանէ լի́ ափով զառ ՛ի յիշատակէն ն(ո)ր(ա), դիցէ ՛ի վ(ե)ր(այ) սեղանոյ ողջակիզացն տ(եառ)ն. քանզի վ(ա)ս(ն) մեղաց է։
¹³եւ քաւեսցէ́ վ(ա)ս(ն) ն(ո)ր(ա) քահանայն զմեղսն զոր մեղաւ՝ որով իւիք եւ իցէ ՛ի նոցանէ. եւ թողցի́ նմա. եւ մնացեալն քահանայի́ն եղիցի իբրեւ զզոհ նաշհւոյ։
¹⁴Խօսեցաւ տ(է)ր ընդ մովսիսի՝ եւ ասէ.
¹⁵Անձն՝ որ եթէ վրիպեսցի եւ մեղիցէ ակամայ ՛ի սրբութե(ան)ց անտի տ(եառ)ն. մատուսցէ վ(ա)ս(ն) յանցանացն իւրոց տ(եառ)ն խո́յ անարատ յօգեաց՝ գնո́ց արծաթոյ ՛ի յիսուն սկեղէ՝ ըստ սրբութե(ան) սկեղն,

¹⁶վ(ա)ս(ն) որոյ յանցուցեալն իցէ։ Եւ զոր մեղաւն ՛ի սրբութի(ւն)սն, հատուսցէ́. եւ զհինգերորդ եւս մասնն յաւելցէ ՛ի նոյն. եւ տացէ́ ցքահանայն. եւ քաւեսցէ́ ՛ի նմանէ քահանայն խոյիւն որ վ(ա)ս(ն) յանցանացն իցէ, եւ թողցի նմա։
¹⁷Եւ անձն՝ որ մեղիցէ, եւ արասցէ մի ինչ յա(մենայ)ն պատուիրանաց տ(եառ)ն զոր չիցէ́ պարտ առնել, եւ ո́չ իմանայցէ, եւ յանցանիցէ, եւ ընդունիցի մե́ղս։
¹⁸Ածցէ́ խո́յ անարատ ՛ի խաշանց գնոց արծաթոյ վ(ա)ս(ն) յանցու(թ)ե(ա)ն՝ առ քահանայն. եւ քաւեսցէ́ վ(ա)ս(ն) ն(ո)ր(ա) քահանայն վ(ա)ս(ն) անգիտու(թ)ե(ա)ն զոր անգիտացաւ՝ եւ ինքն ո́չ գիտէր, եւ թողցի նմա։
¹⁹քանզի յանցեա́ւ յանցուի յանցանաց առաջի տ(եառ)ն։

¹Խօսեցաւ տ(է)ր ընդ մովսիսի՝ եւ ասէ.
²Ա́նձն ոք եթէ մեղիցէ, եւ արհամարհելով արհամարհեաց զպատուիրանս տ(եառ)ն. եւ ստեսցէ́ ընկերի իւրում. եթէ յաւանդի, եթէ ՛ի զովողութե(ան), եւ եթէ ՛ի յափշտակութե(ան), եւ եթէ վնասեսցէ ինչ ընկերի իւրում։
³Եւ եթէ եգիտ կորուստ ինչ՝ եւ ժխտիցէ ՛ի վերայ ն(ո)ր(ա). եւ երդնուցու սո́ւտ վ(ա)ս(ն) միոյ իրիք՝ յա(մենայ)նէ զոր եւ առնիցէ մարդ
⁴առ ՛ի մեղանչելոյ ն(ո)ր(ա) նոքօք։ Եւ եղիցի յորժամ մեղանչիցէ եւ յանցանիցէ, հատուսցէ́ զյափշտակութի(ւն)ն՝ զոր յափշտակեաց,

⁵կամ զվնասն զոր վնասեաց, կամ զաւանդն զոր աւանդեցաւ նմա, կամ զկորուստն զոր եգիտ յա(մենայ)ն իրաց, վ(ա)ս(ն) որոյ երդուաւ սուտ։ Տուժեսցի զգլո́ւխն. եւ զհինգերորդ մասն յաւելցէ ՛ի նոյն. եւ ոյր իցէ՝ հատուսցէ́ նմա յաւուր յորում յանդիմանեսցի։
⁶Եւ ընդ յանցանաց իւրոց մատուսցէ տ(եառ)ն խո́յ անարատ ՛ի հօտից՝ գնոց արծաթոյ, վ(ա)ս(ն) որոյ յանցեաւն։
⁷Եւ քաւեսցէ́ վ(ա)ս(ն) ն(ո)ր(ա) քահանայն առաջի տ(եառ)ն. եւ թողցի́ նմա վ(ա)ս(ն) միոյ իրիք յա(մենայ)նէ զոր արար եւ յանցեա́ւ նա։
⁸Խօսեցաւ տ(է)ր ընդ մովսիսի՝ եւ ասէ։

⁹Պատուէ́ր տուր ահարոնի եւ որդւոց ն(ո)ր(ա)՝ եւ ասասցես. ա́յս օրէն է ողջակիզին, վ(ա)ս(ն) այրելոյ ն(ո)ր(ա) ՛ի վերայ սեղանոյն զա(մենայ)ն գիշերն մինչեւ ցառաւօտ. եւ հուր սեղանոյն որ այրիցի ՛ի վերայ ն(ո)ր(ա)՝ մի́ շիջցի։
¹⁰Եւ զգեցցի քահանայն պատմուճան կտաւի. եւ անդրավարտիս կտաւիս զգեցցի ՛ի վ(ե)ր(այ) մարմնոյ իւրոյ, եւ հանցէ զընծայս ողջակիզին ՛ի վերայ սեղանոյն՝ զոր հուրն ծախիցէ. եւ դիցէ առ ընթե́ր սեղանոյն։
¹¹Եւ մերկասցի́ զպատմուճանն իւր, եւ զգեցցի ա́յլ պատմուճան. եւ հանցէ զողջակէզն արտաքոյ բանակին ՛ի տաղի́ սուրբ։

¹²Եւ հուրն որ այրիցի ՛ի վ(ե)ր(այ) սեղանոյն մի́ շիջցի. եւ այրեսցէ ՛ի վերայ ն(ո)ր(ա) քահանայն փա́յտ ընդ առաւօտս. եւ դիցէ ՛ի վերայ ն(ո)ր(ա) զողջակէզսն. եւ դիցէ́ նմա զճարպ փրկութե(ա)ն.
¹³եւ հո́ւր հանապազ այրեսցի ՛ի վերայ սեղանոյն՝ եւ մի́ շիջցի։
¹⁴Եւ այս օրէն է զոհին՝ զոր մատուցանիցեն որդիքն ահարոնի քահանայքն առաջի տ(եառ)ն յանդիման սեղանոյն։
¹⁵Առցէ ափով իւրով ՛ի նաշհւոյ զոհին հանդերձ իւղո́վ ն(ո)ր(ա) եւ կնդրկաւն որ իցէ ՛ի վերայ զոհին. եւ հանցէ ՛ի սեղանն պտուղ ՛ի հո́տ անուշից յիշատակ ն(ո)ր(ա) տ(եառ)ն։

¹⁶Եւ զմնացեալն ՛ի նմանէ կերիցէ ահարոն եւ որդիք նորա. բաղա́րջ կերիցի ՛ի սուրբ տեղւոջ. ՛ի սրահի́ խորանին վկայու(թ)ե(ան) կերիցեն զնա։
¹⁷ո́չ եփեսցի խմորեալ։ մա́սն ետու զայն ն(ո)ց(ա) ՛ի պտղոցն տ(եառ)ն. սրբութի(ւն)ք սրբու(թ)ե(ան)ց են։ Որպէս վ(ա)ս(ն) մեղացն իցէ, նոյնպէս եւ վ(ա)ս(ն) յանցանացն.
¹⁸ամենայն ա́րու քահանայիցն կերիցեն զայն. օրէն յաւիտենական յազգս ձեր ՛ի պտղոցն տ(եառ)ն. ա(մենայ)ն որ մերձեսցի ՛ի նոսա՝ սրբեսցի́։
¹⁹Խօսեցաւ տ(է)ր ընդ մովսիսի՝ եւ ասէ։
²⁰Ա́յս է պատարագ ահարոնի եւ որդւոցն ն(ո)ր(ա)՝ զոր մատուցանիցեն տ(եառ)ն յաւուր յորում օծանիցե́ս զն(ո)ս(ա)։ Զտասանորդ գրուի միոյ նաշհւոյ զո́հ հանապազորդ. զկէս ն(ո)ր(ա)՝ այգո́ւն, եւ զկէս ն(ո)ր(ա) երիկունն,

²¹՛ի տապակի իւղո́վ զանգեալ գործեսցի։ Եւ մատուսցէ զայն մաքրեալ զո́հ ՛ի պատառոյ. զո́հ ՛ի հոտ անուշից տ(եառ)ն։
²²քահանայն օծեալ՝ փոխանակ ն(ո)ր(ա) յորդւոց իւրոց առցէ́ զայն, օրէ́ն յաւիտենական տ(եառ)ն ամենեւին կատարեսցի։
²³Եւ ա(մենայ)ն զոհք քահանային ողջակէ́զ լինիցի, եւ մի́ ուտիցի։
²⁴Խօսեցաւ տ(է)ր ընդ մովսիսի՝ եւ ասէ։
²⁵խօսեա́ց ընդ ահարոն եւ ը(ստ) որդիս ն(ո)ր(ա)՝ եւ ասասցես. Ա́յս օրէն իցէ վ(ա)ս(ն) մեղացայոյն։ ՛ի տեղւոջ ուր սպանանիցեն զողջակէզն, սպանանիցեն եւ զվասն մեղացն առաջի տ(եառ)ն։ սրբութի(ւն) սրբութե(ան)ց է։
²⁶քահանայն որ մատուցանիցէ զայն, կերիցէ. ՛ի սուրբ տեղւոջ կերիցէ, ՛ի սրահի խորանին վկայութե(ան)։

²⁷Ա(մենայ)ն որ մերձենայցէ ՛ի միս ն(ո)ր(ա)՝ սրբեսցի́. եւ յոյր ձորձոց վերայ սրսկեսցի ՛ի նմանէ արիւն՝ լուասցի́ ՛ի սուրբ տեղւոջ։
²⁸եւ յանօթ կաւեղէն յորում եփեսցի, փշրեսցի́։ եւ եթէ ՛ի պղնձի անօթ եփեսցի́, քերեսցէ́ զնա՝ եւ ջրով ողողեսցէ։
²⁹ամենայն արու քահանայիցն կերիցէ́ զայն։ սրբու(թ)ի(ւն) սրբութե(ան)ց է տ(եառ)ն։
³⁰Եւ յա(մենայ)ն վ(ա)ս(ն) մեղաց յորոց մտանիցէ յարենէ ն(ո)ց(ա) ՛ի խորանն վկայութե(ան) քաւե́լ ՛ի սրբութիսն՝ մի́ կերիցի, այլ հրո́վ այրեսցի։

¹Եւ ա́յս օրէն իցէ խոյին՝ որ վ(ա)ս(ն) յանցանացն իցէ։ զի սրբութի(ւն) սրբութե(ան)ց է։
²՛Ի տեղւոջ ուր սպանանիցեն զողջակէզսն, սպանցեն եւ զխոյն յանցանաց առաջի տ(եառ)ն. եւ զարիւնն հեղցէ́ առ յատակաւ սեղանոյն ողջակիզաց շուրջանակի։
³Եւ զա(մենայ)ն ճարպ ն(ո)ր(ա) առցէ, եւ զմկանն. եւ զճարպ թաղանթ քաղրթին. եւ զա(մենայ)ն ճարպ փորոտւոյն.
⁴եւ զերիկամունսն զերկոսին. եւ զճարպն որ ՛ի վերայ ն(ո)ց(ա) առ մսանամբքն. եւ զլերդաբոյթն երիկամամբքն հանդերձ կորզեսցէ́։
⁵Եւ հանցէ զայն քահանայն ՛ի սեղանն պտուղ տ(եառ)ն՝ զի վ(ա)ս(ն) յանցանա́ց է։

⁶ա(մենայ)ն արու քահանային կերիցեն զայն. ՛ի սուրբ տեղւոջ կերիցեն զայն, քանզի սրբութի(ւն) սրբութե(ան)ց է։
⁷Որպէս զվ(ա)ս(ն) մեղացն՝ նոյնպէս զվասն յանցանացն։ օրէն՝ մի եւ նո́յն կացցէ նոցա. եւ քահանայն որ քաւիցէ նովաւ՝ նմա́ լիցի։
⁸Եւ քահանայն՝ որ մատուցանիցէ զողջակէզս ինչ մարդոյ, մորթ ողջակիզին զոր մատուցանիցէ՝ նմա́ լիցի։
⁹Եւ զա(մենայ)ն զոհ որ գործիցի ՛ի թոնրի. եւ ա(մենայ)ն որ գործիցի ՛ի կասկարայս՝ կամ ՛ի տապակի, քահանայի́ն որ մատուցանիցէ զայն՝ եղիցի։
¹⁰Եւ ա(մենայ)ն զոհ զանգեալ իւղով՝ եւ որ չիցէ զանգեալ, ամենեցո́ւն որդւոցն ահարոնի իւրաքանչիւր ումեք եղիցի հասարակաց։

¹¹Ա́յս օրէ́ն է զոհիցն փրկու(թ)ե(ան)՝ զոր մատուցանիցեն տ(եառ)ն։
¹²Իսկ եթէ վ(ա)ս(ն) գոհութե(ան) մատուցանիցէ զայն. մատուսցէ́ վ(ա)ս(ն) զոհի գոհութե(ա)ն պանս բաղարջս ՛ի նաշհւոյ զանգեալ իւղով, եւ քաքարս բաղարջս օծեալ իւղով, եւ նաշիհ զանգեալ իւղով. շօթի́ւք բաղարջ
¹³հացիւ մատուսցէ զպատարագն իւր, ՛ի վերայ զոհին գոհու(թ)ե(ան) եւ փրկութե(ան). եւ մատուսցէ մի́ ինչ յա(մենայ)ն պատարագաց իւրոց նուէր տ(եառ)ն։
¹⁴եւ ա́յն քահանային որ հեղուցու զարիւնն՝ փրկութե(ան) եղիցի. Եւ մի́ս զոհին գոհութե(ան) եւ փրկութե(ան)՝ նորին լինիցի։
¹⁵յորում աւուր պատարագիցի՝ կերիցի. եւ մի́ թողուցուն ՛ի նմանէ յայդ։

¹⁶Եւ եթէ կամա́ւ ոք ուխտս մատուցանիցէ տ(եառ)ն զպատարագն իւր. յաւուր յորում մատուցանիցի զոհն՝ կերիցի, եւ ՛ի վաղիւն։ եւ մնացեալն ՛ի մսոյ զոհին
¹⁷մինչեւ յօրն երրորդ՝ հրո́վ այրեսցի։
¹⁸Ապա թէ ուտելով ուտիցի ՛ի մսոյ զոհին փրկութե(ան) իւրոյ յաւուրն երրորդի. մի́ լինիցի ընդունելի մատուցանելեացն, եւ մի́ համարեսցի նմա այն. քանզի ապա́խտ եւ պղծութի(ւն) է. եւ անձն՝ որ կերիցէ ՛ի նմանէ, մե́ղս առնիցէ։
¹⁹Եւ միս՝ որ մերձեսցի յա(մենայ)ն պղծութի(ւն)ս, մի́ կերիցի, այլ հրո́վ այրեսցի. ա(մենայ)ն սո́ւրբ կերիցէ զմիսն։
²⁰Եւ անձն՝ որ կերիցէ ՛ի զոհէ փրկութե(ա)ն որ իցէ տ(եառ)ն։ եւ պղծութի(ւն) ն(ո)ր(ա) ՛ի նմա́ իցէ, կորիցէ́ անձն այն ՛ի ժողովրդենէ իւրմէ։

²¹Եւ անձն՝ որ մերձեսցի յա(մենայ)ն իրս պղծութե(ան). ՛ի պղծու(թ)ի(ւն)ս մարդոյ՝ կամ յանասնոց պղծոց, կամ յամենայն գարշելի́ պղծոց, եւ կերիցէ ՛ի մսոյ զոհին փրկութե(ան) որ իցէ տ(եառ)ն, կորիցէ անձնն այն ՛ի ժողովրդենէ իւրմէ։
²²Խօսեցաւ տ(է)ր ընդ մովսիսի՝ եւ ասէ։
²³խօսեա́ց ընդ որդիսդ ի(սրաէ)լի եւ ասասցես։ Զա(մենայ)ն ճարպ զարջառոյ եւ զոչխարի եւ զայծեաց մի́ ուտիցէք։
²⁴եւ ճարպ մեռելոտւոյ եւ գազանաբեկաց՝ լինիցի յա(մենայ)ն գործ. բայց ՛ի կերակուր՝ մի́ ուտիցի։
²⁵Եւ ա(մենայ)ն որ ուտիցէ ՛ի ճարպոյ անասնոց. զոր մատուցանիցէք պտուղ տ(եառ)ն, կորիցէ́ անձն այն ՛ի ժողովրդենէ իւրմէ։
²⁶Զա(մենայ)ն արիւն մի́ ուտիցէք յա(մենայ)ն բնակութի(ւն)ս ձեր, ՛ի թռչնոց եւ յա(մենայ)ն անասնոց։

²⁷ամենայն անձն որ կերիցէ արիւն՝ կորիցէ́ ՛ի ժողովրդենէ իւրմէ։
²⁸Խօսեցաւ տ(է)ր ընդ մովսիսի՝ եւ ասէ։
²⁹խօսեա́ց ընդ որդիսդ ի(սրաէ)լի՝ եւ ասասցես։ Որ մատուցանիցէ զոհ փրկութե(ան) տ(եառ)ն. ածցէ́ զպատարագացն իւր տ(եառ)ն ՛ի զոհէ փրկու(թ)ե(ան) իւրոյ։
³⁰ձե́ռք նորա մատուսցեն պտուղ տ(եառ)ն. զճա́րպ երբծոյն, եւ զլերդաբոյթն երիկամամբքն հանդերձ մատուսցէ դնել առաջի տ(եառ)ն.
³¹եւ հանցէ́ զայն քահանայն ՛ի սեղանն։ Եւ եղիցի երբուծն ահարոնի եւ որդւոց ն(ո)ր(ա).
³²եւ զերին զաջոյ՝ տացէք հա́ս քահանային ՛ի զոհից փրկութե(ան) ձերոյ։
³³Որ մատուցանիցէ զարիւնն փրկութե(ան) եւ զճարպն առ ՛ի յորդւոցն ահարոնի, նորա́ լիցի երին աջոյ ՛ի մասն։

³⁴Զի զերբուծն վերադրաց եւ զերին նուիրաց՝ առի́ ես յորդւոցն ի(սրաէ)լի ՛ի զոհիցն փրկութե(ան) ձերոյ. եւ ետու զայն ահարոնի քահանայի եւ որդւոց ն(ո)ր(ա). օրէն յաւիտենական յորդւոցն ի(սրաէ)լի։
³⁵Ա́յս օծումն է ահարոնի եւ որդւոց ն(ո)ր(ա) ՛ի պտղոցն տ(եառ)ն. յաւուր յորում մատուցանէր զնոսա տ(եառ)ն. ո(ր)պ(էս) պատուիրեաց տ(է)ր տա́լ ն(ո)ց(ա),
³⁶յաւուր յորում օծ զն(ո)ս(ա) յորդւոցն ի(սրաէ)լի. օրէ́ն յաւիտենական յազգս ն(ո)ց(ա)։
³⁷Ա́յս օրէն է ողջակիզացն, եւ զոհից, եւ վ(ա)ս(ն) մեղացն, եւ վ(ա)ս(ն) յանցանաց, եւ վ(ա)ս(ն) կատարմանն, եւ զոհին փրկութե(ան)։

³⁸Ո(ր)պ(էս) պատուիրեաց տ(է)ր մովսիսի ՛ի լերինն սինայ. յաւուր յորում պատուիրեաց տ(է)ր որդւոցն ի(սրաէ)լի, մատուցանել զպատարագս իւրեանց առաջի տ(եառ)ն յանապատին սինայ։

¹Խօսեցաւ տ(է)ր ընդ մովսիսի՝ եւ ասէ.
²Ա́ռ զահարոն եւ զորդիս ն(ո)ր(ա), եւ զպատմուճանս ն(ո)ց(ա), եւ զեւղն օծութե(ան). եւ զզուարակն զվ(ա)ս(ն) մեղաց, եւ զխոյսն զերկոսին, եւ զխանն բաղարջաց։
³եւ զա(մենայ)ն ժողովուրդն եկեղեցացուսցե́ս ՛ի դուռն խորանին վկայութե(ան)։
⁴Եւ արար մովսէս՝ ո(ր)պ(էս) հրամայեաց նմա տ(է)ր. եւ եկեղեցացո́յց զժողովուրդն ՛ի խորանն վկայութե(ան)։
⁵Եւ ասէ մովսէս ցժողովուրդն։ ա́յս բա́ն է զոր պատուիրեաց տ(է)ր առնել։
⁶Եւ մատո́յց մովսէս զահարոն եւ զորդիս ն(ո)ր(ա). եւ լուաց զն(ո)ս(ա) հրով.
⁷եւ զգեցոյց ահարոնի զպատմուճանն, եւ ած ընդ մէջ ն(ո)ր(ա) զկամարն, եւ արկ զնովաւ զվտաւակսն, եւ եդ ՛ի վերայ ն(ո)ր(ա) զվակասն։

⁸եւ խառնեաց ՛ի նմա ըստ գործուածոյ վակասին. եւ պնդեաց զնա ՛ի նմա. եւ եդ ՛ի վերայ ն(ո)ր(ա) զտախտակն, եւ ե́դ ՛ի վերայ տախտակին զյանդիմանութի(ւն)ն եւ զճշմարտութի(ւն)։
⁹Եւ եդ ՛ի վերայ գլխոյ ն(ո)ր(ա) զխոյրն. եւ եդ ՛ի վ(ե)ր(այ) խուրին յերեսաց կողմանէ զթիթեղնն ոսկի զնուիրեալն եւ զսուրբ. ո(ր)պ(էս) պատուիրեաց տ(է)ր մովսիսի։
¹⁰Եւ առեալ մովսիսի յիւղոյն օծու(թ)ե(ան) ցանեա́ց մատամբ ՛ի վ(ե)ր(այ) սեղանոյն եւթն անգամ.
¹¹եւ օծ զսեղանն, եւ սրբեաց զնա, եւ զա(մենայ)ն սպաս ն(ո)ր(ա)։ Եւ զաւազանն եւ զխարիսխս ն(ո)ր(ա). եւ սրբեաց զն(ո)ս(ա)։ եւ օծ զխորանն եւ զա(մենայ)ն ինչ որ ՛ի նմա, եւ սրբեաց զնա։

¹²Եւ ա́րկ մովսէս յիւղոյն օծութե(ան) ՛ի գլուխն ահարոնի եւ օծ զնա, եւ սրբեաց զնա։
¹³Եւ մատոյց մովսէս զորդիսն ահարոնի եւ զգեցոյց ն(ո)ց(ա) զպատմուճանսն. եւ ած ընդ մէջ ն(ո)ց(ա) զկամարսն, եւ ե́դ ն(ո)ց(ա) զխոյրսն. որպէս եւ հրամայեաց տ(է)ր մովսիսի։
¹⁴Եւ մատոյց մովսէս զզուարակն զվ(ա)ս(ն) մեղացն. եւ եդի́ն ահարոն եւ որդիք ն(ո)ր(ա) զձեռս իւրեանց ՛ի վ(ե)ր(այ) գլխոյ զուարակին մեղաց եւ սպան զնա.
¹⁵եւ ա́ռ մովսէս յարենէ անտի, եւ եդ ՛ի վ(ե)ր(այ) եղջերաց սեղանոյն շուրջանակի մատամբ իւրով. եւ սրբեաց զսեղանն. եւ զարիւնն եհեղ առ յատակաւ սեղանոյն։

¹⁶Եւ սրբեաց զնա առնել քաւու(թ)ի(ւն) ՛ի վ(ե)ր(այ) ն(ո)ր(ա)։ եւ ա́ռ զա(մենայ)ն զճարպ փորոտւոյն, եւ զլերդաբոյթն եւ զերկոսին զերիկամունսն, եւ զա(մենայ)ն ճարպն որ ՛ի վերայ ն(ո)ց(ա), եւ եհան մովսէս ՛ի սեղանն։
¹⁷Եւ զզուարակն՝ եւ զկաշի ն(ո)ր(ա), եւ զմիսն եւ զապաւառն այրեաց հրով արտաքոյ բանակին. ո(ր)պ(էս) հրամայեաց տ(է)ր մովսիսի։
¹⁸Եւ մատոյց մովսէս զխոյն որ յողջակէզ. եւ եդին ահարոն եւ որդիք ն(ո)ր(ա) զձեռս իւրեանց ՛ի վ(ե)ր(այ) գլխո́յ խոյին.
¹⁹եւ սպան մովսէս զխոյն. եւ եհեղ զարիւնն շուրջ զսեղանովն։
²⁰եւ զխոյն յօշեա́ց անդամ անդամ։ եւ ա́ռ մովսէս զգլուխն եւ զանդամութի(ւն)ւն, եւ զճարպն եւ զքաղիրթն եւ զոտսն,

²¹եւ լուաց ջրով։ Եւ եհան մովսէս զխոյն ողջոյն ՛ի սեղանն՝ ողջակէ́զ ՛ի հոտ անուշից տ(եառ)ն. քանզի պտուղ տ(եառ)ն է. ո(ր)պ(էս) հրամայեաց տ(է)ր մովսիսի։
²²Եւ մատոյց մովսէս զխոյն երկրորդ՝ զխոյն կատարման, եւ եդին ահարոն եւ որդիք ն(ո)ր(ա) զձեռս իւրեանց ՛ի վ(ե)ր(այ) գլխոյ խոյին.
²³եւ սպանին զնա։ Եւ ա́ռ մովսէս յարենէ ն(ո)ր(ա), եւ ե́դ ՛ի վ(ե)ր(այ) բըլթակի աջոյ ունկանն ահարոնի, եւ ՛ի վ(ե)ր(այ) ծայրի աջոյ ձեռին ն(ո)ր(ա), եւ ՛ի վ(ե)ր(այ) ծայրի աջոյ ոտին ն(ո)ր(ա)։

²⁴Եւ մատոյց մովսէս զորդիսն ահարոնի. եւ եդ մովսէս յարենէ անտի ՛ի վ(ե)ր(այ) բըլթակաց աջուց ականջաց ն(ո)ց(ա), եւ ՛ի վ(ե)ր(այ) ծայրից աջուց ձեռաց ն(ո)ց(ա), եւ ՛ի վ(ե)ր(այ) ծայրից աջուց ոտից ն(ո)ց(ա)։ եւ եհեղ մովսէս զարիւնն շուրջ զսեղանովն։
²⁵Եւ ա́ռ զճարպն եւ զմկանն. եւ զճարպն որ ՛ի վ(ե)ր(այ) քաղրթին, եւ զլերդաբոյթն, եւ զերիկամունսն զերկոսին. եւ զճարպն որ ՛ի վերայ ն(ո)ց(ա), եւ զերին աջոյ։
²⁶Եւ ՛ի խանէն կատարման որ կայր առաջի տ(եառ)ն, ա́ռ պան մի բաղարջ, եւ պան մի յիւղոյ անտի, եւ ե́դ ՛ի վ(ե)ր(այ) ճարպոյն եւ ՛ի վ(ե)ր(այ) երւոյն աջոյ.

²⁷եւ ե́դ զա(մենայ)ն ՛ի վ(ե)ր(այ) ձեռացն ահարոնի, եւ ՛ի վ(ե)ր(այ) ձեռաց որդւոց ն(ո)ր(ա). եւ մատոյց զայն նուէ́ր առաջի տ(եառ)ն։
²⁸Եւ ա́ռ զայն մովսէս ՛ի ձեռաց ն(ո)ց(ա), եւ եհան ՛ի սեղանն յողջակէզ կատարման, որ է ՛ի հո́տ անուշից պտուղ տ(եառ)ն. ո(ր)պ(էս) պատուիրեաց տ(է)ր։
²⁹Եւ առեալ մովսիսի զերբուծն՝ եհան նուէր առաջի տ(եառ)ն ՛ի խոյէ անտի կատարման. եւ եղեւ մովսիսի ՛ի մա́սն, ո(ր)պ(էս) եւ պատուիրեաց տ(է)ր մովսիսի։
³⁰Եւ առեալ մովսիսի յիւղոյն օծու(թ)ե(ան), եւ յարենէն որ ՛ի վ(ե)ր(այ) սեղանոյն՝ ցանեա́ց զահարոնիւ եւ զպատմուճանօք ն(ո)ր(ա), եւ զորդւովք ն(ո)ր(ա)՝ եւ զպատմուճանօք ն(ո)ց(ա).

³¹եւ սրբեաց զահարոն եւ զպատմուճանս ն(ո)ր(ա). եւ զորդիս ն(ո)ր(ա) եւ զպատմուճանս որդւոց ն(ո)ր(ա) ը(նդ) նմա։ Եւ ասէ մովսէս ցահարոն եւ ցորդիս նորա. եփեցէ́ք զմիսդ ՛ի սրահի խորանին վկայութե(ան) ՛ի ս(ուր)բ տեղւոջ, եւ ա́նդ ուտիցէք զայն. եւ զպա́նսն որ ՛ի խանի կատարմանն իցեն. զոր օրինակ հրամայեաց ինձ տ(է)ր՝ եւ ասէ. ահարոն եւ որդի́ք ն(ո)ր(ա) կերիցեն զայն։
³²եւ զնշխար հացի եւ մսոյ՝ հրո́վ այրեսջիք։
³³Եւ ՛ի դրանէ խորանին վկայութե(ան) մի́ ելանիցէք զեւթն օր. մինչեւ յօրն լրման աւուրց կատարմանն ձերոյ. զի զեւթն օր լցցէ զձեռս ձեր.
³⁴ո(ր)պ(էս) եւ արա́րն յաւուրն յայնմիկ. ո(ր)պ(էս) պատուիրեաց տ(է)ր առնել, առ ՛ի քաւելոյ վ(ա)ս(ն) ձեր։

³⁵Եւ առ դրան խորանին վկայութե(ան) նստիցի́ք զեւթն օր, զցա́յգ եւ զցերեկ. եւ պահեսջի́ք զպահպանութի(ւն)ս տ(եառ)ն զի մի́ մեռանիջիք. զի ա́յնպէս պատուիրեաց ինձ տ(է)ր։
³⁶Եւ արար ահարոն եւ որդիք ն(ո)ր(ա) զա(մենայ)ն զբանս՝ զոր պատուիրեաց տ(է)ր մովսիսի։

¹Եւ եղեւ յաւուրն ութերորդի. կոչեաց մովսէս զահարոն եւ զորդիս նորա եւ զծերակոյտն ի(սրաէ)լի. եւ ասէ մովսէս ցահարոն.
²Առ դու քեզ զուարակ մի յանդւոյ վ(ա)ս(ն) մեղաց. եւ խոյ յողջակէզ անարա́տ.եւ մատո́ զն(ո)ս(ա) առաջի տ(եառ)ն։
³Եւ ընդ ծերակոյտ որդւոցն ի(սրաէ)լի խօսեսցի́ս եւ ասասցես. առէ́ք դուք ձեզ նոխազ մի յայծեաց վ(ա)ս(ն) մեղաց. եւ խոյ, եւ զուարակ, եւ գառն տարեւոր, յողջակէզ անարատ։
⁴Եւ զուարակ եւ խոյ, յողջակէզ փրկութե(ան) առաջի տ(եառ)ն. եւ զո́հ նաշիհ զանգեալ իւղով. զի ա́յսօր երեւեսցի տ(է)ր ՛ի միջի ձերում։

⁵Եւ առի́ն ո(ր)պ(էս) եւ հրամայեաց մովսէս առաջի խորանին վկայութե(ան)։ եւ մատեան ա(մենայ)ն ժողովուրդքն, եւ կացին առաջի տ(եառ)ն։
⁶Եւ ասէ մովսէս. ա́յս բան է՝ զոր ասաց տ(է)ր առնել, եւ երեւեսցի́ն ՛ի ձեզ փառք տ(եառ)ն։
⁷Եւ ասէ մովսէս ցահարոն. մատի́ր առ սեղանն, եւ արա́ զվ(ա)ս(ն) մեղացն քո, եւ զողջակէզն քո. եւ քաւեա́ վ(ա)ս(ն) քո եւ տան քո։ Եւ արա́ զպատարագս ժողովրդեան քոյ, եւ քաւեա́ վասն ն(ո)ց(ա). ո(ր)պ(էս) պատուիրեաց տ(է)ր մովսիսի։
⁸Եւ մատեաւ ահարոն առ սեղանն, եւ սպան զզուարակն զվ(ա)ս(ն) մեղացն իւրոց։

⁹Եւ մատուցին որդիքն ահարոնի զարիւնն առ նա. եւ եթաց զմատն իւր յարեանն. եւ ե́դ ՛ի վ(ե)ր(այ) եղջերաց սեղանոյն. եւ զարիւնն եհեղ առ յատակաւ սեղանոյն։
¹⁰եւ զճարպն եւ զերիկամունսն, եւ զլերդաբոյթն, զվ(ա)ս(ն) մեղացայոյն եհան ՛ի սեղանն, որպէս պատուիրեաց տ(է)ր մովսիսի։
¹¹եւ զմիսն եւ զկաշին այրեցին հրով արտաքոյ բանակին։
¹²Եւ սպան զողջակէզն. եւ մատուցին որդիքն ահարոնի զարիւնն առ նա. եւ եհեղ շուրջ զսեղանովն։
¹³եւ զողջակէզն մատուցին առ նա անդամ անդամ, եւ զգլուխն. եւ եդ ՛ի վ(ե)ր(այ) սեղանոյն։
¹⁴եւ լուաց զքաղիրթն եւ զոտսն ջրով, եւ եդ ՛ի վ(ե)ր(այ) ողջակիզին ՛ի սեղանն։

¹⁵Եւ մատուցին զպատարագ ժողովրդեանն. եւ ա́ռ զնոխազն զվ(ա)ս(ն) մեղաց ժողովրդեանն. եւ սպա́ն զնա իբրեւ զառաջինն։
¹⁶Եւ մատո́յց զողջակէզն,
¹⁷եւ արար զնա որպէս եւ օրէ́ն էր. եւ մատոյց զզոհն, եւ ելից զձեռս ՛ի նմանէն, եւ ե́դ ՛ի վերայ սեղանոյն՝ ուրոյն յառաւօտին ողջակիզէն։
¹⁸Եւ սպան զզուարակն եւ զխոյն զոհին փրկութե(ան) ժողովրդեանն. եւ մատուցին որդիքն ահարոնի զարիւնն առ նա. եւ եհե́ղ զայն շուրջ զսեղանովն։
¹⁹Եւ զճարպն որ ՛ի զուարակէն եւ ՛ի խոյէն, եւ զմկանն. եւ զճարպ թաղանթ քաղրթին. եւ զերբուծն։
²⁰Եւ եդին զճարպն ՛ի վ(ե)ր(այ) երբծոցն. եւ հանին զճարպն հանդերձ երբծովքն. եւ եդին զճարպն ՛ի վերայ սեղանոյն։

²¹եւ զերբուծսն եւ զերին աջոյ նուիրեաց նուէ́ր առաջի տ(եառ)ն, ո(ր)պ(էս) պատուիրեաց տ(է)ր մովսիսի։
²²Եւ ամբարձեալ ահարոնի զձեռս իւր ՛ի վ(ե)ր(այ) ժողովրդեանն՝ եւ օրհնեաց զն(ո)ս(ա)։ եւ էջ արար զվ(ա)ս(ն) մեղացն, եւ զողջակէզսն եւ զփրկութե(ա)ն։
²³եւ մտին մովսէս եւ ահարոն ՛ի խորանն վկայութե(ան), եւ ելեալ անտի օրհնեցին զա(մենայ)ն ժողովուրդն։ Եւ երեւեցաւ փառք տ(եառ)ն ա(մենայ)ն ժողովրդեանն։
²⁴Եւ ել հուր ՛ի տ(թեն)է, եւ եկեր զա(մենայ)ն որ ինչ կայր ՛ի վ(ե)ր(այ) սեղանոյն. զողջակէզն, եւ զճարպն։ եւ ետես ա(մենայ)ն ժողովուրդն, եւ զարհուրեցա́ն անկա́ն ՛ի վերայ երեսաց իւրեանց։

¹Եւ առեալ երկուց որդւոցն ահարոնի, նաբադայ եւ աբիուդայ զիւրաքանչիւր բուրուառ՝ եդին ՛ի ն(ո)ս(ա) հուր, եւ արկին խո́ւնկս, եւ մատուցին առաջի տ(եառ)ն հուր օտար. զոր ո́չ հրամայեաց ն(ո)ց(ա) տ(է)ր։
²Եւ ե́լ հուր ՛ի տ(թեն)է եւ եկեր զնոսա. եւ մեռա́ն առաջի տ(եառ)ն։
³Եւ ասէ մովսէս ցահարոն. ա́յս է զոր ասաց տ(է)ր. Ասէ. ՛ի մերձաւո́րս իմ սրբեցայց, եւ առաջի ա(մենայ)ն ժողովրդեան իմոյ փառաւորեցայց։ եւ ստրջացաւ ահարոն։
⁴Եւ կոչեաց մովսէս զմիսադայի եւ զեղիսափան զորդիս եզիէլի, զորդիս հօրեղբօր ահարոնի, եւ ասէ ցնոսա. մատի́ք եւ բարձէ́ք զեղբարս ձեր, հանդերձ պատմուճանօքն իւրեանց յերեսաց սրբութե(ան)ցդ՝ արտաքոյ քան զբանակն։

⁵Մատեան եւ բարձին զնոսա՝ հանդերձ պատմուճանօքն իւրեանց արտաքոյ բանակին. զորօրինակ ասա́ց մովսէս։
⁶Եւ ասէ մովսէս ցահարոն, եւ ցեղիազար, եւ ցիթամար որդիսն ն(ո)ր(ա) մնացեալս։ Զգլուխս ձեր մի́ ապախուրէք, եւ զհանդերձս ձեր մի́ պատառէք, զի մի́ մեռանիցիք. եւ ՛ի վ(ե)ր(այ) ժողովրդեանդ լինիցի բարկութի(ւն)։ Բայց եղբարք ձեր եւ ա(մենայ)ն տունդ ի(սրաէ)լի՝ լացցեն զհրայրեացսն որ այրեցան ՛ի տ(թեն)է։
⁷եւ ՛ի դրանէ խորանիդ վկայութե(ան) մի́ ելանիցէք, զի մի́ մեռանիցիք. զի եւղն օծութե(ան) որ ՛ի տ(թեն)է՝ ՛ի վ(ե)ր(այ) ձեր է։ եւ արարին ըստ բանին մովսիսի։
⁸Խօսեցաւ տ(է)ր ընդ ահարոնի՝ եւ ասէ։

⁹Գինի՝ եւ ցքի՝ մի́ ըմպիցէք դու եւ որդիք քո ընդ քեզ՝ յորժամ մտանիցէք ՛ի խորանն վկայութե(ան), կամ յորժամ մերձենայցէք ՛ի սեղանն. զի մի́ մեռանիցիք։ օրէն յաւիտենական յազգս ձեր.
¹⁰զատե́լ ՛ի մէջ սրբոց եւ պղծոց, եւ ՛ի մէջ պարկեշտի́ց եւ անպարկեշտից։
¹¹եւ իմացուցանել ի(սրաէ)լի զա(մենայ)ն զօրէնս՝ զոր խօսեցաւ տ(է)ր ը(ստ) ն(ո)ս(ա) ՛ի ձեռն մովսիսի։
¹²Եւ ասէ մովսէս ցահարոն, եւ ցեղիազար եւ ցիթամար ցորդիս ն(ո)ր(ա) ցմնացեալս. Առէ́ք զզոհն մնացեալ ՛ի պտղոց անտի տ(եառ)ն, եւ կերա́յք բաղարջ առաջի սեղանոյն. զի սրբութի(ւն) սրբութե(ան)ց է։

¹³եւ կերիջիք զայն ՛ի սո́ւրբ տեղւոջ. զի օրէ́ն քեզ լինիցի այն, եւ օրէ́ն որդւոց քոց ՛ի պտղոցն տ(եառ)ն. զի այնպէս հրամայեալ է ինձ տ(եառ)ն։
¹⁴Եւ զերբուծ նուիրին, եւ զերի հասին կերիջի́ք ՛ի ս(ուր)բ տեղւոջ դու՝ եւ որդի́ք քո եւ տուն քո ը(ստ) քեզ. զի օրէն քեզ է այն, եւ օրէն որդւոց քոց տուաւ՝ ՛ի զոհից փրկութե(ան) որդւոցն ի(սրաէ)լի։
¹⁵Զերի́ն հասի՝ եւ զերբուծ նուիրի ՛ի վ(ե)ր(այ) ընծայից ճարպոյն, մատուսցեն նուէր նուիրել առաջի տ(եառ)ն։ եւ եղիցի քե́զ եւ որդւոց քոց եւ դստերաց քոց ընդ քեզ՝ օրէ́ն յաւիտենական. զորօրինակ հրամայեաց տ(է)ր մովսիսի։
¹⁶Եւ զնոխազն զվ(ա)ս(ն) մեղաց խնդրելով խնդրեաց մովսէս. եւ այն՝ էր այրեցեալ։ Եւ բարկացաւ մովսէս եղիազարու եւ իթամարայ որդւոցն ահարոնի մնացելոց՝

¹⁷եւ ասէ. ընդէ՞ր ոչ կերայք զայն ՛ի սուրբ տեղւոջ. զի սրբութի(ւն) սրբութե(ան)ց է. եւ զայն ետ ձեզ ուտել. զի բառնայցէք զմեղս ժողովրդեանն. եւ առնիցէք քաւութի(ւն) վ(ա)ս(ն) ն(ո)ց(ա) առաջի տ(եառ)ն.
¹⁸քանզի ո́չ եմուտ յարենէ ն(ո)ր(ա) ՛ի սրբութի(ւն)ն յանդիման երեսացն ՛ի ներքս։ Արդ՝ կերա́յք զնա ՛ի ս(ուր)բ տեղւոջ՝ զորօրինակ հրամայեցաւ ինձ։
¹⁹Խօսեցաւ ահարոն ընդ մովսիսի՝ եւ ասէ. զի թէ այսօր մատուցին զվ(ա)ս(ն) մեղացն իւրեանց պատարագ, եւ զողջակէզս իւրեանց առաջի տ(եառ)ն. եւ այսպիսի անցք անցին ընդիս, եւ ուտիցե՞մ այսօր զվ(ա)ս(ն) մեղացն, գուցէ չլինիցի́ հաճոյ առաջի տ(եառ)ն։
²⁰Եւ լուաւ մովսէս՝ եւ հաճոյ թուեցաւ նմա։

¹Խօսեցաւ տ(է)ր ընդ մովսիսի եւ ընդ ահարոնի՝ եւ ասէ։
²խօսեցարո́ւք ը(ստ) որդիսդ ի(սրաէ)լի՝ եւ ասացէ́ք. Ա́յս անասունք են զոր ուտիցէք յա(մենայ)ն անասնոց որ են ՛ի վ(ե)ր(այ) երկրի։
³Զա(մենայ)ն անասուն թաթահերձ եւ կճղակաւոր, որոյ յերկուս բաժանեալ իցեն թաթքն՝ եւ որոճիցէ, յանասնոց՝ զայն կերիջիք։
⁴Բայց յայնցանէ մի́ ուտիցէք, որք որոճիցեն եւ կճղակահերձ ո́չ իցեն։ Ո́ւղտ զի որոճայ՝ եւ թաթն ո́չ բաժանի, պի́ղծ իցէ նա ձեզ։
⁵Եւ նապաստակ զի որոճայ՝ եւ թաթն ո́չ բաժանի՝ պի́ղծ իցէ նա ձեզ։
⁶Եւ Ճագար զի որոճայ՝ եւ թաթն ո́չ բաժանի՝ պի́ղծ իցէ նա ձեզ։
⁷Եւ խոզ՝ զի թաթահերձ է՝ եւ կճղակս ունի՝ եւ որոճայ ո́չ, պի́ղծ իցէ նա ձեզ։

⁸՛ի մսոյ ն(ո)ց(ա) մի́ ուտիցէք, եւ ՛ի գէշ նոցա մի́ մերձենայցէք. քանզի պի́ղծ իցէ ձեզ այն։
⁹Եւ այս է զոր ուտիցէք՝ յա(մենայ)նէ որ ՛ի ջուրս իցեն. Ամենայնի որոյ իցեն թեւք եւ թեփ՝ ՛ի ջուրս եւ ՛ի ծովս եւ ՛ի վտակս, զա́յնս ուտիցէք։
¹⁰Եւ ա(մենայ)նի որոյ ո́չ իցեն թեւք եւ թեփ՝ ՛ի ջուրս եւ ՛ի ծովս եւ ՛ի վտակս, մի́ ուտիցէք, յա(մենայ)նէ զոր ջուրքն բղխիցեն, եւ յա(մենայ)ն շնչոյ կենդանւոյ որ ՛ի ջուրս։ քանզի պի́ղծ է այն, պի́ղծ լինիցի ձեզ.
¹¹՛ի մսոց նոցա մի́ ուտիցէք, եւ ՛ի մեռելոց ն(ո)ց(ա) գարշեսջի́ք։
¹²Զի ա(մենայ)նի որոց ո́չ իցեն թեւք եւ թեփ՝ որ ՛ի ջուրս իցեն, պի́ղծ իցէ ձեզ այն։

¹³Եւ ա́յս իցեն ՛ի թռչնոց՝ յորոց գարշիջիք, եւ ո́չ ուտիցի՝ այլ պի́ղծ իցէ ձեզ. Արծուի, եւ պասկուճ, եւ գետարծուի,
¹⁴եւ անգղ, եւ ցին, եւ որինչ նմա́ն իցէ ն(ո)ց(ա).
¹⁵եւ ագռաւ, եւ որինչ նմա́ն իցէ նմա։
¹⁶եւ ջայլեամն, եւ բու, եւ որոր, եւ որինչ նմա́ն իցէ նոցա։
¹⁷եւ բազէ, եւ որինչ նման իցէ նմա. եւ հաւապատիր, եւ հողամաղ։
¹⁸եւ քաջահաւ, եւ սոխակ, եւ հաւալուսն, եւ կարափ,
¹⁹եւ արագիլ, եւ քարարդ, եւ որինչ նմա́ն իցէ նոցա. եւ յոպոպ, եւ չիղջ։
²⁰Եւ ա(մենայ)ն զեռուն թռչուն՝ որ գնայցէ ՛ի չորս, պի́ղծ լիցի ձեզ։

²¹Այլ զա́յն ուտիցէք ՛ի զերնոց թռչնոց որ գնայցեն ՛ի չորս. որոյ իցեն կարթք ՛ի վերոյ քան զոտսն. ոստոստել նոքօք յերկրէ։
²²Եւ ա́յս իցեն զոր ուտիցէք ՛ի նոցանէ. զջորեակդ, եւ որ ինչ նմա́ն է նմա. եւ զխարագուլ, եւ որ ինչ նմա́ն է նմա. եւ զմարախ, եւ որ ինչ նմա́ն է նմա. եւ զօձամարտ, եւ որ ինչ նմա́ն իցէ նմա։
²³Ամենայն զեռուն թռչնոց, որ իցեն չո́րք ոտք, պի́ղծ իցէ ձեզ, մի́ նոքօք պղծիջիք։
²⁴ա(մենայ)ն որ մերձենայցէ ՛ի մեռեալ ն(ո)ց(ա)՝ պի́ղծ լինիցի մինչեւ ցերեկոյ։
²⁵եւ ա(մենայ)ն որ բառնայցէ զմեռեալ ն(ո)ց(ա)՝ լուասցէ́ զձորձս իւր, եւ պի́ղծ լիցի մինչեւ ցերեկոյ։

²⁶Յա(մենայ)ն անասնոց որ կճղակահե́րձ իցէ եւ մագի́լս սփռիցէ, եւ որոճիցէ ոչ՝ պի́ղծ լիցի ձեզ այն ա(մենայ)ն. եւ որ մերձեսցի ՛ի մեռեալ ն(ո)ց(ա)՝ պի́ղծ լիցի մինչեւ ցերեկոյ։
²⁷Եւ ա(մենայ)ն որ գնայցէ ՛ի ձեռս իւր, յա(մենայ)ն գազանաց որ գնայցէ ՛ի չորս, պի́ղծ լիցի ձեզ այն. ա(մենայ)ն որ մերձեսցի ՛ի մեռեալ ն(ո)ց(ա)՝ պիղծ լիցի մինչեւ ցերեկոյ։
²⁸եւ որ բառնայցէ ՛ի մեռելոյ ն(ո)ց(ա), լուասցէ́ զձորձս իւր, եւ պի́ղծ լիցի մինչեւ ցերեկոյ. զի այն ա(մենայ)ն պի́ղծ իցէ ձեզ։
²⁹Եւ ա́յս իցէ ձեզ պիղծ յա(մենայ)ն սողնոց՝ որ սողին ՛ի վ(ե)ր(այ) երկրի. աքիս, եւ մուկն, եւ տիտեռն, յոստին,
³⁰եւ մկնաքիս, եւ գետնառեւծ, եւ կովադիաց, եւ մուղէղ, եւ խլուրդ։

³¹ա́յս ա(մենայ)ն պի́ղծ իցէ ձեզ յա(մենայ)ն սողնոց որ սողին ՛ի վերայ երկրի. ա(մենայ)ն որ մերձեսցի ՛ի մեռեալ ն(ո)ց(ա)՝ պի́ղծ լիցի ձեզ մինչեւ ցերեկոյ։
³²եւ յա(մենայ)նի յորոյ վերայ անկանիցի ՛ի մեռելոյ ն(ո)ց(ա)՝ պի́ղծ լիցի։
³³Եւ ա(մենայ)ն անօթ խեցեղէն, յոր անկանիցի ինչ ՛ի նոցանէն. եւ որինչ ՛ի ներքս կայցէ, պի́ղծ լիցի, եւ զայն բեկանիջի́ք։
³⁴Եւ ա(մենայ)ն կերակուր որ ուտիցի, եւ անկանի ՛ի վ(ե)ր(այ) նորա ՛ի ջրոյ անտի՝ պի́ղծ լիցի. եւ ա(մենայ)ն ըմպելի որ ըմպիցի յա(մենայ)ն ամանի՝ պի́ղծ լիցի։
³⁵եւ յա(մենայ)ն յոր ինչ անկանիցի ՛ի մեռելոյ ն(ո)ց(ա)՝ պի́ղծ լիցի։ Եւ թոնիրք եւ կասկարայք՝ քակեսցին. քանզի պղծեալ են, եւ պի́ղծք իցեն ձեզ։

³⁶Բա́յց յաղբերաց ջրոց, եւ ՛ի ջրհորոց, եւ ՛ի ջրակուտաց. որ սո́ւրբ լինիցին ձեզ։ Եւ ա(մենայ)ն որ մերձենայցէ ՛ի պղծութի(ւն)ս շնչոյ մեռելոյ ն(ո)ց(ա), պի́ղծ լիցի։
³⁷Իսկ եթէ անկանիցի ինչ ՛ի մեռելոյ ն(ո)ց(ա) ՛ի վերայ ա(մենայ)ն սերման սերմանելոյ, որ սերմանիցի. սո́ւրբ լիցի։
³⁸ապա թէ հեղուցու ջուր ՛ի վերայ ա(մենայ)ն սերման, եւ անկանիցի ինչ անդր ՛ի մեռելոց ն(ո)ց(ա), անսո́ւրբ լիցի ձեզ։
³⁹Եւ եթէ մեռանիցի ի́նչ յանասնոց որ ձեզ ուտելի են, որ մերձենայցէ ՛ի մեռեալ ն(ո)ց(ա)՝ պի́ղծ լիցի մինչեւ ցերեկոյ։
⁴⁰եւ որ բառնայցէ ՛ի մեռելոյ նոցա՝ լուասցէ́ զձորձս իւր, եւ պի́ղծ լիցի մինչեւ ցերեկոյ։

⁴¹Եւ ա(մենայ)ն սողուն որ սողի ՛ի վերայ երկրի, պի́ղծ լիցի ձեզ, եւ մի́ կերիցի։ Ամենայն որ սողի ՛ի վ(ե)ր(այ) որովայնի իւրոյ։
⁴²եւ ա(մենայ)ն որ գնայցէ ՛ի չորս, մինչեւ ցա(մենայ)ն բազմոտանիս, յա(մենայ)ն զեռնոց՝ որ զեռայցեն ՛ի վերայ երկրի, մի́ ուտիցէք. զի պի́ղծ է այն ձեզ։
⁴³Եւ մի́ գարշեցուցանիցէք զանձինս ձեր ա(մենայ)ն սողնովք, որ սողոցին ՛ի վ(ե)ր(այ) երկրի. եւ մի́ պղծիցիք նոքօք, եւ մի́ լինիցիք անսուրբք նոքօք։
⁴⁴Ե́ս եմ տ(է)ր ա(ստուա)ծ ձեր. եւ սրբիջի́ք՝ եւ սո́ւրբք լինիջիք. զի Ս(թեամ)բ եմ ես տ(է)ր ա(ստուա)ծ ձեր. եւ մի́ պղծիցէք զանձինս ձեր ա(մենայ)ն զեռնովք՝ որ շարժիցին ՛ի վ(ե)ր(այ) երկրի։

⁴⁵Զի ե́ս եմ տ(է)ր ա(ստուա)ծ, որ հանի զձեզ յերկրէն եգիպտացւոց լինել ձեզ ա(ստուա)ծ, եւ եղիջիք սո́ւրբք՝ զի ես ս(ուր)բ եմ։
⁴⁶Ա́յս օրէն լինիցի վ(ա)ս(ն) անասնոց՝ եւ թռչնոց եւ ա(մենայ)ն շնչոյ որ շրջիցի ՛ի ջուրս, եւ ա(մենայ)ն շնչոյ որ շրջիցի ՛ի վերայ երկրի։
⁴⁷Որոշել ՛ի մէջ սրբոյն եւ ՛ի մէջ անսրբոյն. եւ խելամուտ առնել զորդիսդ ի(սրաէ)լի ՛ի մէջ ուտելեացն կենդանածնաց. եւ ՛ի մէջ չուտելեացն անասնոց։

¹Խօսեցաւ տ(է)ր ընդ մովսիսի՝ եւ ասէ։
²խօսեա́ց ընդ որդիսն ի(սրաէ)լի՝ եւ ասասցես ցն(ո)ս(ա). Կի́ն ոք՝ եթէ սերմ առցէ եւ ծնանիցի արո́ւ. պի́ղծ լիցի զեւթն օր, ըստ աւուրց զատանելոյ դաշտանին իւրոյ պի́ղծ լիցի։
³Եւ յաւուրն ութերորդի թլփատեսցէ́ զմարմին անթլփատութե(ան) ն(ո)ր(ա)։
⁴եւ զերեսուն եւ զերիս աւուրս նստցի́ ՛ի սրբութե(ան) արեան իւրոյ։ Յա(մենայ)ն ինչ սուրբ՝ նա մի́ մերձենայցէ. եւ ՛ի սրբութի(ւն)ն մի́ մտցէ. մինչեւ լցցին աւուրք սրբութե(ան) նորա։
⁵Ապա թէ է́գ ծնանիցի՝ պիղծ լիցի զեւթն օր ըստ դաշտանին. եւ զվաթսուն եւ զվեց օր նստցի́ ՛ի սուրբ արեանն իւրում։

⁶Եւ յորժամ լնուցուն աւուրք սրբու(թ)ե(ան) ն(ո)ր(ա) ՛ի վ(ե)ր(այ) ուստերն՝ կամ դստերն, ածցէ́ գառն տարեւոր յողջակէզս. եւ զոյդս աղաւնւոյ կամ տատրակի վ(ա)ս(ն) մեղաց ՛ի դուռն խորանին վկայութե(ան) առ քահանայն։
⁷եւ մատուսցէ́ առաջի տ(եառ)ն. եւ քաւեսցէ́ վ(ա)ս(ն) ն(ո)ր(ա) քահանայն, եւ սրբեսցէ́ զնա յաղբերէ արեան նորա։ Ա́յս օրէն իցէ այնորիկ՝ որ ծնանիցին արու կամ էգ։
⁸Ապա թէ ո́չ գտանիցէ ձեռն ն(ո)ր(ա) բաւական լինել գառամբ՝ առցէ́ երկուս տատրակս կամ երկուս ծագս աղաւնեաց, զմին յողջակէզ՝ եւ զմեւսն վ(ա)ս(ն) մեղաց. եւ քաւեսցէ́ վ(ա)ս(ն) ն(ո)ր(ա) քահանայն, եւ սրբեսցի́։

¹Խօսեցաւ տ(է)ր ընդ մովսիսի եւ ընդ ահարոնի՝ եւ ասէ։
²Մարդոյ ուրուք եթէ լինիցի ՛ի մորթ մարմնոյ իւրոյ նշա́ն սպւոյ, կամ պալար, կամ պաղպաջ, եւ լինիցի ՛ի մորթ մարմնոյ ն(ո)ր(ա) արա́ծ բորոտութե(ան), եկեսցէ́ առ ահարոն քահանայ. կամ առ մի յորդւոց ն(ո)ր(ա) քահանայից։
³Եւ տեսցէ́ քահանայն զարածն, ՛ի մորտ մարմնոյ ն(ո)ր(ա), եւ կամ թէ մազ արածին ՛ի սպիտակ դարձեալ իցէ, եւ տեսիլ արածին զնստագոյն իցէ բան զմորթ մարմնոյն, արած բորոտութե(ան) է. եւ տեսցէ քահանայն եւ պղծեսցէ́ զնա։
⁴Ապա թէ պաղպաջն սպիտա́կ իցէ ՛ի մորթ մարմնոյ նորա, եւ զնստագոյն չիցէ́ տեսիլ ն(ո)ր(ա) քան զմորթն, եւ մազն ՛ի սպիտակ չիցէ́ դարձեալ, եւ ինքն շլագոյն իցէ, զատուսցէ́ քահանայն զարածն զեւթն օր։

⁵Եւ տեսցէ́ քահանայն յաւուրն եւթներորդի, եթէ կայցէ նոյնպէս արածն առաջի ն(ո)ր(ա), եւ չիցէ́ փոխեալ արածն ՛ի մորթն, զատուսցէ́ զնա քահանայն ա́յլեւս աւուրս եւթն։
⁶եւ տեսցէ քահանայն յաւուրն եւթներորդի մե́ւս անգամ. եւ ահա շլագոյն իցէ արածն, եւ յա́յլ գոյն չիցէ́ փոխեալ մորթն, սրբեսցէ́ զնա քահանայն. զի նշա́ն ինչ է այն. եւ լուասցէ զձորձս իւր եւ եղիցի սո́ւրբ։
⁷Ապա թէ շրջելով շրջեսցի նշանն ՛ի մորթն, յե́տ տեսանելոյ զնա քահանային եւ սրբելոյ. եւ երեւեսցի մե́ւս անգամ քահանային, եւ տեսցէ քահանայն, եւ ահա այլագունեալ իցէ նշանն ՛ի մորթն
⁸պղծեսցէ́ զնա քահանայն՝ զի բորոտութի(ւն) է։
⁹Եւ արած բորոտութե(ան) եթէ լինիցի մարդոյ, եկեսցէ́ առ ահարոն քահանայ,

¹⁰եւ տեսցէ́ քահանայն, եւ ահա պալար սպիտակ իցէ ՛ի մորթն. եւ մազն ն(ո)ր(ա) ՛ի սպիտակ դարձեալ իցէ, եւ յառողջ եւ ՛ի կենդանի մարմնոյն ՛ի պալար՝
¹¹բորոտութի(ւն) հնացեալ իցէ ՛ի մորթ մարմնոյ ն(ո)ր(ա). պղծեսցէ́ զնա քահանայն, եւ զատուսցէ́ զնա՝ զի պիղծ է։
¹²Ապա թէ սփռելով սփռեսցի բորոտութի(ւն)ն ը(ստ) մորթն. եւ ծածկեսցէ բորոտութի(ւն)ն զա(մենայ)ն մորթ իրանացն, ՛ի գլխոյ մինչեւ ցոտս, ըստ ա(մենայ)ն տեսոյ քահանային։
¹³Եւ տեսանիցէ քահանայն, եւ ահա ծածկեաց բորոտութի(ւն)ն զա(մենայ)ն մորթ մարմնոյն, սրբեսցէ́ քահանայն զարծաթն. քանզի ա(մենայ)ն ՛ի սպիտակ դարձաւ, սուրբ է։
¹⁴Եւ յորում աւուր երեւեսցի ՛ի նմա մարմին կենդանի, պղծեսցի։

¹⁵եւ տեսցէ քահանայն զմարմին կենդանի. եւ պղծեսցէ́ զողջ մարմինն. եւ պի́ղծ լիցի՝ ք(ան)զի բորոտութի(ւն) է։
¹⁶Ապա թէ անդրէն հաստատեսցի մարմինն ո́ղջ, եւ դարձցի ՛ի սպիտակ.
¹⁷եկեսցէ́ առ քահանայն. եւ տեսցէ զնա քահանայն. եւ ահա դարձեալ իցէ արածն ն(ո)ր(ա) ՛ի սպիտակ, սրբեսցէ́ քահանայն զարածն՝ ք(ան)զի սո́ւրբ է։
¹⁸Եւ մարդոյ եթէ լինիցի ՛ի մորթ մարմնոյ ն(ո)ր(ա) կե́ղ, եւ ողջասցի.
¹⁹եւ եղիցի ՛ի տեղի կեղոյն սպիտակ փայլուն, լսնացեալ կամ կարմրացեալ. եւ երեւեսցի քահանային։
²⁰եւ տեսանիցէ քահանայն, եւ ահա խորագո́յն իցէ տեղին քան զմորթն, եւ մազն ՛ի սպիտակ դարձեալ իցէ, պղծեսցէ́ զնա քահանայն. զի բորոտութի(ւն) է ը(ստ) կեղոյն բորբոքեալ։

²¹Իսկ եթէ տեսանիցէ քահանայն՝ եւ չիցէ ՛ի նմա մազ սպիտակ. եւ ո́չ խորագոյն իցէ քան զմարմինն, եւ ինքն շլագո́յն իցէ. զատուսցէ́ զնա քահանայն զեւթն օր։
²²Եթէ սփռեսցի ընդ մորթն, պղծեսցէ́ զնա քահանայն. զի արա́ծ բորոտութե(ան) ընդ կեղոյն բորբոքեցաւ։
²³ապա թէ անդէն ՛ի տեղւոջն կացցէ փայլիւնն՝ եւ ո́չ տարածանիցի, սպի́ կեղոյն է. սրբեսցէ́ զնա քահանայն։
²⁴Եւ մարմնոյ եթէ լինիցի ՛ի մորթ ն(ո)ր(ա) այրեցած հրոյ, եւ լինիցի ողջացեալ մորթ ն(ո)ր(ա) յայրեցածէ անտի. եւ լինիցի տեղի այրեցածին փայլուն կամ պաղպաջ սպիտակ, կամ կարմրացեալ, կամ լսնացեալ։

²⁵եւ տեսանիցէ զնա քահանայն, եւ ահա փոխեալ իցէ մազն ՛ի սպիտակ ՛ի փայլուն. եւ տեսիլ ն(ո)ր(ա) զիջագո́յն իցէ քան զմորթն, բորոտութի(ւն) է ընդ այրեցածին բորբոքեալ. պղծեսցէ́ զնա քահանայն՝ զի արա́ծ բորոտութե(ան) է։
²⁶Եւ եթէ տեսանիցէ քահանայն, եւ ահա՝ չիցէ́ ՛ի նմա փայլիւն ինչ՝ կամ մա́զ սպիտակ, եւ ո́չ զնստագոյն քան զմորթն, բայց շլագոյն իցէ. զատուսցէ́ զնա քահանայն զեւթն օր։
²⁷եւ տեսցէ́ զնա քահանայն յաւուրն եւթներորդի, եթէ սփռելով սփռեալ իցէ արածն ընդ մորթն, պղծեսցէ́ զնա քահանայն. զի արած բորոտութե(ան) է ընդ այրեցածին բորբոքեալ։

²⁸Եւ եթէ ՛ի նմի́ն տեղւոջ կացցէ փայլիւնն, եւ ո́չ սփռեսցի ընդ մորթն. եւ ինքն շլագոյն իցէ, սպի́ այրեցածոյն է. սրբեսցէ́ զնա քահանայն՝ զի դրոշմն այրեցածոյն է։
²⁹Եւ առն կամ կնոջ, եթէ լինիցի արա́ծ բորոտութե(ան) ՛ի գլուխ՝ կամ ՛ի մօրուս, եւ տեսանիցէ քահանայն զարածն,
³⁰եւ ահա տեսիլ ն(ո)ր(ա) զնստագո́յն իցէ քան զմորթն. եւ ի նմա մա́զ աղուամազ խարտեշացեալ, պղծեսցէ́ զնա քահանայն. ք(ան)զի հարա́ծ է, բորոտութի(ւն) գլխո́յ է, կամ բորոտութի(ւն) մօրուաց։
³¹Եւ եթէ տեսանիցէ քահանայն զարած հարածոյն. եւ ահա չիցէ́ տեսիլն զնստագոյն քան զմորթն, եւ ո́չ մա́զ խարտեշացեալ ՛ի նմա. զատուսցէ́ քահանայն զարած հարածին զեւթն օր։

³²Եւ տեսանիցէ́ քահանայն զարածն յաւուրն եւթներորդի, եւ ահա չիցէ́ տարածեալ հարածն ը(ստ) մորթն. եւ մազ խարտեշացեալ չիցէ́ ՛ի նմա, եւ ո́չ տեսիլ հարածոյն զնըստագոյն իցէ քան զմորթն՝
³³գերծցէ́ զնա. բայց զհարածն մի́ գերծցէ. եւ զատուսցէ́ քահանայն զարածն զեւթն օր կրկին անգամ։
³⁴Եւ տեսանիցէ քահանայն զարածն յաւուրն եւթներորդի. եւ ահա չիցէ սփռեալ արածն ընդ մորթն յետ գերծանելոյն զնա. եւ տեսիլ հարածոյն չիցէ́ զնստագոյն քան զմորթն, սրբեսցէ́ զնա քահանայն. եւ լուացեալ զձորձս իւր՝ եղիցի սուրբ։
³⁵Ապա թէ սփռելով սփռեսցի հարածն ը(ստ) մորթն յետ գերծելոյն զնա եւ տեսանիցէ քահանայն, եւ ահա սփռեալ իցէ հարածն ընդ մորթն.

³⁶մի́ դարմանեսցէ զնա քահանայն վ(ա)ս(ն) խարտեաշ մազոյն զի պի́ղծ է։
³⁷Իսկ եթէ կացցէ ՛ի տեղւոջ հարածն ՛ի մորթն, եւ մազ թո́ւխ եկեսցէ ՛ի նմա, ողջացաւ հարածն սո́ւրբ է. եւ սրբեսցէ զնա քահանայն։
³⁸Եւ առն կամ կնոջ եթէ լինիցի ՛ի մորթ մարմնոյ իւրոյ փայլո́ւն ինչ՝ փայլածիւն լսնացեալ,
³⁹եւ տեսանիցէ քահանայն. եւ ահա ՛ի մորթ մարմնոյ ն(ո)ր(ա) փայլիւն փայլածուն՝ լսնացեալ. թեփո́ւկ է տարածեալ ՛ի մորթ մարմոյ ն(ո)ր(ա). սո́ւրբ է։
⁴⁰Եւ եթէ մաշտեսցի գլո́ւխ ուրուք՝ կո́ւնտ է, սո́ւրբ է։
⁴¹եւ եթէ յերեսաց կողմանէ մաշտիցի գլուխ ն(ո)ր(ա), ճե́ղ է՝ սո́ւրբ է։

⁴²Ապա թէ լինիցի ՛ի կնտու(թ)ե(ան) ն(ո)ր(ա) կամ ՛ի ճեղու(թ)ե(ան) արած սպիտակ կամ կարմրացեալ, բորոտու(թ)ի(ւն) թաքուցեալ է ՛ի կնտու(թ)ե(ան) ն(ո)ր(ա) կամ ՛ի ճեղու(թ)ե(ան)։
⁴³Եւ տեսանիցէ զայն քահանայն, եւ ահա տեսիլ արածին սպիտակ իցէ, կամ կարմրագոյն ՛ի կընդու(թ)ե(ան) ն(ո)ր(ա), կամ ՛ի ճեղու(թ)ե(ան), իբրեւ տեսիլ բորոտութե(ան) ՛ի մորթ մարմնոյ ն(ո)ր(ա). ա́յր բորոտեալ է՝ պի́ղծ է, պղծելով պղծեսցէ́ զնա քահանայն. զի ՛ի գլո́ւխ իւրում է արածն իւր։
⁴⁴Եւ բորոտ յորում իցէ արած,
⁴⁵հանդերձ նորա քակեա́լ լիցի, եւ գլուխ ն(ո)ր(ա) մե́րկ, եւ զբերան իւր պատեսցէ́. եւ պիղծ կոչեսցի

⁴⁶զա(մենայ)ն աւուրս որչափ իցէ ՛ի նմա արածն, պի́ղծ եղիցի. եւ պիղծ է, մեկնեալ նստցի, եւ արտաքոյ բանակի́ն եղիցի բնակութի(ւն) նորա։
⁴⁷Եւ ձորձ յորում լինիցի արած բորոտու(թ)ե(ան) եթէ ՛ի ձորձ ասուի, եթէ ՛ի ձորձ կտաւի,
⁴⁸եթէ յառէջ, եթէ ՛ի թեզան, եթէ ՛ի կտաւիս, եւ եթէ յասուիս. եթէ՛ի մորթ, եւ եթէ յա(մենայ)ն մաշկ գործոյ։
⁴⁹եւ լինիցի արած կանաջացեալ կամ կարմրացեալ՝ ՛ի մորթ կամ ՛ի հանդերձ. կամ յառէջ կ(ա)մ ՛ի թեզան, կ(ա)մ յա(մենայ)ն մորթ գործոյ, կ(ա)մ յանօթ ինչ. արած բորոտու(թ)ե(ան) իցէ. եւ ցուցցէ́ քահանային։
⁵⁰Եւ տեսցէ քահանայն զարածն, եւ զատուսցէ́ քահանայն զարածն զեւթն օր։

⁵¹եւ տեսցէ́ քահանայն զարածն յաւուրն եւթներորդի. եթէ սփռեալ իցէ արածն ընդ ձորձն, կամ ը(ստ) առէջ, կամ ընդ թեզան, կամ ը(ստ) կտաւիս, կամ ընս ասուիս, կամ ընդ մորթ. ըստ ա(մենայ)նի որպէս եւ գործիցի մո́րթ ՛ի գործ, բնա́կ բորոտութե(ան) է արածն։ Պի́ղծ է.
⁵²եւ այրեսցէ́ զձորձն եթէ առէջ իցէ՝ եթէ թեզան, յասուեաց կամ ՛ի կտաւեաց, կամ յա(մենայ)ն մաշկեղէն նիւթոյ, յորում իցէ արածն. քանզի բնակ բորոտութե(ան) է՝ հրո́վ այրեսցի։
⁵³Ապա թէ տեսանիցէ քահանայն՝ եւ ահա չիցէ́ սփռեալ հարածն ը(ստ) հանդերձն, կամ ընդ առէջն, կամ ընդ թեզանն, կամ ընդ ասրն, կամ ընդ կտաւն, կամ ընդ ա(մենայ)ն անօթ մաշկեղէն։

⁵⁴հրամա́ն տացէ քահանայն, եւ լուասցեն յորում իցէ արածն. եւ զատուսցէ́ քահանայն զարածն զեւթն օր երկիցս անգամ։
⁵⁵Եւ տեսցէ քահանայն յետ լուանալոյ զարածն. եթէ չիցէ́ ինչ փոխեալ տեսիլ արածին. եւ ո́չ սփռեալ իցէ արածն, պի́ղծ է, հրո́վ այրեսցի. զի հաստատեալ է ՛ի հանդերձն, կամ յառէջն, կամ ՛ի թեզան։
⁵⁶Եւ եթէ տեսանիցէ քահանայն՝ եւ շլագոյն իցէ հարածն յետ լուանալոյն զնա, պատառեսցէ́ զայն ՛ի հանդերձէ անտի, կամ ՛ի մորթոյ, կամ յառիջէ, կամ ՛ի թեզանոյ։

⁵⁷Ապա թէ դարձեալ երեւեսցի ՛ի հանդերձին, կամ յառէջ, կամ ՛ի թեզան, կամ յա(մենայ)ն անօթ մեշկեղէն, բորոտութի(ւն) բորբոքեալ է. հրո́վ այրեսցի յորում իցէ արածն, եթէ հանդերձ իցէ, եւ եթէ առէջ, եթէ թեզան,
⁵⁸եւ եթէ ա(մենայ)ն անօթ մաշկեղէն։ որ լուանայցի՝ եւ ելանիցէ́ ՛ի նմանէ արածն, կրկի́ն լուասցի՝ եւ սո́ւրբ լիցի։
⁵⁹Ա́յս օրէն իցէ արածի բորոտութե(ան) ասուեա́յ հանդերձի, կամ կտաւոյ, կամ առիջոյ, կամ թեզանոյ, կամ ամենայն մաշկեղէն անօթոյ, ՛ի սրբել կամ ՛ի պղծել զնա։

¹Խօսեցաւ տ(է)ր ընդ մովսիսի՝ եւ ասէ.
²Ա́յս օրէն լիցի բորոտի՝ յաւուր յորում սրբեսցի. ածցի́ առ քահանայն։
³եւ ելցէ քահանայն արտաքոյ բանակին. եւ տեսցէ́ քահանայն, եւ ահա բժշկեալ իցէ արած բորոտութե(ա)ն ՛ի բորոտէ անտի։
⁴Հրաման տացէ քահանայն, եւ առցեն ՛ի սրբելոյն երկուս հաւս կենդանիս սո́ւրբս, եւ փայտ եղեւնեայ, եւ կարմիր մանեալ, եւ զոպա։
⁵եւ հրաման տացէ քահանայն, եւ սպանցեն զմի հաւն յանօթ խեցեղէն ՛ի վերայ ջրոյ կենդանւոյ։
⁶Եւ զհաւն կենդանի առցէ, եւ զփայտն եղեւնեայ, եւ զկարմիրն մանեալ, եւ զզոպայն, եւ թացցէ զնոսա եւ զհաւն կենդանի՝ յարիւն հաւուն սպանելոյ ՛ի վ(ե)ր(այ) ջրոյն կենդանւոյ։

⁷եւ ցանեսցէ́ ՛ի վերայ սրբելոյն ՛ի բորոտութ(են)է եւթն անգամ, եւ սրբեսցէ զնա։ եւ արձակեսցէ́ զհաւն կենդանի ՛ի դաշտ։
⁸Եւ լուասցէ́ սրբեալն զձորձս իւր, եւ գերծեսցէ́ զա(մենայ)ն զմազ իւր. եւ լուասցի ջրով, եւ սուրբ լիցի. եւ ապա́ մտցէ ՛ի բանակն, եւ լիցի արտաքո́յ տան իւրոյ զեւթն օր։
⁹եւ յաւուրն եւթներորդի գերծցէ́ զա(մենայ)ն զմա́զ իւր, եւ զգլո́ւխ, եւ զմօրուս եւ զյօնս. եւ զա(մենայ)ն զմա́զ իւր գերծցէ́. եւ ողողեսցէ́ զհանդերձս իւր, եւ լուասցէ́ զմարմին իւր ջրով, եւ սո́ւրբ լիցի։
¹⁰Եւ յաւուրն ութերորդի առցէ́ երկուս գառինս անարատս տարեւորս, եւ որոջ մի անարատ տարեւոր, եւ երիս տասանորդս նաշհւոյ ՛ի զոհ իւղով զանգեալ, եւ ճաշակ մի իւղոյ։

¹¹եւ կացուսցէ քահանայն որ սրբիցէն, զայրն որ սրբիցին, եւ զայն՝ առաջի խորանին վկայու(թ)ե(ան)։
¹²եւ սպանցէ քահանայն զմի գառնն. եւ մատուսցէ́ զնա վ(ա)ս(ն) յանցանաց, եւ զճաշա́կն իւղոյ. եւ նուիրեսցէ զայն նուէ́ր առաջի տ(եառ)ն։
¹³Եւ սպանցէ զգառնն զմեւս ՛ի տեղւոջն ուր սպանանիցեն զողջակէզն եւ զվ(ա)ս(ն) մեղացն ՛ի ս(ուր)բ տեղւոջ. զի ո(ր)պ(էս) որ վ(ա)ս(ն) մեղացն իցէ, նո́յնպէս եւ որ վ(ա)ս(ն) յանցանացն իցէ. եւ եղիցի քահանայն. զի սրբու(թ)ի(ւն) սրբու(թ)ե(ան)ց է։

¹⁴Եւ առցէ քահանայն յարենէ այնր՝ որ վ(ա)ս(ն) յանցանացն իցէ. եւ դիցէ քահանայն յարենէ անտի ՛ի վ(ե)ր(այ) բլթակի աջոյ ունկան այնորիկ որ սրբիցին, եւ ՛ի վ(ե)ր(այ) ծայրի աջոյ ձեռին ն(ո)ր(ա), եւ ՛ի վ(ե)ր(այ) ծայրի աջոյ ոտին ն(ո)ր(ա)։
¹⁵Եւ առեալ քահանային ՛ի ճաշակէ անտի իւղոյն, արկցէ́ ՛ի ձախոյ ձեռին իւր քահանայն։
¹⁶եւ թացցէ́ քահանայն զմատն իւր աջոյ յիւղոյ անտի՝ որ իցէ ՛ի ձախոյ ձեռին իւրում. եւ ցանեսցէ́ մատամբ իւրով եւթն անգամ առաջի տ(եառ)ն։
¹⁷եւ զմնացեալ եւղն ՛ի ձեռին իւրում դիցէ քահանայն ՛ի վ(ե)ր(այ) բլթակի աջոյ ունկան՝ ա́յնորիկ որ սրբելոցն իցէ. եւ ՛ի վ(ե)ր(այ) ծայրի աջոյ ձեռին ն(ո)ր(ա). եւ ՛ի վ(ե)ր(այ) ծայրի աջոյ ոտին ն(ո)ր(ա), ՛ի տեղւոջ արեանն յանցանաց։

¹⁸եւ զմնացեալ իւղն ՛ի ձեռին քահանային, դիցէ́ քահանայն ՛ի վ(ե)ր(այ) գլխոյ սրբեցելոյն,
¹⁹եւ քաւեսցէ́ վ(ա)ս(ն) ն(ո)ր(ա) քահանայն առաջի տ(եառ)ն. Եւ արասցէ́ քահանայն զվասն մեղացն. եւ քաւեսցէ́ քահանայն վ(ա)ս(ն) այնորիկ՝ որ սրբելոցն իցէ ՛ի մեղաց իւրոց։ Եւ ապա սպանցէ քահանայն զողջակէզն,
²⁰եւ հանցէ́ քահանայն զողջակէզն եւ զզոհն առաջի տ(եառ)ն ՛ի սեղանն. եւ քաւեսցէ վ(ա)ս(ն) ն(ո)ր(ա) քահանայն, եւ սրբեսցի։
²¹Եւ եթէ աղքատ իցէ, եւ չգտանիցէ ձեռն իւր. առցէ գառն մի վ(ա)ս(ն) յանցանաց զոր յանցեաւն ՛ի նուէ́ր առ ՛ի քաւելոյ վ(ա)ս(ն) ն(ո)ր(ա). եւ զտասանորդ նաշհւոյ իւղով զանգեալ ՛ի զո́հ, եւ ճաշակ մի իւղոյ։

²²եւ երկուս տատրակս կամ երկուս ձագս աղաւնեաց. որչափ ինչ եգիտ ձեռն ն(ո)ր(ա). եւ եղիցի մին՝ վ(ա)ս(ն) մեղաց. եւ մին՝ յողջակէզ։
²³եւ տարցի զայն յաւուրն ութերորդի առ քահանայն, առ ՛ի սրբելոյ զնա առ դրան խորանին վկայութե(ան) առաջի տ(եառ)ն։
²⁴Եւ առեալ քահանայն զգառնն զվ(ա)ս(ն) յանցանացն, եւ զճաշակն իւղոյ. եւ դիցէ́ նուէ́ր առաջի տ(եառ)ն։
²⁵եւ սպանցէ զգառնն զվ(ա)ս(ն) յանցանացն. եւ առցէ քահանայն յարենէ անտի՝ որ վ(ա)ս(ն) յանցանացն իցէ, եւ դիցէ ՛ի վ(ե)ր(այ) բլթակի աջոյ ունկան սրբեցելոյն, եւ ՛ի ծայրի աջոյ ձեռին ն(ո)ր(ա), եւ ՛ի ծայրի աջոյ ոտին ն(ո)ր(ա)։
²⁶Եւ յիւղոյ անտի արկցէ քահանայն ՛ի ձախու ձեռին իւրում,

²⁷եւ ցանեսցէ́ քահանայն մատամբն աջոյ յիւղոյ անտի՝ որ իցէ ՛ի ձախու ձեռին իւրում եւթն անգամ առաջի տ(եառ)ն։
²⁸զի դիցէ́ քահանայն յիւղոյ անտի որ իցէ ՛ի ձեռին իւրում, ՛ի վ(ե)ր(այ) բլթակի աջոյ ունկան սրբեցելոյն, եւ ՛ի վ(ե)ր(այ) ծայրի աջոյ ձեռին ն(ո)ր(ա), եւ ՛ի վ(ե)ր(այ) ծայրի աջոյ ոտին ն(ո)ր(ա), ՛ի տեղւոջ արեանն որ վ(ա)ս(ն) յանցանացն իցէ։
²⁹Եւ զմնացեալ եւղն որ իցէ ՛ի ձեռին քահանային, արկցէ ՛ի գլուխ սրբեցելոյն. եւ քաւեսցէ́ վ(ա)ս(ն) ն(ո)ր(ա) քահանայն առաջի տ(եառ)ն։
³⁰Եւ արասցէ զմի ՛ի տատրակաց անտի կամ ՛ի ձագուցն աղաւնեաց՝ ըստ ընչին զոր եգիտ ձեռն իւր։

³¹զմին՝ վ(ա)ս(ն) մեղաց, եւ զմին ողջակէզ առաջի տ(եառ)ն հանդերձ զոհիւն. եւ քաւեսցէ́ քահանայն վ(ա)ս(ն) սրբեցելոյն առաջի տ(եառ)ն։
³²Ա́յս օրէն իցէ յորում իցէ արած բորոտութե(ան), եւ ոյր ո́չ գտանիցի ՛ի ձեռին բաւական լինելոյ ՛ի սրբութի(ւն) իւր։
³³Խօսեցաւ տ(է)ր ընդ մովսիսի եւ ընդ ահարոնի՝ եւ ասէ։
³⁴Յորժամ մտանիցէք յերկիրն քանանացւոց՝ զոր ե́ս տաց ձեզ ՛ի ստացուածս. եւ տայցեմ արա́ծ բորոտութե(ան) ՛ի տունս երկրին ստացուածոց ձերոց։
³⁵եւ գայցէ́ որոյ տունն իցէ, եւ պատմիցէ քահանային՝ եւ ասիցէ, թէ արա́ծ իմն երեւեցաւ ՛ի տան իմում։

³⁶Հրամա́ն տացէ քահանայն թափե́լ զտունն, մինչչե́ւ մտեալ իցէ քահանային տեսանել զտունն, եւ մի́ պղծեսցէ քահանայն զա(մենայ)ն ինչ որ ՛ի տանն կայցէ. եւ ապա մտցէ́ քահանայն որոնել զտունն։
³⁷Եւ տեսանիցէ քահանայն զարածն յորմս տանն, զնստագոյնս, կանաջս կամ կարմրացեալս. եւ տեսիլ ն(ո)ր(ա) զնստագոյն իցէ քան զորմոցն։
³⁸եւ ելեալ քահանայն ՛ի տանէ անտի ՛ի դուռն տանն, զատուսցէ́ քահանայն զտունն զեւթն օր։
³⁹Եւ եկեսցէ դարձեալ քահանայն յաւուրն եւթներորդի. եւ տեսանիցէ զտունն, եթէ սփռեալ իցէ արած տանն ընդ որմս տանն։

⁴⁰հրամա́ն տացէ քահանայն, եւ քակեսցեն զքարինսն յորս արածն իցէ. եւ հանցեն զն(ո)ս(ա) արտաքոյ քաղաքին ՛ի տեղի անսուրբ։
⁴¹Եւ քերեսցեն զտունն ՛ի ներքոյ շուրջանակի. եւ հանցեն զքերուածն արտաքոյ քաղաքին ՛ի տեղի անսուրբ։
⁴²եւ առցեն ա́յլ քարինս քերածոյս, եւ դիցեն փոխանակ ա́յնց քարանց. եւ ա́յլ հող առցեն եւ ծեփեսցեն զտունն։
⁴³Եւ եթէ անդրէն կրկնեսցի́ արածն, եւ երեւեսցի́ ՛ի տանն յետ զքարինսն քակելոյ, եւ զտունն քերելոյ եւ միւսանգամ ծեփելոյ.
⁴⁴մտցէ քահանայն եւ տեսցէ́ թէ սփռեալ իցէ արածն ընդ տունն, բնա́կ բորոտութի(ւն) է ՛ի տանն, պի́ղծ է։

⁴⁵քակեսցե́ն զտունն, եւ զփայտս ն(ո)ր(ա), եւ զքարինս ն(ո)ր(ա), եւ զա(մենայ)ն հող տանն. եւ հանցեն արտաքո́յ քաղաքին ՛ի տեղի անսուրբ։
⁴⁶Եւ որ մտանիցէ ՛ի տունն զա(մենայ)ն աւուրս զատանելոյ նորա, պի́ղծ լիցի մինչեւ ցերեկոյ։
⁴⁷եւ որ ննջիցէ ՛ի տան անդ՝ լուասցէ́ զձորձս իւր, եւ պի́ղծ լիցի մինչեւ ցերեկոյ։ եւ որ կերիցէ ՛ի տանն՝ լուասցէ́ զձորձս իւր, եւ պի́ղծ լիցի մինչեւ ցերեկոյ եւ որ կերիցէ ՛ի տանն՝ լուասցէ́ զձորձս իւր, եւ պի́ղծ լիցի մինչեւ ցերեկոյ։
⁴⁸Եւ եթէ եկեալ մտանիցէ քահանայն եւ տեսանիցէ. եւ ահա չիցէ́ սփռեալ արածն ընդ որմս տանն յետ ծեփելոյ զտունն, սրբեսցէ քահանայն զտունն, զի բժշկեցա́ւ արածն։

⁴⁹Եւ առցէ́ առ ՛ի սրբելոյ զտունն երկուս հաւս կենդանիս ս(ուր)բս, եւ փա́յտ եղեւնեայ, եւ կարմիր մանեալ, եւ զոպա.
⁵⁰եւ սպանցէ զմի հաւն յաման խեցեղէն ՛ի վ(ե)ր(այ) ջրոյ կենդանւոյ։
⁵¹եւ առցէ զփայտն եղեւնեայ, եւ զկարմիրն մանեալ, եւ զզոպա́յն, եւ զհաւն կենդանի. եւ թացցէ́ զնոսա յարեան հաւուն սպանելոյ ՛ի վ(ե)ր(այ) ջրոյ կենդանւոյ. եւ ցանեսցէ́ նոքօք զտամբն եւթն անգամ։
⁵²Եւ սրբեսցէ́ զտունն արեամբ հաւուն, եւ ջրովն կենդանեաւ, եւ հաւուն կենդանեաւ, եւ փայտիւն եղեւնեաւ, եւ զոպայի́ւն, եւ կարմրովն մանելով։
⁵³եւ արձակեսցէ́ զհաւն կենդանի արտաքոյ քաղաքին՝ ՛ի դաշտ. եւ քաւեսցէ վ(ա)ս(ն) տանն եւ մաքրեսցի́, եւ սուրբ եղիցի։

⁵⁴Ա́յս օրէն լիցի ըստ ա(մենայ)ն արածոյ եւ բորոտու(թ)ե(ան). եւ հարածի,
⁵⁵եւ բորոտութե(ան) հանդերձի, եւ տան,
⁵⁶եւ սպւոյ, եւ պալարի, եւ պաղպաջոյ
⁵⁷նշանակելոյ, թէ յորո́ւմ աւուր պղծիցի, եւ յորո́ւմ աւուր սրբիցի։ Ա́յս օրէն լիցի բորոտութե(ան)։

¹Խօսեցաւ տ(է)ր ընդ մովսիսի եւ ընդ ահարոնի՝ եւ ասէ։
²խօսեա́ց ընդ որդիսդ ի(սրաէ)լի՝ եւ ասասցե́ս ցդոսա։ Ա́ռն ուրուք ա́ռն՝ եթէ լինիցի ծորումն ՛ի մարմնոյ իւրմէ, ծորումն իւր պի́ղծ է։
³Եւ ա́յս օրէն լինիցի սրբութե(ան) ն(ո)ր(ա). որոյ ծորիցէ́ սերմն ՛ի մարմնոյ իւրմէ, կամ թէ հալիցի մարմին իւր ՛ի ծորելոյն. պղծու(թ)ի(ւն) իւր ՛ի նմա́ է զա(մենայ)ն աւուրս ծորելոյ մարմնոյ իւրոյ, կամ թէ հալիցի մարմին նորա ՛ի ծորելոյ անտի. պղծութի(ւն) մարմնոյ է այն.
⁴Ա(մենայ)ն անկողին յորում ննջեսցէ սերմնակաթն՝ պի́ղծ լիցի. եւ ա(մենայ)ն յորոյ վ(ե)ր(այ) նստցի՝ պիղծ լիցի։

⁵Եւ մարդ որ մերձեսցի յանկողին ն(ո)ր(ա)՝ ողողեսցէ́ զձորձս իւր, եւ լուասցի́ ջրով, եւ պի́ղծ լիցի մինչեւ ցերեկոյ։
⁶եւ որ նստիցի ՛ի վ(ե)ր(այ) անօթոյ՝ յորւմ նստեալ իցէ սերմնակաթին, ողողեսցէ́ զհանդերձս իւր եւ լուասցի́ ջրով. եւ պի́ղծ լիցի մինչեւ ցերեկոյ։
⁷եւ որ մերձեսցի ՛ի մարմին սերմնակաթին, ողողեսցէ́ զձորձս իւր, եւ լուասցի́ ջրով. եւ պի́ղծ լիցի մինչեւ ցերեկոյ։
⁸Եւ եթէ թուք սերմնակաթին հասանիցէ ՛ի սուրբն, ողողեսցէ́ զհանդերձս իւր, եւ լուասցի́ ջրով. եւ պի́ղծ լիցի մինչեւ ցերեկոյ։
⁹Եւ ա(մենայ)ն համէ́տ իշոյ՝ յորոյ վերայ նստցի սերմնակաթն, պի́ղծ լիցի մինչեւ ցերեկոյ։

¹⁰եւ ա(մենայ)ն որ մերձեսցի յա(մենայ)ն որ ինչ ՛ի ներքո́յ ն(ո)ր(ա) իցէ, պի́ղծ լիցի մինչեւ ցերեկոյ։
¹¹Եւ յորինչ մերձեսցի́ սերմնակաթն, եւ զձեռս իւր ո́չ լուանայցէ ջրով, ողողեսցէ́ զհանդերձս իւր, եւ լուասցէ́ զմարմին իւր ջրով. եւ պի́ղծ լիցի մինչեւ ցերեկոյ։
¹²եւ անօթ խեցեղէն՝ յոր թէ մերձեսցի սերմնակաթն, փշրեսցի. եւ ա(մենայ)ն անօթ փեյտեղէն լուասցի́ ջրով, եւ եղիցի ս(ուր)բ։
¹³Եւ եթէ սրբեսցի սերմնակաթն ՛ի բղխմանէ́ իւրմէ, համարեսցի́ իւր եւթն օր ՛ի սրբու(թ)ի(ւն) իւր. եւ ողողեսցէ զհանդերձս իւր, եւ լուասցէ́ զմարմին իւր ջրով կենդանեաւ. եւ եղիցի սո́ւրբ։

¹⁴Եւ յաւուրն ութերորդի առցէ երկուս տատրակս, կամ երկուս ձագս աղաւնեաց. եւ տարցի զայն առաջի տ(եառ)ն ՛ի դուռն խորանին վկայութե(ան). եւ տացէ ցքահանայն։
¹⁵Եւ արասցէ քահանայն զմին վ(ա)ս(ն) մեղաց, եւ զմին՝ յողջակէզ։ եւ քաւեսցէ́ վ(ա)ս(ն) ն(ո)ր(ա) քահանայն առաջի տ(եառ)ն ՛ի բղխմանէ անտի նորա։
¹⁶Եւ ա́յր ոք՝ յորմէ ելանիցէ արու(թ)ի(ւն) սերման, լուասցէ́ զա(մենայ)ն մարմին իւր ջրով. եւ պի́ղծ լիցի մինչեւ ցերեկոյ։
¹⁷Եւ ա(մենայ)ն հանդերձ եւ մաշկ, յորոյ վերայ հասանիցէ արութի(ւն) սերման, լուասցին ջրով. եւ պի́ղծ լիցին մինչեւ ցերեկոյ։
¹⁸Եւ կին ընդ որում հարկանիցի այր՝ արու(թեամ)բ սերման. լուասցի́ն ջրով, եւ պի́ղծ լիցին մինչեւ ցերեկոյ։

¹⁹Եւ կին՝ որոյ բղխիցէ արիւն. եւ լինիցի բղխումն արեան ն(ո)ր(ա) ՛ի մարմնի իւրում, զեւթն օր եղիցի ՛ի դաշտանի իւրում։
²⁰ա(մենայ)ն որ հարկանիցի ընդ նա, պի́ղծ լիցի մինչեւ ցերեկոյ։
²¹Եւ ա(մենայ)ն յորոյ վ(ե)ր(այ) ննջեսցէ ՛ի դաշտանին իւրում. եւ ա(մենայ)ն յորոյ վ(ե)ր(այ) նստցի՝ պի́ղծ լիցի մինչեւ ցերեկոյ։
²²եւ ա(մենայ)ն որ մերձենայցէ յանկողին նորա, ողողեսցէ́ զհանդերձս իւր, եւ լուասցէ́ զմարմին իւր ջրով, եւ պի́ղծ լիցի մինչեւ ցերեկոյ։
²³Եւ ա(մենայ)ն որ մերձենայցէ յա(մենայ)ն անօթ յորոյ վ(ե)ր(այ) նստցի նա. ողողեսցէ́ զհանդերձս իւր, եւ լուասցի́ ջրով, եւ պի́ղծ լիցի մինչեւ ցերեկոյ։

²⁴Եւ եթէ տակաւին յանկողնին իւրում իցէ, կամ թէ ՛ի վ(ե)ր(այ) անօթոյ իրիք յորոյ վ(ե)ր(այ) նստեալիցէ, ՛ի մերձենալ ուրուք ՛ի նա՝ պի́ղծ լիցի մինչեւ ցերեկոյ։ Եւ եթէ ննջելով ոք ննջեսցէ ընդ նմա, եւ պղծութի(ւն) նորա ՛ի նմա́ իցէ, պի́ղծ լիցի զեւթն օր. եւ ա(մենայ)ն անկողին յորոյ վերայ եւ ննջիցէ՝ պի́ղծ լիցի մինչեւ ցերեկոյ։
²⁵Եւ կին՝ որ բղխիցէ բղխումն արեան զաւուրս բազումս. ո́չ ՛ի բաժանակի դաշտանի իւրոյ. եթէ բղխիցէ յետ դաշտանին իւրոյ. ա(մենայ)ն աւուրք բղխման պղծու(թ)ե(ան) իւրոյ, ա́յնպէս իցեն իբրեւ աւուրս դաշտանին իւրոյ. եւ եղիցի պի́ղծ։

²⁶Եւ ա(մենայ)ն անկողին՝ յորում ննջեսցէ զա(մենայ)ն աւուրս բղխման իւրոյ, ըստ անկողնի դաշտանին իւրոյ լիցի անսո́ւրբ։ եւ ա(մենայ)ն անօթ յորոյ վերայ նստցի՝ պի́ղծ լիցի ըստ պղծութե(ան) աւուրց դաշտանին իւրոյ։
²⁷ա(մենայ)ն որ մերձեսցի ՛ի նա՝ պի́ղծ լիցի, եւ ողողեսցէ́ զձորձս իւր, եւ լուասցէ́ զմարմին իւր ջրով. եւ պի́ղծ լիցի մինչեւ ցերեկոյ։
²⁸Ապա թէ սրբեսցի ՛ի բղխմանէ անտի, համարեսցի իւր աւուրս եւթն, եւ ապա́ սրբեսցի։
²⁹Եւ յաւուրն ութերորդի առցէ իւր երկուս տատրակս կամ երկուս ձագս աղաւնեաց. եւ տարցի զայն առ քահանայն ՛ի դո́ւռն խորանին վկայութե(ան)։

³⁰եւ արասցէ քահանայն զմին վ(ա)ս(ն) մեղաց, եւ զմին յողջակէզ. եւ քաւեսցէ վ(ա)ս(ն) ն(ո)ր(ա) քահանայն առաջի տ(եառ)ն ՛ի բղխմանէ անտի պղծութե(ա)ն իւրոյ։
³¹Եւ զգուշագո́յնս առնիցէք զորդիսն ի(սրաէ)լի ՛ի պղծութե(ան)ց իւրեանց. եւ ո́չ մեռանիցին վ(ա)ս(ն) անսրբութե(ան) իւրեանց, առ ՛ի պղծելոյ ն(ո)ց(ա) զխորանն իմ որ է ՛ի նոսա։
³²Ա́յս օրէն իցէ սերմնակաթին։ եւ եթէ ելանիցէ յումեքէ արութի(ւն) սերման, առ ՛ի պղծելոյ նովաւ։
³³եւ տեռատեսի ՛ի դաշտանի իւրում։ եւ սերմնակաթին ՛ի բղխման իւրում. արուին եւ իգի, եւ առն որ ննջիցէ ընդ դաշտանի։

¹Խօսեցաւ տ(է)ր ընդ մովսիսի՝ եւ ասէ. յետ վախճանելոյ որդւոցն ահարոնի, ՛ի մատուցանել նոցա հուր օտար առաջի տ(եառ)ն, եւ սատակել։
²Եւ ասէ տ(է)ր ցմովսէս. խօսեա́ց ը(ստ) ահարոնի եղբօր քում. եւ մի́ մտցեն յա(մենայ)ն ժամ ՛ի սրբութի(ւն)ն ՛ի ներքս քան զվարագոյրն յանդիման քաւութե(ա)ն, որ է ՛ի վերայ տապանակի վկայութե(ա)ն. եւ ո́չ մեռանիցիք։ զի ամպո́վ երեւեցայց ՛ի վ(ե)ր(այ) քաւութե(ա)ն։
³եւ ապա́ մտանիցէ ահարոն ՛ի սրբութի(ւն)ն՝ զուարակաւ յանդւոյ վ(ա)ս(ն) մեղաց, եւ խոյիւ յողջակէզ։

⁴Եւ պատմուճան կտաւի սրբեա́լ զգեցցի, եւ անդրավարտի́ս կտաւիս ունիցի յանդիմանս իւր. եւ գօտի կտաւի́ ածցէ ընդ մէջ իւր, եւ խոյր կտաւի եդեալ ՛ի գլուխ, զի հանդերձ սրբութե(ան) է. եւ լուասցէ́ ջրով զամենայն մարմին իւր, եւ զգեցցի զնոսա։
⁵Եւ ՛ի ժողովրդենէ որդւոցն իսրայէլի առցէ երկուս նոխազս յայծեաց վասն մեղաց, եւ խոյ մի յողջակէ́զ։
⁶եւ մատուսցէ́ ահարոն զզուրակն զվ(ա)ս(ն) մեղաց իւրոց. եւ քաւեսցէ վ(ա)ս(ն) ի́ւր, եւ վ(ա)ս(ն) տա́ն իւրոյ։
⁷Եւ առցէ երկո́ւս նոխազս եւ կացուսցէ́ զն(ո)ս(ա) առջի տ(եառ)ն առ դրան խորանին վկայութե(ան)։
⁸եւ արկցէ ահարոն ՛ի վ(ե)ր(այ) երկուց նոխազաց վիճա́կս՝ վիճակ մի տ(եառ)ն, եւ վիճակ մի արձակելոյ.

⁹եւ մատուսցէ ահարոն զնոխազն՝ յորոյ վ(ե)ր(այ) իջցէ վիճակն արձակելոյ.
¹⁰եւ կացուսցէ զնա առաջի տ(եառ)ն կենդանի. քաւե́լ նովաւ՝ առ արձակելոյ զնա յարձակումն, եւ թողլոյ զնա յանապատ։ եւ առցէ նոխազն յինքն զանօրէնութի(ւն)ս նոցա՝ յանկոխն։
¹¹Եւ մատուսցէ ահարոն զզուարակն զվ(ա)ս(ն) մեղաց զի́ւրն. եւ քաւեսցէ վ(ա)ս(ն) ի́ւր եւ վ(ա)ս(ն) տա́ն իւրոյ։ եւ սպանցէ զզուարակն զվ(ա)ս(ն) մեղաց զիւրն։
¹²եւ առցէ լի́ բուրուառաւ կայծակունս հրոյ ՛ի սեղանոյ անտի, որ է առաջի տ(եառ)ն. եւ լցցէ́ զձեռս իւր խնկով հանդերձանացն մանր աղացելով. եւ տարցի ՛ի նե́րքս քան զվարագոյրն։

¹³եւ դիցէ զխունկն ՛ի վերայ հրոյն առաջի տ(եառ)ն. եւ ծածկեսցէ́ ծուխ խնկոյն զքաւու(թ)ի(ւն)ն որ իցէ ՛ի վ(ե)ր(այ) վկայու(թ)ե(ան)ցն. եւ ո́չ մեռանիցիք։
¹⁴Եւ առցէ́ յարենէ զուարակին, եւ ցանեսցէ մատամբ իւրով ՛ի վ(ե)ր(այ) քաւութե(ա)ն ընդ կողմն արեւելից ընդդէ́մ քաւութե(ա)ն։ եւ ցանեսցէ́ եւթն անգամ յարենէ անտի մատամբ իւրով։
¹⁵Եւ սպանցէ́ զնոխազն զվ(ա)ս(ն) մեղաց, որ վ(ա)ս(ն) ժողովրդեանն իցէ առաջի տ(եառ)ն։ եւ տարցի́ յարենէ անտի ՛ի նե́րքս քան զվարագոյրն. եւ արասցէ զարիւն ն(ո)ր(ա) զոր օրինակ արա́ր զարիւն զուարակին. եւ ցանեսցէ զարիւն ն(ո)ր(ա) ՛ի վ(ե)ր(այ) սեղանոյն յանդիման քաւութե(ա)ն։

¹⁶Եւ քաւեսցէ́ զսրբութի(ւն)սն ՛ի պղծու(թ)ե(ան)ց որդւոցն ի(սրաէ)լի, եւ յանիրաւութե(ան)ց ն(ո)ց(ա), եւ վ(ա)ս(ն) ա(մենայ)ն մեղաց ն(ո)ց(ա)։ Եւ ա́յսպէս արասցէ ՛ի խորանին վկայու(թ)ե(ան), ստացելոյ ՛ի նոսա ՛ի մէջ պղծութե(ան)ց ն(ո)ց(ա)։
¹⁷եւ ամենեւին մարդ ո́չ լինիցի ՛ի խորանին վկայութե(ան) ՛ի մտանե́լ նորա եւ քաւել ՛ի սրբութե(ա)ն մինչեւ ելանիցէ։ եւ քաւեսցէ վ(ա)ս(ն) իւր եւ վ(ա)ս(ն) տան իւրոյ, եւ վ(ա)ս(ն) ա(մենայ)ն ժողովրդեան որդւոցն ի(սրաէ)լի։
¹⁸Եւ ելցէ́ ՛ի սեղանն որ առաջի տ(եառ)ն, եւ քաւեսցէ́ ՛ի վ(ե)ր(այ) ն(ո)ր(ա)։ եւ առցէ́ յարենէ զուարակին եւ յարենէ նոխազին, եւ դիցէ́ ՛ի վ(ե)ր(այ) եղջերաց սեղանոյն շուրջանակի։

¹⁹եւ ցանեսցէ́ յարենէ անտի մատամբ իւրով ՛ի վ(ե)ր(այ) ն(ո)ց(ա) եւթն անգամ, եւ մաքրեսցէ́ զնա, եւ սրբեսցէ́ զնա ՛ի պղծութե(ան)ց որդւոցն ի(սրաէ)լի։
²⁰եւ վախճանեսցէ́ առ ՛ի քաւելոյ զսրբութի(ւն)ն, եւ զխորանն վկայու(թ)ե(ան) եւ զսեղանն։ եւ վ(ա)ս(ն) քահանայիցն սրբեսցէ́։ Եւ մատուսցէ զնոխազն կենդանի.
²¹եւ դիցէ ահարոն զձեռս իւր ՛ի վերայ գլխոյ նոխազին կենդանւոյ. եւ խոստովա́ն լիցի ՛ի վերայ ն(ո)ր(ա) զա(մենայ)ն անօրէնութի(ւն)ս որդւոցն ի(սրաէ)լի, եւ զա(մենայ)ն անիրաւու(թ)ի(ւն)ս ն(ո)ց(ա), եւ զա(մենայ)ն զմեղս ն(ո)ց(ա)։ եւ դիցեն զն(ո)ս(ա) ՛ի վ(ե)ր(այ) գլխոյ նոխազին կենդանւոյ. եւ արձակեսցէ́ ՛ի ձեռն առն պատրաստելոյ՝ յանապատ։

²²Եւ առցէ նոխազն յա́նձն իւր զանօրէնութի(ւն)ս ն(ո)ց(ա)՝ յերկի́ր անկոխ. եւ արձակեսցէ զնոխազն յանապա́տ։
²³Եւ մտցէ́ ահարոն ՛ի խորանն վկայու(թ)ե(ան), եւ մերկասցի́ զպատմուճանն կտաւի. զոր զգենոյր ՛ի մտանելն իւրում ՛ի սրբութի(ւն)ն. եւ դիցէ զայն ա́նդ։
²⁴եւ լուասցէ́ զմարմին իւր ջրով ՛ի տեղւոջն սրբութե(ան). եւ զգեցցի́ զպատմուճանն իւր. եւ ելեալ արասցէ զողջակէզն իւր եւ զողջակէ́զ ժողովրդեանն եւ քաւեսցէ վ(ա)ս(ն) իւր եւ վ(ա)ս(ն) տա́ն իւրոյ, եւ վ(ա)ս(ն) ժողովրդեանն, ո(ր)պ(էս) վ(ա)ս(ն) քահանայիցն։
²⁵եւ զճարպն որ վասն մեղացն իցէ՝ հանցեն ՛ի սեղանն։

²⁶Եւ որ արձակէ զնոխազն նուիրեալ յարձակումն, ողողեսցէ́ զձորձս իւր, եւ լուասցէ́ զմարմին իւր ջրով. եւ ապա́ մտցէ ՛ի բանակն։
²⁷Եւ զզուարակն որ վ(ա)ս(ն) մեղաց, եւ զնոխա́զն զվ(ա)ս(ն) մեղաց, որոց արիւնն մուծաւ քաւե́լ ՛ի սրբութե(ա)ն, հանցեն արտաքոյ բանակին եւ այրեսցե́ն զն(ո)ս(ա) հրով, եւ զմորթ ն(ո)ց(ա) եւ զմիս ն(ո)ց(ա), եւ զապաւառ ն(ո)ց(ա)։
²⁸Եւ որ այրիցէն զնոսա, ողողեսցէ́ զհանդերձս իւր, եւ լուասցէ́ զմարմին իւր ջրով. եւ ապա́ մտցէ ՛ի բանակն։
²⁹եւ եղիցի ձեզ այն՝ օրէ́ն յաւիտենական։
³⁰Զի յաւուր յա́յնմիկ լինիցի քաւութի(ւն) վ(ա)ս(ն) ձեր, առ ՛ի սրբելոյ զձեզ յա(մենայ)ն մեղաց ձերոց առաջի տ(եառ)ն. եւ սրբեսջի́ք,

³¹զի շաբաթ շաբաթուց է։ Եւ եղիցի ձեզ այն հանգի́ստ. եւ լլկեսջի́ք զանձինս ձեր, զի օրէն յաւիտենակա́ն է յազգս ձեր։
³²Եւ քաւեսցէ́ քահանայն զոր օծանիցեն, եւ զորոյ կատարիցեն զձեռս ն(ո)ր(ա) քահանայանա́լ յետ հօր իւրոյ. եւ զգեցցի զպատմուճանն կտաւի զպամուճանն սո́ւրբ։
³³եւ քաւեսցէ́ զսրբու(թ)ի(ւն) սրբութե(ան)ցն. եւ զխորանն վկայութե(ան), եւ զսեղանն. եւ քաւեսցէ́ վ(ա)ս(ն) քահանայիցն, եւ վ(ա)ս(ն) ա(մենայ)ն ժողովրդեանն քաւեսցէ։
³⁴Եւ եղիցի ձեզ այն՝ օրէն յաւիտենական քաւե́լ վ(ա)ս(ն) որդւոցն ի(սրաէ)լի յա(մենայ)ն մեղաց ն(ո)ց(ա)։ մի́ անգամ ՛ի տարւոջ առնիցի. ո(ր)պ(էս) հրամայեաց տ(է)ր մովսիսի։

¹Խօսեցաւ տ(է)ր ընդ մովսիսի՝ եւ ասէ։
²խօսեա́ց դու ընդ ահարոնի եւ ընդ որդիս ն(ո)ր(ա)՝ եւ ընդ ա(մենայ)ն որդիսն ի(սրաէ)լի, եւ ասասցես ցն(ո)ս(ա). ա́յս բա́ն է զոր պատուիրեաց տ(է)ր՝ եւ ասէ։
³Ա́յր ոք այր՝ յորդւոցն ի(սրաէ)լի. որ սպանանիցէ արջառ, կամ ոչխար, կամ այծ ՛ի բանակի. եւ որ ոք սպանանիցէ արտաքոյ բանակին. եւ ՛ի դուռն խորանին վկայութե(ան) ո́չ ածիցէ զայն, առ առնելոյ զնա յողջակէզ վ(ա)ս(ն) փրկութե(ան) տ(եառ)ն ընդունելի ՛ի հո́տ անուշից։ Եւ որ սպանանիցէ արտաքոյ։

⁴եւ ՛ի դուռն խորանին վկայութե(ան) ո́չ ածցէ առ ՛ի մատուցանելոյ պատարագ տ(եառ)ն, յանդիման խորանին վկայութե(ան) տ(եառ)ն։ Յարի́ւն համարեսցի մարդոյն այնմիկ, ո(ր)պ(էս) թէ արիւն եհեղ՝ սատակեսցի́ անձն այն ՛ի ժողովրդենէ իւրմէ։
⁵Որպէս զի ածիցեն որդիքն ի(սրաէ)լի զզոհս իւրեանց՝ զոր ինքեանք սպանանիցեն ՛ի դաշտս, եւ մատուսցեն առաջի տ(եառ)ն ՛ի դուռն խորանին վկայութե(ան) առ քահանայն. եւ զենուցուն զն(ո)ս(ա) զենումն փրկոթե(ան) տ(եառ)ն։
⁶Եւ հեղցէ́ քահանայն զարիւնն առ սեղանովն յանդիման տ(եառ)ն, առ դրան խորանին վկայութե(ան). եւ հանցեն զճարպն ՛ի հո́տ անուշից տ(եառ)ն։

⁷Եւ ո́չ եւս զոհեսցեն զզոհս իւրեանց սնոտեաց՝ զորոց զհետ ինքեանք պոռնկէին։ օրէ́ն յաւիտենական եղիցի ձեզ յազգս ձեր։
⁸Եւ ասասցե́ս ցն(ո)ս(ա)։ մա́րդ ոք մարդ՝ յորդւոցն ի(սրաէ)լի, եւ յորդւոց եկաց յեցելոց ՛ի ձեզ. որ առնիցէ ողջակէզ կամ զոհ.
⁹եւ ՛ի դուռն խորանին վկայութե(ան) ո́չ ածցէ առնել զնա տ(եառ)ն. սատակեսցի́ մարդն այն ՛ի ժողովրդենէ իւրմէ։
¹⁰Եւ մա́րդ ոք մարդ յորդւոցդ ի(սրաէ)լի, կամ յեկաց յեցելոց ՛ի ձեզ. որ ուտիցէ զա(մենայ)ն արիւն. հաստատեցից զերեսս իմ ՛ի վերայ անձինն որ ուտիցէ զարիւնն. եւ կորուսի́ց զնա ՛ի ժողովրդենէ իւրմէ։

¹¹Զի շունչ ա(մենայ)ն մարմնոյ արի́ւն իւր է։ եւ ես ետու ձեզ զայն ՛ի սեղանն, քաւե́լ վ(ա)ս(ն) անձանց ձերոց. զի արիւն ն(ո)ր(ա) փոխանակ անձին ս(ո)ր(ա) քաւեսցէ։
¹²Վ(ա)ս(ն) այնորիկ ասացի ցորդիսն ի(սրաէ)լի. ա(մենայ)ն անձն ՛ի ձէնջ՝ արիւն մի́ կերիցէ։ եւ եկն՝ որ եկեալ յեցեալ իցէ ՛ի ձեզ՝ արիւն մի́ կերիցէ։
¹³Եւ մա́րդ ոք մարդ՝ յորդւոցն ի(սրաէ)լի, կամ յեկաց յեցելոց ՛ի ձեզ. որ որսայցէ ո́րս երէ ինչ՝ կամ թռչուն որ ուտիցի, հեղցէ́ զարիւն ն(ո)ր(ա) եւ ծածկեսցէ́ հողով։
¹⁴զի շունչ ամենայն մարմնոյ արի́ւն իւր է։ Եւ ասացի ցորդիսն ի(սրաէ)լի՝ զարիւն ա(մենայ)ն մարմնոյ մի́ ուտիցէք, զի շունչ ա(մենայ)ն մարմնոյ արի́ւն իւր է։ ա(մենայ)ն որ ուտիցէ զայն՝ սատակեսցի։

¹⁵Եւ ա(մենայ)ն անձն որ ուտիցէ զմեռելոտի կամ զգազանաբեկ, յա(մենայ)ն եկա́ց կամ ՛ի պանդխտաց, ողողեսցէ́ զհանդերձս իւր, եւ ո́չ լուասցէ զմարմին իւր, եւ պի́ղծ լիցի մինչեւ ցերեկոյ. եւ ապա ս(ուր)բ լիցի։
¹⁶Եւ եթէ ո́չ ողողեսցէ զհանդերձս իւր, եւ ո́չ լուասցէ զմարմին իւր ջրով, ընկալցի́ զանօրէնութի(ւն)ս յանձն իւր։

¹Խօսեցաւ տ(է)ր ընդ մովսիսի՝ եւ ասէ։
²խօսեա́ց ընդ որդիսդ ի(սրաէ)լի՝ եւ ասասցես ցն(ո)ս(ա)։ Ես եմ տ(է)ր ա(ստուա)ծ ձեր.
³ըստ ա(մենայ)ն գնացից երկրին եգիպտացւոց յորում պանդխտեցարուք՝ մի́ առնիցէք։ ը(ս)տ գնացից երկրին քանանացւոց յոր ե́ս տարայց զձեզ՝ մի́ առնիցէք. եւ ըստ օրինաց ն(ո)ց(ա) մի́ գնայցէք։
⁴Զիրաւունս իմ առնիջի́ք, եւ զհրամանս իմ պահեսջի́ք, գնալ ՛ի ն(ո)ս(ա)։ Ե́ս եմ տ(է)ր ա(ստուա)ծ ձեր։
⁵եւ պահեսջի́ք զա(մենայ)ն հրամանս իմ, եւ զա(մենայ)ն զիրաւունս իմ, եւ արասջի́ք զն(ո)ս(ա)։ զոր արարեալ մարդոյ՝ կեցցէ́ նոքօք։ ե́ս եմ տ(է)ր ա(ստուա)ծ ձեր։

⁶Մա́րդ ոք մարդ՝ առ ա(մենայ)ն ընտանութի(ւն) մարմնոյ իւրոյ մի́ մերձեսցի՝ յայտնել զառականս ն(ո)ր(ա). զի ե́ս եմ տ(է)ր։
⁷Զառականս հօր քոյ, եւ զառականս մօր քոյ մի́ յայտնեսցես՝ զի մա́յր քո է. մի́ յայտնեսցես զառականս ն(ո)ր(ա)։
⁸Զառականս կնոջ հօր քոյ մի́ յայտնեսցես. զի առականք մօր քում են։
⁹Զառականս քեռ քոյ՝ թէ առ ՛ի հօրէ́ իցէ կամ առ ՛ի մօրէ՝ ՛ի տան ծնեալ կամ արտաքոյ, մի́ յայտնեսցես զառականս ն(ո)ր(ա)։
¹⁰Զառականս դստեր ուստեր քո, կամ զդստեր դստեր քոյ՝ մի́ յայտնեսցես զառականս նոցա. զի առակա́նք քո են։
¹¹Զառականս դստեր կնոջ հօր քոյ մի́ յայտնեսցես. զի համ հօրեայ քո́յր քո է. մի́ յայտնեսցես զառականս նորա։

¹²Զառականս հօրաքեռ քոյ մի́ յայտնեսցես. զի ընտանի́ հօր քոյ է։
¹³Զառականս մօրաքեռ քոյ մի́ յայտնեսցես. զի ընտանի́ մօր քոյ է։
¹⁴Զառականս հօրեղբօր քոյ մի́ յայտ տեսցես, եւ առ կին ն(ո)ր(ա) մի́ մտանիցես. զի ազգակա́ն քո է։
¹⁵Զառականս նուո́յ քոյ մի́ յայտնեսցես. զի կին որդւո́յ քոյ է. մի́ յայտնեսցես զառականս նորա։ Եւ զդուստր ուստե́ր նորա, կամ զդուստր դստեր նորա մի́ առնուցուս յայտնել զառականս ն(ո)ր(ա). զի ընտանի են քո. ամպարշտութի(ւն) է։
¹⁶Զառականս կնօջ եղբօր քոյ մի́ յայտնեսցես. զի առականք եղբօ́ր քում են։

¹⁷Զառականս կնօջ եւ զդստեր իւրոյ մի́ յայտնեսցես։ Զդուստր ուստեր նորա՝ եւ զդուստր դստեր ն(ո)ր(ա) մի́ առնուցուս յայտնել զառականս ն(ո)ց(ա). զի ընտանի́ քո են. ամպարշտու(թ)ի(ւն) է։
¹⁸Կին առ քե́ռբ իւրով մի́ առնուցուս նախանձընդդէմ, յայտնել զառականս ն(ո)ր(ա), առ նովաւ կենդանւոյն։
¹⁹Եւ առ կին ՛ի դաշտանի պղծու(թ)ե(ան) իւրոյ մի́ մտանիցես՝ յայտնել զառականս ն(ո)ր(ա)։
²⁰Եւ առ կին ընկերի քոյ մի́ տացես զարու(թ)ի(ւն) սերման քոյ, առ ՛ի պղծելոյ ընդ նմա։
²¹Եւ ՛ի սերմանէ քումմէ մի́ տացես ծառայել իշխանի, եւ մի պղծեսցես զանուն իմ ս(ուր)բ. զի ես եմ տ(է)ր։
²²Եւ ընդ արուի մի́ մտանիցես զմուտ կանացի, զի պղծութի(ւն) է այն։

²³Եւ յա(մենայ)ն անասուն ո́չ տացես զարութի(ւն) սերման քոյ առ ՛ի պղծելոյ ընդ նմա։ Եւ կին՝ մի́ կացցէ առաջի ա(մենայ)ն անասնոյ մտաբերե́լ ՛ի նա. զի գարշելի́ է այն։
²⁴Եւ մի́ պղծիցիք այնու ա(մենայ)նիւ. զի այնու ա(մենայ)նիւ պղծեցան ազգքն, զոր ե́ս մերժեցից յերեսաց ձերոց.
²⁵եւ եղեւ գարշելի երկիրն, եւ հանդէ́ս արարի անօրէնու(թ)ե(ան)ց ն(ո)ց(ա) ՛ի նմանէ. եւ տաղտկացաւ երկիրն ՛ի բնակչաց իւրոց։
²⁶Եւ պահեցէ́ք զօրէնս իմ, եւ զա(մենայ)ն հրամանս իմ. եւ մի́ առնիցէք յա(մենայ)ն պղծութե(ան)ցն այնոցիկ. բնա́կն, եւ եկն, եւ պանդո́ւխտն որ ՛ի ձեզ իցէ։
²⁷Զի զա́յն ա(մենայ)ն պղծութի(ւն)ս արարին մարդիկ երկրին, որ էին անդ յառաջ քան զձեզ. եւ պղծեցաւ երկիրն։

²⁸զի մի́ տաղտկանայցէ եւ ձեւք երկրին՝ ՛ի պղծել ձեր զնա. ո(ր)պ(էս) տաղտկացաւ ազգօքն՝ որ էին յառա́ջ քան զձեզ։
²⁹Զի ա(մենայ)ն մարդ որ արասցէ յա(մենայ)ն պղծութե(ան)ցն այնոցիկ, սատակեսցի́ն անձինքն՝ որ առնիցեն զայն՝ ՛ի միջոյ ժողովրդեան իւրեանց։
³⁰Եւ պահեսջի́ք զպահպանու(թ)ի(ւն)ս իմ. զի մի́ առնիցէք յա(մենայ)ն պղծու(թ)ե(ան) օրինացն՝ որ գործեցան յառաջ քան զձեզ. եւ մի́ պղծիցիք նոքօք, զի ե́ս եմ տ(է)ր ա(ստուա)ծ ձեր։

¹Խօսեցաւ տ(է)ր ընդ մովսիսի՝ եւ ասէ։
²խօսեա́ց ընդ որդիսդ ի(սրաէ)լի՝ եւ ասասցե́ս ցնոսա։ Սո́ւրբ եղերուք. զի ես ս(ուր)բ եմ տ(է)ր ա(ստուա)ծ ձեր։
³Իւրաքանչիւր ՛ի հօրէ եւ ՛ի մօրէ իւրմէ երկնչիջի́ք։ Եւ զշաբաթս իմ պահեսջի́ք. զի ե́ս եմ տ(է)ր ա(ստուա)ծ ձեր։
⁴Մի́ երթայցէք զհետ կռոց. եւ աստուածս ձուլածոյս մի́ առնիցէք ձեզ։ ե́ս եմ տ(է)ր ա(ստուա)ծ ձեր։
⁵Եւ եթէ զոհիցէք զոհ փրկու(թ)ե(ան) տ(եառ)ն, զընդունելի́ս ձեր զոհեսջիք։
⁶Յաւուր յորում մատուցանիցի՝ կերիցի́, եւ ՛ի վաղիւ անդր. եւ եթէ մնասցէ մինչեւ ցօրն երրորդ՝ հրո́վ այրեսցի։
⁷Ապա թէ ուտելո́վ ուտիցի յաւուրն երրորդի, անզո́հ է, մի́ ընկալցի.

⁸եւ որ ուտիցէ զայն՝ մե́ղս առցէ. զի զսրբու(թ)ի(ւն) տ(եառ)ն պղծեաց, եւ սատակեսցին անձինքն որ ուտիցեն՝ ՛ի ժողովրդենէ իւրեանց։
⁹Եւ ՛ի հնձել հնձողաց ձերոց զհունձս երկրին ձերոյ, մի́ սպառիցէք զհունձս անդոց ձերոց մօտ հնձելով. եւ զանկեալն ՛ի հնձոց քոց մի́ ժողովեսցես։
¹⁰Եւ զայգի քոյ ճռաքաղ մի́ առնիցես։ եւ պտղաքաղ այգւոյ մի́ լինիցիս։ տնանկին եւ պանդխտի́ թողուցուս զայն. ե́ս եմ տ(է)ր ա(ստուա)ծ ձեր։
¹¹Մի́ գողանայցէք. եւ մի́ ստիցէք. եւ մի́ զրպարտիցէք իւրաքանչիւր զընկե́ր իւր։
¹²Եւ մի́ երդնուցուք սուտ յանո́ւն իմ. եւ մի́ պղծիցէք զանուն տ(եառ)ն ա(ստուծո)յ ձերոյ. ե́ս եմ տ(է)ր ա(ստուա)ծ ձեր։
¹³Մի́ զրկեսցես զընկեր քո, եւ մի́ յափշտակեսցես։ Մի́ ագցին վարձք վարձկանին առ քեզ մինչեւ ցառաւօտ։

¹⁴Զհամրն մի́ զզուիցես։ եւ առաջի կուրին գայթագղութի(ւն) մի́ դնիցես։ եւ երկնչիցի́ս ՛ի տ(թեն)է ա(ստուծո)յ քումմէ։ Ե́ս եմ տ(է)ր ա(ստուա)ծ քո։
¹⁵անիրաւութի(ւն) ՛ի դատաստանի մի́ առնիցես. եւ ակն աղքատի մի́ առնուցուս. եւ մի́ երեսաց աչառիցես հարստի. արդարու(թեամ)բ դատեսցի́ս զընկեր քո։
¹⁶Եւ նենգութ(եամ)բ ընդ ազգի քում մի́ գնայցես։ եւ յարիւն ընկերի քոյ մի́ յօժարիցիս։
¹⁷մի́ ատեսցես զեղբայր քո ՛ի մտի քում։ Յանդիմանութ(եամ)բ յանդիմանեսցես զընկե́ր քո, եւ մի́ ընդունիցիս վ(ա)ս(ն) ն(ո)ր(ա) զմեղս։
¹⁸Մի́ խնդրեսցէ վրէժ ձեռն քո։ եւ ընդ որդւոց ժողովրդեան քոյ ոխս՝ մի́ ունիցիս։
¹⁹զօրէնս իմ պահեսջի́ր։

²⁰Եթէ ոք ննջեսցէ ընդ կնոջ արութ(եամ)բ սերման. եւ նա՝ իցէ աղախին պահեալ առն, եւ փրկանօք չիցէ́ փրկեալ, եւ ազատութ(եամ)բ չիցէ́ ազատեալ. հարց եւ փորձ լիցի ն(ո)ց(ա). եւ մի́ մեռանիցին՝ զի չիցէ́ ազատեալ։
²¹Եւ մատուսցէ ընդ յանցանաց իւրոց տ(եառ)ն առ դրան խորանին վակյութե(ան) խո́յ յանցանաց։
²²եւ քաւեսցէ́ վ(ա)ս(ն) նորա քահանայն խոյի́ւն յանցանաց առաջի տ(եառ)ն վ(ա)ս(ն) մեղացն զոր մեղաւ. եւ թողցի նմա մեղքն՝ զոր մեղաւ։
²³Եւ յորժամ մտանիցէք յերկիրն՝ զոր տ(է)ր ա(ստուա)ծ տացէ ձեզ, եւ տնկիցէք զա(մենայ)ն փայտ ուտելի, սրբեսջի́ք զպղծութի(ւն) ն(ո)ր(ա). եւ պտուղ ն(ո)ր(ա) զերեամ պի́ղծ լիցի ձեզ, եւ մի́ կերիցի։

²⁴Եւ յամին չորրորդի եղիցի ա(մենայ)ն պտուղ ն(ո)ր(ա) սուրբ, օրհնեա́լ տ(եառ)ն.
²⁵եւ յամին հինգերորդ կերիջի́ք զպտուղ ն(ո)ր(ա). յաւելուա́ծ ձեզ լինիցին բերք ն(ո)ր(ա)։ Ե́ս եմ տ(է)ր ա(ստուա)ծ ձեր.
²⁶՛ի վ(ե)ր(այ) լերանց մի́ ուտիցէք։ Եւ մի́ հմայիցէք. եւ մի́ հաւահարց՝ եւ մի́ հաւագէտք լինիցիք։
²⁷Ցցունս ՛ի վարսից գլխոց ձերոց մի́ առնիցէք. եւ մի́ ապականիցէք զտեսիլ մօրուաց ձերոց։
²⁸Եւ վէտս ՛ի վ(ե)ր(այ) ոգւոյ մի́ առնիցէք ՛ի մարմինս ձեր։ Եւ գիր կտեալ մի́ առնիցէք ՛ի ձեզ։
²⁹մի́ պղծիցես զդուստր քո պոռնկեցուցանելով զնա. զի մի́ պոռկեսցի երկիրն, եւ լցցի́ երկիրն անիրաւութ(եամ)բ։

³⁰Զշաբաթս իմ պահեսջի́ք, եւ ՛ի սրբու(թ)ե(ան)ց իմոց երկնչիջի́ք, զի ե́ս եմ տ(է)ր։
³¹Զհետ վհկաց՝ մի́ երթայցէք, եւ ՛ի գէտս մի́ յարիցիք պղծել նոքօք։
³²առաջի ալեաց յառնիցէ́ս, եւ պատուեսցե́ս զերեսս ծերոյն։
³³Եւ եթէ յարեսցի առ ձեզ եկ՝ յերկրին ձերում, մի́ նեղիցէք զնա։
³⁴իբրեւ զբնակն ձեր լինիցի ձեզ՝ եւ եկն յարեալ ՛ի ձեզ։
³⁵Մի́ առնիցէք անիրաւութի(ւն) ՛ի դատաստանի, չափս, եւ ՛ի կշի́ռս, եւ ՛ի զոյգս։
³⁶Զոյգք արդարք, եւ չափք արդարք, եւ կշիռք արդարք, եւ կապիճ արդա́ր լիցի ձեզ։ Ե́ս եմ տ(է)ր ա(ստուա)ծ ձեր՝ որ հանի զձեզ յերկրէն եգիպտացւոց։

³⁷եւ պահեսջի́ք զա(մենայ)ն զօրէնս իմ, եւ զա(մենայ)ն զհրամանս իմ. եւ արասջի́ք զն(ո)ս(ա)՝ զի ե́ս եմ տ(է)ր ա(ստուա)ծ։

¹Խօսեցաւ տ(է)ր ընդ մովսիսի՝ եւ ասէ.
²խօսեա́ց ընդ որդիսդ ի(սրաէ)լի՝ եւ ասասցես։ Եթէ ոք յորդւոցդ ի(սրաէ)լի՝ կամ յեկաց պանդխտացդ ի(սրաէ)լի, տացէ զսերմն իւր իշխանի՝ մահո́ւ մեռցի. եւ ազգք երկրին քարկո́ծ արասցեն զնա քարամբք։
³Եւ ես հաստատեցից զերեսս իմ ՛ի վ(ե)ր(այ) մարդոյն այնորիկ. եւ կորուսի́ց զնա ՛ի ժողովրդենէ իւրմէ. զի ե́տ ՛ի սերմանէ իւրմէ իշխանին պղծել զսրբու(թ)ի(ւն)ս իմ. եւ գարշեցուցանել զանուն սրբեցելոցն իմոց։
⁴Ապա թէ ակնածելով ակնածիցեն բնակիչք երկրին աչօք իւրեանց յառնէն յայնմանէ. ՛ի տալ ն(ո)ր(ա) զսերմն իւր իշխանին՝ չսպանանել զնա։

⁵հաստատեցի́ց զերեսս իմ ՛ի վ(ե)ր(այ) առնն այնորիկ, եւ ՛ի վերայ ազգի ն(ո)ր(ա), եւ կորուսի́ց զնա եւ զա(մենայ)ն միաբանեալսն ընդ նմա՝ առ ՛ի պոռնկեցուցանելոյ զնոսա ընդ իշխանին, ՛ի միջոյ ժողովրդեան իւրեանց։
⁶Եւ անձն որ երթիցէ զհետ վհկա́ց կամ գիտա́ց, պոռնկել զկնի ն(ո)ց(ա). հաստատեցից զերեսս իմ ՛ի վ(ե)ր(այ) անձինն այնորիկ, եւ կորուսի́ց զնա ՛ի ժողովրդենէ իւրմէ։
⁷Եւ սրբեսջի́ք. եւ եղիջիք սո́ւրբք, զի ս(ուր)բ եմ ես տ(է)ր ա(ստուա)ծ ձեր։
⁸եւ պահեսջի́ք զհրամանս իմ, եւ արասջի́ք զն(ո)ս(ա). ե́ս եմ տ(է)ր ա(ստուա)ծ ձեր՝ որ սրբեմ զձեզ։
⁹Մա́րդ ոք մարդ՝ որ հայհոյեսցէ զհայր իւր կամ զմայր իւր՝ մահո́ւ մեռցի։ զհայր իւր եւ զմայր իւր, թէ բամբասիցէ՝ մահապա́րտ է։

¹⁰Եւ ա́յր ոք թէ շնասցի ը(ստ) առնակնոջ, կամ շնայցէ ը(ստ) կնոջ զընկերի իւրոյ, մահո́ւ մեռցին, շնացօղն եւ շնացեալն։
¹¹Եւ ա́յր ոք՝ որ ննջիցէ ընդ կնոջ հօր իւրոյ, զառականս հօր իւրոյ յայտնեաց. մահո́ւ մեռցին երկոքին, զի ամպարշտեցա́ն, եւ մահապարտք են։
¹²Եւ եթէ ննջեսցէ ոք ընդ նուո́յ իւրում, մահո́ւ մեռցին երկոքին. զի ամպարշտեցա́ն, եւ մահապարտք են։
¹³Եւ այր ոք եթէ ննջեսցէ ընդ արուի զգործ կանացի. պղծու(թ)ի(ւն) գործեցին, մահո́ւ մեռցին երկոքին՝ զի մահապարտք են։
¹⁴Եւ ա́յր ոք որ առնուցու զկին եւ զմայր ն(ո)ր(ա), անօրէնութի(ւն) է, հրո́վ այրեսցեն զնա՝ եւ զն(ո)ս(ա). եւ մի́ լինիցի ՛ի ձեզ անօրէնութի(ւն)։

¹⁵Եւ ա́յր ոք՝ որ տացէ զարութի(ւն) իւր յանասուն՝ մահո́ւ մեռցի. եւ զանասունն սպանջի́ք։
¹⁶Եւ կին՝ որ մատչիցի յա(մենայ)ն անասուն պղծել նմա ՛ի նմանէ, սպանանիջի́ք զկինն եւ զանասունն. մահո́ւ մեռանիցին՝ զի մահապարտք են։
¹⁷Եւ ա́յր ոք՝ որ առնուցու զքոյր իւր զառ ՛ի հօրէ՝ կամ զառ ՛ի մօրէ, եւ տեսանիցէ զառականս ն(ո)ր(ա), եւ նա տեսանիցէ զառականս նորա՝ նախատի́նք են. սատակեսցի́ն յերեսաց որդւոց ազգին իւրեանց. զի զառականս քե́ռ իւրոյ յայտնեաց. ընկալցի́ն զմեղս իւրեանց։
¹⁸Եւ ա́յր՝ որ ննջիցէ՝ը կնոջ դաշտանի, եւ յայտնեսցէ զառականս ն(ո)ր(ա), զի զաղբեւր արեան ն(ո)ր(ա) յայտնեաց, եւ սա՝ յայտնեա́ց զբղխումն արեան իւրոյ, սատակեսցի́ն երկոքեան յազգէ իւրեանց։

¹⁹Եա զառականս հօրաքեռ քոյ եւ զմօրաքեռ քոյ՝ մի́ յայտնեսցես. զի զընտանութե(ան) առականս յայտնեցին, զմեղս իւրեանց տարցին, եւ անորդի́ք մեռցին։
²⁰Եւ մա́րդ ոք՝ որ ննջիցէ ընդ կնոջ քեռւոյ իւրոյ, զառականս քեռւոյ իւրոյ յայտնեաց. զմեղս իւրեանց ընկալցին, եւ անորդի́ք մեռցին։
²¹Եւ մարդ ոք՝ որ առնուցու զկին եղբօր իւրոյ՝ պղծութի(ւն) է. զառականս եղբօր իւրոյ յայտնեաց, անորդի́ք մեռցին։
²²Եւ պահեսջի́ք զա(մենայ)ն հրամանս իմ, եւ զա(մենայ)ն իրաւունս իմ, եւ արասջի́ք զն(ո)ս(ա). եւ ո́չ տաղտկասցի ձեւք երկիրն՝ յոր ե́ս տարայց զձեզ բնակել ՛ի նմա։

²³Եւ մի́ գնայցէք ըստ օրինաց ազգացն զոր մերժեցի́ց ես ՛ի ձէնջ. զի զա́յն ա(մենայ)ն արարին, եւ գարշեցայ ես ՛ի նոցանէն.
²⁴եւ ասացի ցձեզ. դո́ւք ժառանգեցէք զերկիրն զայն, եւ ես տաց ձեզ զնա ՛ի ստացուա́ծ. երկիր որ բղխէ զկաթն եւ զմեղր։ Ե́ս եմ տ(է)ր ա(ստուա)ծ ձեր՝ որ մեկնեցի զձեզ յա(մենայ)ն ազգաց.
²⁵եւ զատուսջի́ք զանձինս ձեր ՛ի մէջ անասնոց՝ սրբոց եւ անսրբոց, եւ ՛ի մէջ թռչնոց՝ սրբոց եւ անսրբոց. եւ մի́ պղծէք զանձինս ձեր անասնովք եւ թռչնովք, եւ ա(մենայ)ն սողնովք երկրի. զոր ես զատուցի ձեզ ՛ի պղծութի(ւն)։
²⁶Եւ եղիջի́ք ինձ սո́ւրբք, զի ե́ս ս(ուր)բ եմ տ(է)ր ա(ստուա)ծ ձեր. որ զատուցի́ զձեզ յա(մենայ)ն ազգաց լինել ի́նձ։

²⁷Եւ ա́յր կամ կին՝ որ լինիցի վհո́ւկ կամ գէտ, մահո́ւ մեռցի. քարամբք քարկոծեցէք զն(ո)ս(ա)՝ զի մահապարտք են։

¹Խօսեցաւ տ(է)ր ընդ մովսիսի՝ եւ ասէ։ Խօսեա́ց ընդ որդիսդ ահարոնի ը(ստ) քահանայս՝ եւ ասասցես ցդոսա. զի մի́ պղծիցին յոգիս ազգի իւրեանց.
²կամ յընտանի́ կամ ՛ի դրացի իւրեանց։ այլ կամ ՛ի հայր, կամ ՛ի մայր, կամ յուստերս, կամ ՛ի դստերս, կամ յեղբայր,
³կամ ՛ի քոյր, կամ ՛ի դուստր մերձաւոր իւր՝ զոր առն չիցէ տուեալ՝ նոքօք պղծիցին։
⁴եւ մի́ պղծեսցին վայրապար ՛ի ժողովրդեան իւրում ՛ի պղծութի(ւն) իւրեանց։
⁵Եւ մի́ գերծուցուն զգլուխս իւրեանց ՛ի վ(ե)ր(այ) մեռելոյ ՛ի կնտութի(ւն)։ եւ զտեսիլ մօրուաց մի́ գերծուցուն. եւ ՛ի մարմինս իւրեանց վէտս մի́ հատանիցեն։

⁶Զի սո́ւրբ լինիցին տ(եառ)ն ա(ստուծո)յ իւրեանց։ եւ մի́ գարշեցուսցեն զանուն ա(ստուծո)յ իւրեանց. զի զոհսն տ(եառ)ն պատարագ ա(ստուծո)յ իւրեանց նոքա́ մատուցանեն։ եւ եղիցին սո́ւրբք։
⁷Կին պոռնիկ եւ պղծեալ՝ մի́ առնուցուն. եւ զկին հանեալ յառնէ իւրմէ մի́ առնուցուն. զի սո́ւրբ է տ(եառ)ն ա(ստուծո)յ իւրում,
⁸եւ սրբեսցէ́ զանձն. զի զպատարագն տ(եառ)ն ա(ստուծո)յ ձերոյ նա́ մատուցանէ. սո́ւրբ եղիցի. զի ս(ուր)բ եմ ես տ(է)ր՝ որ սրբեմ զն(ո)ս(ա)։
⁹Եւ դուստր ա́ռն քահանայի՝ եթէ ՛ի պոռնկու(թ)ե(ան) պղծիցի, զանուն հօ́ր իւրոյ բամբասեա́ց՝ հրով այրեսցի։

¹⁰Եւ քահանայն մեծ՝ յեղբարց իւրոց,. յորոյ վերայ գլխոյն արկեալ իցէ զեւղ օծու(թ)ե(ան). եւ կատարեալ զձեռս ն(ո)ր(ա) զգենո́ւլ զպատմուճանն, զգլուխ իւր մի́ ապախուրեսցէ, եւ զհանդերձս իւր մի́ պատառեսցէ.
¹¹եւ յանձն վախճանեալ մի́ մտցէ։ ՛ի հայր իւր կամ ՛ի մայր իւր մի́ պղծիցի։
¹²Եւ ՛ի սրբութե(ան)ց անտի մի́ ելանիցէ. եւ մի́ պղծեսցէ զսրբու(թ)ի(ւն) ա(ստուծո)յ իւրոյ. զի ս(ուր)բ եւղն օծու(թ)ե(ան) որ յա(ստուծո)յ՝ ՛ի վ(ե)ր(այ) ն(ո)ր(ա) է. զի ե́ս եմ տ(է)ր։
¹³Նա՝ կին կո́յս յազգէ իւրմէ առնուցու։
¹⁴զայրի եւ զհանեալ, եւ զպոռնիկ, մի́ առնուցու. այլ կոյս յազգէ́ իւրմէ առնուցու կին։ եւ մի́ պղծեսցէ զանուն իմ։
¹⁵եւ մի́ պղծեսցէ զսերմն իւր ՛ի ժողովրդեան իւրում. զի ե́ս եմ տ(է)ր՝ որ սրբեմ զնա։

¹⁶Խօսեցաւ տ(է)ր ընդ մովսիսի՝ եւ ասէ։
¹⁷խօսեաց ընդ ահարոնի՝ եւ ասասցես. Ա́յր ոք՝ յազգէ քումմէ՝ յա(մենայ)ն ազգս ձեր յորում իցէ́ արատ, մի́ մատիցէ մատուցանել պատարագ ա(ստուծո)յ իւրոյ։
¹⁸զի ա(մենայ)ն այր՝ յորում իցէ արատ՝ մի́ մատիցէ։ Այր կաղ, կամ կոյր, կամ կարճունչ, կամ ակընջատ.
¹⁹կամ այր ձեռնբեկ, կամ ոտնբեկ,
²⁰կամ սապատողն, կամ շիլ, կամ պտղակն. կամ այր յորում իցէ քոս, կամ քաղցկեղ, կամ միորձի։

²¹Ա(մենայ)ն այր յորում իցէ արատ, ՛ի զաւակէ ահարոնի քահանայի, մի́ մերձեսցի մատուցանել զոհս ա(ստուծո)յ քում. զի արատ գոյ ՛ի նմա։ եւ զպատարագսն ա(ստուծո)յ մի́ մատչիցի մատուցանել. զի պատարագքն ա(ստուծո)յ՝ սրբու(թ)ի(ւն)ք սրբու(թ)ե(ան)ց են։
²²՛Ի սրբու(թ)ե(ան)ց անտի կերիցէ́.
²³բայց ՛ի վարագոյրն մի́ մերձեսցի, եւ առ սեղանն մի́ մատիցէ, զի արատաւո́ր է։ եւ մի́ պղծեսցէ զսրբու(թ)ի(ւն) ա(ստուծո)յ իւրոյ, զի ե́ս եմ տ(է)ր որ սրբեմ զնոսա։
²⁴Եւ խօսեցաւ մովսէս ընդ ահարոնի եւ ընդ որդիս ն(ո)ր(ա), եւ ընդ ա(մենայ)ն որդիսն ի(սրաէ)լի։

¹Խօսեցաւ տ(է)ր ընդ մովսիսի՝ եւ ասէ.
²Ասասցե́ս ցահարոն եւ ցորդիս ն(ո)ր(ա), եւ զգո́յշ լինիցին սրբու(թ)ե(ան)ց՝ որդւոցն ի(սրաէ)լի. եւ մի́ պղծեսցեն զանուն իմ ս(ուր)բ՝ զորս նոքայն սրբեն ինձ, զի ե́ս եմ տ(է)ր։
³Ասասցե́ս ցնոսա. յազգս ձեր ա(մենայ)ն այր՝ յա(մենայ)ն զաւակէ ձերմէ որ մերձենայցէ ՛ի սրբութի(ւն)սն, որ սրբիցեն որդիքն ի(սրաէ)լի տ(եառ)ն, եւ պղծութի(ւն) իւր ՛ի նմա́ իցէ, սատակեսցի́ անձնն այն յերեսաց իմոց, զի ե́ս եմ տ(է)ր։
⁴Եւ ա́յր ոք ՛ի զաւակէ ահարոնի քահանայի́, թէ բորոտ՝ կամ սերմնակաթ իցէ՝ ՛ի սրբութե(ան)ց անտի մի́ կերիցէ մինչեւ սրբեսցի́։ Եւ որ մերձեսցի յա(մենայ)ն պղծութի(ւն)ս ոգւոյ, կամ այր յորմէ ելանիցէ́ արութի(ւն) սերման.

⁵կամ որ մերձենայցէ յա(մենայ)ն սողուն պիղծ՝ զոր պղծիցեն, կամ ՛ի մարդ որով պղծիցեն զնա ըստ ա(մենայ)ն պղծու(թ)ե(ան) ն(ո)ր(ա)։
⁶Անձն որ մերձենայցէ́ ՛ի ն(ո)ս(ա)՝ պի́ղծ լիցի մինչեւ ցերեկոյ։ եւ մի́ կերիցէ ՛ի սրբու(թ)ե(ան)ց անտի, եթէ ոչ լուանայցէ զմարմին իւր ջրով։
⁷եւ մտանիցէ արեգակն. սո́ւրբ լիցի, եւ ապա́ կերիցէ ՛ի սրբու(թ)ե(ան)ց անտի. զի հա́ց ն(ո)ր(ա) է այն։
⁸Զմեռելոտի եւ զգազանաբեկ մի́ ուտիցէ, պղծե́լ նմա նոքօք. զի ե́ս եմ տ(է)ր։
⁹Եւ պահեսցեն զպահպանու(թ)ի(ւն)ս իմ, զի մի́ ընդունիցին վ(ա)ս(ն) նոցա մեղս. եւ մեռանիցի́ն վ(ա)ս(ն) այնորիկ՝ եթէ պղծիցեն զն(ո)ս(ա). զի ե́ս եմ տ(է)ր որ սրբեմ զն(ո)ս(ա)։

¹⁰Եւ ա(մենայ)ն օտարազգի՝ մի́ կերիցէ զսրբութի(ւն)սն։ պանդուխտ քահանային եւ վարձկանն՝ մի́ կերիցեն ՛ի սրբութե(ան)ցն։
¹¹Բայց թէ քահանայն ստասցի ոգի ստացուածով արծաթոյ՝ նա́ կերիցէ ՛ի հացից անտի ն(ո)ր(ա)։ եւ ընտոծինք ն(ո)ր(ա)՝ կերիցե́ն ՛ի հացից անտի նորա։
¹²Եւ դուստր ա́ռն քահանայի, եթէ լինիցի ա́ռն այլազգւոյ, նա ՛ի պտղոյ սրբութե(ան)ցն մի́ կերիցէ։
¹³Եւ դուստր ա́ռն քահանայի, եթէ լինիցի այրի, կամ հանեալ. եւ զաւակ ո́չ իցէ նմա, եւ դառնայցէ անդրէն ՛ի տուն իւր հայրենի, ըստ մանկութե(ան) իւրում ՛ի հացից անտի հօր իւրոյ կերիցէ́։ եւ ա(մենայ)ն այլազգի՝ մի́ կերիցէ ՛ի նոցանէ։

¹⁴Եւ մարդ՝ որ յանգէտս կերիցէ զսրբու(թ)ի(ւն)սն, յաւելցէ́ ՛ի նոյն զհինգերորդ մասնն. եւ տացէ զսրբութի(ւն)ն ցքահանայն.
¹⁵եւ մի́ պղծեսցեն զսրբութի(ւն)ս սրբու(թ)ե(ան)ցն որդւոցն ի(սրաէ)լի, զոր զատուցին նոքա տ(եառ)ն։
¹⁶Եւ ածիցեն ՛ի վ(ե)ր(այ) իւրեանց անօրէնու(թ)ի(ւն) յանցանաց, ուտելով իւրեանց զսրբու(թ)ի(ւն)սն սրբու(թ)ե(ան)ցն. զի ե́ս եմ տ(է)ր՝ որ սրբեմ զն(ո)ս(ա)։
¹⁷Խօսեցաւ տ(է)ր ընդ մովսիսի՝ եւ ասէ։

¹⁸խօսեա́ց ընդ ահարոնի եւ ընդ որդիս ն(ո)ր(ա), եւ ընդ ա(մենայ)ն ժողովրդեան որդւոցն ի(սրաէ)լի՝ եւ ասասցե́ս ցնոսա։ Ա́յր ոք՝ յորդւոցն ի(սրաէ)լի, կամ յեկացն յարեցելոց ՛ի ն(ո)ս(ա) ՛ի մէջ ի(սրաէ)լի. որ մատուցանիցէ զպատարագս իւր ըստ ա(մենայ)ն խոստովանութե(ան)ց իւրեանց։ կամ ըստ ա(մենայ)ն կամաց իւրեանց՝ զորինչ մատուցանիցեն տ(եառ)ն յողջակէզ
¹⁹ընդունելի առ ՛ի ձէնջ, արո́ւ անարատ յանդւոց եւ յօդեաց եւ յայծեաց.
²⁰զա(մենայ)ն արատաւորն մի́ մատուցանիցեն տ(եառ)ն. զի ո́չ լիցի ընդունելի առ ՛ի ձէնջ։

²¹Եւ այր՝ որ մատուցանիցէ զպատարագս իւր ըստ ա(մենայ)ն խոստովանու(թ)ե(ան) իւրեանց, կամ ըստ ա(մենայ)ն կամաց իւրեանց զոհ փրկու(թ)ե(ան) տ(եառ)ն, ուխտեալ ո́ւխտ, կամ ըստ կամա́ց, կամ ՛ի տօնս ձեր, յանդւոց կամ յոդեաց, անարա́տ լինիցի յընդունելու(թ)ի(ւն). ա(մենայ)ն արատ մի́ լիցի ՛ի նմա։
²²Զկոյրն, կամ զկաղն, կամ զբեկն, կամ զլեզուատ, կամ զմարմառոտ, կամ զքոսոտ, կամ զերքոյնոտ, մի́ մատուցանիցեն զայն տ(եառ)ն, եւ յողջակէզ՝ ո́չ տայցէք ՛ի նոցանէ ՛ի սեղան տ(եառ)ն։
²³Զարջառ եւ զոչխար՝ զակընջատ, կամ զկրճատ՝ քե́զ արասցես ՛ի զենլիս եւ յուխտ քո մի́ լիցի ընդունելի։

²⁴Զթաղամսաւորն, եւ զմայլեալն, եւ զքածաւարոտն, եւ զհատեալն, մի́ մատուցանիցես տ(եառ)ն. եւ յերկրի ձերում մի́ առնիցէք։
²⁵Եւ ՛ի ձեռանէ այլազգւոյն մի́ մատուցանիցէք զպատարագս ա(ստուծո)յ ձերոյ, յա(մենայ)նէ յայնպիսեաց անտի. զի խեղութի(ւն)ք եւ արատք են ՛ի նոսա. եւ ո́չ լինիցի այն ընդունելի առ ՛ի ձէնջ։
²⁶Խօսեցաւ տ(է)ր ընդ մովսիսի՝ եւ ասէ։
²⁷Արջառ կամ ոչխար կամ այծ՝ յորժամ ծնանիցին, կացցէ́ զեւթն օր ընդ մարբն. եւ յօրէն ութերորդէ եւ անդր ընդունելի́ լիցի ՛ի պատարագ ընծայ տ(եառ)ն։
²⁸Զարջառ եւ զոչխար՝ եւ զծնունդս իւրեանց՝ մի մտուցանիցէք՝ ՛ի միում աւուր։
²⁹Եւ եթէ զոհեսցես զզոհ գոհու(թ)ե(ան) տ(եառ)ն. զընդունելիսն առ ՛ի ձէնջ զոհեսջիք։

³⁰՛Ի նմի́ն աւուր կերիցի, եւ մի́ թողուցուք ՛ի մսոյ անտի յա́յգ, զի ե́ս եմ տ(է)ր։
³¹Եւ պահեսջի́ք զպատուիրանս իմ, եւ արասջի́ք զնոսա. զի ես եմ տ(է)ր։
³²եւ մի́ պղծիցէք զանուն իմ ս(ուր)բ՝ զի ես եմ տ(է)ր. եւ սրբեցայց ՛ի մէջ որդւոցն ի(սրաէ)լի։ Ե́ս եմ տ(է)ր որ սրբեմ զձեզ։
³³որ հանի զձեզ յերկրէն եգիպտացւոց լինել ձեր ա(ստուա)ծ. ե́ս եմ տ(է)ր։

¹Խօսեցաւ տ(է)ր ընդ մովսիսի՝ եւ ասէ.
²խօսեա́ց ընդ որդիսդ ի(սրաէ)լի՝ եւ ասասցես ցն(ո)ս(ա). տօ́նս տ(եառ)ն զոր առնիցէք, կոչեցեալք եւ սուրբք՝ ա́յնք իցեն իմ տօնք։
³Զվեց օր գործեսցես զգործ. յաւուրն եւթներորդի, Շաբա́թ՝ հանգի́ստ անուանեալ սուրբ տ(եառ)ն. զա(մենայ)ն գործ մի́ գործիցէք, զի շաբաթ տ(եառ)ն է, յա(մենայ)ն բնակութե(ան) նոցա.
⁴զի ա́յն են տօնք տ(եառ)ն։ եւ նոքա անուանեալք են սո́ւրբք զորս անուանեցէք ՛ի տօնս ն(ո)ց(ա)։
⁵Յառաջնում ամսեանն ՛ի տասն եւ ՛ի չորս ամսոյն ՛ի մէջ երեկորեացն Զատիկ տ(եառ)ն։
⁶եւ յաւուրն հնգետասաներորդի նորին ամսոյ՝ տօն բաղարջակերաց տ(եառ)ն, զեւթն օր բաղա́րջ կերիջիք։

⁷Եւ օրն առաջին անուանեալ՝ սո́ւրբ եղիցի ձեզ. զա(մենայ)ն գործ սպասաւորու(թ)ե(ան) մի́ առնիցէք։
⁸եւ մատուսջիք ողջակէ́զս տ(եառ)ն. զեւթն օր՝ եւ օրն եւթներորդ՝ սուրբ կոչեցեալ լիցի ձեզ. զա(մենայ)ն գործ սպասաւորու(թ)ե(ան) մի́ գործիցէ́ք։
⁹Խօսեցաւ տ(է)ր ընդ մովսիսի՝ եւ ասէ.
¹⁰խօսեա́ց ընդ որդիսդ ի(սրաէ)լի՝ եւ ասասցես. յորժամ մտանիցէք յերկիրն զոր ես տա́ց ձեզ. իբրեւ հնձիցէք զհունձս ն(ո)ր(ա), բերիցէ́ք զորայն զպտուղ հնձոց ձերոց առ քահանայն։
¹¹եւ հանցէ́ զորայն առաջի տ(եառ)ն յընդունելութի(ւն) առ ՛ի ձէնջ։ Եւ ՛ի վաղիւ անդր յաւուրն առաջնում հանցէ զայն քահանայն։
¹²եւ արասցէ յաւուրն յորում մատուցանիցէ զորայն, ոչխա́ր անարատ տարեւոր յողջակէ́զ տ(եառ)ն։

¹³եւ զզոհն իւր երկուս տասանորդս նաշհւոյ զանգելոյ իւղով, զո́հ տ(եառ)ն ՛ի հոտ անուշից տ(եառ)ն. եւ նուէ́ր ն(ո)ր(ա) չորրորդ մասն դորակի գինւոյ.
¹⁴եւ պա́ն մի։ Եւ զա(մենայ)ն մուրկ փխրեալ մի́ ուտիցէք մինչեւ յաւուրն յորում մատուցանիցէք պատարագ տ(եառ)ն ա(ստուծո)յ ձերոյ. օրէ́ն յաւիտենական յազգս ձեր. յա(մենայ)ն բնակութե(ան) ձերում։
¹⁵Եւ համարեսջիք ձեզ ՛ի վաղուէ́ շաբաթուն յօրէ յորմէ մատուցանիցէք զորայ ուխտին, եւթն եւթներորդս բովանդակ թուիցես
¹⁶մինչեւ ցվաղիւն յետին եւթներորդին թուիցէք. Յիսուն օր, եւ մատուցանիցէք զոհ նոր տ(եառ)ն։

¹⁷՛ի բնակութ(են)է ձերմէ մատուցանիցէք պանս նուիրի. երկուս պանս յերկուց տասանորդաց լինիցի պա́ն մի. խմորեալք եփեսցին յառաջնոց արդեանց քոց տ(եառ)ն։
¹⁸Եւ մատուցանիցէք ընդ հացիցն եւթն որոջ անարա́տ տարեւորս, եւ զուարակ մի յանդւոց, եւ խոյս երկուս անարատս։ եւ եղիցին յողջակէ́զ տ(եառ)ն. եւ զոհք նոցա եւ նուէրք ն(ո)ց(ա)՝ զո́հ ՛ի հոտ անուշից տ(եառ)ն։
¹⁹Եւ առնիցէք նոխազ մի յայծեաց վ(ա)ս(ն) մեղաց, եւ երկուս գառինս տարեւորս ՛ի զոհ խաղաղականաց
²⁰ընդ պանից առաջնոց արմտեացն։ Եւ նուիրեսցէ́ զայն քահանայն նուէ́ր ընդ պանից առաջնոց տրմտեացն յանդիման տ(եառ)ն. հանդերձ երկո́ւ գառամբքն սրբեսցին տ(եառ)ն. քահանային որ մատուցանիցէ զայն՝ եղիցին։

²¹Եւ կոչեսջիք զօրն զայն անուանեալ եւ կոչեցեալ օր ա(ստուծո)յ, սո́ւրբ եղիցի ձեզ։ զա(մենայ)ն գործ սպասաւորութե(ան) մի́ գործիցէք ՛ի նմա. օրէն յաւիտենական եղիցի յազգս ձեր յա(մենայ)ն բնակու(թ)ե(ան) ձերում։
²²Եւ յորժամ հնձիցէք զհունձս երկրի ձերոյ. մի́ առհասարակ զնշխար հնձոց անդին քոյ ՛ի նհձել քում ամփոփեսցես. եւ զանկեալն ՛ի հնձոցն քոց մի́ ժողովեսցես. այլ աղքատին եւ պանդխտին քում թողուցուս զայն. զի ե́ս եմ տ(է)ր ա(ստուա)ծ ձեր։
²³Խօսեցաւ տ(է)ր ընդ մովսիսի՝ եւ ասէ.
²⁴խօսեա́ց ընդ որդիսն ի(սրաէ)լի՝ եւ ասասցես։ յամսեան եւթներորդի՝ որ օր մի իցէ ամսոյն, եղիցի ձեզ հանգի́ստ. Յիշատա́կ փողոց՝ կոչեցեալ ս(ուր)բ տ(եառ)ն։

²⁵զա(մենայ)ն գործ սպասաւորութե(ան) մի́ գործիցէք, եւ մատուցանիցէք ողջակէզ տ(եառ)ն։ Խօսեցաւ տ(է)ր ընդ մովսիսի՝ եւ ասէ։
²⁶՛Ի տասներորդում աւուր՝ ամսոյն եւթներորդի, որ օրն Քաւութե(ան) է, կոչեցեալ սո́ւրբ եղիցի ձեզ. եւ խոնարհեցուսջի́ք զանձինս ձեր յիններորդէ օրէ ամսեան յերեկորեայ. եւ մատուսջիք ողջակէզս տ(եառ)ն։
²⁷Զա(մենայ)ն գործ մի́ գործիցէք յաւուրն յայնմիկ, զի օր՝ քաւութե(ան) է նա ձեզ. քաւե́լ վ(ա)ս(ն) ձեր առաջի տ(եառ)ն ա(ստուծո)յ ձերոյ։
²⁸Ա(մենայ)ն անձն որ ո́չ խոնարհեսցի յաւուրն յայնմիկ, սատակեսցի́ ՛ի ժողովրդենէ իւրմէ։
²⁹եւ ա(մենայ)ն անձն որ գործիցէ գործ յաւուր յայնմիկ, կորիցէ́ անձն այն ՛ի ժողովրդենէ իւրմէ։

³⁰զա(մենայ)ն գործ՝ մի́ գործիցէք։ օրէ́ն յաւիտենական եղիցի յազգս ձեր, յա(մենայ)ն բնակու(թ)ե(ան) ձերում։
³¹Շաբա́թ շաբաթուց եղիցի ձեզ. եւ խոնարհեցուսջի́ք զանձինս ձեր յիններորդէ օրէ ամսեանն յերեկորեայ մինչեւ ցերեկոյն. շաբաթացուսջի́ք զշաբաթս ձեր։
³²Խօսեցաւ տ(է)ր ընդ մովսիսի՝ եւ ասէ.
³³խօսեա́ց ընդ որդիսդ ի(սրաէ)լի՝ եւ ասասցես. ՛ի հնգետասաներորդի աւուր ամսեանն եւթներորդի տօն Տաղաւարահարաց զեւթն օր տ(եառ)ն։
³⁴եւ օրն առաջին կոչեցեալ սո́ւրբ. զա(մենայ)ն գործ սպասաւորութե(ան) մի́ գործիցէք։

³⁵Զեւթն օր մատուցանիջիք ողջակէզս տ(եառ)ն. եւ օրն եւթներորդ կոչեցեալ, սո́ւրբ եղիցի ձեզ, եւ մատուցանիցէք ողջակէզ տ(եառ)ն. քանզի ե́լք են. զա(մենայ)ն գործ սպասաւորու(թ)ե(ան) մի́ գործիցէք։
³⁶Ա́յս են տօնք տ(եառ)ն՝ զորս կոչիցէք կոչեցեալ սո́ւրբս, առ ՛ի մատուցանելոյ ընծայս տ(եառ)ն, զողջակէզս եւ զզոհս իւրեանց, եւ նուէ́րս օրըստօրէ
³⁷առանց շաբաթուց տ(եառ)ն. եւ առանց ընծայիցն ձերոց, եւ առանց ա(մենայ)ն ուխտիցն ձերոց, եւ առանց կամայականաց ձերոց՝ զոր տայցէք տ(եառ)ն։

³⁸Եւ ՛ի հնգետասաներորդում աւուր ամսոյն եւթներորդի՝ յորժամ բովանդակիցէք զարդիւնս երկրին, տօնեսջի́ք տ(եառ)ն զեւթն օր։ յաւուրն առաջնում հանգի́ստ, եւ յաւուրն եւթներորդի հանգի́ստ։
³⁹Եւ առնուցուք ձեզ յաւուրն առաջնում պտուղս զգեղեցիկ ծառոց, եւ կողե́րս յարմաւենեաց, եւ ոստս ՛ի տերեւախիտ ծառոց եւ յուռեաց, եւ զոստս հագնեաց ՛ի ձորոց. ուրա́խ լինել առաջի տ(եառ)ն զեւթն օր։
⁴⁰Եւ տօնեսջի́ք զնա տօն տ(եառ)ն զեւթն օր տարւոյն. օրէ́ն յաւիտենական յազգս ձեր, յամսեանն եւթներորդի́ տօնեսջիք զնա։
⁴¹՛Ի տաղաւա́րս բնակեսջիք զեւթն օր. ա(մենայ)ն բնակքն ի(սրաէ)լի բնակեսցեն ՛ի տաղաւարս։

⁴²զի գիտասցեն ամենայն ազգք ձեր, թէ ՛ի տաղաւարս բնակեցուցի զորդիսդ ի(սրաէ)լի ՛ի հանե́լ ինձ զնոսա յերկրէն եգիպտացւոց. Ե́ս եմ տ(է)ր ա(ստուա)ծ ձեր։
⁴³Եւ պատմեաց մովսէս զտօնս տ(եառ)ն որդւոցն ի(սրաէ)լի։

¹Խօսեցաւ տ(է)ր ընդ մովսիսի՝ եւ ասէ։
²Պատուիրեա́ որդւոցն իսրայէլի. եւ առցեն քեզ եւղ ձիթենեաց սո́ւրբ խակակութ ՛ի լոյս. եւ այրիցի ճրա́գ հանապազորդ
³արտաքոյ վարագուրին ՛ի խորանին վկայու(թ)ե(ան). եւ լուցցէ́ զայն ահարոն եւ որդիք ն(ո)ր(ա), յերեկորեայ մինչեւ ցառաւօտ առաջի տ(եառ)ն անպակաս. օրէն յաւիտենական յազգս ձեր։
⁴՛Ի վերայ աշտանակին սրբոյ այրիցէ́ք զճրագունսն առաջի տ(եառ)ն մինչեւ ցառաւօտ։
⁵Եւ առնուցուք նաշի́հ, եւ առնիցէք զայն՝ երկոտասա́ն պան. յերկո́ւց տասանորդաց լինիցի պան մի։
⁶Եւ դնիցէք զն(ո)ս(ա) երկո́ւս նուէրս. վե́ց պան զմի նուէր ՛ի վ(ե)ր(այ) սեղանոյն սրբոյ առաջի տ(եառ)ն։

⁷եւ դիցես ՛ի վ(ե)ր(այ) նուիրին կնդրո́ւկ ս(ուր)բ՝ եւ աղ. եւ եղիցին ՛ի հաց յիշատակի զառաջաւոր տ(եառ)ն։
⁸Յաւուրն շաբաթուց դնիցէք առաջի տ(եառ)ն, հանապազորդ յորդւոցն ի(սրաէ)լի ո́ւխտ յաւիտենական։
⁹Եւ եղիցի ահարոնի եւ որդւոցն ն(ո)ր(ա), եւ կերիցեն զայն ՛ի սո́ւրբ տեղւոջ. զի սրբութի(ւն) սրբութե(ան)ց է այն նմա ՛ի զոհաւորա́ցն տ(եառ)ն՝ օրէ́ն յաւիտենական։
¹⁰Եւ ել որդի կնոջ ի(սրա)էլացւոյ, եւ նա́ էր որդի ա́ռն եգիպտացւոյ ՛ի մէջ որդւոցն ի(սրաէ)լի, եւ կռուեցան ՛ի բանակին։ Որ յի(սրա)էլացւոյ անտի էր. եւ ա́յր մի ի(սրա)էլացի,
¹¹եւ անուանեալ կնոջն ի(սրա)էլացւոյ զանունն՝ եւ անէծ։ եւ ածին զնա առ մովսէս. եւ անուն մօր նորա սաղամիթ՝ դուստր դաբրեայ, յազգէ դանայ։

¹²եւ արկին զնա ՛ի պահ, դատել հրամանաւ տ(եառ)ն։
¹³Եւ խօսեցաւ տ(է)ր ընդ մովսիսի՝ եւ ասէ.
¹⁴հանէ́ք զայրն որ անէծն՝ արտաքոյ բանակին. եւ դիցեն որք լուան՝ զձեռս իւրեանց ՛ի վ(ե)ր(այ) գլխոյ նորա, եւ քարկոծեսցե́ն զնա ա(մենայ)ն ժողովուրդն։
¹⁵Եւ ընդ որդիսն ի(սրաէ)լի խօսեսցիս եւ ասասցես ցնոսա. Ա́յր ոք այր՝ որ անիծանիցէ զա(ստուա)ծ, մե́ղս ընկալցի.
¹⁶զի անուանեաց զանուն տ(եառ)ն՝ մահո́ւ մեռցի. քարընկէցութ(եամ)բ քարկո́ծ արասցեն զնա ամենայն ժողովուրդն. եթէ պանդո́ւխտ իցէ՝ եւ եթէ բնակ, յանուանել ն(ո)ր(ա) զանուն տ(եառ)ն, սատակեսցի́։

¹⁷Եւ մարդ ոք՝ որ հարկանիցէ զա(մենայ)ն անձն մարդոյ՝ եւ մեռանիցի, մահո́ւ մեռանիցի եւ նա։
¹⁸Եւ որ հարկանէ զանասուն, ա́նձն ընդ անձին տուժեսցի։
¹⁹Եւ եթէ եղիցէ́ ոք զընկեր իւր. ո(ր)պ(էս) արարն՝ նոյնպէս արասցի նմա։
²⁰Բեկումն ընդ բեկման, ա́կն ընդ ական, ատամն ընդ ատաման. ո(ր)պ(էս) առնիցէ ոք զխեղու(թ)ի(ւն)՝ նո́յնպէս հատուսցի նմա։
²¹Եւ որ հարկանէ զմարդ՝ եւ մեռանիցի, մահո́ւ մեռանիցի եւ նա́։
²²իրաւունք՝ մի եւ նո́յն կացցեն, եկին, եւ բնակին. զի ե́ս եմ տ(է)ր ա(ստուա)ծ ձեր։

²³Եւ խօսեցաւ մովսէս ընդ որդիսն ի(սրաէ)լի եւ հանին զայրն որ անէծն՝ արտաքոյ բանակին. եւ քարկոծ արարին զնա՝ ա(մենայ)ն ժողովուրդն քարամբք. եւ որդիքն ի(սրաէ)լի արարին՝ ո(ր)պ(էս) պատուիրեաց տ(է)ր մովսիսի։

¹Խօսեցաւ տ(է)ր ընդ մովսիսի՝ ՛ի լերինն սինայ՝ եւ ասէ։
²խօսեա́ց ընդ որդիսն ի(սրաէ)լի՝ եւ ասասցես ցն(ո)ս(ա)։ Եթէ մտանիցէք յերկիրն զոր ես տա́ց ձեզ, եւ հանգչիցի́ երկիրն զոր տաց ձեզ. զի շաբա́թ տ(եառ)ն է։
³զվե́ց ամ վարեսցես զա́նդ քո, եւ զվե́ց ամ յատցես զայգի քոյ, եւ ժողովեսցե́ս զպտուղ նորա.
⁴Յամին եւթներորդի շաբաթ հանգիստ եղիցի երկրին. զի շաբաթ տ(եառ)ն է. զանդ քո ո́չ վարեսցես, եւ զայգի քո ո́չ յատցես.
⁵եւ զինքնեակն անդոյ քոյ որ գայցէ՝ ո́չ հնձեսցես, եւ զխաղող սրբութե(ա)ն քոյ ո́չ կթեսցես. զի ա́մ հանգստեան է այն երկրին։

⁶Եւ եղիցի շաբա́թ երկրին ձերոյ, կերակուր՝ ձե́զ, եւ ծառային քում, եւ աղախնո́յ քում, եւ վարձակին քում, եւ պանդխտին յեցելոյ ՛ի քեզ.
⁷եւ անասնոյ քում, եւ գազանաց որ իցեն յերկրին քում. եղիցի ա(մենայ)ն բերն նորա՝ ՛ի կերակուր։
⁸Եւ թուեսցե́ս դու քեզ եւթն հանգիստ ամաց, եւ եւթն ամ եւթնեկին. եւ եղիցին եւթն եւթներորդքն ամաց՝ քառասուն եւ ինն ամ։
⁹Եւ ա́զդ առնիցէք բարբառով փողոյ յա(մենայ)ն երկրին ձերում, յամսեանն եւթներորդի՝ որ օր տասն իցէ ամսոյն. յաւուրն քաւութե(ան) ա́զդ արասջիք փողով ընդ ամենայն երկիրն ձեր։

¹⁰Եւ սրբեսջի́ք զամն յիսներորդ տարւոյն, եւ քարոզեսջի́ք թողութի(ւն) ՛ի վերայ երկրին՝ ամենայն բնակչաց ն(ո)ր(ա). զի տարի թողու(թ)ե(ա́ն) եղիցի ձեզ այն ազդեցու(թ)ի(ւն)։ Եւ դարձցի́ իւրաքանչիւրոք ՛ի ստացուածս իւր, եւ իւրաքանչիւրոք յա́զգ իւր երթիցէ.
¹¹զի թողութե(ան) ազդեցութի(ւն) է այն։ Ամն յիսներորդ՝ եղիցի ձեզ տարեկա́ն. մի́ սերմանիցէք, եւ մի́ հնձիցէք զինքնեակս ն(ո)ր(ա)՝ որ ելանիցեն. եւ մի́ կթիցէք զսրբեցեալս ն(ո)ր(ա).
¹²զի թողութե(ան) ազատութի(ւն) է, սո́ւրբ լինիցի ձեզ. ՛ի դաշտա́ց կերիջիք զարմտիսն ն(ո)ր(ա)։
¹³Յամին ազդեցու(թ)ե(ան) թողու(թ)ե(ան) ն(ո)ր(ա)՝ դարձցի́ իւրաքանչիւրոք ՛ի ստացուած իւր։

¹⁴Ապա թէ վաճառեսցէ ոք վաճառ ընկերի իւրում, եւ ստասցի́ յընկերէ իւրմէ, մի́ նեղեսցէ այր զընկեր իւր.
¹⁵Ըստ թուոյ ամացն յետ ազդեցու(թ)ե(ա)ն. ստասցի յընկերէ իւրմէ ը(ս)տ թուոյ ամաց արմտեացն վաճառեսցի քեզ.
¹⁶ըստ յաճախելոյ արմտեացն յաճախեսցէ զստացուածն իւր. եւ ը(ս)տ պակասելոյ ամա́ցն պակասեցուսցէ զստացուածսն իւր. զի ըստ թուոյ արդեանցն վաճառեսցէ զնա քեզ։
¹⁷մի́ նեղեսցէ այր զընկեր իւր։ Եւ երկնչիցի́ս ՛ի տն(թեն)է ա(ստուծո)յ քումմէ. ե́ս եմ տ(է)ր ա(ստուա)ծ ձեր։
¹⁸Եւ արասջի́ք զա(մենայ)ն իրաւունս իմ, եւ զա(մենայ)ն դատաստանս իմ. եւ պահեսջի́ք եւ արասջիք զն(ո)ս(ա). եւ բնակեսջի́ք յերկրին յուսով։

¹⁹եւ տացէ́ երկիրն զբերս իւր, եւ կերիջիք ցյա́գ. եւ բնակեսջի́ք ՛ի նմա վստահութ(եամ)բ։
²⁰Ապա թէ ասիցէք՝ զի՞նչ կերիցուք յամին եւթներորդի յայնմիկ, եթէ ո́չ սերմանիցեմք՝ եւ ո́չ ժողովիցեմք զարմտիս մեր։
²¹Առաքեցի́ց զօրհնութի(ւն)ս իմ ՛ի ձե́զ յամին վեցերորդի. եւ արասցէ զարդիւնս իւր երի́ց ամաց.
²²եւ սերմանեսջի́ք յամին ութերորդի. եւ կերիջիք զհին արդեանցն մինչեւ ցամն իններորդ. մինչեւ գայցեն արմտիք ն(ո)ր(ա), կերիջիք հին ՛ի հնոյ։
²³Եւ երկիրն ո́չ վաճառեսցի ՛ի հաստատութի(ւն). զի ի́մ է երկիրն. քանզի պանդուխտք եւ նժդե́հ էք դուք առաջի իմ։
²⁴եւ ըստ ա(մենայ)ն երկրին կալուածոյ ձերոյ՝ փրկա́նս տաջիք երկրին։

²⁵Եւ եթէ աղքատասցի եղբայր քո որ ընդ քե́զ իցէ, եւ վաճառեսցէ́ ՛ի կալուածոց իւրոց. եւ եկեսցէ մերձաւորիչն՝ որ մերձաւո́ր իցէ նորա, եւ փրկեսցէ́ զվաճառ եղբօր իւրոյ։
²⁶Ապա թէ չիցէ́ ուրուք մերձաւորիչ, եւ ձեռնհա́ս իցէ. եւ գտանիցի նմա բաւական փրկանացն իւրոց.
²⁷եւ համարիցի զամս վաճառին իւրոյ, եւ հատուսցէ կարողն ա́չնն որում վաճառեա́ց նմա, եւ դարձցի́ ՛ի կալուածս իւր։
²⁸Ապա թէ ո́չ գտցի ՛ի ձեռին նորա բաւականն՝ առ ՛ի հատուցանելոյ նմա. եղիցի վաճառ ն(ո)ր(ա) ա́յնմ որ ստացաւն զնա մինչեւ յամն թողութե(ան)։ եւ ելցէ յամին թողութե(ան), եւ դարձցի́ անդրէն ՛ի կալուածս իւր։

²⁹Եւ եթէ վաճառեսցէ ոք տո́ւն բնակութե(ան) ՛ի պարսպաւո́ր քաղաքի. եղիցին փրկանք ն(ո)ր(ա) մինչեւ ՛ի կատարել տարւոյն աւուրցն վաճառի նորա. օրաթուի́ լինիցին փրկանքն ն(ո)ր(ա)։
³⁰Ապա թէ ո́չ փրկիցի՝ մինչեւ լնուցու ն(ո)ր(ա) տարին ողջոյն, հաստատեսցի́ տունն որ իցէ ՛ի պարսպաւո́ր քաղաքի հաստատու(թեամ)բ ստացողին իւրոյ յազգս իւր. եւ ելցէ ՛ի թողու(թ)ե(ա)ն։
³¹Իսկ տո́ւնք, որ յաւա́նս իցեն, որոց պարիսպ ո́չ իցէ շուրջանակի, ընդ ա́նդս երկրի համարեսցին, եւ հանապազ ընդ փրկանօք լիցին. եւ ՛ի թողու(թ)ե(ա)ն ելցե́ն։
³²Եւ ՛ի քաղաքս ղեւտացւոց տունք, որ ՛ի քաղաքս կալուածոց ն(ո)ց(ա) իցեն, ընդ փրկանօք լինիցին հանապազ որ ՛ի մէջ ղեւտացւոցն իցէ։

³³Եւ որոք փրկեսցէ ՛ի ղեւտացւոց անտի, ելցէ վաճառ տա́նց քաղաքաց կալուածոցն ն(ո)ց(ա) ՛ի թողութե(ա)ն. զի տունք քաղաքացն ղեւտացւոցն կալուածք ն(ո)ց(ա) են ա́յն ՛ի մէջ որդւոցն ի(սրաէ)լի։
³⁴Եւ ագարակք զատուցեալք ՛ի քաղաքս ն(ո)ց(ա)՝ մի́ վաճառեսցին. զի կալուած յաւիտենական է այն ն(ո)ց(ա)։
³⁵Եւ եթէ աղքատանայցէ եղբայր քո եւ տկարանայցէ ձեռօք՝ առ քե́զ պատսպարեսցես զնա, իբրեւ զե́կն եւ զպանդուխտն. եւ կեցցէ́ եղբայրն քո՝ ոե ընդ քեզն իցէ։
³⁶Մի́ առնուցուս ՛ի նմանէ վա́շխ եւ տոկոսիս. եւ երկնչիցի́ս ՛ի տ(թեն)է ա(ստուծո)յ քումմէ, զի ե́ս եմ տ(է)ր, եւ կեցցէ́ եղբայր քո ընդ քեզ։

³⁷զարծաթ քո մի́ տացես նմա ընդ տոկոսեօք, եւ զկերակուր քո մի́ տացես նմա ը(ստ) շարիատիւ։
³⁸Ե́ս եմ տ(է)ր ա(ստուա)ծ ձեր, որ հանի զձեզ յերկրէն եգիպտացուց, տա́լ ձեզ զերկիրն քանանացւոցն, առ ՛ի լինելոյ ձեր ա(ստուա)ծ։
³⁹Եւ եթէ տնանկասցի́ եղբայր քո որ ը(ստ) քեզ՝ եւ վաճառեսցի́ քեզ, մի́ ծառայեսցէ քեզ զծառայութի(ւն) ստրկի,
⁴⁰իբրեւ զվարձկան։ իբրեւ զպանդո́ւխտ եղիցի քեզ. մինչեւ յա́մն թողութե(ան) գործեսցէ առ քեզ։
⁴¹Եւ ելցէ́ ՛ի թողու(թ)ե(ա)ն ինքն եւ որդիք իւր ընդ իւր, եւ դարձցի́ յազգ իւր, եւ ՛ի հայրենի́ կալուածս իւր երթիցէ։
⁴²Զի ծառայք ի́մ են ն(ո)ք(ա) զորս եւ հանի յերկրէն եգիպտացւոց. մի́ վաճառեսցին ՛ի վաճառ ստրկի.

⁴³եւ մի́ տառապեցուսցես զնա ընդ աշխատութ(եամ)բ. եւ երկնչիցի́ս ՛ի տ(թեն)է ա(ստուծո)յ քումմէ։
⁴⁴Եւ ծառայ՝ կամ աղախին որչափ եւ լինիցին քեզ յազգացն որ շուրջ զքեւն իցեն, ՛ի նոցանէ ստասջի́ք.
⁴⁵եւ յորդւոց պանդխտացն՝ որ ՛ի միջի́ ձերում իցեն, ՛ի նոցանէ́ ստանայցէք, եւ յազգականա́ց ն(ո)ց(ա) որչափ ինչ լինիցին յերկրին ձերում՝ եղիցին ձեզ ՛ի կալուածս.
⁴⁶եւ բաժանեսջի́ք զն(ո)ս(ա) որդւոց ձերոց յետ ձեր, եւ եղիցին ձեզ ստրո́ւկք յաւիտեան։ Բայց յեղբարց ձերոց յորդւոցն ի(սրաէ)լի՝ իւրաքանչի́ւրոք զեղբայր իւր մի́ տառապեցուցանիցէք աշխատութ(եամ)բ։

⁴⁷Եւ եթէ բաւակա́ն իցէ ձեռն եկին եւ պանդխտին որ առ քեզ իցէ. եւ չքաւորեա́լ եղբայր քո վաճառեսցի եկի́ն կամ պանդխտի որ առ քեզ իցէ՝ անդէն ծնելոյ պանդխտին։
⁴⁸Յե́տ վաճառելոյն ն(ո)ր(ա) փրկա́նք լինիցին նմա։ մի́ ոք՝ որ եւ իցէ յեղբարց իւրոց՝ փրկեսցէ́ զնա։
⁴⁹եղբա́յր հօր՝ կամ որդի հօրեղբօր փրկեսցէ զնա. կամ ոք յընտանեա́ց մարմնոյ իւրոյ ՛ի ցեղէ́ իւրմէ փրկեսցէ զնա։ Ապա թէ ի́ւր իսկ զձեռամբ իցէ՝ ինքնին փրկեսցէ զանձն.
⁵⁰եւ համարեսցի́ ընդ ստացողին իւրոյ, յամէ անտի յորմէ վաճառեցաւ նա մինչեւ ցա́մն թողութե(ան). եւ եղիցի արծաթ գնոց ն(ո)ր(ա) իբրեւ վարձկանի. ա́մ յամէ որչափ իցէ́ ընդ նմա։

⁵¹Եւ եթէ աւելի́ եւս քան զայն ամս կայցէ, տացէ́ զփրկանս իւր յարծաթոյ ստացուածոյն իւրոյ։
⁵²Եւ եթէ սակա́ւ ինչ կայցէ յամաց անտի մինչեւ ցամն թողութե(ան). համարեսցի́ իւր ըստ ամացն իւրոց, եւ տացէ զփրկանս իւր
⁵³իբրեւ զվարձկան ա́մ յամէ, որչափ եւ իցէ́ ընդ նմա. եւ մի́ տառապեցուցանիցէ զնա աշխատու(թեամ)բ առաջի քո։
⁵⁴Ապա թէ ո́չ փրկեսցէ զնա ը(ս)տ այսմ օրինակի, ելցէ́ յամին թողութե(ան), ինքն եւ որդիք իւր ընդ նմա։
⁵⁵զի ի́մ են որդիքն ի(սրաէ)լի ստրուկք. ծառայք ի́մ են, զորս հանի յերկրէն եգիպտացւոց։

¹Ե́ս եմ տ(է)ր ա(ստուա)ծ ձեր։
²Զշաբաթս իմ պահեսջի́ք, եւ ՛ի սրբու(թ)ե(ան)ց իմոց երկնչիջի́ք. զի ե́ս եմ տ(է)ր։
³Եթէ ըստ հրամանաց իմոց գնայցէք, եւ զպատուիրանս իմ պահիցէք, եւ առնիցէք զնոսա՝ Տա́ց ձեզ անձրեւ ՛ի ժամանակի իւրում.
⁴եւ երկիրն տացէ́ զարմտիս իւր. եւ ծա́ռք դաշտաց տացեն զպտուղս իւրեանց։
⁵Եւ հասցեն ձեր կա́լք ՛ի կութս, եւ կո́ւթք ՛ի սերմանս հասանիցեն ձեր. եւ կերիջի́ք զհաց ձեր ցյա́գ, եւ բնակեսջի́ք անհոգու(թեամ)բ յերկրին ձերում։
⁶Եւ տաց խաղաղու(թ)ի(ւն) յերկրին ձերում. եւ պատերազմ մի́ անցցէ ընդ երկիր ձեր. եւ ննջիցէ́ք, եւ ո́չ ոք իցէ որ զարհուրեցուցանիցէ զձեզ. եւ կորուսի́ց զգազանս չա́րս յերկրէ ձերմէ.

⁷եւ հալածեցից զթշնամիս ձեր, եւ անկանիցի́ն առաջի ձեր սպանմամբ։
⁸Եւ հալածիցեն ՛ի ձէնջ հինգք զհարիւրս. եւ հարիւրք ՛ի ձէնջ հալածեսցեն զբե́ւրս, եւ անկանիցին թշնամիք ձեր առաջի ձեր սրո́վ։
⁹Եւ հայեցա́յց ՛ի ձեզ. եւ աճեցուցի́ց զձեզ, եւ բազմացուցի́ց զձեզ. եւ հաստատեցի́ց զուխտ իմ ՛ի ձեզ։
¹⁰եւ կերիջի́ք զհին՝ եւ զհնո́յ հին. եւ զհինն յերեսաց նորոյն հանիջի́ք ՛ի բաց։
¹¹Եւ հաստատեցի́ց զուխտ իմ ՛ի ձեզ. եւ ո́չ գարշեսցի անձն իմ ՛ի ձէնջ։
¹²եւ գնացի́ց ՛ի ձեզ, եւ եղէց ձեր ա(ստուա)ծ. եւ դուք եղիջիք ինձ ՛ի ժողովուրդ։

¹³Ե́ս եմ տ(է)ր ա(ստուա)ծ ձեր՝ որ հանի զձեզ յերկրէն եգիպտացւոց, մինչ էիք դուք ծառայք. եւ խղեցի́ զկապանս լծոյն ձերոյ, եւ ածի զձեզ համարձակութ(եամ)բ։
¹⁴Ապա թէ ոչ լսիցէք ինձ, եւ ո́չ առնիցէք զա(մենայ)ն հրամանս իմ զայսոսիկ,
¹⁵այլ հեստիցէ́ք սոցա. եւ յիրաւանց իմոց տաղտկանայցեն անձինք ձեր, առ ՛ի չառնելո́յ ձեզ զա(մենայ)ն զպատուիրանս իմ, եւ ցրելո́յ զուխտն իմ։
¹⁶Արարից նո́յնպէս եւ ե́ս ձեզ. հաստատեցից ՛ի վ(ե)ր(այ) ձեր տագնապաւ տարակուսա́նս, զքո́ս եւ զդալուկն. որ՝ սորեցուցանիցեն զաչս ձեր, եւ հաչիցէք յանձինս ձեր. եւ սրմանիջիք ՛ի սնոտիս զսերմանիս ձեր. եւ զայն հակառակո́րդք ձեր կերիցեն։

¹⁷Հաստատեցի́ց զերեսս իմ ՛ի ձեզ. եւ անկանիջի́ք առաջի թշնամեաց ձերոց. եւ հալածեսցեն զձեզ ատելիք ձեր. եւ լինիջի́ք փախստեա́յք առանց ուրուք հալածելոյ զձեզ։
¹⁸Եւ եթէ տակաւին ո́չ լսիցէք ինձ՝ յաւելից խրատել զձեզ եւթնպատի́կ ՛ի վ(ե)ր(այ) մեղացն ձերոց։
¹⁹եւ խորտակեցից զհպարտու(թ)ի(ւն) ամբարտաւանու(թ)ե(ան)ց ձերոց. եւ արարից ձեզ զերկինս երկաթի, եւ զերկիր ձեր իբրեւ պղնձի́։
²⁰եւ եղիցի ընդունայն զօրու(թ)ի(ւն)դ ձեր. եւ մի́ տացէ երկիր ձեր զսերմանիս իւր, եւ մի́ ծառ վայրաց տացէ զպտուղ իւր։
²¹Եւ եթէ տակաւին գնայցէք դուք խոտորնա́կս, եւ ո́չ կամիցիք լսե́լ ինձ. յաւելի́ց ձեզ հարուածս եւթնպատիկ ըստ անօրէնու(թ)ե(ան) ձերում։

²²եւ առաքեցից ՛ի վ(ե)ր(այ) ձեր գազա́նս չարս երկրի, եւ կերիցե́ն զձեզ, եւ սատակեսցեն զանասունս ձեր։ եւ նուազո́ւնս արարից զձեզ. եւ կուրասցին ճանապարհք ձեր։
²³Ապա թէ այնո́ւ եւս ոչ խրատիցիք. այլ տակաւին խոտորնա́կս գնայցէք ընդիս.
²⁴գնացից եւ ես ը(ստ) ձեզ բարկու(թեամ)բ խոտորնակս. եւ հարի́ց զձեզ եւթնպատիկ փոխանակ մեղաց ձերոց։
²⁵եւ սատակեցի́ց զձեզ սրով, խնդրել զվրէժ ուխտին։ եւ թէ ամրանայցէք ՛ի քաղաքս ձեր, առաքեցից մա́հ ՛ի ձեզ. եւ մատնեսջիք ՛ի ձեռս թշնամեաց։
²⁶՛Ի նեղել զձեզ ռոճկաւ հացի, եփեսցեն տա́սն կին զհացն ձեր ՛ի միում թոնրի, եւ տացեն զհացն ձեր կշռո́վ. եւ կերիջիք եւ մի́ յագիջիք։

²⁷Եւ եթէ այնու ո́չ եւս լուիցէք ինձ. այլ գնայցէք ընդիս խոտորնակս.
²⁸եւ ե́ս գնացից ընդ ձեզ բարկութ(եամ)բ խոտորնակս։ Եւ խրատեցի́ց զձեզ եւթնպատիկ ըստ մեղաց ձերոց.
²⁹եւ կերիջիք զմարմինս ուստերաց եւ դստերաց ձերոց,
³⁰եւ կործանեցի́ց զարձանս ձեր. եւ աւերեցի́ց զփայտեղէն ձեռագործս ձեր. եւ արկից զդիս ձեր զդիակամբք կռոց ձերոց. եւ գարշեսցի́ անձն իմ ՛ի ձէնջ։
³¹Եւ արարից զքաղաքս ձեր աւերա́կս, եւ թափո́ւր արարից զսրբութի(ւն)ս ձեր. եւ ո́չ հոտոտեցայց ՛ի հոտ զոհից ձերոց։
³²եւ աւերեցի́ց զերկիրն ձեր. եւ զարմասցի́ն ընդ նա թշնամիքն ձեր, որ բնակեալ իցեն ՛ի նմա։

³³Եւ ցրեցի́ց զձեզ ընդ ազգս. եւ սատակեսցէ́ զձեզ սուրն եկեալ ՛ի վ(ե)ր(այ). եւ եղիցի երկիրն ձեր աւերա́կ, եւ քաղաքքն ձեր թափո́ւրք։
³⁴Յայնժամ հաճեսցի́ երկիրն ընդ շաբաթս իւր զա(մենայ)ն աւուրս աւերածոյն իւրոյ.
³⁵եւ դուք եղիջիք յերկրին թշնամեաց ձերոց յերկի́ր օտար։ Յայնժամ շաբաթասցի́ երկիրն ձեր, եւ հաճեսցի ը(ստ) շաբաթս իւր զա(մենայ)ն աւուրս աւերածոյն իւրոյ. եւ շաբաթասցի զշաբաթսն զոր ո́չ շաբաթացաւ ՛ի շաբաթս ձեր, ՛ի ժամանակի յորում բնակէիքն ՛ի նմա։

³⁶Եւ ՛ի վ(ե)ր(այ) մնացելոցն ՛ի ձէնջ ածից դողո́ւմն ՛ի սիրտս ն(ո)ց(ա) յերկրին թշնամեաց իւրեանց. եւ հալածեսցէ́ զն(ո)ս(ա) ձայն տերեւոյ խարխափելոյ. եւ փախիցեն ո(ր)պ(էս) փախչիցին ՛ի պատերազմէ. եւ անկանիցի́ն առանց ուրուք հալածելոյ։
³⁷Եւ թողցէ́ եղբայր զեղբայր իւր իբրեւ ՛ի պատերազմի՝ առանց ուրուք զհետ մտանելոյ. եւ ո́չ կարիցէք ընդդէմ դառնալ թշնամեաց ձերոց։
³⁸եւ կորնչիցիք ՛ի մէջ ազգաց. եւ կերիցէ́ զձեզ երկիրն թշնամեաց ձերոց։
³⁹Եւ մնացեալքն ՛ի ձէնջ սատակեսցի́ն վ(ա)ս(ն) մեղաց իւրեանց յերկրի́ թշնամեաց իւրեանց. եւ վ(ա)ս(ն) մեղաց հա́րց իւրեանց՝ որ ը(ստ) նոսա մաշեսցին։

⁴⁰Եւ խոստովա́ն լիցին զմեղս իւրեանց եւ զհա́րց իւրեանց, զի յանցեան, եւ արհամարհեցին զիս։ եւ զի գնացին առաջի իմ խոտորնա́կս.
⁴¹եւ ես գնացի́ց ընդ ն(ո)ս(ա) բարկու(թեամ)բ խոտորնակս, եւ կորուսի́ց զն(ո)ս(ա) յերկրի թշնամեաց իւրեանց։ յայնժամ ամաչեսցէ́ սիրտ նոցա անթլփատ. եւ յայնժամ հաճեսցի́ն ընդ մեղս իւրեանց։
⁴²Եւ յիշեցի́ց զուխտն յակոբայ, եւ զուխտն իսահակայ, եւ զուխտն աբրահամու յիշեցի́ց. եւ զերկիրն յիշեցից։

⁴³եւ երկիրն լքցի́ ՛ի ն(ո)ց(ա)է։ յայնժամ ընկալցի երկիրն զշաբաթս իւր, յաւերել ն(ո)ր(ա) վ(ա)ս(ն) ն(ո)ց(ա). եւ ն(ո)ք(ա) ընկալցի́ն զանօրէնու(թ)ի(ւն)ս իւրեանց. փոխանակ զի զիրաւունս իմ արհամարհեցին, եւ ՛ի հրամանաց իմոց տաղտկացաւ անձն ն(ո)ց(ա)։
⁴⁴Եւ ես՝ մինչդեռ էին յերկրի թշնամեացն իւրեանց, ո́չ արարի զն(ո)ս(ա) անտես. եւ ո́չ տաղտկացայ նոքօք առ ՛ի սատակելոյ զն(ո)ս(ա)՝ ցրե́լ զուխտ իմ որ ընդ ն(ո)ս(ա). զի ե́ս եմ տ(է)ր ա(ստուա)ծ ն(ո)ց(ա)։

⁴⁵Եւ յիշեցի́ց զառաջին ուխտն ն(ո)ց(ա), յորժամ հանի զն(ո)ս(ա) յերկրէն եգիպտացւոց ՛ի տանէ ծառայութե(ան). առաջի ա(մենայ)ն ազգաց՝ լինել ն(ո)ց(ա) ա(ստուա)ծ. զի ես եմ տ(է)ր։ Ա́յս են իրաւունք եւ հրամանք՝ եւ օրէնք, զոր ետ տ(է)ր ՛ի մէջ իւր՝ եւ ՛ի մէջ որդւոցն ի(սրաէ)լի ՛ի լերինն սինայ՝ ՛ի ձեռն մովսիսի։

¹Խօսեցաւ տ(է)ր ընդ մովսիսի՝ եւ ասէ։
²խօսեա́ց ընդ որդիսն ի(սրաէ)լի՝ եւ ասասցե́ս ցնս։ Որ ոք ուխտեսցէ ուխտս, տալ զգինս անձին իւրոյ տ(եառ)ն.
³եղիցին գի́նք արուի ՛ի քսանամենից մինչեւ զվաթսնամեանս. եղիցի դինք ն(ո)ր(ա) յիսուն երկդրամեան արծաթոյ ըստ սրբու(թ)ե(ան) սկեղն։
⁴եւ եգին՝ լիցի́ն գինք՝ երեսուն երկդրամեան։
⁵Ապա թէ ՛ի հինգամենից մինչեւ ցքսան ամսն լինիցին՝ գինք արուին՝ քսան երկդրամեան, եւ եգին՝ տասն երկդրաման։
⁶Եւ յամսօրէից մինչեւ ցհինգեմեանս՝ եղիցի արուին՝ հինգ երկդրամեան արծաթոյ, եւ եգին՝ երեք երկդրամեանք արծաթոյ։

⁷Ապա թէ ՛ի վաթսնամենից եւ ՛ի վե́ր իցէ. եթէ արու իցէ, եղիցին գինք ն(ո)ր(ա) հնգետասան երկդրամեան արծաթոյ. եւ իգին՝ տա́սն երկդրամեան։
⁸Ապա թէ աղքա́տ իցէ ՛ի գնոցն. կացցէ́ առաջի քահանային, եւ հատցէ́ նմա քահանայն գին։ եւ որչափ ինչ ՛ի կարի իցէ ՛ի ձեռին ուխտաւորին՝ արկցէ́ նմա գինս քահանայն։
⁹Եւ եթէ յանասնոց մատուցանելեա́ց տ(եառ)ն իցէ պատարագն. որչափ ինչ տացէ ՛ի ն(ո)ց(ա)է տ(եառ)ն սո́ւրբ լիցի։
¹⁰եւ մի́ փոխանակեսցէ զլաւն ընդ յոռւոյն, եւ մի́ զյոռին ընդ լաւին։ ապա թէ փոխանակելո́վ փոխանակեսցէ զայն անասուն ընդ անասնոյ, եղիցի եւ ա́յն փոխանակն սո́ւրբ։

¹¹Ապա թէ յա(մենայ)ն անասնոց անսրբո́ց իցէ՝ յորոց ո́չ մատչիցի պատարագ տ(եառ)ն. կացուսցէ́ զանասունն առաջի քահանային։
¹²եւ արկցէ́ նմա գինս քահանայն ՛ի մէջ լաւին եւ յոռւոյն. եւ որպէս զիարդ արկցէ́ նմա գինս քահանայն՝ ա́յն կացցէ։
¹³Իսկ եթէ փրկելով փրկեսցէ զնա. եւ զհինգերորդ մասն գնո́ց նորա յաւելցէ ՛ի նոյն։
¹⁴Եւ մարդ ոք՝ որ սրբեսցէ զտուն իւր սրբութի(ւն) տ(եառ)ն, արկցէ́ նմա գինս քահանայն ՛ի մէջ լաւին եւ յոռւոյն. եւ որպէս զիարդ արկցէ́ նմա գինս քահանայն, նո́յն կացցէ։
¹⁵Ապա թէ որ սրբեացն զնա՝ փրկեսցէ́ զտուն իւր, յաւելցէ́ եւ զհինգերորդ մասն արծաթոյ գնոց ն(ո)ր(ա) ՛ի նոյն. եւ նմա́ իսկ եղիցի։

¹⁶Եւ եթէ յանդոյ կալուածոց իւրոց սրբեսցէ ոք ինչ տ(եառ)ն, եղիցին գինք ն(ո)ր(ա) ըստ սերման իւրում։ քոռի միոջ գետնոյ եղիցի յիսուն երկդրամեան արծաթոյ։
¹⁷Եւ եթէ յամէ թողու(թ)ե(ա)ն սրբեսցէ զանդն իւր. ըստ գնոցն որչափ ինչ իցեն, կացցէ։
¹⁸Ապա թէ յետ թողութե(ա)ն սրբեսցէ զանդն իւր. համարեսցի́ նմա քահանայն զարծաթն յա́յլ եւս ամսն՝ մինչեւ ցտարին թողու(թ)ե(ան). եւ հատցէ́ փոքր ինչ ՛ի գնոց անտի նորա։
¹⁹Ապա թէ փրկեսցէ զանդն որ սրբեացն զնա, յաւելցէ́ զհինգերորդ մասն արծաթոյ ՛ի գինս իւր. եւ նորա́ իսկ լիցի։
²⁰Ապա թէ ոք փրկեսցէ զանդն իւր, եւ վաճառեսցէ́ զանդն իւր այլո́ւմ մարդոյ. մի́ եւս փրկեսցի́.

²¹այլ եղիցի անդն ելեալ՝ ՛ի թողու(թ)ե(ա)ն սո́ւրբ տ(եառ)ն, իբրեւ զերկիր մի զատուցեալ՝ քահանա́յին եղիցի ՛ի կալուած։
²²Ապա թէ յանդոյ զոր գնեալ իցէ, եւ չիցէ́ յիւրոց կալուածոց՝ սբեսցէ տ(եառ)ն,
²³հաշուեսցի́ ընդ նմա քահանայն ՛ի գնոցն մինչեւ ցտարին թողութե(ան). եւ տացէ զգինսն յաւուր յայնմիկ սրբութի(ւն) տ(եառ)ն։
²⁴Եւ յամին թողու(թ)ե(ան) դարձցի անդն՝ անդրէն առ ա́յրն յորմէ ստացեալ իցէ. որոյ ի́ւր իսկ էր կալուած երկրին։
²⁵Եւ ա(մենայ)ն գինքն եղիցին ըստ սրբութե(ան) կշռոցն. քսա́ն գանգ լիցի երկդրամեանն։
²⁶Եւ ա(մենայ)ն անդրանիկ որ ծնանիցի ՛ի խաշանց քոց՝ տ(եառ)ն լիցի. եւ մի́ ոք փրկեսցէ զայն. եթէ արջա́ռ իցէ, եւ եթէ ոչխար՝ տ(եառ)ն լիցի։

²⁷Եւ եթէ ՛ի չորքոտանեաց անսրբոց՝ փրկիցէ́ ը(ս)տ գնոց իւրոց. զհինգերո́րդ մասն ՛ի նոյն յաւելցէ՝ եւ նորի́ն լիցի։ ապա թէ ոչ փրկեսցի՝ վաճառեսցի́ ըստ գնոց իւրոց։
²⁸Ա(մենայ)ն նուէր՝ զոր նուիրեսցէ ոք տ(եառ)ն՝ յա(մենայ)նէ որ ինչ իւր իցէ ՛ի մարդոյ մինչեւ յանասուն, եւ յանդոյ մինչեւ ցկալուածս իւր, մի́ դարձցի անդրէն՝ եւ մի́ փրկեսցի։ ա(մենայ)ն նուէր՝ ս(ուր)բ սրբու(թ)ե(ան)ց լիցի տ(եառ)ն։
²⁹Ամենայն նուէր՝ որ նուիրիցի ՛ի մարդկանէ, մի́ փրկեսցի, այլ մահո́ւ մեռանիցի։
³⁰Ամենայն տասանորդ յերկրէ՝ ՛ի սերմանեաց երկրին, եւ ՛ի պտղոց ծառոց՝ տ(եառ)ն է ՛ի սրբութի(ւն) տ(եառ)ն։

³¹Եւ եթէ փրկելո́վ ոք փրկեսցէ զտասանորդ իւր, զհինգերորդ մասն յաւելցէ ՛ի նոյն, եւ նորի́ն լիցի։
³²Եւ ա(մենայ)ն տասանորդ՝ արջառոյ եւ ոչխարի, եւ ա(մենայ)ն տասանորդ որ մտանիցէ ընդ թուով գաւազանի՝ սրբու(թ)ի(ւն) տ(եառ)ն լիցի։
³³Մի́ լիցի խտիր ընդ բարին եւ ընդ յոռին. եւ մի́ փոխանակեսցես զբարին ընդ յոռւոյ. ապա թէ փոխանակելո́վ փոխանակեսցես. եւ նա́ եւ փոխանակն իւր եղիցին ս(ուր)բ՝ եւ մի́ փրկեսցին։
³⁴Ա́յս են պատուիրանք՝ զոր պատուիրեաց տ(է)ր մովսիսի առ որդիսն ի(սրաէ)լի ՛ի լերինն սինայի։