¹Ա́ՅՍ ԵՆ ԱՆՈՒԱՆՔ ՈՐԴՒՈՑՆ իսրայէլի մտելոցն յեգիպտոս հանդերձ յակոբաւ հարբն իւրեանց իւրաքանչիւր ըստ համօրէն տանց իւրեանց մտանէին։
²ռոբէն. շմաւոն. ղեւի. յուդա.
³իսաքար. զաբուղոն. եւ բենիամին։
⁴դան. եւ նեփթաղիմ. գագ. եւ ասեր։
⁵Եւ էին ա(մենայ)ն ոգիք ելեալք ՛ի յակոբայ, եւթանասուն եւ հինգ ոգի։ եւ յովսէփ էր յեգիպտոս։
⁶Վախճանեցաւ յովսէփ՝ եւ ա(մենայ)ն եղբարք նորա, եւ ա(մենայ)ն ազգն այն։
⁷եւ որդիքն իսրայէլի աճեցին եւ յոռացան. բազմանային եւ զօրանային յոյժ. զի բազմացուցանէր զն(ո)ս(ա) երկիրն։
⁸Եկաց ա́յլ թագաւոր՝ որ ո́չ գիտէր զյովսէփ։

⁹եւ ասէ ցազգն իւր. ահա ազգ որդւոցն ի(սրաէ)լի մե́ծ է զօրութ(եամ)բ, եւ զօրանա́յ քան զմեզ։
¹⁰Արդ՝ եկայք հնարեսցուք ինչ նոցա. գուցէ՝ բազմանայցեն. եւ յորժամ դիպեսցի մեզ պատերազմ, յաւելուցուն եւ ն(ո)ք(ա) ՛ի թշնամիսն. եւ մարտուցեալ ընդ մեզ, ելանիցեն յերկրէ աստի։
¹¹Եւ կացո́յց ՛ի վերայ ն(ո)ց(ա) գործավարս, զի չարչարեսցեն զնոսա ՛ի գործ։ եւ շինեցին քաղաքս ամուրս փարաւոնի, զփիդոն, եւ զռամեսէ, եւ զովն՝ որ է արեգ քաղաք։
¹²Եւ որչափ ճնշէին զնոսա, այնչափ առաւե́լ բազմանային եւ զօրանային յոյժ։
¹³Եւ գարշեցուցանէին եգիպտացիքն զորդիսն ի(սրաէ)լի։ եւ յաղթահարէին եգիպտացիքն զորդիսն ի(սրաէ)լի բռնութ(եամ)բ։

¹⁴եւ կեղէին զկեանս նոցա ՛ի գործ խիստ կաւոյ եւ աղիւսարկի, եւ յա(մենայ)ն գործ դաշտաց. ըատ ա(մենայ)ն գործոյ իւրեանց՝ որով ծառայեցուցանէին զնոսա բռնութ(եամ)բ։
¹⁵Եւ խօսեցա́ւ արքայն եգիպտացւոց ընդ ծնուցիչսն եբրայեցւոց. ընդ միում որում անուն էր սեփովրա, եւ անուն երկրորդին փուա.
¹⁶եւ ասէ. յորժամ ծնուցանիցէք զկանայս եբրայեցիս, եւ իցեն մե́րձ ՛ի ծնունդս. թէ արո́ւ իցէ՝ սպանջի́ք զնա, եւ թէ էգ՝ ապրեցուցանիջիք։
¹⁷Եւ երկեա́ն ծնուցիչքն յա(ստուծո)յ. եւ ո́չ արարին՝ որպէս եւ հրաման ետ ն(ո)ց(ա) արքային եգիպտացւոց. եւ ապրեցուցանէին զարուսն։

¹⁸Կոչեա́ց արքայն եգիպտացւոց զծնուցիչսն՝ եւ ասէ ցնոսա. զի՞ է զի արարէք զիրս զայնոսիկ եւ ապրեցուցէք զարուս։
¹⁹Եւ ասեն ծնուցիչքն ցփարաւոն. ո́չ իբրեւ զկանայս եգիպտացիսն եբրայեցիքն։ քանզի նա́խ ծնանին մինչ չե́ւ մտեալ առ նոսա մանկաբարձաց։ եւ ծնանէին։
²⁰Եւ բարի առնէր ա(ստուա)ծ մանկաբարձացն։ եւ բազմանայր յոյժ ժողովուրդն, եւ զօրանայր յոյժ։
²¹Յորմէհետէ երկեան մանկաբարձքն յա(ստուծո)յ, արարին իւրեանց տունս։
²²Հրամա́ն ետ փարաւոն ա(մենայ)ն ժողովրդեան իւրում, եւ ասէ. զա(մենայ)ն արու որ ծնանիցի եբրայեցւոց, ՛ի գե́տ ընկեսջիք, եւ զա(մենայ)ն էգ՝ ապրեցուցանիջիք։

¹Եւ է́ր անդ ոմն յազգէ ղեւեայ. որ ա́ռ իւր կին ՛ի դստերաց անտի ղեւեայ։
²եւ յղացաւ՝ ծնաւ արու։ եւ տեսանէին զնա կայտա́ռ. եւ թաքուցին զնա ամիսս երիս։
³Եւ իբրեւ ո́չ եւս կարէին թաքուցանել, ա́ռ մայրն նորա տապանակ պրտուեայ, եւ ծեփեաց զնա կպրաձիւթով. եւ ե́դ ՛ի նմա զմանուկն, եւ ընկէ́ց զայն ՛ի խաղ մի առ ափն գետոյն։
⁴եւ գիտէր քոյրն նորա ՛ի հեռաստանէ, տեսանել թէ զի՞նչ անցք անցանիցեն ընդ նա։
⁵Եւ իջեալ դուստրն փարաւոնի լուանա́լ ՛ի գետն. եւ նաժիշտք նորա շրջէին առ գետովն։ Եւ տեսեալ զտապանակն ՛ի խաղի անդ, առաքեաց զնաժիշտ մի առնուլ զնա։

⁶եբաց՝ եւ ետես զմանուկն. եւ լայր մանուկն ՛ի տապանակի անդ։ Խանդաղատեցաւ զնովաւ դուստրն փարաւոնի, եւ ասէ. ՛ի մանկա՞նց եբրայեցւոց է դա։
⁷Եւ ասէ քոյրն նորա ցդուստրն փարաւոնի. կամի՞ս զի կոչեցից քեզ կին մի դայեակ ՛ի հեբրայեցւոց անտի. եւ սնուցանիցէ́ քեզ զմանուկդ։
⁸Ասէ դուստրն փարաւոնի՝ ե́րթ։ գնաց աղջիկն եւ կոչեաց զմայր մանկանն։
⁹եւ ասէ ցնա դուստրն փարաւոնի. ա́ռ զմանուկդ, եւ սնո́ ինձ զդա. եւ ես տաց քեզ զվարձս քո։ Եւ ա́ռ կինն զմանուկն՝ եւ սնոյց զնա։ եւ իբրեւ հաստատեցաւ մանուկն, ած զնա առ դուստրն փարաւոնի,
¹⁰եւ եղեւ նմա յորգեգիրս։ եւ անուանեաց զանուն ն(ո)ր(ա) մովսէ́ս. ասէ, ՛ի ջրո́յ անտի հանի զդա։

¹¹Եւ եղեւ յետ աւուրց բազմաց, իբրեւ եղեւ մե́ծ մովսէս, ե́լ առ եղբարս իւր որդիսն ի(սրաէ)լի, հայեցեալ ՛ի չարչարանս ն(ո)ց(ա). ետես այր մի եգիպտացի, զի հարկանէր զոմն եբրայեցի յեղբարց իւրոց՝ յորդւոցն իսրայէլի։
¹²Հայեցեալ յա́յս կոյս յայն կոյս՝ ո́չ զոք տեսանէր. եհա́ր զեգիպտացին, եւ ծածկեաց զնա ընդ աւազով։
¹³Եւ ելեալ յերկրորդում աւուր, տեսանէր երկուս արս եբրայեցիս ընդ միմեանս մարտուցեալս. եւ ասէ ցայրն որ զրկէրն. ը(նդ)է՞ր հարկանես զընկերդ։
¹⁴եւ նա ասէ, ո՞ կացոյց զքեզ * այր իշխան եւ դատաւոր ՛ի վ(ե)ր(այ) մեր։ եթէ սպանանե՞լ զիս կամիցիս ո(ր)պ(էս) երէկ սպաներ զեգիպտացին։ Զահի́ հարաւ մովսէս՝ եւ ասէ. թէ այնպէս յայտնի́ եղեւ բանն։

¹⁵Եւ լուաւ փարաւոն զբանն, եւ խնդրէր սպանանելզմովսէս։ եւ փախեաւ մովսէս յերեսաց փարաւոնի, եւ բնակեաց յերկրին մադիամու։ Եւ եկեալ յերկրին մադիամու՝ նստաւ առ ջրհորի միում։
¹⁶Եւ քրմին մադիանացւոց էին դստերք եւթն, որ արածէին զխաշինս հօրն իւրեանց, եւ եկեալէին հանել ջուր, մինչեւ լցին զաւազանսն, արբուցանել խաշանց հօրն իւրեանց։
¹⁷եւ եկեալ ա́յլ հովիւք՝ մերժեցին զնոսա ՛ի բաց։ Յարուցեալ մովսէս թափեաց զն(ո)ս(ա). եւ եհան ն(ո)ց(ա) ջուր, եւ արբոյց զխաշինս նոցա։
¹⁸Եւ եկին առ հռագուէլ հայրն իւրեանց։ եւ նա ասէ ցնոսա. զի՞ է զի յարեւու եկիք այսօր։
¹⁹եւ նոքա ասեն. այր մի եգիպտացի փրկեաց զմեզ ՛ի հովուաց անտի. եւ եհան ջուր եւ արբոյց խաշանց մերոց։

²⁰Եւ նա ասէ ցդստերսն իւր. եւ ո́ւր է, ընդէ՞ր թողէք զայրն. արդ՝ կոչիցէ́ք զնա՝ զի կերիցէ հաց։
²¹Եւ բնակեցաւ մովսէս առ առնն, եւ ետ զսեպփովրա դուստր իւր մովսիսի կնութե(ան)։
²²Յղացաւ կինն՝ եւ ծնաւ որդի. եւ անուանեաց զանուն ն(ո)ր(ա) մովսէս՝ գերսամ. ասէ՝ զի պանդո́ւխտ իմ ես յօտար երկրի։
²³Եւ յետ աւուրց բազմաց մեռաւ թագաւորն եգիպտացւոց. եւ տառապէին որդիքն ի(սրաէ)լի ՛ի գործոյ անտի, եւ աղաղակէին ՛ի վեր։ եւ ել աղաղակ նոցա առաջի ա(ստուծո)յ ՛ի գործոյ անտի։
²⁴եւ լուաւ ա(ստուա)ծ հեծութե(ան) ն(ո)ց(ա)։ Եւ յիշեաց ա(ստուա)ծ զուխտ իւր որ ընդ աբրաամու եւ սահակայ եւ յակոբայ.

²⁵եւ հայեցաւ ա(ստուա)ծ յորդիսն իսրայէլի. եւ ծանուցա́ւ նոցա։

¹Եւ մովսէս արածէր զխաշինս յոթորայ տներոյ իւրոյ՝ քրմի մադիանացւոց. եւ ած զխաշինսն յանապատ. եւ եկն ՛ի լեառնն ա(ստուծո)յ ՛ի քորէբ։
²Եւ երեւեցաւ նմա հրեշտակ տ(եառ)ն բոցով հրոյ ՛ի միջոյ մորենւոյ։ եւ տեսանէր զի մորենին վառեալէր հրով, եւ ո́չ այրէր մորենին։
³Եւ ասէ մովսէս, անցեալ տեսի́ց զտեսիլն զայն մեծ, զի՞է՝ զի ոչ այրի մորենին։
⁴Իբրեւ ետես տ(է)ր եթէ մերձենա́յ տեսանել, կոչեաց զնա տ(է)ր ՛ի միջոյ մորենւոյն, ասէ. մովսէ́ս մովսէս։ եւ նա ասէ, զի՞է։
⁵եւ ասէ՝ մի́ մերձենար այսր. լո́յծ զկօշիկս քո՝ յոտից քոց. զի տեղիդ յորում կա́ս դու ՛ի դմա՝ երկիր սո́ւրբ է։

⁶Եւ ասէ ցնա, ես եմ ա(ստուա)ծ հօր քոյ, ա(ստուա)ծ աբրաամու. եւ ա(ստուա)ծ սահակայ. եւ ա(ստուա)ծ յակոբայ։ եւ դարձոյց մովսէս զերեսս իւր, քանզի երկնչէր հայել առաջի ա(ստուծո)յ։
⁷Եւ ասէ տ(է)ր ցմովսէս. տեսանելո́վ տեսի զչարչարանս ժողովրդեան իմոյ՝ որ յեգիպտոս։
⁸եւ լուայ աղաղակի ն(ո)ց(ա) ՛ի գործավարացն իւրեանց, զի գիտե́մ զվիշտս ն(ո)ց(ա). եւ իջի փրկել զն(ո)ս(ա) ՛ի ձեռաց եգիպտացւոցն. եւ հանել զն(ո)ս(ա) յերկրէն յայնմանէ, եւ տանել զն(ո)ս(ա) յերկիրն բարի՝ եւ յընդարձակ. յերկիր՝ որ բղխէ զկաթն եւ զմեղր։ յերկիրն քանանացւոց, եւ քետացւոց, եւ ամովրհացւոց, եւ փերեզացւոց, եւ խեւացւոց, եւ գերգեսացւոց, եւ յեբուսացւոց։

⁹Եւ արդ՝ աւասիկ աղաղակ որդւոցն ի(սրաէ)լի հասեալ է առիս, եւ տեսի ես զնեղութի(ւն)ն՝ զոր նեղեն զնոսա եգիպտացիքն։
¹⁰Եւ արդ՝ ե́կ առաքեցից զքեզ առ փարաւոն արքայ եգիպտացւոց, եւ հանցե́ս զժողովուրդ իմ զորդիսն ի(սրաէ)լի յերկրէն եգիպտացւոց։
¹¹Եւ ասէ մովսէս ցա(ստուա)ծ. ո՞վ եմ ես՝ զի երթայցեմ առ փարաւոն արքայ եգիպտացւոց, եւ հանիցեմ զորդիսն ի(սրաէ)լի յերկրէն եգիպտացւոց։
¹²Եւ ասէ՝ ե́ս եղէց ընդ քեզ. եւ ա́յս եղիցի քեզ նշան թէ ե́ս առաքեցի զքեզ հանել զժողովուրդ իմ յեգիպտոսէ, եւ պաշտեսջիք զա(ստուա)ծ ՛ի լերինս յայսմիկ։

¹³Եւ ասէ մովսէս ցա(ստուա)ծ. ահա ես երթեալ առ որդիսն ի(սրաէ)լի, ասիցեմ ցնոսա, ա(ստուա)ծ հարցն ձերոց առաքեաց զիս առ ձեզ. եւ հարցանիցեն զիս՝ թէ զի՞նչ անուն է նորա. զի՞նչ ասացից ցնոսա։
¹⁴Եւ ասէ ա(ստուա)ծ ցմովսէս։ ե́ս եմ Ա(ստուա)ծ որ է́ն։ եւ ասէ՝ ա́յսպէս ասասցես ցորդիսն ի(սրաէ)լի. որէ́ն առաքեաց զիս առ ձեզ։
¹⁵Եւ ասէ դարձեալ ա(ստուա)ծ ցմովսէս։ ա́յսպէս ասասցես ցորդիսն ի(սրաէ)լի։ Տ(է)ր ա(ստուա)ծ հարցն ձերոց, ա(ստուա)ծ աբրաամու, եւ ա(ստուա)ծ սահակայ, եւ ա(ստուա)ծ յակոբայ, առաքեաց զիս առ ձեզ։ ա́յս է անուն իմ յաւիտենական, եւ յիշատակ ազգաց յազգս։

¹⁶Արդ՝ երթեալ ժողովեսցես ցծերակոյտ որդւոցն ի(սրաէ)լի, եւ ասասցես ցնոսա։ տ(է)ր ա(ստուա)ծ հարցն ձերոց երեւեցաւ ինձ. ա(ստուա)ծ աբրաամու, եւ ա(ստուա)ծ սահակայ, եւ ա(ստուա)ծ յակոբայ՝ եւ ասէ. այցելութ(եամ)բ ա́յց արարից ձեզ. եւ որինչ անցք անցին ընդ ձեզ յեգիպտոս,
¹⁷եւ ասեմ, հանի́ց զձեզ յերկրէ չարչարանաց եգիպտացւոցն, յերկիրն քանանացւոց, եւ քետացւոց, եւ ամովրհացւոց, եւ փերեզացւոց, եւ գերգեսացւոց, եւ խեւացւոց, եւ յեբուսացւոց. յերկիր՝ որ բղխէ զկա́թն եւ զմեղր.
¹⁸եւ լուիցեն ձայնի քում։
¹⁹Եւ ես գիտեմ, եթէ ո́չ թողուցու զձեզ արքայն եգիպտացւոց գնալ, եթէ ոչ հզօ́ր ձեռամբ։

²⁰եւ ձգեալ զձեռն իմ հարի́ց զեգիպտոս ա(մենայ)ն սքանչելեօք իմովք՝ զոր արարից ՛ի նոսա. եւ ապա արձակեսցէ զձեզ։
²¹Եւ տաց շնորհս ժողովրդեան իմոյ առաջի եգիպտացւոցն. եւ յորժամ ելանիցէք, մի́ ելանիցէք դատարկք։
²²այլ խնդրեսցէ կին ՛ի գրացւոյ եւ յերդակցէ իւրմէ անօթս ոսկւոյ եւ անօթս արծաթոյ, եւ հանդերձս. եւ զարդարեսջի́ք զուստերս եւ զդստերս ձեր. եւ դաւաճանեսջի́ք զեգիպտացիսն։

¹Պատասխանի ետ մովսէս՝ եւ ասէ։ եթէ չհաւատայցեն ինձ, եւ ոչ լուիցեն ձայնի իմում, քանզի ասիցեն, թէ չի́ք երեւեալ քեզ ա(ստուծո)յ. զի՞նչ ասացից ցնոսա։
²Ասէ ցնա տ(է)ր, զի՞նչ է այդ որ ՛ի ձեռին քում է։ եւ նա́ ասէ՝ գաւազան։
³Եւ ասէ, ընկեա́ զդա ՛ի գետին։ եւ ընկէց զնա ՛ի գետին։ եւ եղեւ օձ, եւ փախեաւ մովսէս ՛ի նմանէն։
⁴Եւ ասէ տ(է)ր ցմովսէս. ձգեա́ զձեռն քո՝ եւ բո́ւռն հար զտտանէն։ եւ ձգեաց մովսէս զձեռն իւր, եւ բուռն եհար զտտանէն. եւ եղեւ գաւազան ՛ի ձեռին ն(ո)ր(ա)։
⁵զի հաւատասցեն քեզ՝ թէ երեւեալ է քեզ տ(է)ր ա(ստուա)ծ հարցն նոցա. ա(ստուա)ծ աբրաամու, եւ ա(ստուա)ծ սահակայ, եւ ա(ստուա)ծ յակոբայ։

⁶Ասէ ցնա դարձեալ տ(է)ր։ ա́րկ զձեռն քո ՛ի ծոց քո։ եւ արկ զձեռն իւր ՛ի ծոց իւր, եւ եհան զնա ՛ի ծոցոյ իւրմէ, եւ եղեւ ձեռն ն(ո)ր(ա) բորոտ իբրեւ զձիւն։
⁷Եւ ասէ ցնա՝ ա́րկ զձեռն քո ՛ի ծոց քո։ եւ արկ զձեռն իւր ՛ի ծոց իւր։ եւ եհան զնա ՛ի ծոցոյ իւրմէ, եւ դարձեալ անդրէն ՛ի նոյն հաստատեցաւ ՛ի գո́յն մարմնոյ իւրոյ։
⁸Եթէ ոչ հաւատայցեն քեզ՝ եւ ո́չ լուիցեն ձայնի առաջնոյ նշանին, հաւատասցեն քեզ ձայնի երկրորդի́ նշանիդ։
⁹Եւ եղիցի եթէ ո́չ հաւատասցեն երկոցունց նշանացդ այդոցիկ, եւ ո́չ լուիցեն ձայնի քում, առցես դու ՛ի ջրոյ գետոյն՝ եւ հեղցես ՛ի ցամաքի. եւ եղիցի ջուրն՝ զոր առնուցուս ՛ի գետոյն, արիւն ՛ի ցամաքին։

¹⁰Եւ ասէ մովսէս ցտ(է)ր. աղաչեմ զքեզ տ(է)ր, չե́մ բաւական, որպէս թէ յերիկէ եւ յեռանտէ, եւ ո́չ յորմէհետէ սկսար խօսել ընդ խառայի քում. զի նրբաձա́յն եւ ծանրալեզո́ւ եմ ես։
¹¹Եւ ասէ տ(է)ր ցմովսէս. ո́վ ետ բերան մարդոյ, կամ ո́վ արար զխուլն եւ զհամր, զականին եւ զկոյր, ո́չ ապաքէն ե՞ս ա(ստուա)ծ։
¹²եւ արդ՝ ե́րթ, եւ ե́ս բացից զբերան քո. եւ խելամո́ւտ արարից զքեզ՝ զոր պա́րտ իցէ խօսել։
¹³Եւ ասէ, աղաչե́մ զքեզ տ(է)ր. ա́ռ քեզ ՛ի ձեռն զա́յլ ոք զօրաւոր՝ զոր առաքիցես։
¹⁴Եւ բարկացաւ տ(է)ր սրտմտութ(եամ)բ ՛ի վերայ մովսիսի՝ եւ ասէ։ ո՞չ աւանիկ կայ ահարոն եղբայր քո ղեւտացի. գիտեմ զի խօսելո́վ խօսեսցի նա ընդ քեզ։ եւ ահա նա ելցէ ընդ առաջ քո, եւ՛ի տեսանելն զքեզ բերկրեսցի́ ՛ի միտս իւր։

¹⁵եւ խօսեսցի́ս ընդ նմա, եւ տացե́ս զպատգամս իմ ՛ի բերան ն(ո)ր(ա). եւ ես բացից զբերան քո եւ զբերան նորա, եւ խելամո́ւտ արարից զձեզ՝ զի՞նչ առնիցէք։
¹⁶Եւ նա́ խօսեսցի առ ՛ի քէն ընդ ժողովրդեանն։ եւ նա եղիցի քեզ բերան. եւ դու եղիցես նմա յա(ստուա)ծակոյս կողմանէ։
¹⁷եւ զգաւազանդ որ դարձաւ յօձ՝ առցե́ս ՛ի ձեռին քում, որով արասցես նշանս։
¹⁸Գնա́ց մովսէս՝ եւ դարձաւ առ յոթոռ աներ իւր՝ եւ ասէ ցնա, դարձայց եւ երթայց առ եղբարս իմ որ յեգիպտոս, եւ տեսից, թէ տակաւին կենդանի՞ իցեն։ եւ ասէ յոթոր ցմովսէս, ո́ղջ երթ։
¹⁹Եւ յետ աւուրցն բազմաց այնոցիկ վախճանեցա́ւ արքայն եգիպտացւոց։ եւ ասէ տ(է)ր ցմովսէս ՛ի մադիամ. գնա́ եւ երթ յեգիպտոս, զի մեռան ա(մենայ)ն արք որ խնդրէին զանձն քո։

²⁰Եւ առեալ մովսիսի զկին իւր եւ զմանկունս * իւր, եւ եհան զնոսա ՛ի գրաստս, եւ դարձաւ յեգիպտոս։ ա́ռ մովսէս զգաւազանն որ յա(ստուծո)յ՝ ՛ի ձեռին իւրում։
²¹Եւ ասէ տ(է)ր ցմովսէս. յերթալդ քո եւ ՛ի դառնալդ յեգիպտոս. տեսջի́ր զա(մենայ)ն նշանս զոր ետու ՛ի ձեռս քո՝ արասցե́ս առաջի փարաւոնի. եւ ես խստացուցից զսիրտ ն(ո)ր(ա), եւ ո́չ արձակեսցէ զժողովուրդ իմ։
²²եւ դու ասասցեն ցփարաւոն. ա́յսպէս ասէ տ(է)ր, որդի անդրանիկ իմ ի(սրա)էլ։
²³ասացի́ ցքեզ՝ արձակեա́ զժողովուրդ իմ, զի պաշտեսցեն զիս. ապաթէ ո́չ կամիցիս արձակել զդա, ե́ս եմ ապաքէն որսպանանիցեմ զորդի քո զանդրանիկ։
²⁴Եւ եղեւ ՛ի ճանապարհի յիջավանս, պատահեաց նմա հրեշտակ տ(եառ)ն, եւ խնդրէր սպանանե́լ զնա։

²⁵Եւ առեալ սեպփովրայի գայլախազ, թլփատեա́ց զանթլփատու(թ)ի(ւն) որդւոյն իւրոյ. եւ անկեալ առ ոտս ն(ո)ր(ա)՝ ասէ. ահա եկա́ց արիւն թլփատութե(ան) մանկան իմոյ։
²⁶Եւ գնաց հրեշտակն ՛ի նմանէ. քանզի ասաց՝ եթէ եկաց արիւն թլփատութեան մանկան իմոյ։
²⁷Եւ ասէ տ(է)ր ցահարոն, ե́րթ ընդ առաջ մովսիսի յանապատն։ եւ գնաց եւ պատահեաց նմա ՛ի լերինն ա(ստուծո)յ. եւ համբուրեաց զնա։
²⁸Եւ պատմեաց մովսէս ահարոնի զա(մենայ)ն պատգամսն, զոր առաքեաց զնա տ(է)ր. եւ զա(մենայ)ն նշանսն զոր պատուիրեաց նմա։
²⁹Գնացին մովսէս եւ ահարոն եւ ժողովեցին զա(մենայ)ն ծերակոյտ որդւոցն ի(սրաէ)լի։

³⁰եւ խօսեցաւ ահարոն զա(մենայ)ն պատգամսն՝ զոր խօսեցաւ տ(է)ր ընդ մովսիսի. եւ արար նշանս առաջի ժողովրդեանն։
³¹Եւ հաւատա́ց ժողովուրդն եւ ուրա́խ եղեւ, զի արար ա(ստուա)ծ ա́յց որդւոցն ի(սրաէ)լի. եւ զի հայեծա́ւ ՛ի նեղու(թ)ի(ւն) ն(ո)ց(ա)։ խոնարհեցաւ ժողովուրդն՝ եւ երկի́ր եպագ։

¹Եւ ապա մտին մովսէս եւ ահարոն առաջի փարաւոնի, եւասեն ցնա. ա́յսպէս ասէ տ(է)ր ա(ստուա)ծ ի(սրաէ)լի. արձակեա́ զժողովուրդ իմ, զի արասցեն ինձ տօն յանապատի։
²Եւ ասէ փարաւոն. ո՞վ է նա, որում լուայց ձայնի ն(ո)ր(ա) արձակել զորդիսն ի(սրաէ)լի։ ո́չ գիտեմ զտ(է)րն՝ եւ զի(սրա)էլ ո́չ արձակեմ։
³Եւ ասեն ցնա. ա(ստուա)ծն եբրայեցւոց կոչեաց զմեզ առ ինքն. արդ՝ երթիցուք երից աւուրց ճանապարհ յանապատն, զի զոհեսցուք տ(եառ)ն ա(ստուծո)յ մերում. գուցէ պատահիցէ մեզ մա́հ կամ սպանումն։
⁴Եւ ասէ ցնոսա արքայն եգիպտացւոց. ընդէ՞ր դու մովսէս եւ ահարոն խափանէք զժողովուրդն ՛ի գործոյ իւրեանց. երթա́յք յիւրաքանչիւր գործ իւր։

⁵Եւ ասէ փարաւոն. ահա բազմանայ յոյժ ժողովուրդն յերկրիս. արդ՝ մի́ հանդարտեցուսցուք զնոսա ՛ի գործոյ։
⁶Եւ հրամայեաց փարաւոն յաւուր յայնմիկ գործավարաց ժողովրդեանն, եւ դպրաց նորա, ասէ.
⁷մի́ եւս յաւելուցուք տալ յարդ ժողովրդեանն յաղիւսարկութի(ւն), որպէս յերէկն եւ յեռանտ։ ինքեա́նք երթիցեն եւ ժողովեսցեն իւրեանց յարդ։
⁸եւ զսակ աղիւսարկին որպէս գործէին հանապազ՝ արկէ́ք ՛ի վերայ ն(ո)ց(ա). մի́ հատանիցէք ինչ անտի. զի դատարկացան, եւ վ(ա)ս(ն) այնորիկ աղաղակէին՝ եւ ասեն. երթիցուք զոհեսցուք ա(ստուծո)յ մերում։
⁹ծանրասցի́ գործ մարդկանն, եւ ա́յնմ հոգասցեն. եւ մի́ հոգասցեն ՛ի բանս տարապարտս։

¹⁰Եւ ստիպէին զնոսա գործավարք ժողովրդեանն՝ եւ դպիրք ն(ո)ր(ա). եւ խօսէին ընդ ժողովրդեանն եւ ասէին. ա́յսպէս ասէ փարաւոն, ո́չ եւս տաց ձեզ յարդ.
¹¹դուք ձեզէն երթա́յք ժողովեցէք ձեզ յարդ՝ ուստի եւ գտանիցէք. զի ո́չ թողասցի ձեզ ՛ի սակէն ձերմէ՝ եւ ո́չինչ։
¹²Եւ սփռեցա́ւ ժողովուրդն ընդ ա(մենայ)ն երկիրն եգիպտացւոց ժողովել եղէգն՝ առ ՛ի յարդ։
¹³Եւ գործավարքն ստիպէին զն(ո)ս(ա) եւ ասէին. բովանդակեցէ́ք զգործն ձեր ըստ հանապազորդ սակին, ո(ր)պ(էս) մինչ յարդն տային ձեզ։

¹⁴Եւ տանջեցան դպիրք ազգի որդւոցն ի(սրաէ)լի, որ կային ՛ի վերայ ն(ո)ց(ա)՝ ՛ի վերակացուացն փարաւոնի։ զի ասէին, թէ ընդէ՞ր ոչ բովանդակեցէք զսակ աղիւսոյն ձերոյ ո(ր)պ(էս) յերէկն եւ յեռանտ՝ եւ զա́յսր աւուրդ։
¹⁵Եւ մտեալ դպրաց որդւոցն ի(սրաէ)լի՝ բողո́ք կալան առաջի փարաւոնի եւ ասեն. ընդէ՞ր առնես ա́յսպէս ը(ստ) ծառայս քո։
¹⁶Յարդ ո́չ տան ծառայից քոց, եւ զաղիւսն հրամայեն մեզ գործել. եւ ահա ծառայք քո ՛ի տանջա́նս են. բո́ւռն առնես ժողովրդեան քում։
¹⁷Եւ ասէ ցն(ո)ս(ա). դատա́րկ էք պարապո́րդ էք. վ(ա)ս(ն) այնորիկ ասէք՝ երթիցուք զոհեսցուք ա(ստուծո)յ մերում։
¹⁸արդ՝ երթա́յք գործեցէ́ք. քանզի յարդ ո́չ ոք տայ ձեզ։ եւ զսակ աղիւսոյն բովանդա́կ տայցէք։

¹⁹Տեսանէին դպիրք որդւոցն ի(սրաէ)լի զանձինս իւրեանց ՛ի չարչարանս՝ եւասէին. ո́չ ոք թողու մեզ զսակ հանապազորդ աղիւսաթուին։
²⁰Պատահեցին մովսիսի եւ ահարոնի, զի գային հանդէպ ն(ո)ց(ա) ելեալք յերեսաց փարաւոնի.
²¹եւ ասեն ցնոսա. տեսցէ́ ա(ստուա)ծ, եւ դատեսցի́ զձեզ. զի գարշեցուցէք զհոտ մեր առաջի փարաւոնի, եւ առաջի ծառայից ն(ո)ր(ա). տա́լ սուր ՛ի ձեռին ն(ո)ր(ա) կոտորել զմեզ։
²²Դարձաւ մովսէս առ տ(է)ր՝ եւ ասէ։ Տ(է)ր, ընդէ՞ր չարչարեցեր զժողովուրդն քո. եւ ընդէ՞ր առաքեցեր զիս։
²³եւ յորմէ հետէ մտի առ փարաւոն խօսել յանուն քո, չարչարեաց զժողովուրդն։ եւ փրկելով ո́չ փրկեցեր զժողովուրդ քո։

¹Եւ ասէ տ(է)ր ցմովսէս։ այժմ տեսցե́ս զինչ արարից ընդ փարաւոն. զի հզօր ձեռամբ արձակեսցէ զդոսա, եւ բարձրացեալ բազկաւ հանցէ զդոսա յերկրէ իւրմէ։
²Խօսեցաւ ա(ստուա)ծ ընդ մովսիսի, եւ ասէ ցնա։ ե́ս եմ տ(է)ր.
³եւ երեւեցա́յ աբրաամու սահակայ եւ յակոբայ. ա(ստուա)ծ ն(ո)ց(ա) եմ, եւ անուն իմ տ(է)ր. եւ ոչ յայտնեցի ն(ո)ց(ա)։
⁴Եւ հաստատեցից զուխտ իմ առ նոսա. տա́լ ն(ո)ց(ա) զերկիրն քանանացւոց՝ ուր պանդխտեցանն։
⁵եւ ես լուայ հեծութե(ան) որդւոցդ ի(սրաէ)լի զոր եգիպտացիքդ ծառայեցուցանեն. եւ յիշեցի զուխտն ձեր։

⁶Ե́րթ խօսեա́ց ընդ որդիսն ի(սրաէ)լի, եւ ասասցես. ե́ս եմ տ(է)ր. եւ հանից զձեզ ՛ի բռնութ(են)է եգիպտացւոցդ, եւ փրկեցից զձեզ ՛ի ծառայու(թեն)է դոցա, եւ ապրեցուցից զձեզ բա́րձր բազկաւ եւ մեծամեծ դատաստանօք։
⁷եւ առից զձեզ ինձ ՛ի ժողովուրդ. եւ եղէց ձեր ա(ստուա)ծ. եւ ծանիջիք թէ ե́ս եմ տ(է)ր ա(ստուա)ծ ձեր, որ հանեմ զձեզ յերկրէ եգիպտացւոցդ։
⁸եւ տարայց զձեզ յերկիրն՝ յոր ձգեցի զձեռն իմ տալ զնա աբրաամու սահակայ եւ յակոբայ. եւ տաց զնա ձեզ վիճակաւ, զի ե́ս եմ տ(է)ր։
⁹Խօսեցաւ մովսէս ա́յնպէս ընդ որդիսն ի(սրաէ)լի. եւ ո́չ անսացին նմա ՛ի կարճմտու(թեն)է, եւ ՛ի խիստ գործոյն։
¹⁰Խօսեցա́ւ տ(է)ր ընդ մովսիսի՝ եւ ասէ.

¹¹մուտ խօսեա́ց ընդ փարաւոնի արքային եգիպտացւոց. զի արձակեսցէ զորդիսն ի(սրաէ)լի յերկրէն եգիպտացւոց։
¹²Խօսեցաւ մովսէս առաջի տ(եառ)ն՝ եւ ասէ. ահա որդիքն ի(սրաէ)լի ո́չ լուան ինձ. եւ զիա՞րդ լսիցէ ինձ փարաւոն. եւ ես չե́մ խօսօղ ոք։
¹³Եւ խօսեցաւ տ(է)ր ընդ մովսիսի եւ ընդ ահարոնի. եւ ե́տ ն(ո)ց(ա) հրաման առ որդիսն ի(սրաէ)լի, եւ առ փարաւոն արքայ եգիպտացւոց. հանե́լ զորդիսն ի(սրաէ)լի յերկրէն եգիպտացւոց։
¹⁴Եւ այս են նահապետք տանց ազգաց նոցա. որդիք ռուբինի անդրանկանն ի(սրաէ)լի. ենոք, եւ փաղղուս.սարսոն, եւ քարմի։ ա́յս ցեղ՝ ռուբինի։

¹⁵Եւ որդիք շմաւոնի. յամուէլ, եւ յամին, եւ ահովդ, եւ յաքին, եւ սահառ, եւ սաւուղ որ ՛ի փիւնիկեցւոյ անտի էր։ այդ ցեղք են որդւոցն շմաւոնի։
¹⁶Եւ այս անուանք են որդւոցն ղեւեայ, ըստ ազգս իւրեանց. գեթսովն, կահաթ, եւ մերարի։ եւ ամք կենաց ղեւեայ հարիւր երեսուն եւ եւթն ամ։
¹⁷Եւ ա́յս են որդիք գեթսոնի. ղոբենի, եւ սեմէի. տունք նահապետաց նոցա։
¹⁸եւ որդիք կահաթու.ամրամ, եւ սահառ, եւ քեբրոն, եւ ոզիէլ. եւ ամք կենաց կահաթու, հարիւր եւ երեսուն եւ երեք ամ։
¹⁹եւ որդիք մերարեայ. մոովղի եւ մովսի. ա́յս են տունք նահապետաց ղեւեայ ըստ ազգաց իւրեանց։

²⁰Եւ ա́ռ ամրամ զյովքաբեթ դուստր եղբօր հօր իւրոյ իւր ՛ի կնութե(ան)։ եւ ծնաւ նմա զահարոն, եւ զմովսէս, եւ զմարիամ քոյր ն(ո)ց(ա). եւ ամք կենաց ամրամայ հարիւր եւ երեսուն եւ եւթն ամ։
²¹Եւ որդիք սահառայ. կորխ, եւ նագեբ, եւ զեքրի։
²²եւ որդիք ոզիէլայ. միսայէլ, եւ եղիսափան, եւ սեթրի։
²³Եւ ա́ռ ահարոն զեղիսաբեթ դուստր ամինադաբայ զքոյր նաասոնի իւր կնութե(ան). եւ ծնաւ նմա զնաբադ, եւ զաբիուդ, եւ զեղիազար, եւ զիթամար։
²⁴Եւ որդիք կորխայ. ասիր, եւ եղկանայ, եւ բիասափ. սոքա են ազգք կորխայ։

²⁵Եւ եղեազար ահարոնեան ա́ռ ՛ի դստերաց անտի փուտիէլի իւր կնութե(ան), եւ ծնաւ նմա զփենէէս։ այս են իշխանք նահապետաց ղեւտացւոցն ըստ ազգս իւրեանց։
²⁶Եւ ա́յս ահարոն եւ մովսէս, ցորս ասաց ա(ստուա)ծ՝ հանել զորդիսն ի(սրաէ)լի յերկրէն եգիպտացւոց հանդերձ զօրութ(եամ)բ իւրեանց։
²⁷Եւ սոքա́ են որ վիճէին ընդ փարաւոնի արքային եգիպտացւոց, հանել զորդիսն ի(սրաէ)լի յեգիպտոսէ։ ա́յս է մովսէս եւ ահարոն.
²⁸յաւուր յորում խօսեցաւ տ(է)ր ընդ մովսիսի յերկրին եգիպտացւոց։
²⁹Եւ խօսեցաւ տ(է)ր ընդ մովսիսի՝ եւ ասէ։ ե́ս եմ տ(է)ր. խօսեա́ց ընդ փարաւոնի արքային եգիպտացւոց զա(մենայ)ն ինչ զոր ասեմ քեզ։

³⁰Եւ ասէ մովսէս առաջի տ(եառ)ն. ահաասիկ ես նրբաձա́յն եմ. եւ զիա՞րդ լսիցէ ինձ փարաւոն։

¹Եւ ասէ տ(է)ր ցվոմսէս. ահա ետու զքեզ Աստո́ւած փարաւոնի. եւ ահարոն եղբայր քո եղիցի քեզ մարգարէ́։
²Դու խօսեսցիս ընդ նմա զա(մենայ)ն ինչ՝ զոր պատուիրեմ քեզ։ եւ ահարոն եղբայր քո խօսեսցի́ ընդ փարաւոնի, արձակել զորդիսն ի(սրաէ)լի յերկրէ իւրմէ։
³Եւ ես խստացուցից զսիրտն փարաւոնի. զի յաճախեցից զնշանս իմ եւ զարուեստս յերկրիդ եգիպտացւոց.
⁴եւ ո́չ լուիցէ ձեզ փարաւոն։ եւ արկի́ց զձեռն իմ յեգիպտոս. եւ հանից հանդերձ զօրու(թեամ)բ իմով զժողովուրդ իմ, զորդիսն ի(սրաէ)լի յերկրէդ եգիպտացւոց, մեծա́ւ զվրէժխնդրու(թեամ)բ։

⁵եւ ծանիցեն եգիպտացիքն, թէ ե́ս եմ տ(է)ր. եւ ձգեցից զձեռն իմ յեգիպտոս, եւ հանից զորդիսն ի(սրաէ)լի ՛ի միջոյ ն(ո)ց(ա)։
⁶Եւ արարին մովսէս եւ ահարոն. ո(ր)պ(էս) եւ պատուիրեաց ն(ո)ց(ա) տ(է)ր, նո́յնպէս եւ արարին։
⁷Եւ մովսէս էր ամաց ութսնից. եւ ահարոն էր որդի ամաց ութսուն եւ երից, յորժամ խօսեցան ընդ փարաւոնի։
⁸Եւ խօսեցաւ տ(է)ր ընդ մովսիսի եւ ընդ ահարոնի՝ եւ ասէ.
⁹եթէ խօսեսցի ընդ ձեզ փարաւոն՝ եւ ասասցէ. տո́ւք մեզ նշան կամ արուեստ, ասասցես ցահարոն եղբայր քո. ա́ռ դու զգաւազանդ, եւ ընկեա́ զդա ՛ի գետին առաջի փարաւոնի եւ ծառայից ն(ո)ր(ա), եւ եղիցի վիշա́պ։

¹⁰Մտին մովսէս եւ ահարոն առաջի փարաւոնի, եւ արարին ա́րարին ա́յնպէս, որպէս պատուիրեաց նոցա տ(է)ր։ Եւ ընկէց ահարոն զգաւազանն առաջի փարաւոնի եւ առաջի ծառայից ն(ո)ր(ա), եւ եղեւ վիշապ։
¹¹Եւ կոչեաց փարաւոն զիմաստունս եգիպտացւոց եւ զկախարդս. եւ արարին գէտքն եգիպտացւոց կախարդու(թեամ)բ իւրեանց նո́յնպէս։
¹²Եւ ընկէ́ց իւրաքանչիւր ոք զգաւազան իւր եւ եղեն վիշապք։ եւ եկո́ւլ գաւազանն ահարոնի զգաւազանս ն(ո)ց(ա)։
¹³Եւ կարծրացա́ւ սիրտն փարաւոնի, եւ ոչ լուաւ ն(ո)ց(ա)՝ որպէս խօսեցաւ տ(է)ր։
¹⁴Եւ ասէ տ(է)ր ցմովսէս. կարծրացեա́լ է սիրտն փարաւոնի չարձակե́լ զժողովուրդն։

¹⁵ե́րթ առ փարաւոն ընդ առաւօտն. ահա նա ելանէ ՛ի ջուրն. եւ կացցե́ս հանդէպ ն(ո)ր(ա) առ եզերբ գետոյն. եւ զգաւազանն որ դարձաւ յօձ՝ առցես ՛ի ձեռին քում։
¹⁶եւ ասասցես ցնա. տ(է)ր ա(ստուա)ծ եբրայեցւոց առաքեա́ց զիս առ քեզ՝ եւ ասէ. արձակեա́ զժողովուրդ իմ զի պաշտեսցե́ն զիս յանապատի. եւ ահա ո́չ լուար ինձ մինչեւ ցայժմ։
¹⁷Այսպէս ասէ տ(է)ր. այլ դո́ւ գիտասցես՝ թէ ե́ս եմ տ(է)ր. ահաւասիկ ես հարկանեմ գաւազանաւս որ ՛ի ձեռին իմում է՝ զջուր գետոյդ, եւ դարձցի յարի́ւն։
¹⁸եւ ձկունք որ ՛ի գետ այդր են, սատակեսցի́ն, եւ նեխեսցի գետդ. եւ ո́չ կարասցեն եգիպտացիք ընպել ջուր՛ի գետոյ այտի։

¹⁹Եւ ասէ տ(է)ր ցմովսէս. ասա́ ցահարոն. ա́ռ զգաւազանդ եւ ձգեա́ զձեռն քո ՛ի վերայ ջրոցդ եգիպտոսի, եւ ՛ի վերայ գետոց ն(ո)ց(ա). եւ ՛ի վերայ լճաց ն(ո)ց(ա), եւ ՛ի վերայ խաղից ն(ո)ց(ա), եւ ՛ի վերայ ջրակուտաց ն(ո)ց(ա). եւ եղիցի արի́ւն։ Եւ եղեւ արիւն յա(մենայ)ն երկրին եգիպտացւոց, ՛ի փայտս եւ ՛ի քարինս։
²⁰Եւ արարին մովսէս եւ ահարոն՝ որպէս եւ պատուիրեաց նոցա տ(է)ր. եւ վերացուցեալ զգաւազանն իւր՝ եհա́ր զջուր գետոյն առաջի փարաւոնի եւ առաջի ծառայից նոցա։ եւ դարձոյց զա(մենայ)ն ջուրս գետոյն յարիւն։
²¹Եւ ձկունք որ ՛ի գետ անդ էին՝ սատակեցան, եւ նեխեցաւ գետն. եւ ո́չ կարէին եգիպտացիքն ըմպել ջուրն ՛ի գետոյ անտի։ եւ էր արի́ւն յա(մենայ)ն երկիրն եգիպտացւոց։

²²Եւ արարին ա́յնպէս եւ գէտքն եգիպտացւոց կախարդութ(եամ)բն իւրեանց։ եւ խստացաւ սիրտն փարաւոնի եւ ո́չ լուաւ ն(ո)ց(ա)՝ որպէս ասաց տ(է)ր։
²³Դարձաւ փարաւոն եւ եմուտ ՛ի տուն իւր, եւ ո́չ հաստատեաց զմիտս իւր եւ ոչ այնո́ւ եւս։
²⁴Եւ փորեցին ա(մենայ)ն եգիպտացիքն շուրջ զգետով ջուր ըմպելոյ. եւ ո́չ կարէին ըմպել ջուր ՛ի գետոյն։
²⁵Եւ լցան աւուրք եւթն յետ հարկանելոյ տ(եառ)ն զգետն։

¹Եւ ասէ տ(է)ր ցմովսէս.մո́ւտ առ փարաւոն՝ եւ ասասցե́ս ցնա. այսպէս ասէ տ(է)ր. արձակեա́ զժողովուրդ իմ, զի պաշտեսցեն զիս։
²Ապա թէ ոչ կամիս դու արձակել. ահա ես հարից զա(մենայ)ն սահմանս քո գորտիւ։
³եւ բղխիցէ գետդ գո́րտ. եւ ելեալ մտանիցեն ՛ի տունս քո, եւ ՛ի շտեմարանս սենեկաց քոց, եւ ՛ի գահոյս քո, եւ ՛ի տունս ծառայից քոց, եւ ժողովրդեան քո. եւ ՛ի թոնիրս քո, եւ ՛ի զանգուածս քո։
⁴եւ ՛ի վերայ քո, եւ ՛ի վերայ ժողովրդեան քո, եւ ՛ի վերայ ծառայից քոց ելանիցեն գորտքն։

⁵Եւ ասէ տ(է)ր ցմովսէս. ասա́ ցահարոն եղբայր քո. ձգեա́ ձեռամբ քո զգաւազանդ քո ՛ի վերայ գետոյն, եւ ՛ի վերայ ջրադարձից, եւ ՛ի վերայ խաղից. եւ հանցես գո́րտ ՛ի վերայ երկրիդ եգիպտացւոց։
⁶Եւ ձգեա́ց ահարոն զձեռն իւր ՛ի վերայ ջրոց եգիպտացւոցն, եւ եհան գո́րտ։ ե́լ գորտն եւ ծածկեաց զերկիրն եգիպտացւոց։
⁷Արարին նոյնպէս եւ գէտքն եգիպտացւոց կախարդու(թեամ)բքն իւրեանց. եւ հանին գորտ յերկրին եգիպտացւոց։
⁸Կոչեա́ց փարաւոն զմովսէս եւ զահարոն՝ եւ ասէ. աղօթս արարէք առ տ(է)ր, եւ ՛ի բա́ց արասցէ զգորտս յինէն՝ եւ ՛ի ժողովրդենէ իմմէ. եւ արձակեցի́ց զժողովուրդդ, եւ զոհեսցեն տ(եառ)ն։

⁹Եւ ասէ մովսէս ցփարաւոն. ժա́մ դիր ինձ. առ ե՞րբ արարից աղօթս վ(ա)ս(ն) քո, եւ ծառայից քոց՝ եւ ժողովրդեան քոյ. սատակել զգորտդ ՛ի քէն եւ ՛ի ժողովրդենէ քումմէ, եւ ՛ի տա́նց ձերոց. բայց միայն ՛ի գե́տ անդր մնասցեն։
¹⁰Եւ նա ասէ. առ վաղի́ւ։ եւ սա ասէ, ո(ր)պ(էս) ասացերդ եղիցի́. զի գիտասցես եթէ չի́ք այլ ոք բա́ց ՛ի տ(թեն)է ա(ստուծո)յ մերմէ։
¹¹եւ բարձցին գորտդ ՛ի քէն եւ ՛ի տանց քոց, եւ ՛ի ծառայից քոց, եւ ՛ի ժողովրդենէ քումմէ, բայց միայն ՛ի գե́տ անդր մնասցեն։
¹²Եւ ելին մովսէս եւ ահարոն ՛ի փարաւոնէ։ եւ աղաղակեաց մովսէս առ տ(է)ր՝ վ(ա)ս(ն) ժամադրութե(ան) գորտոյն, ո(ր)պ(էս) ժամադիր եղեւ փարաւոնի։

¹³Եւ արար տ(է)ր՝ որպէս եւ ասացն մովսէս. եւ սատակեցաւ գորտն ՛ի տանց եւ ՛ի սրահից եւ յանդոց։
¹⁴եւ ժողովեցին զն(ո)ս(ա) կո́յտս. եւ նեխեցա́ւ երկիրն։
¹⁵Իբրեւ ետես փարաւոն թէ եղեւ դիւրութի(ւն), ծանրացա́ւ սիրտ ն(ո)ր(ա). եւ ո́չ լուաւ նոցա՝ որպէս եւ խօսեցա́ւ տ(է)ր։
¹⁶Եւ ասէ տ(է)ր ցմովսէս. ասա́ ցահարոն, թէ ձգեա́ ձեռամբ քով զգաւազանդ եւ հա́ր զհող երկրիդ.եւ եղիցի մո́ւն ՛ի մարդ եւ յանասուն, եւ յա(մենայ)ն երկիրդ եգիպտացւոց։
¹⁷Եւ արարին ա́յնպէս. ձգեաց ահարոն ձեռամբ իւրով զգաւազանն եւ եհա́ր զհող երկրին։ եւ եղեւ մուն՝ ՛ի մարդ եւ յանասուն, եւ յա(մենայ)ն հո́ղ երկրին եգիպտացւոց։

¹⁸Արարին նո́յնպէս եւ գէտքն եգիպտացւոց կախարդութ(եամ)բքն իւրեանց հանել մուն, եւ ո́չ կարէին։ եւ եղեւ մուն ՛ի մա́րդ եւ յանասուն։
¹⁹Եւ ասեն գէտքն ցփարաւոն. մա́տն ա(ստուծո)յ է այդ։ եւ խստացաւ սիրտն փարաւոնի. եւ ո́չ լուաւ նոցա՝ որպէս եւ խօսեցաւ տ(է)ր։
²⁰Եւ ասէ տ(է)ր ցմովսէս. կանխեա́ ընդ առաւօտն եւ կա́ց առաջի փարաւոնի. եւ ահա նա ելանէ ՛ի ջուր անդր։ եւ ասասցես ցնա. ա́յսպէս ասէ տ(է)ր, արձակեա́ զժողովուրդ իմ զի պաշտեսցեն զիս։

²¹ապա թէ ոչ կամիցիս արձակել զժողովուրդ իմ. Ահա ե́ս առաքեմ ՛ի վերայ քո՝ եւ ՛ի վերայ ծառայից քոց, եւ ՛ի վերայ ժողովրդեան քոյ, եւ ՛ի վերայ տա́նց ձերոց շանաճանճ։ եւ լցցին տունք եգիպտացւոցդ շանաճանճիւ. եւ երկիրն յորում իցեն ՛ի նմա։
²²Եւ սքանչելի́ արարից յաւուրն յայնմիկ զերկիրն գեսեմ, յորում ժողովուրդն իմ իցէ. եւ մի́ լիցի անդ շանաճանճ. զի գիտասցես թէ ե́ս եմ տ(է)ր. տ(է)ր ա(մենայ)ն երկրի։
²³եւ տաց խտրո́ց ՛ի մէջ ժողովրդեան իմոյ՝ եւ ՛ի մէջ ժողովրդեան քոյ։ եւ վաղի́ւ եղիցին շանաճանճդ այդ ՛ի վ(ե)ր(այ) երկրիդ։

²⁴Եւ արա́ր տ(է)ր այնպէս. եւ եկն շանաճանճ բազում ՛ի տունս փարաւոնի, եւ ՛ի տունս ծառայից ն(ո)ր(ա). եւ յա(մենայ)ն երկիրն եգիպտացւոց։ եւ սատակեցա́ւ երկիրն ՛ի շանաճանճէ անտի։
²⁵Եւ կոչեա́ց փարաւոն զմովսէս եւ զահարոն, եւ ասէ. երթայք զոհեցէ́ք տ(եառ)ն ա(ստուծո)յ ձերում աստէն ՛ի սմին երկրիս։
²⁶Եւ ասէ մովսէս. չէ́ մարթ այդմ լինել եթէ զգարշելիս բեգիպտացւոցդ զոհիցեմք տ(եառ)ն ա(ստուծո)յ մերում։ քանզի եթէ զոհիցեմք զգարշելիս եգիպտացւոցդ առաջի նորա, քարկո́ծ առնեն զմեզ։
²⁷Այլ երթիցուք երեքօրեայ ճանապարհ յանապատ, եւ զոհեսցուք տ(եառ)ն ա(ստուծո)յ մերում, որպէս եւ ասա́ց մեզ տ(է)ր։

²⁸Եւ ասէ փարաւոն. ե́ս արձակեմ զձեզ, եւ զոհեսջիք տ(եառ)ն ա(ստուծո)յ ձերում յանապատի. այլ մի́ ուրեք հեռի ձգիցիք երթալ։ եւ արդ՝ աղօ́թս արարէք վ(ա)ս(ն) իմ առ տ(է)ր։
²⁹Եւ ասէ մովսէս. ես ելի́ց ՛ի քէն, եւ աղօթս արարից առ ա(ստուա)ծ, եւ փարատեսցէ́ շանաճանճդ ՛ի փարաւոնէ, եւ ՛ի ծառայից իւրոց, եւ ՛ի ժողովրդենէ իւրմէ՝ վաղիւ։ բայց մի́ եւս խաբեսցէ փարաւոն առ ՛ի չարձակելոյ զժողովուրդդ զոհել տ(եառ)ն։
³⁰ել մովսէս ՛ի փարաւոնէ. եւ եկաց յաղօթս առ ա(ստուա)ծ։
³¹Եւ արար տ(է)ր՝ որպէս եւ ասացն մովսէս. եւ փարատեա́ց շանաճանճն ՛ի փարաւոնէ, եւ ՛ի ծառայից ն(ո)ր(ա), եւ ՛ի ժողովրդենէ ն(ո)ր(ա). եւ ո́չ մնաց եւ ո́չ մի։

³²Եւ ծանրացո́յց փարաւոն զսիրտ իւր ՛ի ժամանակին յայնմիկ. եւ ո́չ կամեցաւ արձակել զժողովուրդն։

¹Եւ ասէ տ(է)ր ցմովսէս. մո́ւտ առ փարաւոն եւ ասասցես ցնա. ա́յսպէս ասէ տ(է)ր ա(ստուա)ծն եբրայեցւոց, արձակեա́ զժողովուրդ իմ զի պաշտեսցեն զիս։
²ապաթէ ո́չ կամիս արձակել զժողովուրդ իմ, այլ տակաւին ունիցիս զդա։
³Ահա ձեռն տ(եառ)ն եղիցի ՛ի խաշինս քո որ ՛ի դաշտի են, եւ ՛ի ձիս, եւ յէշս եւ յուղտս, եւ յարջառ, եւ յոչխար՝ մահո́ւ մեծաւ յոյժ։
⁴Եւ արարից ե́ս սքանչելիս ՛ի մէջ խաշանցն եգիպտացւոց, եւ ՛ի մէջ խաշանցն ի(սրաէ)լի. եւ ո́չ ծախեսցի յա(մենայ)ն որդւոցն ի(սրաէ)լի կռինչն։
⁵Եւ ժամանակեա́ց ա(ստուա)ծ եւ ասէ. վաղի́ւ արասցէ քեզ տ(է)ր զբանդ զայդ՝ ՛ի վ(ե)ր(այ) երկրիդ։

⁶Եւ արար տ(է)ր զբանն զայն ՛ի վաղիւ անդր։ եւ սատակեցաւ ա(մենայ)ն անասուն եգիպտացւոցն. բայց յանասնոց որդւոցն ի(սրաէ)լի ոչ ծախեցաւ՝ եւ ո́չ ինչ։
⁷Իբրեւ ետես փարաւոն, թէ ո́չ ծախեցաւ յանասնոց որդւոցն ի(սրաէ)լի եւ ո́չ ինչ. ծանրացա́ւ սիրտ ն(ո)ր(ա), եւ ո́չ արձակեաց զժողովուրդն։
⁸Խօսեցաւ տ(է)ր ընդ մովսիսի եւ ընդ ահարոնի՝ եւ ասէ. առէ́ք դուք լի́ ձեռօք ձերովք մոխիր հնոցի, եւ ցանեսցէ́ զայն մովսէս ընդ երկինս առաջի փարաւոնի՝ եւ առաջի ծառայից ն(ո)ր(ա).
⁹եւ եղիցի փոշի́ ընդ ա(մենայ)ն երկիրդ եգիպտացւոց։ Եւ եղիցի ՛ի մարդ եւ յանասուն կե́ղ, եւ եռասցեն խաղաւարտք ՛ի մարդ եւ յանասուն յա(մենայ)ն երկիրդ եգիպտացւոց։

¹⁰Եւ առին զմոխիր հնոցին առաջի փարաւոնի. եւ ցանեա́ց զայն մովսէս ընդ երկինս։ եւ եղեւ կե́ղ եւ խաղաւարտք եռացեալք ՛ի մարդ եւ յանասուն։
¹¹Եւ ո́չ կարէին կախարդքն կալ առաջի մովսիսի վ(ա)ս(ն) կեղոյն. քանզի եղեւ կեղն եւ ՛ի կախարդսն, եւ յա(մենայ)ն երկիրն եգիպտացւոց։
¹²Եւ խստացոյց տ(է)ր զսիրտն փարաւոնի, եւ ո́չ լուաւ նոցա՝ որպէս եւ ասաց տ(է)ր ցմովսէս։
¹³Եւ ասէ տ(է)ր ցմովսէս, կանխեա́ ընդ առաւօտն, եւ կա́ց առաջի փարաւոնի, եւ ասասցես ցնա, ա́յսպէս ասէ տ(է)ր ա(ստուա)ծ եբրայեցւոց, արձակեա́ զժողովուրդ իմ զի պաշտեսցեն զիս։

¹⁴Քանզի յայսմ ժամանակի առաքեցից ես զա(մենայ)ն պատահարս ՛ի սիրտ քո՝ եւ ծառայից քոց եւ ժողովրդեան քոյ. զի գիտասցես թէ չի́ք ոք իբրեւ զիս յա(մենայ)ն երկրի։
¹⁵քանզի ձգեալ զձեռն իմ հարի́ց զքեզ՝ եւ զժողովուրդ քո մահուամբ, եւ սատակեսցի́ս յերկրէ։
¹⁶Եւ վ(ա)ս(ն) ա́յնորիկ պահեցար, զի ՛ի քե́զ ցուցից զզօրութի(ւն) իմ. եւ զի պատմեսցի́ անուն իմ ընդ ա(մենայ)ն երկիր։
¹⁷եւ դու՝ տակաւին թեւարկե՞ս զժողովրդեամբ իմով չարչարե՞լ զդոսա։
¹⁸Եւ ես ահա տեղացի́ց վաղիւ յայսմ ժամու կարկուտ սաստիկ յոյժ.որպիսի ո́չ եղեւ յեգիպտոս յօրէ յորմէ հաստատեցաւ մինչեւ ցայսօր։

¹⁹Եւ արդ փութա́ ժողովել զանասուն քո, եւ որ ինչ իցէ քո ՛ի դաշտի։ զի ա(մենայ)նմարդ եւ անասուն որ գտցի ՛ի դաշտի՝ եւ ո́չ մտցէ ՛ի տուն, անկցի ՛ի վ(ե)ր(այ) ն(ո)ր(ա) կարկուտն՝ եւ սատակեսցէ́։
²⁰Որ միանգամ երկեա́ւ ՛ի բանէ տ(եառ)ն ՛ի ծառայիցն փարաւոնի, ժողովեաց զծառայս իւր եւ զանասուն ՛ի տուն։
²¹եւ որ ոչն անսաց ՛ի միտս իւր բանիցն տ(եառ)ն, եթող * զծառայս իւր՝ եւ զանասուն իւր ՛ի դաշտի։
²²Եւ ասէ տէր ցմովսէս՝ ձգեա́ զձեռն քո յերկինս. եւ եղիցի կարկո́ւտ ՛ի վ(ե)ր(այ) երկրիդ եգիպտացւոց ՛ի վ(ե)ր(այ) մարդկան եւ անասնոյ, եւ ՛ի վ(ե)ր(այ) ա(մենայ)ն բանջարոյ որ է ՛ի դաշտի երկրիդ եգիպտացւոց։

²³Եւ ձգեա́ց մովսէս զձեռն իւր յերկինս. եւ ե́տ տ(է)ր բարբառս եւ կարկուտ. եւ ընթանայր հուր ընդ երկիրն եւ տեղեաց տ(է)ր կարկուտ ՛ի վերայ ա(մենայ)ն երկրին եգիպտացւոց։
²⁴Էր կարկուտ եւ հո́ւր բորբոքեալ ՛ի մէջ կարկտին։ եւ կարկուտն սաստի́կ էր յոյժ. որպիսի ո́չ եղեւ յա(մենայ)ն երկրին եգիպտացւոց, յորմէ հետէ եղեալ էր ՛ի վերայ ն(ո)ր(ա) ազգ։
²⁵Եհա́ր կարկուտն յամնենայն երկիրն եգիպտացւոց զա(մենայ)ն որ ինչ է́ր ՛ի դաշտի՝ ՛ի մարդոյ մինչեւ յանասուն. եւ զա(մենայ)ն բանջար որ ՛ի դաշտի էր՝ եհա́ր կարկուտն. եւ զա(մենայ)ն փայտ որ ՛ի դաշտս՝ մանրեաց։
²⁶բայց յերկիրն գեսեմ, ուր էին որդիքն ի(սրաէ)լի՝ ո́չ եղեւ կարկուտ։

²⁷Եւ առաքեալ փարաւոնի կոչեաց զմովսէս եւ զահարոն՝ եւ ասէ ցն(ո)ս(ա). մեղա́յ. այսուհետեւ տ(է)ր արդա́ր է. եւ ես՝ եւ ժողովուրդ իմ ամպարիշտ։
²⁸Կացէ́ք յաղօթս վ(ա)ս(ն) իմ առ տ(է)ր՝ եւ դադարեսցեն ՛ի լինելոյ ձայնքն ա(ստուծո)յ, եւ կարկուտն եւ հուր. եւ արձակեցի́ց զձեզ, եւ ո́չ եւս յաւելուցուք մնալ։
²⁹Եւ ասէ ցնա մովսէս. այժմ իբրեւ ելի́ց ըստ քաղաքս, ձգեցի́ց զձեռս իմ առ ա(ստուա)ծ. եւ ձայնքն դադարեսցեն, եւ կարկուտն եւ անձրեւ ո́չ եւս լիցի. զի ծանիցես թէ տ(եառ)ն է երկիր։
³⁰եւ դու եւ ծառայք քո՝ գիտեմ թէ չեւեւս երկերուք ՛ի տ(թեն)է ա(ստուծո)յ։
³¹Կտաւն եւ գարին հարա́ւ. զի գարին յոճ կայր, եւ կտաւն սերմանացեալէր։
³²եւ ցորեանն եւ հաճար ո́չ հարան. զի անագան էին։

³³Եւ ել մովսէս ՛ի փարաւոնէ արտաքս քան զքաղաքն, եւ ձգեաց զձեռն իւր առ տ(է)ր. եւ դադարեցին ձայնքն եւ կարկուտն. եւ անձրեւ ո́չ եւս կաթեաց յերկիր։
³⁴Իբրեւ ետես փարաւոն եթէ դադարեաց անձրեւն եւ կարկուտ եւ ձայնքն, յաւել ՛ի մեղանչել. եւ ծանրացոյց զսիրտ իւր եւ զծառայից իւրոց։
³⁵եւ խստացաւ սիրտն փարաւոնի՝ եւ ո́չ արձակեաց զորդիսն ի(սրաէ)լի՝ որպէս խօսեցաւ տ(է)ր ՛ի ձեռն մովսիսի։

¹Խօսեցաւ տ(է)ր ընդ մովսիսի՝ եւ ասէ. մո́ւտ առ փարաւոն՝ զի ե́ս խստացուցի զսիրտ ն(ո)ր(ա) եւ զսիրտ ծառայից ն(ո)ր(ա). զի կարգա́ւ եկեսցեն նշանքն իմ ՛ի վ(ե)ր(այ) ն(ո)ց(ա)։
²Որպէս զի պատմիցէք յականջս որդւոց ձերոց, եւ որդւո́ց որդւոց ձերոց, ո́րչափ խաղացի ես ընդ եգիպտացիսդ. եւ զնշանս իմ զոր արարի ՛ի նոսա. եւ ծանիջիք՝ թէ ե́ս եմ տ(է)ր։
³Մտին մովսէս եւ ահարոն առաջի փարաւոնի, եւ ասեն ցնա. ա́յսպէս ասէ տ(է)ր ա(ստուա)ծն եբրայեցւոց. մինչեւ յե՞րբ ոչ կամիցիս ամաչել յինէն, արձակեա́ զժողովուրդ իմ զի պաշտեսցեն զիս։
⁴Ապա թէ ոչ կամիցիս դու արձակել զժողովուրդ իմ, ահաւասիկ ես ածի́ց ՛ի սոյն ժամու վաղիւ մարա́խ սաստիկ ՛ի վ(ե)ր(այ) ա(մենայ)ն սահմանաց քոց։

⁵եւ ծածկեսցէ́ զա(մենայ)ն երեսս երկրիդ. եւ ո́չ կարիցես տեսանել զերկիր։ եւ կերիցէ́ զա(մենայ)ն նշխարսն զոր եթող ձեզ կարկուտն. եւ կերիցէ զա(մենայ)ն փայտ բուսեալ ձեզ ՛ի վերայ երկրի։
⁶Եւ լցցին տո́ւնք քո, եւ տունք ծառայից քոց. եւ ա(մենայ)ն տունք յա(մենայ)ն երկրիդ եգիպտացւոց. զոր ո́չ երբէք տեսին հարք ձեր, եւ ո́չ հաւք նոցա, յորմէ օրէ եղեն յերկրի մինչեւ ցայսօր։ եւ խոյս տուեալ՝ ել ՛ի փարաւոնէ։
⁷Ասեն ցնա ծառայքն փարաւոնի. մինչեւ ե՞րբ իցէ մեզ խոչդ այդ. արձակեա́ զմարդիկն՝ զի պաշտեսցեն զտ(է)ր ա(ստուա)ծ իւրեանց. եթէ գիտե՞լ կամիցիս՝ զի կորեա́ւ եգիպտոս։

⁸Եւ դարձուցին զմովսէս եւ զահարոն առ փարաւոն. եւ ասէ ցն(ո)ս(ա), երթա́յք պաշտեցէ́ք զտ(է)ր ա(ստուա)ծ ձեր. բայց ո՞վ եւ ո́վ իցեն որ երթայցեն։
⁹Եւ ասէ մովսէս. երիտասարդօք հանդերձ՝ եւ ծերովք մերովք երթիցուք. ուստերօք եւ դստերօք մերովք. արջառով եւ ոչխարով մերով երթիցուք. զի տօ́ն է տ(եառ)ն ա(ստուծո)յ մերոյ։
¹⁰Եւ ասէ ցնոսա. եղիցի́ այդպէս. տ(է)ր ընդ ձեզ. քանզի արձակե́մ զձեզ, միթէ եւ զստացուա՞ծս ձեր։ Տեսանէ՞ք զի չարիք կան ՛ի ձեզ։
¹¹մի́ այդպէս. այլ երթիցեն ա́րք եւեթ, եւ պաշտեսցեն զա(ստուա)ծ. քանզի զայդ իսկ խնդրէիք դուք։ եւ հանին զնոսա յերեսաց փարաւոնի։

¹²Եւ ասէ տ(է)ր ցմովսէս. ձգեա́ զձեռն քո ՛ի վ(ե)ր(այ) երկրիդ եգիպտացւոց, եւ ելցէ մարա́խ ՛ի վ(ե)ր(այ) երկրիդ եգիպտացւոց, եւ կերիցէ զա(մենայ)ն բանջար երկրիդ. եւ զա(մենայ)ն պտուղ ծառոց զոր եթող կարկուտն։
¹³Եւ ամբա́րձ մովսէս զձեռն իւր յերկինս. եւ ա́ծ տ(է)ր հողմ հարաւոյ յերկիր զտիւն ա(մենայ)ն՝ եւ զգիշերն ա(մենայ)ն։ իբրեւ առաւօտ եղեւ, եւ հողմ հարաւոյ ա́ռ զմարախն,
¹⁴եւ եհան յա(մենայ)ն յերկիրն եգիպտացւոց. եւ դադարեցոյց ՛ի վ(ե)ր(այ) ա(մենայ)ն սահմանացն եգիպտացւոց։ Յարաջ քան զայն ո́չ եղեւ այնպիսի մարախ. եւ յետ այնորիկ ո́չ եղեւ այնպիսի։

¹⁵եւ ծածկեա́ց զա(մենայ)ն երեսս երկրին. եւ ապականեցա́ւ երկիրն. եւ եկեր զա(մենայ)ն բանջար երկրին. եւ զա(մենայ)ն պտուղ ծառոց, ուր մնաց ՛ի կարկտէ անտի. եւ ո́չ մնաց կանաչ, ո́չ ՛ի ծառս եւ ո́չ յա(մենայ)ն բանջար դաշտի յա(մենայ)ն երկրին եգիպտացւոց։
¹⁶Եւ փութացա́ւ փարաւոն կոչել զմովսէս եւ զահարոն, եւ ասէ. մեղա́յ առաջի տ(եառ)ն ա(ստուծո)յ ձերոյ եւ ձեզ։
¹⁷արդ՝ նեղեցէ́ք այսմ եւս յանցանաց իմոց. եւ աղաչեցէ́ք առ տ(է)ր ա(ստուա)ծ ձեր, եւ փարատեսցէ́ յինէն զմարախս զայս։
¹⁸Եւ ել մովսէս ՛ի փարաւոնէ. եւ եկաց յաղօթս առ ա(ստուա)ծ։
¹⁹եւ դարձոյց տ(է)ր հողմ սաստիկ ՛ի ծովէ, եւ ա́ռ զմարախն եւ ամաց ՛ի ծովն կարմիր. եւ ո́չ մնաց մարախ յա(մենայ)ն երկիրն եգիպտացւոց։

²⁰Եւ խստացոյց տ(է)ր զսիրտն փարաւոնի, եւ ո́չ արձակեաց զորդիսն ի(սրաէ)լի։
²¹Եւ ասէ տ(է)ր ցմովսէս. ձգեա́ զձեռն քո յերկինս. եւ եղիցի խաւա́ր ՛ի վ(ե)ր(այ) երկրիդ եգիպտացւոց. խաւար՝ շօշափելի́։
²²Ձգեաց մովսէս զձեռն իւր յերկինս. եւ եղեւ խաւա́ր եւ մէգ եւ մութ ՛ի վ(ե)ր(այ) ա(մենայ)ն երկրին եգիպտացւոց զերի́ս աւուրս։
²³եւ ո́չ ոք տեսանէր զեղբայր իւր զերիս աւուրս։ եւ ոչ ոք յարեաւ յանկողնոյ իւրմէ զերիս աւուրս։ բայց ա(մենայ)ն որդւոցն ի(սրաէ)լի լո́յս էր յա(մենայ)ն բնակու(թ)ի(ւն)ս իւրեանց։
²⁴Եւ կոչեաց փարաւոն զմովսէս եւ զահարոն եւ ասէ ցնոսա. երթա́յք պաշտեցէ́ք զտ(է)ր ա(ստուա)ծ ձեր, բայց զարջառ եւ զոչխար ձեր աստէ́ն թողէք. եւ այլ աղխդ ձեր՝ երթիցեն ընդ ձեզ։

²⁵Եւ ասէ մովսէս. նա եւ դո́ւ եւս տացես մեզ ողջակէզս եւ զոհս՝ զոր առնիցեմք տ(եառ)ն ա(ստուծո)յ մերում։
²⁶Այլ մեր անասո́ւն իսկ երթիցէ ընդ մեզ, եւ ո́չ թողուցումք եւ ոչ կճղա́կ մի. քանզի ՛ի նոցանէ́ առնուցումք պաշտել զտ(է)ր ա(ստուա)ծ մեր. եւ մեք ո́չ գիտեմք զինչ մատուցանիցեմք տ(եառ)ն ա(ստուծո)յ մերում մինչեւ ա́նդր հասանիցեմք։
²⁷Եւ խստացոյց տ(է)ր սիրտն փարաւոնի. եւ ո́չ կամեցաւ արձակել զնոսա։
²⁸Եւ ասէ փարաւոն. ՛ի բա́ց գնա յինէն. զգո́յշ լեր անձին քում. մի́ եւս յաւել
²⁹ուցուս տեսանել զերեսս իմ. զի յորում աւուր երեւիս դու ինձ՝ մեռանի́ս։
³⁰Եւ ասէ մովսէս. ասացեր՝ ո́չ եւս երեւեցայց երեսաց քոց։

¹Եւ ասէ տ(է)ր ցմովսէս. ա́յլ մեւս եւս հարուածս ածից ՛ի վերայ փարաւոնի եւ ՛ի վերայ եգիպտոսի. եւ ապա́ արձակեսցէ զձեզ աստի. այլ յորժամ արձակեսցէ զձեզ, ամենեւին հանցէ զձեզ աստի։
²Արդ՝ խօսեաց գաղտ յականջս ժողովրդեանն, եւ խնդրեսցեն իւրաքանչի́ւր ոք յընկերէ իւրմէ, եւ կին ՛ի դրացւոյ իւրմէ անօթս ոսկեղէնս եւ անօթս արծաթեղէնս, եւ հանդերձս։
³Եւ ետ տ(է)ր շնորհս ժողովրդեան իւրում առաջի եգիպտացւոցն. եւ ետուն ն(ո)ց(ա) ՛ի զարդ։ Եւ այրն մովսէս մեծարո́յ եղեւ յոյժ առաջի եգիպտացւոցն, եւ առաջի փարաւոնի, եւ առաջի ա(մենայ)ն ծառայից ն(ո)ր(ա). եւ յաչս ժողովրդեանն։
⁴Եւ ասէ մովսէս. ա́յսպէս ասէ տ(է)ր. զհասարակ գիշերաւ ե́ս մտից ՛ի մէջ եգիպտոսի։

⁵եւ սատակեցի́ց զա(մենայ)ն անդրանիկ յերկրէդ եգիպտացւոց, յանդրանկէ անտի փարաւոնի որ նստի յաթոռ ն(ո)ր(ա), մինչեւ ցանդրանիկ աղախնոյն որ կայցէ առ երկանս, եւ մինչեւ ցանդրանիկ ա(մենայ)ն անասնոց։
⁶եւ եղիցի աղաղա́կ մեծ յա(մենայ)ն երկրիդ եգիպտացւոց. որպիսի ո́չ եղեւ, եւ ո́չ եւս յաւելուցու լինել նոյնպիսի։
⁷Եւ ՛ի մէջ ա(մենայ)ն որդւոցն ի(սրաէ)լի ո́չ կռնչեսցէ եւ ո́չ շուն մի լեզուաւ իւրով, եւ ո́չ ՛ի մարդոյ մինչեւ յանասուն. զի գիտասցես ո՞րչափ ինչ սքանչելիս արասցէ́ տ(է)ր ՛ի մէջ եգիպտացւոցդ ՛ի մէջ ի(սրաէ)լի։
⁸Եւ իջցեն ա(մենայ)ն ծառայքս քո այսոքիկ առիս. եւ երկի́ր պագցեն ինձ եւ ասասցեն. ե́լ դու եւ ա(մենայ)ն ժողովուրդ քո, որում դուդ առաջնորդես. եւ ապա́ ելից։

⁹Եւ ել մովսէս ՛ի փարաւոնէ լի́ բարկութ(եամ)բ։ Եւ ասէ տ(է)ր ցմովսէս. ո́չ լուիցէ ձեզ փարաւոն, զի յաՃախեցից զնշանս եւ զարուեստս յերկրիդ եգիպտացւոց։
¹⁰Եւ մովսէ́ս եւ ահարոն արարին զա(մենայ)ն նշանս եւ զարուեստս զայսոսիկ յերկրին եգիպտացւոց առաջի փարաւոնի։ Եւ խստացոյց տ(է)ր զսիրտն փարաւոնի, եւ ո́չ կամեցաւ արձակել զորդիսն իսրայէլի յերկրէն եգիպտացւոց։

¹Եւ խօսեցաւ տ(է)ր ընդ մովսիսի եւ ընդ ահարոնի յերկրին եգիպտացւոց, եւ ասէ։
²Ամիսս այս եղիցի ձեզ սկիզբն ամսոց, առաջին եղիցի ձեզ յամիսս տարւոյ։
³Խօսեաց ընդ ա(մենայ)ն ժողովրդեան որդւոցն ի(սրաէ)լի եւ ասասցես։ ՛ի տասներորդում ամսեանս այսորիկ առցեն իւրեանց իւրաքանչիւր ոչխար ըստ տունս ազգաց իւրեանց. ոչխար ը(ս)տ երդ։
⁴Եւ եթէ սակաւք իցեն ՛ի տանն, որպէս թէ չիցե́ն բաւական լինել ոչխարին՝ առցէ́ ընդ իւր զդրացի իւր եւ զընկեր իւր ըստ մարդաթուի. իւրաքանչիւր ըստ բաւականի իւրում համարեսցի յոչխարն։
⁵Ոչխար կատարեալ՝ արրու, տարեւոր, անարա́տ լիցի ձեզ։ յօգեա́ց եւ յայծեաց առնուցո́ւք.

⁶եւ եղիցի ձեզ պահեալ մինչեւ ՛ի չորս եւ ՛ի տասն աւուր ամսոյս այսորիկ։ եւ զենցեն զնա ա(մենայ)ն բազմութի(ւն) ժողովրդեան որդւոցն ի(սրաէ)լի ընդ երեկս։
⁷եւ առցեն յարենէ անտի եւ դիցեն ՛ի վերայ երկուց սեմոցն եւ բարաւորին տանցն յորս ուտիցեն զնա ՛ի ն(ո)ս(ա)։
⁸Եւ կերիցեն զմիսն ՛ի գիշերիս յայսմիկ խորովեալ հրով. եւ բաղարջ ընդ եղիգի կերիցեն։
⁹եւ ո́չ ուտիցէք ՛ի նոցանէ հում, եւ ո́չ պախ եփեալ ջրով. այլ խորովեալ հրով. զգլուխն ոտիւքն հանդերձ, եւ զփորոտին ն(ո)ր(ա)։
¹⁰Եւ ո́չ թողուցուք ՛ի նմանէ յայգ. եւ ոսկր մի́ բեկանիցէք ՛ի նմանէ։ եւ որ ինչ մնասցէ ՛ի նմանէ յայգ՝ հրո́վ այրեսջիք։

¹¹Եւ այնպէս ուտիցէք, գօտիք ձեր ընդ մէջս, եւ կօշիկք ձեր յոտս, եւ ցուպ ձեր ՛ի ձերին։ փութանակի́ ուտիցէք, զի զատիկ տ(եառ)ն է։
¹²Եւ անցից ընդ ա(մենայ)ն երկիրդ եգիպտացւոց ՛ի գիշերիս յայսմիկ, եւ հարից զա(մենայ)ն անդրանիկ երկրիդ եգիպտացւոց ՛ի մարդոյ մինչեւ յանասուն։ եւ յամենայն դիսն եգիպտացւոց արարից վրէժխնդրութի(ւն), զի ե́ս եմ տ(է)ր։
¹³Եւ եղիցի ձեզ արիւնդ նշանակեալ ՛ի վերայ տանց՝ յորս ուտիցէք դուք անդ։ եւ տեսից զարիւնդ եւ ապրեցուցի́ց զձեզ. եւ ո́չ լինիցին ՛ի ձեզ հարուածք ՛ի սատակել՝ յորժամ հարկանիցեմ յերկրիդ եգիպտացւոց։
¹⁴Եւ եղիցի ձեզ արիւնդ այդ ՛ի յիշատա́կ, եւ տօնեցէք զդա՝ տօ́ն տ(եառ)ն յազգս ձեր. օրէն յաւիտենակա́ն տօնեցէք զդա։

¹⁵Զեւթն օր բաղա́րջ ուտիցէք, յառաջնմէ իսկ օրէ անտի՝ անհե́տ առնիջիք զխմոր ՛ի տանց ձերոց։ ա(մենայ)ն որ ուտիցէ խնորեալ՝ սատակեսցի́ անձնն այն յի(սրա)էլէ։
¹⁶Յառաջնմէ օրէն մինչեւ յօ́րն եւթներորդ. եւ օրն եւթներորդ նուիրեա́լ եղիցի ձեզ սո́ւրբ։ զա(մենայ)ն գործ սպասպու մի́ գործիցէք ՛ի նմա, բայց միայն որ գործիցի ա(մենայ)ն անձին՝ այն միայն գործեսցի ձեզ։
¹⁷Եւ պահեսջի́ք զպատուիրանս իմ զայս, զի յաւուր յայմիկ հանի́ց զզօրու(թ)ի(ւն) ձեր յերկրէս եգիպտացւոց. եւ առնիցէք զօրս զայս յազգս ձեր օրէ́ն յաւիտենական։
¹⁸՛Ի սկսանել չորեքտասաներորդի աւուր ամսոյն առաջնոյ. յերեկորեայ բաղարջ ուտիցէք, մինչեւ ցքսա́ն եւ մի օր ամսոյն ցերեկոյ։

¹⁹զեւթն օր մի́ գտցի խմոր ՛ի տունս ձեր. ա(մենայ)ն որ ուտիցէ խմորեալ՝ սատակեսցի́ անձն այն յի(սրա)էլէ։ յեկա́ց եւ ՛ի բնակաց երկրին
²⁰խմորեալ մի́ ուտիցեն. յա(մենայ)ն բնակու(թ)ե(ան) ձերում ուտիցէք բաղա́րջ։
²¹Եւ կոչեաց մովսէս զա(մենայ)ն ծերակոյտ որդւոցն ի(սրաէ)լի. եւ ասէ ցնոսա. երթա́յք առէք ձեզ ոչխար ըստ ազգս ձեր, եւ զենջի́ք ՛ի զատիկ։
²²Եւ առնուցուք մշտիկ զոպայի թաթաւեալ յարեան որ առ գրօքն իցէ, եւ սրսկեսջի́ք զբարաւորաւն եւ զերկոքումբք սեմովքն յարենէ անտի որ առ գրօքն։ բայց դուք մի́ ելանիցէք իւրաքանչիւր ընդ դուռն տան իւրոյ մինչեւ ցառաւօտ։

²³Եւ անցցէ տ(է)ր հարկանել զեգիպտացիսդ։ եւ տեսանիցէ զարիւնն որ ՛ի վ(ե)ր(այ) բարաւորին եւ ՛ի վ(ե)ր(այ) երկուց սեմոց, եւ զանց առնիցէ տ(է)ր զգրօքն. եւ ո́չ տայցէ թոյլ սատակչին մտանե́լ ՛ի տունս ձեր եւ հարկանել։
²⁴Եւ պահեսջի́ք զբանս զայս՝ օրէ́ն յաւիտենական քե́զ եւ որդւոց քոց, մինչեւ ցյաւիտեան։
²⁵Եւ եթէ մտանիցէք յերկիրն զոր տացէ ձեզ տ(է)ր՝ ո(ր)պ(էս) եւ խօսեցաւն, պահեսջի́ք զպաշտօնդ զայդ։
²⁶Եւ եղիցի եթէ ասիցեն ցձեզ որդիք ձեր. զի՞նչ է պաշտօնս այս ձեզ։
²⁷ասասջիք ն(ո)ց(ա), եթէ զո́հ զատկի տ(եառ)ն է այս. յորժամ պահեաց զտունս որդւոցն իսրայէլի յեգիպտոս։ մինչ հարկանէր զեգիպտացիսն, եւ զտունս մեր ապրեցոյց։ Եւ խոնարհեցաւ ժողովուրդն՝ եւ երկի́ր եպագ։

²⁸Եւ գնացեալ որդիքն ի(սրաէ)լի արարին ո(ր)պ(էս) պատուիրեաց տ(է)ր մովսիսի եւ ահարոնի, նոյնպէս եւ արարին։
²⁹Եւ եղեւ ՛ի հասարա́կ գիշերի՝ եւ տ(է)ր եհար զա(մենայ)ն անդրանիկս յերկրին եգիպտացւոց. յանդրանկանէ́ անտի փարաւոնի որ նստէր յաթոռ ն(ո)ր(ա), մինչեւ յանդրանիկ գերւոյն որ կայր ՛ի վիրապի. եւ զա(մենայ)ն անդրանիկ անասնոց։
³⁰Եւ յարեաւ փարաւոն գիշերայն, ի́նքն եւ ա(մենայ)ն ծառայք իւր, եւ ա(մենայ)ն եգիպտացիք. եւ եղեւ աղաղա́կ մեծ յա(մենայ)ն երկիրն եգիպտացւոց. զի ո́չ գոյր տուն յորում ոչ գոյր մեռեալ ՛ի նմա։

³¹Եւ կոչեաց փարաւոն զմովսէս եւ զահարոն գիշերայն, եւ ասէ ցնոսա. Արիք եւ ելէ́ք ՛ի ժողովրդենէ իմմէ. եւ դուք եւ որդիքն ի(սրաէ)լի, երթայք պաշտեցէ́ք զտ(է)ր ա(ստուա)ծ ձեր. ո(ր)պ(էս) եւ ասացէք։
³²եւ զարջառ եւ զոչխար ձեր առեալ գնացէք՝ ո(ր)պ(էս) եւ ասացէք։ բայց եւ զիս օրհնեցէ́ք։
³³Եւ բռնադատէին եգիպտացիքն զժողովուրդն փութանակի́ հանել զնոսա յերկրէ անտի։ քանզի ասէին՝ թէ ամենեքեան իսկ մեռանիմք։
³⁴Եւ ա́ռ ժողովուրդն զհայսն իւրեանց մինչ չե́ւ խմորեալ էր. եւ զզանգուածս իւրեանց ծրարեալ ՛ի կտաւս իւրեանց՝ ՛ի վերայ ուսոց իւրեանց։

³⁵Եւ որդիքն ի(սրաէ)լի արարի́ն որպէս եւ հրաման ետ ն(ո)ց(ա) մովսէս։ եւ խնդրեցին յեգիպտացւոցն անօթս ոսկեղէնս եւ անօթս արծաթեղէնս, եւ հանդերձս։
³⁶Եւ ետ տ(է)ր շնորհս ժողովրդեան իւրում առաջի եգիպտացւոցն, եւ ետուն ն(ո)ց(ա) ՛ի զարդ՝ եւ կողոպտեցին զեգիպտացիսն։
³⁷Եւ չուեցին որդիքն ի(սրաէ)լի յռամեսեայ ՛ի սիկովթ, վեց հարիւր հազար այր հետեւակ, թո́ղ զայլ աղխ։
³⁸Եւ խառնիճազանճ բազում ե́լ ընդ նոսա. եւ արջառ եւ ոչխար եւ անասուն բազում յոյժ։
³⁹Եւ եփեցին զհայսն զոր հանին յեգիպտոսէ. նկա́նս բաղարջս, քանզի ո́չ խմորեցաւ. զի հանին զնոսա եգիպտացիքն՝ եւ ո́չ կարէին մնալ, եւ ո́չ պաշար արարին իւրեանց ճանապարհին։

⁴⁰Եւ բնակութի(ւն) որդւոցն ի(սրաէ)լի զոր բնակեցին յերկրին եգիպտացւոց եւ յերկրին քանանացւոց, ինքեանք եւ հարք իւրեանց. ամք չորեքհարիւր եւ երեսուն։ Եւ եղեւ յետ չորեքհարիւր եւ երեսուն ամի,
⁴¹յաւուր յայնմիկ ելին ա(մենայ)ն զօրութիք տ(եառ)ն յերկրէն եգիպտացւոց
⁴²գիշերի։ որ էր յառաջապահե́ստ տ(եառ)ն հանել զնոսա յերկրէն եգիպտացւոց։ ա́յն գիշեր յառաջապահե́ստ տ(եառ)ն լինել ա(մենայ)ն որդւոցն ի(սրաէ)լի յազգս ն(ո)ց(ա)։
⁴³Խօսեցաւ տ(է)ր ընդ մովսիսի եւ ընդ ահարոնի՝ եւ ասէ։ ա́յս է օրէն զատկի։ ա(մենայ)ն այլազգի մի́ կերիցէ ՛ի նմանէ։
⁴⁴եւ զա(մենայ)ն ծառայ ուրուք եւ զարծաթագին թլփատեսցե́ս, եւ ապա́ կերիցէ ՛ի նմանէ։

⁴⁵պանդուխտն եւ վարձկանն մի́ կերիցէ ՛ի նմանէ։
⁴⁶՛Ի տան միում կերիցի։ եւ մի́ հանիցէք ՛ի մսոյ անտի արտաքս քան զտունն։ եւ Ոսկր մի́ բեկանիցէք ՛ի նմանէ։
⁴⁷ամենայն ժողովուրդ որդւոցն ի(սրաէ)լի առնիցեն զայն։
⁴⁸Ապաթէ մերձենայցէ առ ձեզ եկամուտ՝ եւ առնիցէ զզատիկն տ(եառ)ն, թլփատեսցե́ն զա(մենայ)ն արու մանուկ ն(ո)ր(ա), եւ ապա́ մերձեսցի առնել զնա եւ եղիցի իբրեւ զբնա́կ երկրին։ ա(մենայ)ն անթլփատ մի́ կերիցէ ՛ի նմանէ։
⁴⁹օրէն՝ մի եւ նո́յն կացցէ բնակին եւ եկին՝ որ գայցէ մերձենալ ՛ի ձեզ։
⁵⁰Եւ արարին ա(մենայ)ն որդիքն ի(սրաէ)լի՝ որպէս պատուիրեաց տ(է)ր մովսիսի եւ ահարոնի, նոյնպէս եւ արարին։

⁵¹Եւ եղեւ յաւուր յայնմիկ՝ եհա́ն տ(է)ր զորդիսն ի(սրաէ)լի յերկրէն եգիպտացւոց հանդերձ զօրու(թեամ)բ իւրեանց։

¹Խօսեցա́ւ տ(է)ր ընդ մովսիսի՝ եւ ասէ։
²Սրբեա́ դու ինձ զա(մենայ)ն անդրանիկս նախծին որ բանայ զա(մենայ)ն արգանդ ՛ի մէջ որդւոցն ի(սրաէ)լի. ՛ի մարդո́յ մինչեւ յանասուն՝ քանզի ի́մ է։
³Եւ ասէ մովսէս ցժողովուրդն. յիշեսջի́ք զօրս զայս յորում ելէք յեգիպտոսէ ՛ի տանէ ծառայութե(ան). զի հզօ́ր ձեռամբ եհան զձեզ տ(է)ր աստի։ եւ ո́չ ուտիցէք խմորուն։
⁴զի յայսմ աւուր ելէք դուք յամսեանս կանխոց։

⁵Եւ եղիցի յորժամ եթէ տանիցի զքեզ տ(է)ր ա(ստուա)ծ քո յերկրին քանանացւոց, եւ քետացւոց, եւ ամովրհացւոց, եւ խեւացւոց, եւ յեբուսացւոց, եւ փերեզացւոց եւ գերգեսացւոց. զոր երդուա́ւ հարցն քոց տալ քեզ, երկիր որ բղխէ́ զկաթն եւ զմեղր. եւ արասցե́ս զպաշտօնս զայս յամսեանս յայսմիկ։
⁶Զեւթն օր բաղա́րջ կերիջի́ք. եւ յաւուրն եւթներորդի տօ́ն տ(եառ)ն։
⁷բաղարջ կերիջիք։ զեւթն օր ո́չ երեւեսցի առ քեզ խմորուն. եւ ո́չ եղիցի խմոր յա(մենայ)ն սահմանս քո։
⁸Եւ պատմեսցես որդւոյ քում յաւուր յայնմիկ եւ ասասցես։ վ(ա)ս(ն) ա́յնորիկ արար ինձ տ(է)ր ա(ստուա)ծ. մինչ ելանէի յեգիպտոսէ։

⁹Եւ եղիցի քեզ նշա́ն ՛ի ձեռին քում, եւ յիշատակ առաջի աչաց քոց. զի լինիցին օրէնք տ(եառ)ն ՛ի բերա́ն քում. զի հզօր ձեռամբ եհան զքեզ տ(է)ր յեգիպտոսէ.
¹⁰եւ պահեսջիք զօրէնս զայս ՛ի ժամանակաց ՛ի ժամանակս, եւ աւուրց յաւուրս։
¹¹Եւ եղիցի յորժամ տանիցի զքեզ տ(է)ր ա(ստուա)ծ քո յերկիրն քանանացւոց՝ որպէս երդուաւ քեզ եւ հարցն քոց. եւ տացէ զնա քեզ.
¹²զատուսցե́ս տ(եառ)ն զա(մենայ)ն արրու որ բանայ զարգանդ. եւ զա(մենայ)ն որ բանայ զարգանդ յանդէոց եւ յանասնոց քոց որ լինիցի քեզ. արուքն սո́ւրբ տ(եառ)ն լինիցին։

¹³Եւ զա(մենայ)ն որ բանայցէ զարգանդ իշոյ, փոխանակեսցես ընդ ոշխարի։ եւ եթէ ո́չ փոխանակեսցե́ս, փրկեսցե́ս զնա։ զա(մենայ)ն անդրանիկս որդւոց քոց փրկեսցես։
¹⁴Եւ եթէ հարցանիցէ զքեզ որդին քո յետ այսորիկ եւ ասիցէ՝ թէ զի՞նչ է այդ. ասասցե́ս ցնա. զի հզօր ձեռամբ եհան զմեզ տ(է)ր յեկրէն եգիպտացւոց ՛ի տանէ ծառայու(թ)ե(ան)։
¹⁵յորժամ խստացաւ փարաւոն չարձակել զմեզ. կոտորեաց տ(է)ր զա(մենայ)ն անդրանիկս յերկրին եգիպտացւոց. յանդրանկէ մարդոյ մինչեւ ցանդրանիկս անասնոյ։ վ(ա)ս(ն) այնորիկ ես մատուցանեմ տ(եառ)ն զա(մենայ)ն արու որ բանայ զարգանդ. եւ զա(մենայ)ն անդրանիկս որդւոց իմոց փրկեցի́ց։

¹⁶Եւ եղիցի նշան ՛ի վերայ ձեռին քոյ. եւ անշա́րժ առաջի աչաց քոց. քանզի հզօր ձեռա́մբ եհան զմեզ տ(է)ր յերկրէն եգիպտացւոց։
¹⁷Եւ իբրեւ արձակեաց փարաւոն զժողովուրդն. ո́չ առաջնորդեաց նոցա ա(ստուա)ծ ընդ երկիրն փղշտացւոց, ընդ կարճոյ ճանապարհն. քանզի ասաց ա(ստուա)ծ, թէ գուցէ զանգիտիցէ ժողովուրդն՝ յորժամ տեսանիցէ զպատերազմն, եւ դառնայցէ́ յեգիպտոս։
¹⁸եւ պատեաց ած ա(ստուա)ծ զժողովուրդն ընդ ճանապարհ անապատին՝ առ կարմիր ծովուն։ Եւ ՛ի հինգերորդ ազգի ելին որդիքն ի(սրաէ)լի յերկրէն եգիպտացւոց։

¹⁹Եւ ա́ռ մովսէս զոսկերսն յովսեփու ընդ իւր. քանզի երդմնեցո́յց յովսէփ զորդիսն ի(սրաէ)լի, եւ ասէ, եթէ այցելու(թեամ)բ ա́յց արասցէ ձեզ տ(է)ր, հանջի́ր զոսկերս իմ աստի ընդ ձեզ։
²⁰Եւ չուեալ որդւոցն ի(սրաէ)լի ՛ի սիկքովթայ, բանակեցան յոթոմ առ անապատին։
²¹Եւ ա(ստուա)ծ առաջնորդէր ն(ո)ց(ա) ցերեկ՝ սեա́մբ ամպոյ. ցուցանել ն(ո)ց(ա) զճանապարհն։ եւ զցայգ՝ սեամբ հրոյ, լուսատո́ւ լինել ն(ո)ց(ա) ՛ի գնալն՝ զցայգ եւ զցերեկ։
²²Եւ ո́չ պակասէր սիւն ամպոյն ՛ի տուէ, եւ սիւն հրոյն ՛ի գիշերի. առաջի ա(մենայ)ն որդւոցն ի(սրաէ)լի։

¹Եւ խօսեցաւ տ(է)ր ընդ մովսիսի եւ ասէ։
²Խօսեա́ց ընդ որդիսն ի(սրաէ)լի, եւ դարձցին բանակեսցին դէմ յանդիման հանդրուանին. ընդ մագդովղ, եւ ընդ ծովն. հանդէպ բէելսեպփոնեայ. յանդիման ն(ո)ց(ա) բանակեսցիս առ ծովեզերբն։
³Եւ ասասցէ փարաւոն զորդւոցդ ի(սրաէ)լի թէ մոլորեա́լ են յերկրին, քանզի պատեաց զնոսա անապատն։
⁴Եւ ես խստացուցի́ց զսիրտն փարաւոնի եւ պնդեսցի զհետ դոցա։
⁵եւ փառաւորեցա́յց ՛ի փարաւոն եւ յա(մենայ)ն զօրս ն(ո)ր(ա)։ եւ ծանիցեն ա(մենայ)ն եգիպտացիքն թէ ե́ս եմ տ(է)ր։ եւ արարին ա́յնպէս։

⁶Եւ ա́զդ եղեւ արքային եգիպտացւոց եթէ փախեաւ ժողովուրդն։ եւ շրջեցաւ սիրտն փարաւոնի՝ եւ ծառայից իւրոց ՛ի վ(ե)ր(այ) ժողովրդեանն, եւ ասեն. զի՞նչ գործեցաք զայն զի արձակեցաք զորդիսն ի(սրաէ)լի, զի մի́ ծառայեսցեն մեզ։
⁷Եւ հանդերձեաց փարաւոն զկառս իւր. եւ տարաւ ընդ իւր զա(մենայ)ն ժողովուրդն իւր. եւ ա́ռ վեցհարիւր կառս ընտիրս, եւ զա(մենայ)ն երիվարս եգիպտացւոց, եւ սպառազէ́նս ՛ի վերայ ամենեցուն։
⁸Եւ խստացոյց տ(է)ր զսիրտն փարաւոնի արքային եգիպտացւոց, եւ պնդեցաւ զհետ որդւոցն ի(սրաէ)լի։ եւ որդիքն ի(սրաէ)լի ելանէին բարձրացեալ ձեռամբ։

⁹Եւ պնդեցան եգիպտացիքն զհետ ն(ո)ց(ա), եւ գտին զնոսա բանակեալս առ ծովեզերբն. եւ ա(մենայ)ն երիվարք՝ եւ կառք փարաւոնի, եւ հեծեալք ն(ո)ր(ա) եւ զօրք ն(ո)ր(ա) յանդիման հանգրուանին. հանդէպ բեէղսեպփոնայ։
¹⁰եւ եհաս մօտ փարաւոն։ Եւ համբարձեալ որդւոցն ի(սրաէ)լի զաչս իւրեանց տեսանէին՝ զի բանակեցան եգիպտացիքն ՛ի թիկանց նոցա, եւ երկեա́ն յոյժ։
¹¹Եւ բողոքեցի́ն որդիքն ի(սրաէ)լի առ տ(է)ր։ եւ ասեն ցմովսէս իբրեւ թէ ո՞չ գոյին գերեզմանք յերկրին եգիպտացւոց. հաներ զմեզ սպանանե՞լ յանապատի աստ։ զի՞նչ գործեցեր զայս ընդ մեզ, զի հաներ զմեզ յեգիպտոսէ։

¹²Ո՞չ այս այն բանք են՝ զոր խօսեցաք ընդ քեզ յերկրին եգիպտացւոց, թէ թո́յլ տուր մեզ զի ծառայեսցուք եգիպտացւոցն։ զի լա́ւ էր մեզ ծառայել եգիպտացւոցն, քան մեռանել յայսմ անապատի։
¹³Եւ ասէ մովսէս ցժողովուրդն. քաջալերեցարո́ւք, պի́նդ կացէք. եւ տեսանիցէք զփրկու(թ)ի(ւն) ՛ի տ(թեն)է զոր արասցէ ձեզ այսօր։ զի զորօրինակ տեսէք զեգիպտացիսն այսօր, ո́չեւս յաւելուցուք տեսանել զն(ո)ս(ա) յաւիտեանս ժամանակաց։
¹⁴տ(է)ր տայ պատերազմ ընդ ձեր, եւ դուք լռեցէ́ք։
¹⁵Եւ ասէ տ(է)ր ցմովսէս. զի՞ գոչես առիս։ խօսեա́ց ընդ որդիսդ ի(սրաէ)լի՝ եւ չուեսցեն։

¹⁶եւ դու ա́ռ զգաւազանդ քո. եւ ձգեա́ զձեռն քո ՛ի վ(ե)ր(այ) ծովուն եւ սպառեա́ զնա։ եւ մտցեն որդիքն ի(սրաէ)լի ՛ի մէջ ծովուն ընդ ցամաք։
¹⁷Եւ ահա ես խստացուցի́ց զսիրտն փարաւոնի, եւ զեգիպտացւոցն ամենեցուն, եւ մտցեն զկնի դոցա։ եւ փարաւորեցայց ես ՛ի փարաւոն եւ յա(մենայ)ն զօրս ն(ո)ր(ա), եւ ՛ի կառս ն(ո)ր(ա) եւ յերիվարս ն(ո)ր(ա)։
¹⁸եւ ծանիցեն ա(մենայ)ն եգիպտացիքն՝ թէ ե́ս եմ տ(է)ր. ՛ի փարաւորել իմում ՛ի փարաւոն՝ եւ ՛ի կառս ն(ո)ր(ա) եւ յերիվարս նորա։
¹⁹Եւ ամբարձա́ւ հրեշտակն ա(ստուծո)յ որ երթայր առաջի բանակի որդւոցն ի(սրաէ)լի. եւ չոգաւ զկնի ն(ո)ց(ա). եւ վերացաւ սիւն ամպոյն յերեսաց ն(ո)ց(ա), եւ եկաց ՛ի թիկանց ն(ո)ց(ա)։

²⁰եւ եմուտ ՛ի մէջ բանակի եգիպտացւոցն, եւ ՛ի մէջ բանակի իսրայէլացւոցն. եւ եղեւ խաւա́ր եւ մէգ։ եւ անց գիշերն. եւ ո́չ խառնեցան ընդ միմեանս զա(մենայ)ն գիշերն։
²¹Եւ ձգեաց մովսէս զձեռն իւր ՛ի վ(ե)ր(այ) ծովուն. եւ դարձո́յց անդրէն զծովն բռնութ(եամ)բ հողմոյ հարաւոյ զա(մենայ)ն գիշերն։ եւ արա́ր զծովն ցամաք. եւ պատառեցաւ ջուրն։
²²Եւ մտին որդիքն ի(սրաէ)լի ընդ մէջ ծովուն ընդ ցամաք։ եւ եղեւ ջուրն պարիսպ ընդ աջմէ նոցա, եւ ընդ ահեկէ իւրեանց։
²³Պնդեցան եգիպտացիքն՝ եւ մտին զկնի ն(ո)ց(ա), ա(մենայ)ն երիվարք փարաւոնի, եւ կառք նորա, եւ հեծեալք ն(ո)ր(ա) ՛ի մէջ ծովուն։

²⁴Եւ եղեւ յառաւօտին պահուն, հայեցա́ւ տ(է)ր ՛ի բանակն եգիպտացւոց սեամբ հրոյ եւ ամպոյ. եւ խռովեաց զբանակն եգիպտացւոցն.
²⁵եւ կապեա́ց զանիւս կառաց ն(ո)ց(ա), եւ վարէր զնոսա բռնու(թեամ)բ։ Ասեն եգիպտացիքն, փախիցո́ւք յերեսաց ի(սրաէ)լի. զի տ(է)ր պատերազմի վասն ն(ո)ց(ա) ընդ եգիպտացիսս։
²⁶Եւ ասէ տ(է)ր ցմովսէս. ձգեա́ զձեռն քո ՛ի վերայ ծովուդ, եւ կարկատեսցի́ անդրէն ջուրդ. եւ ծածկեսցէ́ զեգիպտացիսդ, եւ զկառս դոցա եւ զհեծեալս իւրեանց։
²⁷Եւ ձգեա́ց մովսէս զձեռն իւր ՛ի վերայ ծովուն, եւ դարձաւ ջուրն ընդ առաւօտն ՛ի տեղի իւր։ եւ եգիպտացիքն փախեան յերեսաց ջրոյն։ եւ թօթափեա́ց տ(է)ր զեգիպտացիսն ՛ի մէջ ծովուն։

²⁸եւ դարձուցեալ զջուրսն, ծածկեաց զկառս եւ զհեծեալս, եւ զա(մենայ)ն զօրութի(ւն) փարաւոնի. որ մտեալէին զհետ ն(ո)ց(ա) ՛ի ծով անդր. եւ ո́չ մնաց ՛ի նոցանէ եւ ո́չ մի։
²⁹Եւ որդիքն ի(սրաէ)լի գնացին ընդ ցամաք ՛ի մէջ ծովուն. եւ ջուրն պարիսպ էր ընդ աջմէ նոցա եւ ընդ ահեկէ իւրեանց։
³⁰Եւ ապրեցո́յց տ(է)ր զի(սրա)էլ յաւուր յայնմիկ ՛ի ձեռաց եգիպտացւոցն։
³¹Եւ ետես ի(սրա)էլ զեգիպտացիսն մեռեալս առ ափն ծովուն։ եւ ետես ի(սրա)էլ զձեռն մեծ զոր արար տ(է)ր ընդ եգիպտացիսն. եւ երկեա́ւ ժողովուրդն ՛ի տ(թեն)է. եւ հաւատացին յա(ստուա)ծ՝ եւ ՛ի մովսէս ծառայ ն(ո)ր(ա)։

¹Յայնժամ երգեաց մովսէս՝ եւ որդիքն ի(սրաէ)լի զօրհնութի(ւն)ս զայս ա(ստուծո)յ, եւ ասեն։ Օրհնեսցուք զտ(է)ր զի փառօք է փառաւորեալ. Զերիվարս եւ զհեծեալս նոցա ընկէ́ց ՛ի ծով.
²օգնական ընդունելի իմ տ(է)ր, եւ եղեւ ինձ ՛ի փրկութի(ւն)։ Սա́ է իմ ա(ստուա)ծ եւ փառաւո́ր արարից զսա։ ա(ստուա)ծ հօր իմոյ՝ եւ բա́րձր արարից զսա։
³Տ(է)ր խորտակէ զպատերազմունս, տ(է)ր անուն ն(ո)ր(ա)։
⁴Զկառս փարաւոնի՝ եւ զզօրութի(ւն)ս նորա ընկէ́ց ՛ի ծով. զընտիրս հեծելոց եւ զսպառազէնս. ընկղմեցան ՛ի ծով կարմիր։
⁵Խորք ծածկեցին զնոսա. ընկլան յանդունդս իբրեւ զվէմս։
⁶Աջ քո տ(է)ր փառաւորեալ է զօրու(թեամ)բ իւրով, աջ քո տ(է)ր խորտակեաց զթշնամին։

⁷Եւ բազմու(թեամ)բ փառաց քոց մանրեցեր զհակարակորդս, առաքեցեր զբարկութի(ւն) քո, եւ եկե́ր զնոսա իբրեւ զեղէգն։
⁸Եւ հողմով սրտմտութ(եամ)բ քով պատառեցան ջուրք. պաղեցան ո(ր)պ(էս) պարիսպ ջուրք. պաղեցան ալիք ՛ի մէջ ծովուն։
⁹Ասա́ց թշնամին, հալածեցից եւ հասից, բաժանեցից զաւարն, եւ լցուցի́ց ՛ի նոցանէ զանձն իմ։ Սատակեցից սրով իմով. տիրեսցէ́ նոցա ձեռն իմ։
¹⁰Առաքեցեր զհողմն քո, եւ ծածկեաց զնոսա ծով. ընկղմեցան որպէս կապա́ր ՛ի ջուրս սաստիկս։
¹¹Ո՞վ իցէ նման քեզ յաստուածս տ(է)ր. եւ կամ ո՞վ նմանիցէ քեզ փառաւորեալդ ՛ի ս(ուր)բս։ Սքանչելի փառօք՝ որ առնես զնշանս.
¹²ձգեցեր զաջ քո՝ եւ եկուլ զնոսա երկիր։

¹³Առաջնորդեցեր արդարութ(եամ)բ ժողովրդեան քում, այսմ զոր փրկեցեր։ Մխիթարեցեր զօրութ(եամ)բ քով ՛ի բանակետղ սրբու(թ)ե(ան) քոյ.
¹⁴լուան ազգք եւ բարկացան, եւ երկունք կալան զբնակիչս քանանացւոց։
¹⁵Յայնժամ տագնապեցան դատաւորք եդովմայ, եւ իշխանք մովաբացւոց։ Կալաւ զնոսա դողումն, հալեցա́ն ա(մենայ)ն բնակիչք քանանացւոց։
¹⁶Անկցի ՛ի վերայ ն(ո)ց(ա) ա́հ եւ երկիւղ. մեծութ(եամ)բ բազկի քոյ քարասցին։ Մինչեւ անցցէ ժողովուրդ քո տ(է)ր. մինչեւ անցցէ́ ժողովուրդ քո այս զոր ստացար։
¹⁷Տարեալ տնկեսցես զն(ո)ս(ա) ՛ի լեառն ժառանգութե(ան) քոյ, ՛ի պատրաստութի(ւն) բնակու(թ)ե(ան) քոյ։ Զոր արարեր տ(է)ր սրբութի(ւն). տ(է)ր զոր պատրաստեցին ձեռք քո.

¹⁸տ(է)ր թագաւոր յաւիտեան. եւ յաւիտեանս եւ ե́ւս։
¹⁹Զի մտին երիվարք փարաւոնի կառօք եւ հեծելովք ն(ո)ր(ա) ՛ի ծով. եւ ած ՛ի վերայ ն(ո)ց(ա) տ(է)ր զջուրս ծովուն. եւ որդիքն ի(սրաէ)լի գնացին ընդ ցամաք ՛ի մէջ ծովուն։
²⁰Եւ ա́ռ մարիամ մարգարէ քոյրն ահարոնի զթմբուկն ՛ի ձեռին իւր. եւ ելին ա(մենայ)ն կանայք զհետ ն(ո)ր(ա) թմբկօք եւ պարուք։
²¹եւ յառաջէր մարիամ եւ ասէր։ Օրհնեսցո́ւք զտ(է)ր, զի փառօք փառաւորեալ է. Զերիվարս եւ զհեծեալս ընկէ́ց ՛ի ծով։
²²Եւ խաղացո́յց մովսէս զորդիսն ի(սրաէ)լի ՛ի կարմիր ծովէ անտի. եւ ած զն(ո)ս(ա) յանապատն ՛ի սո́ւր։ եւ գնացին երեքօրեայ ճանապարհ յանապատի անդ. եւ ո́չ գտանէին ջուր ընպելոյ։

²³Եկին ՛ի մեռա, եւ ո́չ կարէին ըմպել ջուր ՛ի մեռայն. քանզի դա́ռն էր. վ(ա)ս(ն) այնորիկ անուանեաց զանուն տեղւոյն այնորիկ՝ դառնութի(ւն)։
²⁴Եւ տրտնջեա́ց ժողովուրդն զմովսիսէ եւ ասեն. զի՞նչ արբցուք։
²⁵աղաղակեաց մովսէս առ տ(է)ր։ եւ եցոյց նմա տ(է)ր փայտ։ եւ արկ զայն ՛ի ջուրն, եւ քաղցրացա́ւ ջուրն։ Եւ ա́նդ եդ նմա իրաւունս եւ դատաստանս. եւ ա́նդ փորձեաց զնա,
²⁶եւ ասէ, եթէ լսելո́վ լուիցես ձայնի տ(եառ)ն ա(ստուծո)յ քում, եւ զհաճոյս առաջի ն(ո)ր(ա) արասցես, եւ ունկնդի́ր լիցիս պատուիրանաց ն(ո)ր(ա). եւ պահեսցես զա(մենայ)ն իրաւունս ն(ո)ր(ա). զա(մենայ)ն զախտն զոր ածի ՛ի վերայ եգիպտացւոցն, ո́չ ածից ՛ի վերայ քո. զի ե́ս եմ տ(է)ր որ բժշկեմ զքեզ։

²⁷Եւ եկին յաղիմ. եւ էին անդ երկոտասան աղբեւր ջուրց, եւ եւթանասուն ծառ արմաւենեաց. եւ ա́նդ բնակեցան առ ջրովն։

¹Չուեցին յեղիմայ, եւ եկին ա(մենայ)ն ժողովուրդ որդւոցն ի(սրաէ)լի յանապատն ՛ի սին, որ է ը(ստ) եղիմ եւ ընդ սինա։ Եւ յաւուր հինգետասաներորդի յերկրորդի ամսոյն ելանելոյ նոցա յերկրէն եգիպտացւոց։
²տրտնջեա́ց ա(մենայ)ն ժողովուրդ որդւոցն ի(սրաէ)լի զմովսիսէ եւ զահարոնէ յանապատի անդ։
³Եւ ասեն ցն(ո)ս(ա) որդիքն ի(սրաէ)լի. լա́ւ էր թէ մեռեալէաք հարուածովքն ՛ի տ(եառ)նէ յերկրին եգիպտացւոց. մինչ նստէաք առ կաթսայ մսոյն, եւ ուտէաք հաց յագ. քան հանէք զմեզ յանապատս յայս, սպանանե́լ զա(մենայ)ն ժողովուրդս ՛ի սովոյ։

⁴Եւ ասէ տ(է)ր ցմովսէս. ահա ես տեղացի́ց ձեզ հաց յերկնից. եւ ելցէ́ ժողովուրդ իմ եւ ժողովեսցեն զօրըստօրէն, զի փորձեցից զն(ո)ս(ա)՝ եթէ գնայցե՞ն յօրէնս իմ, թէ ոչ։
⁵եւ եղիցի յաւուրն վեցերորդի, պատրաստիցեն զոր ինչ բերիցենն. եւ եղիցի կրկին քան զայն, զոր օրըստօրէն ժողովիցեն։
⁶Եւ ասեն մովսէս եւ ահարոն ցա(մենայ)ն ժողովուրդ որդւոցն ի(սրաէ)լի. ընդ երեկոյս գիտասջիք՝ եթէ տ(է)ր եհան զձեզ յերկրէն եգիպտացւոց։
⁷եւ առաւօտուց տեսջիք զփառսն տ(եառ)ն։ ՛ի լսել ն(ո)ր(ա) զտրտունջ ձեր զա(ստուծո)յ։ այլ մեք ո́վ եմք զի տրտնջէք զմէնջ։

⁸Եւ ասէ մովսէս՝ ՛ի տալ ձեզ տ(եառ)ն ընդ երեկոյս միս ուտելոյ. եւ ընդ առաւօտս հաց յագ. վասն լսելոյ տ(եառ)ն զտրտունջ ձեր զոր դուք տրտնջեցէք զմէնջ. քանզի մեք ո՞վ եմք. զի ո́չ զմէնջ է տրտունջդ ձեր, այլ զա(ստուծո)յ։
⁹Եւ ասէ մովսէս ցահարոն. ասա́ ցա(մենայ)ն ժողովուրդ որդւոցդ ի(սրաէ)լի. մատերո́ւք առաջի տ(եառ)ն, քանզի լուաւ զտրտունջ ձեր։
¹⁰Մինչդեռ խօսէր ահարոն ընդ ա(մենայ)ն ժողովրդեան որդւոցն ի(սրաէ)լի, դարձա́ն յանապատն. եւ ահա́ փառք տ(եառ)ն երեւեցան ամպով։
¹¹Եւ խօսեցաւ տ(է)ր ընդ մովսիսի՝ եւ ասէ։

¹²լուա́յ զտրտունջ որդւոցդ ի(սրաէ)լի։ արդ խօսեաց ընդ դոսա՝ եւ ասասցես. ընդ երեկոյս մի́ս կերիջիք, եւ ընդ առաւօտս հացի́ւ յագեսջիք. եւ ծանիջիք թէ ե́ս եմ տ(է)ր ա(ստուա)ծ ձեր։
¹³Եւ եղեւ ընդ երեկոյսն, եւ ել լորամարգին եւ ծածկեաց զբանակն։
¹⁴եւ եղեւ ընդ առաւօտն՝ ընդ արկանել ցօղոյն շուրջ զբանակաւն. եւ ահա ՛ի վերայ երեսաց անապատին՝ մա́նր իբրեւ զգինձ, սպիտակ իբրեւ զեղեամն ՛ի վերայ երկրին։
¹⁵Իբրեւ տեսին զայն որդիքն ի(սրաէ)լի, ասեն այր ցընկեր, զի՞նչ է այս. քանզի ո́չ գիտէին զինչ իցէ։ եւ ասէ ցնոսա մովսէս. ա́յդ է հացն զոր ետ ձեզ տ(է)ր ուտելոյ.

¹⁶եւ այս բան է՝ զոր պատուիրեաց ձեզ տ(է)ր։ Ժողովեցէ́ք ՛ի դմանէ իւրաքանչիւր ըստ բաւականի́ իւրում. չափո́վ ըստ գլուխ. ըստ թուոյ անձանց ձերոց, ըստ իւրաքանչիւր ըստ վրա́նս ձեր ժողովեցէ́ք։
¹⁷Եւ արարին ա́յնպէս որդիքն ի(սրաէ)լի. եւ ժողովեցին, որ շա́տ եւ որ սակաւ։
¹⁸եւ չափեցին չափովն։ որոյ շատն էր՝ ո́չ յաւելաւ. եւ որոյ սակաւն էր՝ ո́չ պակասեաց։ իւրաքանչիւր ը(ս)տ բաւականի́ իւրում ժողովեցին։
¹⁹Եւ ասէ ցնոսա մովսէս. մի́ ոք թողուցու այտի յայգ։
²⁰Եւ ո́չ լուան մովսիսի. այլ թողին ոմանք ՛ի նմանէ յայգ. եւ եռաց ՛ի նմա որդն, եւ նեխեցաւ։ եւ դառնացաւ ՛ի ն(ո)ս(ա) մովսէս։
²¹Եւ քաղէին այգուն այգուն իւրաքանչիւր ըստ բաւականի իւրում. եւ իբրեւ արեւն ջեռնոյր՝ հալէ́ր։

²²Եւ եղեւ յաւուրն վեցերորդի ժողովեցին զպէտսն կրկին՝ երկո́ւս չափս առ մի մի։ եւ մտին ա(մենայ)ն իշխանք ժողովրդեանն եւ պատմեցին մովսիսի։
²³Ասէ ցնոսա մովսէս. ա́յս բան է զոր խօսեցաւ տ(է)ր։ Շաբաթ՝ հանգիստ՝ սուրբ տ(եառ)ն վաղիւ։ որ ինչ եփելոց էք՝ եփեցէ́ք, եւ որ ինչ հասուցանելոց էք՝ հասուցէ́ք եւ զա(մենայ)ն զաւելորդն թողուցուք յամանս մինչեւ ցառաւօտ։
²⁴Եւ թողին ՛ի նմանէ յայգ. ո(ր)պ(էս) հրամայեաց ն(ո)ց(ա) մովսէս. եւ ո́չ նեխեցաւ, եւ ո́չ եղեւ ՛ի նմա որդն։
²⁵Եւ ասէ մովսէս. կերայք զայդ այսօր. քանզի շաբա́թ տ(եառ)ն է այսօր. ո́չ գտանէք այսօր զայդ ՛ի դաշտի։
²⁶զվեց օր ժողովեցէ́ք զայդ. եւ յաւուրն եւթներորդի շաբա́թ. ո́չ լինիցի ՛ի նմա։

²⁷Եւ եղեւ յաւուրն եւթներորդի՝ ելին ոմանք ՛ի ժողովրդենէ անտի քաղել՝ եւ ո́չ գտին։
²⁸Եւ ասէ տ(է)ր ցմովսէս. մինչեւ յե՞րբ ո́չ կամիք լսել պատուիրանաց իմոց եւ օրինաց։
²⁹տեսէ́ք զի տ(է)ր ետ ձեզ զօրս զայս շաբա́թ. վասն այնորիկ ինքն ետ ձեզ յաւուրն վեցերորդի հաց՝ երկուց աւուրց։ Նստարո́ւք իւրաքանչիւր ՛ի տունս ձեր. եւ մի́ ոք ելանիցէ ՛ի տեղւոջէ իւրմէ յաւուրն եւթներորդի։
³⁰Եւ շաբաթացա́ւ ժողովուրդն յաւուրն եւթներորդի։
³¹Եւ անուանեցին որդիքն ի(սրաէ)լի զանուն ն(ո)ր(ա) ման։ եւ նա́ էր իբրեւ զսերմն գնձոյ՝ սպիտա́կ. եւ հա́մ նորա իբրեւ զխորիսխ մեղու։

³²Եւ ասէ մովսէս. ա́յս բա́ն է՝ զոր հրաման ետ տ(է)ր. լցէ́ք լի չափով զմանանայդ յաման մի. եւ պահեցէ́ք յազգս ձեր. զի տեսանիցէք զհացդ զոր կերայք դուք յանապատի աստ. ՛ի ժամանակի իբրեւ եհան զձեզ տ(է)ր յերկրէն եգիպտացւոց։
³³Եւ ասէ մովսէս ցահարոն. ա́ռ սափոր մի ոսկի, եւ արկցե́ս ՛ի նա լի չափովդ մանանայ, եւ դիցես զնա առաջի ա(ստուծո)յ ՛ի պահե́ստ յազգս ձեր։
³⁴որպէս հրաման ետ տ(է)ր մովսիսի։ Եւ եդ զայն ահարոն առաջի վկայութե(ա)ն ՛ի պահեստ։
³⁵Եւ որդիքն ի(սրաէ)լի կերան զմանանայն զքառասուն ամ մինչեւ եկին ՛ի շէն երկիրն, զմանանա́յն ուտէին. մինչեւ հասին ՛ի կողմն փիւնիկեցւոց։
³⁶եւ չափն էր տասներորդ երից գրուաց։

¹Եւ չուեաց ա(մենայ)ն ժողովուրդ որդւոցն ի(սրաէ)լի ՛ի սինն անապատէ, ըստ բանակս իւրեանց բանիւ տ(եառ)ն։ եւ բանակեցան յռափիդիմ։ Եւ ո́չ գոյր ջուր ըմպել ժողովրդեանն։
²եւ բամբասէ́ր ժողովուրդն զմովսէս՝ եւ ասէին. տո́ւր մեզ ջուր զի արբցուք։ Եւ ասէ ցնոսա մովսէս. զի՞ բամբասէք զիս. եւ զի՞ փորձէք զտ(է)ր։
³Եւ ծարաւեաց անդ ժողովուրդն ՛ի ջրոյ։ եւ տրտնջեաց ժողովուրդն զմովսիսէ, եւ ասեն. ընդէ՞ր հաներ զմեզ յեգիպտոսէ, կոտորե́լ զմեզ եւ զորդիս մեր, եւ զխաշինս մեր ՛ի ծարաւոյ։
⁴Եւ բողոքեաց մովսէս առ տ(է)ր եւ ասէ. զի՞նչ արարից ժողովրդեանս այսմիկ. սակաւիկ մեւս եւս. եւ քարկո́ծ առնիցեն զիս։

⁵Եւ ասէ տ(է)ր ցմովսէս. ե́րթ առաջի ժողովրդեանդ, եւ ա́ռ ընդ քեզ ՛ի ծերոց ժողովրդեանդ. եւ զգաւազանն քո որով հարեր զգետն՝ ա́ռ ՛ի ձեռին քում, եւ երթիցես։
⁶եւ ես հասեալ կայցեմ անդ յառաջագոյն քան զքեզ ՛ի վերայ վիմին ՛ի քորէբ։ եւ հարցե́ս զվէմն եւ ելցէ ՛ի նմանէ ջուր, եւ արբցէ ժողովուրդդ։ Եւ արա́ր այնպէս մովսէս առաջի որդւոցն ի(սրաէ)լի։
⁷Եւ անուանեաց զանուն տեղւոյն այնորիկ՝ փորձութի(ւն), եւ բամբասանս. վ(ա)ս(ն) բամբասանաց որդւոցն ի(սրաէ)լի, եւ վասն փորձելոյ ն(ո)ց(ա) զտ(է)ր եւ ասելոյ, եթէ իցէ՞ ՛ի մեզ տ(է)ր՝ եւ եթէ ոչ։
⁸Եկն ամաղէկ, եւ տայր պատերազմն ընդ ի(սրաէ)լի յռափիդիմ։

⁹Եւ ասէ մովսէս ցյեսու. ընտրեա́ դու քեզ արս զօրաւորս, եւ ելեալ տացես պատերա́զմն ընդ ամաղեկայ առ վաղիւ։ եւ ահա ես եկեալ կայցեմ ՛ի վ(ե)ր(այ) գլխոյ բլրոյն, եւ գաւազանն ա(ստուծո)յ ՛ի ձեռին իմում։
¹⁰Եւ արար յեսու ո(ր)պ(էս) ասաց նմա մովսէս. եւ ճակատեցա́ւ յանդիման ամաղեկայ։ եւ մովսէս՝ եւ ահարոն՝ եւ ովր՝ ելին ՛ի գլուխ բլրոյն։
¹¹Եւ լինէր յորժամ ամբառնայր մովսէս զձեռս իւր, զօրանա́յր ի(սրա)էլ. եւ յորժամ խոնարհեցուցանէր զձեռս իւր, զօրանայր ամաղէկ։

¹²Եւ ծանրէին ձեռքն մովսիսի. եւ առեալ վէմ դնէին ընդ նովաւ. եւ նստէր ՛ի վերայ ն(ո)ր(ա). եւ ահարոն եւ ովր հաստատէին զձեռս ն(ո)ր(ա), մի աստի եւ մի անտի. եւ լինէին ձեռքն մովսիսի հաստատեալք մինչեւ ցմտանել արեգականն։
¹³Եւ եհար յեսու զամաղէկ՝ եւ զա(մենայ)ն զօրս նորա կոտորմամբ սրոյ։
¹⁴Եւ ասէ տ(է)ր ցմովսէս. գրեա́ զայդ առ ՛ի յիշատակ ՛ի գիրս։ եւ տուր յականջս յեսուայ. զի ջնջելով ջնջեցից զյիշատա́կ ամաղեկայ յերկրէ ՛ի ներքոյ երկնից։
¹⁵Եւ շինեաց մովսէս սեղան տ(եառ)ն. եւ անուանեաց զանուն ն(ո)ր(ա)՝ Տ(է)ր ապաւէն իմ։
¹⁶եւ ասէ, զի ծածուկ ձեռամբ տ(եառ)ն պատերազմի տ(է)ր ընդ ամաղեկայ ազգա́ց յազգս։

¹Եւ լուաւ յոթոր քուրմ մադիամու աներ մովսիսի զա(մենայ)ն զոր արար տ(է)ր ընդ մովսիսի, եւ յի(սրաէ)լի ժողովրդեան իւրում. զի եհա́ն տ(է)ր զի(սրա)էլ յեգիպտոսէ։
²Եւ ա́ռ յոթոր աներ մովսիսի զսեպփովրայ զկին մովսիսի՝ յետ թողլոյն զնա։
³եւ զերկուս որդիս ն(ո)ր(ա). որոց միումն անուն էր՝ գերսամ, ասէ՝ պանդուխտ էի յօտար երկրի։
⁴եւ անուն երկրորդին՝ եղիազար. ասէ՝ ա(ստուա)ծ հօր իմոյ օգնական իմ, եւ ապրեցոյց զիս ՛ի ձեռաց փարաւոնի։
⁵Եւ եկն յոթոր՝ աներ մովսիսի եւ որդիք նորա եւ կին ն(ո)ր(ա) առ մովսէս յանապատն, ուր բնակեալ էր ՛ի լերինն ա(ստուծո)յ։

⁶Ա́զդ եղեւ մովսիսի եւ ասեն. թէ ահա աներ քո յոթոր՝ գա́յ առ քեզ, եւ կին քո եւ երկու որդիք քո ընդ նմա։
⁷Ե́լ մովսէս ընդառաջ աներոյն իւրոյ, եւ երկի́ր եպագ նմա եւ համբուրեաց զնա։ եւ ողջո́յն ետուն միմեանց ՛ի խաղաղութի(ւն). եւ տարաւ զնոսա ՛ի խորանն։
⁸Եւ պատմեաց մովսէս աներոյն իւրոյ զա(մենայ)ն զոր արար տ(է)ր ընդ փարաւոն եւ ընդ եգիպտացիսն վ(ա)ս(ն) ի(սրաէ)լի, եւ զա(մենայ)ն աշխատութի(ւն)ս որ եղեւ ն(ո)ց(ա) ՛ի ճանապարհի, եւ զի ապրեցո́յց զնոսա տ(է)ր։
⁹Եւ զարմացաւ յոթոր ՛ի վերայ ա(մենայ)ն բարեացն զոր արար ն(ո)ց(ա) տ(է)ր. եւ զի ապրեցոյց զն(ո)ս(ա) ՛ի ձեռաց եգիպտացւոցն եւ ՛ի ձեռաց փարաւոնի։

¹⁰Եւ ասէ յոթոր. օրհնեա́լ է տ(է)ր՝ որ ապրեցոյց զդոսա ՛ի ձեռաց եգիպտացւոցն՝ եւ ՛ի ձեռաց փարաւոնի. օրհնեալ է տ(է)ր զի փրկեաց զժողովուրդդ ՛ի ներքուստ ձեռինն եգիպտացւոց։
¹¹արդ՝ գիտեմ թէ մեծ է տ(է)ր քան զա(մենայ)ն աստուածս։ վ(ա)ս(ն) այնորիկ զի բռնանային ՛ի վերայ դոցա։
¹²Եւ ա́ռ յոթոր աներն մովսիսի ողջակէզս եւ զոհս ա(ստուծո)յ։ եւ գնացին մովսէս եւ ահարոն եւ ա(մենայ)ն ծերքն ի(սրաէ)լի՝ ուտել հա́ց ընդ աներոյն մովսիսի առաջի տ(եառ)ն։
¹³Եւ եղեւ ՛ի վաղիւ անդր, նստա́ւ մովսէս դատե́լ զժողովուրդն. եւ կա́յր ա(մենայ)ն ժողովուրդն շուրջ զմովսիսիւ, յայգուէ մինչեւ ցերեկոյ։

¹⁴Եւ տեսեալ յոթորայ զա(մենայ)ն ինչ զոր առներ ժողովրդեանն. եւ ասէ։ Զի՞նչ է բանդ այդ զոր առնես ժողովրդեանդ. ընդէ՞ր դու նստիս միայն, եւ ա(մենայ)ն ժողովուրդդ կայ շուրջ զքեւ յառաւօտէ մինչեւ ցերեկոյ։
¹⁵Եւ ասէ մովսէս ցաներս իւր. քանզի գա́յ ժողովուրդդ առիս, խնդրե́լ իրաւունս յա(ստուծո)յ։
¹⁶յորժամ լինիցի ինչ դոցա հակառակութի(ւն), գա́ն առիս. եւ ես ընտրեմ ՛ի մէջ իւրաքանչի́ւր ուրուք. եւ իմացուցանե́մ դոցա զհրամանն ա(ստուծո)յ եւ զօրէնս նորա։
¹⁷Եւ ասէ ցնա աներն մովսիսի. ո́չ է ուղիղ բանդ զոր առնես.
¹⁸անհնարին տանջանօք տանջիս դու՝ եւ ա(մենայ)ն ժողովուրդ որ է ընդ քեզ։ ծա́նր է քեզ բանդ այդ. ո́չ կարես միայն առնել։

¹⁹Բայց արդ՝ լո́ւր ինձ, եւ տաց քեզ խրատ. եւ եղիցի ա(ստուա)ծ ընդ քեզ։ լե́ր դու ժողովրդեանդ առ ՛ի յա(ստուծո)յ, եւ տարցիս դու զբանս դոցա առ ա(ստուա)ծ։
²⁰եւ դիցես դոցա վկայու(թ)ի(ւն) զհրամանացն ա(ստուծո)յ եւ զօրինաց ն(ո)ր(ա). եւ ցուցցես դոցա ճանապարհս յորս գնայցեն, եւ զգործս զոր գործիցեն։
²¹Եւ դու տե́ս քեզ յա(մենայ)ն ժողովրդենէդ արս զօրաւորս՝ ա(ստուա)ծապաշտս. արս արդարակորովս, որ ատիցեն զհպարտութի(ւն). եւ կացուսցես զնոսա ՛ի վերայ դոցա հազարապե́տս։

²²եւ դատեսցին զժողովուրդդ յամենայն ժամ. եւ զբան ինչ մեծ, առ քե́զ հասուցանիցեն. եւ զփոքր ինչ դատաստան՝ ինքեա́նք դատեսցին. եւ թեթեւացուսցե́ս ՛ի քէն, եւ եղիցին քեզ օգնականք։
²³Եթէ զայս բան արասցես, զօրացուսցէ́ զքեզ ա(ստուա)ծ. եւ կարասցես տոկա́լ. եւ ամենայն ժողովուրդդ երթիցէ ՛ի տեղի իւր խաղաղութ(եամ)բ։
²⁴Եւ լուաւ մովսէս ձայնի աներոյն իւրոյ. եւ արար զա(մենայ)ն որ միանգամ ասաց նմա։
²⁵եւ ընտրեաց մովսէս յամ ի(սրա)էլէ ա́րս զօրաւորս. եւ արար զնոսա ՛ի վերայ ն(ո)ց(ա) հազարապետս, եւ հարիւրապետս եւ յիսնապետս, եւ տասնապետս.

²⁶եւ դատէին զժողովուրդն յա(մենայ)ն ժամ։ Բայց զբա́ն ինչ մեծ հասուցանէին առ մովսէս. եւ զա(մենայ)ն բան թեթեւ՝ ինքեա́նք դատէին։
²⁷Եւ արձկեա́ց մովսէս զաներսն իւր, եւ գնա́ց յերկիր իւր։

¹Յամսեանն երրորդի ելանելոյ որդւոցն ի(սրաէ)լի յերկրէն եգիպտացւոց. յաւուրն յայնմիկ եկին յանապատն սինայ.
²Չուեցին յռափիդիմայ, եւ եկին յանապատն սինայի. եւ բանակեցան յանապատի անդ. եւ բանակեցաւ ի(սրա)էլ անդ հանդէ́պ լերինն։
³Եւ մովսէս ել ՛ի լեառնն ա(ստուծո)յ։ եւ կոչեաց զնա ա(ստուա)ծ ՛ի լեռնէ անտի եւ ասէ. Ա́յսպէս ասասցես տանն յակոբայ, եւ պատմեսցես որդւոցն ի(սրաէ)լի։
⁴Դուք ձեզէ́ն տեսէք՝ որչափ ինչ արարի ընդ եգիպտացիսն. եւ առի զձեզ իբրեւ ՛ի վերայ թեւո́ց արծուոյ՝ եւ յարեցի́ զձեզ առիս։

⁵եւ արդ՝ եթէ լսելով լուիցէք ձայնի իմում, եւ պահիցէք զուխտն իմ, եղիջիք դուք ինձ ժողովուրդ սեպհական յա(մենայ)ն ազգաց. զի ի́մ է ա(մենայ)ն երկիր.
⁶եւ դուք եղիջիք ինձ ՛ի թագաւորութի(ւն), եւ ՛ի քահանայութի(ւն)՝ եւ յազգ ս(ուր)բ։ զա́յս բանս խօսեսցիս ընդ որդիսն ի(սրաէ)լի։
⁷Եկն մովսէս եւ կոչեաց զծերս ժողովրդեանն. եւ ե́դ առաջի նոցա զա(մենայ)ն բանս զայսոսիկ զոր պատուիրեաց նմա ա(ստուա)ծ։
⁸Պատասխանի ետ ժողովուրդն միահամուռ, եւ ասեն. զամենայն ինչ զոր ասաց ա(ստուա)ծ՝ արասցուք եւ լուիցուք։ եւ տարաւ մովսէս զպատգամս ժողովրդեանն առ ա(ստուա)ծ։

⁹Եւ ասէ տ(է)ր ցմովսէս. ահաւասիկ ե́ս եկից առ քեզ սեամբ ամպոյ, զի լուիցէ́ ժողովուրդն մինչ ես ընդ քեզ խօսիցիմ. եւ հաւատասցեն քեզ յաւիտեան։ եւ պատմեաց մովսէս զբանս ժողովրդեանն առ տ(է)ր։
¹⁰Եւ ասէ տ(է)ր ցմովսէս. է́ջ՝ դի́ր վկայութի(ւն) ժողովրդեանն, եւ սրբեա́ զն(ո)ս(ա) այսօր եւ վաղիւ, եւ լուասցե́ն զձորձս իւրեանց։
¹¹եւ պատրաստեսցի́ն աւուրն երրորդի։ զի յաւուրն երրորդի իջցէ́ տ(է)ր յանդիման ա(մենայ)ն ժողովրդեանդ ՛ի լեառնդ սինա։
¹²Եւ զատուսցես զժողովուրդդ շուրջ՝ եւ ասասցես. զգո́յշ կացէք անձանց յելանելոյ ՛ի լեառնն եւ մերձենալոյ առ նա. զի ա(մենայ)ն որ մերձեսցի ՛ի լեառնն՝ մահո́ւ սատակեսցի։

¹³Մի́ մերձեսցի ՛ի նա ձեռն. քանզի քարա́մբք քարկոծեսցի եւ նետիւք խոցոտեսցի։ եթէ անասուն իցէ եւ եթէ մարդ՝ մի́ կեցցէ։ այլ յորժամ ձա́յնքն եւ փողն եւ ամպն վերասցի ՛ի լեռնէ անտի՝ ելցեն նոքա ՛ի լեառնն։
¹⁴Եւ էջ մովսէս ՛ի լեռնէ անտի առ ժողովուրդն, եւ սրբեաց զնոսա. եւ լուացին զձորձս իւրեանց։
¹⁵եւ ասէ ցժողովուրդն. պատրա́ստ լերուք. զերիս աւուրս ՛ի կանայս մի́ մերձենայք։
¹⁶Եւ եղեւ յաւուրն երորդի ընդ առաւօտն. ձա́յնք եւ փայլատակունք եւ ա́մպ միգախառն ՛ի վերայ լերինն սինայի լինէին. եւ ձայն փողոյն հնչէ́ր մեծաձայն։ Եւ զարհուրեցաւ ա(մենայ)ն ժողովուրդն որ էր ՛ի բանակի անդ։

¹⁷եւ եհան մովսէս զժողովուրդն ընդ առաջ ա(ստուծո)յ ՛ի բանակէ անտի. եւ կացոյց շուրջ զստորոտով լերինն սինայի։
¹⁸Եւ լեառն սինա ծխէ́ր առ հասարակ. քանզի իջեա́լ կայր ա(ստուա)ծ ՛ի վ(ե)ր(այ) ն(ո)ր(ա) հրով. եւ ելանէր ծուխ նորա իբրեւ զծուխ հնոցի։ եւ զարհուրեցա́ւ ա(մենայ)ն ժողովուրդն յոյժ.
¹⁹քանզի հասանէին ձայնք փողոցն ՛ի բաց, յառաջեալք եւ սաստկացեալք յոյժ։ մովսէս խօսէր՝ եւ ա(ստուա)ծ տա́յր նմա ձայն։
²⁰Եւ է́ջ տ(է)ր ՛ի լեառնն սինա, ՛ի գլո́ւխ լերինն։ եւ կոչեա́ց տ(է)ր զմովսէս ՛ի գլո́ւխ լերինն. եւ ե́լ անդր մովսէս։

²¹Եւ խօսեցաւ ա(ստուա)ծ ընդ մովսիսի եւ ասէ. է́ջ, դի́ր վկայութի(ւն) ժողովրդեանդ գուցէ́ մերձենայցեն հայել առ ա(ստուա)ծ, եւ անկանիցին բազումք ՛ի նոցանէ։
²²եւ քահանայքն որ մերձենան առ ա(ստուա)ծ՝ սրբեսցի́ն. գուցէ́ սատակիցէ ՛ի նոցանէ տ(է)ր։
²³Եւ ասէ մովսէս ցա(ստուա)ծ. ո́չ կարէ ժողովուրդն ելանել ՛ի լեառնն սինա. զի դու ինքնին ուխտեցեր մեզ՝ եւ ասացեր. թէ զատուսցե́ս զլեառնս եւ սրբեսցես զդա։
²⁴Եւ ասէ ցնա տ(է)ր, ե́րթ է́ջ, եւ ե́լ այսրէն դո́ւ եւ ահարոն ընդ քեզ. բայց քահանայքն եւ ժողովուրդն մի́ ժտեսցին ելանել առ ա(ստուա)ծ, գուցէ́ սատակիցէ ՛ի նոցանէ տ(է)ր։
²⁵Է́ջ մովսէս առ ժողովուրդն՝ եւ ասէ ցնոսա։

¹Խօսեցաւ տ(է)ր զա(մենայ)ն զպատգամս զայսոսիկ՝ եւ ասէ։
²Ե́ս եմ տ(է)ր ա(ստուա)ծ քո որ հանի զքեզ յերկրէն եգիպտացւոց ՛ի տանէ ծառայութե(ան)։
³մի́ եղիցին քեզ այլ աստուածք բա́ց յինէն։
⁴Մի́ արասցես դու քեզ կուռս ըստ ա(մենայ)ն նմանութե(ան). որ ինչ յերկինս ՛ի վեր, եւ որ ինչ յերկիր ՛ի խոնարհ, եւ որ ինչ ՛ի ջուրս ՛ի ներքոյ երկրի։
⁵մի́ երկիրպագանիցես ն(ո)ց(ա), եւ մի́ պաշտեսցես զն(ո)ս(ա). զի ես եմ տ(է)ր ա(ստուա)ծ քո՝ ա(ստուա)ծ նախանձոտ, որ հատուցանեմ զմեղս հարանց՝ որդւոց, յերիս եւ ՛ի չորս ազգս ատելեաց իմոց։
⁶եւ առնեմ զողորմու(թ)ի(ւն) ՛ի հազար ազգս սիրելեաց իմոց, եւ ոյք պահեն զհրամանս իմ։

⁷Մի́ առնուցուս զանուն տ(եառ)ն ա(ստուծո)յ քոյ ՛ի վերայ սնոտեաց. զի ո́չ սիրեսցէ տ(է)ր զայն, որ առնուցու զանուն նորա ՛ի վերայ սնոտեաց։
⁸Յիշեսջի́ր զօրն շաբաթուց սրբե́լ զնա։
⁹զվեց օր գործեսցես, եւ արասցես զա(մենայ)ն գործս քո։
¹⁰յաւուրն եւթներորդի շաբա́թ տ(եառ)ն ա(ստուծո)յ քում, մի́ գործեսցես ՛ի նմա զա(մենայ)ն գործ քո դո́ւ եւ ուստր քո եւ դուստր քո, ծառա́յ քո, եւ աղախին քո. ե́զն քո եւ էշ քո, եւ ա(մենայ)ն անասուն քո. եւ ե́կն քո եւ պանդուխտն քո որ ՛ի քեզ։
¹¹Զի զվե́ց օր արար տ(է)ր ա(ստուա)ծ զերկինս եւ զերկիր, եւ զծով եւ զա(մենայ)ն որ ՛ի նոսա, եւ հանգեաւ յաւուրն եւթներորդի. վ(ա)ս(ն) այնորիկ օրհնեաց տ(է)ր զօրն եւթներորդ, եւ սրբեաց զնա։

¹²Պատուեա́ զհայր քո եւ զմայր քո. զի քեզ բարի́ լինիցի, եւ զի երկայնակեա́ց լինիցիս ՛ի վերայ երկրին բարութե(ան)՝ զոր տ(է)ր ա(ստուա)ծ տացէ քեզ։
¹³Մի́ սպանանէր։
¹⁴Մի́ շնար։
¹⁵Մի́ գողանար
¹⁶Մի́ սուտ վկայու(թ)ի(ւն) վկայեր զընկերէ քումմէ։
¹⁷Մի́ ցանկանար տան ընկերի քոյ, եւ մի́ անդոյ նորա։ մի́ ցանկանար կնոջ ընկերի քոյ, եւ մի́ ծառայի ն(ո)ր(ա), եւ մի́ աղախնոյ ն(ո)ր(ա), եւ մի́ եզին ն(ո)ր(ա), եւ մի́ իշոյ ն(ո)ր(ա), եւ մի́ ա(մենայ)ն անասնոյ ն(ո)ր(ա). եւ մի́ ա(մենայ)նի զինչ ընկերի քոյ իցէ։

¹⁸Եւ ամենայն ժողովուրդն տեսանէր զձայնն զճառագայթսն, եւ զբարբառ փողոյն՝ եւ զլեառնն ծխեալ։ զահի́ հարաւ ա(մենայ)ն ժողովուրդն, եւ խորշեցա́ւ. եկաց ՛ի հեռաստանէ։
¹⁹Եւ ասեն ցմովսէս. դու խօսեաց ընդ մեզ՝ եւ լուիցո́ւք. եւ մի́ խօսեսցի ընդ մեզ ա(ստուա)ծ՝ գուցէ́ մեռանիցիմք։
²⁰Եւ ասէ ցն(ո)ս(ա) մովսէս. քաջալերեցարո́ւք. զի վ(ա)ս(ն) փորձելոյ զձեզ եկն առ ձեզ ա(ստուա)ծ. ո(ր)պ(էս) զի լինիցի երկիւղ ն(ո)ր(ա) ՛ի ձեզ, զի մի́ մեղանչիցէք։
²¹եւ կայր ժողովուրդն ՛ի հեռաստանէ. Եւ մովսէս եմուտ ՛ի մէգն ուր է́ր ա(ստուա)ծ։
²²Եւ ասէ տ(է)ր ցմովսէս. ա́յսպէս ասասցե́ս դու տանդ յակոբայ, եւ պատմեսցե́ս որդւոցդ ի(սրաէ)լի։ դուք ձեզէն տեսէք, զի յերկնից խօսեցայ ընդ ձեզ։

²³Մի́ առնիցէք ձեզ աստուածս ոսկեղէնս եւ աստուածս արծաթեղէնս։
²⁴Սեղան՝ հոզեղէն արասջի́ք ինձ, եւ մատուսջի́ք ՛ի նմա զողջակէզս ձեր, եւ զփրկութի(ւն)ս ձեր, զոչխարս ձեր, եւ զարջառս ձեր. յա(մենայ)ն տեղիս ուր անուանեցից զանուն իմ անդ. եւ եկի́ց առ քեզ եւ օրհնեցի́ց զքեզ։
²⁵Ապա թէ սեղան ՛ի քարանց առնիցես ինձ, մի́ շինեսցես ինձ զնոսա կոփածոյս. քանզի զձեռին գործին քո մերձեցուցեր ՛ի նա, եւ պղծեա́լ է։
²⁶Մի́ ելանիցես ընդ աշտիճանս ՛ի սեղան իմ, զի մի́ մերկասցին առականք քո ՛ի վերայ ն(ո)ր(ա)։

¹Եւ ա́յս իրաւունք են զոր դիցես առաջի ն(ո)ց(ա)։
²Եթէ գնեսցես ծառայ եբրայեցի, զվեց ա́մ ծառայեսցէ քեզ. եւ յամին եւթներորդի՝ գնասցէ ազա́տ ձրի́։
³թէ ինքն միա́յն մտեալ իցէ՝ միա́յն գնասցէ. եւ եթէ կնաւ հանդերձ մտեա́լ իցէ՝ ելցէ եւ կինն ընդ նմա։
⁴Ապա թէ տէրն իւր տացէ նմա կին, եւ ծնանիցի նմա ուստերք եւ դստերք, կինն եւ որդիք՝ տեառն ն(ո)ր(ա) եղիցին. եւ նա միա́յն ելցէ։
⁵Ապա թէ պատասխանի տուեալ ասիցէ ծառայն. սիրեցի զտէր իմ, եւ զկին իմ, եւ զորդիս իմ. եւ ո́չ գնամ յազատու(թ)ի(ւն)։
⁶տարցի́ զնա տէրն իւր յատեան ա(ստուծո)յ. եւ ապա մատուսցէ զնա առ սեամս դրանն, եւ ծակեսցէ́ զունկն ն(ո)ր(ա) հերեամբ, եւ ծառայեսցէ́ նմա յաւիտեան։

⁷Իսկ եթէ վաճառեսցէ ոք զդուստր իւր յաղախնութի(ւն), մի́ գնասցէ որպէս ելանիցեն աղախնայք։
⁸եթէ ոչ լինիցի հաճոյ յաչս տեառն իւրոյ՝ որում հաստատեցաւն, փրկեսցէ́ զնա. բայց յա́զգ օտար՝ չէ́ իշխան վաճառել, զի անարգեաց զնա։
⁹Ապա թէ որդւոյ իւրում հաստատեսցէ զնա, ըստ օրինաց դստերա́ց արասցէ նմա։
¹⁰Ապա թէ առ նովաւ ա́յլ առնուցու. զօրէնն եւ զհանդերձ ն(ո)ր(ա) եւ զմերձաւորիւթի(ւն) մի́ հատցէ ՛ի նմանէ։
¹¹Ապա թէ զերիս զայսոսիկ ո́չ առնիցէ նմա, ձրի́ իսկ ելցէ առանց արծաթոյ։
¹²Եւ եթէ հարցէ́ ոք զոք՝ եւ մեռանիցի, մահո́ւ մեռցի եւ նա։
¹³Իսկ որ ոչ կամաւ՝ այլ ա(ստուա)ծ մատնեաց ՛ի ձեռս ն(ո)ր(ա), տացի́ նմա տեղի ուր փախիցէ սպանօղն։

¹⁴Իսկ եթէ մտաբերիցէ ոք յընկեր իւր սպանանել զնա նենգութ(եամ)բ՝ եւ փախիցէ, եւ ՛ի սեղանո́յ իմմէ առնուցուս զնա եւ սպանանիցես։
¹⁵Որ հարկանէ զհայր իւր, կամ զմայր իւր, մահո́ւ մեռցի։
¹⁶Որոք գողասցի յորդւոցն ի(սրաէ)լի՝ եւ վաճառեսցէ զնա, եւ գտցի առ նմա, մահո́ւ մեռցի։
¹⁷Որ բամբասեսցէ զհա́յր իւր՝ կամ զմայր իւր, մահո́ւ մեռցի։
¹⁸Եթէ կագիցեն արք երկու, եւ հարկանիցէ ոք ՛ի նոցանէ զընկեր իւր քարի́ւ կամ բռնցի. եւ ո́չ մեռանիցի, այլ դնիցի ՛ի մահիճս։
¹⁹Եթէ յառնիցէ այրն եւ շրջիցի արտաքոյ ՛ի ցպոյ, անպա́րտ լիցի որ եհարն. բայց զխափանածո́յ ն(ո)ր(ա)՝ եւ բժշկութե(ա)ն տուժեսցի́։

²⁰Եթէ ոք հարցէ զծառայ իւր՝ կամ զաղախին իւր գաւազանաւ, եւ մեռցի́ ՛ի ձեռաց նորա, դատաստանաւ վրէժխնդրութի(ւն) լիցի։
²¹Բայց թէ մի օր՝ կամ երկուս կեցցէ, մի́ խնդրեսցի վրէժն. զի գինք արծաթոյ իւրոյ են։
²²Իսկ եթէ կռուիցին արք երկու, եւ հարկանիցեն զկին յղի եւ ելանիցէ սաղմնն աննկար, կէ́ս վնասու տուժեսցի. որչափ ինչ արկանիցէ նմա ա́յր կնոջն, եւ տացէ աղաչելով։
²³Ապա թէ կերպարանեալ իցէ. տացէ ա́նձն ընդ անձին։
²⁴ա́կն ընդ ական, ատա́մն ընդ ատաման, ձե́ռն ը(ստ) ձեռին, ո́տն ը(ստ) ոտին,
²⁵խարա́ն ընդ խարանի, վէ́ր ը(ստ) վիրի. հարուա́ծ ը(ստ) հարուածոյ։

²⁶Իսկ եթէ հարցէ́ ոք զակն ծառայի իւրոյ, կամ զակն աղախնոյ իւրոյ, եւ կուրացուսցէ, արձակեսցէ զնոսա ազա́տս փոխանակ ական ն(ո)ց(ա)։
²⁷Եւ եթէ զատամն ծառայի իւրոյ, կամ զատամն աղախնոյ թափեսցէ, արձակեսցէ ազա́տ փոխանակ ատաման ն(ո)ց(ա)։
²⁸Իսկ եթէ հարցէ ցուլ զա́յր կամ զկին, եւ մեռանիցին, ցուլն՝ քարկո́ծ լիցի, եւ միս ն(ո)ր(ա) մի́ կերիցի. եւ տէր ցլուն անպա́րտ լիցի։
²⁹Ապա թէ ցուլն հարկանօղ իցէ յերեկն եւ յեռանտն, եւ բողոքեա́լ իցէ տեառն ն(ո)ր(ա), եւ ն(ո)ր(ա) չիցէ́ ՛ի միջոյ բարձեալ. եւ սպանանիցէ զայր կամ զկին, ցուլն քարկոծ լիցի, եւ տէր ցլուն առ նմին մեռցի։

³⁰Իսկ եթէ փրկանք անկանիցին ՛ի վերայ ն(ո)ր(ա), տացէ́ փրկանս ընդ անձին իւրում, ըստ ա(մենայ)նի́ որչափ ինչ արկանիցեն նմա գին։
³¹Եւ եթէ զուստր կամ զդուստր հարկանիցէ, ը(ս)տ նմին օրինակի արասցեն նմա։
³²Իսկ եթէ զծառա́յ կամ զաղախին հարկանիցէ ցուլն, երեսուն կրկին սատեր արծաթոյ տացէ տեառն ն(ո)ց(ա). եւ ցուլն քարկո́ծ լիցի։
³³Իսկ եթէ բացցէ ոք հո́ր, կամ փորեսցէ ջրհոր, եւ ո́չ խփանիցէ զնա, եւ անկանիցի անդ արջառ՝ կամ էշ։
³⁴տէր հորոյն տուժեսցի արծաթ, եւ տացէ տեառն ն(ո)ր(ա). եւ շաղիղն նորա́ լիցի։

³⁵Իսկ եթէ հարցէ ցուլ ուրուք զցուլ ընկերի իւրոյ՝ եւ մեռցի. վաճառեսցե́ն զցուլն կենդանի, եւ բաժանեսցե́ն զգինս նորա, եւ զցուլն սպանեալ՝ բաժանեսցե́ն։
³⁶Ապա թէ յերէկն եւ յեռանտն գիտէին զցուլն, եւ բողոքեա́լ իցէ տեառն ն(ո)ր(ա), եւ ն(ո)ր(ա) չիցէ́ ՛ի միջոյ բարձեալ զնա, տուժեսցի́ ցուլ ը(ստ) ցլուն, եւ սպանեալն ն(ո)ր(ա) լիցի։

¹Իսկ եթէ գողասցի ոք արջառ կամ ոչխար, եւ սպանցէ́ կամ վաճառեսցէ, հի́նգ արջառ ընդ արջառոյն տուժեսցի. եւ չորս ոչխար ընդ ոչխարին։
²Իսկ եթէ յակա́ն գտանիցի գող. եւ խոցեալ մեռցի, չէ́ այն նմա ՛ի սպանու(թ)ի(ւն)։
³ապա թէ արեւն ՛ի վ(ե)ր(այ) ն(ո)ր(ա) ծագիցէ, մահապա́րտ է, փոխարէ́ն մեռցի։ ապա թէ ո́չինչ գտանիցի ն(ո)ր(ա), վաճառեսցի́ փոխանակ գողու(թ)ե(ա)ն իւրոյ։
⁴Իսկ եթէ ըմբռնեսցի, եւ գտցի́ ՛ի ձեռին ն(ո)ր(ա) գողօնն՝ յարջառոյ եւ յիշոյ մինչեւ ցոչխար՝ կրկի́ն տուժեսցի։

⁵Եթէ արածիցէ ոք զանդ՝ կամ զայգի, եւ թոյլ տայցէ խաշին իւրում արածե́լ զանդ այլոց, յիւրմէ́ անդոյ անտի տուժեսցի ըստ արդեանն։ Ապա թէ զա(մենայ)ն իսկ զանդն արածիցէ, զընտի́ր կողմն անդոյ իւրոյ, եւ զընտի́ր այգւոյ իւրոյ տուժեսցի։
⁶Իսկ եթէ ելանիցէ հուր, եւ գտանիցէ փո́ւշ, եւ ընդ նմին այրիցէ զկալ՝ կամ զօրան կամ զանդ, տուժելով տուժեսցի որոյ զհրդեհն հանեալ իցէ։
⁷Իսկ եթէ ոք տացէ ընկերի իւրում արծաթ, կամ ա́յլ ինչ կարասի զիւր յաւանդ, եւ գողանայցի́ ՛ի տանէ առնն. եթէ գտցի́ որ գողացաւն, կրկին տուժեսցի։
⁸ապա թէ ո́չ գտցի որ գողացաւն, մատիցէ տէր տանն առաջի ա(ստուծո)յ, եւ երդուիցի, եթէ իւր չէ́ նենգեալ ամենեւին զաւանդ ընկերի իւրոյ.

⁹ըստ ա(մենայ)ն վնասակա́ր բանի, յարջառոյ՝ եւ յիշոյ՝ եւ յոչխարէ, եւ ՛ի հանդերձէ, եւ յա(մենայ)ն կորստենէ որում վնասակար առնիցեն։ Որ զինչ իցէ՝ առաջի ա(ստուծո)յ եկեսցէ դատաստա́ն երկոցուն. եւ որ ոք ՛ի նոցանէ ըմբռնեսցի ՛ի ձեռն ա(ստուծո)յ, կրկի́ն տուժեսցի ընկերի իւրում։
¹⁰Եւ եթէ տացէ ոք ընկերի իւրում էշ, կամ եզն, կամ ոչխար, կամ ա́յլ ինչ անասուն ՛ի պահեստ, եւ բեկցի՝ կամ մեռցի՝ կամ գերի վարեսցի, եւ ո́չ ոք գիտասցէ.
¹¹երդո́ւմն ա(ստուծո)յ լիցի ՛ի մէջ երկոցուն, եթէ նենգանօք ինչ չիցէ́ գնացեալ ամենեւին ընդ աւա́նդ ընկերին իւրոյ. ապա յա́նձն առցէ տէր ն(ո)ր(ա). եւ մի́ տուժեսցի։
¹²Իսկ եթէ գողութ(եամ)բ գողանայցի ՛ի նմանէ, տուժեսցի́ տեառն ն(ո)ր(ա)։

¹³ապա թէ գազանաբե́կ լինիցի, ածցէ վկայ ՛ի գէ́շ անդր. եւ մի́ տուժեսցի։
¹⁴Իսկ եթէ ոք խնդրեսցէ անօթ յընկերէ́ իւրմէ, եւ բեկցի́ կամ մեռցի, կամ գերի́ գնասցէ, եւ տէր նորա չիցէ́ ընդ նմա, տուժելո́վ տուժեսցի։
¹⁵ապա թէ տէր ն(ո)ր(ա) ընդ նմա իցէ՝ ո́չ տուժեսցԷ։ ապա թէ ՛ի վարձո́ւ առեալ իցէ, ընդ վարձո́ւց իւրոց եղիցի նմա։
¹⁶Իսկ եթէ ոք խաբեսցէ́ զկոյս զո́չ խօսեալ՝ եւ ննջեսցէ ընդ նմա, վարձանօք վարձեսցի զնա իւր կնու(թ)ե(ան)։
¹⁷Եւ եթէ ո́չ առնուցու յանձն հայր ն(ո)ր(ա) տալ զնա նմա կնու(թ)ե(ան), տուժեսցի արծա́թ հօր ն(ո)ր(ա) ո(ր)պ(էս) իցեն վարձանք կուսից։
¹⁸Զկախարդս մի́ ապրեցուցանիցէք։
¹⁹Զամենայն որ խառնակիցի ընդ անասուն, մահո́ւ սպանանիջիք։

²⁰Որ դից զոհէ՝ սատակեսցի́, բայց միայն տ(եառ)ն։
²¹Զպանդուխտն՝ մի́ չարչարիցէք՝ եւ մի́ նեղէք զնա, զի եւ դուք պանդուխտք էիք յերկրին եգիպտացւոց։
²²Զա(մենայ)ն զայրի՝ եւ զորբ՝ մի́ չարչարիցէք։
²³ապա թէ չարչարելով չարչարիցէ́ք զնոսա, եւ բողո́ք բարձեալ աղաղակիցեն առիս, լսելո́վ լուա́յց աղաղակի ն(ո)ց(ա)։
²⁴եւ բարկացա́յց սրտմտութ(եամ)բ եւ կոտորեցից զձեզ սրով. եւ եղիցին կանայք ձեր այրի́ք, եւ մանկունք ձեր ո́րբք։
²⁵Եւ եթէ արծաթ փո́խ տայցես եղբօր քում, որ աղքա́տ իցէ՝ առ քեզ, մի́ ճեպեսցես զնա. եւ մի́ արկանիցես նմա տոկոսիս։

²⁶Եւ եթէ գրաւեսցես զբաճկոն ընկերի քոյ, նախ քան զմտանել արեւու դարձուսցե́ս անդրէն։
²⁷զի ա́յն վերարկու նորա, եւ այն է հանդերձ առականաց նորա որով ննջիցէ։ եւ եթէ բողոքիցէ առիս՝ լուա́յց նմա. քանզի ողորմա́ծ եմ։
²⁸Զաստուածս քո մի́ բամբասիցես։ եւ զիշխան ժողովրդեան քոյ մի́ հայհոյեսցես։
²⁹Զպտուղ կալոյ քոյ եւ զհնձանի մի́ հատանիցես։ Զանդրանիկս որդւոց քոց ի́նձ տացես։
³⁰նոյնպէս արասցես զարջառ քո, եւ զոչխար քո, եւ զէշ քո։ զեւթն օր՝ եղիցի ընդ մա́րբ իւրով, եւ յաւուրն ութերորդի՝ տացե́ս զնա ինձ։

³¹Եւ մարդք սո́ւրբք լինիջիք ինձ, զի ես եմ տ(է)ր ա(ստուա)ծ ձեր։ Զմիս գազանաբեկին ՛ի բացի՝ մի́ ուտիցէք, այլ շա́ն ընկեսջիք։

¹Եւ համբաւ սուտ՝ մի́ ընդունիցիս։
²Մի́յօժարեսցիս ընդ բազումս ՛ի չարիս։
³եւ մի́ ողորմեսցիս տնանկին ՛ի դատաստանի։
⁴Եւ եթէ պատահեսցիս եզին թշնամվոյ քոյ, կամ իշոյ ն(ո)ր(ա) մոլորելոյ, դարձուսցես եւ հասուսցե́ս զնա առ նա։
⁵Եւ եթէ տեսանիցես զգրաստ ընկերի քոյ՝ անկալ ընդ բեռամբ, մի́ զանց առնիցես զնովաւ, այլ յարուսցե́ս զնա ընդ նմա։
⁶Մի́ խոտորիցես զիրաւունս տնանկին ՛ի դատաստանի իւրում։
⁷Յամենայն՝ ՛ի զո́ւր բանէ՝ ՛ի բա́ց լինիցիս. եւ զարդարն եւ զանպարտն մի́ սպանանիցես. եւ զամպարիշտն մի́ ապրեցուցանիցես վ(ա)ս(ն) կաշառաց.

⁸եւ կաշառ՝ մի́ առնուցուս. զի կաշառ կուրացուցանէ́ զաչս համարձակահայեաց, եւ ապականէ́ զբանս արդարս։
⁹Եւ զպանդուխտն մի́ նեղես. քանզի ճանաչէ́ք դուք զանձինս պանդխտաց. զի եւ դուք պանդուխտք էիք յերկրին եգիպտացւոց։
¹⁰Զվե́ց ամ սերմանեսցես զերկիր քո, եւ ժողովեսցե́ս զարմտիս ն(ո)ր(ա)։
¹¹եւ յամին եւթներորդի թողու(թ)ի(ւն) արասցես, եւ հանգուսցես զնա։ եւ կերիցեն տնա́նկք ազգի քոյ. եւ զմնացեալն ՛ի նոցանէ կերիցեն գազա́նք վայրի. ա́յսպէս արասցես զայգի քո եւ զձիթենի քո։
¹²Զվե́ց օր գործեսցես զգործ քո. եւ յաւուրն եւթներորդի հանգիցէ́ եզն քո եւ է́շ քո, եւ հանգիցէ́ որդի աղախնոյ քոյ եւ պանդխտին։

¹³Զամենայն զոր ասացի ձեզ՝ պահեսջի́ք. եւ զանուն աստուածոց օտարաց մի́ յիշիցէք. եւ մի́ լուիցի ՛ի բերանոյ ձերմէ։
¹⁴Երի́ս ժամանակս ՛ի տարւոջ արասջի́ք ինձ տօնս։
¹⁵Զտօն բաղարջակերա́ցն պահեսջիք. զեւթն օր բաղարջ կերիջիք, ո(ր)պ(էս) պատուիրեցի ձեզ ըստ ժամանակի ամսոյն կանխոց. զի ՛ի նմա́ ելէք դուք յերկրէն եգիպտացւոց։ ո́չ երեւեսցիս առաջի իմ դատարկաձեռն։
¹⁶Եւ զտօն ամարայնոյ առաջնոյ արմտեա́ց քոց արասցես զգործոց քոց, որ ինչ վարեա́լ իցէ յանդի քում։ Եւ զտօն կատարածի ելից տարւոյն, ՛ի ժողովել գործոց քոց յանդէ։
¹⁷Երի́ս ժամանակս ՛ի տարւոջ յանդիմա́ն լիցի ա(մենայ)ն արու քո առաջի տ(եառ)ն ա(ստուծո)յ։

¹⁸Եւ մի́ զոհեսցես ՛ի վերայ խմորոյ զարիւն զոհից քոց։ եւ մի́ ագցի ճարպ տօնի իմոյ մինչեւ ցառաւօտ։
¹⁹Զպտուղս առաջին արմտեաց քոց բերցես ՛ի տո́ւն տ(եառ)ն ա(ստուծո)յ քոյ։ Եւ մի́ եփեսցես զգառն ՛ի կաթն մօր իւրոյ։
²⁰Եւ ահա ես առաքեմ զհրեշտակ իմ առաջի երեսաց քոց, զի պահեսցէ զքեզ ՛ի ճանապարհի. ո(ր)պ(էս) զի տարցի́ զքեզ յերկիրն, զոր պատրաստեցի քեզ։
²¹Զգո́յշ լեր անձին քում եւ լուիցես, եւ մի́ անհաւան լինիցիս նմա. զի ո́չ խորշեսցի ՛ի քէն. քանզի անուն իմ ՛ի վերայ ն(ո)ր(ա) է։
²²Եւ եթէ լսելով լուիցես ձայնի իմում, եւ արասցես զա(մենայ)ն զոր ինչ ասացի քեզ, եղէց թշնամի́ թշնամեաց քոց. եւ հակառա́կ կացից հակառակորդաց քոց։

²³զի երթիցէ հրեշտակ իմ առաջնորդե́լ քեզ. եւ տարցի́ զքեզ առ ամովրհացին, եւ քետացի, եւ փերեզացի, եւ քանանացի, եւ գերգեսացի, եւ խեւացի, եւ յեբուսացի. եւ սատակեցից զնոսա։
²⁴Մի́ պագանիցես երկիր աստուածոց ն(ո)ց(ա), եւ մի́ պաշտեսցես զն(ո)ս(ա). եւ մի́ առնիցես ը(ս)տ գործոց ն(ո)ց(ա), այլ քակելով քակեսցե́ս զնոսա, եւ մանրելով մանրեսցես զարձանս ն(ո)ց(ա)։
²⁵Եւ պաշտեսցե́ս զտ(է)ր ա(ստուա)ծ քո. եւ օրհնեցի́ց զհաց քո եւ զջուր քո, եւ դարձուցից ՛ի ձէնջ զախտ։
²⁶եւ մի́ եղիցի անսերմ եւ ամուլ յերկրի քում. զթիւ աւուրց քոց լցուցի́ց։

²⁷եւ զա́հ իմ առաքեցից առաջնորդե́լ քեզ. եւ զարհուրեցուցի́ց զա(մենայ)ն ազգս յորս մտանիցես ՛ի նոսա։ Եւ տաց զա(մենայ)ն հակառակորդս քո փախստակա́նս։
²⁸եւ առաքեցի́ց առաջի քո զպիծակ. եւ մերժեսցէ́ զամովրհացին, եւ զխեւացին, եւ զքանանացին, եւ զքետացին յերեսաց քոց։
²⁹Եւ ո́չ մերժեցից զն(ո)ս(ա) յերեսաց քոց ՛ի միում ամի. զի մի́ երկիրն անապատ լինիցի, եւ բազմանայցեն ՛ի վերայ քո գազանք երկրին։
³⁰առ սակաւ սակա́ւ մերժեցից զնոսա ՛ի քէն. մինչեւ աճեսցես եւ ճառանգեսցես զերկիր։

³¹Եւ եդից զսահմանս քո ՛ի կարմիր ծովէ մինչեւ ՛ի ծովն փղշտացւոց. եւ յանապատէն մինչեւ ցգե́տն մեծ եփրատ։ եւ մատնեցից ՛ի ձեռս ձեր զբնակիչս երկրին. եւ մերժեցից զն(ո)ս(ա) ՛ի քէն։
³²Եւ դու՝ մի́ դնիցես ընդ ն(ո)ս(ա), եւ ընդ դի́ս նոցա ուխտ։
³³եւ մի́ բնակեսցեն յերկրի քում, զի մի́ յանցուցանիցեն զքեզ առիս։ զի եթէ ծառայեսցես դի́ց նոցա, նոքա́ լիցին քեզ ՛ի գայթագղութի(ւն)։

¹Եւ ասէ ցմովսէս. ե́լ առ տ(է)ր, դո́ւ եւ ահարոն, եւ նաբադ եւ աբիուդ՝ եւ եւթանասուն այր ՛ի ծերոցն ի(սրաէ)լի։ եւ երկի́ր պագցեն տ(եառ)ն ՛ի հեռաստանէ։
²Եւ մերձեսցի մովսէս միայն առ ա(ստուա)ծ. եւ նոքա մի́ մերձեսցին բայց ժողովուրդն մի́ ելցէ ընդ նոսա։
³Եւ եմուտ մովսէս եւ պատմեաց ժողովրդեանն զա(մենայ)ն պատգամս ա(ստուծո)յ, եւ զա(մենայ)ն իրաւունս։ Պատասխանի ետ ա(մենայ)ն ժողովուրդն ՛ի մի ձայն՝ եւ ասեն. զա(մենայ)ն պատգամս զոր խօսեցաւ տ(է)ր՝ արասցո́ւք եւ լուիցուք։
⁴Եւ գրեաց մովսէս զա(մենայ)ն զպատգամսն տ(եառ)ն։ Եւ կանխեալ մովսիսի ընդ առաւօտն, շինեաց սեղան ՛ի ստորոտ լերինն. եւ երկոտասան վէ́մ կանգնեաց ըստ երկոտասան ազգացն ի(սրաէ)լի։

⁵Եւ առաքեաց զերիտասարդս որդւոցն ի(սրաէ)լի, եւ հանին ողջակէզս, եւ զոհեցին զոհս փրկութե(ան) ա(ստուծո)յ ո́րթս։
⁶Եւ առեալ մովսիսի զկէ́ս արեանն արկ ՛ի խառնելիսն. եւ զկէ́ս արեանն եհեղ առաջի սեղանոյն։
⁷եւ առեալ զգիր ուխտին ընթերցաւ յականջս ժողովրդեանն։ Եւ ասեն, զա(մենայ)ն զոր խօսեցաւ տ(է)ր՝ արասցո́ւք եւ լուիցուք։
⁸Եւ առեալ մովսիսի զարիւնն, ցանեաց զժողովրդեամբն՝ եւ ասէ. ահա ա́յս արիւն է ուխտին զոր ուխտեաց տ(է)ր ընդ ձեզ վ(ա)ս(ն) ա(մենայ)ն բանիցս այսոցիկ։
⁹Եւ ելին մովսէս եւ ահարոն, եւ նաբադ եւ աբիուդ՝ եւ եւթանասունք ՛ի ծերոցն ի(սրաէ)լի։

¹⁰եւ տեսին զտեղին ուր կայր ա(ստուա)ծ ի(սրաէ)լի. եւ ընդ ոտիւք նորա իբրեւ զգործա́ծ աղիւսոյ շափիղայ. եւ իբրեւ զտեսի́լ հաստատութե(ան) երկնից սրբութ(եամ)բ։
¹¹Եւ յընտրելոցն ի(սրաէ)լի ո́չ ծախեցաւ եւ ո́չ մի. եւ երեւեցան ՛ի տեղւոջն ա(ստուծո)յ. եւ կերա́ն եւ արբին։
¹²Եւ ասէ տ(է)ր ցմովսէս. ե́լ առիս ՛ի լեառնն, եւ ա́նդ լինիջիր։ եւ տա́ց քեզ տախտակս քարեղէնս եւ օրէնս եւ պատուիրանս զորս գրեցի, լինել ն(ո)ց(ա) օրէնսդիր։
¹³Յարեաւ մովսէս եւ յեսու պաշտօնեայ նորա, եւ ելին ՛ի լեառնն ա(ստուծո)յ։
¹⁴եւ ասէ ցծերսն. դադարեցէ́ք այդր մինչեւ դարձցուք առ ձեզ։ եւ ահա ահարոն եւ ովր ընդ ձե́զ են։ եթէ ուրուք դատաստան ինչ լինիցի, երթիցեն առ նոսա։

¹⁵Եւ ել մովսէս ՛ի լեառնն. եւ ծածկեաց ամպն զլեառնն։
¹⁶եւ իջին փառքն ա(ստուծո)յ ՛ի լեառնն սինա. եւ ծածկեա́ց զնա ամպն զվեց օր։ Եւ կոչեաց տ(է)ր զմովսէս յաւուրն եւթներորդի ՛ի միջոյ ամպոյն։
¹⁷եւ տեսիլ փառացն տ(եառ)ն իբրեւ զհուր բորբոքեալ ՛ի վերայ գլխոյ լերինն՝ յանդիման որդւոցն ի(սրաէ)լի։
¹⁸Եւ եմո́ւտ մովսէս ՛ի մէջ ամպոյն, եւ ել ՛ի լեառնն. եւ է́ր մովսէս ՛ի լերին անդ զքառասուն տիւ եւ զքառասուն գիշեր։

¹Եւ խօսեցաւ տ(է)ր ընդ մովսիսի եւ ասէ։
²Ասասցես ցորդիսն ի(սրաէ)լի. եւ առէ́ք ինձ պտուղ ՛ի նոցանէ, որոց հաճոյ թուեսցի ՛ի սիրտս իւրեանց եւ առնուցուք զպտուղս իմ։
³Եւ ա́յս է պտուղն զոր առնուցուք ՛ի նոցանէ. ոսկի, եւ արծաթ, եւ պղինձ,
⁴եւ կապուտակ, եւ ծիրանի. եւ կարմիր կրկին, եւ բեհէզ մանեալ. եւ մազ այծեաց.
⁵եւ մորթս խոյոց կարմիր ներկեալ. եւ մորթս կապուտակեալս. եւ փայտս անփուտս։
⁶Եւ եւղ լուսոյ. եւ խունկս յեւղ օծման՝ եւ ՛ի հանդերձանս խնկոց։
⁷եւ ականս սարդիոնս. եւ ականս գրոյ ՛ի գործ վակասին. եւ զպճղնաւորն։
⁸Եւ արասցե́ս ինձ սրբու(թ)ի(ւն), եւ երեւեցայց ՛ի ձեզ։

⁹Եւ արասցե́ս ինձ ըստ ա(մենայ)նի զոր ցուցից քեզ ՛ի լերինն. օրինակ խորանի՝ եւ օրինակ ամենայն սպասուց նորա։
¹⁰եւ այսպէս արասցես։
¹¹Եւ պատեսցե́ս զնա ոսկւով սրբով ներքոյ, եւ արտաքոյ օծցե́ս զնա։ եւ արասցես ՛ի նմա ծնօտս ոսկիս շո́ւրջ շրջանակաւ։
¹²Եւ ձուլեսցես ՛ի նմա չո́րս օղամանեակս ոսկիս. եւ դիցես ՛ի չորեցունց կողմանց ն(ո)ր(ա) երկուս օղամանեակս ՛ի միոջէ կողմանէ. եւ երկուս օղամանեակս ՛ի միւսմէ կողմանէ։
¹³Եւ արասցես լծա́կս յանփուտ փայտից. եւ պատեսցե́ս զնոսա ոսկւով։
¹⁴եւ ագուսցե́ս զլծակսն՝ յօղամանեակսն ՛ի կողմանս տապանակին, բառնա́լ նոքօք զտապանակն։

¹⁵զի յօղամանեակս տապանակի կտակարանացն կայցեն լծակքն, անշա́րժք անդստին ՛ի նմանէ։
¹⁶Եւ դիցես ՛ի տապանակին զվկայու(թ)ի(ւն)սն զոր ե́ս տաց քեզ։
¹⁷Եւ արասցես զքաւու(թ)ի(ւն)ն խնկակալ յոսկւո́յ սրբոյ։ յերկուց կանգնոց եւ ՛ի կիսոյ զերկայնու(թ)ի(ւն) ն(ո)ր(ա), եւ ՛ի կանգնոյ եւ ՛ի կիսոյ զլայնութի(ւն) ն(ո)ր(ա)։
¹⁸Եւ արասցես երկուս քրոբէս ոսկիս ճախարակեա́յս. եւ դիցես զն(ո)ս(ա) ՛ի վերայ երկոցունց կողմանց քաւու(թ)ե(ա)ն։
¹⁹եւ լինիցին քրոբէքն՝ մի ՛ի միոջէ́ կողմանէ, եւ մի ՛ի միւսմէ́ կողմանէ քաւութե(ա)ն։

²⁰Եւ արասցես երկուս քրոբէս ՛ի վերայ երկոցունց կողմանց ն(ո)ր(ա)։ եւ իցէ քրոբէիցն տարածեալ զթեւս իւրեանց ՛ի վերուստ. եւ հովանի́ ունիցին թեւօք իւրեանց ՛ի վերայ քաւութե(ա)ն. եւ երեսք ն(ո)ց(ա) յանդիման միմեանց, զի ՛ի քաւութի(ւն)ն հայեսցին երեսք քրոբէիցն։ Եւ դիցես զքաւութի(ւն)ն ՛ի վերայ տապանակին ՛ի վերո́ւստ կողմանէ։
²¹Եւ դիցես ՛ի տապանակի անդ զվկայութի(ւն)սն զոր ե́ս տաց քեզ։
²²Եւ յայտնեա́յց քեզ անտի. եւ խօսեցայց ընդ քեզ ՛ի վերուստ ՛ի քաւութ(են)է անտի. ՛ի միջոյ երկուց քրոբէիցն, որ իցեն ՛ի վերայ տապանակին վկայութե(ան), ըստ ա(մենայ)նի զոր պատուիրեցի քեզ առ որդիսն ի(սրաէ)լի։

²³Եւ արասցես սեղա́ն յանփուտ փայտից. յերկուց կանգնոց զերկայնու(թ)ի(ւն) նորա, եւ ՛ի կանգնոյ զլայնու(թ)ի(ւն) ն(ո)ր(ա), եւ ՛ի կանգնոյ կիսոյ զբարձրու(թ)ի(ւն) նորա։
²⁴Եւ պատեսցե́ս զնա ոսկւով սրբով. եւ արասցես նմա ծնօտս ոսկիս շուրջանակաւ շուրջանակի։
²⁵եւ արասցես նմա պսա́կ ուղկեան շուրջանակի։ եւ արասցես պսակին ծնօտս շուրջանակաւ շուրջանակի։
²⁶Եւ արասցես նմա չո́րս օղամանեակս ոսկիս. եւ դիցես զօղամանեակսն ՛ի չորեսին կողմանսն, որ իցեն չորեցունց ոտից նորա,
²⁷՛ի ներքոյ պսակին. եւ եղիցին օղամանեակքն լա́մբք լծակացն, բառնալ նոքօք զսեղանն։

²⁸Եւ արասցես զլծակսն յանփո́ւտ փայտից, եւ պատեսցես զն(ո)ս(ա) ոսկւով սրբով. եւ բարձցի́ նոքօք սեղանն։
²⁹Եւ արասցես զխնկաղացսն եւ զտուփս ն(ո)ր(ա), եւ զճաշակս, եւ զնուիրանո́ցս ն(ո)ր(ա), որովք նուիրեսցես. յոսկւոյ սրբոյ արասցե́ս զայն։
³⁰Եւ դիցես ՛ի վերայ սեղանոյ՝ հացիներեսաց յանդիման իմ հանապազորդ։
³¹Եւ արասցես աշտանա́կ յոսկւոյ սրբոյ. ճախարակեա́յ գործեսցես զաշտանակսն. զի բունն, եւ ստեղունքն, եւ սկահքն, եւ գնդակքն, եւ շուշանքն՝ անդստին ՛ի նմանէ իցէ։
³²Վեց ստեղունք արձակեալք ՛ի կողմանց ն(ո)ր(ա). երեք ստեղունք աշտանակին ՛ի միոջէ́ կողմանէ. եւ երեք ստեղունք աշտանակին ՛ի միւսմէ́ կողմանէ։

³³Եւ երեք սկահաձեւք ընկուզազարդք յօրինեալք ՛ի միում ստեղանն. եւ գնդա́կ եւ շուշան. եւ երեք սկահաձեւք ընկուզազարդք յօրինեալք ՛ի միւսում ստեղանն. եւ գնդակ եւ շուշան. նո́յնպէս վեցեցունց ստեղանցն արձակելոց յաշտանակէ անտի։
³⁴Եւ յաշտանակի անդ չորք սկահաձեւք ընկուզազարդք յարդարեալք. եւ գնդակք եւ շուշանք ն(ո)ր(ա)։
³⁵Գնդակ ՛ի ներքոյ երկուց ստեղանցն անդստին ՛ի նմանէ, եւ գնդակ ՛ի ներքոյ երկուց եւս ստեղանցն անդստին ՛ի նմանէ. նոյնպէս արասցես վեցեցո́ւնց ստեղանցն արձակելոց յաշտանակէ անտի։
³⁶զի գնդակք ն(ո)ց(ա) եւ ստեղունք անդստին ՛ի նմանէ́ իցեն. համա́կ ճախարակեայ ՛ի միոջէ ոսկւոյ սրբոյ։

³⁷Եւ արասցես նմա ճրագարանս եւթն. եւ դիցես զճրագարանսն ՛ի վերայ աշտանակին. եւ տայցեն լո́յս ՛ի միոջէ կողմանէ երեսաց ն(ո)ր(ա)։
³⁸Եւ զբազմակալս ն(ո)ր(ա), եւ զնեցո́ւկսն արասցես յոսկւոյ սրբոյ։
³⁹՛ի տաղանդէ́ միոյ յոսկւոյ սրբոյ արասցես զայն ա(մենայ)ն սպաս։
⁴⁰Զգո́յշ լեր որպէս ցուցաւ քեզ օրինակ ՛ի լերինն՝ արասցե́ս։

¹Եւ արասցես խորա́ն տասնփեղկեան։ ՛ի բեհեզոյ մանելոյ, եւ ՛ի կապուտակէ, եւ ՛ի ծիրանւոյ, եւ ՛ի կարմրոյ կրկնելոյ։ քերոբ՝ գո́րծ անկուածոյ գործեսցես զնոսա։
²Երկայնու(թ)ի(ւն) միոյ փեղկին ՛ի քսանեւյութ կանգնոյ, եւ լայնու(թ)ի(ւն) ՛ի չորից կանգնոց փեղկի միոյ լինիցի։ չափ՝ նո́յն եղիցի ա(մենայ)ն փեղկիցն։
³հի́նգ փեղկ ընդ միմեանս կցեալ. եւ հինգ եւս ա́յլ ընդ միմեանս խառնեալ։
⁴Եւ արասցես ճարմա́նդս կապուտակեայս առ եզերբ միոյ փեղկին ՛ի միոջէ կողմանէ ՛ի խառնուածսն։ նոյնպէս արասցես եւ առ եզե́րբ արտաքնոյ փեղկին, երկրորդի́ խառնուածոյն։

⁵Յիսո́ւն ճարմանդ արասցես միում փեղկի. եւ յիսուն ճարմանդ արասցես ՛ի կողմանէ փեղկին ըստ երկրորդի խառնուածոյն. դէմ ընդդէ́մ միմեանց խառնիցն իւրաքանչիւր ճարմանդքն։
⁶Եւ արասցես յիսուն օղս ոսկիս՝ եւ խառնեսցես զփեղկսն ընդ միմեանս աղխիւքն. եւ եղիցի խորա́ն մի։
⁷Եւ արասցես վերնափեղկս մազեղէնս նուարտան խորանին, մետասան փեղկ գործեսցես զնոսա։
⁸Երկայնութի(ւն) միոյ փեղկի՝ լինիցի յերեսուն կանգնոյ. եւ լայնութի(ւն) միոյ փեղկի ՛ի չորից կանգնոց։ չափ՝ նոյն եղիցի մետասանեցունց փեղկիցն։
⁹Եւ խառնեսցե́ս ընդ միմեանս զհինգ փեղկն ՛ի միասին, եւ զվեց փեղկն ՛ի միասին։ եւ կրկնեսցես զվե́ցերորդ փեղկն առաջոյ կողմանէ խորանին։

¹⁰Եւ արասցես ճարամանդս յիսունս առ եզերբ միոյ փեղկին ՛ի մէ́ջ խառնուածոյն։ եւ յիսուն ճարամա́նդ արասցես առ եզերբ փեղկին երկրորդի́ խառնուածոյն։
¹¹Եւ արասցես օ́ղս պղնձիս յիսուն, եւ խառնեսցե́ս զօղսն ընդ ճարմանդսն. եւ կցեսցե́ս զփե́ղկսն՝ եւ եղիցին մի։
¹²Եւ դիցես զաւելորդ փեղկին ՛ի ներքո́յ խորանին. կիսով փեղկիւն աւելորդաւ մնացելով ծածկեսցե́ս զապարումս փեղկից խորանին յետոյ կողմանէ,
¹³կանգնաւ՝ յա́յսմ կողմանէ, եւ կանգնաւ՝ յա́յնմ կողմանէ. յաւելորդէ երկայնու(թ)ե(ան) փեղկից խորանին. եւ եղիցի ծածկե́լ զապարումս խորանին աստի անտի։
¹⁴Եւ արասցես զվիժակս խորանին ՛ի շիկակարմի́ր մորթոց խոյոց։ եւ ծածկելիս ՛ի կապո́ւտակ մորթոյ ՛ի վերուստ։

¹⁵Եւ արասցես զսիւնակս խորանին յանփո́ւտ փայտից
¹⁶կանգնաւորս. ՛ի տա́սն կանգնոյ զերկայնութի(ւն) միոյ սիւնակին առնիցես։ եւ ՛ի միոջէ կանգնոյ եւ ՛ի կիսոյ
¹⁷զթանձրութի(ւն) եւ զլայնու(թ)ի(ւն) միոյ սիւնակին։ Եւ երկուս սփռիչս միում սիւնակի, ագուցեալ ընդ միմեանս. ա́յնպէս արասցես ա(մենայ)ն սիւնակաց խորանին։
¹⁸Եւ արասցես քսան սիւնակս խորանին ՛ի հիւսւսոյ կողմանէ։
¹⁹եւ քառասուն խարիսխս արծաթիս արասցես քսանեցունց սեանց։ երկու խարիսխք առ մի սիւն յերկոցունց կողմանց. եւ երկու խարիսխք առ մի սիւն յերկոցունց կողմանց խորանին։
²⁰Եւ յերկրորդէ կողմանէ խորանին ընդ հարաւ քսան սիւն։

²¹եւ քառասուն խարիսխք ն(ո)ց(ա) արծաթիք. երկո́ւ խարիսխք առ մի սիւն յերկոցունց կողմանց։
²²Եւ յետուստ խորանին ՛ի ծովակողմն կուսէ արասցես վե́ց սիւն։
²³Եւ եկո́ւ սիւնս արասցես յանկիւնս խորանին ՛ի թիկա́նց կողմանէ։
²⁴եւ եղիցին հասարակ ՛ի ներքուստ։ Եւ ըստ նմի́ն օրինակի լինիցին զոյգք խոյակաց ն(ո)ր(ա) ՛ի մի խառնուած։ նո́յնպէս արասցես երկոցունց անկեանցն կանգնաւորս։
²⁵եւ եղիցի ո́ւթ սիւն. եւ խարիսխք ն(ո)ց(ա) արծաթիք՝ վեշտասան խարիսխք։ երկու խարիսխք առ մի սիւն յերկոցունց կողմանց ն(ո)ր(ա). եւ երկու սարիսխք առ մե́ւս եւս սիւն։
²⁶Եւ արասցես նիգս յանփուտ փայտից. հի́նգ նիգ առ մի սիւն ՛ի միոջէ́ կողմանէ խորանին,

²⁷եւ հինգ նիգ առ մե́ւս եւս սիւն յերկրո́րդ կողմանէ խորանին. եւ հինգ նիգ առ մի սիւն ՛ի թիկանց խորանին ընդ ծովակողմն։
²⁸եւ նիգ մի ՛ի մէջ սեանցն թափանցա́նց՝ ՛ի միոջէ կողմանէ ՛ի մի́ւս կողմն։
²⁹Եւ զսիւնսն պատեսցես ոսկւո́վ. եւ արասցես օ́ղս ոսկիս՝ յորս ագուցանիցես զնիգսն։ եւ պատեսցես զնիգսն ոսկւո́վ։
³⁰Եւ կանգնեսցես զխորանն վկայութե(ան)՝ ըստ օրինակին որ ցուցաւ քեզ ՛ի լերինն։
³¹Եւ արասցես վարագո́յր ՛ի կապուտակէ́, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեղո́յ նիւթելոյ։ գո́րծ անկուածոյ գործեսցես զնա քերա́ւբ։
³²Եւ դիցես զնա ՛ի վերայ չորեցունց անփո́ւտ եւ ոսկիապատ սեանցն. եւ խոյակք ն(ո)ց(ա) ոսկի́ք. եւ խարիսխք նոցա արծաթի́ք։

³³եւ ձգեսցե́ս զվարագոյրն սիւնէ ՛ի սիւն։ Եւ տարցիս ՛ի նե́րքս քան զվարագոյրն զտապանակ վկայութե(ա)ն. եւ անջրպետիցէ́ ձեզ վարագոյրն ՛ի մէջ սրբութե(ա)ն, եւ ՛ի մէջ սրբութե(ան) սրբութե(ան)ցն։
³⁴Եւ ծածկեսցե́ս վարագուրաւն զտապանակ վկայութե(ա)ն ՛ի սրբութի(ւն) սրբութե(ան)ցն։
³⁵Եւ դիցես զսեղանն արտաքոյ վարագուրին։ եւ զաշտանակն յանդիման սեղանոյն, ՛ի կողմանէ խորանին ընդ հարաւ։ եւ զսեղանն դիցես ՛ի կողմանէ խորանին ընդ հիւսւսի։
³⁶Եւ արասցես սրահա́կ դրան խորանին. ՛ի կապուտակէ́, եւ ՛ի ծիրանւոյ,եւ ՛ի կարմրոյ մանելոյ, եւ ՛ի բեհեզոյ նիւթելոյ. գործ նկարակե́րպ։

³⁷Եւ արասցես վարագուրին հինգ սիւնակ յանփուտ փայտից. եւ օծցես զնոսա ոսկւո́վ։ Եւ խոյակք ն(ո)ր(ա) ոսկի́ք. եւ ձուլեսցես նոցա հինգ խարիսխ պղնձի։

¹Եւ արասցես սեղա́ն յանփուտ փայտից. ՛ի հի́նգ կանգնոյ զերկայու(թ)ի(ւն) ն(ո)ր(ա), եւ ՛ի հինգ կանգնոյ զլայնութի(ւն)։ չորեքկուսի́ լինիցի սեղանն, եւ յերից կանգնոց զբարձրու(թ)ի(ւն) ն(ո)ր(ա)։
²Եւ արասցես զեղջեւրս նորա ՛ի վերայ չորեցո́ւնց անկեանց իւրոց. զի անդստի́ն ընտրեալ իցեն եղջեւրքն։ եւ պատեսցե́ս զնա պղնձով։
³Եւ արասցես պսա́կ սեղանոյն։ եւ զնուարտա́ն ն(ո)ր(ա)։ եւ զտաշտսն։ եւ զմսահանսն։ եւ զկրակարանսն։ եւ զա(մենայ)ն սպասն արասցեն պղնձի́։
⁴Եւ արասցես նմա գահաւորա́կ վանդակակե́րպ պղնձի։ եւ արասցես գահաւորակին չո́րս օղամանեակս պղնձիս ՛ի չորեցունց կողմանէ։

⁵եւ դիցես զնոսա ընդ գահաւորակաւ սեղանոյն ՛ի ներքոյ։ եւ եղիցի գահաւորակն մինչեւ ՛ի մէջ սեղանոյն։
⁶Եւ արասցես լծա́կս սեղանոյն, լծակս յանփուտ փայտից։ եւ պատեսցես զն(ո)ս(ա) պղնձով.
⁷եւ արկցես զլծակսն ընդ օղսն։ եւ եղիցին լծակքն յերկոցունց կողմանց սեղանոյն՝ առ ՛ի բառնալոյ զնա։
⁸Խո́ր, տախտակամա́ծս արասցես զնա. ըստ օրինակին որպէս ցուցաւ քեզ ՛ի լերինն. ա́յնպէս արասցես զնա։
⁹Եւ արասցես սրահ ՛ի խորանին ՛ի կողմ հարաւոյ. եւ զառագաստ սրահին ՛ի բեհեզո́յ մանելոյ. հարիւր կանգուն յերկայնու(թ)ի(ւն) միոյ կողմանն,
¹⁰եւ սիւնք նոցա քսան, եւ խարիսխք նոցա պղնձիք քսան, եւ օղք նոցա եւ խոյակք ն(ո)ց(ա) արծաթիք։

¹¹Նո́յնպէս եւ ՛ի կողմանն որ ընդ հիւսւսի՝ առագաստքն հարիւր կանգուն յերկայնութի(ւն). եւ սիւնք ն(ո)ց(ա) պղնձիք քսան, եւ սարիսխք նոցա պղնձիք քսան. եւ խոյաւղք նոցա. եւ խոյակք սեանցն պատեալ արծաթով։
¹²Եւ ՛ի լայնութի(ւն) սրահին ընդ ծովակողմն առագաստք ՛ի յիսուն կանգնոյ. սիւնք ն(ո)ց(ա) տասն, եւ խարիսխք ն(ո)ց(ա) տասն։
¹³Եւ ՛ի լայնու(թ)ի(ւն) առաջին սրահին՝ որ ընդ արեւելս առագաստք ՛ի յիսուն կանգնոյ. սիւնք ն(ո)ց(ա) տասն, եւ խարիսխք ն(ո)ց(ա) տասն։
¹⁴Եւ ՛ի հնգետասան կանգնոյ բարձրու(թ)ի(ւն) առագաստին ՛ի միոջէ կողմանէ. սիւնք ն(ո)ց(ա) երեք, եւ խարիսխք ն(ո)ց(ա) երեք։

¹⁵Եւ յերկրորդում կողմանն՝ հինգետասան կանգուն առագաստից ՛ի բարձրութի(ւն). սիւնք ն(ո)ց(ա) երեք, եւ խարիսխք ն(ո)ց(ա) երեք։
¹⁶Եւ դրան սրահին վարագոյր՝ քսան կանգուն ՛ի բարձրու(թ)ի(ւն), ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզո́յ նիւթելոյ. նկարէն յասղնագործաց։ եւ սիւնք ն(ո)ց(ա) չորք, եւ խարիսխք ն(ո)ց(ա) չորք։
¹⁷ա(մենայ)ն սիւնք սրահին շուրջանակի արծաթապատք, եւ խոյակք նոցա արծաթիք, եւ սարիսխք նոցա պղնձիք։
¹⁸Եւ երկայնութի(ւն) սրահին հարի́ւր առ հարիւր. եւ լայնութի(ւն) յիսո́ւն առ յիսուն. եւ բարձրութի(ւն) հնգետասա́ն կանգուն. ՛ի բեհեզոյ մանելոյ. եւ խարիսխք ն(ո)ց(ա) պղնձիք։

¹⁹եւ ա(մենայ)ն կա́հ խորանին, եւ ա(մենայ)ն գործի ն(ո)ր(ա), եւ ա(մենայ)ն ցի́ցք սրահին՝ պնձիք։
²⁰Եւ դու պատուիրեա́ որդւոցն ի(սրաէ)լի. եւ առցեն քեզ ձէ́թ ՛ի ձիթենեաց, պարզ, սուրբ, խակակութ, ՛ի լոյս. զի եղիցի ճրագ հանապազորդ՝
²¹՛ի խորանին վկայու(թ)ե(ան), արտաքոյ վարագուրի ուխտին։ Եւ լուցանիցէ զնա ահարոն եւ որդիք իւր յերեկորեայ մինչեւ ցառաւօտ առաջի տ(եառ)ն. օրէն յաւիտենակա́ն յազգս ձեր առ ՛ի յորդւոցն ի(սրաէ)լի։

¹Եւ դու մատուսցես առ քեզ զահարոն զեղբայր քո. եւ զորդիս ն(ո)ր(ա) ընդ նմա՝ յորդւոցն իսրայէի, քահանայանա́լ ինձ. զահարոն, եւ զնաբադ, եւ զաբիուդ, եւ զեղիազար, եւ զիթամա́ր զորդիս ահարոնի։
²Եւ արասցես պատմուճան սո́ւրբ՝ ահարոնի եղբօր քում, ՛ի պատիւ եւ ՛ի փառս։
³եւ դու խօսեսցի́ս ը(նդ) ա(մենայ)ն իմաստունս մտօք, զորս լցուցի́ց հոգւով իմաստու(թ)ե(ան)։ Եւ արասցես պատմուճան սուրբ՝ ահարոնի ՛ի սրբութի(ւն), որովք քահանայանայցէ́ ինձ։

⁴Եւ ա́յս օրինակ պատմուճանացն՝ զոր առնիցեն. զպճղնաւորն, եւ զվակաս՝ զուսովք եւ զլանջօք. եւ զպատմուճանն բեհեղեայ. եւ խոյր. եւ կամար։ եւ արասցեն պատմուճան սո́ւրբ՝ ահարոնի եղբօր քում, եւ որդւոց ն(ո)ր(ա) քահանայանա́լ ինձ։
⁵Եւ առցեն նոքա ոսկի, եւ կապուտակ, եւ ծիրանի, եւ կարմիր մանեալ, եւ բեհե́զ։
⁶Եւ արասցեն զվակասն յոսկւո́յ սրբոյ, եւ ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզոյ նիւթելոյ. գո́րծ ոստայնի նկարակերպ։
⁷Երկու վակասք ընդ միմեանս խառնեալք, եղիցին ՛ի վ(ե)ր(այ) երկոցո́ւնց կողմանց ն(ո)ր(ա) հաստատեալք։

⁸եւ գործ վակասին՝ որ իցէ ՛ի վերայ ն(ո)ր(ա). ըստ նմի́ն օրինակի գո́րծ անդստին ՛ի նմանէ լինիցի. յոսկւոյ սրբոյ, եւ ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզոյ նիւթելոյ։
⁹Եւ առցես երկուս ականս զմրո́ւխտս, եւ գրեսցես ՛ի նոսա զանուանս որդւոցն իսրայէլի.
¹⁰զվե́ց անուն ն(ո)ց(ա) ՛ի միում ական. եւ զայլն եւս վեց՝ յերկրորդում ականն. ը(ս)տ ազգս իւրեանց.
¹¹գո́րծ ճարտարու(թ)ե(ան) ակնագործաց. քանդա́կ կնքոյ քանդակեսցես զերկոսին ականսն. ըստ անուանց որդւոցն ի(սրաէ)լի. տպաւորեալս եւ քանդակեալս ոսկւով արասցես զն(ո)ս(ա)։

¹²Եւ դիցես զերկուս ականսն ՛ի վերայ ուսոց վակասին. զի լինիցին ականքն յիշատակ որդւոցն ի(սրաէ)լի։ եւ բառնայցէ́ ահարոն զանուանս որդւոցն ի(սրաէ)լի առաջի տ(եառ)ն, ՛ի վ(ե)ր(այ) երկուց ուսոց իւրոց՝ ՛ի յիշատակ վ(ա)ս(ն) ն(ո)ց(ա)։
¹³Եւ արասցես վահանա́կս յոսկւոյ սրբոյ։
¹⁴եւ արասցես երկո́ւս վերջս յոսկւոյ սրբոյ. մանուածոյս ծաղկեալս՝ գո́րծ հիւսկէն. եւ դիցես զվերջսն մանուածոյս ՛ի վերայ երկոցուն վահանակացն
¹⁵առ վտաւակօքն ն(ո)ց(ա) առաջոյ կողմանէ։
¹⁶Եւ արասցես զնա չորեքանկիւնի́, թղաւ յերկայնութի(ւն), եւ թղաւ ՛ի լայնութի(ւն)։
¹⁷Եւ ընդգելուզցե́ս ՛ի նմա ընդելուզածս, ըստ չորեքկարգեա́ն ականց։ Կարգս ականց, Առաջին՝ զըմրուխտ, եւ սարդիոն, եւ տպազիոն. կարգ մի։

¹⁸եւ Կարգն երկրորդ՝ կարկեհան, եւ չափիզա, եւ յասպիս։
¹⁹եւ Կարգն երրորդ՝ գոճազմ, եւ ակատ, եւ սուտակ։
²⁰եւ Կարգն չորրորդ՝ յակինթ, եւ բիւրեղ, եւ եղունդն։ ընդելուազեալ, յոսկի կապեալ՝ յիւրաքանչիւր կարգս կայցեն։
²¹Եւ եղիցին ականքն յանուա́նց որդւոցն ի(սրաէ)լի երկոտասան. ըստ անուանց նոցա գրեալք քանդակաւ իւրաքանչիւր ըստ անուան իւրում լինիցին. ըստ ազգա́ցն երկոտասանից։
²²Եւ արասցես տախտակ մի հիւսկէ́ն վերջիւք. գործ շղթայգործ յոսկւոյ սրբոյ։
²³Եւ արասցես ՛ի վերայ տախտակին երկուս օղս ոսկիս. եւ դիցես զերկուս օղսն ոսկիս ՛ի վերայ երկուց ծայրից տախտակին։

²⁴Եւ դիցես զերկու շղթայագործսն ոսկիս ՛ի վերայ երկոցուն օղոցն առ ծայրիւք տախտակին։
²⁵եւ զերկուս ծայրս երկուց շղթայագործիցն տացե́ս ՛ի վերայ երկոցունց մած. եւ դիցես ՛ի վերայ թիկանց վակասին ՛ի ճակա́տ երեսաց նորա։
²⁶Եւ արասցես երկո́ւս օղս ոսկիս, եւ տացե́ս զնոսա ՛ի վերայ երկուց ծայրից տախտակին, առ եզերբն որ իցէ հանդէպ վակասին ՛ի ներքոյ կողմանէ։
²⁷Եւ արասցես երկուս օղս ոսկիս, եւ տացես զնոսա ՛ի վերայ երկուց ուսոց վակասին ՛ի ներքոյ կողմանէ՝ յանդիման միմեանց միաբան. եւ զաղխս ն(ո)ր(ա) ՛ի վերայ մենքենայից վակասին։

²⁸եւ պինդ ունիցին զտախտակն յօղոց ն(ո)ր(ա)՝ մինչեւ ցօղս վակասին, ՛ի նիւթոյ կապուտակէ. զի իցէ ՛ի վերայ մենքենայից վակասին. եւ մի́ զերծանիցի տախտակն ՛ի վակասէ անտի։
²⁹Եւ առցէ ահարոն զանուն որդւոցն ի(սրաէ)լի ՛ի վերայ տախտակի դատաստանի՝ ՛ի լանջս իւր, ՛ի մտանել իւրում ՛ի սրբու(թ)ի(ւն)ն ՛ի յիշատակ հանապազորդ առաջի ա(ստուծո)յ։

³⁰Եւ դիցես ՛ի վերայ տախտակին դատաստանի զվերջսն շղթայագործս՝ յերկոցունց կողմանց տախտակին դիցես։ եւ զերկուս վահանակսն դիցես ՛ի վերայ երկուց ուսոց վակասին յերեսաց կողմանէ ՛ի ներքուստ։ Եւ դիցես ՛ի վերայ տախտակին դատաստանի զյանդիմանու(թ)ի(ւն)ն եւ զճշմարտու(թ)ի(ւն). եւ եղիցի ՛ի վ(ե)ր(այ) լանջա́նցն ահարոնի յորժամ մտանիցէ ՛ի սրբու(թ)ի(ւն)սն առաջի տ(եառ)ն։ եւ տարցի ահարոն զդատաստանս որդւոցն ի(սրաէ)լի ՛ի վերայ լանջաց իւրոց առաջի տ(եառ)ն հանապազ։
³¹Եւ արասցես վտաւակս պճղնաւորս համա́կ կապուտակ.
³²եւ զօձիսն գրապանա́ւ արարեալ, բոլորա́կ ձեւեսցես շուրջանակի՝ գո́րծ անդուածոյ։ եւ զխառնուածսն անկեալ անդստին ՛ի նմանէ. զի մի́ արատիցի։

³³Եւ արասցես առ ստորոտով՝ վտաւակացն ՛ի ներքոյ կողմանէ՝ իբրեւ նռնաձեւս ծաղկեալս, ՛ի կապուտակէ եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզոյ նիւթելոյ առ ստորոտով վտաւակացն շուրջանակի. եւ տեսիլ ն(ո)ր(ա) նռնաձեւ, եւ զանգակս ոսկիս ՛ի մէջ ն(ո)ց(ա) շուրջանակի։
³⁴զանգակս ոսկի եւ նռնաձեւ՝ ծաղկեալ առ ստորով վտաւակացն շուրջանակի։
³⁵Եւ եղիցի ՛ի վերայ ահարոնի յորժամ պաշտիցէ՝ հնչիւն բարբառոյ ՛ի մտանել իւրում ՛ի սրբութի(ւն)ն առաջի տ(եառ)ն, եւ յելանել ն(ո)ր(ա)՝ զի մի́ մեռանիցի։
³⁶Եւ արասցես թիթեղն յոսկւոյ սրբոյ. եւ քանդակեսցես ՛ի նմա քանդակ կնքոյ՝ սրբութի(ւն) տ(եառ)ն։
³⁷եւ դիցես զնա ՛ի վերայ կապուտակին մանելոյ. եւ ե́ղիցի խուրին յերեսաց կողմանէ

³⁸՛ի վերայ ճակատուն ահարոնի։ Եւ բարձցէ ահարոն զմեղս նուիրացն, որչափ ինչ նուիրիցեն որդիքն ի(սրաէ)լի, ըստ ա(մենայ)ն արոց սրբութե(ան)ցն իւրեանց. եւ եղիցի ՛ի վերայ ճակատուն ահարոնի հանապազ յընդունելութի(ւն) նոցա առաջի տ(եառ)ն։
³⁹Եւ զպճղնաւոր պատմուճանն ՛ի բեհեզոյ։
⁴⁰Եւ որդւոցն ահարոնի արասցես պատմուճանս, եւ կամարս, եւ խոյրս. ՛ի պատիւ եւ ՛ի փառս։
⁴¹եւ զգեցուսցես զայն ահարոնի եղբօր քում, եւ որդւոց ն(ո)ր(ա) ընդ նմա։ Եւ օծցե́ս զնոսա. եւ լցցե́ս զձեռս ն(ո)ց(ա). եւ սրբեսցե́ս զնոսա՝ զի քահանայասցին ինձ։
⁴²Եւ արասցես նոցա անդրավարտիս կտաւեայս. ծածկել զառականս մարմնոց իւրոց, միջովք չափ եւ բարձիւք չափ։

⁴³Եւ ունիցի զայն ահարոն եւ որդիք ն(ո)ր(ա), յորժամ մտանիցեն ՛ի խորանն վկայութե(ան). կամ յորժամ մերձենայցեն ՛ի սեղանն սրբութե(ան) պաշտե́լ։ եւ մի́ ածիցեն ՛ի վ(ե)ր(այ) իւրեանց մեղս՝ զի մի́ մեռանիցին։ օրէն յաւիտենակա́ն նմա եւ զաւակի իւրում յետ ն(ո)ր(ա)։

¹Եւ ա́յս ինչ է զոր առնիցես նոցա, եւ սրբեսցես զնոսա քահանայանալ ն(ո)ց(ա) ինձ։ Առցես զուարակ մի յանդոյ. եւ խոյս երկո́ւս անարատս։
²եւ պա́նս բաղարջս, եւ շօթս բաղարջս զանգեալ իւղով. եւ քաքա́րս բաղարջս օծեալ իւղով, նաշի́հ ցորենոյ զանգեալ իւղով արասցես զայն։
³Եւ դիցես ՛ի վերայ խանի միոյ. եւ մատուսցես զայն խանիւն, եւ զզուարակն, եւ զերկու խոյսն։
⁴Եւ զահարոն եւ զորդիս նորա մատուսցես ՛ի դուռն խորանին վկայութե(ան). եւ լուասցես զնոսա ջրով։
⁵Եւ առեալ զպատմուճանսն զգեցուսցե́ս ահարոնի եղբօր քում. եւ զպարեդօտս պճղնաւորս ՛ի վ(ե)ր(այ) ներքնակացն. եւ զվակասն. եւ զտախտակն. եւ պնդեսցե́ս զտախտակն ընդ վակասն։

⁶եւ դիցես զխոյրն ՛ի վերայ գլխոյ ն(ո)ր(ա). եւ դիցես զթիթեղնն սուրբ ՛ի վ(ե)ր(այ) խուրին։
⁷Եւ առցես յիւղոյ անտի օծման, եւ արկցե́ս ՛ի գլուխ նորա, եւ օծցես զնա։
⁸Եւ զորդիս ն(ո)ր(ա) մատուսցես, եւ զգեցուսցես նոցա պատմուճանս. եւ ածցե́ս նոցա կամարս.
⁹ահարոնի եւ որդւոց ն(ո)ր(ա). եւ ածցես ն(ո)ց(ա) ապարաւշս. եւ եղիցի ն(ո)ց(ա) այն ինձ ՛ի քահանայու(թ)ի(ւն) յաւիտենական։ եւ կատարեսցե́ս զձեռս ահարոնի եւ զձեռս որդւոց ն(ո)ր(ա)։
¹⁰Եւ մատուսցես զզուարակն առ դուռն խորանին վկայութե(ան). եւ դիցեն ահարոն եւ որդիք ն(ո)ր(ա) զձեռս իւրեանց ՛ի վերայ գլխոյ զուարակին առաջի տ(եառ)ն, առ դրան խորանին վկայութե(ան)։

¹¹Եւ սպանցե́ս զզուարակն առաջի տ(եառ)ն, առ դրան խորանին վկայու(թ)ե(ան)։
¹²եւ առցե́ս յարենէ զուարակին, եւ դիցե́ս ՛ի վերայ եղջերաց սեղանոյն մատամբ քով. եւ զա́յլն ա(մենայ)ն արիւն ցանեսցես առ յատակաւ սեղանոյն։
¹³Եւ առցե́ս զա(մենայ)ն ճարպ թաղանթո́յ քաղրդին, եւ զլերդաբոյթն, եւ զերկուս երիկամունսն ճարպովին, դիցես ՛ի վերայ սեղանոյն։
¹⁴Եւ զմիս զուարակին եւ զմորթ նորա, եւ զապաւառն այրեսցեն արտաքոյ բանակին. զի այն իսկ է վ(ա)ս(ն) մեղաց։
¹⁵Եւ զխոյն զմի՝ առցե́ս. եւ դիցեն քահանայքն որդիքն ահարոնի զձեռս իւրեանց ՛ի վ(ե)ր(այ) գլխոյ խոյին.
¹⁶եւ զենցե́ս զխոյն։ եւ առեալ զարիւն ն(ո)ր(ա) հեղցե́ս շուրջ զսեղանովն։

¹⁷Եւ զխոյն յօշեսցե́ս անդա́մ անդամ, եւ լուասցես զփորոտին եւ զոտս նորա ջրով. եւ դիցես ՛ի վերայ յօշուածոյն, հանդերձ գլխով նորա։
¹⁸Եւ հանցես բովանդակ զխոյն ՛ի վերայ սեղանոյն յողջակէզ տ(եառ)ն ՛ի հոտ անուշից. զոհ տ(եառ)ն է։
¹⁹Եւ առցես զխոյն զերկրորդ. եւ դիցեն ահարոն եւ որդիք ն(ո)ր(ա) զձեռս իւրեանց ՛ի վերայ գլխո́յ խոյին։

²⁰եւ սպանցե́ս զխոյն։ Եւ առցես յարենէ ն(ո)ր(ա), եւ դիցես ՛ի վերայ բլթակի աջոյ ունկանն ահարոնի. եւ ՛ի վերայ բլթակի աջոյ ունկան որդւոց ն(ո)ր(ա). եւ ՛ի վ(ե)ր(այ) ծայրից ձեռին ն(ո)ր(ա) աջոյ, եւ ՛ի վ(ե)ր(այ) ծայրից աջոյ ոտին ն(ո)ր(ա). եւ ՛ի վ(ե)ր(այ) աջուց բլթակաց ականջաց որդւոց ն(ո)ր(ա). եւ ՛ի վ(ե)ր(այ) ծայրից աջոյ ձեռաց ն(ո)ց(ա). եւ ՛ի վ(ե)ր(այ) ծայրից աջոյ ոտից ն(ո)ց(ա)։ եւ հեղցե́ս զարիւնն շուրջ զսեղանովն։

²¹Եւ առցես յարենէն որ ՛ի վ(ե)ր(այ) սեղանոյն իցէ, եւ յիւղոյ օծու(թ)ե(ա)ն, եւ ցանեսցե́ս ՛ի վ(ե)ր(այ) ահարոնի եւ ՛ի վ(ե)ր(այ) պատմուճանի ն(ո)ր(ա), եւ ՛ի վերայ որդւոց ն(ո)ր(ա), եւ ՛ի վ(ե)ր(այ) պատմուճանաց որդւոց ն(ո)ր(ա) ընդ նմա. եւ սրբեսցի́ ինքն եւ պատմուճան իւր. եւ որդիք ն(ո)ր(ա), եւ պատմուճանք որդւոց նորա ընդ նմա։ եւ զարիւն խոյին ցանեսցե́ս շուրջ զսեղանովն։
²²Եւ առցես ՛ի խոյէ անտի զճարպն եւ զդմակն եւ զճարպ թաղանթոյ քաղրթին, եւ զլերդաբոյթն եւ զերկուս երիկամունս ճարպովին. եւ զերին աջոյ. զի ա́յն է կատարումն։
²³եւ պան մի, եւ շօթ մի իւղով զանգեալ. եւ քաքար մի ՛ի խանէ անտի բաղարջացն եդելոցն առաջի տ(եառ)ն։

²⁴Եւ դիցես զայն ամենայն ՛ի վերայ ձեռացն ահարոնի, եւ ՛ի վերայ ձեռաց որդւոց ն(ո)ր(ա). եւ նուիրեսցես զայն նուէ́ր առաջի տ(եառ)ն։
²⁵Եւ առցես ՛ի ձեռաց նոցա, եւ հանցես ՛ի սեղանն ողջակիզաց ՛ի հո́տ անուշից առաջի տ(եառ)ն. զի պտուղ տ(եառ)ն է։
²⁶Եւ առցես զերբուծն ՛ի խոյէ անտի կատարման, որ է ահարոնի. եւ նուիրեսցես զայն նուէ́ր առաջի տ(եառ)ն. եւ եղիցի քե́զ ՛ի մասն։
²⁷եւ սրբեսցես զերբուծն ՛ի նուէր, եւ զերի́ նուիրին որ նուիրիցի։ Եւ որ ինչ հանիցի ՛ի խոյէն

²⁸կատարման յահարոնէ եւ յորդւոց նորա, եւ եղիցի ահարոնի եւ որդւոց ն(ո)ր(ա) օրէ́ն յաւիտեանական առ ՛ի յորդւոցն ի(սրաէ)լի. զի ա́յն է նոցա հաս։ Եւ եղիցի նուէր յորդւոցն խորայէլի ՛ի զենլեաց փրկութե(ան)ց իւրեանց, նուէ́ր ն(ո)ց(ա) տ(եառ)ն։
²⁹Եւ պատմուճանն սրբութե(ան) որ է ահարոնի, եղիցի որդւո́ց ն(ո)ր(ա) յետ ն(ո)ր(ա), օծանել զն(ո)ս(ա) նոքօք, եւ կատարել նոքօք զձեռս ն(ո)ց(ա)։
³⁰Զեւթն օր զգենուցու զայն քահանայն որ փոխանա́կ նորա կայցէ յորդւոց իւրոց. որ մտանիցէ ՛ի խորանն վկայու(թ)ե(ան) պաշտել ՛ի սրբութի(ւն)սն։
³¹Եւ զխոյն կատարման առցես. եւ եփեսցես զմիս ն(ո)ր(ա) ՛ի սրբում տեղւոջ.

³²եւ կերիցեն՝ ահարոն եւ որդիք ն(ո)ր(ա) զմիս խոյին. եւ զպա́նսն որ ՛ի խանի անդ, առ դրան խորանին վկայու(թ)ե(ան) կերիցեն զայն,
³³որովք սրբեցանն՝ ՛ի կատարել զձեռս ն(ո)ց(ա) եւ սրբել զնոսա։ օտարազգի́ ոք՝ մի́ կերիցէ ՛ի նոցանէ՝ զի սրբութի(ւն)ք են։
³⁴Ապա թէ մնայցէ ՛ի մսոյ զոհին կատարման, եւ ՛ի հացէ անտի յայդ՝ այրեսցեն զնշխարն հրով. եւ մի́ կերիցի, զի սրբութի(ւն) տ(եառ)ն է։
³⁵Եւ արասցես ահարոնի եւ որդւոց ն(ո)ր(ա) ա́յսպէս, ը(ս)տ ա(մենայ)նի զոր միանգամ պատուիրեցի քեզ։ Զեւթն օր կատարեսցես զձեռս ն(ո)ց(ա)։
³⁶եւ զզուարակն զվասն մեղաց՝ արասցե́ս յաւուրն սրբութե(ան)։

³⁷զեւթն օր։ եւ մաքրեսցե́ս զսեղանն եւ սրբեսցես զնա. եւ եղիցի սեղանն սուրբ սրբոյն. ա(մենայ)ն որ մերձեսցի ՛ի սեղանն՝ սրբեսցի։
³⁸Եւ ա́յս ինչ իցէ զոր առնիցես ՛ի վ(ե)ր(այ) սեղանոյն։ երկո́ւս դառինս տարեւորս անարատս՝ առ օր ՛ի վերայ սեղանոյն յաճախութ(եամ)բ. զի պտուղ յաճախութե(ան) է։
³⁹զմի գառնն առնիցես ընդ առաւօտս, եւ զերկրորդ գառնն՝ առնիցես ընդ երեկոյս։
⁴⁰Եւ տասանորդ նաշհոյ՝ մղեալ իւղո́վ թրմեալ. եւ զչորրորդ դորակի գինւոյ՝ նուէ́ր առ մի գառնն։
⁴¹Եւ զգառնն երկրորդ, արասցես ընդ երեկոյս՝ ըստ առաւօտին զոհին, եւ ը(ս)տ նորին նուիրին առնիցես նմա ՛ի հո́տ անուշից

⁴²պտուղ տ(եառ)ն։ զոհ յաճախու(թ)ե(ան) յազգս ձեր, առ դրա́ն խորանին վկայութե(ան) առաջի տ(եառ)ն։ որովք ծանուցայց քեզ ա́նդ խօսել ընդ քեզ։
⁴³եւ ժամանակեցի́ց անդ որդւոցն ի(սրաէ)լի, եւ սրբեցայց փառօք իմովք.
⁴⁴եւ սրբեցից զխորանն վկայութե(ան) եւ զսեղանն։ Եւ զահարոն եւ զորդիս նորա սրբեցի́ց ինձ ՛ի քահանայութի(ւն)։
⁴⁵եւ անուանեցա́յց յորդիսն ի(սրաէ)լի. եւ եղէց ն(ո)ց(ա) ա(ստուա)ծ։
⁴⁶Եւ ծանիցեն թէ ե́ս եմ տ(է)ր ա(ստուա)ծ ն(ո)ց(ա). որ հանի զնոսա յերկրէն եգիպտացւոց, անուանել ն(ո)ց(ա)՝ եւ լինել ն(ո)ց(ա) տ(է)ր ա(ստուա)ծ։

¹Եւ արասցես սեղան խնկակա́լ խնկոց յանփուտ փայտից։
²եւ արասցե́ս զնա կանգնաւ յերկայնու(թ)ի(ւն), եւ կանգնաւ ՛ի լայնութի(ւն), չորեքկուսի́ լինիցի. եւ յերկուց կանգնոց բարձրու(թ)ի(ւն) ն(ո)ր(ա). եւ եղջեւրք իւր անդըստին ՛ի նմանէ́ լինիցին։
³Եւ պատեսցե́ս զն(ո)ս(ա) ոսկւով սրբով. զվանդակն ն(ո)ր(ա) եւ զկողմանս շուրջանակի, եւ զեղջեւրս ն(ո)ր(ա). եւ արասցես նմա պսա́կ ոսկի շուրջանակաւ շուրջանակի։
⁴Եւ երկուս օղս ոսկիս սուրբս արասցես ը(ստ) շուրջանակաւ պսակի ն(ո)ր(ա) յերկոցունց կողմանց։
⁵եւ արասցես յերկոսին անկիւնս ն(ո)ր(ա). եւ եղիցին լծա́կք օղալամբացն բառնալ զնա նոքօք։

⁶եւ արասցես զլծակսն յանփո́ւտ փայտից, եւ պատեսցես զն(ո)ս(ա) ոսկւով։
⁷Եւ դիցե́ս զնա յանդիման վարագուրին, որ իցէ առաջի տապանակին վկայութե(ան), ընդդէ́մ վկայութե(ա)ն՝ որ իցէ առ վկայութ(եամ)բքն, որովք երեւեցա́յց քեզ անդ։
⁸Եւ արկցէ ՛ի վերայ ն(ո)ր(ա) ահարոն խո́ւնկս հանդերձեալ՝ աղացեալ մանր իբրեւ զփոշի. ընդ առաւօ́տս առաւօտս, յորժամ զճրագսն հանդրձիցէ. ծխեսցէ խո́ւնկ ՛ի վերայ ն(ո)ր(ա)։
⁹Եւ յորժամ լուցանիցէ ահարոն զճրագսն երեկորին, ծխեսցէ ՛ի վերայ ն(ո)ր(ա) խո́ւնկս յաճախութե(ան) հանապազորդ առաջի տ(եառ)ն յազգս իւրեանց։

¹⁰Եւ ո́չ հանիցէք ՛ի վերայ ն(ո)ր(ա) խունկ օտար, եւ պտուղս, եւ զոհս, եւ նուէրս մի́ նուիրիցէք ՛ի վերայ ն(ո)ր(ա)։
¹¹Եւ քաւեսցէ́ ահարոն ՛ի վերայ եղհերաց նորա միանգամ ՛ի տարւոջ՝ յարենէ առ ՛ի վասն մեղացն սրբութե(ան) եւ քաւութե(ան). մի անգամ ՛ի տարւոջ սրբեսցէ զնա յազգս ն(ո)ց(ա), զի սրբութի(ւն) սրբութե(ան)ց տ(եառ)ն է։
¹²Եւ խօսեցաւ տ(է)ր ընդ մովսիսի եւ ասէ, եթէ ունիցիս զհամար որդւոցն ի(սրաէ)լի ՛ի հանդիսի իւրեանց։ եւ տացեն իւրաքանչիւր փրկա́նս ընդ անձին իւրոյ տ(եառ)ն՝ ըստ հանդիսին իւրեանց. եւ մի́ լինիցի ՛ի նոսա մա́հ ՛ի հանդիսի անդ իւրեանց։

¹³Եւ ա́յս ինչ է զոր տացեն որք անցանիցեն ՛ի հանդիսի անդ. զկէս երկդրամենին, որ իցէ ըստ սրբութե(ան) երկդրամենին. քսան դա́նգ է երկդրամեանն. եւ կէս երկդրամենին եղիցի հա́ս տ(եառ)ն։
¹⁴Ամենայն որ անցանիցէ ՛ի հանդիսի անդ՝ ՛ի քսան ամենից եւ ՛ի վեր՝ տացեն հա́ս տ(եառ)ն.
¹⁵մեծատունն՝ մի́ յաւելցէ. եւ տնանկն՝ մի́ պակասեցուսցէ
¹⁶՛ի կիսոյ երկդրամենին ՛ի տա́լ անդ զհաս տ(եառ)ն յորդւոցն ի(սրաէ)լի, առնել քաւու(թ)ի(ւն)՝ վ(ա)ս(ն) անձանց ձերոց։ Եւ առցես զարծաթ հասին յորդւոցն ի(սրաէ)լի, եւ տացես զնա ՛ի գո́րծ խորանին վկայու(թ)ե(ան). եւ եղիցի որդւոցն ի(սրաէ)լի յիշատակ առաջի տ(եառ)ն, քաւե́լ վ(ա)ս(ն) անձանց նոցա։
¹⁷Խօսեցաւ տ(է)ր ընդ մովսիսի՝ եւ ասէ։

¹⁸արա́ աւազան պղնձի, եւ զխարիսխ նորա պղնձի առ ՛ի լուանալոյ ՛ի նմա։ եւ դիցե́ս զնա ընդ խորանն վկայութե(ան) եւ ընդ սեղանն. եւ արկցես ՛ի նա ջո́ւր։
¹⁹Եւ լուասցե́ն ահարոն եւ որդիք ն(ո)ր(ա) ՛ի նմանէ զձե́ռս եւ զոտս իւրեանց,
²⁰յորժամ մտանիցեն ՛ի խորանն վկայութե(ան)՝ լուասցին ջրով՝ եւ մի́ մեռանիցին. կամ յորժամ մերձենայցեն ՛ի սեղանն պաշտել, եւ հանել զողջակէզսն տ(եառ)ն, լուասցեն զձեռս եւ զոտս իւրեանց՝
²¹զի մի́ մեռանիցին։ Եւ եղիցի ն(ո)ց(ա) օրէն յաւիտենական. նմա́ եւ որդւոց ն(ո)ր(ա) յետ ն(ո)ր(ա)։
²²Խօսեցաւ տ(է)ր ընդ մովսիսի,

²³եւ ասէ. եւ դու ա́ռ քեզ խունկս անուշունս. ծաղիկ ընտիր զմըռնենեաց հինգ հարիւր սիկղ. եւ կինամոմոն զանոյշ, զկէս այնորիկ երկերիւր եւ յիսուն. եւ զխունկեղէգն զանոյշ երկերիւր եւ յիսուն։
²⁴եւ հիրիկ հինգ հարիւր սիկղ ըստ սրբութե(ա)ն. եւ եւղ ձիթենեաց հիմենեաւ միով։
²⁵Եւ արասցես զայն եւղ յօծումն սրբութե(ան). եւղ եփեալ ըստ արուեստի իւղագործաց. եւղ յօծումն սրբութե(ան) լինիցի։
²⁶Եւ օծցե́ս ՛ի նմանէ զխորանն վկայութե(ան), եւ զտապանակ վկայու(թ)ե(ա)ն.
²⁷եւ զսեղանն եւ զա(մենայ)ն զկահ ն(ո)ր(ա)։ եւ զաշտանակ եւ զա(մենայ)ն զկահ նորա, եւ զսեղանն խնկոց։

²⁸եւ զսեղանն ողջակիզաց, եւ զա(մենայ)ն զկահ ն(ո)ր(ա). եւ զաւազանն, եւ զյատակս ն(ո)ր(ա)։
²⁹Եւ սրբեսցե́ս զնոսա. եւ եղիցի սրբութի(ւն) սրբութե(ան)ց. ա(մենայ)ն որ մերձենայցէ ՛ի նոսա՝ սրբեսցի́։
³⁰Եւ զահարոն եւ զորդիս ն(ո)ր(ա) օծցե́ս եւ սրբեսցե́ս զն(ո)ս(ա) ինձ ՛ի քահանայու(թ)ի(ւն)։
³¹Եւ ընդ որդիսն ի(սրաէ)լի խօսեսցի́ս եւ ասասցես. եւղ յօծումն օծու(թ)ե(ան) սրբոյ եղիցի ձեզ յազգս ձեր։
³²՛ի մարմին մարդոյ՝ ո́չ օծանիցի. եւ ըստ ա́յդմ հանդերձանի ո́չ առնիցէք ձեզ այդպիսի, զի սո́ւրբ է, եւ ՛ի սրբութի(ւն) եղիցի ձեզ։
³³Որոք առնիցէ այդպիսի. եւ որոք տացէ́ ՛ի դմանէ այլազգւոյ, սատակեսցի́՛ի ժողովրդենէ իւրմէ։

³⁴Եւ ասէ տ(է)ր ցմովսէս. ա́ռ դու քեզ խունկս անուշունս. ստաշխն, եւ եղունգն, եւ զքաղբա́նն զանոյշ, եւ զկնդրուկն զերեւելի. զի հասարակ առ հասարակ լինիցին։
³⁵Եւ արասցե́ս զայն խունկս եփեալս. գո́րծ իւղագործաց հանդերձանի. գործ մաքո́ւր ՛ի սրբութի(ւն)։
³⁶Եւ աղայցե́ս ՛ի նոցանէ մանր. եւ դիցես ՛ի նմանէ յանդիմա́ն վկայութե(ան)ցն ՛ի խորանին վկայութե(ան). ուստի երեւեցա́յց քեզ անտի. զի ՛ի սրբութի(ւն) սրբու(թ)ե(ան)ց եղիցի ձեզ խո́ւնկն այն զոր առնիցէք։
³⁷Ըստ ա́յնմ հանդերձանի մի́ առնիցէք ձեզ խունկս. զի սրբութի(ւն) տ(եառ)ն եղիցի ձեզ։
³⁸Ա́յր ոք որ առնիցէ ըստ ա́յսմ օրինակի՝ առնուլ հո́տ ՛ի նմանէ, կորիցէ́ ՛ի ժողովրդենէ իւրմէ։

¹Խօսեցաւ տ(է)ր ընդ մովսիսի եւ ասէ,
²ահաւադիկ յանուանէ́ կոչեցեալ է իմ զբեսէլիէլ զուրիեան, զորդի ովրայ յազգէ յուդայ։
³եւ լցուցի́ց զնա ա(ստուա)ծեղէն հոգւով իմաստութե(ան), եւ հանճարոյ եւ գիտու(թ)ե(ան) ա(մենայ)ն գործոյ,
⁴խելամուտ լինել, եւ ճարտարապետել։ Գործել զոսկին եւ զարծաթ եւ զպղինձ։
⁵զկապուտակն, եւ զծիրանին, եւ զկարմիրն մանեալ. եւ զականակապն ՛ի լրութի(ւն) գործոյն. եւ զհիւսնու(թ)ի(ւն) փայտից, գործել ըստ ա(մենայ)ն գործոյ։
⁶Եւ ես ահա ետու զնա, եւ զեղիաբ զաքիսամայ յազգէ դանայ. եւ ՛ի սիրտ ա(մենայ)ն իմաստնոյ ետու զիմաստութի(ւն), եւ արասցե́ն զա(մենայ)ն զոր միանգամ պատուիրեցի քեզ։

⁷Զխորանն վկայութե(ան). եւ զտապանակ կտակարանացն. եւ զքաւու(թ)ի(ւն)ն որ ՛ի վերայ ն(ո)ր(ա). եւ զա(մենայ)ն սպաս խորանին. եւ զզոհանոցսն.
⁸եւ զսեղանն եւ զա(մենայ)ն զկահ ն(ո)ր(ա). եւ զաշտանակն սուրբ եւ զա(մենայ)ն զկահ նորա. եւ զսեղան խնկոցն.
⁹եւ զսեղան ողջակիզացն եւ զա(մենայ)ն զկահ ն(ո)ր(ա). զաւազանն եւ զխարիսխ նորա.
¹⁰եւ զպատմուճանս պաշտամանն. եւ զհանդերձս սրբու(թ)ե(ա)ն զահարոնի քահանայի. եւ զպատմուճանս որդւոց ն(ո)ր(ա) ՛ի քահանայանալ ինձ։
¹¹եւ զեւղն օծու(թ)ե(ան) եւ զխունկս հանդերձանաց սրբութե(ա)ն։ Եւ զա(մենայ)ն զոր միանգամ պատուիրեցի քեզ՝ արասցե́ս։

¹²Խօսեցաւ տ(է)ր ընդ մովսիսի եւ ասէ.
¹³եւ դու խօսեա́ց ընդ որդիսն ի(սրաէ)լի՝ եւ ասասցես. Զգո́յշ կացէք պահելոյ զշաբաթս իմ. զի նշանա́կ է է ընդիս եւ ընդ ձեզ յազգս ձեր. զի ծանիջիք թէ ե́ս եմ տ(է)ր որ սրբե́մ զձեզ.
¹⁴եւ պահեսջի́ք զշաբաթս, զի սրբութի(ւն) է այն տ(եառ)ն, եւ ձեզ։ Որ պղծեսցէ զնա՝ մահո́ւ մեռցի. ա(մենայ)ն որ գործիցէ ՛ի նմա գործ, սատակեսցի́ անձնն այն ՛ի միջոյ ժողովրդեան իւրոյ։
¹⁵Զվե́ց օր գործեսցես գործ. եւ յաւուրն եւթներորդի շաբա́թ հանգստեան սրբութի(ւն) տ(եառ)ն. ա(մենայ)ն որ գործեսցէ գործ յաւուր շաբաթու՝ մահու մեռցի։
¹⁶Եւ պահեսցե́ն որդիքն ի(սրաէ)լի զշաբաթս, առնել զնոսա յազգս ձեր. ո́ւխտ յաւիտենական

¹⁷ընդիս եւ ընդ որդիսն ի(սրաէ)լի։ Նշանա́կ իմ է յաւիտենական. զի զվեց օր արա́ր ա(ստուա)ծ զերկինս եւ զերկիր, եւ յաւուրն եւթներորդի դադարեա́ց եւ հանգեաւ։
¹⁸Եւ ե́տ մովսիսի՝ իբրեւ դադարեաց ինքն ՛ի խօսից իւրոց ՛ի լերինն սինա, զերկո́ւս տախտակսն վկայու(թ)ե(ան), տախտա́կս քարեղէնս գրեա́լս մատամբն ա(ստուծո)յ։

¹Եւ տեսեալ ժողովրդեանն՝ թէ յամեա́ց մովսէս իջանել ՛ի լեռնէ անտի. կուտեցաւ ժողովուրդն ՛ի վ(ե)ր(այ) ահարոնի՝ եւ ասեն ցնա. արի́ եւ արա́ մեզ աստուա́ծս՝ որ առաջնորդեսցեն մեզ. զի այրն այն մովսէս որ եհան զմեզ յեգիպտոսէ, ո́չ գիտեմք զի՞ եղեւ նմա։
²Եւ ասէ ցն(ո)ս(ա) ահարոն. կողոպտեցէ́ք զգինդս ոսկիս յակընջաց կանանց ձերոց, եւ ուստերաց եւ դստերաց ձերոց, եւ բերէ́ք առիս։
³Եւ կողոպտեաց ա(մենայ)ն ժողովուրդն զգինդս ոսկիս յակւնջաց կանանց իւրեանց, եւ բերին առ ահարոն։
⁴Եւ ընկալաւ ՛ի ձեռաց նոցա։ եւ ձուլեա́ց զայն քանդակագործով, եւ արար ո́րթ ձուլածոյ։ Եւ ասեն. ա́յս են աստուածք քո ի(սրա)էլ, որ հանին զքեզ յերկրէն եգիպտացւոց։

⁵եւ իբրեւ ետես ահարոն՝ շինեաց սեղան առաջի ն(ո)ր(ա)։ Եւ քարո́զ կարդաց ահարոն՝ եւ ասէ. տօն տ(եառ)ն առ վաղիւ։
⁶Եւ կանխեալ ՛ի վաղիւ անդր եհան ողջակէզս, եւ մատոյց զո́հս փրկու(թ)ե(ան). Եւ նստաւ ժողովուրդն յուտել եւ յըմպել, եւ յարեան ՛ի խաղալ։
⁷Եւ խօսեցաւ տ(է)ր ընդ մովսիսի՝ եւ ասէ. գնա́ է́ջ դու աստի վաղվաղակի, զի անօրինեցա́ւ ժողովուրդն քո՝ զոր հաներ յերկրէն եգիպտացւոց.
⁸անցի́ն վաղվաղակի զճանապարհաւն՝ զոր պատուիրեցեր ն(ո)ց(ա). արարին իւրեանց ո́րթ ձուլածոյ, եւ երկի́ր պագին նմա, եւ զոհեցին նմա եւ ասեն. ա́յս են աստուածք քո ի(սրա)էլ, որ հանին զքեզ յեգիպտոսէ։

⁹Եւ ասէ տ(է)ր ցմովսէս. տեսի́ զժողովուրդն զայն, եւ ահա ժողովուրդ խստապարանոց է։
¹⁰Եւ արդ՝ թո́յլ տուր ինձ, եւ բարկացեալ սրտմտութ(եամ)բ իմով ՛ի նոսա սատակեցից զն(ո)ս(ա). եւ արարից զքեզ յազգ մեծ։
¹¹Եւ աղաչեաց մովսէս առաջի տ(եառ)ն ա(ստուծո)յ իւրոյ՝ եւ ասէ. ընդէ՞ր տ(է)ր բարկանաս սրտմտութ(եամ)բ քով ժողովրդեան քում, զոր հաներ յերկրէն եգիպտացւոց զօրութ(եամ)բ մեծաւ եւ բարձր բազկաւ։
¹²Գուցէ́ խօսիցին եգիպտացիքն՝ ուստի հանե́րն զմեզ, եւ ասիցեն. առ չարութե(ան) եհան զնոսա, կոտորել զն(ո)ս(ա) ՛ի լերինն, եւ ջնջել զնոսա յերկրէ։ Դադարեա́ ՛ի բարկութ(են)է սրտմտութե(ան) քոյ, եւ ցածի́ր ՛ի չարեաց ժողովրդեան քոյ։

¹³Յիշեա́ դու զաբրաամ եւ զիսահակ եւ զյակոբ զծառայս քո. որոց երդուա́ր յանձն քո, խօսեցա́ր ընդ նոսա եւ ասես. եւ առաւե́լ բազմացուցից զզաւակ ձեր, իբրեւ զաստեղս երկնից բազմութ(եամ)բ։ եւ զա(մենայ)ն երկիրն զոր ասացեր տալ զաւակի ն(ո)ց(ա), կալցի́ն զնա յաւիտեան։
¹⁴Եւ ցածեաւ տ(է)ր ՛ի չարեացն, զոր ասաց առնել ժ(ո)ղ(ո)վրդեանն իւրում։
¹⁵Եւ դարձաւ մովսէս՝ էջ ՛ի լեռնէ անտի, եւ երկու տախտակքն վկայութե(ան) ՛ի ձեռս ն(ո)ր(ա)։ տախտակք քարեղէնք, գրեալք յերկուց կողմանց աստի եւ անտի գրեալք։
¹⁶եւ տախտակքն՝ գո́րծ ա(ստուծո)յ էին. եւ գիրն՝ գի́ր ա(ստուծո)յ դրոշմեալ ՛ի տախտակսն։

¹⁷Եւ լուաեալ յեսուայ զձայն ժողովրդեանն աղաղակելոյ, ասէ ցմովսէս. ձա́յն պատերազմի է բանակին։
¹⁸Եւ ասէ մովսէս. ո́չ է ձայն նահատակա́ց զօրութե(ան), եւ ո́չ է բարբառ նահատակաց քաջութե(ան). այլ ձայն յանզգայելոց ՛ի գինւոյ լսեմ ես։
¹⁹Եւ իբրեւ մերձեցաւ ՛ի բանա́կ անդր, եւ ետես զորթն եւ զպարաւորսն, բարկացաւ սրտմտութ(եամ)բ մովսէս. ընկէ́ց ՛ի ձեռաց իւրոց զտախտակսն երկոսին, եւ խորտակեա́ց զնոսա առ ստորոտով լերինն։
²⁰Եւ առեալ զորթն զոր արարին՝ այրեաց հրով. եւ խարտեաց զնա մա́նր, եւ ցանեա́ց ՛ի վերայ ջրոցն եւ արբո́յց որդւոցն իսրայելի։
²¹Եւ ասէ մովսէս ցահարոն. զի՞նչ արար քեզ ժողովուրդդ, զի ածեր ՛ի վ(ե)ր(այ) դոցա անհնարին զմեղսդ։

²²Եւ ասէ ահարոն ցմովսէս. մի́ բարկանար սրտմտութ(եամ)բ տէ́ր իմ. զի դու ինքնին դիտես զյանդգնութի(ւն) ժողովրդեանդ.
²³զի ասացին թէ արա́ մեզ աստուածս որ առաջնորդեսցեն մեզ. զի այրն այն մովսէս՝ որ եհան զմեզ յեգիպտոսէ, ո́չ գիտեմք զի՞ եղեւ նմա։
²⁴Եւ ասե́մ ցնոսա եթէ իցէ ուրուք ոսկի, կողոպտեցէ́ք եւ բերէ́ք առիս։ եւ ետուն ցիս, եւ ընկեցի զայն ՛ի հուր, եւ ել ո́րթդ այդ։
²⁵Եւ ետես մովսէս եթէ յանցեա́ւ ժողովուրդն. քանզի յանցոյց զնոսա ահարոն յոտնահարու(թ)ի(ւն) թշնամեաց իւրեանց։
²⁶Եւ եկաց մովսէս առ դրան բանակին՝ եւ ասէ. որ ոք տ(եառ)ն իցէ՝ առի́ս մատիցէ։ հասանէին առ նա ա(մենայ)ն որդիքն ղեւեայ։

²⁷Եւ ասէ ցնոսա. այսպէս ասէ տ(է)ր ա(ստուա)ծ ի(սրաէ)լի. դի́ք իւրաքանչիւր զսուր իւր յազդեր իւրում. անցէ́ք եւ այսրէն դարձարուք դրանէ ՛ի դուռն բանակիդ. եւ կոտորեցէ́ք իւրաքանչիւր զեղբայր՝ եւ իւրաքանչիւր զընկեր իւր, եւ իւրաքանչիւր զմերձաւո́ր իւր։
²⁸Եւ արարին որդիքն ղեւեայ որպէս եւ ասաց մովսէս։ եւ անկան ՛ի ժողովրդենէ անտի յաւուր յայնմիկ, ոգիք իբրեւ երեք հազարք այր։
²⁹Եւ ասէ ցնոսա մովսէս. լցէ́ք զձեռս ձեր այսօր տ(եառ)ն, եւ իւրաքանչիւր յորդի իւր, եւ իւրաքանչիւր յեղբայր իւր, տա́լ ՛ի վերայ ձեր այսօր օրհնութի(ւն)։
³⁰Եւ եղեւ ՛ի վաղիւ անդր, ասէ մովսէս ցժողովուրդն. դուք մեղա́յք զմեղսդ զայդ զմեծ, բայց ես արդ՝ ելի́ց առ ա(ստուա)ծ, զի ցածուցից վ(ա)ս(ն) մեղաց ձերոց։

³¹Դարձաւ մովսէս անդրէն առ տ(է)ր եւ ասէ. աղաչե́մ զքեզ տ(է)ր. մեղա́ւ ժողովուրդն այն մե́ղս անհնարինս. եւ արարին իւրեանց աստուածս ոսկեղէնս։ արդ՝ եթէ թողուս ն(ո)ց(ա) զմեղս իւրեանց՝ թո́ղ
³²ապա թէ ոչ՝ ջնջեա́ եւ զիս ՛ի դարութ(են)է քումմէ յոր գրեցեր։
³³Եւ ասէ տ(է)ր ցմովսէս. եթէ ոք մեղաւ առաջի իմ, ջնջեցից զնա ՛ի դպրութ(են)է իմմէ։
³⁴Բայց արդ՝ ե́րթ է́ջ եւ առաջնորդեա́ ժողովրդեանն այնմիկ ՛ի տեղին՝ յոր ասացի քեզ։ Եւ ահա հրեշտակ իմ երթիցէ առաջի երեսաց քոց։ բայց յաւուր յորում ա́յց արարից, ածից ՛ի վերայ ն(ո)ց(ա) զմեղս իւրեանց
³⁵Եւ եհար տ(է)ր զժողովուրդն վ(ա)ս(ն) առնելոյ ն(ո)ց(ա) զորթն՝ զոր արար ահարոն։

¹Եւ ասէ տ(է)ր ցմովսէս. ե́րթ ե́լ աստի, դու եւ ժողովուրդն քո զոր հաներ յերկրէն եգիպտացւոց, յերկիրն զոր երդուայ աբրաամու՝ եւ սահակայ՝ եւ յակոբայ. ասեմ, զաւակի́ ձերում տաց զնա։
²Եւ առաքեցից առաջի երեսաց քոց զհրեշտակ իմ. եւ մերժեսցէ́ զքանանացին, եւ զամովրհացին, եւ զքետացին, եւ զփերեզացին, եւ զգերգեսացին, եւ զխեւացին, եւ զյեբուսացին,
³եւ տարցի́ զքեզ յերկիրն որ բղխէ զկաթն եւ զմեղր։ Բայց ես ո́չ ելից ընդ ձեզ, վ(ա)ս(ն) խստապարանո́ց լինելոյ ժողովրդեանդ. զի մի́ սատակիցե́մ զքեզ ՛ի ճանապարհի։
⁴Եւ լուեալ ժողովրդեանն զբա́նն զայն չար, սո́ւգ առին սգաւորք. եւ ոչ ա́ռ այր զզարդ զանձամբ։

⁵Եւ ասէ տ(է)ր ցմովսէս. ասա́ դու ցորդիսն ի(սրաէ)լի. դուք ժողովուրդ խստապարանոց էք. զգո́յշ լերուք գուցէ եւ ա́յլ եւս հարուած ածիցեմ ՛ի վ(ե)ր(այ) ձեր, եւ սատակիցե́մ զձեզ։ եւ արդ՝ մերկացարո՞ւք զպատմուճանս փառաց ձերոց, եւ զզարդ քո ՛ի քէն. եւ ցուցի́ց զինչ առնիցեմ քեզ։
⁶Եւ մերկացան որդիքն իսրայէլի զզարդ իւրեանց, եւ զպատմուճանս իւրեանց ՛ի քորէբ լերին։
⁷Եւ առեալ մովսիսի զխորան իւր՝ եհար արտաքո́յ բանակին, մեկուսի́ ՛ի բանակէ անտի. եւ կոչեցաւ այն՝ խորա́ն վկայութե(ան)։ Եւ լիներ ա(մենայ)ն ոք որ խնդրէ́ր ինչ ՛ի տ(թեն)է, ելաներ ՛ի խորանն վկայութե(ան) արտաքոյ բանակին։

⁸Եւ յորժամ երթա́յր մովսէս ՛ի խորանն՝ կայր ա(մենայ)ն ժողովուրդն դէտակնկալեալ իւրաքանչիւր ուրուք առ դուրս խորանի իւրոյ։ հայէին ընդ մովսէս մինչ երթայր մտանէր ՛ի խորանն։
⁹Եւ յորժամ մտանէ́ր մովսէս ՛ի խորանն, իջանէր սի́ւն ամպոյն եւ կայր առ դուրս խորանին, եւ խօսէր տ(է)ր ընդ մովսիսի։
¹⁰Եւ տեսանէր ա(մենայ)ն ժողովուրդն զսի́ւն ամպոյն որ կայր առ դուրս խորանին. եւ կային ա(մենայ)ն ժողովուրդն յոտն, եւ երկի́ր պագանէին իւրաքանչիւր առ դուրս խորանի իւրոյ։
¹¹Եւ խօսէ́ր տ(է)ր ընդ մովսիսի դէ́մ յանդիման. որպէս ոք զի խօսիցի ընդ բարեկամի իւրում. եւ դառնայր ՛ի բանակ անդր։ Բայց պաշտօնեայ ն(ո)ր(ա) յեսու որդի նաւեայ ո́չ ելանէր ՛ի խորանէ անտի։

¹²Եւ ասէ մովսէս ցտ(է)ր. ահա ասե́ս ցիս, հա́ն զժողովուրդդ զայդ. եւ դու ո́չ ցուցեր ինձ զո՞ առաքիցես ընդիս։ եւ դու՝ ցի́ս ասացեր՝ թէ ճանաչե́մ զքեզ քան զամենեսին, եւ ունիս շնորհս յինէն։
¹³Արդ՝ եթէ գտի շնորհս առաջի քո՝ ցո́յց ինձ զանձն քո յայտնապէս, զի գիտացից՝ թէ ի՞ւ գտեալ է իմ շնորհս առաջի քո. եւ զի ծանեա́յց թէ ժողովուրդս քո այս՝ յա́զգ մեծ լինիցի։
¹⁴Եւ ասէ. ե́ս ինքնին երթայց առաջի քո, եւ զետեղեցի́ց զքեզ։
¹⁵Եւ ասէ ցնա. եթէ ոչ դու ինքնին երթայցես ընդ մեզ, մի́ հաներ զմեզ աստի։

¹⁶Եւ զիա՞րդ յայտ լինիցի, եթէ արդարեւ գտի շնորհս առաջի քո, եւ ե́ս եւ ժողովուրդս քո։ այլ յերթալն քո ընդ մեզ՝ փառաւորեսցուք, եւ ե́ս եւ ժողովուրդս քո, քան զա(մենայ)ն ազգս որ իցեն ՛ի վերայ երկրի։
¹⁷Եւ ասէ տ(է)ր ցմովսէս. եւ զա́յդ եւս զքո բան զոր ասացեր՝ արարի́ց. քանզի գտե́ր շնորհս առաջի իմ. եւ ճանաչեմ զքեզ քան զամենեսեան։
¹⁸Եւ ասէ՝ ցո́յց ինձ զփառս քո։
¹⁹Եւ ասէ, ե́ս անցից առաջի քո փառօք իմովք. եւ կոչեցից յանուն տ(եառ)ն առաջի քո. եւ ողորմեցա́յց որում ողորմեցայց, եւ գթացա́յց յորս գթացայց։
²⁰Եւ ասէ. ո́չ կարես տեսանել զերեսս իմ. զի ո́չ տիսանէ մարդ զերեսս իմ, եւ ապրի։
²¹Եւ ասէ տ(է)ր, ահա́ տեղի մի առաջի իմ. եւ կացցե́ս ՛ի վ(ե)ր(այ) վիմին.

²²յորժամ անցանիցեն փառքն իմ. եւ եդից զքեզ ՛ի ծե́րպ վիմին. եւ ծածկեցի́ց զքեզ ձեռամբ իմով մինչեւ անցի́ց ես։
²³եւ բարձի́ց զձեռն իմ ՛ի քէն, եւ ապա տեսցես զյետո́յսն իմ. բայց երե́սք իմ քեզ մի́ երեւեսցին։

¹Եւ ասէ տ(է)ր ցմովսէս. կոփեա́ դու քեզ երկո́ւս տախտակս քարեղէնս ըստ առաջին տախտակացն, եւ ե́լ առիս ՛ի լեառնն. եւ գրեցի́ց ՛ի վ(ե)ր(այ) տախտակացն զպատգամսն՝ որ էին յառաջին տախտակսն զոր խորտակեցերն։
²Լե́ր պատրաստ առ վաղիւ, եւ ելանիցե́ս ընդ առաւօտս ՛ի լեառնն սինա. եւ մնասցե́ս ինձ անդ ՛ի վերայ գլխոյ լերինն։
³եւ մի́ ոք ելանիցէ ընդ քեզ, եւ մի́ ոք երեւեսցի ամենեւին ՛ի լերինն. եւ արջա́ռ եւ ոչխար՝ մի́ արածեսցին մօտ ՛ի լեառնն։
⁴Եւ կոփեաց երկուս տախտակս քարեղէնս, ըստ օրինակի առաջին տախտակացն. եւ կանխեալ մովսիսի ընդ առաւօտն՝ ել ՛ի լեառնն սինա, ո(ր)պ(էս) հրամայեաց նմա տ(է)ր։ եւ ա́ռ մովսէս ընդ իւր զերկուս տախտակսն քարեղէնս։

⁵Եւ էջ տ(է)ր ամպով, եւ կա́յր յանդիման ն(ո)ր(ա) անդ։ եւ կոչեա́ց յանուն տ(եառ)ն։
⁶Եւ անց տ(է)ր առաջի նորա։ եւ կարդաց Տ(է)ր ա(ստուա)ծ՝ գթա́ծ եւ ողորմած, երկայնամիտ բազում ողո́րմ եւ ճշմարիտ։
⁷Որ պահէ́ զարդարութի(ւն), եւ առնէ զողորմութի(ւն) ՛ի հազար ազգս։ բառնա́յ զանօրէնութի(ւն)ս եւ զանիրաւութի(ւն)ս եւ զմեղս. եւ ո́չ անպա́րտ առնէ զպարտաւորն. ածէ́ զանիրաւութի(ւն)ս հարց՝ որդւոց եւ յորդիս որդւոց՝ մինչեւ յերիս եւ ՛ի չորս ազգս։
⁸Եւ երագեաց մովսէս խոնարհ երկի́ր եպագ,

⁹եւ ասէ. եթէ գտի շնորհս առաջի քո տ(է)ր, երթիցէ́ ընդ մեզ տ(է)ր. զի ժողովուրդս խստապարանո́ց է. եւ բարձցե́ս դու զանօրէնութի(ւն)ս եւ զմեղս մեր. եւ եղիցուք մեք քո́։
¹⁰Եւ ասէ տ(է)ր ցմովսէս. ահա ե́ս դնեմ ընդ քեզ ուխտ առաջի ա(մենայ)ն ժողովրդեան քոյ. եւ արարից սքանչելի́ս՝ որ ո́չ եղեն յա(մենայ)ն երկիր, եւ յա(մենայ)ն ազգս. եւ տեսցէ́ ա(մենայ)ն ժողովուրդդ՝ յորս ե́ս դու ՛ի մէջ դոցա զգործս տ(եառ)ն. զի զարմանալիք իցեն զոր ե́սս արարից ձեզ։
¹¹Զգո́յշ լեր դու ա(մենայ)նի, զոր միանգամ պատուիրեցի քեզ այսօր։ ահաւասիկ ես մերժե́մ յերեսաց ձերոց զամովրհացին, եւ զքանանացին, եւ զքետացին, եւ զփերեզացին, եւ զխեւացին, եւ զգերգեսացին, եւ զյեբուսացին։

¹²Զգո́յշ լեր անձին քում, գուցէ́ դնիցես ուխտ ընդ բնակիչս երկրին, յորում դու մտանելոց ես ՛ի նոսա. գուցէ լինիցի ձեզ գայթագղութի(ւն)։
¹³Զբագինս ն(ո)ց(ա) կործանեսջի́ք, եւ զարձանս ն(ո)ց(ա)՝ փշրեսջի́ք, եւ զանտառս ն(ո)ց(ա)՝ կոտորեսջի́ք, եւ զդրօշեալս դից ն(ո)ց(ա)՝ հրո́վ այրեսջիք։
¹⁴եւ մի́ պագանիցէք երկիր աստուածոց օտարաց. զի տ(է)ր ա(ստուա)ծդ անուն նախանձելի́ է. ա(ստուա)ծ նախանձօ́տ է։
¹⁵Գուցէ́ դնիցեն ուխտ ընդ բնակիչս երկրին, եւ պոռնկիցին զկնի դից ն(ո)ց(ա), եւ զոհիցեն աստուածոց ն(ո)ց(ա). եւ կոչիցեն զքեզ՝ եւ ուտիցես ՛ի զոհից ն(ո)ց(ա)։

¹⁶Եւ առնուցուս ՛ի դստերաց նոցա ուստերաց քոց. եւ ՛ի դստերաց քոց՝ տացես ուստերաց ն(ո)ց(ա). եւ պոռնկիցին դստերք քո զկնի ն(ո)ց(ա), եւ պոռնկեցուցանիցեն զուստերս քո զկնի դի́ցն իւրեանց։
¹⁷Եւ աստուածս ձուլածոյս՝ մի́ առնիցես քեզ։
¹⁸Զտօն բաղարջակերաց պահեսցես. զեւթն օր բաղա́րջ կերիցես ո(ր)պ(էս) պատուիրեցի քեզ, ՛ի ժամանակի իւրում յամսեա́նն կանխոց. զի յամսեանն կանխոց եկեր յեգիպտոսէ։
¹⁹Ամենայն արու որ բանայ զարգանդ՝ ինձ լիցի. եւ ա(մենայ)ն արուք անասնոյ քոյ,

²⁰անդրանիկն արջառոյ, եւ անդրանիկն ոչխարի։ եւ զանդրանիկն իշոյ՝ փրկեսցես գառամբ. ապա թէ ոչ փրկեսցես զնա՝ զգի́նս նորա տայցես։ Զամենայն անդրանիկս որդւոց քոց փրկեսցե́ս։ Եւ ձեռնուա́յն առաջի իմ՝ մի́ երեւեսցիս։
²¹Զվե́ց օր գործեսցես. եւ յաւուրն եւթներորդի հանդիցե́ս. եւ ՛ի սերմանս եւ ՛ի հունձս՝ հանգիցե́ս։
²²Եւ տօ́ն եւթներորդաց արասցես ինձ, իսկզբանէ́ հնձոց ցորենոյ։ եւ զտօն արմտեաց ամփոփելոյ՝ յընդմիջե́լ տարւոյն։
²³Երի́ս ժամանակս ՛ի տարւոջ երեւեսցի ա(մենայ)ն արրու մանուկ քո առաջի տ(եառ)ն ա(ստուծո)յ ի(սրաէ)լի։

²⁴քանզի մերժեցի́ց զազգսն յերեսաց քոց. եւ ընդարձակեցից զսահմանս քո, եւ ո́չոք իցէ որ ա́կն դնիցէ երկրին քում, յորժամ ելանիցես երեւել առաջի տ(եառ)ն ա(ստուծո)յ քոյ յերիս ժամանակս ՛ի տարւոջն։
²⁵Մի́ զենուցուս ՛ի վերայ խմորելոյ զարիւն զոհից իմոց. եւ մի́ ելանիցէ յայգ զենո́ւմն տօնի զատկի։
²⁶Զառաջին արմտիս երկրի քոյ՝ տարցի́ս ՛ի տուն տ(եառ)ն ա(ստուծո)յ քոյ։
²⁷Եւ ասէ տ(է)ր ցմովսէս. գրեա́ դու քեզ զպատգամսդ զայդոսիկ. զի այդո́ւ բանիւ դնիցեմ ուխտ ընդ քեզ՝ եւ ընդիս ի(սրա)էլ։
²⁸Եւ էր մովսէս առաջի տ(եառ)ն զքառասուն տիւ եւ զքառասուն գիշեր. հաց ո́չ եկեր, եւ ջուր ո́չ արբ. եւ գրեաց ՛ի վերայ տախտակացն զբանս ուխտի՝ զտասն պատգամացն։

²⁹Մինչդեռ իջանէր մովսէս ՛ի լեռնէն սինայ, եւ երկոքին տախտակքն ուխտի ՛ի ձեռս մովսիսի էին։ եւ յիջանել իւրում ՛ի լեռնէ անտի, ո́չ գիտէր մովսէս եթէ փառաւորեալ իցէ տեսիլ գունոյ երեսաց ն(ո)ր(ա) ՛ի խօսել ն(ո)ր(ա) ընդ նմա։
³⁰Եւ ետես ահարոն եւ ա(մենայ)ն որդիքն ի(սրաէ)լի զմովսէս. եւ էր փարաւորեալ տեսիլ գունոյ երեսաց ն(ո)ր(ա). եւ երկեան մերձենալ ՛ի նա։
³¹Եւ կոչեաց զնոսա մովսէս. եւ դարձան առ նա ահարոն եւ ա(մենայ)ն իշխանք ժողովրդեանն. եւ խօսեցաւ մովսէս ընդ նոսա։
³²Եւ ապա մերձեցան առ նա ա(մենայ)ն որդիքն ի(սրաէ)լի։ եւ պատմեաց ն(ո)ց(ա) զա(մենայ)ն զոր խօսեցաւ ընդ նմա տ(է)ր ՛ի լերինն սինայ։

³³Եւ իբրեւ դադարեաց ՛ի խօսելոյ անտի ընդ նոսա. արկ պատրուակ զերեսօք իւրովք։
³⁴Իբրեւ մտանէր մովսէս առաջի տ(եառ)ն խօսել ընդ նմա, մերկանա́յր զպատրուակն մինչեւ այսրէն ելանելոյ։ եւ իբրեւ լեաներ՝ խօսէր ը(ստ) ա(մենայ)ն որդիսն ի(սրաէ)լի զոր միանգամ պատուիրեաց նմա տ(է)ր։
³⁵Եւ տեսանէին որդիքն ի(սրաէ)լի զերեսն մովսիսի զի փառաւորեալ էր տեսիլ գունոյ երեսաց ն(ո)ր(ա). եւ արկանէր մովսէս պատրուակ ՛ի վերայ երեսաց իւրոց, մինչեւ անդրէն մտանելոյ եւ խօսելոյ ընդ նմա։

¹Եւ ժողովեաց մովսէս զա(մենայ)ն ժողովուրդ որդւոցն իսրայէլի՝ եւ ասէ ցն(ո)ս(ա). ա́յս բանք են զօր ասաց տ(է)ր առնել զնոսա։
²Զվեց օր գործեսցե́ս զգործ. յաւուրն եւթներորդի հանգիցե́ս. շաբաթ սո́ւրբ է, հանգիստ տ(եառ)ն։ ա(մենայ)ն որ գործեսցէ ՛ի նմա, սատակեսցի́։
³մի́ լուցցի հուր յա(մենայ)ն բնակութե(ան) ձերում յաւուր շաբաթուց. զի ե́ս եմ տ(է)ր։
⁴Եւ խօսեցաւ մովսէս ընդ ա(մենայ)ն ժողովրդեան որդւոցն ի(սրաէ)լի՝ եւ ասէ. ա́յս պատգամ է՝ զոր պատուիրեաց տ(է)ր՝ եւ ասէ։
⁵Առէ́ք ՛ի ձէնջ հա́ս տ(եառ)ն. ա(մենայ)ն ոք զիարդ եւ յօժարեսցի ՛ի սրտի իւրում, բերցէ պտուղ տ(եառ)ն։ ոսկի. արծաթ. պղինձ, եւ կապուտակ.

⁶եւ ծիրանի. եւ կարմիր կրկին մանեալ. եւ բեհեզ նիւթեալ. եւ մազ այծեաց։
⁷եւ մորթս խոյոց կարմիր ներկեալ. եւ մորթս կապուտակեալս. եւ փայտս անփուտս։
⁸եւ եւղ լուսոյ. եւ խունկս իւղոյ օծման. եւ խունկս հանդերձանաց։
⁹Եւ ականս սարդիոնս եւ ականս զըմրուխտս եւ ականս ՛ի գիր վակասին. եւ զպճղնաւորն։
¹⁰Եւ ա(մենայ)ն որ իմաստուն իցէ սրտիւ ՛ի ձեզ, եկեալ գործեսցէ́ զա(մենայ)ն ինչ՝ զոր պատուիրեաց տ(է)ր։
¹¹Զխորանն, եւ զնուարտանս իւր, եւ զվիժակս ն(ո)ր(ա), եւ զգահաւորակս ն(ո)ր(ա), եւ զտախտակս նորա. եւ զպարզունակս ն(ո)ր(ա), եւ զսիւնակս ն(ո)ր(ա), եւ զխարիսխս ն(ո)ր(ա)։

¹²Եւ զտապանակն վկայութե(ան), եւ զլծակս ն(ո)ր(ա), եւ զքաւութի(ւն)ն, եւ զվարագոյրն, եւ զառագաստ սրահին, եւ զսիւնակս նորա, եւ զականսն զըմրուխտս, եւ զխունկսն, եւ զեւղն օծման։
¹³Եւ զսեղանն, եւ զա(մենայ)ն զկահ նորա, եւ զհովանոցս սեղանոյն, եւ զլծակս ն(ո)ր(ա), եւ զա(մենայ)ն զկահ ն(ո)ր(ա)։ եւ զհացն երեսաց։
¹⁴եւ զաշտանակն լուսոյ, եւ զա(մենայ)ն զկահ ն(ո)ր(ա), եւ զճրագարանս ն(ո)ր(ա), եւ զեւղն լուսոյ։
¹⁵Եւ զսեղանն խնկոց, եւ զլծակս ն(ո)ր(ա), եւ զեւղն օծութե(ան), եւ զխունկսն հանդերձանաց, եւ զվարագոյր դրան խորանին։

¹⁶եւ զսեղանն ողջակիզաց, եւ զվանդակս ն(ո)ր(ա) զպղնձիս, զլծակս նորա, եւ զա(մենայ)ն զկահ ն(ո)ր(ա)։ Եւ զաւազանն, եւ զխարիսխս ն(ո)ր(ա)։
¹⁷եւ զառագաստ սրահին, եւ զսիւնակս ն(ո)ր(ա), եւ զխարիսխս նորա։
¹⁸Եւ զսրահակ դրան սրահին, եւ զցիցս խորանին, եւ զցիցս սրահին, եւ զապարումս ն(ո)ց(ա)։
¹⁹եւ զպատմուճանսն որովք պաշտիցեն ՛ի սրբու(թ)ե(ա)ն. զպատմուճանսն սուրբս՝ ահարոնի քահանայի. եւ զպատմուճանս քահանայու(թ)ե(ան) որդւոցն ահարոնի։
²⁰Եւ ել ա(մենայ)ն ժողովուրդ որդւոցն ի(սրաէ)լի առ ՛ի մովսիսէ։

²¹եւ բերին իւրաքանչիւր որպէս եւ յօժարէին սիրտք իւրեանց. եւ որոց զիարդ եւ կա́մ եղեւ անձանց իւրեանց. բերէին նուէրս տ(եառ)ն յա(մենայ)ն գործս՝ խորանին վկայու(թ)ե(ան). եւ յա(մենայ)ն նիւթս ն(ո)ր(ա). եւ յա(մենայ)ն պատմուճանս սրբութե(ան)ցն։
²²Եւ բերին ա́րք ՛ի կանանց, ա(մենայ)ն ոք որպէս եւ միտք իւր վարէին. Ականս, եւ գինդս, եւ մատանիս, եւ ծամակալս, եւ կշտապանակս, եւ զա(մենայ)ն անօթս ոսկեղէնս. եւ ա(մենայ)ն արք որ եւ էին, բերին նուէրս ոսկւոյ տ(եառ)ն։
²³Եւ ա(մենայ)ն այր առ որում գտանէր կապուտակ, եւ ծիրանի, եւ կարմիր մանեալ, եւ բեհեզ. եւ մազ այծեաց. եւ մորթս խոյոց կարմիր ներկեալ. եւ մորթս կապուտակեալս։

²⁴բերէին ա(մենայ)ն, որ նուիրէր նուէրս։ արծաթ եւ պղինձ բերէին զնուէրսն տ(եառ)ն. եւ ա(մենայ)ն առ որում գտանէր փա́յտ անփուտ՝ յա(մենայ)ն գործ կահին, բերէին։
²⁵Եւ ա(մենայ)ն կին՝ իմաստուն մտօք նիւթէր ձեռօք իւրովք. եւ բերէ́ր մանեալ՝ զկապուտակն, եւ զծիրանի, եւ զկարմիրն ներկեալ, եւ զբեհեզն։
²⁶Եւ ա(մենայ)ն կանայք որ յօժարէին ՛ի միտս իւրեանց, մանէին իմաստութ(եամ)բ զմազ այծեացն։
²⁷Եւ իշխանքն բերէին ականս զըմրուխտս. եւ ականս ՛ի նիւթ վակասին եւ տախտակին.
²⁸եւ զհանդերձանս խնկոցն. եւ զեւղն լուսոյ, եւ զեւղն օծութե(ան)։

²⁹Եւ ա(մենայ)ն այր եւ կին, որոց յօժարէին միտք իւրեանց, մտանէին գործել զա(մենայ)ն գործն՝ զոր պատուիրեա́ց տ(է)ր գործել։ եւ ՛ի ձեռն մովսիսի բերէին որդիքն ի(սրաէ)լի զնուէրսն տ(եառ)ն։
³⁰Եւ ասէ մովսէս ցորդիսն ի(սրաէ)լի. տեսէ́ք՝ զի կոչեաց ա(ստուա)ծ յանուանէ զբեսելիէլ զուրիեան՝ զորդի ովրայ յազգէ յուդայ.
³¹եւ ելի́ց զնա ա(ստուա)ծեղէն հոգւով իմաստութե(ան), եւ հանճարով եւ գիտութ(եամ)բ յա(մենայ)նի։
³²ըստ ա(մենայ)ն գործոյ ճարտարապետել ճարտարութ(եամ)բ. գործել զոսկին եւ զարծաթն՝ եւ զպղինձն։
³³Եւ քանդակել զականսն, եւ գործել զփայտն, եւ առնել զա(մենայ)ն գործ իմաստութե(ան), եւ խելամտել. զի ե́տ ՛ի սիրտ ն(ո)ր(ա) զիմաստու(թ)ի(ւն)։

³⁴Եւ եղիաբայ որդւոյ աքիսամայ յազգէ դանայ։
³⁵զորս ելի́ց մտօք իմաստու(թ)ե(ան), խելամտել, գործել զա(մենայ)ն գործ սրբութե(ա)ն. զոստայնանկու(թ)ի(ւն), եւ զնկարու, կապուտակաւն, եւ ծիրանեաւն, եւ կարմրովն ներկելով, եւ բեհեզով. անկանել գործել զամենայն գործ ճարտարութե(ան) նկարակերտաց։

¹Եւ արարին բեսելիէլ, եւ եղիաբ, եւ ա(մենայ)ն այր իմաստուն մտօք, որում տուաւ ՛ի տ(թեն)է իմաստութի(ւն) եւ գիտու(թ)ի(ւն), խելամուտ լինել, գործել զա(մենայ)ն գործ տարազու սրբութե(ա)ն. ըստ ա(մենայ)նի որպէս եւ հրամայեաց տ(է)ր։
²Եւ կոչեաց մովսէս զբեսելիէլ եւ զեղիաբ, եւ զամենեսին որ ունէին իմաստութի(ւն) ՛ի սրտի. որոց ետ ա(ստուա)ծ հանճար ՛ի սիրտս նոցա։ Եւ զամենեսին որ կամակար մտօք կամէին մերձենալ ՛ի գործն, եւ կատարել։
³Եւ առին ՛ի մովսիսէ զա(մենայ)ն նուէրսն՝ զոր բերին որդիքն ի(սրաէ)լի յա(մենայ)ն գործ տարազու սրբու(թ)ե(ա)ն առնել զայն։ եւ ինքեանք եւս ընդունէին զնուէրսն ՛ի նուիրաբերացն ընդ առաւօտս առաւօտս։

⁴Եւ գայի́ն ա(մենայ)ն իմաստունք՝ որ գործէին զգործ սրբութե(ա)ն, իւրաքանչիւր ըստ տարազո́ւ իւրում, զոր ինքեանք գործէին։
⁵Խօսեցան ը(ստ) մովսիսի եւ ասեն. կարի́ յաճախէ բերել ժողովուրդդ քան զբաւական տարազու պիտոյից գործոյն, զոր հրամայեաց ա(ստուա)ծ առնել։
⁶Եւ հրամայեաց մովսէս քարո́զ կարդալ ՛ի բանակին, եւ ասել. ա́յր կամ կին՝ մի́ եւս գործեսցեն ՛ի պտուղ սրբութե(ա)ն։ եւ ապա արգելաւ ժողովուրդն ՛ի բերելոյ.
⁷եւ զգործեալն իւրեանց բերէին յա(մենայ)ն կազմած գործոյն գործե́լ զայն. եւ դադարեցին։

⁸Եւ գործէ́ր ա(մենայ)ն իմաստուն սրտիւ ընդ գործաւորսն զգործ խորանին տա́սն փեղկեան, ՛ի բեհեզոյ մանելոյ, եւ ՛ի կապուտակէ, եւ ՛ի ծիրանւոյ, եւ ՛ի կարմրոյ կրկնելոյ։ քերոբ գործ անկուածոյ գործէին։
⁹Երկայնութի(ւն) միոյ փեղկին ՛ի քսան եւ յութ կանգնոյ, եւ լայնութի(ւն) ՛ի չորից կանգնոց միոյ փեղկի. չափ նո́յն էր ամենեցունց փեղկիցն։
¹⁰եւ կցեալ զհինգ փեղկն ը(ստ) միւս հինգ փեղկին, եւ զհինգն եւս փեղկ կցեալ ընդ այլում հնգի։
¹¹Եւ արար ճարամանդս կապուտակեալս առ եզերբ միոյ փեղկին
¹²՛ի կողմանէ առ ՛ի խառնուածս. նո́յնպէս արար եւ առ եզերբ արտաքնոյ փեղկին, երկրորդի խառնուածոյն։

¹³Յիսուն ճարամանդ արար միոյ փեղկի. եւ յիսուն ճարամանդ արար ՛ի կողմանէ փեղկին ըստ երկրորդի խառնուածոյն, առ ՛ի խառնելոյ իւրաքանչիւր ճարամանդացն ընդ միմեանս։ Եւ արար օղս ոսկիս յիսուն. եւ խառնեաց զփեղկսն ընդ միմեանս օղիւքն. եւ եղեւ խորան մի։
¹⁴Եւ արար փեղկս մազեղէնս ծածկիչս խորանին. մետասան փեղկ արար զնոսա։
¹⁵երկայնութի(ւն) միոյ փեղկի յերեսուն կանգնոյ. եւ լայնութի(ւն) միոյ փեղկի ՛ի չորից կանգնոց։ չափ նո́յն էր մետասանեցունց փեղկիցն.
¹⁶եւ կցեաց զհինգ փեղկն ՛ի միասին, եւ զվեց փեղկն ՛ի միասին։
¹⁷Եւ արար յիսուն ճարամանդ առ եզերբ փեղկին՝ որ ՛ի մէջ խառնուածոցն. եւ արար յիսուն եւս ճարամանդ առ եզերբ փեղկին երկրորդի խառնուածոյն.

¹⁸եւ արար օղս պղնձիս յիսուն. եւ կցեա́ց զխորանն՝ զի լինիցի մի։
¹⁹Եւ արար զվիժակս խորանին ՛ի մորթոց խոյոց կարմի́ր ներկելոց. եւ զարտախուրակսն ՛ի կապուտակէ ՛ի վերո́յ կողմանէ։
²⁰Եւ արար զերկուս սիւնս խորանին յանփուտ փայտից կանգնաւորս։
²¹՛ի տասն կանգնոյ զերկայնութի(ւն) միոյ սեան. եւ ՛ի կանգնոյ եւ ՛ի կիսոյ զթանձրու(թ)ի(ւն) եւ զլայնու(թ)ի(ւն) միոյ սեան.
²²եւ երկուս սփռի́չս առ մի մի սիւն խառնեալ ընդ միմեանս. նո́յնպէս արար ա(մենայ)ն սեանց խորանին։
²³Եւ արար զսիւնս խորանին. քսան սիւն՝ ՛ի հարաւոյ կողմանէ, եւ քառասուն խարիսխ արծաթի՝ սեանցն քսանեցունց.

²⁴երկուս խարիսխս առ մի սիւն յերկոցունց կողմանց. եւ երկու խարիսխս առ մեւս եւս սիւն յերկոցունց կողմանց։
²⁵Եւ յերկրորդ կողման խորանին ընդ հիւսւսի արար քսան սիւն,
²⁶եւ քառասուն խարիսխ արծանե. երկու խարիսխ առ մի սիւն, եւ երկու խարիսխ առ մեւս եւս սիւն։
²⁷Եւ ՛ի թիկանց խորանին ընդ ծովակողմ արար վե́ց սիւն.
²⁸եւ երկու սիւնս արար յանկիւնս խորանին յետուստ կողմանէ։
²⁹Եւ էին հասարակ ՛ի ներքուստ. եւ ըստ նմին օրինակի հասարա́կ եին ՛ի գլխոյ կողմանէ, ՛ի մի խառնուած. նո́յնպէս արար եւ երկոցունց սեանցն՝ որ յանկիւնսն։

³⁰Եւ էին ո́ւթ սիւն, եւ խարիսխ ն(ո)ց(ա) արծաթիք, վեշտասա́ն խարիսխք, երկու խարիսխք առ մի սիւն, եւ երկու խարիսխք առ մի սիւն։
³¹Եւ արար պարզունակս յանփուտ փայտից, հի́նգ առ մի սիւն ՛ի միոջէ կողմանէ խորանին։
³²եւ հի́նգ եւս պարզունակ առ միւս սիւն՝ յերկրորդ կողմանէ խորանին. եւ հինգ պարզունակ առ միւս սիւն ՛ի թիկանց խորանին ընդ ծովակողմն։
³³Եւ արար զմիջին պարզունակն թափանցա́նց ՛ի մէջ սեանցն ՛ի կողմանէ ՛ի կողմն։
³⁴Եւ զերկուս սիւնսն պատեաց ոսկւով. եւ զերկուս օղամանեակսն նոցա արար ոսկիս, յորս մտանիցեն պարզունակքն. եւ պատեաց զպարզունակսն ոսկւով։

³⁵Եւ արար վարագոյր ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզոյ նիւթելոյ. գո́րծ անկուածոյ գործեաց զնա քերոբ։
³⁶եւ ե́դ զայն ՛ի վերայ չորից սեանցն յանփուտ փայտից ոսկիապատաց. եւ խոյակք նոցա ոսկիք, եւ չո́րք խարիսխք ն(ո)ց(ա) արծաթիք։
³⁷Եւ արար զվարագոյր դրան խորանին վկայութե(ան) ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզոյ նիւթելոյ, գո́րծ անկուածոյ քերոբ։
³⁸Եւ զսիւնս նոցա հինգ, եւ զօ́ղս ն(ո)ց(ա). եւ պատեաց զխոյակս նոցա ոսկւով. եւ խարիսխք նոցա պղնձիք հինգ։

¹Եւ արար բեսելիէլ զտապանակն յանփուտ փայտից. յերկուց կանգնոց եւ ՛ի կիսոյ զերկայնու(թ)ի(ւն) նորա. եւ ՛ի կանգնոյ եւ ՛ի կիսոյ զլայնութի(ւն) ն(ո)ր(ա). եւ ՛ի կանգնոյ եւ ՛ի կիսոյ զբարձրութի(ւն) նորա։ եւ պատեաց զնա ոսկւով սրբով ներքոյ եւ արտաքոյ։
²եւ արար նմա ծնօտս ոսկիս շուրջանակի։
³Եւ ձուլեաց նմա չո́րս օղամանեակս ոսկիս ՛ի չորեցունց կողմանց ն(ո)ր(ա). երկուս օղամանեակս ՛ի միոջէ կողմանէ, եւ երկուս օղամանեակս ՛ի միւսմէ կողմանէ, եւ ագո́յց լծակացն։
⁴Եւ արար լծակս յանփուտ փայտից, եւ պատեաց զնոսա ոսկւով։
⁵եւ ագուցին զլծակսն յօղամանեակսն ՛ի կողմանց տապանակին, բառնա́լ զնա նոքօք։

⁶Եւ արարին զքաւութի(ւն)ն ՛ի վերուստ տապանակին ոսկւո́յ սրբոյ. յերկո́ւց կանգնոց եւ ՛ի կիսոյ զերկայնու(թ)ի(ւն) ն(ո)ր(ա), եւ ՛ի կանգնոյ եւ ՛ի կիսոյ զլայնութի(ւն) ն(ո)ր(ա)։
⁷Եւ արար երկուս քերովբէս ոսկիս, ճախարակեա́յս գործեաց զն(ո)ս(ա)՝ յերկուց կողմանց քաւու(թ)ե(ա)ն։
⁸քերոբ մի ՛ի վ(ե)ր(այ) միոյ գլխոյ քաւութե(ա)ն. եւ քերոբ մի ՛ի վ(ե)ր(այ) երկրորդի գլխոյ քաւու(թ)ե(ա)ն, անդստին ՛ի քաւու(թեն)է անտի արար զերկոսին քերոբսն, յերկոցունց ծայրից ն(ո)ր(ա)։
⁹Եւ է́ր քերովբէիցն տարածեալ զթեւս իւրեանց ՛ի վերուստ. եւ հովանի́ ունէին թեւօք իւրեանց ՛ի վ(ե)ր(այ) քաւութե(ա)ն. եւ երեսք քերովբէիցն հանդէպ միմեանց ՛ի վերայ քաւութե(ա)ն։

¹⁰Եւ արար զսեղանն զառաջաւոր յոսկւոյ սրբոյ. եւ ձուլեաց նմա չորս օղամանեակս ոսկիս. երկուս ՛ի միոջէ կողմանէ, եւ երկուս յերկրորդ կողմանէ. եւ ագոյցս, բառնալ զնա ագուցիւքն։ Եւ զագոյցս տապանակին եւ զսեղանոյն արար յանփուտ փայտից. եւ պատեաց զն(ո)ս(ա) ոսկւով. յերկուց կանգնոց զերկայնու(թ)ի(ւն) ն(ո)ր(ա), եւ ՛ի կանգնոյ եւ ՛ի կիսոյ զլայնութի(ւն) ն(ո)ր(ա). եւ ՛ի կանգնոյ եւ ՛ի կիսոյ զբարձրութի(ւն) ն(ո)ր(ա)։
¹¹Եւ պատեաց զնա ոսկւով սրբով. եւ արա́ր նմա ծնօտս ոսկիս շուրջանակի։
¹²եւ արար նմ(ա) պսակ ուղկեան շուրջանակի. եւ արար ծնօտս ոսկիս պսակին ն(ո)ր(ա) շուրջանակի։

¹³Եւ արար նմա չորս օղամանեակս ոսկիս. եւ եդ զօղամանեակսն ՛ի չորս կողմանս, որ էին չորեցունց ոտից ն(ո)ր(ա).
¹⁴՛ի ներքոյ պսակին. եւ եղեն օղամանեակքն ագոյցք լծակացն առ ՛ի բառնալոյ զսեղանն։
¹⁵Եւ արար երկուս լծակս յանփուտ փայտից. եւ պատեաց զնոսա ոսկւով առ ՛ի բառնալ զսեղանն։
¹⁶Եւ արար զկահ սեղանոյն. զխնկաղացս ն(ո)ր(ա), եւ զարիւնակալս նորա, եւ զճաշակս նորա, եւ զնուիրանոցսն՝ որովք նուիրեցեն՝ յոսկւոյ սրբոյ։

¹⁷Եւ արար զաշտանակն լուսոյ՝ ձոյլ ոսկի, զբունն. եւ զստեղունսն յերկոցունց կողմանց ն(ո)ր(ա). եւ ՛ի ստեղանցն շառաւիղք ընտրեալք առ միմեանս երեք ՛ի միոջէն, եւ երեք ՛ի միւսմէն հաւասարք միմեանց։ եւ զլուսակալս նոցա՝ որ են ՛ի ծայրսն ընկուղազարդս անդստին ընտրեալս։ Եւ զբազմակալսն ՛ի նոսա. զի եղիցին ճրագարանքն ՛ի վերայ ն(ո)ց(ա). եւ զբազմակալն զեւթներորդ՝ որ ՛ի գլուխ լուսակալին. որ ՛ի վերայ բուն իսկ գլխոյն ՛ի վերուստ ձոյլ՝ համա́կ ոսկի։ Եւ զեւթն ճրագարանսն որ ՛ի վերայ նորա ոսկիս. եւ զունելիս նորա ոսկիս. եւ զյարդարիչս ն(ո)ր(ա) ոսկիս յոսկւոյ սրբոյ. ճախարակեալ գործեաց զաշտանակն, զբունն, եւ զստեղունս ն(ո)ր(ա). եւ զսկահաձեւսն եւ զգնդակսն եւ զշուշանսն անդստին ՛ի նմանէ։

¹⁸Վեց ստեղունք արձակեալք ՛ի կողմանց ն(ո)ր(ա). երեք ստեղունք արձակեալք ՛ի միոջէ կողմանէ աշտանակին. եւ երեք ստեղունք յերկրորդ կողմանէ աշտանակին։
¹⁹եւ երեք սկահաձեւք ընկուզազարդք յօրինեալք ՛ի միում ստեղան, եւ գնդակ եւ շուշան։ եւ երեք սկահաձեւք ընկուզազարդք յօրինեալք ՛ի միում եւս ստեղան, եւ գնդակ եւ շուշան։ Ա́յսպէս վեցեցունց ստեղանցն արձակելոց յաշտանակէ անտի։
²⁰Եւ ՛ի բուն աշտանակին չորք սկահաձեւք ընկուզազարդք յօրինեալք. եւ գնդակք նորին եւ շուշանք։
²¹Եւ գնդակ մի ընդ երկու ստեղամբքն. անդստին ՛ի նմին. վեցեցունց ստեղանցն արձակելոց ՛ի նմանէ։

²²գնդակք ն(ո)ց(ա) եւ ստեղունք իւրեանց անդստին ՛ի նմին, բովանդակ ճախարակեայ ՛ի միոջէ յոսկւոյ սրբոյ։
²³Եւ արար զճրագարանս ն(ո)ր(ա) եւթն. եւ զունելիս, եւ զյարդարիչս ն(ո)ր(ա) յոսկւոյ սրբոյ։
²⁴՛ի տաղանդէ միո́յ ոսկւոյ սրբոյ արար զնա՝ եւ զա(մենայ)ն զկահ ն(ո)ր(ա)։
²⁵Սա́ արար զսեղանն ոսկիապատ յանփուտ փայտից, ՛ի հինգ կնգնոյ զերկայնու(թ)ի(ւն) ն(ո)ր(ա), եւ ՛ի հինգ կանգնոյ զլայնու(թ)ի(ւն) ն(ո)ր(ա), չորեքկուսի. եւ յերից կանգնոց զբարձրութի(ւն) ն(ո)ր(ա), եւ զեղջեւրս ն(ո)ր(ա) անդստին ՛ի նմանէ։
²⁶Եւ պատեաց զնա ոսկւով սրբով. եւ զյարկս ն(ո)ր(ա), եւ զկողմանս նորա շուրջանակի, եւ զեղջեւրս նորա։

²⁷Եւ արա́ր նմա ծնօտս ոսկիս շուրջանակի. եւ երկուս օղամանեակս ոսկիս ընդ ծնօտիւք ն(ո)ր(ա) առ ՛ի կողմանէ ընդ երկոքումբք կողմամբք ն(ո)ր(ա)՝ յագոյցս լծակացն, առ ՛ի բառնալոյ զնա նոքօք։
²⁸Եւ արար զլծակսն յանփուտ փայտից, եւ պատեաց զն(ո)ս(ա) ոսկւով։
²⁹Սա́ արար զեւղն օծութե(ան) զսուրբ, եւ զհանդերձանս խնկոցն. գործ մաքուր իւղագործաց։

¹Եւ արար զսեղանն պղնձապատ ՛ի բուրուառացն պղնձեաց՝ որ էին ՛ի ձեռս արանցն ապստամբաց հանդերձ ժողովրդեամբն կորխայ, յանփուտ փայտից. ՛ի հինգ կանգնոյ զերկայնութի(ւն) ն(ո)ր(ա), եւ ՛ի հինգ կանգնոյ զլայնու(թ)ի(ւն) ն(ո)ր(ա). չորեքկուսի. եւ յերից կանգնոց բարձրու(թ)ի(ւն) ն(ո)ր(ա)։
²Արա́ր եւ զեղջեւրս ն(ո)ր(ա) ՛ի վ(ե)ր(այ) չորեցունց անկեանց ն(ո)ր(ա). անդստին ՛ի նմանէ եին եղջեւրք ն(ո)ր(ա). եւ պատեաց զնա պղնձով։
³Սա́ արար զա(մենայ)ն կահ սեղանոյն, զխարիսխսն, եւ զբլշակն, եւ զտաշտսն, եւ զմսահանսն, եւ զբուրուառսն։ եւ զա(մենայ)ն կահս ն(ո)ր(ա) արար պղնձի։

⁴Սա́ արար զգահաւորակս սեղանոյն. գո́րծ վանդակագործ պղնձի՝ ՛ի բուրուառացն. ՛ի ներքուստ մինչեւ ցմէջս.
⁵ե́դ ՛ի նմա չորս օղամանեակս պղնձիս ՛ի չորեցունց կողմանց գահաւորակի սեղանոյն՝ ագոյցս նգացն։
⁶Եւ արար զլծակսն յանփո́ւտ փայտից, եւ պատեա́ց զնոսա պղնձով։
⁷եւ ագուցին զլծակսն յօղամանեակսն ՛ի կողմանս սեղանոյն, բառնալ զսեղանն նոքօք։ բովանդակ տախտակամած գործեաց զնա։
⁸Եւ արար զաւազանն պղնձի, եւ զխարիսխս նորա պղնձի, ՛ի հայելեաց կանանց ուխտաւորաց. որք պահեցին պահս առ դրան խորանին վկայութե(ան), յաւուր յորում եհար զխորանն։
⁹Եւ արար զսրահն որ հայէր ընդ հարաւ. եւ զառադաստ սրահին ՛ի բեհեզոյ մանելոյ հարիւր առ հարիւր։

¹⁰եւ սիւնք ն(ո)ց(ա) քսան, եւ խարիսխք ն(ո)ց(ա) պղնձիք քսան. եւ զարդք սեանցն եւ խոյակք ն(ո)ց(ա) արծաթիք։
¹¹Եւ ընդ կողմն հիւսւսոյ հարեւր առ հարեւր. եւ սիւնք ն(ո)ց(ա) քսան. եւ խարիսխք ն(ո)ց(ա) պղնձիք քսան. եւ զարդք սեանցն եւ դրուագք ն(ո)ց(ա) արծաթիք։
¹²Եւ ընդ ծովակողմն սրահք ՛ի յիսուն կանգնոյ. եւ սիւնք ն(ո)ց(ա) տասն, եւ խարիսխք ն(ո)ց(ա) տասն. եւ զարդք սեանցն եւ դրուագք ն(ո)ց(ա) արծաթիք։
¹³Եւ ընդ կողմն արեւելից ՛ի յիսուն կանգնոյ։ եւ առագաստքն
¹⁴՛ի հնգետասան կանգնոյ ՛ի թիկանց. եւ սիւնք ն(ո)ց(ա) երեք, եւ խարիսխք ն(ո)ց(ա) երեք։

¹⁵Եւ յերկրորդ թիկունսն առ դրամբք սրահին, սրահք ՛ի հնգետասան կանգնոյ. եւ սիւնք նոցա երեք, եւ խարիսխք ն(ո)ց(ա) երեք։
¹⁶Ա(մենայ)ն սրահք խորանին շուրջանակի ՛ի բեհեզոյ մանելոյ.
¹⁷եւ խարիսխք ն(ո)ց(ա) պղնձիք. եւ դրուագք սեանցն եւ խոյաւղք ն(ո)ց(ա) արծաթիք, եւ խոյակք ն(ո)ց(ա) արծաթապարտք, եւ սիւնք արծաթապատք։
¹⁸եւ ա(մենայ)ն սիւնք սրահակին։ Եւ սրահակք դրան սրահին, գործ նկարակերտ ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ. եւ ՛ի բեհեզոյ նիւթելոյ. ՛ի քսան կանգնոյ երկայնութի(ւն), եւ ՛ի հնգետասան կանգնոյ բարձրու(թ)ի(ւն), եւ լայնու(թ)ի(ւն) հասարակ ըստ առագաստից սրահին։

¹⁹Եւ սիւնք նոցա չորք, եւ խարիսխք ն(ո)ց(ա) պղնձիք չորք՝ եւ խոյաւղք ն(ո)ց(ա) արծաթիք չորք. եւ խոյակք ն(ո)ց(ա) արծաթապատք.
²⁰եւ ա(մենայ)ն ցիցք սրահին եւ խորանին շուրջանակի պղնձիք։
²¹Եւ ա́յս էր պայման խորանին վկայութե(ան). ո(ր)պ(էս) հրաման ետ մովսիսի կազմել զպաշտօնն ղեւտացւոցն ՛ի ձեռն իթամարայ որդւոյ ահարոնի քահանայի։
²²Եւ բեսելիէլ ուրիեան որդի ովրայ յազգէ յուդայ արա́ր ո(ր)պ(էս) հրաման ետ տ(է)ր մովսիսի։

²³Եւ ապա եղիաբ աքիսամայ յազգէ դանայ. որ ճարտարապետէ́ր զոստայնանկու(թ)ի(ւն), եւ զասղնագործու(թ)ի(ւն), եւ զնկարակերտու(թ)ի(ւն). եւ ՛ի կապուտակէ, եւ ՛ի ծիրանւոյ եւ ՛ի կարմրոյ մանելոյ, եւ ՛ի բեհեզոյ նիւթելոյ։
²⁴Ամենայն ոսկւոյն՝ որ գործեցաւ ՛ի գործն, ըստ ա(մենայ)ն գործոյ սրբութե(ա)ն, եղեւ կշիռ ոսկւոյն նուիրացն քսան եւ ինն տաղանդ, եւ եւթն հարիւր եւ երեսուն սիկղ՝ ըստ սրբութե(ան) սկեղն։

²⁵Եւ արծաթոյ նուէրք՝ յանցելոց արենա ժողովրդեանն ՛ի հանդիսի՝ հարեւր տաղանդ, եւ հազար եւ եւթն հարեւր եւ եւթանասուն եւ հինգ սիկղ՝ ըստ սրբութե(ան) սկեղն. դրա́մ մի առ գլուխ՝ կէս սկեղ ըստ սրբու(թ)ե(ան) սկեղն. ա(մենայ)ն որ անցանէր ՛ի հանդիսի անդ ՛ի քսան ամենից եւ ՛ի վեր, վեց հարեւրհազար եւ երեք հազարք եւ հինգ հարեւր եւ յիսուն։
²⁶Եւ եղեւ հարեւր տաղանդ արծաթոյն՝ ՛ի ձոյլ հարեւր խոյակաց խորանին, եւ ՛ի խոյակս վարագուրին. հարեւր տաղանդ՝
²⁷՛ի հարեւր խոյակ. տաղանդ մի առ խոյակ։
²⁸Եւ զհազար եւ զեւթն հարեւր եւ զեւթանասուն եւ հինգ սիկղն, գործեաց ՛ի խոյաւղս սեանցն, եւ պատեաց ոսկւով զխոյակս ն(ո)ց(ա), եւ զարդարեաց զն(ո)ս(ա)։

²⁹Եւ պղինձ նուիրացն՝ եւթանասուն տաղանդ, եւ երկու հազար եւ չորք հարեւր սիկղ։
³⁰Եւ արարին անտի զխարիսխս դրան խորանին վկայութե(ան). եւ զսեղանն պղնձի, եւ զգահաւորակ սեղանոյն պղնձի, եւ զա(մենայ)ն սպաս սեղանոյն, եւ զխարիսխս սրահին շուրջանակի.
³¹եւ զխարիսխս դրան սրահին. եւ զամենայն ցիցս խորանին, եւ զա(մենայ)ն ցիցս սրահին շուրջանակի. եւ զապարումսն ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզոյ նիւթելոյ։

¹Եւ արար պատմուճանս պաշտամանն, պաշտե́լ նոքօք ՛ի սրբութե(ա)ն։ եւ արար պատմուճան սրբութե(ան)ցն որ իցեն ահարոնի քահանայի. ո(ր)պ(էս) հրամայեաց տ(է)ր մովսիսի։
²Եւ արարին զվակասն յոսկւոյ, եւ ՛ի ծիրանւոյ, եւ ՛ի կապուտակէ, եւ ՛ի կարմրոյ մանելոյ, եւ ՛ի բեհեզոյ նիւթելոյ։
³Եւ հատանէին թիթղունս ոսկիս. թե́լս թելս անկանել ընդ կապուտակին՝ եւ ընդ ծիրանւոյն, եւ ընդ կարմրոյ մանելոյ, եւ ընդ բեհեզոյ նիւթելոյ. գո́րծ անկուածոյ վակասի գործեցին զնա,
⁴խառնեալ յերկոցունց կողմանց ընդ միմեանս հիւսկէն. գո́րծ անկուածոյ ՛ի միմեանս։ ՛ի նոյն

⁵եւ ՛ի նմանէ գործեցին ըստ իւրում գործուածոյ, յոսկւոյ, եւ ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզոյ նիւթելոյ. ո(ր)պ(էս) եւ հրամայեաց տ(է)ր մովսիսի։
⁶Եւ գործեաց զերկոսին ականսն զըմրուխտս՝ ժապաւինեալս եւ ընդելուզեալս ոսկւով, քանդակեալս եւ մածեալս ՛ի քանդակ կնքոյ. յանուանց որդւոցն ի(սրաէ)լի։
⁷Եւ հաստատեաց զնա ՛ի վերայ ուսոց վակասին, ականս յիշատակի որդւոցն ի(սրաէ)լի. ո(ր)պ(էս) եւ հրամայեաց տ(է)ր մովսիսի։
⁸Եւ արար զտախտակն գործ անկուածոյ նկարակերպ ըստ գործոյ վակասին, յոսկւոյ, եւ ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզոյ նիւթելոյ։

⁹Չորեքկուսի, եւ կրկին գործեաց զտախտակն. թզա́ւ յերկայնու(թ)ի(ւն)՝ եւ թզա́ւ ՛ի լայնութի(ւն)։
¹⁰եւ անկանէր ը(ստ) նմին անկուած ականակապ չորեքկարգեան ականց։ Կարգն առաջին՝ սարդիոն, եւ տպազիոն, եւ զըմրուխտ, կարգ մի։
¹¹Եւ կարգն երկրորդ, կարկեհան, եւ շափիզա, եւ յասպիս։
¹²Եւ կարգն երրորդ, սուտակ, եւ գոճազմ, եւ ակատ։
¹³Եւ կարգն չորրորդ, ոսկեա́կն, եւ եղունգն, եւ բիւրեղ. պատեալ եւ ընդելուզեալ ոսկւով։
¹⁴Եւ ականքն ըստ անուանց որդւոցն ի(սրաէ)լի էին. երկոտասանք յանուանց ն(ո)ց(ա) գրեալք եւ քանդակեալք. ը(ս)տ իւրաքանչիւր անուանց ազգացն երկոտասանից։

¹⁵Եւ արարին ը(ստ) տախտակաւն վերջս փողփողեալս ՛ի վ(ե)ր(այ) երկուց օղոցն. գործ հիւսկէն յոսկւոյ սրբոյ։
¹⁶Եւ արարին երկո́ւ վահանակս ոսկիս, եւ երկուս օղս ոսկիս. եւ եդին զերկու օղսն ոսկիս յերկոսին առաջս տախտակին։
¹⁷Եւ եդին զվերջսն փողփողեալս ՛ի վերայ երկուց օղոցն յերկոսին կողմանս տախտակին. եւ յերկոսին խառնուածսն զերկուս վերջս փողփողեալս. եւ եդին ՛ի վերայ երկուց վահանակացն, եւ զն(ո)ս(ա) եդին ՛ի վերայ ուսոց վակասին

¹⁸դէ́մ յանդիման յերեսաց կողմանէ։ Եւ արարին երկուս օղս ոսկիս, եւ եդին ՛ի վերայ երկոցունց թեւոցն ՛ի ծայրս տախտակին, եւ գլուխ թիկանց վակասին ՛ի ներքոյ կողմանէ։ Եւ արարին երկուս օղս ոսկիս, եւ եդին ՛ի վերայ երկոցունց ուսոց վակասին ՛ի ներքոյ կողմանէ յերեսաց ն(ո)ր(ա)՝ ը(ս)տ վերնոյ խառնուածոյն անկուածոյ վակասին։
¹⁹Եւ պնդեցին զտախտակն յօղից ն(ո)ր(ա) մինչեւ ցօղս վակասին, խառնեալ ընդ միմեանս ՛ի կապուտակէ. հիւսեալս ընդ միմեանս յանկուած վակասին, զի մի́ զերծանիցի տախտակն ՛ի վակասէ անտի. ո(ր)պ(էս) հրամայեաց տ(է)ր մովսիսի։
²⁰Եւ արարին զվտաւակն ՛ի վերայ վակասին, գո́րծ անկուածոյ համակ կապուտակ.

²¹եւ օձիք վտաւակացն անդէն ՛ի նորին ՛ի միջի անկուածոյ հիւսկէն՝ գրապանաւ օձիքն շուրջանակի անքակ։
²²Եւ արարին առ ստորոտով վտաւակացն իբրեւ ծաղկեալս նռնաձեւս ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, եւ ՛ի բեհեզոյ նիւթելոյ։
²³Եւ արարին զանգակս յոսկւոյ սրբոյ. եւ եդին զզանգակսն ՛ի մէջ նռնաձեւացն առ ստորոտով վտաւակացն շուրջանակի.
²⁴՛ի մէջ նռնաձեւացն զանգակս ոսկիս եւ նռնաձեւ. զանգակ եւ նռնաձեւ, առ ստորոտով վտաւակացն շուրջանակի ՛ի սպաս պաշտամանն. ո(ր)պ(էս) եւ հրամայեաց տ(է)ր մովսիսի։
²⁵Եւ արարին պատմուճանս բեհեզեղէնս գո́րծ անկուածոյ, ահարոնի եւ որդւոց ն(ո)ր(ա)։
²⁶եւ զապարաւշսն ՛ի բեհեզոյ. եւ զխոյրն ՛ի բեհեզոյ։

²⁷եւ զանդրավարտիսն տաբատ՝ ՛ի նիւթոյ բեհեզոյ։
²⁸Եւ զկամարս ն(ո)ց(ա) ՛ի բեհեզոյ նիւթելոյ, եւ ՛ի կապուտակէ, եւ ՛ի ծիրանւոյ, եւ ՛ի կարմրոյ մանելոյ, գո́րծ նկարուց. զոր օրինակ հրամայեաց տ(է)ր մովսիսի։
²⁹Եւ արարին զթիթեղն ոսկի նուէ́ր սրբութե(ա)ն յոսկւոյ սրբոյ. եւ գրեցին ՛ի նմա գիր դրոշմեալ քանդակաւ, սրբու(թ)ի(ւն) տ(եառ)ն։
³⁰եւ եդին առ կապուտակեայ ժապաւինեաւն. զի կացցէ ՛ի խուրին ՛ի վերոյ կողմանէ. զոր օրինակ հրամայեաց տ(է)ր մովսիսի։

³¹Եւ կատարեցաւ ա(մենայ)ն գործ խորանին՝ յարկի վկայութե(ան)։ եւ արարին որդիքն ի(սրաէ)լի ըստ ա(մենայ)նի ո(ր)պ(էս) եւ հրամայեաց տ(է)ր մովսիսի, նո́յնպէս եւ արարին։ Եւ զաւելորդ զոսկի նուիրացն՝ արարին կահ պաշտելոյ նոքօք առաջի տ(եառ)ն։
³²Եւ բերին զպատմուճանսն առ մովսէս ՛ի խորանն. եւ զյարկն՝ եւ զա(մենայ)ն զկահ նորա. զառանցսն եւ զտախտակս ն(ո)ր(ա). եւ զպարզունակս ն(ո)ր(ա). եւ զսիւնակս ն(ո)ր(ա). եւ զխարիսխս ն(ո)ր(ա)։
³³Եւ զմաշկսն. եւ զմորթս խոյոց ներկեալս կարմրով. եւ զվիժակսն կապուտակեայս։
³⁴եւ զսրահակն որ ծածկէր զտապանակ կտակարանացն. եւ զլծակսն.

³⁵եւ զքաւութի(ւն)ն. եւ զսեղանն զառաջաւոր, եւ զա(մենայ)ն զկահ նորա. եւ զհացն երեսաց։
³⁶Եւ զաշտանակն սուրբ. եւ զճրագարանս ն(ո)ր(ա), եւ զճրագունսն այրելոյ՝ եւ զա(մենայ)ն կահ նորա. եւ զեւղն լուսոյ։
³⁷եւ զսեղանն ոսկի. եւ զեւղն օծութե(ան). եւ զխունկսն հանդերձանաց։
³⁸Եւ զսրահակս դրանն, եւ զխորանն.
³⁹եւ զսեղանն պղնձի՝ եւ զլծակս ն(ո)ր(ա), եւ զա(մենայ)ն կահ ն(ո)ր(ա). եւ զաւազանն, եւ զխարիսխս նորա՝ եւ զառագաստ սրահին, եւ զսիւնակս ն(ո)ր(ա), եւ զխարիսխս ն(ո)ր(ա)։
⁴⁰Եւ զվարագոյր դրան խորանին, եւ զդրան սրահին. եւ զապաւանդակս ն(ո)ր(ա), եւ զցիցս ն(ո)ր(ա). եւ զա(մենայ)ն զկահ խորանին յարկի վկայու(թ)ե(ա)ն։

⁴¹Եւ զպատմուճանսն պաշտաման պաշտել ՛ի սրբու(թ)ի(ւն)սն. եւ զպատմուճան սրբու(թ)ե(ա)ն որ իցեն ահարոնի քահանայի. եւ զպատմուճանս որդւոցն ն(ո)ր(ա) ՛ի քահանայութի(ւն)։
⁴²Ըստ ա(մենայ)նի զոր միանգամ պատուիրեաց տ(է)ր՝ մովսիսի. նո́յնպէս եւ արարին որդիքն ի(սրաէ)լի զա(մենայ)ն զկազմածն։
⁴³Եւ ետես մովսէս զա(մենայ)ն գործն. եւ է́ր գործեալ ըստ օրինակին՝ որպէս հրամայեաց տ(է)ր մովսիսի, նո́յնպէս եւ արարին. եւ օրհնեաց զն(ո)ս(ա) մովսէս։

¹Եւ խօսեցաւ տ(է)ր ընդ մովսիսի՝ եւ ասէ։
²Յամսեանն առաջնում յամսամտի ամսոյն, կանգնեսցե́ս զխորանն զյա́րկ վկայութե(ա)ն։
³եւ դիցե́ս անդ զտապանակն վկայութե(ան). եւ ծածկեսցե́ս զտապանակն վարագուրաւն։
⁴եւ տարցի́ս ՛ի ներքս զսեղանն, եւ յօրինեսցե́ս զհացն ՛ի վերայ նորա. եւ տարցի́ս ՛ի ներքս զաշտանակն, եւ դիցե́ս ՛ի վերայ ն(ո)ր(ա) զճրագարանսն։
⁵Եւ դիցե́ս զսեղանն ոսկի՝ արկանել խունկս առաջի տապանակի վկայութե(ա)ն։ եւ ձգեսցե́ս զպատրուակ վարագուրին ՛ի դրան խորանին վկայութե(ան)։

⁶եւ դիցե́ս զսեղան ողջակիզացն՝ առ դրան խորանին յարկի վկայութե(ա)ն։ եւ օծցես շուրջ զխորանն. եւ զա(մենայ)ն ինչ որ ՛ի նմա իցեն՝ սրբեսցե́ս շուրջանակի։
⁷Եւ դիցես զաւազանն ընդ խորա́նն վկայութե(ան)՝ եւ ընդ սեղանն. եւ արկցե́ս անդ ջուր։
⁸եւ օծցե́ս զսրահն շուրջանակի. եւ ձգեսցե́ս զսրահակ դրան սրահին։
⁹Եւ առցե́ս զեւղն օծու(թ)ե(ան)՝ եւ օծցես զխորանն՝ եւ զա(մենայ)ն որ ինչ ՛ի նմա է. եւ սրբեսցե́ս զնա, եւ զա(մենայ)ն կահ ն(ո)ր(ա). եւ եղիցին սրբութի(ւն)ք։
¹⁰Եւ օծցե́ս զսեղանն ողջակիզաց՝ եւ զա(մենայ)ն կահ ն(ո)ր(ա)։
¹¹եւ սրբեսցե́ս զսեղանն, եւ եղիցի սեղանն՝ սուրբ սրբութե(ան)ց։ եւ օծցե́ս զաւազանն, եւ զխարիսխս ն(ո)ր(ա), եւ սրբեսցե́ս զնա։

¹²Եւ մատուսցես զահարոն եւ զորդիս ն(ո)ր(ա) ՛ի դուռն խորանին վկայու(թ)ե(ան). եւ լուասցես զն(ո)ս(ա) ջրով։
¹³եւ զգեցուսցե́ս ահարոնի զպատմուճանն սուրբ. եւ օծցե́ս զնա, եւ սրբեսցե́ս զնա, եւ քահանայասցի́ ինձ։ Եւ մատուսցե́ս զորդիս ն(ո)ր(ա), եւ զգեցուսցե́ս ն(ո)ց(ա) պատմուճան. եւ օծցե́ս զնոսա զորօրինակ օծեր զհայրն ն(ո)ց(ա), եւ քահանայասցի́ն ինձ. եւ եղիցի նոցա օծումն քահանայութե(ան) յաւիտեան յազգս նոցա։
¹⁴Եւ արա́ր մովսէս ըստ ա(մենայ)նի, զոր միանգամ պատուիրեաց նմա տ(է)ր, նո́յնպէս եւ արար։
¹⁵Եւ եղեւ յամսեանն առաջնումյամի երկրորդի ելանելոյ ն(ո)ց(ա) յերկրէն եգիպտացւոց, յամսամտին, կանգնեցա́ւ խորանն։

¹⁶Եւ կանգնեա́ց մովսէս զխորանն, եւ եդ զխարիսխս ն(ո)ր(ա), եւ կանգնեաց զսիւնս նորա. եւ ե́դ ՛ի վերայ զխոյակս նորա։
¹⁷եւ պարզեաց զպարզունակս ն(ո)ր(ա). եւ տարածեաց զվերնափեղկսն ՛ի վ(ե)ր(այ) խորանին. Եւ ա́րկ զվիժակս խորանին ՛ի վերայ ն(ո)ր(ա) ՛ի վերուստ։ եւ յօրինեաց զարտախուրակս ն(ո)ր(ա). ո(ր)պ(էս) հրամայեաց տ(է)ր մովսիսի։
¹⁸Եւ ա́ռ զվկայութի(ւն)սն՝ եւ ե́դ ՛ի տապանակի անդ. եւ ե́դ զնիգսն ընդ տապանակաւն. եւ ե́դ զքաւութի(ւն)ն ՛ի վերայ տապանակին ՛ի վերուստ։
¹⁹Եւ տարա́ւ ՛ի ներքս զտապանակն ՛ի խորանն. եւ ձգեա́ց զպատրուակ վարագուրին, եւ ծածկեա́ց զտապանակն վկայութե(ան)՝ զորօրինակ հրամայեաց տ(է)ր մովսիսի։

²⁰Եւ ե́դ զսեղանն ՛ի խորանին վկայու(թ)ե(ան) ՛ի հիւսւսոյ կողմանէ խորանին, արտաքոյ վարագուրին ՛ի խորանին։
²¹եւ յօրինեաց ՛ի վերայ նորա զհացն երեսաց առաջի տ(եառ)ն, զորօրինակ հրամայեաց տ(է)ր մովսիսի։
²²Եւ ե́դ զաշտանակն ՛ի խորանին վկայու(թ)ե(ան) յանդիման սեղանոյն, ՛ի հարաւոյ կողմանէ խորանին։
²³եւ ե́դ զճրագարանսն ՛ի վերայ ն(ո)ր(ա) առաջի տ(եառ)ն, զորօրինակ հրամայեաց տ(է)ր մովսիսի։
²⁴Եւ ե́դ զսեղանն ոսկի ՛ի խորանին վկայու(թ)ե(ան)՝ յանդիման վարագուրին.
²⁵եւ արկ խունկ ՛ի վերայ նորա ՛ի խնկոցն հանդերձանաց, ո(ր)պ(էս) հրամայեա́ց տ(է)ր մովսիսի.
²⁶եւ ձգեաց զսրահակ դրան խորանին։

²⁷Եւ ե́դ զսեղանն ողջակիզաց առ դրան խորանին յարկի վկայութե(ա)ն. եւ եհան ՛ի վ(ե)ր(այ) ն(ո)ր(ա) ողհակէզս եւ զոհս, ո(ր)պ(էս) պատուիրեաց տ(է)ր մովսիսի։
²⁸Եւ ե́դ զաւազանն ընդ խորանն վկայու(թ)ե(ան) եւ ընդ սեղանն, եւ արկ ՛ի նա ջուր.
²⁹զի լուասցեն ՛ի նմանէ մովսէս եւ ահարոն, եւ որդիք ն(ո)ր(ա) զձեռս եւ զոտս իւրեանց,
³⁰յորժամ մտանիցեն ՛ի խորանն վկայութե(ան), կամ յորժամ մերձենայցեն ՛ի սեղանն պաշտել։ եւ լուանային ՛ի նմանէ, որպէս եւ հրամայեաց տ(է)ր մովսիսի։
³¹Եւ կանգնեաց զսրահն շուրջ զխորանաւն եւ զսեղանաւն. եւ ձգեաց զսրահակ դրան սրահին։ եւ կատարեաց մովսէս զա(մենայ)ն զգործն։

³²Եւ ծածկեաց ամպն զխորանն վկայութե(ան). եւ լի́ եղեւ փառօք տ(եառ)ն խորանն։
³³եւ ո́չ կարէր մովսէս մտանել ՛ի խորանն վկայութե(ան), զի ծածկեաց զնա ամպն, եւ լի́ եղեւ խորանն փառօք տ(եառ)ն։
³⁴Յորժամ վերանայր ամպն ՛ի խորանէ անտի, չուէին որդիքն ի(սրաէ)լի հանդերձ ա(մենայ)ն աղխիւ իւրեանց։
³⁵Եւ եթէ ոչ վերանայր ամպն՝ ո́չ չուէին մինչեւ ցօրն վերանալոյ։
³⁶Զի ամպն տ(եառ)ն է́ր ՛ի վերայ խորանին ՛ի տուէ. եւ հո́ւր կայր ՛ի վերայ ն(ո)ր(ա) ՛ի գիշերի. առաջի ա(մենայ)ն որդւոցն ի(սրաէ)լի, յամենայն ՛ի չուս իւրեանց։